احد عنده معرفه عن فتحات القلب عند الاطفال او تجربه لاسمح لله

[Rayane]

السلام عليكم ورحمة الله

مبروك عليكم الشهر ولو انها متاخره. ونسال الله انه يتقبل طاعاتنا واياكم.

الموضوع يطول لي في عماركم.

عندي بنت انولدت ومعها فتحتين فالقلب جعلكم ماتشوفون شر. وامورها طيبه. وعلى مواعيد مستشفى حمد وكل شي تمام.

البنت عمرها الحين تقريباً 3 سنين. واخر موعد قرروا عليها قصطره حتى يسكرون الفتحات.

تساؤلات . هل احد قد مر فالموقف هذا مع مستشفى حمد. هل النتيجه مضمونه بعد مشيئة الله.

هل الحل نهائي يعني تتسكر الفتحات وخلاص انتهينا.

تنصحوني اوافق والا اسعى في سفر خارج الدوحه.

الله يعطيكم العافيه ويجزاكم عني كل خير ولا يبتليكم.

[هارون الرشيد]

وعليكم السلام ... ماتشوف شر أنشاء الله

بخصوص الفتحات في القلب ...يسمونها ( ثقب في القلب ) ويسمى في اللغة الانجليزية pfo

يا يكون الثقب في الاذين أو يكون في البطين في القلب . والقسطرة تسستخدم لسد الثقب . واسم القطعة المعدنية المستخدمة في سد الثقب هيه Amplatzer

طبعاا من وجهت نظري لازم تعرفون نوع وطريقة العملية . وفي نفس الوقت أطلبو عرض على اللجنه

[وحش قطر]

عندي واحد من الربع مسوي العملية حق ولده في الهند اذا تبي رقمه كلمني على الخاص

[وليف الشوق]

ماانصح قسطره القلب في هالعمر هذا الا بعد مرور سنه من التحاليل والاشعات اذا تبين ان الثقوب لازالت موجوده
وانصحك بعدم الاستعجال في موضوع القسطره الا بعد وجود وثبوت اثار جانبيه للطفل تعيقه وبحالات نادره ودقيقه قم بالموافقه على القسطره ولكن في الوقت الحالي وعدم مرور سنه من الولاده لاانصح بها ويمكن استشارة طبيب متخصص في هذه الامور

[aziz4z]

و عليكم السلام و رحمة الله أخوي , مبارط عليكم الشهر كذلك
عندي تجربة من واحد قريب , ولده كان عنده فتحة في القلب , و انتظروا كم سنة لين سووا العملية في مستشفى حمد , و الحمد لله نجحت العملية

[بنت مريخ]

ماتشوف شر ان شاءالله
ولدي نولد و فيه 3 فتحات
و يراجع عند الدكتور دلاوار ف حمد كل سنه
الحمدلله تصكرو الا وحده
الحين عمره 6 سنوات

[بوعلاوي]

ولد عمي قالي مستشفى الامريكي في تايلاند يمدحونه

[aloosh]

السلام عليكم
عندي حفيدي الله يحفظه انولد عنده فتحه
وراجعنا استشاري والحمدلله طمنا انها بعد سنة راح تسكر ان شاء الله

اذا تنفسها طبيعي لا تخاف اخوي وان شاء الله تسكر شوي شوي

الله يشافيها ويعافيها ان شاء الله

[Rayane]

السلام عليكم.

مشكورين على التفاعل.

بالنسبه للحاله. البنيه قد عمرها 3 سنين. واخر موعد نصحونا بالقسطره لانه صار تضخم في الاذين الايمن والبطين الايمن.

الفتحات بين الاذينين. وحده 8 ملي والثانيه 2 ملي.

مثل ماتشوفون. صار لنا صابرين 3 سنين مع الدكتور محمد ديلاور.

الحين. من تجربه. تنصحونا فالقسطره هنا ولا سفر للخارج.

مشكورين على التفاعل للمره الثانيه.

وحفظنا الله وياكم وحفظ لنا ولكم

[Rayane]

عمرها 3 سنين

[عاشق العديد]

نصيحه لك ياخوي ،،

فالبدايه الله يشافيها يارب ..

عندي ولد خالتي عنده صغر فصمام القلب من انولد وتعالج فحمد بهدلوه قصو له صدره وكل خمس سنين يراجع يقولون له ترا خطر عليك لازم نفتح العمليه مره ثانيه واخر شي قام يرفض يسوي شي في حمد قام وتعالج عند دكتور في امريكا اسمه زاك في مستشفى في لوس انجلوس كالفورنيا دكتور جدا ممتاز وراح ع حساب الدوله واموره حاليا طيبه فنصيحه لوجه الله روح عالجها برع لاتسلمها لحمد ولو تبي معلومات عن المستشفى والدكتور بيب لك رقمه او ايميله ،،

والله يشافيها يارب وللعلم مستشفى حمد كانو يبون يدربون دكاتره ع ولد خالتي تخيل يقولون له بنسوي لك العمليه في جامعة في شيكاغو وقدام طلبه قطرين يدرسون طب قالهم انا مش فار تجارب تجربون علي

فا انتبه ياخوي والله يشفيها لك ويخليها ومثل ماقلت لك تبي اي معلومه عطني خير

[Rayane]

انا لله وانا اليه راجعون. تستاهلون سلامته.

اذا تقدر تجيب ايميله اكون شاكر لك ياخوي.

[الكفــــــو]

نصيحة لك خاطب مستشفى ( رش ) - خاص بعمليات القلب وخصوصا

الأطفال في شيكاغو - الولايات المتحدة ..

ولا تخطي الدكتور / زياد حجازي - أردني / أمريكي ( كان في قطر وهمشوه )

واذا تبي رقم جوال رئيس مكتب علاقات المرضى بذات المستشفى أرسل لي

رقمك على الخاص ( لأن لا أستطيع أرسل ) ..

وبالختام .. ( عليك بالطب النبوي والإرشادات والقراءات قبل طب البشر )

وأسأل الله أن يبلغكم في مريضكم الصلاح والفلاح والعافيه والعُمر المديد في طاعة الله ..

[وطن]

استخيروا الله سبحانه

ما عليها شر
والله يطمنكم عليها

[قدام]

لندن او ألمانيا كيف العلاج هناك بنفس المشكله ( لشاب عمره 20 سنه )

شكراا

[الهديل]

لا انصح بحمد لامراض القلب اطلاقا
سافر مع بنتك لاي دولة متقدمة افضل
لا تسلمها لناس اغلب العمليات الي عملوها فاشله