كمية الحقد على قطر واهلها

[CaTaLuNy]

السلام عليكم ورحمة الله وبركاته, تقبل الله صيامنا وصيامكم يا اهل قطر.. زمان والله عن المنتدى واخبار اهل قطر طبعا اخوكم في الغربة ادرس وبعيد عن اهلي واخواني في دوحة الخير هذا تقريبا اول رمضان لي اقضيه خارج قطر وبعيد عن الاهل , حتى رمضان ماله طعم هنا مع الاسف والصوم في البلد اللي ادرس فيها جدا صعب ومع الاسف مناظر لاتليق فينا كعرب مسلمين لدرجة انه الناس ماتصوم الله المستعان. صادفتني مواقف كثيرة هنا خلت قطر تكبر في عيني اكثر واكثر بمرور الشهور والسنين فوق ماهي كبيرة..

طبعا انا ادرس في مدينة جامعية صغيرة والواحد لازم يصادف اشكال وانواع من الناس مهما حاولت تتجنب هالنماذج هذي واحيانا تكون مجبور تقابلهم في قعدات معينة لان المدينة صغيرة, من خلال قعداتي لاحظت ناس جاية من بلد اتحفظ على ذكر اسمها, هالناس هذي فيها كمية حقد عجيبة وغريبة على قطر ساعات يحسووني انه قطر ضارة اهاليهم ولا سارقة حلالهم وقطر مو دارية عنهم ولا هي بحاجتهم الحمدلله, يعني حاجة تغبني انا شخصيا مهما حاولت اتجاهلها صحيح اني عراقي بس تظل قطر بمقام ديرتي والله ومستحيل ارضى واحد يجيب طاريها بسوء او يذمها بحضرتي, يجونك بعد ناس تستفز من تحت لتحت وتعطيك نغزات بشكل مو مباشر بكلام مثل "قطر شلون استضافت كاس العالم - قطر صغيرة وشايفة نفسها - راشين الفيفا -" الـخ وكلام ثاني الواحد يستحي يحطه والله من تفاهته, لحد ما صادفني موقف من كم يوم واحنا في ايام الشهر الفضيل صيام, شخص ماعرفه لكن حاول يستفزني بشكل غير مباشر مجرد ماعرف اني عايش بقطر وصلت معاي اني اطلب منه بكل ادب انه مايجيب طاري قطر على لسانه لكن الرجال تمادى وانا صايم وحيل مشتاق لاهلي وفترة اختبارات فاينل ومع هالاستفزاز صرت نار كبره من الداخل وصار اللي صار.. حاليا كل تفكيري اني اخلص اختبارات وارجع الدوحة واشوف اهلي, مع انه بودي والله احجز اليوم قبل باجر حتى الاختبارات كان ودي اسحب عليها بس مابي اضيع وقت ابي اخلص عالسريع واتخرج عشان ارتاح من الغربة وهمها..

اعتذر اني طولت بس والله ياخوان قطر ضاغطة كثير ناس وخلتهم حاقدين عليها بشكل اعمى وبدون سبب يذكر واحنا ما شفنا منها الا كل خير وعز, ماتتخيلون ابدا كمية الحقد اللي شفتها وربي ماتنوصف, عالم مريضة ميتين قهر مو شايفة خير والتربية هم تلعب دور, والله الواحد يحمد ربه ويشكره الف مرة انه عاش وتربى بهالديرة ولو ترجع بي السنين والله حتى دراسة خارج قطر مافكرت فيها واعض على اصابعي من الندم اني قررت ادرس برى لكن الحمدلله على كل حال.. دام عزج ياقطر وتقبل الله منا ومنكم صالح الاعمال..

[aloosh]

وانت جاي تثير الفتن المبطنه

[CaTaLuNy]

وانت جاي تثير الفتن المبطنه
رايك واحترمه اخوي لكن اقسم بالله واحنا بايام شهر فضيل انه الموضوع ماطرحته بهدف اني اثير فتنة.. واذا كان الموضوع مخالف فانا اعتذر واتمنى من الاخوة المراقبين يشيلونه..

[دايموند]

فتنة بين من ومن؟ هو اصلا ماذكر الجنسيه !!

[شموخ دائم]

,

,

مرحبا


اخوي الكريم

العلاقات بين الدول والسياسه و ( الاعلام ) هو من يحرك و ( يلعب ) بعواطف الناس

وطول عمر الدنيا وهي ما تثبت على حال بسبب السياسه وبسبب الطائفيه ومن يحركها

عادي الي يحبك يصير بكم برنامج بالتلفزيون يصير ( عدوك )

واحنا كـ عرب ما نتقبل ( الاختلاف ) نهائيا في الافكار والتوجهات

قطر طول عمرها والحمدالله واياديها ( بيضاء ) هذي بلد خير وخيرها واصل كل مكان

ودائما مع الحق ومن قديم الزمن يقولون كلمه الحق ( تزعل )

ومن الواجب ان تعرف ان مايقال في الاعلام او من يتبع هذا الاعلام مجرد ( كلام ) في الهوى

وعمر الكلام ما يضر الدول ولا يغير مواقف الرجال

ولا تشغل نفسك بهذا الكلام لانه كلام فاضي لايودي ولا يجيب

قطر دوله صغيره و ( افعالها ) كبيره

والحمدالله ماشيه وطموحها اكبر من الجبال

( وتطمن ترى الي تسمعه بكره بيتغير الى غزل ومدح في قطر )

والايام تثبت لك ان شاء الله

ان غدا لناظره لقريب

انت تدرس في جامعه

والدنيا مدرسه كبيره وراح تتعلم منها الكثير

نفس الي يحسد ويكره ويحقد هو نفسه راح يتغزل اذا صادف مصلحته بالغزل

:)

ركز بدراستك ولا تشغل نفسك في ( نقاشات ) ما منها أي فايده وراح تضيع وقتك

استثمر وقتك في كل ماهو ( مفيد ) لك ولقطر

:)


,

,

[دنيا الاسهم]

وين تدرس لو سمحت اي دولة

[ضوى]

اذا قطري يحسد على هل قطر على رواتبهم والخير اللي هم فيه تبي الغريب مايحقد !

الله يرد كيدهم في نحرهم ويشغلهم بانفسهم

[حرف]

اذا قطري يحسد على هل قطر على رواتبهم والخير اللي هم فيه تبي الغريب مايحقد !

الله يرد كيدهم في نحرهم ويشغلهم بانفسهم

ولاتنسين بعد القطريين الي حاسدين المدرسين والمدرسات على الاجازة الصيفية

[معماري قطري]

نصيحتي لك اخوي كتلوني وانا متأَكد من صحة كلامك ومشاعرك الطيبة

انا مريت بمثل هالظروف في بداية دراستي وبداية ما تسمى الغربة .. كان المزاج مشوش وكنا نتناقش ونتحاور دوم مع ناس عايشين في قطر ويسبونها بطريقة غير مباشرة .. بعد الاستقرار والقبول بالواقع والاندماج مع الكل يتغير كل شيء ويستوي احترام متبادل.

صحيح كنا نضحك ونعلق على بعض بلهجات بعض .. يعني محد سلم من حد .. أهل الخليج أهل بلاد وحدة .. كنا نسلم على شباب الكويت ونسولف بلهجتهم وكلنا نضحك ضحك بريء .. تجينا أَوقات نطلع مع بعض ونجتمع شلة من تقريباً كل دول الخليج .. وصدقني يكونون معانا أوقات لبنانيين وفلسطينيين وصارت أحداث احتلال الكويت .. وهالوقت كان صعب علينا كلنا لكن كانت علاقاتنا شيء ثانوي وبعيد عن هذي الأُمور.

نصيحتي لك لتفكر في التخرج كثر ما تفكر شكثر تستفيد .. ولو المدينة ما عجبتك من البداية غير لمدينة ثانية .. انا غيرت من سياتل - معهد اللغة اي ال اس اعتقد .. الى تاكوما - تاكوما كومينتي كولج .. الى هايلاين كوميونتي كولج .. ومنها الى ميامي - جامعة ميامي .. حصلت القبول قبل بدء الدراسة باسبوع تقريباً وبسرعة بسرعة ترست سيارتي بالأغراض وطلعت الليل بعد ما خلصت آخر امتحان .. قطعت انا وواحد من الاخوان يمني بس عايش في الامارات .. قطعنا حول 5000 ميل على 5 أَيام من أَقصى الشمال الغربي لأَقصى الجنوب الشرقي .. بدون جي بي اس ذاك الوقت واذكر 3 مرات 24 ساعة بدون توقف الا لوجبة سريعة أو بترول .. وبتنا ليلة في كولورادو وليلة في اتلانتا وبس.

كل اخواننا وقت الدراسة نذكرهم بالخير ومنهم صدقني ناس للحين متواصل معاهم وضد سياسة بلادنا هم ويقولونها صريحة .. انا ببساطة ردي دوم انا ما اتدخل في هذي الامور ولا ادري بها .. البعض خصوصاً في الفراغ ووقت الدراسة يبون يلهون بأَي شيء ومن يحصلون حد يتأَثر ويجاريهم ويتفاعل يضغطون عليه .. خصوصاً لو كان هو القطري الوحيد .. شوف لك بلدة أو مدينة فيها ناس من العراق وناس وايد من قطر وبتتغير نظرتك وبترتاح وبتحب البلاد والدراسة.

سو جدول اسبوعي وخل لك فعاليات تسويها .. وجدول يومي حتى برامج التلفزيون في البلد اللي انت فيها تابعها .. اعتمد على نفسك وابتعد عن مثيري السوالف الفاضية.

الله يوفقك وسامحني على التطويل وطمنا عنك بعد فترة شصار معاك

[H H]

يبيلنا احد يرد ويرفع موضوع الاداره بخصوص (النغزات) في الردود.

عموماً , نرجع للموضوع , هالشي عادي جداً ياخوي , وتشوفه فكل مكان , وموب ضد قطر فقط , ضد اغلب الدول (المستقره).

الله يوفقك فدراستك وتسلم على غيرتك.

[وحيد-الشوق]

احيي فيك غيرتك وحبك لقطر ياخوي شيء حلو ان الانسان حتى لو ماكان ينتمي لجنسية البلد المقيم فيها لكن مايرضى بتشويه سمعته

الله يوفقك في دراستك وربي يعينك عالغربة

[نوفا91]

مبارك عليك ماتبقى من رمضان اخوي :)

[POINT]

ماخاب فيك الطيب اخي الكريم و اهلًا بك بين اهلك وناسك

اعرف كثير يتحاشى ذكر انه من قطر او عايش في قطر خصوصا فالغربة خوفا من المشاكل و قلة أدب بعض اخواننا العرب و أسالتهم البايخة النابعة من حقد و غل و حسد.

العيون كلها على قطر
ياريت المسؤولين يهتمون اكثر بتنمية الموارد البشرية القطرية ويخففون من عقده الاجنبي الخبير

الفرد القطري / القطرية هم عَصّب و عماد المستقبل.
بسنا اجانب تجي تسحب فلوس، تشتم، وتطلع مع الريح و تكمل شتم في بلادها وفالغربة!

الاستثمار الناجح والدائم هو الفرد القطري في قطر

اسأل الله ان يحفظ هذا البلد الطيب و قيادتة الحكيمة و شعبة الكريم من كل سوء

[qatarman8008]

مرحبا فيك اخوي..
نتشرف بوجودك بهالمنتدى وبطرحك للمواضيع اللي تهم كل مواطن ومقيم على ارض هالبلد الطيب..
اولا.. مثل هالعبارات نسمعها كثيرا خارج دولة قطر من ناس يبحثون عن مصالح ويروجون لدعايات ليس لها هدف سوى الفتنة..
بعض الناس يكون مظلل اصلا وبعضهم يكون واعي ولكنه قد بدت البغضاء من فيه وما يخفي صده اكبر..
ثانيا.. لا تحتاج لان ترد عليه الا بعبارة روح الله يعطيك على قد نيتك.. واسكت عنه..
لان الحوار هنا عقيم .. يدخلك في مشاكل والفاظ لاتحب ان تقولها اصلا وقد تكبر حلقة هذه المشاكل الى مستوى انت في غنى عنه..
انت طالب جامعي.. رايح تدرس وترجع بالسلامة..
ثالثا.. اشكرك على وقفتك الجريئة ونيتك الطيبة واتمنى ان يوفقك الله في دراستك وان تعود الى اهلك سالما غانما..

[JN000N]

الحسد صار بينا
ف ما بالك من الدول اللي حولنا

نظفو قلوبكم :)

[حسن]

رايك واحترمه اخوي لكن اقسم بالله واحنا بايام شهر فضيل انه الموضوع ماطرحته بهدف اني اثير فتنة.. واذا كان الموضوع مخالف فانا اعتذر واتمنى من الاخوة المراقبين يشيلونه..

مرحبا ياكتالوني

اوافقك الراي بحذف الموضوع خيرا فعلت

وان شاء الله المراقبين بيقومون بالواجب
فعلا
الموضوع ليس له اي هدف الى اثاره فتنه وفي وقت احنا ممحتاجين التكاتف
اتعاطف معك واشكرك لغيرتك

تحياتي لك

[رهج السنابك]

تعلم تكون ابرد في هالمواقف
عادي جدا تعودت لما اسافر برا اسمع التعليقات وخاصه على قناة الجزيرة

مايخصني اضحك معاهم واقول لا صج؟ انزين وبعد شنو عندكم
جذي تقهرهم زياده
هم هدفهم يستفزونك وتحس بحقد في قلبهم اذا انت استفزيت بيستانسون انت خلك العكس ابتسم وشاركهم بيموتون قهر ولا بيرجعون يتكلمون

بالاخير مثل ماقال شموخ دائم الشعب يتأثر عاطفيا بالسياسة

[qtr qtr]

في ردود سبحان الله اذا الواحد تكلم بشي صحيح قالوا عنه حسود وحقود على اخوه القطري ..

يقول الله سبحانه: (يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ إِنَّ بَعْضَ الظَّنِّ إِثْمٌ)
ويقول النبي - صلى الله عليه وسلم -: (إياكم والظن فإن الظن أكذب الحديث) متفق على صحته .

http://www.binbaz.org.sa/audio/noor/031109.mp3

[qtr qtr]

اما موضوعك اخوي اتبع طنش تعش تنتعش .. ودع القافلة تسير والكلاب تنبح .. واهتم في دراستك ولا تعطيهم اي اعتبار .

[طبيب قطري]

الموضوع يحذف افضل
ومبارك عليكم الشهر

[roma27]

السلام عليكم اخوي عادي هذي التعليقات نسمعها وحنا بره الديره وأحيانا نسمع العكس اذا عرفوا ان حنا من قطر نسمع المدح و الكلام الي يرفع الرأس بس اغلب المقيمين الي عايشين في قطر يمدحون ويشكرون في قطر اذا كانوا خارج البلد اعر ف ناس كثير من مصر والسودان وهم خارج قطر يشكورن في قطر حكومه وشعب

[sweet qatar]

الموضوع يحذف افضل
ومبارك عليكم الشهر

وليش يحذف.. الأخ ما تكلم إلا عن واقع !


أخوي كاتالوني .. عسي الله يوفقك في دراستك ويحفظك من كل شر

مثل هالامور لازم تطور من نفسك وشخصيتك عشان تتعامل معاها

ومثل ماذكرت الارستقراطية لاتكون أبدا سهل الانفعال

أقدر مشاعرك و أحييك عليها .. هذا من طيب اصلك

الي يسب ويشتم .. مهما تتحاور معاه وتناقشه بيستمر

رد عليهم رد يسكتهم

يحرجهم مع اني ماظن عندهم إحساس هم متروسين إعلاميا و مقهورين واقعيا

والأفضل تتجنب هالاشكال .. و تبتعد عن مجلسهم

[CaTaLuNy]

نصيحتي لك اخوي كتلوني وانا متأَكد من صحة كلامك ومشاعرك الطيبة

انا مريت بمثل هالظروف في بداية دراستي وبداية ما تسمى الغربة .. كان المزاج مشوش وكنا نتناقش ونتحاور دوم مع ناس عايشين في قطر ويسبونها بطريقة غير مباشرة .. بعد الاستقرار والقبول بالواقع والاندماج مع الكل يتغير كل شيء ويستوي احترام متبادل.

صحيح كنا نضحك ونعلق على بعض بلهجات بعض .. يعني محد سلم من حد .. أهل الخليج أهل بلاد وحدة .. كنا نسلم على شباب الكويت ونسولف بلهجتهم وكلنا نضحك ضحك بريء .. تجينا أَوقات نطلع مع بعض ونجتمع شلة من تقريباً كل دول الخليج .. وصدقني يكونون معانا أوقات لبنانيين وفلسطينيين وصارت أحداث احتلال الكويت .. وهالوقت كان صعب علينا كلنا لكن كانت علاقاتنا شيء ثانوي وبعيد عن هذي الأُمور.

نصيحتي لك لتفكر في التخرج كثر ما تفكر شكثر تستفيد .. ولو المدينة ما عجبتك من البداية غير لمدينة ثانية .. انا غيرت من سياتل - معهد اللغة اي ال اس اعتقد .. الى تاكوما - تاكوما كومينتي كولج .. الى هايلاين كوميونتي كولج .. ومنها الى ميامي - جامعة ميامي .. حصلت القبول قبل بدء الدراسة باسبوع تقريباً وبسرعة بسرعة ترست سيارتي بالأغراض وطلعت الليل بعد ما خلصت آخر امتحان .. قطعت انا وواحد من الاخوان يمني بس عايش في الامارات .. قطعنا حول 5000 ميل على 5 أَيام من أَقصى الشمال الغربي لأَقصى الجنوب الشرقي .. بدون جي بي اس ذاك الوقت واذكر 3 مرات 24 ساعة بدون توقف الا لوجبة سريعة أو بترول .. وبتنا ليلة في كولورادو وليلة في اتلانتا وبس.

كل اخواننا وقت الدراسة نذكرهم بالخير ومنهم صدقني ناس للحين متواصل معاهم وضد سياسة بلادنا هم ويقولونها صريحة .. انا ببساطة ردي دوم انا ما اتدخل في هذي الامور ولا ادري بها .. البعض خصوصاً في الفراغ ووقت الدراسة يبون يلهون بأَي شيء ومن يحصلون حد يتأَثر ويجاريهم ويتفاعل يضغطون عليه .. خصوصاً لو كان هو القطري الوحيد .. شوف لك بلدة أو مدينة فيها ناس من العراق وناس وايد من قطر وبتتغير نظرتك وبترتاح وبتحب البلاد والدراسة.

سو جدول اسبوعي وخل لك فعاليات تسويها .. وجدول يومي حتى برامج التلفزيون في البلد اللي انت فيها تابعها .. اعتمد على نفسك وابتعد عن مثيري السوالف الفاضية.

الله يوفقك وسامحني على التطويل وطمنا عنك بعد فترة شصار معاك
الله يوفقنا وياك يارب واشكرك على نصايحك الثمينة اخوي وهذا اللي قاعد اسويه اوقات فراغي دائما اشغلها بالنادي واتكي مع شباب قطر او ناس اجانب طيبة وقلوبها صافية اما باقي العرب مع الاسف اقولها مايتعاشرون.. اذا الله كتبلي عمر بوافيكم باذن الله بخبر تخرجي ولي رجعة عالموضوع لين ذاك الوقت اذا الله احيانا.


ماخاب فيك الطيب اخي الكريم و اهلًا بك بين اهلك وناسك

اعرف كثير يتحاشى ذكر انه من قطر او عايش في قطر خصوصا فالغربة خوفا من المشاكل و قلة أدب بعض اخواننا العرب و أسالتهم البايخة النابعة من حقد و غل و حسد.

العيون كلها على قطر
ياريت المسؤولين يهتمون اكثر بتنمية الموارد البشرية القطرية ويخففون من عقده الاجنبي الخبير

الفرد القطري / القطرية هم عَصّب و عماد المستقبل.
بسنا اجانب تجي تسحب فلوس، تشتم، وتطلع مع الريح و تكمل شتم في بلادها وفالغربة!

الاستثمار الناجح والدائم هو الفرد القطري في قطر

اسأل الله ان يحفظ هذا البلد الطيب و قيادتة الحكيمة و شعبة الكريم من كل سوء
آمين يارب. انا عندي قناعة تامة انه اي واحد ماكل من خير قطر وعاش وتربى فيها ولو لفترة قصيرة استبعد والله يجيب طاريها بسوء او يذمها وان حدث غير هالشي فهو ناكر جميل واصل ومايغزر فيه مع الاسف, انا كلامي كان عن الناس اللي قطر لاجنبهم ولا حوليهم ومع ذلك نفوسهم متروسة حقد وكراهية.


تعلم تكون ابرد في هالمواقف
عادي جدا تعودت لما اسافر برا اسمع التعليقات وخاصه على قناة الجزيرة

مايخصني اضحك معاهم واقول لا صج؟ انزين وبعد شنو عندكم
جذي تقهرهم زياده
هم هدفهم يستفزونك وتحس بحقد في قلبهم اذا انت استفزيت بيستانسون انت خلك العكس ابتسم وشاركهم بيموتون قهر ولا بيرجعون يتكلمون

بالاخير مثل ماقال شموخ دائم الشعب يتأثر عاطفيا بالسياسة
هذا الاسلوب اللي دائما اتبعه وغالبا اكون بارد لدرجة اللي قدامي يقفل الموضوع من غير رجعة بس ساعات الواحد في لحظة ينفجر ويمكن عشان الصيام وفترة اختبارات اثرت علي لكن بحاول باذن الله قدر الامكان اني اتجنب هالناس, عندي قعدة البيت ارحم بمليون مرة من اني اجالس ناس من هالنوعية.


اعتذر اذا الموضوع سبب حساسية بين الاخوة بس ساعات الواحد يحب يفضي اللي بداخله, شكرا لكل اللي ردوا ماقصرتوا يعطيكم العافية.

[مخطط قطري]

كل ذي نعمه محسود ,,,, مشكلتهم تعدو مرحله الحسد وصارو يحقدون ويتمنون لنا العثره والشر لانه قلوبهم مريضه وتربيتهم فاشله ارفع نفسك عنهم وبلادنا باذن الله من نجاح لين نجاح اكبر وخير اللهم لك الحمد والمنه والحسد يقتل صاحبه هو مقهور ومنبطهً جبده خله ف هالحال واردى

[ريتويت]

علي قوله ماجد الصباح الخير مقبل