البياره استفسار

[الدبلوماسي]

السلام عليكم
صارت لي مشكله بين المقاول والاستشاري بخصوص بياره المجاري اعزكم الله
المقاول حفر للبياره وبنى من غير اعمده وأساسات ومن غير وتر بروف تحت
يوم شافه الاستشاري وقفه وقاله يهدم الشغل كله لان بدون اساسات ولا اعمده
ناس قالوا لي عادي البياره مالها اساسات ولا اعمده وانا حاليا محتار .

[مهاجر]

انا خبرتي بسيطه لكن اللي شفته فالبنيان عندي انهم يصبون خرسانه للقاعده والاطراف وطبعا مع العازل عشان يمنع التسريب ولا يضر بيتك ...

والاخوان بيفيدونك اكثر

[$الملياردير$]

هلا اخوي مواصفات إدارة الصرف الصحي بأشغال انها تكون أصلا من الخرسانة كاملة ... بس جرت العادة بين المقاولين وبعض الناس الملاك عمل جسر ارضي مربع الشكل او مستطيل وًتزع فيه أعمدة أربعة في كل زاوية بارتفاع المحدد وبعدها يتم صف الطابوق في الحوائط ويتم صب السقف أيضاً خرسانة بعد عمل النجارة و الحديد وً التأكد من مقاس فتحات الغطاء الحديدي ... واعتقد انهم يهدفون ان يعض المياه اللي مجتمعه في السبتي تانك لازم تتسرب خلال التربة عن طريق الطابوق حتى لا يمتلئ بسرعة .. بس لازم يكون مكان السبتي تانك قريب من السور او الباب عشان الشفط أعزكم الله و يجيب ان يكون السقف مدعم و خرساني عشان السيارات .... هذا و العلم عند الله ..... اخوي معماري لا تحرمنا من إضافتك وتقبل الله طاعتكم

[معماري قطري]

إخوي الملياردير ما قصرت وتقريباً لا اضافة على كلامك غير انها قبل كانت تنعمل مفتوحة لتصريف المياه للأَرض وبعد الدراسات البيئية عرفوا انهم لوثوا البيئة الجوفية للأَرض .. ببساطة حساب كمية الصرف يعتمد على حساب كمية المياه المستهلكة .. فإِذا عندنا حفرة صرف 4 في 2 في عمق 2 متر فهذا معناه تكفي 16 متر مكعب من مياه الصرف .. ولو كل يومين نستهلك خزان ماء فيه 4 متر مكعب فهذا يعني إِن المفروض خزان الصرف يكفي لفترة معدلها 8 أَيام .. قد تزيد أَو تقل حسب الإِستعمال.

يفترض تكون معزولة صح ومبنية بنيان قوي والعزل في رأَيي أَهم من الخرسانات .. عرض مترين عرض بسيط والطابوق يتحمل ومن فوق بس نحتاج لصبية ومن تحت كذلك مع الحمايات .. لكن لو كانت عريضة نحتاج تصميم انشائي مناسب.

تكلمنا في السابق عن الموضوع وكان النقاش حول عملها بعرض متر مثلاً وطول كبير أَو عمق أَكبر حتى تتسع لكمية أَكبر .. مثلاً حجم 2 في 4 في 2 يساوي 1 في عمق 3 في طول 5.33 متر وتعطينا حجم 16 متر مكعب لكن ضيقنا العرض شوي وزدنا الطول وزدنا العمق .. وذكرنا طريقة العوامة واللمبة الخارجية المستعملة في السعودية حيث لو امتلأَ الخزان ترتفع العوامة فيشتغل النور فنعلم أَن الخزان قارب على الامتلاء فنطلب سيارة الشفط.

العملية مزعجة وحلها سهل لكن أَشغال تصرف مليارات على أَشياء تافهة والصرف الصحي وصرف الأمطار المفروض يكون متصل ومشترك ويبتعدون عن الحفر العميق والاعتماد على الجاذبية الأَرضية ويركزون على الأَنفاق سهلة الصيانة والتوصيل والاضافة .. وبمضخات دفع مثل باقي العالم ولكل المناطق .. حتى في بعض المناطق ممكن البايبات تكون خارجية أَو شبه مدفونة في بعض المواقع.

[الدبلوماسي]

بيض الله وجهكم ماقصرتوا على هالمعلومات

[معماري قطري]

ووجهك أبيض إخوي الدبلوماسي يوم تبيض وجوه وتسود وجوه والله يحسن خاتمتنا