اشرايكم في هالكلام؟

[المحاميه]

السلام عليكم

مساء الورد


إذا فشلت في رفع أحد لمستوى أخلاقك فلا تدعه ينجح في إنزالك لمستوى أخلاقه..

إياك أن تعالج الخطأ بالخطأ
والزعل بالزعل
والسب بالسب
والشتم بالشتم

ولكن"ادفع بالتي هي أحسن"
فهل أبصرت طبيبا يعالج الجرح بالجرح..؟


كلام عجبني وحبيت تقرونه معاي وتقولونلي اشلون اتصرفون اذا اساء لكم شخص؟

ياريت اتشاركوني من واقع تجاربكم

[عاهد بن علي]

فعلا نقل موفق
جدا جدا جدا
تسلم يدج
درر

[المحاميه]

مرحبا اخوي عاهد

من طول الغيبات

اشكرك على الكلام الطيب

شتسوي اذا شخص غلط عليك

[عاهد بن علي]

ابشري بالخير

[النهار]

احلفي هذالكلام انتي مقتنعه فيه عيل طبقيه :)

[المحاميه]

ليش انت مب مقتنع؟؟

ان شاء الله باطبقه ليش لا

بالعكس الذكرى تنفع المؤمنين


انت شتسوي اذا واحد غلط عليك

[النهار]

ههههههههههههه
مأنطره لين يغلط علي ياذابح يامذبوح

[مخطط قطري]

صحيح انا مع رد الاساءه بالاحسان وعدم معالجه الغلط بغلط ولكن مع الاسف هذا ماتقدر اطبقه مع الجميع،،،،،،،،،، البشر اصناف مختلفه في ناس لمن يسئ اليك وترد له الاساءه بالاحسان او انك اطنشه راح يفهمها ضعف او خوف وراح يتمدى او يكرر الاساءه هالنوع لازم ترد له الصاع صاعين وتلقنه فنون الادب والعقاب باساءه اقوى وتركيزك يكون في منتصف الجبهه وسبحان الله عقبها يكون افضل صديق لك ويصطلب وفي ناس لا والله العكس يكون اساء لك بدون قصد او حتى بقصد وبرد فعلك تخجله او تكسر عينه ينصدم انك رديت الاساءه باحسان فالعمليه نسبيه وتختلف بين اصناف البشر الي عجزت اعتى واقوى فلاسفة ورجال مخابرات محنكين بدراسه السلوك البشري من فك شفراته

[مخطط قطري]

وعندي موقفين ممكن يثرون الموضوع وكلهم مواقف حديثه ومهمه ممكن نستخلص منهم عبره وخبره ولكن بعد شوي راح اذكرهم وشكرا على هالموضوع بس ممكن سؤال يالمحاميه هل انتي تكلمينا ولابسه روب اسود ولا هو مجرد نك نيم وبس

[المحاميه]

^

كلامك صحيح اخوي ولكن السالفه يبيلها صبر وطولت بال يعني خلك واثق من نفسك ومن تصرفك وخله يفكر مثل مايبي المهم انك تصرفت بالشكل اللي يرضي ضميرك

المشكله الوحيده هي لازم نسيطر على اعصابنا ونترك مسألة الحساب للخالق

[رجل الجزيرة]

بحكم عملي نعم أنا أطبقه.

[المحاميه]

اخوي مخطط ياريت تثري الموضوع بالمواقف اللي عندك
في انتظارك


اخوي رجل الجزيرة
احييك على استخدام هذه التقنيه
كيف تحس وانت تطبقها؟
هل ضافتلك ام سلبت منك شي؟

[h9466]

كلام جميل جدا...ومن يطبق مقولة سامح وانت الرابح فعلا سيكون هو الرابح لكن الموضوع يحتاج لترويض للنفس على العفو والتسامح,...
شكرا لك_

[المحاميه]

مرحبا اخوي
اشكرك عالاضافه
الواحد ممكن يفضفض ولكن يسامح فالنهايه بدلا من تكبيد النفس مالا تطيق

[مخطط قطري]

الموقف الاول اذكر من 13 سنه بضبط احد المسؤلين في مكان عملي كان حاطني في راسه لا التقييم انصفني فيه وكانت دورات في مجال التطوير تخصني ياخذها ويعطيها غيري وكان يحاول بقدر المستطاع نقلي من القسم الي كنت اشتغل فيه ونجح في ذلك بحيله وبمساعده بعض المتخاذلين في العمل وبعدها طلعت من هالبيئه الغير مريحه ورحت شغل اخر وترقيت هناك لين وصلت الي انا وصلت له الحين دارت الايام واكتشفت بصدفه البحته انه واحد من المتخاذلين مع المدير الظالم وكان هو المحرك الرئيسي موظف عندي مع انه كان رئيس قسم قبل 13 سنه في الوزاره الحكوميه الي كنت فيها وصديق حميم للمدير الظالم وكان معاه يوم ظلمني وطلعني من الشغل مع اني اقسم بالله ماكان هامني ذاك الشغل لاني اوردي ابي اطلع بس كرهتهم على تصرفاتهم هذيك المهم الرجال جاني يشتكي من تعطيله في الدرجه وفيه مكافاءات ماخذها وانهم شطبو اسمه من مهمه رسميه كان بيروحوها وجاتني مقشره واكمل عليه بعد اذا حاب لانه تصرف بامور تعتبر غير قانونيه واقدر امشيها واقدر ابهدله فيها وهو يشرح لي وانا منصبي لازم يمر على 3 تحتي من رئيس قسم ومدير اداره عشان يشرحلهم بكتاب رسمي مب يتخطاهم الزبده انا عرفته وهو ماعرفني وقاطعته وهو يتكلم قلت له معقوله ماتعرفني قالي لا
حسيت انه جاني مقشر واقدر انتقم الحين منه واقدر اسوى فيه الي ابي واغثه اكثر من هو مغتث ومستعد ابهدله بس قلت ليش الله انصفني منهم وخذت حقي وسبحان الله يمكن لولا مضايقتهم لي ماطلعت ووصلت الي انا وصلت له
بالعكس ساعدته بالي اقدر عليه ومن ضمن صلاحياتي ونسيت اقول انه المدير الي ظلمني اول واحد تقاعد بعدها بسنتين وكل الي كانو معاه يكرهونه ومحد مدحه طبعا الكلام مب مرتب وكتبته بالسريع وهذا درس لكل شخص يتعمد يظلم انسان ترى الدنيا دوائر وانتبه

[نوفا91]

الا انزل لمستواه والعن شكله وارجع واطلع لمستواي ، عادي ماعندج اي مشاكل


^

امزح يامحاميتنا بس على حسب مزاجي حزتها وملاغة هالشخص

[حرف]

شدخل الطبيب والجرح في الشتم والسب

[جبر ال جبر]

انا مؤمن بمقوله العفو عند المقدره وشكرا

[لـبـيـه]

عن نفسي اطبق

اذا الكلام من فضه فان السوك من ذهب

وخير الكلام ماقل ودل

واتجنب الرد على الاساءه

[وطن]

على حسب نوع الإساءة
وعلى حسب نوع الميانة
وعلى حسب نوع المزاج :)


ممكن اقول حسبي الله ونعم الوكيل و اسكت اخليهم يحترقون من سكوتي
جربتها كذا مره


وممكن اطيش و اعصب

وممكن اطوّف و اقول ما يندرا شنو ظروفهم مساكين !!
الله يعينهم على ما بلاهم

[شبح الصمت]

اغسل شراع شراعه وعقب ما اغسله انشفه وعقب ما انشفه اشتغل عليه مزاااجيه ..



وبس


هاهاهي



لا لا لحد يصدق
عن نفسي قبل كنت اعدددددددي واعددددي
الحين ما اتوقع اني اعدي لاحد الا اذا اهو عزيز على قلبي واحترمه واحشمه ..

اما اشخاص عاديين لهم الاحترام والتقدير
بس لا يكثر كلامه ..

وانواع المستويات الي الواحد يوصل لها كثيرة ..


وكل مستوى على حسب تعاملك مع الطرف الآخر ..

بس يبقى في الاخير مستوااك الي تربيت عليه ..
التربية الطيبه والذرابه وحسن تعاملك مع الناس المحترمه والغير محترمه ..


كلن على طيب اصله يرجع


في السنوات الاخيرة
عرفت انه نفسي اطلعت مزاجية