استفسار لفتح مكتب استشاري

[bu3abed]

السلام عليكم ورحمة الله وبركاتة

بم انه الواحد هالايام لازم مايعتمد على راتبه الشهري كمصدر دخل وحيد
فحبيت انه افتح مكتب استشارات هندسيه

الي له خبره في هالمجال شنهي نصايحه لي
وبغيت اعرف شنو هي الاجرائات لفتح المكتب

وكبدايه شالي احتاجه من اجهزه وحجم مكتب وكم مهندس
شنو هي الصعوبات الي راح اواجها فالبدايه ؟؟

وشكرا

[معماري قطري]

عليكم السلام ورحمة الله وبركاته

شروط فتح المكتب ودرجات المكاتب موجودة في لجنة المكاتب .. ألحين اتوقع دمجوها مع التخطيط .. كانت قبل مستقلة وكان مقرها على الكورنيش صوب الهلال الأحمر

حق مكتب درجة أولى تحتاج مهندس مصنف درجة اولى واتوقع أما معماري أو مدني وخبرته 10 سنين .. ولهم شروط ثانية ما اذكرها حاول تشوف موقعهم بتحصلها بسهولة

الخيار الأفضل تشوف مكتب جاهز وتجيبه كوكيل خدمات وتاخذ نسبة ثابتة من العقود ويكون دورك الاسم يعني تحت كفالتك وهم يكون عليهم أي شغل اداري وهندسي وما تكون موجود الا للضرورة كتمثيل مالك قطري.

لي ربع مهندسين فتحوا وسكروا بسبب تجاوزات العرب وشغلهم من تحت الطاولة والخساير الكبيرة ووحع القلب اللي ما يجيب همه .. شوف مكتب فلبيني أو هندي أو باكستاني أو تركي بس يكون متأسس في الواقع وقوي في بلاده ويفتح على أساس مكتب دولي وعقدك يكون واضح معاهم وعن طريق محامي.

بتفتح صغير وبتحاول تكبر بتتعب وايد .. بيطالبونك بسكن وسيارات وتجهيزات وبيضطرون ياخذون مشاريع رخيصة ما تغطي التكاليف المدفوعة والتكاليف الجارية .. والله يعينك ويوفقك.

نبهت عن تجاوزات المهندسين مرات عديدة .. وبالنسبة للمكتب ممكن ياخذ رسام شغل خارجي ويشتغل عليه وقت الدوام ويكون انتاجه للمكتب قليل جداً وللشغل الخارجي أكثر لأن في المكتب مدفوع له لكن الخارجي يعطونه على اللوحة وكاش وبدون عقد حتى وفواتير .. وفي شغل الاشراف يتم الشغل مباشرة مع فورمان المقاول ويتم التجاوز وتقاسم الغنيمة لا ادارة المكتب تدري ولا المقاول يدري.

[bu3abed]

الله يعطيك العافيه اخوي معماري قطري والله ماقصرت

بس عندي استفسار
شلون اقدر احصل المكاتب الجاهزه وين ادور يعني ؟

[معماري قطري]

هذي يبي لك تبذل مجهود وتشتغل على كل الحلبات

شوف الموجودين في قطر وقابل مدراء المكاتب يمكن يساعدونك

آعرف واحد من التجار مختص في هذي الشغلة وعنده كم مكتب بعضهم مؤسسين محلياً وبعضهم عالميين .. ومعرفتي به كانت علاقة شغل بحيث كان يبغيني ادير مكتب وما توافقنا بسبب عملي الحكومي ما وافقوا عن تقاعدي .. وكان هذا شرط من لجنة تصنيف المكاتب والمهندسين لإدارة المكتب.

شوف الدكتور مهندس عتيق الناصر .. وهو قطري يدير ويملك مكتب نسيت والله اسمه وهو في التاون سنتر ممكن يفيدك.

في النهاية اللي يفتح مطعم ويتوفق مدخوله يكون أفضل من مكتب هندسي.

عندي بعد واحد فاتح مكتب لإدارة شغله الخاص .. قطري واسم مكتبه عَمَار في بناية النيسان في السد فوق ومدخله من ورا .. ممكن بعد يفيدك.

المكتب ممكن تركز على الجانب المعماري فقط والباقي تصميم بالباطن واتفاقيات مع مكاتب ثانية .. وممكن تشوف ناس يسون مجسمات ويحطون اضاءَة صغيرة وشجر .. أو تركز على جانب الخدمات بجميع أنواعها وهنا لازم تاخذ مشاريع حكومية.

بعد لا تنسى تمر على المهندس ابراهيم الجيدة .. هذا من فطاحل المهندسين القطريين ومهندس معماري ممتاز وهو اللي مصمم مبنى برج برزان ومكتبه المكتب العربي للشؤون الهندسية.

الله يوفقك يبي لك شغل وجمع معلومات وممكن تحصل مكاتب جاهزة تواصلت مع هذي المكاتب وما صار اتفاق .. عندي بعد صديق بحريني عنده مكتب وبزنس كبير في قطر واتوقع عنده شراكات.

[bu3abed]

ان شاء الله بدرس الموضوع عدل قبل لا ابدا اي شي

ما قصرت الشيخ والله يكتب الي فيه الخير

[معماري قطري]

العفو يا اخوي

[هامور البورصة]

السلام عليكم ورحمة الله وبركاتة

بم انه الواحد هالايام لازم مايعتمد على راتبه الشهري كمصدر دخل وحيد
فحبيت انه افتح مكتب استشارات هندسيه

الي له خبره في هالمجال شنهي نصايحه لي
وبغيت اعرف شنو هي الاجرائات لفتح المكتب

وكبدايه شالي احتاجه من اجهزه وحجم مكتب وكم مهندس
شنو هي الصعوبات الي راح اواجها فالبدايه ؟؟

وشكرا

الله يوفقك اخوي ... اخبر سألت عن الرخصة قبل سنتين وكانت الشروط عشان تحصل رخصة مكتب استشارات هندسية انك تكون مهندس معماري او مدني أو انك ماتكون موظف في الدولة وماتكون مالك او شريك في شركة مقاولات ... بس تأكد بنفسك من التخطيط العمراني