ابي اتكفل برعاية يتيم... كيف؟

[Jspec]

السلام عليكم ورحمة الله

جماعة الخير .... اتوقع اغلبكم شاف صورة الطفل السوري الغرقان على شواطى تركيا وانا والله من شفت الصوره وقلبي يتقطع ولا جاني النوم وفي نفسي مليون سوال عن تخاذل العرب والمسلمين والجحيم اللي وصلنا له كأمه اسلاميه

سؤالي هو ..... هل في طريقة قانونيه اقدر اني اتكفل برعاية يتيم واكون انا ولي امره واجيبه قطر. الوضع الاي هناك مزري ويقهر ولا فيه اي تحرك

لحد يقولي كفالة يتيم بس ارسل فلوس!!!!! والله لي اكثر من 15 سنه شهريا ادفع وغيري مليون شخص يسوي نفس الشي والحق يقال بديت اشك انها مجرد ارقام تدخل في حسابات اخرى !!!!! عنبوه مليارات من التبرعات اللي تدفع من العرب والمسلمين لو عليها احد صاااادق ويوصلها كان ماشفنا الاف من البشر يموتون جوع او برد او من ردى العيشه!!!!

ارجع لسؤالي ..... هل في طريقه قانونيه اقدر اجيب طفل يتيم مثلا 4 او 5 سنوات واتكفل به واكون ولي امره!!!!!

[أسير الاسهم]

الله يكتب أجرك على كل حال

والله انا مثلك .. وكثير من اهل قطر اللي فيهم خير كافلين أيتام ويدفعون مبالغ شهرية عن طريق جمعيات خيرية تقوم بهالامر .. والله العالم عاد هي تصل للمستحقين والا لا

انا عن نفسي أحيانا أحيانا وليس دائما يجيني تقرير عن حالة المكفول .. تعليمه وصحته وحالته المادية بعد الكفالة .. والله عاد مدري هم صادقين ولا لا .. انا متوكل على الله وقايم باللي اقدر عليه .. وودي اسوي أكثر

ربي يكتب الاجر للجميــع ويعطيهم على نياتهم

[بشائر]

وعليكم السلام ورحمة الله وبركاته

الله يكتب أجرك/ ج على هالنية الطيبة ..
وأنا والله العظيم فكرت بنفس هالتفكير وفعلا ماتشعر بلذة كفالة اليتيم عن طريق الجمعيات الخيرية ولو انهم ماقصروا الله يجزيهم خير .. لكن يبقى شي في النفس
مارتاح .. وفكرت لو أجيب طفلة يتيمة وأتكفل بها وأكون ولية أمرها .. الحمد لله عندنا خير
ووقت وفراغ .. وياعظم أجر كافل اليتيم .. أحسن مليون مرة من الجمعيات الخيرية ..

نصيحتي لكم لو تعرفون سوريين هنا ثقة ولهم أقارب هناك عندهم أيتام تكفلوا بأسرة واطلبوا التواصل معهم (شخصيا ) وتابعوا حالتهم أول بأول
أو طفل في هالأسرة حسب اللي يناسبكم .. بهالطريقة بس تطمئنون بأن المبلغ يوصل لأصحابه صح ..
ولو يسر الله لكم وقدرتوا تجيبون طفل يتيم للدوحة .. بشرونا ولكم الأجر ..

[Jspec]

الموضوع مش موضوع فلوس ياجماعة الخير

الفلوس مجرد وررررررق ماراح تحميهم من السفاحين والتقتيل والحرب .... اوك شخص بالغ ممكن يقدر يدبر اموره هناك .... لكن ايش ذنب الاطفال!!!!! سواء كفلناهم او ارسلنا لهم فلوس هذي مش حمايه لهم من اللي يحصل هناك .... ياناس اطفال مالهم ذنب

انا ابي طريقه لو اقدر اجيب واحد على الاقل احس اني انقذت نفس واتكفل بتربيته ورعياته لين يكبر ويكون قادر انه يعين نفسه

هل فيه طريقه

[مدغشقر]

وعليكم السلام ورحمة الله وبركاته

يمكن أنت راح تقدر تكقل واحد أو أثنين ولكن هناك الالاف يموتون بالفنابل وضحايا حرب وعطش وجوع

وبهالطريقة ماحلينا المشكلة وظلت المشكلة قائمة صح؟ وعشان تنحل المشكلة من الأساس

ضروري يفتحون باب اسمة تاشيرات اللجوء مثل الدول المتقدمة أوروبا وأمريكا

بحيث ان الدوحة ليس أقل منهم في القيمة والمسئولية وهذا الشي اصلا في ديننا الكريم

وهو ما حث عليه نبينا الكريم عليه أفضل الصلوات والسلام في إعانة الضعفاء والمساكين والمحتاجين

من العوائل المنكوبه في كل الدول العربية المسلمة ويكون الدعم شامل (التعليم - الصحة - السكن- الوظائف)

ويكون الدعم فقط عن طريق الحكومة القطرية ليس عن طريق شركات وموسسات أو حتى أفراد

نحن نأكل ونلبس احسن الثياب وأخواننا يموتون جوعا وعطشا لا ننتظر حتى نرى مثل هذه المشاهد ولكن علينا أن نطالب كلنا بيد واحده

وأنا اشوف ان البلد راح تطور وتتغير لان راح يكون فيها ناس راح تشتغل في الشركات والموسسات والمصانع

قد أمر الله تعالى بالإحسان إلى اليتيم غي أكثر من آية من كتابه الكريم فقال الله عز وجل: ( وَاعْبُدُوا اللَّهَ وَلا تُشْرِكُوا بِهِ شَيْئاً وَبِالْوَالِدَيْنِ إِحْسَاناً وَبِذِي الْقُرْبَى وَالْيَتَامَى) (النساء: من الآية36).

وقد جعل الله تعالى الإحسان إلى اليتامى قربة من أعظم القربات ونوعا عظيما من البر أيضا المساكين، فقال:( لَيْسَ الْبِرَّ أَنْ تُوَلُّوا وُجُوهَكُمْ قِبَلَ الْمَشْرِقِ وَالْمَغْرِبِ وَلَكِنَّ الْبِرَّ مَنْ آمَنَ بِاللَّهِ وَالْيَوْمِ الْآخِرِ وَالْمَلائِكَةِ وَالْكِتَابِ وَالنَّبِيِّينَ وَآتَى الْمَالَ عَلَى حُبِّهِ ذَوِي الْقُرْبَى وَالْيَتَامَى وَالْمَسَاكِينَ وَابْنَ السَّبِيلِ وَالسَّائِلِينَ وَفِي الرِّقَابِ وَأَقَامَ الصَّلاةَ وَآتَى الزَّكَاةَ وَالْمُوفُونَ بِعَهْدِهِمْ إِذَا عَاهَدُوا وَالصَّابِرِينَ فِي الْبَأْسَاءِ وَالضَّرَّاءِ وَحِينَ الْبَأْسِ أُولَئِكَ الَّذِينَ صَدَقُوا وَأُولَئِكَ هُمُ الْمُتَّقُونَ) (البقرة:177) .

كما قال الله عز وجل: (وَيُطْعِمُونَ الطَّعَامَ عَلَى حُبِّهِ مِسْكِيناً وَيَتِيماً وَأَسِيراً.إِنَّمَا نُطْعِمُكُمْ لِوَجْهِ اللَّهِ لا نُرِيدُ مِنْكُمْ جَزَاءً وَلا شُكُوراً. إِنَّا نَخَافُ مِنْ رَبِّنَا يَوْماً عَبُوساً قَمْطَرِيراً. فَوَقَاهُمُ اللَّهُ شَرَّ ذَلِكَ الْيَوْمِ وَلَقَّاهُمْ نَضْرَةً وَسُرُوراً. وَجَزَاهُمْ بِمَا صَبَرُوا جَنَّةً وَحَرِيراً). (الإنسان:8-12) .
ومانقص مال من صدقة

سَمِعْتُ عَبْدَ الرَّحْمَنِ بْنَ عَوْفٍ يَقُولُ: إِنَّ رَسُولَ اللَّهِ صلى الله عليه وسلم قَالَ: «ثَلاَثٌ وَالَّذِي نَفْسُ مُحَمَّدٍ بِيَدِهِ، إِنْ كُنْتُ لَحَالِفًا عَلَيْهِنَّ: لاَ يَنْقُصُ مَالٌ مِنْ صَدَقَةٍ فَتَصَدَّقُوا، وَلاَ يَعْفُو عَبْدٌ عَنْ مَظْلَمَةٍ يَبْتَغِي بِهَا وَجْهَ اللَّهِ إِلاَّ رَفَعَهُ اللَّهُ بِهَا»، وقَالَ أَبُو سَعِيدٍ مَوْلَى بَنِي هَاشِمٍ: «إِلاَّ زَادَهُ اللَّهُ بِهَا عِزًّا يَوْمَ الْقِيَامَةِ، وَلاَ يَفْتَحُ عَبْدٌ بَابَ مَسْأَلَةٍ إِلاَّ فَتَحَ اللَّهُ عَلَيْهِ بَابَ فَقْرٍ».

بارك الله فيك على الطرح وجزاك الله خير الجزاء على النية الطيبة .

[سعود.]

الله يجزاك خير

والله الصورة الي انتشرت امس تقطع ( القلب )

الله ينصرهم على بشار ( الحمار )

[بـارود]

وعليكم السلام ورحمة الله وبركاته

في طريقة وهي كالتالي ، تقدر تكفلك يتيم عن طريق الجمعيات التركية مثلها مثل أي جمعية خيرية ثانية ، وتزوره مثلًا في أي وقت في السنة وتطمن عليه ، منها سياحة ومنها تاخذه معاك وتفسحه وتكون له كل شي في الدنيا ، وما يحس بفقدان والدينه ، ولَك أجره ، وجزاك الله على حرصك ، والله يقدرنا وإياك على فعل الخير