من تجاربكم !! [الأرشيف] - منتديات شبكة الأسهم القطرية

مشاهدة النسخة كاملة : من تجاربكم !!

سعود.

10-09-2015, 12:08 PM

ادور على محل تصميم وتنفيذ داخلي

ويكون دقيق وشغل 100%

معماري قطري

10-09-2015, 02:49 PM

سمعت اغنية قارئة الفنجان .. يقول ستفتش عنها يا ولدي في كل مكان

تعاملت قبل في شغلات بسيطة ومحدودة عمل كبتات بتقسيمات خاصة وتسريحات تكون ثابتة في الحائط .. مع مهندس مغربي قرب السنتر اسم محليه اتيليه ورقم ما اذكر كم .. كان زين بس جاب لي منجرة رخيصة من مزرعة العطية وزين خذت عينات منه قبل.

لو تبي حدد المناطق وتعامل مع شركات توريد الأثاث بعضهم عندهم .. وأعرف واحد فاتح محل أثاث وعنده محل مواد صحية وفتح مكتب تصميم وهو قطري شفت محلاته بس للأمانة ما جربت شغله.

انا مبدئي هو دمج الديكور في بدايات التصميم وتحديد المناطق شبيكون فيها من البداية وبعدين تفصيل القطع أو شراؤها جاهزة يكون سهل ولو تبي رأي على المخططات اللي يريحك خاص ولا عام .. ولو بيتك ما بديت في تشطيبه وسهل عمل تغييرات عليه وتحصل مهندس انترير شاطر بس تحدد ميزانيتك واحتياجك وهو يصمم لك في هذي الحدود بيكون زين .. الغالبية يصممون شيء خيالي وتنفيذه يكون ورطة .. لكن اطلب تصميم وتنفيذ وحدد ميزانيتك من الأساس وناقشه هل هذي الموازنة تكفي.

واحنا بيوتنا كبيرة وممكن نقسمها بحيث بعض المناطق يكون لها تصميم خاص وبعضها حسب الاستعمال وحسب رغبة الشخص .. لاحظت مثلاً السجاد المريح مع الحشوة التحتية مهم للغرف وعندك خيارات عديدة ولا فيه داعي تتكلف حتى في تبليط الأرض .. حتى الصبية تكفي ويتركب عليها السجاد .. والحمامات والمطابخ يسون لك رسومات اللي بيجهزونها مع سنابل وكل شيء واضح .. ممكن تركز على مجلس أو صالة.

الغرف عندي أهم ما فيها الووك ان كلوزت وهذي تقدر تسوي لها قواطع جبسية وخشب في أي غرفة كبيرة حسب المساحة المتوفرة .. أو تتجه لعمل خزائن الحائط وأي شيء تختاره بتكون عارف تكلفته أما مع مهندسين الديكور توقع المادة اللي يوفرونها رخيصة بسعر غالي.

الانارة لو ما كملت التمديدات حاول تسويها عدة نقاط حتى تستفيد منها بعد الجبس بحيث تركب كم نوع .. وللغرف حاول تركب اللي يجي مثل الكيبل وينور بعض الزوايا للمشي في الليل .. يعني ركز على عدة مستويات ونوعيات من الانارة .. وشوف الهاي تك في هذا المجال بعض من يسمون نفسهم مهندسين ديكور حتى تخصص دراسي ما درسوا وشغلهم ممارسة وهواية ولا عندهم معلومات كفاية عن الانارة والتكييف وعناصر مهمة تدخل في التصميم الداخلي .. بعضهم خريجين فرجينيا وممارسين لهم فترة ذيلا جيدين خصوصاً القطريات منهم وعندهم فن في التصميم والتنفيذ

سعود.

10-09-2015, 03:08 PM

جزاك الله خير ( اخوي ) معماري

دائما سباق في المساعدة .

captin

10-09-2015, 03:26 PM

بكل صراحة لايوجد في قطر تصميم وتنفيذ متكامل

لذلك تلقى معظم المشروعات الكبيرة مثل الفنادق وغيرها
اللي يشتغلون فيها تصميم وتنفيذ من برع سواء من دبي او اوروبا

شغلة التصميم الداخلي شغلة لازم تتزامن مع بداية فكرة التصميم المعماري
وتكون شاملة لكل شي من الطابع العام للتصميم الى الارضيات والاسقف والاضاءة والاثاث
ودمج هاذي الاشياء مع العناصر الاخرى في المبنى مثل فتحات التكييف ودرجة الوان الابواب الخ .

للأسف معظمنا يلجأ لمكاتب التصميم بعد ما يخلص مرحلة العظم ويكون البيت شبه مكتمل
ويرجع يكسر ويعدل في كل شيء تقريبا وبعض المكاتب يسوي لك خلطة بين تصاميم حديثة وكلاسيكية

في تجربة لي مع التصميم الداخلي المصمم يسوي لك بالرسم اشياء حلوة وجذابة لكن ما يراعي مثلا
ان موقع الاضاءة لازم يكون في مكان معين يتناسب مع المساحة اللي راح ينورها او دائرة ونقوش الجبس في السقف
ما تتعارض مع فتحات التكييف مثلا .

المشكلة لما تبتدي تنفذ بتلقى مشاكل كثيرة تدل ان المصمم غفل عن اشياء كثيرة وبتضطر تعدل وتكسر او تغير مكان اضاءة
او مفاتيح كهرباء .

المشكلة الاخرى ان المصمم دائما له عالم خاص حالم مب واقعي راح يدور لك اشكال والوان من الانترنت وبيركبها في التصميم
تعال دورها في الدوحة بتقعد سنة تلف على المحلات ولانت بلاقي شي مثلا كان عندي في التصميم رخام لونه ازرق على بنفسجي دورت معظم المحلات
قالوا صار لنا سنين في السوق وعمرنا ما شفنا مثل هاللون . فتضطر تغير وتحيد عن التصميم اللي دفعت فيه فلوس .

عموما من بعض محلات التشطيب الكبيرة تلاقي عندهم مصممين واهم شي تضمن توفر المواد تكون متوفرة .

سعود.

10-09-2015, 07:34 PM

أشكرك يا ( الكابتن )

معماري قطري

10-09-2015, 08:06 PM

العفو اخوي سعود وكابتن ما شاء الله أوجز الكثير من المشاكل

أذكر قبل لبنانية نشيطة ما شاء الله عليها وسوت أعمال كثيرة وسوق لنفسها وكانت تنفذ عن طريق دبي .. بس تاخذ مبالغ كبيرة كدفعة اولى للتنفيذ وفجأة بعد ما جمعت كم مليون هربت ولا حد عرف وين يحصلها .. بعض الناس يطلعون جنسية في دول أفريقيا أو جنوب أمريكا ويغيرون أسماؤهم ويشتغلون قبل بجواز عربي ويفلون ولا حد يحصل لهم على أثر.

لو تشوف موضوع مراجعة التصاميم انا سويت مقترح الأرضيات وكله بمقياس رسم وحطيت المقاسات المناسبة .. الفرق لو يسوي هذا التصميم مهندس ديكور داخلي بيجيب لك عينات وبيوصف طريقة التركيب وممكن يكون من الهواة ويخليها لإختيار اللي بيركب .. والمواد ممكن تتغير حسب الموجود وحسب رغبة المالك .. وهذا اللي يصير في مشاريع تنفيذ المنازل الخارجية في الدول المتطورة .. المالك والإستشاري تكون علاقتهم مستمرة وشغلهم مهني كثير أكثر من الموجودين عندنا.

فيه تصميم مبدئي وتطوير للتصميم ومتابعة للعقود مع المقاولين المتخصصين .. ومتابعة للبناء والتنفيذ ومنها يكون فيه تغييرات بسيطة وبحث مستمر من المالك لشراء الأفضل والمناسب .. وفي خلال كل هذي المراحل يكون المالك متابع ومتأمل خير ويتعب أوقات ويصيده احباط .. خصوصاً عندنا بسبب عدم تنظيم العملية بقوانين صارمة وواضحة.

في كثير من الدول مدارس مهنية خاصة لتدريب العمال تدريب مهني معين أو ترخيصهم للعمل بعد فحصهم .. عندنا ما فيه حتى لو مركز فحص وترخيص والعامل ما يشتغل الا برخصة .. وممكن لعامل خبرة يسوي عدة أشياء بس يكون مفحوص بواسطة مختصين ومرخص.

المواد تطورت وطرق تركيبها تغيرت عن قبل وما لم نكون حتى احنا كمختصين متابعين لهذا السوق ما نقدر ننصح ولا نصمم صح.

سعود.

10-09-2015, 09:00 PM

مشكور اخوي ( معماري ) ومانستغني من تعليماتك وجزاك الله خير . وفعلا انا استفدت كثير من مواضيعك . في عالم البناء والتشطيبات والعزل الحراري ووووووالخ .

ودائما نتمنى نشوف الجديد منك لنستفيد .

وانتمنى عودتك قريبآ ( لدوحه ) معافين بأذن الله
وتحيه كبيرة لك .

Qt.1

12-09-2015, 01:11 PM

تبي نصيحتي منت بمحتاج شركه تصميم وغيره , انت بنسفك تبدع في بيتك لك نظرتك الخاصه في التصميم والديكور مهب ضروري يعجبك الي يسويه المصمم , انا الحمدالله صممت ديكور بيتي على ذوقي والحمدالله كل من شافه قال ماشاء الله ابدعت ,

سعود.

12-09-2015, 01:19 PM

مشكور اخوي ( ابو عبدالله )

احس اني بخمبقها بتصميم :fight::fight::f

معماري قطري

12-09-2015, 03:32 PM

دخلت بيت شخص عادي .. ماخذ تصميم ومعدل عليه اللي ما عجبني فيه مسويه دور أرضي وفوق مسوي غرفة بس بصالة صغيرة .. ما حسب حساب عياله بيكبرون وبتتغير احتياجاتهم .. لكن تصميمه لهذا الوقت ول 15 سنة قادمة كافي وجيد.

التصميم الداخلي سوى عدة أنماط والحمد لله اشوفه توفق بالتغيير من مكان لمكان .. وكله اجتهاد ذاتي .. جزء بطابع مغربي وجزء غير وهكذا وهذا للصالات القريبة من بعض .. وأحياناً المزج يحدث لنا تغيير محبوب ونرتاح له.

التصميم يفترض يكون عملي وقابل للتغيير بسهولة .. بورق جدران وبقواطع خشبية .. حتى البعض يسوي سقف مرتفع ويقدر يقسم الغرفة لدورين بأرضية خشب مفروشة بفرش مريح ويخلي فوق للنوم والراحة وتحت غرفة ملابس وجلوس ودراسة.

لتنسون الغاء حوائط عملية سهلة وعمل فتحات ثانية كالنوافذ والمناور تحت جسر السقف بالطوب الزجاجي .. أو بقطعة زجاج بفريم ثابتة عملية سهلة وقص الفتحات سهل ويتم في فترة بسيطة .. والتغيير المدروس ضروري ومهم في فترة معينة حسب سن الانسان .. للطفل غير والمراهق شوي غير والشاب غير وللرجل الكبير احتياطات ثانية.

في خلال فترة علاج والدتي الله يحفظها كلمت اخوي وطلبته يغير أشياء معينة في غرفتها .. مع انهم ساكنين بيتهم من حول 3 سنين تقريباً .. وتم تغيير المغسلة وتنزيلها قليلاً والمقعد وتركيب بلاستيك خاص كمسكات لكبار السن .. وهذي أشياء اشتكت منها هي .. أَشياء لاحظتها انا كانت تغيير سجاد الأرضية بنوع جيد مع حشوة تحتية وبعض أثاث الغرفة مع الستائر .. واخترنا التشكيلة والألوان من صور على الوتس أب .. حتى كرسي قابل للاغلاق في الشاور ركب اخوي جزاه الله خير كاضافة هو لاحظها .. وهذا مثال بسيط على احتياج الشخص حسب عمره الحالي.

بإختصار الديكور العملي والنظيف واللي تدخل فيه الاضاءَة الطبيعية واسلوب المعيشة والحركة .. ودرجات الراحة والهدوء هو اللي المفروض نسعى له لأَنه بيدوم وبيعطينا تجديد وراحة.

من الدراسات والقراءات والخبرة العملية اللي مريت بها نظرتي لتشطيب المنازل السكنية هي كالآتي:

نحاول نتجنب الزوايا الخطرة والعتبات الكثيرة والغير مريحة .

نحسب حساب الاضاءَة المتعددة ونخلي لها شبكة قنوات جاهزة .. والوقت الحالي عندنا الاضاءة الأرضية والسقفية المتعددة والجدارية.

نمط الأرضيات صلبة للصالات ومريحة وسجاد فاخر للغرف .. ونقدر نسوي بعض الصالات لو حبينا سجاد للهدوء وللراحة ولإمتصاص الصوت ولو عندنا ممر ضيق تطل عليه الغرف هذا يستحسن سجاد.

الأسقف في رأيي بعضها ممكن تجي ببلاستر لو حبينا الارتفاع الزائد وبصبغ مناسب وبدون جبس .. وممكن ننوع حسب المكان ولو عندنا مجلس مغلق نقدر نسوي له جبس مزخرف بزخرفة مغربية كتغيير عن نمط الأماكن المفتوحة .. وممكن نسويها كلها بطريقة متقاربة ووحدة ولهذا الفن فيه ناس مختصين وفاهمين شغلهم .. عندنا كذلك الستايل القطري القديم من الدنجل والخوص وتشكيلة الحوائط الطينية والعناصر القديمة من روشنات ودرايش مغطاة من داخل بالخشب ومن الخارج ممكن بشكل حديث .. ممكن نسوي مجلس خارجي بهذي التشكيلة ونضيف عليه فتحات مربعة فوق الدرايش والأبواب وممكن بكامل الطول وبارتفاع عالي وبألوان مختلفة تبين في الليل منورة وتنقل النور من داخل للخارج وفي النهار تدخل نور الشمس بألوان مختلفة .. كانوا شيابنا الله يرحم من مات منهم ومن هو حي كذلك ويرحمنا معاهم يحبون النور ويخلون واجهات مجالسهم في الغالب جهة الجنوب حتى الشمس تدخل المجلس أغلب الوقت .. وعندنا في برنامج الاوتوكاد نظام يسوي تشبيه لأشعة الشمس حسب اتجاه المبنى وحسب الموقع في أي بقعة في العالم وحسب الوقت والتاريخ.

عناصر كثيرة صعب اجمالها في مقال بسيط .. وتمت مناقشتها كثيراً يمزجها المفروض المصمم في التصميم وينتبه لها المالك.

سعود.

12-09-2015, 08:57 PM

الله يجزاك كل خير اخوي ( معماري )

مانستغني من معلوماتك .

stone

13-09-2015, 09:09 AM

اخ سعود نحن شركة هوم ستون لدينا تصميمات داخلية وخارجية مع التنفيذ ، مرفع صور من تصميم داخلي في فلا بالوكير.

http://www.3rbz.com/uploads/8989055bb7771.jpg (http://www.bnatgames.info/)العاب تلبيس بنات (http://www.bnatgames.info/cat-3.html)

http://www.3rbz.com/uploads/81d915f2d8b92.jpg (http://www.bnatgames.info/)العاب تلبيس بنات (http://www.bnatgames.info/cat-3.html)

http://www.3rbz.com/uploads/7cb57f0fa9af3.jpg (http://www.bnatgames.info/)العاب تلبيس بنات (http://www.bnatgames.info/cat-3.html)

http://www.3rbz.com/uploads/2e07c4633b654.jpg[/url]العاب تلبيس بنات (http://www.bnatgames.info/cat-3.html)

سعود.

13-09-2015, 11:10 AM

مشكور ياخوي

صراحه شغل ممتاز

شمس المغيب

13-09-2015, 12:14 PM

في مهندسة ديكور تشتغل شخصي
وزوجها يشتغل على التنفيذ
اذا تبي ممكن ارسل لك رقمها

معماري قطري

13-09-2015, 03:22 PM