وين ضاعت النخوه والفزعه بين الجيل الجديد من هل قطر!!!!

[مخطط قطري]

الموضوع باختصار صارلي سنوات مبطي من الدوائر الحكوميه بحكم طبيعه شغلي وعندي مندوبين يسنعون اموري في الداوير الحكوميه الامور الروتينيه بشكل عام ،،،، شاءات الاقدار والصدف اني بنفسي قمت اسعى واخلص اموري هذي من بلديه وتخطيط عمراني وادارات امنيه مثل امن العاصمه والمحاكم الي في الدفنه والمرور والتجاره والبيئة وكهرماء خلال الاسابيع الماضيه على الرغم من قانونيه جميع معاملاتي ولكن تحتاج وقت وتوجيهه سليم لانهاء اجراءاتها بشكل اسرع لاحظت شباب قطرين واجد في هالدواير ولكن مع الاسف مافيهم هاب ريح او راعي فزعه وبيخلصك وبيركضلك مثل الجيل السابق الي تعودنا عليه ومثل لاجاني قطري مواطن اكيد ماراح اقصر معاه بكل الوسائل المتاحه الي ماتتعارض مع القوانين واقلها البسمه والاستقبال بصدر رحب وفي الاخير كلنا نكمل بعض لاشك لاجاني المقيم مب مقصر معاه بعد بس المواطن احق واولى باي خدمه تقدمها الدوله له ،،،،،
بصراحه صدمت من الاشخاص الي موجودين في هالمواقع ماعرف وش السبب هل فيه تعليمات خاصه بهالشان؟ هل الاشخاص هم نفسهم زهقو وملو من المراجعين ؟؟؟ هل فيه سبب يمنعه من القيام بواجباته الوظيفيه بشكل مرضى للمراجع ؟؟؟
ملاحظه اخيره ؛ انا ماقول انه الاشخاص الي تمت مراجعتهم بشكل عام في الجهات الي ذكرتها فوق ماكانو على قدر المسؤليه ولكن تحسه مغصوب وماوده يرشدك ومافيه حماس الموظف الي تعودنا عليه في السابق يمكن لانه مايعرفك مع انه مب لازم يعرفني يكفي اني مواطن وعندي معامله عندهم الموضوع للنقاش والتداول على وعسى نرجع روح النخوه والفزعه القطرية الي تميزنا بها طوال العقود الماضيه ونبثها في الجيل الجديد من الصف الثاني في المؤسسات والهيئات الحكوميه ونضفى عليهم مهارات سلوكيه لاتنفك على المهارات الوظيفيه لبناء مستقبل مشرق لدوله قطر وتحقيق رؤيه 2030

[دايموند]

علبالهم انت مندوب بعد اظاهر مادروا انك مواطن هههه

[المخفي]

لانهم مظلومين فما يتحمس للعمل

[بانغ بانغ]

للاسف هذا واقع

وذلك بسبب انتشار المحسوبية ولازم يعرفون من اللي جاي عشان ايفزون له .

كثير من هالشباب خريجيين ثانوية او جامعية جدد وما يقدرون اشمعنى الواحد ايخلص اجراءاته بيده نفس جيل قبل

اتفق معك في ظل هالمتغيرات الاجتماعية والمادية ...لازم ايكون في ولاء ووطنية وحب خدمة الناس .....

اتصدق هالدوائر الحكومية ... الاخوات الموظفات والله انهن اكفأ ولو مش بيدها اي موضوع .... الكثيرات منهن يتعنين وايبادرن بالمساعده

اما الشباب فبعضهم ... يبغيله توعية

طبعا ما اعمم فماشاء الله كثير منهم والنعم فيهم

[مخطط قطري]

علبالهم انت مندوب بعد اظاهر مادروا انك مواطن هههه

والله يالشيخه مهوب مدح في عمري غير لاجيت مكان فزو من مكانهم ورحبو الحمدالله شكلي وهيئتي من روس عرب وشيوخ (وهذا الواقع) وحتى كلامي معاهم بكل احترام وادب حشمه وتقدير لانهم موظفين دوله عاد*انافي
طرحي للموضوع اقصد انه بعض الناس عندهم قل سنع ومعرفه في حسن التدبير والتصرف مع المراجع في كذا مؤسسه احصل هالصنف من الموظفين

[مخطط قطري]

لانهم مظلومين فما يتحمس للعمل

يجوز والله ليش لا

[مخطط قطري]

للاسف هذا واقع

وذلك بسبب انتشار المحسوبية ولازم يعرفون من اللي جاي عشان ايفزون له .

كثير من هالشباب خريجيين ثانوية او جامعية جدد وما يقدرون اشمعنى الواحد ايخلص اجراءاته بيده نفس جيل قبل

اتفق معك في ظل هالمتغيرات الاجتماعية والمادية ...لازم ايكون في ولاء ووطنية وحب خدمة الناس .....

اتصدق هالدوائر الحكومية ... الاخوات الموظفات والله انهن اكفأ ولو مش بيدها اي موضوع .... الكثيرات منهن يتعنين وايبادرن بالمساعده

اما الشباب فبعضهم ... يبغيله توعية

طبعا ما اعمم فماشاء الله كثير منهم والنعم فيهم

كلامك فيه كثير من الصحه

[دايموند]

والله يالشيخه مهوب مدح في عمري غير لاجيت مكان فزو من مكانهم ورحبو الحمدالله شكلي وهيئتي من روس عرب وشيوخ (وهذا الواقع) وحتى كلامي معاهم بكل احترام وادب حشمه وتقدير لانهم موظفين دوله عاد*انافي
طرحي للموضوع اقصد انه بعض الناس عندهم قل سنع ومعرفه في حسن التدبير والتصرف مع المراجع في كذا مؤسسه احصل هالصنف من الموظفين

محشوم ماقصد اقلل من هيئتك..بس لان اغلب الي يراجعون هم مندوبين فيمكن علشان جذي مافزعوا لك

و ع فكره صح كلامك لا مقارنه بين موظفين الجيل السابق وموظفي هالجيل خاصه فالدوائر الحكوميه
لازم يكون في تشديد ورقابه عليهم

[R 7 A L]

كلامك صحيح
الجيل الحالي يبي له توعيه ( علوم رجال )

[لطيف الروح]

السبب يا خوك التربية الفاسدة

رافق رفيقً لا تضايقت يشفيك
ولا تنفع الرفقة على غير فزعات

ولا الردي عند اللزوم يخليك
لا نافعاً نفسه ولا منه فزعات

[JN000N]

الجيل النص يديد واليديد
عليهم العوض

[جبر ال جبر]

ياريال ماشفت شي عيل بعضهم وقح يتكلم بسوالف ماصخه مع ربعه عيب تنقال في مكان عام ووزاره حكوميه محترمه حتى هيبه المكان تتلاشى مره في مكان الله يستر عليهم كانو يقولون كلام غير لائق وغشمره من العيار الثقيل وفيه مراجعين بس اغلبهم مندوبين ومن اخوانا المقيمين العرب ورديت عليهم قلت ماتستحون على ويهكم عيب وين مديركم انتم والله توقعت من وقاحتهم يغلطون على بس تفاجاءت بانهم اعتذرو وقالو اسمحلنا احنا دايمن هشكل حسيت انه محد معلهم احترام المكان الي هم فيه ومش مدربين بالتعامل مع الجمهور وكلهم يهال مايتعدون 20 مال الثانويه الي يدخلونهم مركز التأهيل الوظيفي كم شهر ويقطونهم في الوزرات بدون تأهيل في فن معامله الجمهور وهذي اهم شهاده

[aloosh]

المتعارف عليه الموظف لا يقوم من مكانه بل المعامله تنقل من موظف الى موظف
اما يقوم ويقعد يراكض بالمعامله ما صارات هذي

[جبر ال جبر]

علوش من قالك حد يبيه يقوم الحين كل شي الكتروني بس اتوقع راعي الموضوع يقصد الترحيب في المراجع وتذليل الصعاب امامه ومحاوله مساعدته وحتى لو قام من كرسيه وخلص الموضوع عادي ،،،، عيني في عينك شكلك من الموظفين اياهم عطني رقمك الوظيفي

[راجي الْعفو]

والله ياخوي مخطط الجيل الجديد اذا ما تلاحقوا عليهم أولياء الامور و ظبطوهم فالله يعين

لانهم فعلا كثير منهم ما يعرف علوم و سلوم العرب

عيال الكوفي شوب وَ البتاتا والايباد

الآباء لازم ياخذون عيالهم للمجالس الخيرة اللي تصقلهم

الابناء مسؤولية يا أولياء امور

[معماري قطري]

صادق اخوي مخطط وهذا الملاحظ

قبل تقدير كبير للشيبة ولكبير السن من الشباب .. يعني يجي رجال عمره 45 يعتبر شاب كبير يحصل من يخلصه ويتعب معاه تعب بسيط .. ألحين الوضع تغير واحد في نص عمرك قاعد على كرسي وانت واقف وهو يكلمك ببرود.

رحت مرة بصفة رسمية لوزارة البيئة وما قصروا الأمن صفيت سيارتي في مكان خاص ونزلت .. بس أول ما جيت بادخل الا واحد من الموظفين اللي نايمين يناديني تعال هنا وبطريقة استفزازية .. كنت اقدر اورطه ورطة كبيرة وانا صبري ينفذ خصوصاً كنت رايح لأَحد المدراء الكبار .. بس دوم طيبتنا كقطريين تحتم علينا عذر البعض .. لكن صراحة منظر من يشتغل هناك يدل على الشغل بدون نفس.

اللي يشتغل بنفس طيبة ويتعامل بالطيب مع أي شخص ويساعده صدقوني يمر يومه مستمتع ولا يمل الدوام.

[بوخالد911]

والبعض كاره دوامه كرة العمى.
ويحط حرته في المراجعين.

[معماري قطري]

المتعارف عليه الموظف لا يقوم من مكانه بل المعامله تنقل من موظف الى موظف
اما يقوم ويقعد يراكض بالمعامله ما صارات هذي

ناس وناس يا اخوي .. يجيني كبير سن ولو مقيم باساعده وباقوم له أكيد .. حتى الأجانب كثير منهم يستحقون التقدير والابتسامة الطيبة

[معماري قطري]

ياريال ماشفت شي عيل بعضهم وقح يتكلم بسوالف ماصخه مع ربعه عيب تنقال في مكان عام ووزاره حكوميه محترمه حتى هيبه المكان تتلاشى مره في مكان الله يستر عليهم كانو يقولون كلام غير لائق وغشمره من العيار الثقيل وفيه مراجعين بس اغلبهم مندوبين ومن اخوانا المقيمين العرب ورديت عليهم قلت ماتستحون على ويهكم عيب وين مديركم انتم والله توقعت من وقاحتهم يغلطون على بس تفاجاءت بانهم اعتذرو وقالو اسمحلنا احنا دايمن هشكل حسيت انه محد معلهم احترام المكان الي هم فيه ومش مدربين بالتعامل مع الجمهور وكلهم يهال مايتعدون 20 مال الثانويه الي يدخلونهم مركز التأهيل الوظيفي كم شهر ويقطونهم في الوزرات بدون تأهيل في فن معامله الجمهور وهذي اهم شهاده

إخوي جبر مره رحت آخذ ملف خاص بي .. الا عاملة الملفات وحدة ما شاء الله عليها وزنها كم طن وقاعده على الكرسي وتتكلم في التلفون .. شافتني وصدت كملت كلامها .. شكانت تقول؟ كانت تقنع وحدة بأن الرجال ما يعيبه شكله .. طلعت خطابة وانا مسكين انطرها تخلص مكالمتها والمشكلة تسولف في حيثيات ما اقدر اقولها.

[بـن عدوان]

إخوي جبر مره رحت آخذ ملف خاص بي .. الا عاملة الملفات وحدة ما شاء الله عليها وزنها كم طن وقاعده على الكرسي وتتكلم في التلفون .. شافتني وصدت كملت كلامها .. شكانت تقول؟ كانت تقنع وحدة بأن الرجال ما يعيبه شكله .. طلعت خطابة وانا مسكين انطرها تخلص مكالمتها والمشكلة تسولف في حيثيات ما اقدر اقولها.




هههههههههههه الوصف

[احبك يابلد]

الان هذي النوعية المرغوبة والمطلوبة في سوق العمل يجيك قليل الذوق والمرؤة والمبهر بالسلطة وضعيف النفس والمستفز المتصيد والمشكك في النوايا
والمعطل لمصالح الناس والحاسد عطه كم سنه الا هو رئيس القسم او يمكن المدير

[مختلفة عقليا]

السلام عليكم

ان الله احب اذا عمل احدكم عمل ان يتقنه .,

يا اخوي احس ان البلا في فهمهم لمعني وقيمة الوظيفة والمساعدة و ( السنع ) .,

بغض النظر عن الجنسية ., انا امثل قطر في أي جهه حكومية وامثل تربية هلي وامثل اخلاقي وقيمتي .,

انا كنت انا بلا ( فهم وادراك ) ف هالشي يكون متوقع وطبيعي .,

ويسلموو

[captin]

للأسف هذا هو الواقع

الإدارة الحكومية في قطر في الحضيض رغم الهالة
الاعلامية لمعظم الوزارات والجهات الخدمية بالدولة
كل يوم طالع وزير يصرح ولا مسئول يلمع وزارته او بالاحرى يلمع نفسه امام المسئولين .

أبسط الموضوعات في الوزارات تحتاج لواسطة لكي تنجز
يعني اذا ما تعرف لك احد في تلك الجهات مستحيل موضوعك يخلص
على سبيل المثال موضوع في الجوازات او في المرور او العمل او البلدية
وباقي الجهات اللي ما تحضرني لازم لازم تعرف احد وتتصل به قبلها بيوم او يومين
وتقول له يا بو فلان لو سمحت عندي الموضوع الفلاني تكفى باطرش لك السايق او المندوب
وبيالله يالله هذا الواقع للاسف

اما راحت اي معاملة بروحها بشكل طبيعي عادي يا تضيع او تهمل او اذا انجزت بتاخذ شهور وهو شغل نصف ساعة
بسبب الروتين الحكومي والموظف الحكومي البيروقراطي المتخلف .

هذا في الجانب الاجرائي اما الجانب الشخصي والاخلاقي للموظفين حدث ولا حرج كلن نفسه في خشمه
وبعضهم تسلم عليه ما يرد وبعضم من يشوفك جاي على الكاونتر قام وراح يسولف مع رفيجه ولا قال حق
زميلة انا طالع ساعتين وراجع وامثلة وسيناريوهات كثيرة تحدث يوميا في معظم جهات الدولة وخصوصا الخدمية.

للأسف ان الموظف الجديد والخريج الجديد اللي يلتحق بمثل هالوزارات والجهات خلاص يتنهي يدخل في عالم التخلف
وعالم البيروقراطية العربية المتخلفة .

الوزارات كلها تبي لها نفاض تبي لها فكر موسسي تبي انظمة متقدمة مثل انظمة شركات البترول والغاز والبنوك .

[لـبـيـه]

يارجال الحين بعض الموظفين مش الكل البعض من الموظفين الشباب يحتاجون من يعلمهم شغلهم

[eXpert*]

المثل يقول : حط فلوسك بالشمس واقعد بالظلال

رحت دول عديدة ،، معاملتك ماتمشي الإ بحضورك الشخصي الإ عندنا المندوب يخلص تعاملاتك الحكومية أسرع من أي واسطة وأي معرفة و و و و ..

[مخطط قطري]

اولا اشكر الجميع على تفاعلهم ومناقشتهم للاسباب واعتقد اغلبكم شخص الموضوع بشكل صحيح وفعلا هذا الي حاصل بس والله يالربع هالشي مايسر ترى بعد كم سنه بنكون مثل دول جنبنا تروح تبي تخلص لك شي تحس كانك غريب في بلادك وماتعرف حد وعلى فكره سالفه المندوبين انا طول عمري مشغلهم بس مب في كل شي بيخلصك المندوب لازم بعد تسوي اتصالاتك عشان امورك تخلص بين فلان وعلان المندوب له سقف معين يتحرك فيه ويخلص امور بسيطه مب كل شي بس هالزاويه من النقاش مفروغ منها وعارفين كيف نخلص معاملتنا القصد زرع روح التفاني والااخلاص في العمل مابيه يفز من كرسيه ويراكض لا بالعكس قاعد ومعزز ومكرم بس حسسني انك صج مهتم بالمعامله وبتخلص الرجال الي قدامك في اطار صلاحياتك ومقدرتك بس بارد ومفهي ولاتعرف السنع حتى اذا جاك مراجع ماتطلب له قهوه وشاي على حساب الدوله مب على حسابك بعد في امور صغيره وبسيطه بس جدا مهمه ومن جذور وعمق السنع والعادات والتقاليد القطريه الاصيله وترى امور وايد حصلت معاي في الدوائر الي ذكرتها بس مافي مجال اذكرها بتفصيل لانها بتشتت محور الموضوع الرئيسي بس ممكن مع طرح وجهات النظر ممكن اسردها في نفس هالموضوع لانه فعلا الموضوع مهم جدا ونبي الجميع يتعاون للرقى بمستوى الموظف القطري لانه اسلوبك وطريقه تعاملك مع المراجيعن انا عندي تساوي 60% يعني حتى لو شغلك بيرفكت ومسكت وتخلص كل شغلك وتنجزه بسرعه هذا يمكن عليه 40% فقط يليت المدراء ينتبهون لهلنقطه الي ماراح يدرسونها اكاديميا في اعرق الجامعات الدوليه ولكن صدقوني اذا كانت المعامله والاسلوب وروح النخوه والفزعه موجوده عن الموظف اعتقد والعلم عند الله راح تكسر مؤشر الاداء التميزي في اي مؤسسه طبق هالشي ولكن مشكلتنا الكبيره يجونا موظفين عرب او اسيويين يعلمون ستاف كبير من الموظفين القطريين الشغل وهذاك كوبي بيست على الرغم من ضعف امكانيات الموظف الاسيوي او العربي في تعليم القطري الموظف

[بومحمد المطاوعه]

الله المستعان ,,

خلنا ساكتين ياريال

لو تكلمنا على البعض الي يسوون جذي
بنطلع جذابين

ف السكوت من ذهب

والله يعينك على الي صار لك

تحياتي

[بريق الحق]

للامانه
اي قطري يسئلني او يستفسر عن اي شي اعامله مثل واحد من الربع واحاول اخلص موضوعه
وشهادة حق الخوات في اي مكان يخلصون الموضوع حتى اذا ماكان عندها الموضوع الله يجزاهم خير

[مخطط قطري]

لا بالعكس يابومحمد ادلو بدلوك طال عمرك وقول الي بخاطرك نستفيد من جميع الاراء انا قلت يمكن انا الوحيد المصدوم من هالوضع عشان هشكل طرحته في الحوار العام ونبي الكل يشارك على وعسى نطلع بقرارات وتوصيات ترفع للمسؤلين الكبار وصناع القرار بالدوله من اشخاص ذوي خبره واحتكاك بهالظاهره الي طفحت على السطح وتسبب كثير من العراقيل الادارية وفشل في مستوى رضى الجمهور( الي اساسا هالموظف وجد من اجله) واعتقد الحل سهل وبسيط جدا تفعيل دور لجان التفتيش او نشوف حلول افضل يعني مادري انا وجهه نظري نستمع ونشوف وبعدها نتخد الخطوه الصح

[مخطط قطري]

للامانه
اي قطري يسئلني او يستفسر عن اي شي اعامله مثل واحد من الربع واحاول اخلص موضوعه
وشهادة حق الخوات في اي مكان يخلصون الموضوع حتى اذا ماكان عندها الموضوع الله يجزاهم خير

بيض الله وجهك وجعلك حي وسالم انت والي معاك هذا من طيب اصلكم وهذا الي نبقيه يعني هذا صار من النوادر مثل قرانيس الشواهين في هالوقت كثر الله من امثالكم قطر ماراح تتطور وتحافظ على تقدمها وريادتها في كافه الاصعده الا بسواعد عيالها وهذا الي نبيه كفو عليكم

[بومحمد المطاوعه]

لا بالعكس يابومحمد ادلو بدلوك طال عمرك وقول الي بخاطرك نستفيد من جميع الاراء انا قلت يمكن انا الوحيد المصدوم من هالوضع عشان هشكل طرحته في الحوار العام ونبي الكل يشارك على وعسى نطلع بقرارات وتوصيات ترفع للمسؤلين الكبار وصناع القرار بالدوله من اشخاص ذوي خبره واحتكاك بهالظاهره الي طفحت على السطح وتسبب كثير من العراقيل الادارية وفشل في مستوى رضى الجمهور( الي اساسا هالموظف وجد من اجله) واعتقد الحل سهل وبسيط جدا تفعيل دور لجان التفتيش او نشوف حلول افضل يعني مادري انا وجهه نظري نستمع ونشوف وبعدها نتخد الخطوه الصح

ياليت لو انت الوحيد بس الي مصدوم

ولكن شريحه كبيره يتكلمون على هؤلاء البعض
الي مايستحقون ان يمسكون مناصب
او في مكاتب

لخدمه العملاء

للأسف البعض منهم لاعنده اسلوب فن التعامل ولا عنده ضمير لتخليص المعامله

[معماري قطري]

هههههههههههه الوصف

هذا كان أَقل ما يقال فيه مقاطع حذفتها .. والله تتعجب من هالجرأَة وياليتها مجابلة الكاونتر لافه وجهها الجهة الثانية بس التفت لي وصدت تكمل مكالمتها المهمة للغاية

[فــلان]

صدقت أخوي فعلا ً للأسف هذا اللي حاصل هالأيام و من وجهة نظري الخاصة إن هالأمور من تعليم السنع وحسن الخلق وفن التعامل مع الآخرين تنزرع في البيوت وشلون الآباء و الامهات يرشدون أبنائهم ويعودونهم على هالأسس من قبل ليطلعون للناس. أغلب هذه الحالات و إن لم يكن جميعها ناتجه عن غياب أولياء الأمور وعدم إلتزامهم بزرع هذا الشي في أبنائهم منذ صغر سنهم.

[مشاكل]

من باب تجربة
يسر أمور الناس ،، ييسر الله تعالى أمرك ويرزقك من حيث لاتحتسب

[كروة]

كلامك صحيح
الجيل الحالي يبي له توعيه ( علوم رجال )

يبيله جلد مب بس علوم رجال

[بن غيث]

اليوم صادفت هذه النوعية
في ادارة التوثيق العقاري بوزارة العدل .. لطلبات شهادة املاك
موظف مصري متغطرس لابعد الحدود واشتكيت عليه مسئول القسم
لكن مسئول القسم قال : لا استطيع فعل شئ له !!!!!
وايضا في المحكمة المدنية ... موظفين لا يحترمون اي شخص .. اهمال وضياع طلبات واستهتار
حاول توصل لمسئول عندهم .. من المستحيلات
هيئات ووزارات تحتاج الى تغيير جذري .. من مسئوليين وموظفين واجراءات وقوانيين