المقاول ما التزم بضمان صيانة البيت في العقد. وين أشتكي عليه

[فــلان]

السلام عليكم

عندي أمور في البيت إطلعت وكلمت المقاول كذا مره يجي يحل الموضوع لكن تجاهل بلاغي له أكثر من مره وما منه جواب وأنا صراحه محترق قلبي على أمور وايد فالبيت إختربت بسبب شغله السيء و أبي آخذ حقي منه بشكل يبرد الخاطر وش مفروض أسوي أو وين أروح أشتكي عليه


وجزاكم الله خير

[بريق الحق]

اول شي اشتك عند رب العالمين
وبعدها الاخوان يفيدونك شلون تاخذ حقكك بالقانون

[معماري قطري]

في قطر يا اخوي المقاولين طايحين في نعمة .. يسون اللي يبون ولو رفعت قضية واضحة المستشارين القانونيين ينسون ما يسمى بالممارسة الهندسية العامة ويدققون في العقد.

بالنسبة للمواصفات القطرية للحين غير ملزمة .. قالوا في الربع الأخير بيتم الاعلان عن كود ( قانون ) البناء الخليجي الموحد وللحين ما أعلنوا عنه وهل بيكون ملزم أو لا هذي مسئلة ثانية.

الله يعينك ويوفقك .. المقاولات اعتقد بين الاقتصاد والبلدية .. والمكاتب الاستشارية عند التخطيط العمراني

[ameeer3]

عندك شيك الضمان الي المفروض يتم عند الاستشاري حسب العقد المبرم ، بانه في حاله عدم التزام المقاول بضمان الصيانه يتم خصمه من الشيك.

[سعود.]

عندك كرت الضمان ؟؟؟؟

[فــلان]

جزاكم الله خير يالربع. اي نعم عندي العقد مذكوره فيه مدة الضمان

[شموخ دائم]

,

,


مرحبا


موفق ان شاء الله

الحقوق ما تضيع عند رب العالمين

اول شي من الضروري تترك العصبيه لانها ما تفيد بمثل هذي الظروف

واذا حاب تاخذ الموضوع قانوني فلابد نوثق الموضوع قانوني وحسب العقد وحسب النقاط التاليه

ا- اول شي توثق المشكله ( كتابه ) والافضل تروح عند الاستشاري الي ماسك بيتك
وتسوي كتاب وتحط كل الامور الي تحتاج صيانه ويكون واضح ومحدد وفيه لسته الصيانه
وتختم الكتاب بفقره توضح له ان حسب العقد المبرم بينكم المقاول ملزم بعمل الصيانه
وتوضح التاريخ الكتاب والفتره الزمنيه المتبقه للصيانه

( حتى ما تنتهي الفتره وبيقول انت ما بلغتني رسمي )

بعد الكتاب هو ملزم بعملها حتى لو انتهت الفتره لانك بلغته خلال الفتره القانونيه وهو اخل بهذا


2- ترسل له الكتاب على العنوان اما فاكس او ايميل او الاثنين مع بعض او يسلم في مكتبه باليد

بعدها بكم يوم اذا ما تحرك ( ترسل كتاب موضح فيه باللجوء للقضاء لعدم التعاون وعدم الرد ) ولعدم القيام بعمل الصيانه اللازمه


50% بعد الكتاب بيتجاوب معاك وبيتصل فيك احد منهم اذا جاه الكتاب من الاستشاري


او انت تكتب الكتاب باسمك كـ مالك البيت

وتفتح ملف قضيه في المحكمه والمحكمه بتخاطبه رسمي
وبعدها بيطلع ( مندوب خبير يعاين الامور ويعمل تقرير للقاضي )
واكيد بيحكم لك خلال 6 شهوربالكثير


بعد الخبير ما يعاين البيت
تقدر انت تعمل الصيانه على حسابك وتحتفظ بالفواتير والقيمه
وتطلبها من المحكمه ويلزمون المقاول بردها لك


,

,

[بن غيث]

انا مع شموخ في الحل القانوني والاجراءات التي ذكرها
لكن يجب اخطار شركة المقاولات بشكل رسمي .. اي ارسال الكتاب عن طريق البريد الممتاز والاحتفاظ بآيصال البريد وذلك لحاجتك اليه عند تحريك الدعوة القضائية ..

[معماري قطري]

المشكلة كثيرين ما يحطون استشاري وعقدهم مع المقاول كاتبه المقاول .. وكثيرين يبنون عظم وهم يشطبون مع عدة مقاولين وتضيع الحسبة هشكل .. والمفروض قوانين البناء تكون واضحة وكل عقد حتى لو ما يتضمن شروط التعاقد الأساسية يكون المقاول ملزم بها بما إنه يشتغل في دولة قطر .. الشروط الأساسية هذي لازم توضح ويكون كل مقاول فاهمها .. فترة الصيانة مثلاً 400 يوم لازم يكون فيها توصيف لنوعية الصيانة وحدودها وتغطي أي جزئية .. الهيكل الإنشائي والعمر الافتراضي مثلاً لازم يكون واضح أَي شلوخ واضحة يحدد عمقها واتجاهها ونوعيتها ومكانها ولكل نوع يكون تعامل معين.

النظام القضائي يجب أن يواكب هذه النوعية من الشكاوي والقضايا واللجنة اللي تطلع تعاين تكون لجنة قانونية وهندسية في نفس الوقت ومحايدة كذلك .. حتى يكون هذا الشخص مقاول لازم يحمل ترخيص بمزاولة نوع مقاولة معين وعندنا الغالبية يتعاملون مع عمال لا مرخصين ولا مؤهلين للتقاضي .. باختصار نظام التقاضي ونظام المقاولات وترخيص من أصغر عامل لأَكبر شركة مقاولات لازم يحدد بضوابط واضحة وأُسس متكاملة ومن يتلاعب فيه أو يشذ عن هذي الضوابط يحاسب قانونياً.

[بن غيث]

نعم "معماري"
نعاني من عدم وجود قوانين لحماية المالك .. وعدم وجود لجان في الجهات المختصة لحل تلك المنازعات ودية وتحويلها للجهات القضائية في حال عدم الوصول لحل يرضي الطرفين "الاسكان و البلدية"
ومعظم قضايا المحاكم من هذه النوعية ... والشركات تزاول عملها بشكل عادي وتستمر عمليات الغش

[qtr qtr]

المفروض يكون عندك مبلغ متبقي من المشروع كضمان في حالة حدوث خلل يغطي من ضمنها او يقوم المقاول باصلاح الخلل اين كان مقاول كهربه او سباكه او صبغ او ديكور .. انا تعاملت معاهم بهالطريق اخلي مبلغ متبقي من المشروع فخلال مده الضمان وحصلت بعض العيوب من مقاول الكهربه والسباكه كلمته اكثر من مره وما سوى شي فمن مبلغ الضمان سويت العيوب والحمدلله لا محاكم ولا عوار راس .

[سعود.]

المواطن ( القطري ) العادي تقريبآ

اكبر مشروع في حياتة ( بيت العمر )

بعد ينصب علينا لازم يكون لها حل ورقابة وعقوبة وتشهير باالصحف المحليه حتى يكونوا عبرة لغيرهم .

حسبي الله عليهم لاحسيب ولا رقيب .

[معماري قطري]

في تامبا كشفوا خلل في بيوت بناها مقاول وباعها ( مطور عمراني ) بعد 10 سنين وألزموه باصلاح الخلل وحطوا عليه غرامة كبيرة وبعدها أعلن افلاسه .. عندنا تطلع عيوب كارثية أوقات يفسرون الخلل بضعف الأرض أو المياه الجوفية .. أو وصلت بهم الى كائنات غريبة

[لطيف الروح]

في تامبا كشفوا خلل في بيوت بناها مقاول وباعها ( مطور عمراني ) بعد 10 سنين وألزموه باصلاح الخلل وحطوا عليه غرامة كبيرة وبعدها أعلن افلاسه .. عندنا تطلع عيوب كارثية أوقات يفسرون الخلل بضعف الأرض أو المياه الجوفية .. أو وصلت بهم الى كائنات غريبة

نسيت المطر

[معماري قطري]

نسيت المطر

هم الله يهداهم يتشردون من أخطاؤهم بهذي الأُمور ولازم يتبعونهم ناس كثيرين ويستوي عندنا البناء والهندسة شيء بدائي للغاية

[بوخالد911]

عندك شيك الضمان الي المفروض يتم عند الاستشاري حسب العقد المبرم ، بانه في حاله عدم التزام المقاول بضمان الصيانه يتم خصمه من الشيك.

أي شيك يمر عليه 6 شهور وأكثر يعتبر ملغي
لذلك المقالوليين عارفين هالشي
واللي يبي يبني يتفق مع مقاول لموضوع الشيك بس بدون ما يكتب تاريخ ع الشيك