ام الدويس؟!

[العفراء]

السلام عليكم
تذكرون قبل كانوا بالخراريف يتكلمون عن شخصيات ما يندرا هي صج حقيقيه و الا من باب الخيال

الموضوع طرا على بالي لان اخويه شموخ دايم قريت له تعليق عن اللي ريوله شرات الحمير عزكم الله

و تذكرت ام الدويس و شي جني بعد اسمه اظن درياه اونه مربوط بالبحر

يوم نسأل الاوليين يقولون هايل جن و حقيقيين بس ما قد شفناهم و لا شفنا اي إثر لهم

انا اتوقع قبل الاوليين ما كان عندهم شي يتسلون به فاكيد كان واحد ايمعهم و يقرا عليهم قصص مثل كليلة و دمنه و الف ليله و ليله و مغامرات سندباد
و الظاهر ان بعضهم قام يخوف الفريخات بهالسوالف اللي عن الجن علشان ما يظهرون بالقوايل و بنص الليل و شوي شوي صدقوا سالفة الجن مثل ام الدويس و درياه

وين حسن يخبرنا دامه هو راعي بحر ما قد تروالك هذا درياه بالبحر او ام الدويس ؟

[بانغ بانغ]

شفت فيلم عن ام الدويس صراحة وايد ايخوف ... حدثت الحالة او الحادثة في فندق الحمرا في ابوظبي وهي قصة حقيقية حيث كان الفندق مسكون وكان مؤذي اهل المنطقة .

ام الدويس شخصية يقال انها وهمية والبعض يقول انها حقيقية حيث كانت تسرق الاطفال في مهدهم وتبيعهم للجن او شي من هالقبيل .

انا من فترة كنت بنزل موضوع عن الجن والبيوت المسكونة

[بانغ بانغ]

اسم الفيلم djinn وهو فيلم انتاج اماراتي والمخرج كان شخصية معروفة عالميا في افلام الرعب .

[العفراء]

هي والله يا بانغ بانغ انا سامعه بهالفيلم بس ما شفته ما احب اصلا افلام الرعب احب الافلام التاريخية و القصص و الدراما شفت من فترة فيلم ليتل بوي وايد حلو شوفه اوكي و عندك فيلم السقوط لهتلر هالفيلم تاريخي وجميل جميل جميل بس جديم وايد
نرجع لام الدويس يقولون انها مغطايه بالذهب و انها حلوة و تفتن الرياييل ما تحسون ان هالسوالف جذب اصلا وين نقدر نشوف الجن لا و بعد نربطهم اعتقد ان في حاجز و غطاء عن رؤية الجن

[بانغ بانغ]

بس هي تتحول وتعيش في منطقة قديمة مش فاكر اسمها...

الله يهديك يالعفراء بس تبين اتخرعييينا .... شو ترمسسين ابوووييه

[حسن]

الصراحه الموضوع غريب
:)

انا قرت رد شموخ دائم عن بوريل حمار
هذه قصه انتشرت عندنا على الخطوط الخارجيه وبالاخص خط الشمال
بان شخص ركب معاه عبري يوصله للدوحه ولمح ان رجله رجل حمار
وتم تداولها الناس فتره من الزمن وهي في حقبه الثمانيينات وانتهت
كلها خزعبلات والناس فاضيه والشوارع مافيها زحمه
:)
وانتشر سالفه المصري اللي باع الخروف على البنغالي بعدها وهم كلهم راكبين عبريه
في البدي وكان معاهم خاروف وقام المصري وباع الخاروف على البنغالي اللي معاه
ولما جاء ينزل البنغالي وهو الاخير في النزول جاء ينزل الخاروف وهو لصاحب السياره
وقاله انا باعني ياه المصري اللي نزلته من شوي قاله راهي السياره هذا خاروفي
هههههههههه
يعني ناس فاضيه
اما سالفه ام دويس هذه يمكن دارجه عندكم اما عندنا كانت يخرعون الصغار علشان النوم
ان بتجيهم ام السف والليف والغول
واما بوردياه
هذا يسمى ان شخص يطلع من البحر ايام الغوص ويخوفون فيه الناس
شخصيه وهميه جات من فراغ
الصراحه موضوع خفيف
هههههههه

شكرا لك

[<اضرب واشرد>]

السلام عليكم

صحيح أختي أول كانوا يؤمنون بشكل مبالغ فيه (بالجن) و (السحر)، ويستأنسون في قصصهم بالحكايات عن ذلك، فالغموض والخيال لازال يجذب الإنسان حتى في شاشات السينما والأفلام الخرافية الآن مثل (هاري بوتر).

وبعضهم ربما إذا كبر يتوهم نتيجة ذلك أنه يرى جن يتشكلون على شكل حيوانات أو بشر في البر أو على شاطئ البحر أو .. إلخ ، فيقص مارآه على الناس والناس يصدقونه! وأحيانا يجهلون قوى الطبيعة (البحر) فيحيلون أسباب الغرق والعواصف إلى قوى خارقة (بودرياه)، وأحيانا لتخويف الأطفال لمنعهم من كذا وكذا

بين يدي كتاب عن الحكايات الشعبية في قطر، وهذه عناوين لروايات عن السحر والجن:

البنت والعفريت
الكلب الجني
الأمير المسحور والطلبات المستحيلة
رمان الجدي
فرس الجان
المهر المتكلم والبنّورة السحرية
راعي الغنم (والساحر)
الإبن المسحور
الدجاجة المسحورة
شجرة الكركم (والجن)
الجني المقلد
أبوعيد والجن الثلاثة
بسم الله الرحمن الرحيم (والساحران)
المرأة الجنية
صداقة المرأة الإنسية للمرأة الجنية
منصور والعجوز الجنية
الشيخ الجني والعَطَش
المرأة الجنية
الخروف الجني
الحمار الجني

[العفراء]

لو تلاحظ بانغ بانغ بكل منطقه امزودين بالتاليف عنها
وحليلها والله ام الدويس مب مخلينها بحالها طايحين ابها حش
و ترى كلنا انزيغ من طاريهم بس بالنهار و يمعة الناس شوي نتشجع:shy:

[العفراء]

حياك الله حسن راعي البحر
زين والله ان هاي خراريف مب صجيه و الا جان محد وطى البحر
تخيل حسن و انت بالبحر و قاعد تحدق و تحصل غرشه مصكره بغطا
الغرشه تكون سودا
عاد لو تطيح بيدك هالغرشه و تفتحها و يظهر منها دخان و الا هاك اليني بودرياه يقول امر الشيخ شو بغيت

لو انا بيغمى علي صراحة

بس القصص الاوليه كانت حلوة و خيال عاد الا طاري ام الدويس عندنا الكبار للحين مصدقينها مثل هاللي بو ريل حمار بقطر و مشت ع الناس
يمكن لان الناس تحب القصص اللي تخوف و سوالف الين

اذكر من جمن سنه بتويتر واحد اشترك بمعرف انه جني صجي و وايدين قاموا يتابعونه و قام اتفق مع ربعه على اساس يقول لهم بتويتر هم شو قاعدين يسوون على اساس انه جني و يقدر يعرف شو يسوون و ينتقل من بلاد لبلاد و الناس صدقوا و طاروا به لين ما ياك واحد سعودي و هكر ع معرف اليني بتويتر و اكتشفنا ان السالفه جذب انا كنت مستانسه ع الغموض اللي بالموضوع اكشنوها صح و سوووا لنا جو ههههه
الموضوع مكانه الاستراحه صج خفيف السموحه حطيته بالمكان الغلط

[العفراء]

و عليكم السلام اخويه اضرب و اشرد
هيه والله نلاحظ حب الناس لسوالف الين و بشكل كبير يمكن لان وسايل الترفيه كانت شبه معدومه فكانوا يتونسون ع سوالف الين و جذا

هاري بوتر كان عن السحر و الانتقال من عالم لعالم و خيالي و الناس تحب الفنتازيا و لو تلاحظ البريطانيين بالذات يطلعون ذهب من الايرادات على هالنوعية من الافلام
هاري بوتر
ذا هوبيت
ملك الخواتم
اظن بعد قراصنة الكاريبي انتاج بريطاني

و صح اني للحين ما قريت القصص عن الين بالحكايات الشعبيه القطريه بس ما استبعد انها بتتشابه مع قصصنا لان نحن و اياكم تقريبا بيئة وحده

[شموخ دائم]

,

,

مرحبا


شكرا على الموضوع الخفيف الطريف

العفراء
وحسن وبقيه الاخوان ماقصروا بشرح تلك القصص

يطول الحديث بهذا الموروث القديم

القصص بتلك الفتره هي ( السينما والتلفزيون ) وهو التسليه الوحيده المتاحه بتجمعهم
هو وسيله التواصل

انا اعتقد ان الانسان دائما يبحث عن ( العالم الاخر ) وعن ( قوه خارقه ) تفوق العقل والتصور قوه شريره

مثل الفراعنه يبحثون عن حياه اخرى ( بالسحر )

ومنها امتد هذا الامر الى حياتنا اليوم ولو ان اختلفت الطريقه


ما زلنا بالواتس اب بين فتره وفتره تطلع لنا صوره عن ( جن ) او حوريه بحر وجه انسان وجسد سمكه
او صوره ( مخلوق غريب ) وفي الاخير يطلع انها ( تأليف )

من يعمل هذه الصور ؟؟
ومن يركب هذه القصص ؟؟
من يختلق هذه الاعاجيب ؟؟؟

هو ( فضول الانسان ) بالعالم الاخر والقوه الخارقه
ما زالت مسيطره على عقول البشر

ومنها امتد هذا الى ( الافلام ) بكل الكنولوجيا والخيال المتوفر اليوم

اجدادنا وشيبانا الله يغفر لهم ويرحم الاموات منهم والاحياء

عاشوا حياه فيها ( قسوه الظروف ) مجبورين على المشي مسافات طويله

بر متسع مظلم ..... وصحراء مافيها ونيس

بحر ماله نهايه مظلم وموحش وليالي وايام طويله

وهم مجبرون على السير فيه لطلب الرزق والسفر بهكذا ظروف

هذا القلق
والتخيل
والسير في هذا المجهول
واصوت الطبيعه في هذا السكون
لها مفعول غريب على النفس
يشعر الانسان بضعفه

خلق قصص واساطير غريبه وعجيبه
منها ( تعبير عن هذه الوحشه )
ومنها ( سرد قصص ) تسليهم بتلك الايام والليالي الطويله
مع سرد تلك القصص
يدور حديث يتسامرون فيه
بكل مافيه من تسائلات وخوف وقلق المشهد
وايضا فيه بعض قصص
( البطولات ) والشجاعه بمواجهه هذه الظروف

وفيه ( عبره ) وحكمه
( التوكل ) على الله وبعض القصص فيها
تحدي الجن


على سبيل المثال

( حماره القايله ) او حماره الظهيره

كانت جدتي الله يرحمها تقص علينا قصتها
عشان ننام الظهر ونجلس بالغرفه
وما نطلع بتلك الفتره في الشمس الحاره لانها بتطلع لنا وبتلحقنا
لوجود تلك الحماره الساحره التي تدور في الفريج ما بنطلع من الخوف
:)

الحكمه ان احنا ما نطلع من البيت بتلك الحزه
وبنفس الوقت هي قصه نجلس نسمعها واحنا مندمجين ومتوترين


حتى لو زرعت فينا الخوف
هي

( اسطوره )

وكل شعب وله ( اساطير )

حماره القايله
بورجل حمار
بودرياه
ام دويس

كل قصه وفيها حكمه وقصه فيها ( رعب )
:)

لو الموضوع بيدي كان طلعت قصه اسمها
( حماره تويتر )
:shy:

لما فيه من توتر بين الاخوان والشعوب العربيه والاسلاميه


,

,

[معماري قطري]

خوفتوني وانا ساكن بروحي شلون بانام الحين

[العفراء]

صباااح الخير اخويه شموخ

شرحك جميل و استمتعت باللي قريته بردك

احس فيه تفصيل و اقناع لسوالف الجن و

الشخصيات اللي صاحبت القصص الموروثه عن الجن


امس ربيعتي تقرا الموضوع تقول اشقا ما تصدقون على اساس هي سافرت ما ادري اي دولة اوروبية نسيت
المهم من كثر التماثيل بالمنطقه كانت كل ما
تشغل القران
بغرفة الفندق فجاة المسجل روحه يبند

تقول من هالتماثيل لما سالت قالوا لها الجن يسكنون بالصور و التماثيل و اكيد هم تسببوا ع المسجل و سكرووه :rolleyes2: ام الدويس شكلها راحت اوروبا

[العفراء]

معماري اسم الله عليك هههههه اقرا المعوذات و آية الكرسي حافظ عليك اخويه