مسكينة الأم

[مشاكل]

اتعبت وشقت وربت
ويوم اكبروا عيالها وبناتها
كلن راح في حال سبيله وتركها بين اربع طوف
وياليت اتركوها في حالها كان زين !!!
صاروا في كل طلعة وكل سفرة يقطون العيال عليها
وياليتهم ع الاقل كل اسبوع يطلعونها معاهم او ياخذونها معاهم في سفراتهم
انانية مابعدها انانية وجحود مابعده جحود

والله وبالله ان اللي تسويه في امك بكره بيستوي معاك
وان غداً لناظره لقريب

[طبيب قطري]

ياساتر..

[حرف]

وفيه امهات عيالهم وبناتهم شايلينهم ومايروحون مكان الا وهم معهم ولا يدش البيت شي قبل لا يجيهم
ولهم خدم وحشم وغرفهم اكبر غرف في البيت وموفرين لهم عيالهم كل سبل الراحة وذلك طمعاً في رضاهم وارضاء الله عزوجل الذي وصى بهذا الشي
هؤلاء نقول لهم هنياً لكم
والدنيا مازال بخير دام انكم موجودين

[ابن البيطار]

جزاك الله خير اخي فعلا الجحود بلغ حده عند البعض واصبحنا نرى هذه النوعيات بكثره الله المستعان

[معماري قطري]

الحمد لله هذي أول سفرة لي مع أُمي ولعلاجها وكنت احاول فيها مرات ومرات تسافر معاي ولا ترضى

أَلحين إن شاء الله تتقبل مسألة السفر

[طلعة الروح]

أنا عندي عبارة دايما أقولها (اللي مب قد تربية عياله ولا يبي يتكفل فيهم لا يجيبهم)
لأن الناس مب ملزومين بعد واذا انتوا ابهاتهم مب قادرين عليهم ف غيركم مابيكون أحن عليهم
منكم، هالايام للاسف هاي الواقع انا اشوف ان الجدود مب لازم يربون عيال عيالهم او يتكفلون فيهم
حدهم ساعه ساعتين اذا كلش مضطرين يتركونهم او زيارات خفيفه عابره أما انك تسافر وتقط عيالك
انا ضد هالمبدأ لأن حتى لو ما اعترضوا وسكتوا ترى هم كبار واغلبهم مرضى ومايقدرون ع تربية يهال صغار
وكثر الله خيرهم انهم ربوكم وكبروكم اما عيالكم مب ملزومين فيهم من الألف الى الياء.
كذلك اللي يترس البيت خدم ع اساس كل خدامه تمسك ياهل أحب اقول عمر الخدامة ماكانت شغلتها التربية وعمرها
ماتقدر تربي عيالكم ولا تسنعهم لأن ببساطة هذي مب وظيفة الخدامة.
فاللي يبي يسافر ياخذ عياله ولا يدبرلهم مكان يوديهم فيه بس مب عند الاجداد لأنهم أكثر ناس يستاهلون
نريحهم ومانضايقهم، لكن البعض أناني ويبي يستانس ع حساب راحة أقرب الناس له وهاي يستاهل أن
الواحد يقوي قلبه ويعطيه كاش في ويهه ببساطه سفروا عيالكم وياكم ولا خلكم معاهم ف البيت.

[ضوى]

امي رويحة الجنه

لو هي عايشه الله يعفي عنها ويغفر لها لا اطيح تحت ريلها واخدمها بعيوني وماخليتها الا وقت النوم

ياعساها بجنة النعيم الفردوس الاعلى مع سيدنا محمد عليه الصلاه والسلام

عورت قلبي ياخوي

[Qtr37]

الله يجزيهم الجنه يا رب!!
ترى في مشكله اكبر من ان الابناء يخلون عيالهم عندها ويروحون،، المشكله ان واحنا قاعدين معاهم عيونا في موبايلاتنا نكلمهم من غير ما نشوفهم حتى الله يغفر لنا
انصح نفسي وغيري،، اذا قعدتوا مع امهاتكم واباءكم كلموهم وشوفوهم وامسكوا يدهم واضحكوا حتى لو قالوا شي ما يضحك وتفاعلوا مع سوالفهم حتى لو سالفه مب مثيره للاهتمام!!!
الله يعينا على برهم يا رب.

[khalid525]

امي رويحة الجنه

لو هي عايشه الله يعفي عنها ويغفر لها لا اطيح تحت ريلها واخدمها بعيوني وماخليتها الا وقت النوم

ياعساها بجنة النعيم الفردوس الاعلى مع سيدنا محمد عليه الصلاه والسلام

عورت قلبي ياخوي

اللهم امين


اغلب اللي اعرفهم بارين في والديهم ، ومعاك فعلا ترك اليهال عند جدودهم شي يضايق اذا زاد عن حده

[white bird]

مافي أحن من الأم على عيالها
و مع جذي ممكن تمل أحيان من أزعاجهم ممكن يطلعونها عن طورها
فشلون راح يتحملهم الغريب بالذات الخادمات
و عقب يزعلون أذا الخادمة صرخت ولا ضربت الياهل 💔

[aziz4z]

مسكينة الام , حتى و هي جدة تخاف على أحفادها , و الابن مايحترم سنها , و يقط العيال عليها , و ممكن ماتقدر عليهم , و خاصة جيل الايباد , بدون مايكلمونها , يجيبون العيال عندها و يطلعون و ماتدري المسكينة.
الله يصلح الحال

[العفراء]

اذكر برمضان قبل سنتين كنا نشوف بالتلفزيون دعايه مثل توجيه اسري عن اللي يفرون الابو و الام في دار العجزة

انا كنت استغرب اقول معقوله في ناس عرب و مواطنين بيسوون هالسواة

المهم بالدوام سوينا يوم رحلة لمركز دار العجزة و كانت المناسبة بعيد الاتحاد للامارات و قمنا انوزع عليهم الهدايا و الله حرام شقايل يغمضون وحده عيوز قبضت ايدي تبي تبوس ايدي قلتلها لا يا امي انا اللي ابوس ايدج و راسج حرام والله اشقا في ناس ترضى على جنتهم بالدنيا هالاهمال

شي يزعل ان اللي اتعبوا و شقوا بحياتهم علشان عيالهم لما يوصلون لاخر العمر ما يلقونهم قراب منهم

و ترى اللي بدار العجزه لهم اهتمام كبير صحي ونفسي واجتماعي بس بعد هم اكيد يفكرون بالقرب من عيالهم
لكن هاللي ببيوتهم و مهملينهم عيالهم و لا يزورونهم الا بالاسبوع مره او بالشهر مرتين مهما وفرتوا لهم من حاجات ماديه و شغالات يخدمونهم ترى والله ما يكفيهم و لا يعوضهم عن مشاعرهم المكسوره ببعد العيال عنهم

لا تظنون ان بر الوالدين بزيادة الشغالات و الممرضات و تتوفير المونه لا والله بر الوالدين ان كل واحد منا يكون بخدمتهم بنفسه وما يخلي حد ينوب عنه حتى ابرة السكري تعلموا تعطونها ارواحكم لمرضاكم تراها مب جايده علشان نخلي الممرضه او الشغاله تعطيها للوالدين و هم ترى راحتهم بقرب عيالهم منهم

[مختلف جداََ]

المفروض اللي يقط أبوه أو أمه في دار العجزه ينسجن .

استغفر الله العظيم

[حسن]

هذولا من امهات من جيل الطبيبن ولا الحين الغالبيه مالهم بارض بعيالهم

[بانغ بانغ]

والله الطفرة العبت دور في تخلي الابناء عن والديهم ..

[شبح الصمت]

الله يسامح بعض الحريم يقسووون قلوب العيال على امهاتهم وتنسى انه عندها ام ..

ومثل ما تسووي في ام ريلها تتاكد انه في الطرف الاخر امها قاعده تتعامل بمثل تعاملها لام زوجها ..


الله يهديهم ..

الله يجعلني من البارين في امي ويطول بعمرها يارب ..


والام يا مشاكل ما تبي الطلعات والروحات والجيات ..
بس تبي لمت عيالها حولها
تبي تشوفهم يد وحده ..
تبي تنام وهي مطمئنه عليهم انهم كلهم موجودين ومرتاحين ..
تبي تقوم وتشوف احد يصبح عليها ايااً كان عيالها والا عيال عيالها ..
تبي تحس انها عايشه لهم ..
خذت من الدينا مسكينه وما تنطر احسان ..

تنطر منا كلمة يمه احبك
يمه اشفيج
يمه سلامتج

كثيره اشياء نغفل عنها ولكن متى نحس فيها
يوم يروحون من الدنيا ونسترجع شريط الذكريات

ونقول

ياليت وياليت ..

ما يفيد الندم والا الحسره بعدها

[راجي الْعفو]

سبحان الله ..

الام و تربية العيال مسؤوليه مب سهله ..

ولذلك تشوف كثير من بنات هالجيل مب عارفين يتحملون مثل هالتكليف ..


اقول:


كم شقوا أمهاتنا في سبيل راحتنا
وكم قصّرنا في حقهم !

الله يرحمهم مثل ما ربوّنا صغار
ويغفر لنا تقصيرنا
ويعينا على رد ( شعرة ) من جميلهم !