استفسار حول حساب سعر المتر في مساحة البناء..

[بوسعود (USA)]

السلام عليكم ورحمة الله وبركاته

انا خلصت خرايط البيت الحمدلله وقاعد ادور لي على مقاول زين
كلمت شركة من الدرجة الرابعة وعطوني مبلغ خيالي

انا عندي مساحة البناء 1100 متر مربع
شامل الملاحق والمطبخ الخارجي

صراحة قالو لي عظم (حديد عادي وطابوق اسمنتي وبلستر) بمليون وستمية الف ريال
:rolleyes2:

مادري هل يحسبون السور بعد حق تسعير البنا؟ ههههه

مع العلم دخلت موقع شركة راحة وحطيت حديد مسلح كامل البيت مع طابوق اسمنتي عازل
طلع لي حول المليون وميتين الف

اذا ممكن حد يشرح لي كيف اتم الحسبة؟ جزاه الله خير بيفيدني والله
واللي عنده شركة مقاولات زينة وامجربه لايبخل علينا :)

ومشكورين مقدما :)

[سعود.]

غالي سعرة تقريبآ حسب لك متر البناء 1450 ريال .

انا ابني حاليا عند شركة مصنفة ( 1 ) مساحة 1217 متر

مع ( قبو ) بسعر العظم بلاستر 1100

اما عن كيفية الحسبة ؟؟ كلن صار يعطي سعر من كيفه

اما عن الشركات الزينة اترك الميكرفون للاخوان يفيدونك أكثر .

[Azizuk]

مره سالت مقاول عن هالموضوع

قالي اذا راح تبني غرفة مساحة صغيرة لازم فيها عمدان وقواعد اربع عمدان وأربع قواعد خلنا نقول مساحة الغرفة 4 في 5 وراح تبني جنبها غرفة ثانية بعد تحتاج عمدان وقواعد

ولو نفرض راح تبني غرفة بمساحة 8 في 7 راح تحتاج اربع عمدان وأربع وقواعد

كل ماصار المكان صغير تزيد العمدان والقواعد وكل هذا يكلف

بين كل عامود وعامود 8 أمتار اذا الجسر ساقط راح يكون نازل بسماكة معينة يمكن نزول 70 او 80 سنتمتر

الحسبة على حسب المساحة وعلى حسب شطارة المهندس الإنشائي

عندك على سبيل المثال سماكة الخرسانة السطح او الدور الاول على حسب

اذا جسور ساقطة ونظام الهوردي غير عن الفلات سلاب

انا عندي هوردي يأخذ حديد اكثر وخرسانة اكثر وإذا جسر ساقط غير عن الجسر المقلوب ( الجسر المخفي ) في كمة الحديد

المخفي ممكن يوصل من متر الى متر ونص ومترين على حسب المساحة كل هذا بعد ينحسب له كمة الحديد

انا في بيتي عندي جسور مخفية وهوردي وجسور ساقطة وسماكة الخرسانة عندي 38 سنتمتر

بس لو سويت نظام الافلات سلاب

اقل كمية حديد وكمية خرسانة وكل هذا بحسابة لان السماكة عندك تطلع بين 15 او 20 سنتيمتر

فرق كبير بين سماكة 38

الحداد قالي ان باني قصر فلات سلاب بسماكة 20 سنتيمتر وبدون جسور ساقطة وأوفر في القيمة

رجعت للاستشارة قلت له ليش مانصحتني أني أسوي فلات سلاب قالي انت ماطلبت

دريت علية قلت له من المهندس انا وإلا انت قالي لا نظام الهوردي وبيتك قوي يتحمل

قلت له الحين الأبراج اللي تنبني بنظام الافلات سلاب انا احسن منهم

انا انصحك اذا تقدر ترجع خرايطك على الاستشاري قول له يغير الى نظام الفلات سلاب

لا يقولي بعد بيتك مقاوم للزلازل قوي أقوى من البيوت الثانية وإذا حد مشى فوق ماتسمع صوته

وين اسمع الصوت اذا السقف نزل عندي بعد الجبس 90 سنتيمتر مع دكتات التكيف

شكل ديكور البيت اذا الشبابيك اقواس بعد ينحسب لها شغل النجار والحداد والخرسانة

عندك بعد اذا عندك وارش فوق البيت كديكور بعد احسب كمية الحديد والخرسانة وشغل النجار

اسمحلي عورت رأسك

واكيد عندك اخوي معماري قطري بيشرح لك افضل مني وعنده معلومات احسن لان هو صاحب الاختصاص

[بوسعود (USA)]

الله يعطيكم العافيه اخواني بوسعود وazizuk

مشكوين
وجزاك الله خير اخوي عزيز يو كي عالشرح الكافي والوافي لازم اسال الاستشاري عن هالنقطه


في انتظار اراء الاخوه الباقيين

جزاكم الله خير

[Azizuk]

الله يسلمك بس انتظر رد المختصين افهم مني في مجال البناء والانشاء

والعين ماتعلى على معماري قطري وشموخ دائم وباقي الاعضاء الكرام المختصين

انا معلوماتي يادوب على قد حالي من خلال دخولي مجال البناء ومعرفت الأخطاء اللي مرت على وتم تفاديها بقدر الإمكان

والحمدالله احمد ربي على المستوى اللي انا مريت في في البناء

[Bozizoo]

بوسعود usa
محد يقدر يقولك سعرك غالي او رخيص بدون ماياخذ تفاصيل الخرايط

على سبيل هل فيه ديكورات خرسانيه كثيره نوعية الاسقف نوعيه الجدران هل هو طابوق احمر او الابيض او فيه بيسمنت
اما بخصوص بوسعود و بيتك فيه قبو وبسعر المتر مربع 1100 ومن شركه مصنفه درجه اولى هذي فيها علامات استفهام كثيره ؟؟؟؟!!!!
في شي غامض مستحيل حسابيا يصير هذا الشي.
اصلا شركه درجه اولى ماتاخذ مشاريع صغيره

[سعود.]

أخوي bozizoo

عاد هذا والله الي حاصل عندي ( نعم ) مصنفة درجة اولى . وشركة قديمة في سوق البناء .

ونبني عندها حاليآ 3 فلل مساحات ( 1217 + 1118+ 987 ) جنب بعض في منطقة ام صلال .

[معماري قطري]

المقاول الشاطر مهما كان صغير لازم عنده حاسب كميات ولو مبدئي

كمية الحديد ونوعيتها وسعرها + شغل الفورمات الخشب + كمية الخرسانات وتكلفتها ونوعيتها وقوتها + تكلفة الشغل المتوقعة من عمال وآليات + نسبة ربح المقاول في هذي الأشياء = لنا تكلفة بناء العظم ونضيف عليها أي كميات أُخرى كالطابوق ومواصفاته ونوعيته.

غالبية مقاولين العظم يتعاملون مع عمال رخاص ويشتغلون حسب طلبات العميل ويستغلون أي ثغرة للربح بدون اهتمام للبناء .. لأَنه بيخلص شغله وغيره بيتورط .. وكثير منهم يعطون الشغل لشركات رخيصة كمقاول بالباطن.

[معماري قطري]

المقاول اللي يسعر بالمتر وبدون حساب كميات يحط رسك كبير حق شغله وربح كبير حتى ما يتورط .. ووقت الشغل تكون عنده ثغرات كثيرة يقدر يلعب فيها ويسوي شيء في راسه ما يلزمه العقد بجودة عالية وسعر كبير.

المفروض حتى الدفعات تكون حسب الكميات المنجزة .. كتبت كثير في موضوع العقود بس اعتقد المثال راح مع وفاة موقع غلف أب للتحميل

[Azizuk]

المقاول عندي حاسب حسبة على قيمة التكلفة نسبة 30% رسوم ادارية ومواد مثل مطارق اكياس نايلون ومسامير وشبك قفازات ابوات

لان بعد ماخلص لقيت تقريبا 100 مطرقة وعشر كراتين مسامير غير وغير القفازات وكمية كبيرة من النايلون جدد
بعضها لم يستخدم

سالت المهندس اشوفه مب مهتم قلت له العمال لاعبين بالاشياء هذي لعب مرميه بالأرض

بعدين قلت للمقاول ليش عندكم هدر كبير واهمال رد على قالي هذا كله محسوب عليك وغير هذا انا مب فاضي كل مشروع اقعد ألقت وأجمع المواد هذي

هذي اعتبرها مواد استهلاكية هذا شغل الشركات الكبيرة ماضيع وقت أفكر فيها

لان صاحب الشركة صديق لي وماقصر معاي وآخر المشروع نزل لي تقريبا مبلغ محترم قالي عن الحلال والحرام

جبت لي عمال جمعت باقي المواد ورجعتها عليه

مع العلم انا مب مجبور أني أرجعها

[بوخالد911]

جان بعت الاغراض. واستفدت منهم

[معماري قطري]

المقاول عندي حاسب حسبة على قيمة التكلفة نسبة 30% رسوم ادارية ومواد مثل مطارق اكياس نايلون ومسامير وشبك قفازات ابوات

لان بعد ماخلص لقيت تقريبا 100 مطرقة وعشر كراتين مسامير غير وغير القفازات وكمية كبيرة من النايلون جدد
بعضها لم يستخدم

سالت المهندس اشوفه مب مهتم قلت له العمال لاعبين بالاشياء هذي لعب مرميه بالأرض

بعدين قلت للمقاول ليش عندكم هدر كبير واهمال رد على قالي هذا كله محسوب عليك وغير هذا انا مب فاضي كل مشروع اقعد ألقت وأجمع المواد هذي

هذي اعتبرها مواد استهلاكية هذا شغل الشركات الكبيرة ماضيع وقت أفكر فيها

لان صاحب الشركة صديق لي وماقصر معاي وآخر المشروع نزل لي تقريبا مبلغ محترم قالي عن الحلال والحرام

جبت لي عمال جمعت باقي المواد ورجعتها عليه

مع العلم انا مب مجبور أني أرجعها

زين سويت .. وانت تستاهل كل خير ما شاء الله عليك

تصدق غيروا لي سجادة البيت في أمريكا .. وجاو إثنين شالوا القديمة وقطعوا بعض أجزائها وحطوها في كونتينر خشب عليه قفل في بدي جمس وشلوا الحشوة اللي تحت .. كانت الأرضية صبية اسمنت تحت .. وسئلتهم شبيسون في القديم قالوا بنوديه المصنع لإعادة التصنيع .. صدقني ما خلوا شيء كل شيء شالوه وخموا الأرضية قبل بمكنسة هوائية عن قطع الربر الصغيرة مالت الحشوة .. ورشوا معقم لأنه لاحظ وصاخة حيوانات قبل ساكنين ناس غير.

المهم هناك كل مقاول يسوي شغله لازم يشيل المواد ويصنفها واللي لإعادة التصنيع يوديها مركز اتوقع يجي مسؤول المصنع ياخذها.

حتى ولو المقاول يعرفك ومتعامل معاك معاملة طيبة المفروض ما يقول لك انت دافع قيمتها ويهتم بتنظيف البيت أول بأول من كل المواد .. صحيح قيمتها تافهة بس حماية لمن يدخل البيت ويستفيد منها في مشروع ثاني.

وزين مقاولك ذمته طيبة والظاهر بعد نهاية البنيان شاف إنه ربح أكثر مما هو متوقع وما قصر معاك .. بعض المقاولين يحطون تكلفة احتياطية لزيادة الأسعار للمواد وأوقات ما تزيد ويمكن تقل فيكون ربحهم مضاعف .. وبعض المقاولين يحسبون غلط خصوصاً في بعض المواد الغالية ويخسرون.

[Azizuk]

هلا وغلا بمعماري قطري

الحين بعد صدور قانون الشركات والازام الشركات بفتح حساب في البنوك للعماله ومراقبة الشركات خلال سبوع يجب تنزيل الراتب للعامل او اللي على كفالته

كلو هواء تجار الشنطة والشركات الوهمية

كثير من الشركات قفلت ونباعت

لأنهم توهقو فيهم وإذا مانزل له راتب يتحاسب صاحب الشركة بغرامات توصل الى إغلاق الشركة وسحب السجل التجاري والوكالة من التاجر

واحد من الربع مكفل عمال على شركته وتوهق فيهم بعضهم مايدري عنهم وماعنده أرقامهم

ان شاالله البلاد تخف من موضوع العمالة السائبة والحرامية

[بن غيث]

انا السؤال غامض بالنسبة لي ..
انت تبغي اتعرف اشلون اطلعت مليون وستمية .. ولا تبغي تعرف اشلون المقاول يسعر

[لبيبة]

وعليكم السلام ورحمة الله وبركاته،

حساب الكميات ونوعيتها موجودة أرقامهم عندي، ما ابي اكتب اي ارقام هني او في الخاص، المشكلة السعر اللي عطوني إياه وحدة من الشركات كان خيالي.

أبي أعرف شركة تبي تكسب العميل وتعطيني سعر معقول.

[معماري قطري]

إختي لبيبة الشركات كثيرة ومتنوعة وانا حطيت لستة راعيت فيها هذا التنوع وتجربتي معاهم

التسعير شيء ثاني ويختلف من شركة لشركة والتفاوض ضروري .. انا رحت لشركتين لربعي في الشغل لبناء بيتي .. شركة عطوني سعر كبير ومجال التفاوض شبه مقطوع بسبب المالك أشغاله وايد ويتابع شركات ابوه ولا حد يقدر يفتي غيره .. مباشرة شلتها من الحسبة .. شركة سعروا لي الفورم الخشب اللي يحدد مكان الباب ب 7000 للباب .. استغربت السعر وسئلت عنه قال متأكد منه وبسبب اختيارك سوفت وايت وود .. قلت له كان فيه مجال تغير وتحط اختيار ثاني وتسعير ثاني وبس وصلت لمرحلة حسيت انه وايد صعب وتابعت التفاوض مع غيره .. شركة رحت لها العصر قبل المغرب بشوي .. حصلت الليتات مطفية وظلام وفيها هندي على كاونتر يستقبل يعني .. سئلته وين المدير قال داخل مشيت لمكتب المدير الا لابس جلابية ويصلي .. ما ادري أي فرض بس قعدت انطره على كرسي مشقق وناقشت معاه السعر وليش ما سعر لي حساب الكميات كامل .. طلع مهندس بالبركة لا مختص ولا شيء ومسعر لي مراحل وتبي زين ما تبي كيفك .. بس خليته ورحت لغير ولغير .. ووالله خذت حول سنة في المناقصة بس لين توفقت بمقاول مسوي لنا شغل حكومي وكان شغله نظيف ومقاول قوي وحاولت فيه وبصعوبة وافق ياخذ الشغل وطلع تسعيره لي الأرخص بدرجة كبيرة .. حول نص تسعير الباقي وثلث تسعير الأعلى وسعر كل شيء وكان شغلهم مهني لآخر درجة وعنده موظفين كثيرين في المكتب وادارته عالية توكلت على الله وبنيت عنده.

[لبيبة]

إختي لبيبة الشركات كثيرة ومتنوعة وانا حطيت لستة راعيت فيها هذا التنوع وتجربتي معاهم

التسعير شيء ثاني ويختلف من شركة لشركة والتفاوض ضروري .. انا رحت لشركتين لربعي في الشغل لبناء بيتي .. شركة عطوني سعر كبير ومجال التفاوض شبه مقطوع بسبب المالك أشغاله وايد ويتابع شركات ابوه ولا حد يقدر يفتي غيره .. مباشرة شلتها من الحسبة .. شركة سعروا لي الفورم الخشب اللي يحدد مكان الباب ب 7000 للباب .. استغربت السعر وسئلت عنه قال متأكد منه وبسبب اختيارك سوفت وايت وود .. قلت له كان فيه مجال تغير وتحط اختيار ثاني وتسعير ثاني وبس وصلت لمرحلة حسيت انه وايد صعب وتابعت التفاوض مع غيره .. شركة رحت لها العصر قبل المغرب بشوي .. حصلت الليتات مطفية وظلام وفيها هندي على كاونتر يستقبل يعني .. سئلته وين المدير قال داخل مشيت لمكتب المدير الا لابس جلابية ويصلي .. ما ادري أي فرض بس قعدت انطره على كرسي مشقق وناقشت معاه السعر وليش ما سعر لي حساب الكميات كامل .. طلع مهندس بالبركة لا مختص ولا شيء ومسعر لي مراحل وتبي زين ما تبي كيفك .. بس خليته ورحت لغير ولغير .. ووالله خذت حول سنة في المناقصة بس لين توفقت بمقاول مسوي لنا شغل حكومي وكان شغله نظيف ومقاول قوي وحاولت فيه وبصعوبة وافق ياخذ الشغل وطلع تسعيره لي الأرخص بدرجة كبيرة .. حول نص تسعير الباقي وثلث تسعير الأعلى وسعر كل شيء وكان شغلهم مهني لآخر درجة وعنده موظفين كثيرين في المكتب وادارته عالية توكلت على الله وبنيت عنده.

جزاك الله خير اذا ممكن تعطيني عنوان المقاول الاخير اللي ذكرته ورقمه احاول معاه يمكن يسوي لي ما دام سعره كان نص تسعير الباقي وثلث الاعلى.

واي رقم لمقاول تنصحني فيه اكون شاكرة لك. ابي اشوف عدة عروض واقرر اللي يناسبني.

[معماري قطري]

جزاك الله خير اذا ممكن تعطيني عنوان المقاول الاخير اللي ذكرته ورقمه احاول معاه يمكن يسوي لي ما دام سعره كان نص تسعير الباقي وثلث الاعلى.

واي رقم لمقاول تنصحني فيه اكون شاكرة لك. ابي اشوف عدة عروض واقرر اللي يناسبني.

الله يسلمج هذا تركيزه الحين على مشاريع الأوقاف والتعليم وقال لي ما يقدر تبين جربي حظج معاه وهو مقاول كبير hkh ومقرهم فوق معرض الدرويش في طريق الوكرة .. فيه ثاني تعاملنا معاه من زمان وشركتهم تابعة لهندسة العمارة القطرية اللي كانت المقاول الرئيسي في الستي سنتر وسعر لصديق لي تسعير فوق الجيد .. شركته كانت جي ال سي وتضامنوا مع شركة أمريكية اسمها ييل أند أندرو وعدد قوتها البشرية 1600 والله أعلم خلال ست شهور ما ادري شصار ممكن اكتفوا مشاريع أو دخلوا مشروع كبير.

بارسل لج خاص أرقام ذيلا المدراء ورقم مدير شركة كونسيرف وهي شركة قديمة وسمعتها سوبر جيدة بس غالية شوي .. المفاوضة ضرورية وعندج المضاربة بالأسعار .. لو حصلتي عقد جيد تاخذينه وتراوين الشركة الثانية قيمة العقد بدون اسم الشركة فيضطرون ينزلون.

بعض المقاولين يسون نفسهم ما يبون شغل لكن من يبدون في التسعير يستوي همهم توقيع العقد وبدء الشغل.

[لبيبة]

الله يسلمج هذا تركيزه الحين على مشاريع الأوقاف والتعليم وقال لي ما يقدر تبين جربي حظج معاه وهو مقاول كبير hkh ومقرهم فوق معرض الدرويش في طريق الوكرة .. فيه ثاني تعاملنا معاه من زمان وشركتهم تابعة لهندسة العمارة القطرية اللي كانت المقاول الرئيسي في الستي سنتر وسعر لصديق لي تسعير فوق الجيد .. شركته كانت جي ال سي وتضامنوا مع شركة أمريكية اسمها ييل أند أندرو وعدد قوتها البشرية 1600 والله أعلم خلال ست شهور ما ادري شصار ممكن اكتفوا مشاريع أو دخلوا مشروع كبير.

بارسل لج خاص أرقام ذيلا المدراء ورقم مدير شركة كونسيرف وهي شركة قديمة وسمعتها سوبر جيدة بس غالية شوي .. المفاوضة ضرورية وعندج المضاربة بالأسعار .. لو حصلتي عقد جيد تاخذينه وتراوين الشركة الثانية قيمة العقد بدون اسم الشركة فيضطرون ينزلون.

بعض المقاولين يسون نفسهم ما يبون شغل لكن من يبدون في التسعير يستوي همهم توقيع العقد وبدء الشغل.

الحين في مرحلة اشوف عروض اسعار المقاولين، باجرب اكلمهم، بانتظار الأرقام وجزاك الله كل خير.

[الكواري 1972]

عجبي من بعض الشركات يقولون الحال واقف و لا في شغل

واخر شي يعطيك سعر خيالي كأن محد فالسوق الا هو

[معماري قطري]

عجبي من بعض الشركات يقولون الحال واقف و لا في شغل

واخر شي يعطيك سعر خيالي كأن محد فالسوق الا هو


هذي سياسة تسويقية يا ولد بني تميم

البعض يتأخر لك في التسعير ويماطل وتحصله يحاول يشوف لك شركة بتبني ويحط ربحه بدون ما يتعب

إحنا في قطر شذبحنا مادياً قصدي غير التعامل بالباطن وكله بوق في بوق

[الكواري 1972]

اي والله انك صادق

[بوسعود (USA)]

الاخوان الاعضاء شكرا على الردود
الله يعطيكم العافية

اخ معماري قطر اشكرك جزيل الشكر على مشاركتك وكلمة حق تنقال انا ماشارك في المنتدى وايد بس
متابع هالقسم من فترة طويلة واستفدت كثير من كتاباتك اخوي
شكرا عالمجهود
ولا به قصور في باقي الاعضاء

اخوي ممكن تبعث لي ارقام الشركات اللي ذكرتهم للاخت الكريمة
انا حاليا ادور مقاول نفس الشي
وشكرا جزيلا

[بوسعود (USA)]

انا السؤال غامض بالنسبة لي ..
انت تبغي اتعرف اشلون اطلعت مليون وستمية .. ولا تبغي تعرف اشلون المقاول يسعر

مرحبا اخوي بن غيث
اللي اقصده ان المبلغ كبير بالنسبة لمساحة البناء خصوصا ان الحديد اللي فالعرض حديد عادي وطابوق اسمنتي عادي
يعني طلع لي حول ال1500 ريال عالمتر
الشركة درجة رابعة .. هل هالتسعير طبيعي والا مبالغ فيه

اللي اعرفه ان سعر المتر فالسوق بين ال800 وال1300 اذا كانت المعلومه اللي سمعتها صحيحه
شاللي ممكن رفع السعر؟؟
اذا احسبوه مع السور مثلا بيطلع المبلغ عالي جذي؟
او هل يمكن لان الاستشاري زايد لي مثلا في كمية الحديد
او مثل ماقال الاخ عزيز يو كي ان ممكن في نظام الاسقف حاط لي نظام يتطلب حديد زيادة
وما الى ذلك ...

[بوخالد911]

توووو متش
السعر المعقول والمقبول ما بين 950 -1350
لو عندك بيسمنت هذا بيكلفك أكثررر

[معماري قطري]

الاخوان الاعضاء شكرا على الردود
الله يعطيكم العافية

اخ معماري قطر اشكرك جزيل الشكر على مشاركتك وكلمة حق تنقال انا ماشارك في المنتدى وايد بس
متابع هالقسم من فترة طويلة واستفدت كثير من كتاباتك اخوي
شكرا عالمجهود
ولا به قصور في باقي الاعضاء

اخوي ممكن تبعث لي ارقام الشركات اللي ذكرتهم للاخت الكريمة
انا حاليا ادور مقاول نفس الشي
وشكرا جزيلا

العفو يا اخوي واللي اسويه قليل في حقكم

لازم اسوي بعض البحوث الميدانية السوق يتغير وانا متابعتي بسيطة واستفيد من الموجودين في السوق الآن

وهذا القسم مفيد للكل وخصوصاً من يبني والمقاولين والمهندسين .. أتمنى يكون للمهندسين اهتمام وتواجد دائم .. هذا تطوير للذات حتى لو في استعراض آراء مخالفة باثباتات ودراسات علمية.

حسيت فيه اهتمام كبير من البعض سواءً رجال أو نساء ولكلٍ بصمته.

اللي شوي يحزن هناك ملفات قوية ولازم نرجع لها ونحدثها ونضيف شوي عليها ونخليها للكل يطلع عليها .. مثل موضوع العقود والعزل الحراري .. كنت ناوي افتح موضوع لتصميم الحدائق واللاندسكيبنغ .. موضوع للتفاصيل المعمارية والمواصفات .. لكن بعض هذي المواضيع أما تنسى وتنقفل وتروح بعيد وما نقدر نتابعها أو يكون الاهتمام بها قليل وصعب صياغتها بطريقة تجذب الاهتمام لأَنها تخصصية أكثر.

ما ادري لو فيه طريقة لحفظ بعض المواضيع غير عن طريقة التثبيت بتكون أفضل .. مثل صفحة معينة للمواضيع حسب تسلسلها .. مثلاً مواضيع الإنارة - التكييف - المصاعد - المطابخ - الحمامات - الحدائق - التشطيبات والأصباغ والجبس - التصاميم المبدئية - وأُمور كثيرة.

[بوسعود (USA)]

مرحبا اخوي معماري قطر
الله يعطيك العافيه عالمجهود

اخوي ليش ماتسوي لك مدونه تحط فيها كل الامور هذي
يستفيدون منها ناس وايد وتكون المواضيع امرتبه اكثر

مجرد اقتراح

[معماري قطري]

إقتراحك في محله اخوي بو سعود

مشكلتي ما اعرف وشي المدونة .. اتوقع يمكن في تويتر أو غيره من المواقع اللي للحين ما دخلت فيها .. بس لو تنحفظ على طول والصور والرسومات تتحمل بسرعة والزوار العاديين مثل الإخوان اللي يدخلون هذا المنتدى يقدرون يتابعون بسهولة بتكون شيء زين.

إن شاء الله عندي خطة حق فتح مكتب استشاري وعمل موقع للاستشارات الهندسية تابع للمكتب ويفيد الناس .. واللي يعرف الطريقة للمدونة أو لإنشاء الموقع يعلمني والله يجزاه خير.

[بوسعود (USA)]

مرحبا اخوي

المدونة هي مثل ماتقول صفحة كامله لك (موقع الكتروني مصغر)
ويكون تبع لموقع كبير
المدونه تقدر تحط فيها مواضيع وايد وكل موضوع تكتب فيه اللي تبي
وتحط صور وفيديوات
وتحت فيه مجال للناس ان يردون ويحطون كومنتاتهم


في موقع مشهور وايد اسمه wordpress
https://ar.wordpress.com


في اوبشن مجاني واوبشن بفلوس يعطيك دومين خاص فيك
خطواته سهله وماتاخذ دقايق
انا سويت سكرين شوت عالخطوات وارفقتها
94875

9487394874

[معماري قطري]

مشكور اخوي باشوف شلون .. بس خايف بعد فترة تنمسح المشاركات وتروح وأوقات يتسكر الموقع .. مثلاً موقع التحميل غلف أب تسكر وضاعت وايد صور محمله عن طريقه