طلب رأي الجميع

[ام خويلد]

السلام عليكم ورحمه الله وبركاته

لوسمحتوا عندي استفسارين وياليت كل واحد يجاوب ويحط تجربته:
أولا: ابقي احسن مكتب لتصميم الخرايط

ثانيا: شركه مقاولات وسبق تم التعامل معها بحيث يكون شغلهم فيه ذمه وضمير ودقة


وشاكرة لكم التعاون والافادة

[معماري قطري]

عليكم السلام ورحمة الله وبركاته

أحسن المكاتب في قطر مشغولين .. بعضهم قالوها لي صريحة لا تطرش لنا مشاريع شخصية حكومية أو مشاريع كبيرة بيوت لا .. وبعضهم سعروا سعر تعجيزي حتى اللي حولته لهم هو بنفسه يقول ما ابي.

من ضمنها مكتب إم زد وشركاه في بن محمود شرقي مطعم بيروت تبين لافتته .. مكتب ابراهيم الجيدة .. العربي للشؤون الهندسية .. مكتب اتحاد قطر للتخطيط وهذا موجود في بناية الجبر مدخله من ورا على الدائري الثالث .. مكتب غلف ديزاين كونسبت ( ما ادري شترجمة الإسم ) هذا مكتب يصمم معماري ومصممين بيت الشيخ خالد بن حمد .. وكل هذي المكاتب تعاملت معاهم واللي ارتاح له أكثر شيء اتحاد قطر للتخطيط.

بالنسبة للمقاولات طبعاً أَقوامهم حمد بن خالد ومدماك وهندسة العمارة القطرية .. فيه شركة تابعة لهندسة العمارة القطرية قوية ومجربها وتسعيرها جيد علاقتي مستمرة مع مديرها وقال لي من فترة إنهم تضامنوا مع شركة أمريكية .. اسمهما ييلز أند أندرو واستوت القوة البشرية للشركة 1600 عامل ومهندس ويحتاجون شغل .. هم داخلين لشغلات كبيرة بس سعر لأحد الإخوان بسعر 2.3 مليون لبيتين ومجلس تسليم مفتاح وغيره سعر ب 5.3 مليون.

كذلك شركة كونسيرف جربناها مرات عديدة وهي شركة متوسطة السعر وعالية الجودة .. وشركة اتش كي اتس .. حمد بن خالد بن حمد كانوا مضغوطين ومكتفين .. وشركة مافا مالكها ومديرها قطري.

المكاتب الرخيصة نوعاً ما مكتب السد وجماعة العمارة العربية .. مهندسهم محمد سرحان له حول 30 سنة في قطر ما ادري اذا موجود أو لا كبر كثير ( شيب ).

نصيحة لكل واحد بيبني يروح للمكاتب هو بنفسه ويقابل مدراءها .. يسئلهم عن مشاريعهم وعينات منها وعدد وخبرات مهندسينهم وصيغة العقد المقترحة .. وتخصصاتهم .. بعض المكاتب ياخذون عشرات المشاريع وعندهم 3 مهندسين مستحيل يغطون كل مشروع حتى لو بزيارة اسبوعية والزحمة معروفة شلون.

لو لاحظ الواحد صعوبة أخذ موعد مع المدير أو خذ موعد وأَثناء المقابلة كان فيه تشتيت والاجتماع ما كان محضر له بصور وعينات اللي المفروض تنطلب منه قبل الموعد بالتلفون .. ومكان الاجتماع كان غير مريح وأصوات ودخول وخروج للكثيرين وبعضها قلة المواقف هذي المكاتب وحتى الشركات يبعد عنها.

المكتب اللي تتفق معاه خل اتفاقك تصميم مبدئي ومع نهايته ونهاية الموافقة الأولية يستحقون دفعة غير عن الدفعة المقدمة .. بعدها باقي التصميمات الانشائية والكهربية والميكانيكية ودفعة .. بعدها اعداد وثائق المناقصة والمناقصة والتوقيع ودفعة .. وبعدها الاشراف بدفعات شهرية وكل مرحلة تكون مفصلة ووشو يتخللها .. ممكن نطلب تكييف متخصص وتصميم للتكييف ومتابعة عقد التكييف مع مقاول التكييف أو تصميم داخلي .. المهم نحاول نصيد الاستشاري بعقد كامل ونحط بند فيه إنه من حق المالك الغاء العقد بعد أي مرحلة ( بعد ما يدفع ويستلم كل الوثائق اللي وصلوا لها ) وهذا من حق أي مالك.

أي عقد بيوقعه المالك مع أي مقاول لازم يوقعه بشهادة وحضور الاستشاري ولازم الاستشاري تكون عنده قاعة اجتماعات أو ثنتين لهذي الاجتماعات والتنسيقات .. إتحاد قطر للتخطيط كمثال كانوا في مكان سوق واقف في الجسرة قبل .. وكانت عندهم شقة للتصميم وشقة للاشراف وفيهم كم مكان للاجتماعات والانتظار .. وفوق هذا عندهم شقة معزولة عن النور ومكيفاتها تشتغل 24 ساعة ومخصصينها لحفظ الرسومات الورقية القديمة .. كانوا يحتفظون برسومات عمرها 20 سنة.

ألحين خذوا مكان ديوان المحاسبة كله .. قبل أوقات كنا ندور مكان فاضي للاجتماعات السريعة من زحمة المراجعين.

عقد اشرافي معاهم كان ب 1200 شهرياً بس كنت اتفاجأ بزيارتهم للموقع وأوقات يكون شلة مهندسين مختصين يشوفون كم شيء .. مثل الكهربة ما كان يفتي فيها المشرف المدني لازم يجيب مهندس كهربائي .. عند بعض المكاتب مهندس بتاع كله هو اللي يعرف كل شيء.

[سعود.]

الاقصى للاستشارات الهندسية . للتصميم الفلل انصح بهم .

اما شركة مقاولات ( لا تعليق ) .

[شموخ دائم]

,

,


مرحبا

الله يوفقك

اختي الكريمه

اخذي الموضوع خطوه خطوه

ركزي اول على مكتب ( الخرائط ) اول شي

اختاري بعنايه ولا تستعجلين
اسئلي زين قبل تروحين لمكتب خرائط
واسئلي كثير كثير عن المقاول
شوفي شركته شوفي شغله شوفي الي بنوا عنده
ولا تروحين ( للارخص ) ولا للغالي كثير
وحاسبي زين وحاسبي كثير
وماعليك من الجنسيات
عليك في ( الامكانيات )
لاتروحين لمكتب مافيه امكانيات
ولا تروحين لمقاول ماعنده امكانيات
من اداره
ومن عماله
ومن معدات
ومهندسين

وحاسبي من الشركه ( ابو نفر واحد )

لا عنده اداره عدله من محاسبين ومهندسين

وحاسبي من المقاول الي مكتبه

( مقفول )



والله يوفقك


,

,

[معماري قطري]

1200 كانت تكلفة الاشراف شهرياً في 2004 طارت ألحين ل 50000 حق ولد عمي وهو رفض المكتب والمبلغ المبالغ فيه وهم الظاهر قاصدين يشردونه .. يعني في السنة تطلع تكلفة الاشراف 600000 وهو مبلغ خيالي لفلة عادية

[معماري قطري]

أي تسعير يحصله الواحد في البداية لازم يتابعه ويفاوض .. المهم السعر النهائي بعد المفاوضة وتعديل البنود لتتضمن كل شيء يحتاجه المالك.

[معماري قطري]

حاولت ارد على رسالتج الخاصة بس الصندوق مليان

[ام خويلد]

حاولت ارد على رسالتج الخاصة بس الصندوق مليان

اخوي مسحت الرسايل ممكن ترد

[معماري قطري]

اخوي مسحت الرسايل ممكن ترد

بالصدفه طلع ردي بخصوص الاستشاري موجود هنا

الاستشاري ما فيه أحسن وأسوأ فيه جيد ومستعد يبدع بأفضل ما عنده ويهتم بالتصميم من البداية للنهاية .. وفيه جيد وسمعة ومب فاضي يتابع وممكن يعطي التصميم لشخص مبتديء .. وفيه تصاميم موجودة عليها عدة تطويرات وعلى هذي التطويرات تخلصت من غالبية العيوب.

عندنا اللي يتوفق في تصميم جيد في الغالب يتوفق بسعيه ومتابعته والمفروض تفعيل حماية للمستهلك من هذي الناحية .. بعض استشاريين شخبط شخابيط كل شخبوطة بمبلغ كبير ما يتناسب مع الشخبوطة والضحية المالك .. أخطاء كثيرة والسبب عدم وجود جميع التخصصات في المكتب وتناسق شغلهم مع بعض كفريق واحد .. إستووا يعتمدون النسخ واللصق لأجزاء كثيرة كالأعمدة والجسور والأساسات وبمبالغة كبيرة .. يعني انا باوفر 5000 في التصميم بين مكتب جيد ومكتب ربع كُم والربع كم بيخسرني 100000 في الهيكل الإنشائي .. غير التعب والتضارب بين حيثيات تصميم كثيرة.

حتى مراجعتنا للتصاميم هنا ما تغطي هذي التخصصات ببساطة لعدم ممارستي لها ولعدم وجود هذي المخططات.