مشوره فنيه

[ام خويلد]

مساء الخير
لوسمحتوا عندي عده اسئله محتاجه اعرف إجابتها وخصوصا انا في مرحله الخرائط
1.ماهي افضل مساحه لغرف النوم ومنها الماستر؟
2.افضل مساحه الحمام اعزكم الله؟
3.افضل مساحه للمطبخ الخارجي مع المخزن؟؟
مع الشكر للجميع

[سعود.]

وجهة نظري ....


الغرف : لاتقل عن 5x5

الحمام : لايقل عن 3x2

المطبخ : لايقل عن 5x6

المخزن : لايقل عن 4x4

ليش لايقل لانة لو قل عن كذا بيكونوا صغار ؟؟

ولو بنزيد ممكن شوي عن المقاسات المذكورة ؟؟

[بن غيث]

الاهم من المساحات .. اتجاه الرياح وحركة الشمس
والتآثير على المبنىمن عدة نواحي .. مثل الاضاءة التهوئة الطبيعية
لا احد يهتم لهذا في التصميم للاسف ..
حيث يفضل في اتجاه الشرق ان تكون غرف النوم
والجنوب .. المطبخ الحمام المخزن والدرج

[بن غيث]

وايضا الاهتمام في ابعاد تصميم الفراغات

[بن غيث]

اتمنى وجود اخي معماري ليشرح لكم تلك التفاصيل اكثر مني

[Qt.1]

مساء الخير
لوسمحتوا عندي عده اسئله محتاجه اعرف إجابتها وخصوصا انا في مرحله الخرائط
1.ماهي افضل مساحه لغرف النوم ومنها الماستر؟
2.افضل مساحه الحمام اعزكم الله؟
3.افضل مساحه للمطبخ الخارجي مع المخزن؟؟
مع الشكر للجميع

غرف النوم ماتقل عن 5*6
الحمامات 2*3
المطبخ اذا خارجي على الااقل 4*7 اذا داخلي تحضيري ماتفرق
المخزن 4*4 حلو

هذي مقاسات بيتي مع ان حماماتي اكبر بكثير , بالنسبه للغرف حسبو احسابكم كل غرفه ماستر مع دريسنغ وحمامها الخاص

[Azizuk]

غرفة الماستر الرئيسية

5 *8 اقل شي

الحمام

4* 4 اذا مع جاكوزي بروحه وشور بروحه ومغسلة مقاس كبير ومرحاض وبيديه

لازم الحمام امبحبح شوي مع مراعاة موقع الشباك والباب

المطبخ الخارجي 5* 8 وإذا تقدر تكبر كبر خاصة المطبخ الخارجي

والمخزن 4*4

اذا عندك مساحة لا تقصر على عمرك

وغرف العيال خلها 5*6 او 4.5 * 6

حتى غرفة ماستر 4.5 * 7 مع مراعاة فتحت الباب بعد حلوه واسعة وكبيرة

حمامات العيال لا تتنازل عن مقاس 2.5 * 3 او على الأقل 2 *3

ركز على مداخل الغرف والشبابيك لها دور كبير في شكل الغرفة النهائي

المجلس حلو يكون مستطيل

المطعم مربع او مستطيل اذا المساحة كبيرة

مجلس الحريم حلو مربع وملموم

المطبخ يكون مستطيل وإذا حجم كبير مربع وإذا خارجي يفضّل لون ابيض لشراحه او بيج فاتح

المهم ألوان فواتح

من احلا المقاسات 5 * 7 الشكل المستطيل احلا من المربع

[معماري قطري]

اتمنى وجود اخي معماري ليشرح لكم تلك التفاصيل اكثر مني

من شوي ضايع في دهاليز الحوار العام ومتابعة الجزيرة ومآسي الحروب واسمع اذني تصيح ما توقعت إن اخوي بن غيث يناديني

بالنسبة لتساؤل الأُخت أًم خويلد .. ردي هذا كتبته قبل المساحات تعتمد على الاستعمال والأثاث

مساحة السرير معروفة للكنغ سايز 2 في 2 ونزيد عليها مساحة جدام وفي الجوانب .. السوبر كنغ سايز أو ما يسمى بكاليفورنيا كنغ سايز 215 سم في 210 واظن الطول 210 .. هذا السرير تدليع وواسع شوي بس بصعوبة نحصل له فرش.

انا سويت الغرفة الرئيسية 6 في 8 .. فوق المجلس وملحقاتها فوق غرفة الطعام .. بس غيرت التصميم شوي وسويت قواطع .. مثلاً جهة الستة متر سويت كبت حائط وحركت الباب اللي يودي لغرفة المكياج وغرفة الملابس 75 سم داخل الغرفة فقل العرض ل 5.25 وإن شاء الله بعد كم يوم أرجع قطر واحط تصميم لبيت جديد ناوي ابنيه وحطيت قبل صور عامة للتصميم.

وسويت غرف أصغر والمعيشة فيها مريحة لشخص أو شخصين .. مثل غرفة 3.8 في 6 وسويت في الطرف كبت حائط كامل فصغرت استوت 3.8 في 5.3 .. معاها تكرمون حمام 3 قطع .. شاور وكرسي ومغسلة بمقاس 2 في 2 وممكن يصغر للي يبي حق هالثلاث قطع ل 1.6 في 1.6 لو حبينا الشكل المربع.

ألا محد سوى حمام دائري .. حد جرب؟ فكرته حلوة وسهل ينعمل.

نرجع لنقاشنا والنقاط اللي ذكرها اخوي بن غيث .. صح استغلال الفراغات كتصميم فراغ للمعيشة والحركة والنور الطبيعي والتهوئة قليل اللي تندرس صح .. وشيء آخر مهم اللي هو الصوت سواءً من الخارج أو من داخل البيت .. المناور مهمة للصالات وللمطبخ وللحمامات والبانتري لكل دور مهم للخفايف والشاي ويكون بثلاجة قريبة من الكل.

المطبخ لو يكون مفتوح على جلسة طعام والصالة بدون حواجز بيكون حلو مثل البيت اللي اشتغلنا كلنا فيه في موضوع مراجعة التصاميم المعمارية.

مهم لبعض الفراغات الداخلية مثل المطبخ تكون له اطلالة على حديقة وبواجهة زجاجية كبيرة.

دراسة التأثيث مع بدايات التصميم مهمة لأنها تعطينا فكرة عن توزيع الأثاث وأماكن الكهربة والتلفون والانتركم والتلفزيون والكاميرات لو نبي

وهذا رابط موضوع التصاميم المعمارية .. وإن شاء الله تتم مراجعة تصاميمكم من خلال هذا الموضوع

http://www.qatarshares.com/vb/showthread.php?608441-مراجعة-التصاميم-المعمارية-وابداء-الملاحظات-عليها-(محدث)/page9

[معماري قطري]

غرفة الماستر الرئيسية

5 *8 اقل شي

بس لو المساحة ما تسمح والواحد يبي يوفر ممكن يسوي أصغر بدون ما يضيق على نفسه المهم توزيع الأثاث اللي محتاجه

الحمام

4* 4 اذا مع جاكوزي بروحه وشور بروحه ومغسلة مقاس كبير ومرحاض وبيديه

انا الرئيسي عندي 3.3 في 4.1 بالضبط وفيه حائط نص ارتفاع وسطي يعزل منطقة المغسلة عن الباقي .. والباقي شاور وبخار ثابت ومسكر بقزاز 90 في 90 .. وجكوزي زاوية 145 في 145 .. وكرسي وبديه .. وفيه دريشة كبيرة صوب المغسلة تنور الحمام كله ومجابلة شرق تدخل الشمس من صبح.

الحمام الطويل والضيق بعد يجي عملي .. ممكن نسويه مثلاً 4 متر وعرض 1.8 متر .. نقدر نخلي البانيو ملاصق لطرف ال 1.8 وفيه فراغ يكون فيه الشاور وبعده باب قزاز يعزل المنطقة هذي الرطبة عن باقي الحمام .. نحتاج 1.8 بعد من ال 4 متر وبتبقى لنا 2.2 في 1.8 يكون فيها الباب والكرسي والبديه والمغسلة أو مغسلة وتسريحة أو مغسلتين.

المستطيل مساحته أقل من نص مساحة المربع 4 في 4 ونقدر نسوي له بلكونة بباب قزاز كامل لدخول الشمس وسور البلكونة يصد النظر عن الحمام .. وممكن نستخدم البلكونة للتشمس.

بالنسبة للدور الأرضي نقدر نسوي فتحات لجهة الحديقة بعد للمطبخ وللحمام لو حبينا مثل حديقة خاصة صغيرة تابعة لحيز هذا المكان

لازم الحمام امبحبح شوي مع مراعاة موقع الشباك والباب

المطبخ الخارجي 5* 8 وإذا تقدر تكبر كبر خاصة المطبخ الخارجي

معاك في هذا بس الداخلي يستحسن تحصيري ومفتوح على الصالة

والمخزن 4*4

اذا عندك مساحة لا تقصر على عمرك

وغرف العيال خلها 5*6 او 4.5 * 6

حتى غرفة ماستر 4.5 * 7 مع مراعاة فتحت الباب بعد حلوه واسعة وكبيرة

حمامات العيال لا تتنازل عن مقاس 2.5 * 3 او على الأقل 2 *3

ركز على مداخل الغرف والشبابيك لها دور كبير في شكل الغرفة النهائي

المجلس حلو يكون مستطيل

المطعم مربع او مستطيل اذا المساحة كبيرة

مجلس الحريم حلو مربع وملموم

المطبخ يكون مستطيل وإذا حجم كبير مربع وإذا خارجي يفضّل لون ابيض لشراحه او بيج فاتح

المهم ألوان فواتح

من احلا المقاسات 5 * 7 الشكل المستطيل احلا من المربع

دختور يا بو سعود ونصايحك طيبة .. بالنسبة للمخازن انا تنبهت للمخازن العامة ومخازن عدة التنظيف في كل دور حتى لو تكون صغيرة جداً مثل متر في نص متر لمكينة الهوفر وعدة التنظيف .. للغرف أحسن نسوي غرفة ملابس بباب وتوزيعها داخل بدون أبواب لإختيار الملابس .. وضحت لها صور وأمثلة في موضوع غرف النوم .. فوق علاق الملابس اللي يكون في العادة بإرتفاع 1.6 متر نقدر نسوي رف للشناط أو الكراتين للتخزين الطويل .. هذي الغرف ممكن عرضها يكون 1.6 وطولها حسب المتوفر ولا تحتاج دريشة .. للثياب نحتاج حتى 40 سم وكذلك الأرفف والأدراج لو احتجنا لها .. ومن الجهتين وللمرور 80 سم كفاية وفيها يكون الباب أو يكون في الضلع الطويل.

[الجـــوديّ]

يعتمد على احتياجج اختي وعلى خططج المستقبلية حق العيال

يعني بعض المساحات الكبيرة متعبة وانا احتياجي لها قليل.

المطبخ الخارجي حلو كبير لكنه متعب سواء الخدم او حتى راعية البيت الا اذا تأثث بطريقة تلم اجزاء المطبخ.. الطباخ صوب بما فيهم الثلاجة والستوريج الصوب الثاني.

[Bozizoo]

انا من وجهة نظري غرف النوم لنوم فقط ولا نبالغ بحجمها .
و السبب لكي لاننعزل عن ابنائنا
نحط احتياجتنا في الغرفه وبناء عليه نضع مساحه الغرفه

[Azizuk]

هلا وغلا يامعماري قطري

ننتظر رجعت الى ارض الوطن سالماً غانماً

طبعا قليل اللي من أعضاء المنتدى يملك خبرة ومعرفة ومعلومات في مجال البناء والانشاء والهندسة غيرك يامعماري

ومهب قصور في بعض الاعضاء

معلوماتي وخبرتي في مجال البناء جات من خلال فترة بناء الفيلا عندي فقط

ومن بعض المشاكل اللي واجهتني اثناء البناء

هذا غير ان عندي بعض الأماكن كان بالإمكان اني أوسع نص متر وقلت مايحتاج

لأكن هالنص متر يفرق فرق كبير لو اني ماتنازلت عنه

عندي الله يعزك حمامات العيال خليتها 2.5 * 2 وتحسفت اني مازدتها نص متر

واللي خلاني اصغر الحمامات هو اني ابي دولاب او غرفة ملابس صغيرة

بس هالنص متر يفرق في وسع الحمام وحبيت كل غرفة بحمامها

لان في الوقت الحالي العيال لما يصحون من النوم يتهاوشون على الحمام الله يعزكم من يخلص قبل

وخاصه حمام البنات

غرف العيال عندي 5.5 * 5 والبعض 6.5 * 6

وخليت كل طفل في غرفة للخصوصية

لان العيال بيكبرون الله يحفظهم في المستقبل وكل واحد يبي غرفته بروحه

ولاكن اذا الواحد يقدر يكبر في الغرف وعنده إمكانية ليش لا

انا في بيت اجار والغرف في الحمدالله وسيعه

الماستر 4.5 * 7 واشوفها واسعه

وغرف العيال 4.5 * 6.5 و

اصغر غرفة في بيت الاجار 4.5 * 5

على هالاساس أسست البيت عندي وكبرت شوي

الماستر عندي في الفيلا الجديده 6 * 10 مقسمه غرفة واستراحة للقعدة

والحمام 3 * 3 واشوفه صغير لو يحصلي كان كبرت

وغرفة الملابس 3 * 3

وجنبها غرفة ماتسر بعد 6.5 * 6 مع حمامها 3 * 3 وغرفة الملابس 3 * 3

الماستر عندي كامله تجيك 6 * 22 تقريبا يعتبر جناح

لان مدخل الغرفتين في صالة صغيرة وتدخلك على الغرفة الرئيسية وغرفة الماستر الثانية

وكل شخص يخطط بيته على حسب احتياجاته المستقبلية

على سبيل المثال البيت عندي

مقسم مش مثل الفلل الجديده مفتوحه بسبب احتياجاتي غير

عندي ضيوف يجوني البيت

وكثير من الناس اللي بيوتهم مفتوحه على بعض مافيها خصوصيه

دخلت بيت مره الدور الأرضي كله مفتوح على بعض بس غرفه بحمامها للضيوف

المطبخ والقعدات والصالات والمجلس الداخلي كله مفتوح

سالت راعي البيت قالي انا ماعندي ضيوف غرب ومحد يجيني عشان اقسم البيت*

والله يوفق كل من يخطط للبناء او يخطط لبيت المستقبل

[Azizuk]

انا من وجهة نظري غرف النوم لنوم فقط ولا نبالغ بحجمها .
و السبب لكي لاننعزل عن ابنائنا
نحط احتياجتنا في الغرفه وبناء عليه نضع مساحه الغرفه


غرف العيال قدام غرفتي وجميع الغرف مكشوفة قريبة مني والصالة فوق عندي مكشوفه على الغرف كلها مافي شي مخشوش

[sweet qatar]

مساء الخير
لوسمحتوا عندي عده اسئله محتاجه اعرف إجابتها وخصوصا انا في مرحله الخرائط
1.ماهي افضل مساحه لغرف النوم ومنها الماستر؟
2.افضل مساحه الحمام اعزكم الله؟
3.افضل مساحه للمطبخ الخارجي مع المخزن؟؟
مع الشكر للجميع

1
الغرف لا تقل عن 4*4

2
لايقل عن 2*3

3
المطبخ الخارجي لا يقل عن 6*7
والمخزن 4*4


بس مافي شي مثالي .. و أي تقليل في المساحة ممكن يتعالج بالتصميم الداخلي للغرفة

موفقة ان شالله

[sweet qatar]

انا من وجهة نظري غرف النوم لنوم فقط ولا نبالغ بحجمها .
و السبب لكي لاننعزل عن ابنائنا
نحط احتياجتنا في الغرفه وبناء عليه نضع مساحه الغرفه

أتفق معاك

للأسف صار الطفل بو سنتين في غرفة ماستر !!


شخصيا أفضل غرف العيال تتشارك بحمام واحد تكرمون

عشان في المستقبل ممكن يصير سويت متكامل

[بوخالد911]

الغرفة 5*6
الحمام 3 * 2.5
المطبخ 5*6
مخزن المطبخ 5*3

[ام خويلد]

اشكر الجميع بدون استثاء على اجاباتكم الوافيه
زالله يجعله في ميزان حسناتكم

[معماري قطري]

اللي بيبني وعنده مساحة ما عنده مشكلة لو يزيد شوي ويوسع على نفسه

تبقى هذي المساحات يحكمها التصميم والمساحة الإجمالية المتاحة .. وتبقى مساحات قليلة تسمى بالمساحات الضائعة وهذا اسم ظالم وفي رأيي ما فيه شيء ضائع .. هذي المساحة تعتبر مكملة.

ذكرت الأُخت سويت قطر نقطة مهمة اللي هي التحول المستقبلي .. لو احتجنا مجموعة غرف لعمل جناح لزواج أحد الأبناء .. وانا اضيف عليها البنتهاوس مهم جداً وإن شاء الله مطالبات الكثيرين تعجل بقوانين بلدية جديدة تسمح بثلاث أدوار كاملة أو حتى أربع وأكثر إن أمكن .. وأتمنى فتح المجال لعمل مداخل خاصة خصوصاً لمن يعمل بيسمنت .. بحيث يكون قابل للعزل عن باقي المنزل لإبن أو لأَخ والإبتعاد عن الشك في نوايا الناس بالتأجير .. وسن القوانين الخاصة بالتأجير الجزئي لو أحدهم رغب في ذلك أو منعه بقوانين واضحة وعقوبات رادعة لكن يعدلون التصميم على أساس الشك هذي مأساة .. فالمخارج والمداخل لو تعددت للبيت أفضل لسهولة الخروج والدخول ولوقت الطواريء.

أَفضل لو في البيت جزء من الصالة بواجهة زجاجية ويخصص للتلفزيون وألعاب التلفزيون للأطفال حتى لا يتسببوا في الإزعاج لباقي البيت وتمكن رؤيتهم .. ولو مع سرراوند ساوند نحتاج مخمدات صوت ونسوي الغرفة مغلقة .. وهذي مساحة 3 في 4 كافية لها بحيث بعد التلفزيون عن الجالس يكون حول 3 متر حتى يعيش الحدث.

المكتب المنزلي كذلك ضروري للطباعة ولحفظ الكتب والأوراق المهمة وللدراسة .. يكون متعدد الوظائف وبواجهة زجاجية أفضل.

غرفة التمارين البسيطة ضرورية كذلك وممكن تكون غرفة عادية زائدة تتحول وقت الحاجة لأي استخدام.

لو فيه مساحة خارجية نقدر نسوي حوض سباحة ويستحسن بواجهة زجاجية مطلة على الصالة ودخوله وخروجه يكون سهل .. البعض يسونه فوق السطح أو في البيسمنت بس يحتاج شغل قوي ومغامرة مب مضمونة.

للأراضي المحدودة ضروري نسوي بيسمنت أقل شيء للسيارات ومخزن وغرفة سائق لو احتجنا .. ولو سوينا بيسمنت مب ضروري نرفع أرضية الدور الأرضي .. ممكن ننزل أرضية الحوش في بعض الأماكن لعمل مناور أو حدائق نازلة للبيسمنت .. وارتفاع البيسمنت ممكن يكون صافي من 2.2 الى 2.8 ولو حبينا نسوي التمديدات للماء وللصرف تحت سقف البيسمنت بتكون سهلة ومكشوفة نقدر نلاحظ أي تسريب .. ممكن كذلك نسوي غرف صغيرة لمعدات التكييف مع تهوئة جيدة ونفتك من التكييف اللي فوق السقف ونفتك من حرارة الشمس على المكيفات .. ولو سوينا بيسمنت خدمات كهذا ليس من الضروري يكون كله خرسانات لو استعملنا نظام تصريف المياه بالمضخات والبايبات الممدة تحت الأرض.

أُمور كثيرة صعب نجملها في كم كلمة ومرينا عليها في مواضيع كثيرة.