استفسار عن بناء مجلس خارجي.

[بوخالد911]

مرحباً
حبيت اسالكم بخصوص بناء مجلس خارجي
10 * 5
مع مغسلتين وحمام. أجلكم الله
تسليم مفتاح
مع المواصفات التالية :
بيبات بي بي ار المانية
وايرات كهربا عمانية
سوكتات تمبي
جبس بورد ون ليفل
عازل حراري
صبغ جوتن
تمديدات كهربا

كم سعر المتر؟
مع فائق الشكر.

[معماري قطري]

المقاول اللي بيسعر لك بيسعر لك على حسب التصميم والمواصفات الباقية .. الأرضيات ونوعية الحديد وكمياته حتى الواجهات لو فيها جي ار سي وكمياته ونقوشاته ومواصفاته لو مكتوبة ولازم ينشرى من محل غالي أو الرخيص مقبول .. وكل هذي يحط عليها المقاول نسب احتمال ارتفاع السعر والربح الخاص به.

اللي بيسعر لك بالمتر بيسعر لك غالي ( يفترض ) واللي بحساب كميات بتقدر تحاججه في بعض الكميات .. وغلبيتهم يسون حساب كميات ما يراونك اياه.

لو تبي باكستاني سعره معقول عندي رقمه .. بس خل الجبس عليك اتفاق خاص وخل الأرضيات عليك وعليه التركيب ولو تخلي متر ونص للمغاسل وتكرم الحمام وغرفة صغيرة للقهوة والشاي وباقي المجلس مفتوح جزء معقول لجلسة أرضية للطعام .. وهذا الجزء نسويه بأرضية سجاد مع حشوة مريحة للجلوس ويكون محفور لها في البورسلان أو الرخام.

خل الدرايش اتفاق خاص يو بي في سي أفضل .. ولو بتركب عازل سو جزء الحائط اللي بدون درايش بفتحات للزينة وتقدر تسويها بتبطين خشب وتترك في الطرف الداخلي فراغ لإنارة داير الفتحة ممكن ال اي دي وممكن شبه مخفية .. فريم الخشب نفس فريم الباب تقريباً يجي عريض ويوازن حواف الفتحة وتكون الإنارة في آخره .. تقدر تقسم هذي الفتحات ( رواشن بالقطري القديم ) قسم فوق ظهر الكرسي بشوي وقسم فوقه بحيث تكون مربعة الشكل من 80 سم الى 120 سم للضلع حسب تصميم المجلس .. اللي تحت تكون مثل الرف لدلة قهوة قديمة أو صورة أو أي شيء غير .. اللي فوق الإضاءَة تكون أقوى وتنغطى الواجهة بزجاج ملون ممكن نشيله لتغيير اللمبات .. ممكن اللي فوق متوازنين غير وصغار حتى لين 40 في 40 سم ويكونون على كل جدار من داخل حتى فوق الدرايش .. وللمجلس يستحسن الدرايش تكون بدون ستاير ومن داخل بلون خشبي .. يجي بجلاد يتلبس تلبيس عند بعض الشركات والخارج أبيض لمقاومة الشمس وتغير اللون.

هذي أفكار بسيطة للمجلس .. فوق ممكن بعد نسوي درايش ثابتة صغار ومن داخل مغطية بمشربية جي ار سي أو جبس بنقوشات حلوة والمغاربة شاطرين في هذي الشغلة.

واللي يبي يسوي مجلسه شرح أكثر وفيه خرير الماء وهو يشوف الوجوه الحسنة حوله يسوي فيه نافورة صغيرة .. هذي السوريين خطيرين فيها والمغاربة كذلك .. وما تكون مرتفعة بحيث الجالس يشوف اللي مقابله

[معماري قطري]

الإنارة الطبيعية من الفتحات العلوية اللي في الجدار حلوة .. وممكن لو حبيت انارة أكثر تسوي منور سقفي .. skylight ممكن هرمي مقسوم قسمين لأن المجلس طويل قسم في المربع اليمين وقسم في المربع اليسار

[Azizuk]

مرحباً
حبيت اسالكم بخصوص بناء مجلس خارجي
10 * 5
مع مغسلتين وحمام. أجلكم الله
تسليم مفتاح
مع المواصفات التالية :
بيبات بي بي ار المانية
وايرات كهربا عمانية
سوكتات تمبي
جبس بورد ون ليفل
عازل حراري
صبغ جوتن
تمديدات كهربا

كم سعر المتر؟
مع فائق الشكر.



مراحب

حط في بالك مب اقل من 170 الف التكلفة

واحد من الربع مسوي مجلس 6 في 10 جاي شوي مضلع المجلس

مع غرفة طعام 4 في 8 ومغاسل وحمام صغير وارتفاع 4 متر صافي

كلفة البنيان عظم 170 الف مع العازل

هذا من غير الكهرباء والسباكة والديكور وباقي التشطيبات من والى

تقدر توفر اذا تجيب لك الوايرات وتجيب لك كهربائي يسلك لك بس

شغل يده يمكن يكلفك 3 آلاف

والسباك مثل

وإذا تقدر تقدر تبني بروحك اذا لك بأرض

جيب ناس تحفر وتروح

ونزل الطابوق والرمل والاسمنت مع الحديد والخشب وجيب لك ناس تبني

والسقف تطلب لك من شركات الخرسانة

المهم تبني قطاعي راح تتأخر شوي والله اعلم كم راح توفر

ونصيحه شوف لك مقاول بتاني وإلا باكستاني لا يعور رأسك ويخلص شغلك بسرعة

البتان يعجبونك يخلصون بسرعة بسرعة وشغلهم كله بدائي يدوي مال اول

والله مره بتات يسون منهول في الشارع يحفرون بيدهم حفرو 4 متر يدوي

وسوو صبية المنهول على مراحل وصله وصله وخلطة الخرسانة بالخلاط القديم والقابرو والمواد يجيبون على قد المطلوب

[Qt.1]

هلا بوخالد تبي نصيحتي وانا اخوك لتعور راسك وتبني مجلس صبيه وطابوق وسنداره , سو لك خيمه حلوه مرتبه مع جلسه حلوه ووزع الااضاءه بطريقه حلوه , وسو حمام وانت بالكرامه مع مغاسل رخام على جنب واذا تبي افصلهم عن البيت , انا عن نفسي مابنيت مجلس خارجي لاني بفصل خيمه تقريبا نفس المساحه الي انت تبيها وصدقني مابتطلع عليك كثر البنيان والله يوفقك يابوخالد.

http://www.alhadeeqa.com/vb/imgcache/2010/08/98.jpg


http://www.mzalatraed.com/upload/1424181899_78c2df75.jpg

[معماري قطري]

الأمثلة كثيرة وما قصر بو عبدالله وبو سعود

شفت الرواشن المذهبة شلون؟ هذي لو عندنا شوية ارتفاع نقدر نسوي فوقها أصغر وحتى لو بتكرار أكثر ومسافات تختلف بس تكون متجانسة مع اللي تحت .. واللي فوق تكون للإنارة الطبيعية وفي كل الجهات .. صوب المغاسل نقدر نسوي السقف نازل وسقف المجلس مرتفع حتى نسوي فتحات إنارة في الحائط.

انا فكرتي لمجلس بيتي الجديد تختلف .. وناوي اسوي الدرايش طويلة وضيقة .. من تحت تنفتح ومن فوق ثابتة واسوي منور في السقف من الوسط .. كلها أيام وارجع للقواعد الدوحوية ان شاء الله واحط فكرة تصميم المجلس واتابع أكثر في باقي المواضيع .. خذت احتياطي من ناحية الارتداد وان شاء الله التخطيط ما يعقدون الموضوع.

المشكلة مجالس قطر في السابق كانت خارج حدود البيت وألحين الأراضي صغيرة والاختيارات محدودة والتخطيط راسهم يابس في الارتداد وعدم فتح نوافذ على الخارج .. المجلس لازم يكون مفتوح ومرحب بالناس وعلى حدود السور ولازم يساعدون ببعض الاستثناءات للمواقف والزراعة جدام ليعكس تراث قطر كما هو موجود في الكثير من المجالس .. أما نسوي مجالسنا مخفية وكملحق خدم بحائط وباب فهذا شيء لم نتعود عليه.

[معماري قطري]

مع كلام بو سعود بنيان المجلس سهل وممكن تسويه قطاعي حسب الوقت المتوفر عندك بس تنسق الشغل صح

حتى ممكن تسوي السقف حديد معزول وبطريقة مخفية وما يبين .. عندنا مجلس قديم قديم معمول بحوايط طابوق بدون تسليح وخشب المربع الكبار .. مسوينه من داخل شد وقماش راقي ومركبين له باب خشب سولد بتصميم قديم والشد مخليه دافي في الشتاء وبارد في الصيف بسبب وجود الاسفنج المضغوط وعازل للصوت كذلك .. عيبه تجديده تم بدون شبابيك نهائياً .. بس نظام البناء الأساسي موجود كما هو.

[بوخالد911]

الف شكر للكل
كان الهدف هو معرفة كم بيكلفني المجلس تقريباً؟
كم سعر المتر؟
وشكراً

[اللوز]

قبل ما تسوي المجلس
هل بناء المجلس تستفيد منه كل يوم
بمعنى هناك مجالس لا تفتح الا في العيد
يغني ما مدى استفادتك من المجلس

ثم يجب ان تحدد نوع المجلس
هل هو مجلس تراثي
ام مجلس كلاسيك
ام مجلس مودرن
ام مجلس مغربي
كل تصميم وله سعره