مكتب لعمل الخرائط

[البرونزي]

السلام عليكم ورحمة الله

بغيت اسوي خرائط للبيت ياليت نصايحكم لمكتب شغله عدل ويعطي نصايح وافكار
رحت مكتب توب فيلا عطاني سعر 90 الف :nice: قلت له ترا بيت مب مجمع سكني
قالي هالشغل مع الديكورات الداخليه ونهائي من غير الديكورات الداخليه واصلا انا ما احتاجها
قال 60 الف :secret:
على العموم الي عنده رقم مكتب زين ومن الاسعار المعقوله ياليت يرسله لي

تحياتي للجميع

[$الملياردير$]

هلا اخوي الله يوفقك ويسعدك و يبارك لك .. هذا سوال مطاطي و كل واحد راح يجاوبك من خلال تجربته .. والزين عندي شين لغيري ... أنصحك روح لجنة قبول المهندسين عندهم لسته للمكاتب المصنفة و اي درجه هي .... وتعرف اذا عليها عقوبات او مشطوبه ... بعض الأحيان يكون المكتب الهندسي نزل تصنيفه من درجه ا الى ب او ج من قبل اللجنة و احنا مانعرف بهذا الشي و النزول لا سباب فنية او مهنية او مخالفات ... بس مستمر يبيع خدماته ع انه مكتب فئة أولى ... والله ياخوي سوالف المكاتب الاستشارية ما تخلص ... نصحية اخيره لا تستهين بدور التصميم و الاستشارة فهو كل شي وتفادي المشاكل ع الورق أهون بكثر من تفاديها ع الطبيعة ... السعر لمساحة بناء 1000 متر الى 850 متر هو 20 الى 25 بالكثير ويكون مكتب مصنف 1 .... لك ودي و احترامي

[سعود.]

الاقصى للاستشارات الهندسية

انصحك فية عن تجربة .... عيبهم يتأخرون شوي

اسعارهم ممتازة

[معماري قطري]

الأقصى سمعته طيبة بس ما جربته انا .. ومثل ما قال اخوي الملياردير شوف اللجنة أفضل ومر على المكاتب اللي درجة ثانية وثالثة بشرط يكون المكتب متضمن كل التخصصات وما يسوي لك شغل برا خصوصاً الكهربة والإنشائي .. وحاول تتفق مع المكتب اتفاق شامل .. تصميم - مناقصة - اشراف لأنك بتتعب في باقي المراحل وبتتعرض للغش.

ولو تطلبهم حساب كميات مبدئي مع تحديد المواصفات وطريقة العمل لكل شيء بوضوح أفضل لك .. بعدين بتدخل في المفاوضات وبتشيل أشياء انت تتفق فيها مع مقاول ثاني أو تشتريها والمقاول يركبها وباشراف الاستشاري أفضل لك بوايد.

ركز على المكتب وطبيعة الشغل فيه وقسم الاشراف وغرفة الاجتماعات والهدوء .. بعض المكاتب كنك في الحراج حتى الكراسي قنابل موقوتة فجأة تطيح بك ومن الحراج شارينها .. وبارتشن مفتوح كنك في سوق السمج والمهنية عندهم ضايعة.

اطلب يضمنون العقد تصوير وتقرير اسبوعي وحسب أوقات الصب .. بعدين هذي الأسعار معقولة لكن شبتحصل من وراها وشلون الدفعات هذا الأهم ولازم تحدد في العقد.

وانا حاضر وباساعد في الملاحظات ومر شوف هذا الموضوع بيفيدك .. وشوف باقي المواضيع بتستفيد ثقافة عامة في البناء

http://www.qatarshares.com/vb/showthread.php?608441-مراجعة-التصاميم-المعمارية-وابداء-الملاحظات-عليها-(محدث)

فيه كم نموذج من بدايات التصميم ممكن تاخذ فكرة وتعدل حسب اللي تبيه

[سعود.]

صادق اخوي معماري ( الاقصى )

يوم رحت لهم مب صدفة امدحه لي واحد من الربع ( ثقه ) شرواك

وصدق يوم رحت لهم شغلهم 100%

حتي الأستشاري يوم شاف الخرايط ماحصل اي ملاحظات .

[البرونزي]

الملياردير
سعود
معماري قطر
الف شكر لكم يا اخواني على الرد وجزاكم الله الف خير .
الاخ معماري قطر مشكور على المجهود الطيب بصراحه وبدون مجامله مواضيعك مفيده جدا
خاصه الي ماعنده اي فكره في البناء و في ميزان حسناتك ان شاء الله
تحياتي للجميع

[معماري قطري]

الله يحفظك إخوي البرونزي ويوفقك في بنيانك

تذكر إخوي البنيان خطة تبدأ بفكرة وتتطور حسب حاجة الإنسان .. والإنسان دوم يطمع ويبي كل شيء .. وقليل تحصل اللي يختار التوسط أو الوسط بدون مبالغة وبدون تقصير كذلك .. لأن البنيان مجهود ولو ما حسب الواحد حساب الكفاية له ولأهل بيته يضيع كثير من مجهوده على شيء ناقص .. كذلك لو بالغ وما قدر يكمل أو سوى بنيان مزين بطريقة مبالغ فيها ممكن ينقلب الجمال قبح .. حلاة الجمال يكون فيه وقار ويدوم فترة طويلة.

وإن شاء الله حاضر لك وللجميع في أي استفسار دوم بإذن الله.