الــمــجــلــس والمشادات بين بعض !!!

[بومحمد المطاوعه]

السلام عليكم ورحمه الله وبركاته ،،

اسعد الله صباحكم بكل خير،،

اليوم الويكند
اسأل الله ان يحفظكم جميعآ

واليوم يبدأ موعد نصب الخيام والعنن
الله يحفظكم جميعآ وعن التهور ،،!


ببدأ في الموضوع وبتكلم عن برنامج المجلس !! ..

طبعآ الكثير يعرف البرنامج على قناة الكأس
وأسم البرنامج المجلس ،،

سبحان الله ولا عمري تابعت هذا البرنامج ومافيه هوشه او رفع فالصوت او سوء فهم بين أثنين
وكأنهم والسموحه على هذي الكلمه ،،،
اطفال بالتصرف والعياذ بالله ،،،


نسو كلام الله تعالى ،،

يقول الله -سبحانه-: وَأَنْ تَعْفُوا أَقْرَبُ لِلتَّقْوَى[البقرة: 237]، ويقول -عز وجل-: فَمَنْ عَفَا وَأَصْلَحَ فَأَجْرُهُ عَلَى اللَّهِ[الشورى: 40]،

وقول رسولنا الكريم صل الله عليه وسلم ..

يقول النبي -صلى الله عليه وسلم-: (لا تحاسدوا، ولا تباغضوا، ولا تدابروا ولا تناجشوا ولا يبع بعضكم على بيع بعض، وكونوا عباد الله إخواناً، المسلم أخو المسلم لا يظلمه ولا يحقره ولا يكذبه ولا يكذب عليه ... الحديث)،


مستغرب من بعض الضيوف في هذا البرنامج ،،

وصلني مقطع فيديو من البرنامج
مع ضيف عماني وكويتي ..

من قلة ادبهم وكلامهم والبعض يغلط على الثاني
بكلمه غبي و تخسي ومتخلف
وبعدها يرد عليه الأخر انا محترم غصبآ عنك وعن الي جابك ،،!! ويقوله تاكل تبن !!!

استغفر الله لا أحترام للمشاهدين ولا للبرنامج

وين قاعدين احنا !!
في kg1
وفي الروضه يمكن مايسوونها الأطفال !


الله يهديهم ويصلح حالهم
واتمنى من هذا البرنامج ان يعيدون النظر لأن في اطفال اعتقد يحبون التحليل الرياضي ويشاهدون هذي البرامج

والسلام عليكم ورحمه الله وبركاته

[شبح الصمت]

وعليكم السلام ورحمة الله وبركاته ،،،

كرياضيين يابومحمد مفروض تكون عندهم الروح الرياضية

الرياضي يتعلم
الصبر
والتحمل
والاحترام

مش قلة الادب والتطاول ..

الا اذا يبون يقلدون برنامج الاتجاه المعاكس ..
بس في فرق بين الاتجاه المعاكس لانه يجيب لك ناس معارضين

وهذولي كوره يعني لا فيها سياسه والا فيها اسلحة نوويه ..


الله يهديهم
لا اتابعهم ولا لي فالكوره من زمان

مريح الطاسه على قولتهم

[راعي الكورفت]

برنامج المجلس مجرد مسرحية هزليه والمحللين يمثلون عشان يرفعون حماس المشاهدين وبعد مالبرنامج يخلص تلاقيهم حبايب يمشون مع بعض بالكورنيش .

[bo matar]

حركات اعلاميه

هالهوشات والمناوشات هي الي تشد المشاهد

من افضل البرامج الرياضيه برأيي

[بومحمد المطاوعه]

الله يهديهم يارب

[كازانوفا]

ههههههههههه شكلهم ناسين ان الكاميرا شغاله
او ما حد قالهم

[شموخ دائم]

,

,


مرحبا


اخوي الكريم

برنامج المجلس

ينقسم الى 3 اقسام

1- قسم التحليل الفني للمباريات وبعض الاسماء منهم ( خليل الزياني ) هذا محد يقرب منه بالمشادات والمهاترات لانه جاي للتحليل فقط
2- قسم المشادات والاثاره والحفار لبعض واحراج الضيوف بمطبات على الهوى مباشره
3- القسم الكوميدي وله بعض الضيوف وعلى راسهم شخص معروفه بالمجلس

الهدف طبعا من هذه التشكيله
هو زياده المتابعين من جميع دول مجلس التعاون وفكره البرنامج
انه مثل المجلس فيه الهرج والمرج والانفعالات فيه الزين وفيه الشين


البرنامج نجح وبه متابعين كثر محليا وعلى مستوى دول الخليج
مقدم البرنامج عنده ( قدره عجيبه ) على ضبط اعصابه
والتلاعب بالجميع بكل برود اعصاب
اهنيه على هذه الموهبه

,

,

[الحياة الخالدة]

و عليكم السلام و رحمة الله و بركاته

المجلس فيه محللين يفرضون هيبتهم و احترامهم .. يتكلمون بكل هدوء و يحللون بحرفية متقنة .. و ينأون بأنفسهم عن المهاترات
و بالمقابل فيه البعض ( اللي ما اقدر اطلق عليهم حتى لقب محللين ) تحسهم موجودين بس للتهريج أو الصراخ و المعاياة

نوع من الإثارة و التشويق .. بين الفائدة و تضييع الوقت .. قد ترجح الكفة لأحدهما دون الآخر : حسب الظروف

[غريب الدّار]

,

,


مرحبا


اخوي الكريم

برنامج المجلس

ينقسم الى 3 اقسام

1- قسم التحليل الفني للمباريات وبعض الاسماء منهم ( خليل الزياني ) هذا محد يقرب منه بالمشادات والمهاترات لانه جاي للتحليل فقط
2- قسم المشادات والاثاره والحفار لبعض واحراج الضيوف بمطبات على الهوى مباشره
3- القسم الكوميدي وله بعض الضيوف وعلى راسهم شخص معروفه بالمجلس

الهدف طبعا من هذه التشكيله
هو زياده المتابعين من جميع دول مجلس التعاون وفكره البرنامج
انه مثل المجلس فيه الهرج والمرج والانفعالات فيه الزين وفيه الشين


البرنامج نجح وبه متابعين كثر محليا وعلى مستوى دول الخليج
مقدم البرنامج عنده ( قدره عجيبه ) على ضبط اعصابه
والتلاعب بالجميع بكل برود اعصاب
اهنيه على هذه الموهبه

,

,

.

تحليل واقعي جدا
أعتقد انه ينطبق (بشكل كبير) على البرنامج

[طلعة الروح]

فعلا البرنامج اسم على مسمى (مجلس) وطقطقه اكثر من أي شي آخر وحاطين لهم فاله وفوق هذا كل واحد فيهم مب جاي يسولف ابلاش وتلاقي متابعه ورواج لهذه البرامج لدى بعض افراد المجتمع المتمللين غالبآ.

[معماري قطري]

المجلس عينة من أي مجلس قطري .. فيه وفيه وفيه

من زمان ما تابعته بس لو جات فيه كلمات قوية مثل تخسي وغبي صراحة وايد تجرأوا على الذوق العام والمشاهد

[بوحارب]

مجلس لهو وغفله وكلام فاضي

صارلي ثلاث سنين وأكثر ما تابعته

[ابوعلي]

مجلس لهو وغفله وكلام فاضي

صارلي ثلاث سنين وأكثر ما تابعته

صدقت اخوي وأنا مثلك صرت ما اتابع بسبب تصرفات بعض المحللين والي للاسف المفترض يكونون قدوة ولهم قاعدة جماهيرية

[بومحمد المطاوعه]

ودي انزل الفيديو ولكن

ماقدر اسمعكم الكلام الي ينقال
لأن في ناس هني محترمين
مب مستواهم هذا الكلام الي ينقال في الهوشه

[جبر ال جبر]

المخرج عايز كده يبي يضحك شوي ونسى انه اعلام مفتوح وفضاء والكل يشوف يليتك يالمخرج تجيبهم مجلسك وتضحك عليهم

[فرفوش]

تمثيل في تمثيل

[فارس قطر]

المجلس فيه ناس محترمه وتعطيك الفائدة وتحليل الجيد وفي ناس نستمتع لوجدها تعطيك نكهه وفرفشه في المجلس وفي ناس غير محترمه كلامهم يخرج عن الذوق العام وينسون ان في ناس تشاهدهم من جميع الإعمار اللوم كله يقع ع المخرج ومذيع البرنامج اللذين يغفلون ان البرنامج يذاع للجميع دول العالم ويحمل اسم دوله قطر.

[CH Engineer]

يتعمدون هالسوالف بس مرات يصير سوء فهم ومشادات
فكرة البرنامج حلوه
مثل الاتجاه المعاكس الكل تكلم عنه وحاليا أشهر برنامج فالوطن العربي ومقدم البرنامج عنده 9 مليون متابع عالفيس بوك

[الكواري 1972]

سياسة البرنامج

[بوخالد911]

قدام الناس يتهاوشون
وبرع تلقاهم يتمشون بسوق واقف
وساكنين بفندق واحد !!!!

[بومحمد المطاوعه]

الله المستعان

مادري لين متى بيرتقووون اشوي

البعض منهم

[عثرة جواد]

السلام عليكم

المجلس برنامج من انجح البرامج الرياضية

الي يقدمة خالد جاسم الله يعطية العافية

يمكن يكون فية اغلاط مثلة مثل غيرة من البرامج

لاكن لة اهميتة الرياضية وضيوفة لهم الاحترام والتقدير

عساااك ع القوة