عاجل .. شركة مقاولات

[المحاميه]

السلام عليكم

بغيت ماعليكم امر بشكل مستعجل شركة مقاولات وصيانة ثقه وشغلها نظيف وسريع


ف الانتظار
وجزاكم الله خير

[Aozomblue]

الصيانة دوم تكون صعبة الله يكون بالعون
حاولي تاخدي اكثر من عرض سعر من اكثر من مقاول
برسلك على الخاص ارقام ناس ثقة و بالتوفيق ان شاء الله

[المحاميه]

جزاك الله خير اخوي

في انتظار ارقام اخرى

[المحاميه]

للرفع

ارجو المساعده

[سهم القطو]

السلام عليكم ، ، ،

شيكي الخاص أختي.

[المحاميه]

عليكم السلام

جزاك الله خير اخوي وف ميزان حسناتك


في انتظار المزيد

[رذاذ]

انصحج بشركه الابدال للتجاره والمقاولات
شركتهم وشغلهم تمام وبمتابعه صاحب الشركه بنفسه
واسعارهم بعد فوق المعقول .

عندهم صباغين وبلاستر وبناين و ديكور و تبليط . كهرباي وفيتري

[معماري قطري]

شوفي التسعير من الشركات الصغيرة وجربي بعد الكبيرة والمتوسطة .. واحد بنى لنا في منتصف التسعينات بناية تجارية 4 طوابق وكانت الشركة مستقلة لكن تعتبر فرع من هندسة العمارة القطرية ( المقاول الرئيسي في بناء الستي سنتر ) والحمد لله بناؤهم على هذي السنين ما تغير وكان فيه اشراف قوي من قبل مكتب استشاري شغال للحين.

من فترة شفت تسعير لبيتين بيسمنت + أرضي + أول + بنتهاوس والبيتين كبار مضاف لهم مجلس بملحقاته .. وحصلنا تسعير 5.3 مليون الى 2.2 مليون ومن شركات بعضها توها في السوق وهذي الشركة بعد ما تضامنت معاها شركة أمريكية وزاد عدد العمال ل 1600 عامل .. الشركة تحتاج مشاريع لذلك تسعر بحدود ربح بسيطة للمنافسة .. وكان سعرهم هو الأقل .. إسمها ييلز أند أندرو وشوفي تفصيلاتهم للأعمال وما يسمى بالشوب دروونغز قبل التوقيع ولو تبغين عنوان إدارة الشركة .. عندهم مقر فوق فوشون من ورا ويمكن عليه لافتتهم القديمة شركة جي ال سي وعندهم مقر في الأبراج.

شركة ثانية هي كونسيرف ومقرهم في السد فوق بوكيه .. الشركات هذي لازم نسوي لهم زيارات مبدئية ونشوف مكانهم ونحاول بعد بطريقتنا نعرف مشاريعهم وانا عني مجرب الثنتين في مباني من أفضل المباني .. كونسيرف بنوا لمديرنا السابق ومديرنا اللي قبله وبنوا لإخوي وللوالد بس الشركة مب رخيصة ولازم الاتفاق النهائي معاها ومع غيرها عن طريق استشاري وتحديد كل النقاط والمفاوضات ضرورية للوصول لحل وسط ولبدء البناء.

شركة العلي للمشاريع بعد شركة قوية ويديرها المهندس محمد بن راشد العلي .. شركة حسنسكو وشركة سريع .. وشركة مافا في شارع ال شافي مديرها ومالكها قطري وهي شركة صغيرة جربتهم في شغل بسيط خلصوه لي بسرعة وبرخيص

[المحاميه]

جزاكم الله خير


واللي يعرف زياده عن المذكور يعلمنا

[معماري قطري]

نصيحتي لا تاخذين وايد بتتعبين انتي وبيكون الاختيار صعب .. من 7 لين 12 شركة كفاية .. أول المراحل تقدرين تقولين الاستدعاء للمناقصة بواسطة الاستشاري .. وثانيها التأكد إن الدعوة وصلت بالفاكس ولا شفهياً بالتلفون .. بعض الاستشاريين يوجهون الدعوة للي يحبون وبس وبعضهم يطلبون مبالغ كبيرة من المقاول بخصوص الخرايط والمواصفات وشروط العقد .. ولو المالك بنفسه خذ هذي الوثائق وصورها ووزعها بطريقته بعد بيمر بمشاوير وبيستفيد انه يكون جدي ويقابل مدراء الشركات ويتناقش معاهم ويعرفهم ويعرف امكانية الشركة .. وحتى ما تكلفه شيء بس بعض الاستشاريين ما عندهم عدة التصوير اللازمة وبعضهم يستخسرون هذي الخدمة .. يفترض من أساس عقد الاستشارات نذكر المناقصة وعدد الشركات المدعوة وتجهيز الوثائق حتى الاستشاري يلتزم.

أَثناء دراسة الخرائط تكون فيها نواقص يستفسر عنها المقاول بالفاكس أو الايميل الرسمي من الإستشاري ومن المالك لو فيها اختيار خاص .. وممكن المقاول يعرض بدائل يراها أفضل ويتم النقاش حولها والموافقة على الوضع النهائي .. طبعاً فيه مقاولين يشوفون ويعرفون ويعتبرونها ثغرة ويغضون النظر عنها لين يجي وقتها وبعضهم كسل .. لكن خلال المتابعة والزيارات والسؤال عن لو فيه ملاحظات نشوف مدير الشركة أو اللي درس الوثائق متعاون ويقول لنا كل شيء أول بأول.

شركات بترفض تسعر وشركات بتسعر ودياً وتسعيرها بيكون غالي كثير لأنها ما تبغي الشغل أو مضغوطة .. شركات بترسل الوثائق للتسعير من قبل حاسب كميات مختص كطرف ثالث وبتحط هي تسعيرها بزيادة شوي كاحتياط لإرتفاع الأسعار المتوقع .. وشركات بتحول الدراسة لشركة ثانية تشتغل بالباطن وبتاخذ كومشن بدون عمل شيء .. وهذي لازم نذكر في الدعوة بند خاص يحذر من التعامل بالباطن.

انا حق بيتي خذت سنة تقريباً في هذي المعمعة وآخرها بعد ما شفت الأسعار تدور حول ال 3 مليون وكان في 2004 قررت أخلي المواد التخصصية مثل الدرايش والبيبان عن طريقي وباتفاق خاص وبالتنسيق مع المقاول لعمل الترتيبات اللازمة .. التبليط والصحية علي شراؤها والتركيب على المقاول وبشروط خاصة وتفاصيل للتركيب .. المطابخ أخذتها علي وكذلك الأسقف المستعارة .. وتم التفاوض مع مقاول كان خارج اللستة كلها وكان لي تجربة معاه في بنيان للشغل وحاولت معاه ورفض .. وبصعوبة اقتنع وسعر وكان سعره هو الأفضل بحدود 40% من سعر الباقيين .. وجاني حساب الكميات واضح ومسعر بند بند ووقت المفاوضات نزل شوي في السعر وارتحت له راحة تامة.

الحمد لله ما كان نهائياً فيه أي ثغرات ولا زيادة في السعر لأَن كل شيء محسوب بدقة وموافق عليه من البداية والاستشاري كان مختص ومجتهد ولكل شغلة يجي شخص متخصص فيها مب مهندس واحد لكل شيء وهو فورمان حتى ما يوصل .. والمقاول عنده مدراء مشاريع دوم موجودين ومقر راقي بمكاتب وكاميرات مراقبة عند المدير وترتيب من أفضل ما يكون .. حتى التأثيث للمكتب راقي وغرف اجتماعات خاصة والأُمور تمشي بسلاسة من ناحية الاتصالات والتواصل والحضور للموقع لو فيه داعي وكان المدير يمر بروحه ويتابع.

[Aozomblue]

اخوي معماري قطري

جزاك الله خيراً مبدع كالعادة

[معماري قطري]

العفو يا طويل العمر ما قلت الا القليل

كنت مفكر مشروع بناء لو صيانة على حسب درجة الصيانة نحدد أي مقاول يسويها