سؤال للبنات .. من تتجرأ ..!!

[بصمة قطرية]

بسم الله الرحمن الرحيم
السلام عليكم و رحمة الله و بركاته


صباح / مساء الخير على الجميع ..
سؤالي للبنات و ما يمنع الشباب يشاركونا الراي ..


لو شفتي وحدة في مجمع و لا مكان عام لابسة لبس عاري ..
هل بتتجرأين تكلمينها ..؟؟
تنبهينها عن لبسها ..
يمكن تكون ما تعرف عاداتنا و تقاليدنا
و قبل كل هاي إن قطر دولة مسلمة ما نرضى بهالملابس ..!!!



بالنسبة لي ..
إي نعم أكلمهم و الحمدلله تجيني قوة في ذيك اللحظة
إني أوقف اللي لابسة عاري و أكلمها ..
طبعاً الكلام يكون بأدب و بهدوء عشان تتقبل كلامي ..
ممكن تكون ردة الفعل عكس ما أتوقعها
و اكون مهيأة نفسي لهالشي ..
نفس الموقف اللي تعرضت له صديقتي من سنه تقريباً
في أحد الفنادق .. ( سبق نزلت موضوع عن هالشي ) ..
المهم ..
شخصياً الحمدلله مرات كثيرة أوقف أجنبيات يكون لبسهم عاري
أكلمهم و أقول لهم إن هاللبس مرفوض عندنا
و إحنا بلد مسلم و عاداتنا وتقاليدنا ترفض هالشي
كل اللي نطلبه بس إحتشام
ما نطالب إنهم يلبسون عباية بس يسترون أجسامهم ..

اللي خلاني أنزل الموضوع إني كنت في الرويال بلازا يوم الأربعاء ..
شفت فلبينية كان لبسها عاري جداً ..
إنقهرت يوم شفتها و ما قدرت أسكت ..
دخلت الحمام ( الله يكرمكم ) ..
قلت بنتظرها تطلع و بكلمها بهدوء بيني و بينها
عشان ما أسبب لها أي أحراج ..

أول ما طلعت قلت لها أبي أقول لج شي ..
استغربت و قالت لي شنو ..؟
قلت لها إنتي شايفة لبسج ..!!
جسمج كله برع ..!!!
و جاية مكان عام بهاللبس .. !!
سكتت و تمت تطالعني ..
كملت كلامي ..
قلت لها إنتي في بلد مسلم و له عادات و تقاليد ..
المفروض ما تطلعين أماكن عامة بهاللبس ..
المطلوب منج بس إحترام ديننا و عاداتنا و تقاليدنا ..
و قلت لها في قانون في المجمعات يمنع اللبس العاري ..

قالت لي : أوكي مدام
أنا آسفة ..
راح ألبس هاي ..
كان معاها بلوزة رابطتها على خصرها ..
لبستها قدامي و مشت ..

بصراحة إرتحت وايد بعد ما كلمتها ..

[Dana’1]

وعليكم السلام ورحمة الله وبركاته

بصراحه مو دايم يمكن مره بس لان اللبس كان جدا جدا جدا فاضح ومقزز شلون دخلت ما اعرف شلون العالم ساكته ما اعرف ؟! سلمت و كلمتها بهدؤ وكانت تسمع وقالت اوك وجاء صديقها عربي وقالت له قال أوك ولا يهمك أنا افهمها ولا تلبس كذا مره ثانيه


وموه بعد شفت وحده لبسها يلوع الكبد مقزز منظر جدا بشع
بس ما كلمتها أنكرته بقلبي وهذا أغلب الحال والشكوى لله


جزاك الله خير

[السيف5]

شخصيا انا كرجل مستحيل اكلم بنت عن لبسها

لكن ممكن أنظر لها نظرة ازدراء من بعيد ..فقط

لكن عندي تساؤل اختي بصمة طبعا اللي كلمتيها اجنبية

لكن السؤال هل تكون عندك الجرأة لو كانت قطرية..طبعا لن تلبس الشورت ..أنما عباتها ضيقة اووفر

[العفراء]

يزاج الله خير عزيزتي بصمه

عن نفسي ',,,,, ع حسب الموقف يمكن لو اشوف مجموعة بنات و احن انكون بنات يمكن اتكلم اما لو شفت حد مع زوجها او صديقها فما بتجرأ اتكلم ،،، بس انا ملاحظه ان الفلبينيات اكثر الجنسيات اللي ما يتقيدن بالاحتشام و اكيد شافوا ان القانون فيه تساهل علشان جذا تمادن فيه

[حمد 2002]

الاجنبيات وانقول مايعرفون قوانين البلد ولا هاذي عاداتهم وتقاليدهم ..


لكن قطريات ولابسين عبايات لاتعليق والمكياج الحمد لله والشكر .. هاؤلاء الواحد ماذا يقول عنهن ؟! ..


انا أجوف الدوله فيها قوانين والمفروض هناك جهات أمنية اكلمهم وانا مب قانون وبصفتي ماذا علشان اكلمهم؟ !

[حسن]

بالنسبه لي مستحيل

مهب خوفا ولا عيبا ولا جراءه

لكن الوضع اصبح عادي وغير مستغرب نفسنا نفس دول خليجيه سبقونا في ذالك

[حمد 2002]

بالنسبه لي مستحيل

مهب خوفا ولا عيبا ولا جراءه

لكن الوضع اصبح عادي وغير مستغرب نفسنا نفس دول خليجيه سبقونا في ذالك

والقادم ادهى وامر

[حسن]

والقادم ادهى وامر

مايحتاج اتقولي الشواهد كثيره وذكرت منه دول خلجييه سبقتنا بذالك
يعني احنا بنكون غير عنهم
مااحنا جزء منهم ولا هل البينان اللي قاعد يتطاول حق منهو ياحبيني لنا
احنا مانسكن الشقق والاستديوهات هذه حق امم جايه بالملايين
من كل حدب وصوب مافي قطر ماقبل النفط هذا الزمن ولى
ومايسير نطالب برجوع الزمن القديم الجميع بيرفض وبقوه

[بومحمد المطاوعه]

بالنسبه لي مستحيل

مهب خوفا ولا عيبا ولا جراءه

لكن الوضع اصبح عادي وغير مستغرب نفسنا نفس دول خليجيه سبقونا في ذالك

يوم القيامه مافي هذي الكلام

واجب عليك كمسلم

تتكلم واذا ماتعرف انجليزي

تتصل على العضيد في كل الاحوال
حتى لو ماتقدر تتكلم


عيل وين راح الامر بالمعروف والنهي عن المنكر ؟؟؟

[بومحمد المطاوعه]

مايحتاج اتقولي الشواهد كثيره وذكرت منه دول خلجييه سبقتنا بذالك
يعني احنا بنكون غير عنهم
مااحنا جزء منهم ولا هل البينان اللي قاعد يتطاول حق منهو ياحبيني لنا
احنا مانسكن الشقق والاستديوهات هذه حق امم جايه بالملايين
من كل حدب وصوب مافي قطر ماقبل النفط هذا الزمن ولى
ومايسير نطالب برجوع الزمن القديم الجميع بيرفض وبقوه

الي مايحترم الاسلام ولا الحشمه


طزززززز فيييييهم

مب شرط نستقبلهم ونرحب فيهم

[بومحمد المطاوعه]

والقادم ادهى وامر

ادهى وادمر لأن
الي على ويها شنب ومايقدر يتكلم بالنصح او يتصرف

هذي مشكله
عادي مع السنين
يدشون بيتك ومب كفو حد يطردهم

[راعي ال VXR]

لاحول ولا قوة الا بالله اللهم سترك وعفوك ورضاك

[بومحمد المطاوعه]

الله يجزاكي خير يا بصمه
والمفروض وواجب على كل مسلم

ولكن للأسف
البعض
اسم رجل ولا يقدر يقوووول بررررم فالشارع للخطأ

وبعض النساء الله يهديهم
مسلمات وفاصخات الحيا والعياذ بالله ،،


الله يهديهم يهدينا ويستر علينا وعليهم يارب

[حسن]

يوم القيامه مافي هذي الكلام

واجب عليك كمسلم

تتكلم واذا ماتعرف انجليزي

تتصل على العضيد في كل الاحوال
حتى لو ماتقدر تتكلم


عيل وين راح الامر بالمعروف والنهي عن المنكر ؟؟؟

وين يابومحمد الحين الكل رايح في سبحانيته

تكلم من ولا من

ابتعد عن الشبهات احسن

[بومحمد المطاوعه]

وين يابومحمد الحين الكل رايح في سبحانيته

تكلم من ولا من

ابتعد عن الشبهات احسن

لا سلامتك ولا ابتعد ولا هم يحزنون

بتكلم بما يرضي الله تعالى ورسولنا الكريم صل الله عليه وسلم

مدام اتكلم فالحق مب خايف من اي شي
ومستعد اضحي بنفسي لجل الحق ولجل الدين والأسلام

ولاراح اتنازل واقول هالكلام

هالكلام حق الي مايعرف الأسلام ولا يعرف حقوق الاسلام ولا واجباته كمسلم

[بوخميس]

يا اخوان

بالنسبة للي يقول احنا دولة مسلمة وفيها قوانين ومن هالكلام؟

عطوني القوانين اللي تحميني اذا كلمت هالاشكال، ويمكن تتطور الأمور، أو يمكن يكون شخصية دبلوماسية وأروح ورا الشمس!!

الزبدة: ما في قانون، واذا في كلام ينكتب على باب بعض المجمعات، فكل واحد يقدر يفسره على كيفه. واحنا نشوف في أماكن عمل وفي مؤتمرات عامة أشكال وملابس تلوع الجبد، ويكون في مسؤولين موجودين في نفس المكان ولا حد يقدر يكلمهم.

عشان ما نكون مثاليين ورا الشاشات بس. أنا عن نفسي ما اطب مكان خلط، وحتى البيت ما اطلع منه وايد.

[حمد 2002]

لا سلامتك ولا ابتعد ولا هم يحزنون

بتكلم بما يرضي الله تعالى ورسولنا الكريم صل الله عليه وسلم

مدام اتكلم فالحق مب خايف من اي شي
ومستعد اضحي بنفسي لجل الحق ولجل الدين والأسلام

ولاراح اتنازل واقول هالكلام

هالكلام حق الي مايعرف الأسلام ولا يعرف حقوق الاسلام ولا واجباته كمسلم


بومحمد

لو جفت قطريات حاطين مكياج وايتضحكون بمول وفاصخين الحياء !!


هل تقدر اتروح تنصحهم وتكلمهم ؟

[الحياة الخالدة]

يوم القيامه مافي هذي الكلام

واجب عليك كمسلم

تتكلم واذا ماتعرف انجليزي

تتصل على العضيد في كل الاحوال
حتى لو ماتقدر تتكلم


عيل وين راح الامر بالمعروف والنهي عن المنكر ؟؟؟

للأسف أخوي .. صارت السالفة على المزاج
و الرأي على الكيف
لين بغينا استنكرنا و شفناه عيب و حرام
و لين بغيناه عادي صار عادي
يعني حسب الشخص اللي منزل الموضوع بكل اختصار

[راعي الكورفت]

قطريه غيوره حاولت تنصح وحده اجنبيه انها تلبس محتشم في سوق واقف !! وشوفي شنو ردت عليها الاجنبيه بكل وقاحه

www.youtube.com/watch?v=RvGzJjQgN5k


المقطع منتشر باليوتيوب في سوق واقف وهذا الرابط .

[الحياة الخالدة]

ادهى وادمر لأن
الي على ويها شنب ومايقدر يتكلم بالنصح او يتصرف

هذي مشكله
عادي مع السنين
يدشون بيتك ومب كفو حد يطردهم

لا
لين دشوا بيوتهم و وصلت السالفة عندهم بتحترق قلوبهم و بيتحولون دعاة يأمرون بالمعروف و ينهون عن المنكر
لا تحاتي يعني

[الحياة الخالدة]

لا سلامتك ولا ابتعد ولا هم يحزنون

بتكلم بما يرضي الله تعالى ورسولنا الكريم صل الله عليه وسلم

مدام اتكلم فالحق مب خايف من اي شي
ومستعد اضحي بنفسي لجل الحق ولجل الدين والأسلام

ولاراح اتنازل واقول هالكلام

هالكلام حق الي مايعرف الأسلام ولا يعرف حقوق الاسلام ولا واجباته كمسلم

كفو عليك و النعم فيك
بالأمر بالمعروف و النهي عن المنكر تميز المسلمون و صارت أمتهم خير أمة أخرجت للناس

[بومحمد المطاوعه]

بومحمد

لو جفت قطريات حاطين مكياج وايتضحكون بمول وفاصخين الحياء !!


هل تقدر اتروح تنصحهم وتكلمهم ؟

اي نعم بتكلم

بالنصح الطيب والكلام الي ماينقلب ضدي

واحط في بالي جميع الأحتمالات
يمكن احصل رد طيب
ويمكن احصل رد يزعل

ولكن اصبر واحتسب الأجر على الله تعالى

اذا تمتلك هذي الصفات
الصبر والشجاعه بما يرضي الله

توكل على الله وأبدأ بالنصح السليم ولاتخاف من شي

[بومحمد المطاوعه]

للأسف أخوي .. صارت السالفة على المزاج
و الرأي على الكيف
لين بغينا استنكرنا و شفناه عيب و حرام
و لين بغيناه عادي صار عادي
يعني حسب الشخص اللي منزل الموضوع بكل اختصار

هذي المشكله للأسف ,,

لو شي عجيب بتشوفين ردود مليون

في مواضيع مهمه نزلتها ماشفت مشاركات

بس البعض يدور لو في موضوع عن النساء
او الرجال

شارك وذم وذبح ذي وكفر ذي وذاك

انزين والمواضيع المهمه
عن الصلاة وعن الكثير في حياتنا وشوارعنا

وين التفاعل

يخق الموضوع ولا نشوف اقلام تغرد

[بومحمد المطاوعه]

لا
لين دشوا بيوتهم و وصلت السالفة عندهم بتحترق قلوبهم و بيتحولون دعاة يأمرون بالمعروف و ينهون عن المنكر
لا تحاتي يعني

الله المستعان

بعد لو كل واحد قال مالي خص ومب متكلم ومب ناصح ولا لنا شغل

ترى عادي بتشوفين يخيمون قدام البيوت ومحد يقدر يتكلم

حريه شخصيه وفي الشارع
ليش عقب الواحد يصيح ويتكلم

[بوخميس]

على الطاري

كاس العالم للسباحة بكرة في قطر

إذا حد وده يروح ينكر على السباحات! ولا تنسون إن كانت في (سباحة قطرية) في الأولمبياد

[بومحمد المطاوعه]

كفو عليك و النعم فيك
بالأمر بالمعروف و النهي عن المنكر تميز المسلمون و صارت أمتهم خير أمة أخرجت للناس

كفوج الطيب
الله ينعم بحالج


الحمدلله الي يخاف من الله بيخاف وبيغار على دينه وعلى اسلامه واي شي غلط قدامه
بيتكلم بشكل سليم علشان يوصل الفكره والنصح العدل

[بومحمد المطاوعه]

على الطاري

كاس العالم للسباحة بكرة في قطر

إذا حد وده يروح ينكر على السباحات! ولا تنسون إن كانت في (سباحة قطرية) في الأولمبياد

مب مجبور تقط نفسك في هذي الأماكن الكجره
علشان تنصح

شي طبيعي محد بيلتفت صوبك

ولكن في اماكن عامه وشفت
الواجب على اي مسلم يتكلم وينصح

اما بتدخل ديسكو وتبي تنصح
محد بيعطيك ويه ويمكن تطلع عليك عكسيه

اذا حاب تقدر تنصح الناس بعدم المشاركه والتشجيع ويكون المدرج فاضي

[Qtr37]

انا كنت طالعة بسيارتي ومريت احذا بيت من البيوت وشفت اسيوية بلبس غير محتشم خارج منزلها، وقفت وكلمتها وقلت لها لبسج عاري المفروض ما تلبسينه خارج المنزل وقدام الناس، ودخلت بيتها :)
صحيح ان الواحد لازم ينكر المنكر بالطريقة اللي يقدر عليها، لكن ما اعتقد اني بوقف في المجمع واشوف كل وحدة لبسها عاري وبكلمها، اصلا ما يكون عندي صبر متى اخلص شغلي من المجمع واطلع منه مب فاضية اشوف العالم واشوف لبسهم !!

[حمد 2002]

مب مجبور تقط نفسك في هذي الأماكن الكجره
علشان تنصح

شي طبيعي محد بيلتفت صوبك

ولكن في اماكن عامه وشفت
الواجب على اي مسلم يتكلم وينصح

اما بتدخل ديسكو وتبي تنصح
محد بيعطيك ويه ويمكن تطلع عليك عكسيه

اذا حاب تقدر تنصح الناس بعدم المشاركه والتشجيع ويكون المدرج فاضي


الرجال من الافضل انه ماينصح المرأه المتبرجه خوفا من الوقوع بالفتنه ، والافضل المرأه هي من تقوم بنصح المرأه المتبرجه ..

وخصوصا لو كنت معاها فيس تو فيس كوميونكيشن ، اي عن طريق الحديث معاها والنصح لها بطريقه مباشره ، بعكس ماكانت النصيحه عن طريق الكتابه او بالكلام بالتلفزيون والاذاعه وهذا ابعد من الوقوع بالفتنه ..


اخوي بومحمد ماهو رأي الشرع بنصيحه الرجل للمراه المتبرجه وخصوصا لو كان القاء معها بطريقه مباشره ؟

[النهار]

انا في رائي المتواضع
تكثيف الحملات من قبل وسائل الاعلام وارسائل رسائل نصيه لجميع الهواتف الخلويه من قبل الجهات الرسميه
توضح لهم ماهو ممنوع وماهو مسموح وماهي عادات وتقالد البلد
اكيد معظم الذين يعملون في قطر لهم اماكن عمل دور مقر عمله يكون لهم كالمرشد وتنويرهم وتوزيع مطويات تعرفهم بعادات اهل البلد
اللوحات الاعلانيه المنتشره لو مرتين في السنه يتم حجزهم لهذالغرض
بالاضافه الي المجمعات التجاريه يجيب وضع الارشادات الواجب اتباعها من قبل الجميع في اكثر من مكان في المجمعات وبشكل مستمر
مع تغيرها بين كل فتره

[ضوى]

اتجرأ ونص وسويتها اكثر من مرة والله الهادي ، طبعا بأدب ، بس مرة بالرونق واحدة فلبينية لابسة من غير هدوم كلمتها بهدوء انه مايجوز عيب ببلادنا طالعتنا باحتقار وقالت لي مالج خص البس بكيفي ناديت لها اللي يشتغلون في الرونق وقلت لهم اذا ماطلعت الحين بانادي الشرطة ، كلموها واختفت من الرونق

[بومحمد المطاوعه]

الرجال من الافضل انه ماينصح المرأه المتبرجه خوفا من الوقوع بالفتنه ، والافضل المرأه هي من تقوم بنصح المرأه المتبرجه ..

وخصوصا لو كنت معاها فيس تو فيس كوميونكيشن ، اي عن طريق الحديث معاها والنصح لها بطريقه مباشره ، بعكس ماكانت النصيحه عن طريق الكتابه او بالكلام بالتلفزيون والاذاعه وهذا ابعد من الوقوع بالفتنه ..


اخوي بومحمد ماهو رأي الشرع بنصيحه الرجل للمراه المتبرجه وخصوصا لو كان القاء معها بطريقه مباشره ؟

الي بيقعد يقز ومايقدر يصلب نفسه
لايروح وينصح ولا يروح ويتكلم وهمه القززز

اذا في امرأه تقدر تنصح خير وبركه


وبخصوص لو اللقاء وجه بوجهه

اصرف النظر عنها وتكلم
مب شرط تحط عينك ف عينها


قال الله سبحانه وتعالى: {وَمَنْ يَتَّقِ اللَّهَ يَجْعَلْ لَهُ مَخْرَجاً * وَيَرْزُقْهُ مِنْ حَيْثُ لا يَحْتَسِبُ} الآية،
وقال سبحانه وبحمده: {وَمَنْ يَتَّقِ اللَّهَ يَجْعَلْ لَهُ مِنْ أَمْرِهِ يُسْراً}.

[عثرة جواد]

السلام عليكم

انا نصحت وحده وحدة نديت لها العضيد

والله يستر علينا

عساج ع القوة

[العقل المدمر]

وطبعا في ناس عادي عندهم بنات بشورتات وبديهات كت
لانهم اجانب وشقر وحلال عليهم
حتى العرب امهات اللقنز والحجاب ماعلقوا عليهم
وجابوا حق بناتنا عشان عبيهم ضيقة .. ويقارنون بنت عبايتها ضيقة بوحدة مايبين الا لحمها !!
فاضيين يتطنزون ويعلقون ونسوا ان القطريات بناتهم وناتج تربيتهم
وعقب يقولون ليش المرا تستحي من القطري وما تستحي من الهندي يعني مو ريال ؟
لا والله هو اريل منك ياخوي مابيقعد يتكلم فيها وينشر قصصها فالمنتدى على اخطاء سخيفة
.
المهم ما علينا .. بالنسبة حق سؤالج .. لا ماعندي جرأة
لاني انفعالية وماعندي اسلوب فالنصيحة والاقناع
وانا اعتبر هالشي من اختصاص الدولة مايصير احنا نتدخل بالناس
ان كان في قانون فهالقانون ما يتطبق وان كان مو موجود المفروض الدولة تحطه
حتى بعض الاحيان مانعرف شنهي الحدود فاللبس .. لازم يكون واسع مثلا والا عادي ضيق ؟
لازم يكون شطول ؟ والكم شطول ؟ انزين والشفاف ؟ ووو...الخ
والعضيد نفس الشي ليش لازم نتصل لهم عشان يجيون انا رايحة اتسوق والا رايحة اتامل الناس واتصل عالعضيد كل شوي ؟
هم عارفين اماكن تواجد هالاجنبيات فالاسواق والاماكن العامة لو فعلا يهمهم ليش ما يكونون متواجدين باستمرار ؟

[عثرة جواد]

هههههههههههههه

[CH Engineer]

ترا حتى عندهم أماكن كثيره يمنع فيها اللبس القصير

عن نفسي ماراح أكلمها

[قطريه ماركه]

بالنسبة لي : ما احب اكلمهم
لكن المفروض انه البلاد تحذرهم و تحط لهم قوانين
نشوفهم في السعودية يعرفون يلبسون عباة !!!

[فريج النجادة]

ولا اتردد في الاتصال على العضيد

[حسن]

بل ردود وايد ماقدر اقراء ولا واحد مهب فاضي لاني في حاله
تفكير بعد السوفت وير الجديد
وش وصلتو له
تئبا ولا ماتئبا

:)

[دااانة قطر]

بالنسبه لي مستحيل

مهب خوفا ولا عيبا ولا جراءه

لكن الوضع اصبح عادي وغير مستغرب نفسنا نفس دول خليجيه سبقونا في ذالك

للأسف ..الله الهادي

[بصمة قطرية]

وعليكم السلام ورحمة الله وبركاته

بصراحه مو دايم يمكن مره بس لان اللبس كان جدا جدا جدا فاضح ومقزز شلون دخلت ما اعرف شلون العالم ساكته ما اعرف ؟! سلمت و كلمتها بهدؤ وكانت تسمع وقالت اوك وجاء صديقها عربي وقالت له قال أوك ولا يهمك أنا افهمها ولا تلبس كذا مره ثانيه


وموه بعد شفت وحده لبسها يلوع الكبد مقزز منظر جدا بشع
بس ما كلمتها أنكرته بقلبي وهذا أغلب الحال والشكوى لله


جزاك الله خير

وياج يارب ..
مرات أتصرف نفسج أنكره بقلبي
و مرات أحاول إني أتشجع و أكلمهم ..