هل علاقتنا بالمنتدى محدوده ؟

[العفراء]

صباح الخير باليميييع

اليوم حابه اتكلم عن موضوع التواصل بالمنتدى

اعتقد ان كل واحد منا عنده ناس معينيين يحب يتواصل وياهم بالمنتدى

و يتعود عليهم و يحس انهم صاروا جزء من يومياته و ياخذون حيز كبير من تفكيره


لكن مرات تصير حالات اتخلي الواحد منا يحزن و يتألم على بعض الاعضاء

اقصد مثلا لو اي عضو فيكم متواصل مع عضو بالمنتدى و بالخاص و فجأة

اختفى هالعضو من دون سابق انذار و من دون ما تعرفون اسباب قطيعته

بهالحاله يمكن الواحد فينا مليون فكره و فكره اتشرق و اتغرب براسه

بس بصراحه افظع شعور ان توصل مع الواحد انه يحس ان فلان غاب فجاة يمكن صار له حادث و توفى

يرسل له ع الخاص او ع الايميل و ما يلقى منه رد او جواب و يتم هالشعور الغامض فقلبه ان فلان غايب يمكن صار له شي و توصل معاه لدرجة انه بس يبا يطمن عليه و يعرف انه ابخييير و بس رغم ان العلاقه جدا بسيطة و هي التواصل بالمنتدى ،،،،

فهل احن نبالغ لو تعلقنا بحد بالعالم الافتراضي ام لازم من البدايه انحط حدود وضوابط وما نسمح لاعمارنا ان انتعود على التواصل مع الاعضاء


طبعا كلامي بنيته لقصه حقيقيه صارت في منتدى من المنتديات غاب فلان و قام فلان يدوره و يدوره لين اليوم يحاول بس يطمن عليه و مب عارف كيف يوصل له و خااايف انه يكون متوفي و هالشعور محطمنه داخليا :(

[عابر سبيل]

تصير...
بس الأيام تعلم انه لابد من ضبط الأمور و تحديد الحدود..

عموما،
التعلق بشخص مجهول امر فيه اكبر المغامرات

[بومحمد المطاوعه]

موضوع طيب

انا الصراحه عندي ناس اعزهم واتواصل معاهم

ولله الحمد تعرفت على شباب من المنتدى ونعم فيهم ،،

انشهد ان تواصلهم ذهب على قلبي
والحمدلله كل يوم اراسلهم على الواتساب والسناب وهزات نتلاقه مع بعض

الله يحفظهم ويحفظ الجميع يارب ،،

[العفراء]

تصير...
بس الأيام تعلم انه لابد من ضبط الأمور و تحديد الحدود..

عموما،
التعلق بشخص مجهول امر فيه اكبر المغامرات


صح كلامك و اتفق معاك اخويه عابر

لكن في شخصيات ما اعتبرها مجهوله يعني المنتدى و الردود تعطيني انطباع حول كل شخص احاوره

اعتقد شي صعب لو اي شخص يختفي فجأه و تنقطع اخباره ما يندرا هو حي و الا ميت يعني التفكير يجبر الانسان انه يوصل للخوف عليه بسبة العشرة الطيبه و المنتديات عودتنا على ناس تعرفنا عليهم و تواصلنا معاهم من خلال المواضيع و الردود و الرسايل و يمكن النيات الطيبه ما تخلي الشخص يشوف ان التعلق بهالطريقه مغامره كبيره لكن بنفس الوقت صدق ان العشره الطيبه ما تهون ع الانسان حتى لو كانت بالمنتديات و الشبكات الاجتماعيه ،،، اظنك اخويه عابر عشت مثل هالمواقف يعني اكيد مروا عليك ناس بالانترنت و اختفوا فجأه و انقطعت اخبارهم وما اظن انك ما حاولت تنشد عنهم و تطمن عليهم

[ya3coub]

أكبر مثال لما اخر شي اعترفتي فيه اختي العفرا بأنج مريضه و موضوع يوميا تتابعينه للحكم و اختفيتي معنه ما صار لوجودج بالمنتدى بينا إلا شهر تقريبا واحد و انتي مشاركة و داخله بقوة بكل المواضيع

فقدناج الأسبوع الي فات و سئلنا عنج و الي يقول مريضه و الخ...



مثل ما ذكر أخوي بو محمد المنتدى عرف ناس كثير على بعض من ضمنهم المرة الوحيدة الي شفت فيها ابو محمد كانت عن طريق ناس من المنتدى و الدوحة صغيره.
كنت اشوف نكه بعدة منتيات سنين عده و اعرف انه نفس الشحص بحكم تقارب الإعترافات و المواضيع و النك ايضا.


فالمنتدى شي طيب بس التعلق اكثر من اللازم قد يؤدي إلى نهاية غير طيبه طالما الواحد بحدود مافيها اي شي و الشخص الغايب عذره معاه إلين ما يرجع و يقول اسباب غيابه اذا حب
و في من الشباب و بين الأخوات ايضا الي تعرفو على بعض و تواصلهم صار على واتس اب و تلفونات و لقى و صحبه طيبه بسبب المنتدى غير تبادل الخبرات.


بس التعلق بشخصية افتراضية بالعالم الإفتراضي انا اقول بحدود العامة فقط

[مختلف جداََ]

يعقوب ما سمعت
ممكن تعيد
من له شهر بالمنتدى؟؟؟!

[العقل المدمر]

بالنسبة للمنتديات قبل صار وتعرفت على بنات والتقيت فيهم وفرقتنا الايام والحين بعد سنين اتابع اخبارهم بصمت
اما بالنسبة لهالمنتدى صادني زهايمر ماعدت احفظ الاسماء وردودهم .. اوقات حتى اقرا المواضيع والردود بدون ماطل عالاسم
فالاكيد اني مراح افقد شخص الا يمكن بعد شهوووور ابدا استوعب .. هاي اذا استوعبت
بالنسبة للموضوع اكيد لازم يكون في حدود بين الاعضاء .. واللي فعلا يحس عضو قريب من قلبه المفروض تواصله معاه يكون اكبر واكثر واقرب من المنتديات اللي اساسها حوارات فمواضيع مختلفة مب تواصل شخصي

[الجـــوديّ]

"و يعرف انه ابخييير و بس " ..... هذا الهدف الانساني اللي غاب عن الكثيرين !

مادري هل يجوز أن نتطمن على اخوان افاضل بدون لا يلعب الشيطان بتفكيرهم يمين ويسار ؟؟



اتفق معاج فيه ناس .. نفتقدهم حتى لو اختلفنا معاهم .. ونتمنى لو نعرف عنهم انهم بخير بس .. مش مهم أي تفاصيل ثانية...

لكن في المقابل .. وهذا الطرف تحديداً مش مهتم للطرف الاول ..

ومايبي يدخل معاه في علاقة حتى شلونك .. هل انت بخير وطيب .. ممكن توصل الرسالة لكنه ما يرد .. مانعرف وشي أسبابه :(

مالنا الا ندعي له في ظهر الغيب اذا كان وايد عزيز وغالي .. وهذا أفضل عزاء أشوفه.




من فترة قصيرة قريت تعليق لأحد الأعضاء ..

يقول انه يعرف عضو وايانا هنيه في المنتدى .. ماله نشاط كثير ... توفي .. الله يرحمه ويغفر

وهو حط اسبابه ليش ماصرح باسمه

وتمنيت ان فعلا اعلنوا وفاته لانه اقل حق بين الأعضاء هو الذكر بالخير والترحم على من يرحل عنا...

ولعلنا اجتمعنا له في صدقة جارية .. التآخي بيننا رحمة لنا وله


حزنت على رحيله بصمت .. مع اني ما اعرفه

الله يرحمه ويغفر له ويوسع منازله




صار الحين ممكن نلقى بعض الأشخاص في السوشيال ميديا خاصة اذا كانوا بنفس الاسم والصور الرمزية.

[aloosh]

علاقات اعضاء المنتدى تبقى في المنتدى فقط لا احب اتعرف على شخص من خلف كي بورد
او يكون فيه شغل بينا فقط اما اتعرف عليه لا أويد ها الشي

[حمد 2002]

امتنع عن التعليق ..


شكرا ياراعي الموضوع ..

[السمسمه]

صراحه بما اني جديد في المنتدى انا شفت اعضاء تعاملت معاهم في عمل صراحه في قمت الذوق والاحترام ولا منكم قصور من الباقي وتعاملت مع احدى الفتيات التي كانت محترمه جدا خلصت معاه في عمل وانتهت علاقه بعد ذلك ،،،ولي شدني في التسجيل في المنتدى على المواضيع التي تطرح والردود عليها من جميع الاعضاء بدون تحديد عضو صراحه انا اقول للحين الدنيا بخير من حيث النصائح والارشاد على الخير الله يوفق الجميع ،،وتحياتي لجميع الاعضاء والله يوفقكم على الخير ،،يارب،،

[العفراء]

موضوع طيب

انا الصراحه عندي ناس اعزهم واتواصل معاهم

ولله الحمد تعرفت على شباب من المنتدى ونعم فيهم ،،

انشهد ان تواصلهم ذهب على قلبي
والحمدلله كل يوم اراسلهم على الواتساب والسناب وهزات نتلاقه مع بعض

الله يحفظهم ويحفظ الجميع يارب ،،


صبااح الخير شيخي بو محمد

اول شي بقولك اني محظوظه اشوفك اترد على مواضيعي لاني احترمك وايد عندك اسلوب طيييب بالنصيحه و بالاخذ و العطا و لاحظت انك ما تجرح اي حد حتى لو اختلف معاك انا اقول هالكلام مب علشان امدحك لا والله بس ابي نكون كلنا شراتك بالتعامل حتى مع اللي يختلفون معانا بدال ما نيلس نجرح بعض شو بنستفيد من هالشي غير عوار القلب و اسمح لي بديت الرد بهالكلام لانها رساله ابي احطها لاي شخص انه يحسب حساب لكلامه قبل ما يرد على اي عضو نبي انتم اخوااان و نبي هالمنتدى يجمعنا على الخير ترى اشوف فيكم الخير و احس انه صج كسبت لي اخوان و خوااات و الحمدلله ,,,,,,,


و مثل ما قلت شيخي بو محمد المنتدى بيعرفك على ناس بتحس انهم مكسب بحياتك عاد تخيل لو انك تميت متواصل مع شخص بس بالمنتدى وما عندك وياه اي وسيلة تواصل ثانيه و غاب فجاة و طول غيابه اكيد قلبك بيعورك عليه و بتحاول تطمن عليه لكن كيف اذا ما تعرف عنه شي بهالحاله الدعوات لرب العالمين هي بس اتخفف عوار القلب و ارد و اقول تراها العشرة الطيبه ما تهون

[bo matar]

ماشاء الله واضحه الروابط الاخويه بين الجميع

الله لا يغير عليكم

[naklan]

يا هلا يا عفراء صحيح كلا مج ان الي يغيب يوحشنا وودنا نطمن عليه لذالك خاصية الرسائل موجودة
الخير والبركة في الموجودين والمنتدى عامر بالنشاما والنشميات والبقاء لمن بقا انا شخصيا اقدر الجميع
لكن رسمت حدود وما اتعداها ورفيجي الي انا اتخاطب معاه الان والغايب الله يحفضه التمس
له العذر وكل واحد وضروفه البعض يغيب سنه ويرجع والبعض اكثر من ذالك
والبعض ودر المشاركة ويكتفي بالقرائة كلما سنحت له الضروف

تحياتي يا عفراء وما اقول الا كما قال الشاعر

الا يا وجودي موتري خارب الجامات & ولا له على التسراة ليت يشبونه
ولا يفتهم راعيه نمره وتبديلات & بريكه خراب ولا يجيبه دركسونه

[العفراء]

مراااحب اخويه الباشمهندس يعقووب

بص حضرتك ،،، انا تراني يوم اني مرضت بعيد الشر عنكم روحي حسيت ان شي كبير ناقصني لاني صدق اتعودت ع جو المنتدى و الاعضا و الحمدلله احس ان ربي رزقني بناس طيبييين شراتكم تتحملوني و تصبرون علي و ما تزعلون مني :weeping: وهذي نعمه من الله علينا ان تيمعنا بهالمكان الطيب ،،،،

و مثل ما تفضلت اخويه ان التعلق بالاعضاء شي غير محمووود لكن لو الاعضاء يعرفون قدرهم فقلوب غيرهم و يعرفون انهم لو عودوا الناس ع طلتهم و شوفتهم يوميا و عقب يغيبون و لا يشرحون سبب غيابهم هنا صج اللي يتعود عليهم بينشغل باله و تفكيره و بيتم يوسوس و يدعي الله انهم بس يكونون بخير ،،،،، و صدق يمكن احن نعطي الامور اكبر من حجمها لكن شو بنسوي لو صدق حبينا الاعضااا و ارتحنا لهم و لسوالفهم و طيبتهم اكيد بنتمنى انهم يتواصلون ويانا لو بالمنتدى او بالرسايل ع الاقل نسال و نطمن عليهم و القصد والله طيب لان المنتدى الحمدلله يامعنا ع الخير و صدق صدق لكم قدر فقلبي و عيني و ما تهونون علي و ادري ان وايد منكم عنده نفس الشعور

[غير البشر]

مرحبا اختي العفراء
شعور جميل جدا منج
وهذا يدل على معدنج الطيب

الله يذكرج بالخير يا العفراء
كثيرين الي اختفو فجأه من بعد سنين طويله كانو معانا
مالنا الا ندعو بالهم بالخير ان شاء الله بالدنيا والاخره

قلبتي المواجع :(

شكرا يا العفراء

[حسن]

موضوع جميل يالعفراء

المشكله انا انسان انطوائي ولا لي ربع
وماعرف حد في المنتدي

:(

وهذه الابيات حق نرد على العضو نيكلن

يقـول الـذي بيـح بـالاسـرار عـقـب سـكـات ==جـــواب لــكــم يــاهــل الــمــوده تـجـرونــه
اكـوسـر غـوانـات وافــرج بـهـا الضيـقـات ==والاحـــي حـمــام الـــدوح لاجـــر بلـحـونـه
وابــرد عـلـى كـبـد عـلــى طـيـرهـا كـيــات == واذكــر هــل العـنـوان بــة خــاف ينسـونـه
واجري علـى مجـرى دليـل علـى السيـدات==لـــة الـسـيــد الاول والـسـواويــق يـتـلـونـه
كمـا نوخـذا شـطـن عـلـى قـوعـة التـبـرات==طــرح فــوق هـيــر غـاصـتـي مايصـكـونـه


تحياتي

شكرا لك

:)

[R 7 A L]

كثير من الاعضاء اعرفهم وتربطني بهم كل موده واحترام والعديد منهم متواصل معه


وهذي بيتن رد للاخوة نكلان وحسن


سلامي على اللي مايدور على المنقود
ولا شل في قلبه على ربعه احقادي

صديق المراجل فالشدايد خوي الجود
تشوفه على يمناك لا حدك الحادي

[مختلف جداََ]

رحال بريدك فلل

ما تبي تفتح المجلس ولا شنو :anger1:

[R 7 A L]

رحال بريدك فلل

ما تبي تفتح المجلس ولا شنو :anger1:

شسالفه يالله بفضي البريد*

[naklan]

موضوع جميل يالعفراء

المشكله انا انسان انطوائي ولا لي ربع
وماعرف حد في المنتدي

:(

وهذه الابيات حق نرد على العضو نيكلن

يقـول الـذي بيـح بـالاسـرار عـقـب سـكـات ==جـــواب لــكــم يــاهــل الــمــوده تـجـرونــه
اكـوسـر غـوانـات وافــرج بـهـا الضيـقـات ==والاحـــي حـمــام الـــدوح لاجـــر بلـحـونـه
وابــرد عـلـى كـبـد عـلــى طـيـرهـا كـيــات == واذكــر هــل العـنـوان بــة خــاف ينسـونـه
واجري علـى مجـرى دليـل علـى السيـدات==لـــة الـسـيــد الاول والـسـواويــق يـتـلـونـه
كمـا نوخـذا شـطـن عـلـى قـوعـة التـبـرات==طــرح فــوق هـيــر غـاصـتـي مايصـكـونـه


تحياتي

شكرا لك

:)

الله يرحم راعي الرفيغ ويسكنه الجنة
تحياتي ياراعي بروق وشخبار الحجرة الي فوق مكانها ولا شالوها
تحياتي اخوي حسن وسلامي لخوي رحال

[العفراء]

اسمحوا لي بس اتجاوز الردود علشان اشارك اخواني نكلان و حسن و رحال بهالابيات اللي هاضت بها القريحه :


بالمنتدى احنا عضايد أو أصحاب
تجمعنا عشره طيّبه و الأخوّه

من غيثكم و البرد تنبت بنا اعشاب
و لولاكم ،،، الحر ما برح عنّا جوّه

و سوالم :shy:

[حسن]

الله يرحم راعي الرفيغ ويسكنه الجنة
تحياتي ياراعي بروق وشخبار الحجرة الي فوق مكانها ولا شالوها
تحياتي اخوي حسن وسلامي لخوي رحال

امين

هلا هلا بنكلين وين هل الغيبه
اما الحجره انشد بوطالب عنها
يمكن دخلها استملاك الدوله يدعي انها حق جده التاسع عشر والشاهد حسن العيادي
وذيب بن عبدالله

:(

من زمان ه
هدوها

زورنا شرفنا ياخوك

وشكرا يارحال على هل الابيات حيالله الجار ولو جار
:(

شكلي حركت المياه الراكده في الموضوع

:)

[العفراء]

حسن اشفيك بس تشكر رحال جاملنا يا ولد الحلال:(

[العفراء]

يعقوب ما سمعت
ممكن تعيد
من له شهر بالمنتدى؟؟؟!

مختلف اخويه يعقوب يقصد اني مشهوره انت الشو بلاك تبا تحسد الفقير ع موتة اليمعه :weeping:

[بانغ بانغ]

انتي انسانة نبيلة لشعورك هذا

اما المنتديات فهي خدعة ... يتواصل الناس فيها بصفات خفية للفضفضة وغالبا ما تعكس شخصياتها اي شخصيات المنتدى واقع الحال ...

وفي اعضاء فيهم الخير والبركة ويكشفون عن هوياتهم وانا ايضا منهم ما عندي مشكلة اكشف عن هويتي للتواصل مع الاعضاء وسبق وفعلت .

اما اللي يختفون فجأة . نسأل الله ان يكونوا بخير فلربما مشاغل الحياة وامواجها جرفتهم لشاطئ الانشغال

[حسن]

حسن اشفيك بس تشكر رحال جاملنا يا ولد الحلال:(

شكرا

لك يالعفراء

:)

[ام امااني]

هو عالم افتراضي
لكنه في بعض الاحيان يفرض على العلاقات انها تبرز للواقع
هذا بيكون سهل لللشباب اكثر من البنات
لكن داءما هالعلاقات بتخلي اثر بحياتنا

[مختلف جداََ]

مختلف اخويه يعقوب يقصد اني مشهوره انت الشو بلاك تبا تحسد الفقير ع موتة اليمعه :weeping:


هههههههه طيب

[العفراء]

بالنسبة للمنتديات قبل صار وتعرفت على بنات والتقيت فيهم وفرقتنا الايام والحين بعد سنين اتابع اخبارهم بصمت
اما بالنسبة لهالمنتدى صادني زهايمر ماعدت احفظ الاسماء وردودهم .. اوقات حتى اقرا المواضيع والردود بدون ماطل عالاسم
فالاكيد اني مراح افقد شخص الا يمكن بعد شهوووور ابدا استوعب .. هاي اذا استوعبت
بالنسبة للموضوع اكيد لازم يكون في حدود بين الاعضاء .. واللي فعلا يحس عضو قريب من قلبه المفروض تواصله معاه يكون اكبر واكثر واقرب من المنتديات اللي اساسها حوارات فمواضيع مختلفة مب تواصل شخصي


مرااحب بالعقل المدمر

اسمج غريب بس حلو ههه

احس انه شعور مؤلم لو اتابعين اخبار ناس كنتي تعرفينهم والحين اتابعينهم بصمت

شو اللي يخلي العلاقات سواء صداقه او زمالة عمل او الخ توصل لهالمرحله من الجمود يمكن كثرة الانشغالات و الالتزامات اليوميه تجبر الانسان انه يحد من علاقاته لكن اهم شي تبقى الذكرى الطيبه واللي اهم من كل هذا انه لو خطر على بالج اي شخص تقدرين ع الاقل تطمنين عليه حتى لو بطريقه غير مباشره لكن بعالم المنتديات و مواقع التواصل تكون علاقاتنا مبنيه على التواصل من خلال المواقع بس لما نتعود على بعض ويغيب فلان ماشي وسيله ثانيه توصلنا للغايب حتى لو بغينا بس نطمن عليه و هاللي يخلي العلاقات بالمنتديات تكون لها افضليه اذا ما كانت محدوده بس بعد من هالموضوع نقول للكل لا تغيبون واستمروا لانكم سبب لوجود غيركم معاكم بالمنتدى و الكل هنا بيتعود على الثاني اهم شي الكلمه الطيبه والنيه الصافيه والحمدلله اتابع وايد مواضيع واشوف كيف الاعضاء قاعدين ينفعون بعضهم ويتبادلون الخبرات و النصايح و افعال الخير يعني والله صدق وايد امور اتخلي هالمنتدى عامر بطيبتكم وانا مع اني كتبت بوايد منتديات بس خذت عليكم بسرعه وصح اني نزلت الموضوع وضربت فيه مثل لقصة صارت لناس اعرفهم لكن بعد اكيد بالمنتدى ناس مفقودين واكيد شي من الاعضاء اللي ودهم بس يطمنون على كل غااايب اختفى فجاة ولا يندرا هو بخير و بنعمه ولا صار له شي ,,,,,, ربي ايحفظكم من كل شر

[العفراء]

"و يعرف انه ابخييير و بس " ..... هذا الهدف الانساني اللي غاب عن الكثيرين !

مادري هل يجوز أن نتطمن على اخوان افاضل بدون لا يلعب الشيطان بتفكيرهم يمين ويسار ؟؟


اتفق معاج فيه ناس .. نفتقدهم حتى لو اختلفنا معاهم .. ونتمنى لو نعرف عنهم انهم بخير بس .. مش مهم أي تفاصيل ثانية...

لكن في المقابل .. وهذا الطرف تحديداً مش مهتم للطرف الاول ..

ومايبي يدخل معاه في علاقة حتى شلونك .. هل انت بخير وطيب .. ممكن توصل الرسالة لكنه ما يرد .. مانعرف وشي أسبابه :(

مالنا الا ندعي له في ظهر الغيب اذا كان وايد عزيز وغالي .. وهذا أفضل عزاء أشوفه.




من فترة قصيرة قريت تعليق لأحد الأعضاء ..

يقول انه يعرف عضو وايانا هنيه في المنتدى .. ماله نشاط كثير ... توفي .. الله يرحمه ويغفر

وهو حط اسبابه ليش ماصرح باسمه

وتمنيت ان فعلا اعلنوا وفاته لانه اقل حق بين الأعضاء هو الذكر بالخير والترحم على من يرحل عنا...

ولعلنا اجتمعنا له في صدقة جارية .. التآخي بيننا رحمة لنا وله


حزنت على رحيله بصمت .. مع اني ما اعرفه

الله يرحمه ويغفر له ويوسع منازله




صار الحين ممكن نلقى بعض الأشخاص في السوشيال ميديا خاصة اذا كانوا بنفس الاسم والصور الرمزية.


مرااحب بالغاليه الجودي

والله يا اختيه ماشالله عليج عرفتي تلقطين زبدة الموضوع لما ركزتي على جملة "و يعرف انه ابخييير و بس " و اكيد ان الانسان فيه نوايا للخير و للشر بس احن لمنو بنرتاح او بناخذ وبنعطي الا للي تعلمنا الايام عنه وعن طيب معدنه سواء كان عضو او عضوه وما بننشد الا عن اللي نحس انه فيه الخير و بعيد عن لعب الشيطان والتفكير العوي : ) لكن بعد ارجع واقول كلامج صح ولازم ما تستميلنا العاطفه الا و نحسب حساب لهالنقاط اللي ذكرتيها لان فعلا مب اي حد يمكن يفهم سؤالنا عن طيب نيه بس الحمدلله انه نلامس الخير والبركه بالموجودين وانتي اولهم ربي يحفظكم ,,,,,,

و منو هالعضو اللي توفى الله يرحمه؟! ياليت لو تقولين اسمه ع الاقل ندعي له بالرحمة والمغفره وعلشان اللي ما يعرف ينتبه لو رد ع مواضيعه مثلا وانا عندي اقتراح للادارة ان اي عضو او عضوه يتوفون انهم يكتبون تحت اسمهم ( انتقل الى رحمة الله ) او اي عباره تدل على انه هالعضو توفى مع انه الموت حق بس والله بعد شي ايحزن ويمكن هالحركة تخلينا ننتبه لكلامنا وتصرفاتنا بالمنتدى و نحسب حساب لكل كلمه انقولها علشان باجر يذكرونا بالخير و يدعون لنا بالرحمة والمغفره

ربي ييزاج الخير اختيه الجودي

[غير البشر]

الله يرحمهم جميع

انا اعرف 4 اسماء توفو بالمنتدى من الاعضاء القدامى :(
بس ماعرفهم معرفه شخصيه فقط نكات

[مختلف جداََ]

عندي شعور اني اعرفك ^^^

مممممم
و شكلك من شياب المنتدى

دز لي اسمك على الخاص :)

[غير البشر]

^

لي الشرف يا الغالي

ههه لا مب شيبه شيبه يعني بلغت اشدي :tease: هههههه

[الحياة الخالدة]

أختي عفاري
سبق و شفت مكتوب تحت اسم أحد الأعضاء أنه انتقل إلى رحمة الله
يعني أعتقد الإدارة لما يصير عندها علم و محد يكون عنده مانع من ذوي المتوفي أو معارفه .. تحط مثل هالإشارة تحت المعرف ماله

الله يرحمهم و يغفر لهم
و يغفر لنا و يرحمنا إذا صرنا إلى ما صاروا إليه

[مختلف جداََ]

^

لي الشرف يا الغالي

ههه لا مب شيبه شيبه يعني بلغت اشدي :tease: هههههه

الشرف لنا طال عمرك

ههههه

طولة العمر بالخير يا رب

[العفراء]

علاقات اعضاء المنتدى تبقى في المنتدى فقط لا احب اتعرف على شخص من خلف كي بورد
او يكون فيه شغل بينا فقط اما اتعرف عليه لا أويد ها الشي


مساك الله بالخير ابووويه علوش ان شاء الله انك بخير و نعمه

اكيد العلاقات بتكون افضل بالمنتدى بس لو حد قطع فجأه القصد كيف نتطمن عليه
علشان جذا انفضل لو التواصل بالمنتدى يستمر بين الجميع علشان ادوووم المودة و الرحمه من بينا

الله يحفظك يالشييييخ

[حرف]

حاولت افهم الموضوع بس للاسف ماقدرت يعني نحط بياناتنا عند الادارة تلفوناتنا وارقامنا ولا كل عضو يتعرف عن عدد من الاعضاء على شان اذا اختفى ندري وينه مافهمت

[العفراء]

امتنع عن التعليق ..


شكرا ياراعي الموضوع ..

استاذ حمد ليش تمتنع عن التعليق لا يكون زعلان مني انت و الا ليش ما تبا اتعلق

تقدر تشارك و تبدي رايك و بيكون رايك ع العين و الراس و محل تقدير حتى لو نختلف بالاراء

و تشرفنا باي وقت طويييل العمر

[جبر ال جبر]

نعم محدوده ويجب ان يظل هناك حدود خصوصا في العالم الافتراضي

[العفراء]

تحياتي يا عفراء وما اقول الا كما قال الشاعر

الا يا وجودي موتري خارب الجامات
ولا له على التسراة ليت يشبونه

ولا يفتهم راعيه نمره وتبديلات
بريكه خراب ولا يجيبه دركسونه



نصيحه اذا الموتر خِرَبْ بدّل السيتات
و رد اصبغه احمر شرا الدم في لونه

و ركب مكينه لك ،،، تضبّطك ف الصعدات
وْ تحمّل على الموتر من اللي يِدِعْمونه:weeping:

[العفراء]

صراحه بما اني جديد في المنتدى انا شفت اعضاء تعاملت معاهم في عمل صراحه في قمت الذوق والاحترام ولا منكم قصور من الباقي وتعاملت مع احدى الفتيات التي كانت محترمه جدا خلصت معاه في عمل وانتهت علاقه بعد ذلك ،،،ولي شدني في التسجيل في المنتدى على المواضيع التي تطرح والردود عليها من جميع الاعضاء بدون تحديد عضو صراحه انا اقول للحين الدنيا بخير من حيث النصائح والارشاد على الخير الله يوفق الجميع ،،وتحياتي لجميع الاعضاء والله يوفقكم على الخير ،،يارب،،

و هذي من الامور اللي اتخلينا كاعضاء انحس بارتباط فكري و نفسي طيب
التعامل الراقي و النصح و المشورة و الاحترام و الذوق يعني وايد امور ما ابالغ لو قلت
ان اللي يمكن نشوفه بالمنتدى و بالعالم الافتراضي يمكن من الصعب انشوفه على ارض الواقع

لك يالسمسمه و للجميع كل الاحترام و التقدير

[العفراء]

الله لا يغير ع اليمييع و الله يديم الاخوة و المحبه و الطيبه بيناتنا و صباحك خير اخويه بو مطر

[شبح الصمت]

في ناس تتحفظ وذلك لانها تبي اتم غامضه وتكتب على راحتها والا تبي احد يعرفها ومن حقهم صراحة
لانه يمكن يتغير وضع ونظرة الشخص له يوم يعرفه ويعرف حياته اليومية اشلون وواقعه وكتاباته في المنتدى

فمن حقهم التحفظ على انفسهم وعدم ربط علاقات مع اعضاء فالمنتدى ..

وفي ناس عادي عندهم بحدود معينه يمكن
تواصل من بعيد وتسال عنهم وتعرف اخبارهم وتصلهم وقت الافراح والاحزان ..

وفي ناس معرفتها لك بتكون لعبور شيء معين
ومنهم
اهل المصالح
معرفة مؤقته
غرض معين ..

اشياء كثيرة ..

فالاحسن كلن يثبت على رايه واذا على الموت والحياء ترى الانسان ينذكر بخيره عند هل الطيب وغيرهم ..

وشكراً العفراء ..

الله يرحمنا ويغفر لنا

[العفراء]

مرحبا اختي العفراء
شعور جميل جدا منج
وهذا يدل على معدنج الطيب

الله يذكرج بالخير يا العفراء
كثيرين الي اختفو فجأه من بعد سنين طويله كانو معانا
مالنا الا ندعو بالهم بالخير ان شاء الله بالدنيا والاخره

قلبتي المواجع :(

شكرا يا العفراء

مرااحب اخويه غير البشر شحالك ؟

والله واضح من ردك اني قلبت المواجع اااااسفه

و صج مالنا الا ندعي لكل من يغيب بالخير و بيبقى ذكرهم فالقلب دام انهم كانوا معانا طيبييين و اصيلييين

ربي يحفظك الشيخ

[العفراء]

موضوع جميل يالعفراء

المشكله انا انسان انطوائي ولا لي ربع
وماعرف حد في المنتدي

:(

وهذه الابيات حق نرد على العضو نيكلن

يقـول الـذي بيـح بـالاسـرار عـقـب سـكـات ==جـــواب لــكــم يــاهــل الــمــوده تـجـرونــه
اكـوسـر غـوانـات وافــرج بـهـا الضيـقـات ==والاحـــي حـمــام الـــدوح لاجـــر بلـحـونـه
وابــرد عـلـى كـبـد عـلــى طـيـرهـا كـيــات == واذكــر هــل العـنـوان بــة خــاف ينسـونـه
واجري علـى مجـرى دليـل علـى السيـدات==لـــة الـسـيــد الاول والـسـواويــق يـتـلـونـه
كمـا نوخـذا شـطـن عـلـى قـوعـة التـبـرات==طــرح فــوق هـيــر غـاصـتـي مايصـكـونـه


تحياتي

شكرا لك

:)

حسن انت اشقا انطوائي و نص اللي بالمنتدى اقرا بردودهم انهم مشتاقين لليلسه وياك فبروق

ياخي عرف الانطوائيه شكلك فاهم الانطوائيه غلط ههههه

و صح لسانك هذي ابياتك ام ابيات مختاره ع ذووقك لاني ما اتوقعك شاعر انت راعي بحر و صياد و مغامر لكن ما اظني انك شاعر

[عثرة جواد]

انا اعرف كل الي ف المنتدى

وعلاقتي معاهم جدا رااائعة

اعلق ع كتاباتهم ويعلقون عي وهاااي افضل صداقة تجمعني فيهم


احب افكارهم المختلفة ومواضيعهم المتنوعة وردودهم الي تسعدني

وانت وحده منهم ...

عساج ع القوة

[راعي ال VXR]

امتنع عن التعليق ..


شكرا ياراعي الموضوع ..

اخوي حمد انت خلاص علقت وخلصت

ذكرتني بسالفة الشايب يقول اربعه يصلون خلف الامام
اثنين كانو يتكلمون اثناءالصلاه الثالث قالهم لاتتكلمون بتبطل صلاتكم
الرابع قالهم الحمدلله اني انا ما تكلمت ...

[العفراء]

كثير من الاعضاء اعرفهم وتربطني بهم كل موده واحترام والعديد منهم متواصل معه


وهذي بيتن رد للاخوة نكلان وحسن


سلامي على اللي مايدور على المنقود
ولا شل في قلبه على ربعه احقادي

صديق المراجل فالشدايد خوي الجود
تشوفه على يمناك لا حدك الحادي

صح لسانك اخويه رحال و لا هنت على الابيات الطيبه شاعرنا

[بشائر]

بعض الأعضاء تحسين إنج تعرفينهم من زمان .. وأكيد تحزنين لو غابوا أو تأخروا عن دخول المنتدى فترة طويلة ..
لكن بعد لازم تكون هناك حدود في العلاقة خاصة بين الجنسين ..
وعني شخصيا لاحظت من خلال المشاركات أن هناك شخصيات معينة راقية جدا ومثقفة أتشرف إني أتعرف عليهم ..
اللي ماشي صح مايخاف من شي .. بالعكس حلو نكتسب صداقات جديدة رغم إني كنت ضد صداقات النت .. لكن النماذج الراقية اللي لفتت
انتباهي هنا مشجعة ومشرفة..
وانتي وحدة منهم :)

[العفراء]

انتي انسانة نبيلة لشعورك هذا

اما المنتديات فهي خدعة ... يتواصل الناس فيها بصفات خفية للفضفضة وغالبا ما تعكس شخصياتها اي شخصيات المنتدى واقع الحال ...

وفي اعضاء فيهم الخير والبركة ويكشفون عن هوياتهم وانا ايضا منهم ما عندي مشكلة اكشف عن هويتي للتواصل مع الاعضاء وسبق وفعلت .

اما اللي يختفون فجأة . نسأل الله ان يكونوا بخير فلربما مشاغل الحياة وامواجها جرفتهم لشاطئ الانشغال

هلا و غلا اخويه بانغ بانغ عاش من شافك يالغااايب

ليش نظن ان المنتديات خدعه اظن المسأله فيها نسبه و تناسب

بنلقى الصالح و الطالح و احنا علينا بالظاهر و لازم نتوخى الحذر لكن هذا ما يمنع انه نشوف ناس طيبين مثلكم و شرواكم نقدر نعتمد عليهم و نثق فيهم و نستشيرهم باي شي و و الحمدلله احس ان هالمنتدى فيه طيبه و احترام و تقدير ما بين الاعضاء و الله يديم الاخوة الصادقه بين اليميييع

[العفراء]

هو عالم افتراضي
لكنه في بعض الاحيان يفرض على العلاقات انها تبرز للواقع
هذا بيكون سهل لللشباب اكثر من البنات
لكن داءما هالعلاقات بتخلي اثر بحياتنا

هلااا بالخاااله ام امااني

اكيد والله ان العلاقات بالمنتدى بتترك اثرها بحياتنا و لا تعتقدون اني بيوم من الايام بنساكم
انا العشره مول ما تهوون عليّه

[بريق الحق]

اعرف ناس وايد من خلال هالمنتدى ربي يبارك فيهم
كنت اتمنى التقي بشخص لكن الله يرحمه والملتقى الجنه واياكم يارب

[الحياة الخالدة]

اعرف ناس وايد من خلال هالمنتدى ربي يبارك فيهم
كنت اتمنى التقي بشخص لكن الله يرحمه والملتقى الجنه واياكم يارب
اللهم آمين
عاش من شافك أخوي

[مهرة]

..

كم عمرج يالعفرا ؟؟ جاوبيني عالخاص ان حبيتي .!

وانا بقولج انطباعي عن تساؤلاتج ..

[بريق الحق]

اللهم آمين
عاش من شافك أخوي
الله يبارك فيج يارب

[مهرة]

..

على فكرة ماشفت ولا قريت الموضوع بس شفت العنوان ورديت على أثره . :)

[بوحارب]

اللي تعرفت عليهم في الفتره الماضيه محظوظين جدن جدن جدااا

لاني خلاص وقفت عن انشاء علاقات جديدة

ماعندي وقت وليس من باب الغرور

أصدقائي القدماء مرحبا بكم في عالمي الخاص
وأتمنى لكم المتعه والفائدة

:coo::yes2:

[Dana’1]

والنعم بالكل وأحترم الجميع بس ماجات فرصه أتعرف على أي عضوه بالمنتدى
وفيه كم عضوه فابت عن المنتدى مكانهم بين فعلا بس ما أملك لهم إلا الدعاء لهم بالتوفيق وعساهم دوم بخير


أما بعالم النت بالعموم عندي صديقه من زمااان تعرفت عليها بأحد المواقع ومازالنا مثل الخوات حتى إننا تعارفنا صار على مستوى العايله

[مختلف جداََ]

اللي تعرفت عليهم في الفتره الماضيه محظوظين جدن جدن جدااا

لاني خلاص وقفت عن انشاء علاقات جديدة

ماعندي وقت وليس من باب الغرور

أصدقائي القدماء مرحبا بكم في عالمي الخاص
وأتمنى لكم المتعه والفائدة

:coo::yes2:


اوكي عرفنا

ترى للحين أنطر الهدايا :anger1:

[ضوى]

وايد علاقاتي تطورت ببعض عضوات المنتدى ماشاء الله عليهم ذوق واخلاق وادب الله لاغير علينا وبعضهم على مستوى العايلة وبعضهم غابوا وانا متواصلة معاهم وبينا كل حب وود واحترام الله يحفظهم كلهم

[jwar]

السلام عليكم وشكرا على الموضوع

انا مع هالشي طبعا ( للشباب فقط)

كنت من الناس ( المشتركين ) في شبكة الخليفي اذا كان حد يتذكرها

وتعرفت على ناس كفو ولين الحين انا وهم اصدقاء ونتواصل

شي طيب ان الواحد يتعرف على ناس محترمين وطيبين وكفو باي طريقه كانت

طبعا انا ضد هالشي للبنات او الحريم جدا جدا وذلك لان لهم وضع خاص وحساس والطريقه في التعرف على صديقات قد تكون ضاره جدا جدا

وشكرا