انا و الطبباااخ البنغالي ( قصه حزينه )

[العفراء]

كان عندنا طباخ هندي جديييم بعزبتنا من قبل لا انولد و هو عندنا و اهلي بالاساس مربينه و تم عند حياة ابويه الله يرحمه و هو صح كان طباخ لكن ماسك العزبه و يدير الحلال و الزرع و يوم انروح العزبه كان يطبخ لنا لانه متعلم الطباخ عندنا من صغره و عقب لما كبر بالسن و طاف الستين سافر وحليله و تمت العزبه بدون طباخ

و مره اظن بسنة 2012 ما ياني رقاد و جان ادش الانترنت قلت بشوف المواقع مالت التجاره و البضايع اليديده كنت ادخل موقع اسمه دبي مون المهم و انا اقلب بمواضيع البضايع جان اشوف اعلان طلبات عمل جان ادش و جااان القى طباخ بنغالي خبره بالطبخ بالامارات يبحث عن عمل قلت اوووكي لقينا طبااخ للعزبه و جان اتصل فيه و جان يرد عليّه

و جان اقول له سلام عليكم صديق انت يريد شغل طباااخ ؟

جان صديق يقول لي : ماما ،،، انتي في معلوم الحين ساعه كم ؟؟؟:eek5:

كانت الساعه 12 بالليل و انا مب منتبهه ان الوقت متحيير جذا

جان اقول له انزين انا آسفه بكرا صبح يسوي تيلفون

جان هو يبند التيلفون دببببببفففف شكلي صج خربت رقاده


طبعا انا ما اتصلت فيه و قررت من هالموقف ان ما نتعامل مع البنغاليين و والله للحين مب لاقين طباخ هندي ههههه فجأة صاروا كل الطباخين بالامارات بنغالييين لكن قلت مستحيييل نتعامل معاهم

و جذا والله قصتي الحزينه و الله لا يقول انكم تشوفون اللي انا شفته بحياتي و دمتم سالمين

[R 7 A L]

خلاص لاتتصلين
وانتظري بيجيكم طباخ بروحه بيعرف انكم تبون طباخ وبيجي لاتخافين بس انتظري

[العفراء]

ههههه والله يتني عقده منهم رحال

بس صج احن اندور نبا هندي مب لاقين طبعا يبنا كم مره باكستانيين لكن كانوا يتاجرون بالدياي من ورانا هههه احنا نشوف عددهم ينقص طلعوا هم يبيعون و يشترون من ورانا بعد لو كانوا يواعه و ياكلونهم ما بنقول لهم شي

[أسير الاسهم]

خرطي ترا .. جبته طباخ بنغالي خبرة في الامارات .. مفاطيح .. وكبسات وبرياني .. وآخر شي هذاك هو عند الحلال وزين بعد انه يقوم بالحلال

لانه الطبخ في وادي واهو في وادي آخر

انتبهوا ترا نصهم خرطي ما يعرفون شي

[العفراء]

ترى مشكلتهم انهم يسوون اعمارهم يعرفون اي شي

انا اشوف بالطباخ لازم نفس قبل كيف يسوون اييبون حد من صغره و يعلمونه الشغل

بس الحين الامور تغيرت و الهنود مب اي حد بيرضى يداوم بالخليج مثل ايام قبل

و البنغالي اييك وغد ما تأمنه بصراحه

و ع فكره اساسا كنا نبا حد يمسك العزبه لكن بالاقامه لازم نكتب له طباخ

ومب مترقعين كل ما انييب حد يسوي مشكله اما يسرق او يزخونه الشرطه سكران تلعوزنا منهم و صج قبل كان الهندي احسن وااااحد بس تجدم بالعمر وما قدر ايتم حليله

[نفسي عزيزه]

ههههههههههههههاي ولج كان ينراد لج كتل :shy:

هييجي اكتلج بالسكين

هيييج تسرين في عباد الله ولج خليه ينام :shy:

آآنييي طباخ :(

[العفراء]

والله هيج صار لنا ،،، انت هسه تباوع علينا و تضحك ما تشوف لنا حل يابه

[qatarman8008]

قصة حزينة..:weeping:

[مختلف جداََ]

هاي حلم و لا علم

[غايه الطواش]

ايه ع الطبابيخ والله
احنا طبابيخا واحد خذوه بيت شيوخ جنبنا والثاني واحد في الديوان خذه
ومن عقبهم محنا مترقعين

[الحياة الخالدة]

خذي مني الكلام الصح
تعلمي الطباخ انتي و الحريم أو البنات اللي في البيت
و اطبخوا حق أعماركــــــــم
وابووووويه عليكن .. حتى الأكل ما ترومون تسوونه حق عماركم :nice:
حريم آخر زمن :tease:

[العفراء]

هيه والله اخويه قطر مان ثمانتالاف و ثمانيه هه صج انها قصة حزينه
و انا حياتي جذا كلها حزن وشقا مب بس انا حتى جورجي و سالي و سندريلا و سنو وايت كلنا جذا حياتنا شقينا و تعبنا وكنا دووم نيلس مع بعض و انصييح و نشتكي لبعض و الله لا يقول انكم اتشوفون لي احن شفناه بحياتنا

و وين شعار الغرافه ابي احط ع موتري هههه

[معماري قطري]

وانا مبرز الدموع طلعت هذي القصة الحزينة وقربت الكلينكس مني

بعد أيام بتستوي عندنا قصص مأساوية لين طبقوا قانون الانفلات ( الكفالات ) الجديد

[معماري قطري]

ايه ع الطبابيخ والله
احنا طبابيخا واحد خذوه بيت شيوخ جنبنا والثاني واحد في الديوان خذه
ومن عقبهم محنا مترقعين

تربون وغيركم يستفيد .. انا كنت سوبر طباخ أيام الدراسة واطبخ بمزاج برياني وحركات وحشوات .. بس من تزوجت وأم عيالي فازت علي وقالت لي إنسى الطبخ.

كانت طبختي المفضلة لحم محموس بالنعناع المجفف وحمسه من مواد أُخرى .. وعليها احط العيش بعد ما ينشخل وشوية زعفران وداخل الفرن يتمغط براحته

[مختلف جداََ]

تربون وغيركم يستفيد .. انا كنت سوبر طباخ أيام الدراسة واطبخ بمزاج برياني وحركات وحشوات .. بس من تزوجت وأم عيالي فازت علي وقالت لي إنسى الطبخ.

كانت طبختي المفضلة لحم محموس بالنعناع المجفف وحمسه من مواد أُخرى .. وعليها احط العيش بعد ما ينشخل وشوية زعفران وداخل الفرن يتمغط براحته



تكفى طلبتك في مطعم يسوي اللي قلت عليه ؟؟

ههههههه

[qatarman8008]

هيه والله اخويه قطر مان ثمانتالاف و ثمانيه هه صج انها قصة حزينه
و انا حياتي جذا كلها حزن وشقا مب بس انا حتى جورجي و سالي و سندريلا و سنو وايت كلنا جذا حياتنا شقينا و تعبنا وكنا دووم نيلس مع بعض و انصييح و نشتكي لبعض و الله لا يقول انكم اتشوفون لي احن شفناه بحياتنا

و وين شعار الغرافه ابي احط ع موتري هههه

بس مايصير تحطين شعار نادي الغرافة على موترج وانتي حزينة..
لازم يزول الحزن اولا ثم.. نحط الشعار ومجانا بعد..:nice:

[السيف5]

هههههه

اضم صوتي لصوت مشرفتنا

واقول وش بلاكن ماتطبخن يداكن محنايه

[العفراء]

هاي حلم و لا علم

علم علم شيخي مختتتلف ما عندكم طباخ ما تبونه : (

[العفراء]

ايه ع الطبابيخ والله
احنا طبابيخا واحد خذوه بيت شيوخ جنبنا والثاني واحد في الديوان خذه
ومن عقبهم محنا مترقعين

وابووووي يا غايه قلبتي المواجع هههه

والله العظيم كان طباخنا يسوي هاك المجبوس اللي للحين محد يضبطه شراته خليها على الله بس :weeping:

[العفراء]

الحياة الخالدة و السيف فايف لحظه لحظه انا اعرف اطبخ والله
و كل يمعه و سبت انا من الغبشه بالمطبخ مع امايه واسوي كل ما لذ و طاب

بس بوقت الدوامات ما ادش المطبخ والا متعلمين الطبخ بسس انا اقصد بالموضوع ان احن اندور حق العزبه مب حق البيت و مب بس علشان الطبااخ لا كنا نبا واحد يمسك العزبه ويوم احن نروح العزبه بالاجازات يطبخ لنا

الحين انتم قلتوا عفرا ما تعرف تطبخ و باجر الناس بيسمعون هالرمسه و عقب الحريم بالفرجان بيصدقون و عقب محد بييي يخطبني :(

شفتوا وين راح تفكيري ههه

[النهار]

صج قصه حزينه
http://store2.up-00.com/2015-11/1446986012571.gif (http://www.up-00.com/)[/URL]http://store2.up-00.com/2015-11/1446986012571.gif (http://www.up-00.com/)[URL="http://www.up-00.com/"]

[العفراء]

هلا والله عممي المعماااري عاش من شافك يالغاالي ليش قانون الكفالات شو بلاه اظن الامور الحين وايد اتغيرت الحين الهندي يبا راتب محترم والا بيرجع بلاده مب مثل قبل يتحملون الغربه علشان 500 او 1000 درهم ،،،،،، و ما ينفع اتييب طباخ ما تضمن طباخه لازم تبدا من الصفر كانوا اييبونهم فروخ ويعلمونهم و يربونهم حتى كانوا يعاملونهم شرات عيالهم صج ترى الاوليين كانوا بقلوبهم رحمة رغم قسوة العيشه و حتى لو تلاحظ العمال ايام قبل ما خبلوا بالاوليين لان كانوا يعرفون يقبضونهم و بنفس الوقت يرحمونهم و هالشي يخلي العماله يحترمون كفيلهم بس وين الحين تعلموا منكر يديد و قاموا يلفون وايدروون وغير ان بعض الناس يعاملونهم بقسوه و ما يعطونهم رواتبهم وهالشي يخليهم يشردون ويططفشون عاد من عقب طباخنا الهندي يبنا كم واحد باكستاني والله خبلوا فينا هاييل و كل ما تصير مشكله نتذكر محمد الهندي ونترحم على ايامه كان قايم بالعزبه و بكل شي صج ما عرفنا جيمته الا يوم سافر وحليله

[العفراء]

تكفى طلبتك في مطعم يسوي اللي قلت عليه ؟؟

ههههههه

مختلف جان تبا انا بطبخ لك انت بس آمر شو تبا بس يكون بيوم اجازة اوكي و ع فكره ببلاش ترى ما ناخذ فلوس ع الطباخ

[العفراء]

بس مايصير تحطين شعار نادي الغرافة على موترج وانتي حزينة..
لازم يزول الحزن اولا ثم.. نحط الشعار ومجانا بعد..:nice:

انا صح اني حزينه و وايد عانيت بحياتي لكن الغرافه هالفريق دوم ينسيني الاحزان و يخليني افرح واستانس خاصة لما ياخذون الكاس و نسوي مسيره و نحوط بالشوارع والفرجان و نفرح و نستانس والله عليك يالغرفاوي ياللي تجرح و لا اتداوي :victory:


و على فكره انا ادري ان الغرافه هالفريق كان اسمه قبل الاتحاد لا تتحراني من يومين اشجع الغرافه خخخ

[العفراء]

صج قصه حزينه
http://store2.up-00.com/2015-11/1446986012571.gif (http://www.up-00.com/)[/URL]http://store2.up-00.com/2015-11/1446986012571.gif (http://www.up-00.com/)[URL="http://www.up-00.com/"]

اسمحوا لي والله مب قصدي العب بمشاعركم وعواطفكم بس قلت احط عن قصصنا الحزينه شوي وانا ادري كل واحد فيكم عنده محطات حزينه بحياته و مستعدة اشارككم بالحلوة و المره و متى ما تبون حد يصيح وياكم خبروني انا جاهزة تراني

[qatarman8008]

انا صح اني حزينه و وايد عانيت بحياتي لكن الغرافه هالفريق دوم ينسيني الاحزان و يخليني افرح واستانس خاصة لما ياخذون الكاس و نسوي مسيره و نحوط بالشوارع والفرجان و نفرح و نستانس والله عليك يالغرفاوي ياللي تجرح و لا اتداوي :victory:


و على فكره انا ادري ان الغرافه هالفريق كان اسمه قبل الاتحاد لا تتحراني من يومين اشجع الغرافه خخخ

تعيش العفراء.. تعيش تعيش.. :omen2:

[العفراء]

احمم عاشت ايامك الغالي ,,, عاش فريق الغرافه الرياضي الثقافي ان شاء الله يخلوني امينة السر بالنادي

[مختلف جداََ]

مختلف جان تبا انا بطبخ لك انت بس آمر شو تبا بس يكون بيوم اجازة اوكي و ع فكره ببلاش ترى ما ناخذ فلوس ع الطباخ

ما بتاخذين فلوس على الطباخ

بس

المواد علي صح ؟ :anger1:

[العفراء]

لالا ببلاااش كل شي علينا انت بس آمر

[مختلف جداََ]

لالا ببلاااش كل شي علينا انت بس آمر


ما تقصرين يالشيخة

[بشائر]

ههههه الحين هذي القصة الحزينة؟!

روووحي ياشيخة منك لله..
نبي الجزء الثاني بعد قانون إلغاء الكفالات واللي يعافيج :)

[العفراء]

مختلف جدا ربي يسلمك الشيخ


هلا و الله بالغاليه بشاير شحالج ؟؟؟؟؟


ههه شو السالفه محد فيكم مقتنع ان القصه حزينه:weeping:

و ربج يعيين ع القانون اليديد عندكم اظن وايد بيتحررون العماله من القيود اللي بالاساس كانت تفرض الانضباااط بس ان شاء الله ان الجهات المعنيه ما بتغفل عن اي شي يسبب الانفلات

[العفراء]

اسمحوا لي بترخص عنكم الحين تصبحون على خير نلتقي بكم باجر ان الله احيانا

[المبرمج صلاح]

ههههههههههههههه حزنت فعلا

معقولة الحين الدولة بكبرها مافيها ولا طباخ هندي راضي يشتغل عندكم :eek5: :secret:
اكيد سامعين عنك شي اكيد انك قوية ومتسلطة وبتشغليهم الكل في واحد :weeping:

امزح ترى :shy: :discuss:

[معماري قطري]

دنيا واجد خراب يستوي شيسوي انا

[معماري قطري]

تكفى طلبتك في مطعم يسوي اللي قلت عليه ؟؟

ههههههه

صدقني يا مختلف الأكلة ذي مختلفة وقاتلة للكل .. كانوا الربع يوم الجمعة يقولون لي اليوم عليك الطبخة وانا اوزع الادوار واحط اللمسات الأخيرة .. كانت عادتنا بعد صلاة الجمعة نتغدى ونعطيها نومة وعشانا يكون متأخر.

واحد من الربع اخترع الجبسة بالمايونيز هذي حلاتها لينة وقرب الفجر في آخر السهرة .. الله يرحم رفيجنا سعود بن ثاني السويدي كانت شقته مجلس لهذي الطبخات وكان يعلق دوم على هواة المجبوس ومعاه المايونيز .. قرشة مايونيز كاملة يخلصونها لا والمجبوس بصل وعيش وبهارات ولحم أو دجاج بيسك يعني

[الجـــوديّ]

الله يسعدج يالعفراء على هالقصة الحزينة اللي مب حزينة :tease:

طمنتيني .. على بالي احنا بس مبتلشين بالنغالي .. أثر العالم يعانون :/

[العفراء]

ههههههههههههههه حزنت فعلا

معقولة الحين الدولة بكبرها مافيها ولا طباخ هندي راضي يشتغل عندكم :eek5: :secret:
اكيد سامعين عنك شي اكيد انك قوية ومتسلطة وبتشغليهم الكل في واحد :weeping:

امزح ترى :shy: :discuss:
الجمله الاخيره خلتني احس انك وااايد تخاف تجرح مشاعر الناس

ادريبك تتغشمر اخويه المبرمج صلاح هههه

وماشي طباخين هنود مووول صاروا عملوا ناااادره

وانا حليلي مب قويه و لا متسلطه بالعكس طيوووبه و رهيفة المشاعر و بسرعه اصيح:(

[دايموند]

بعد اذنج الشيخه

سؤال لشباب قطر

كم تعطون البنغالي الصبي الي يشتغل في العزبه!!!
لان ناوين نجيب بنغالي ومب عارغين كم نعطيه...
واشرايكم بهالجنسيه زينه والا لا؟

شكرا