العزاء والمفهوم الخاطى !!!!

[Qt.1]

للاسف يقع مجتمعنا القطري في خطأ كبير بالنسبة لمفهموم واجب العزاء , انا هنا لا اعني واجب عزاء الرجال لان هذا الموضوع يحتاج وقفه خاصه وموضوع اخر , موضوعي عن النساء عند اداء واجب العزاء , تتجمع النساء في منزل الشخص المتوفى لمده لاتقل عن قرابة الشهر تقريبا وقد تزيد !! تجمعات كبيره غداء عشاء احاديث جانبيه وقد يصل الامر لضحكات جانبيه , تاخر حتى اخر الليل قد يصل الى الساعه 12 ليلا !! الاايعلم الناس مالذي يمر به اهل المتوفى , هم في حاجه للراحه فهم يمرون بموقف صعب ويحاولون تخطي هذه المرحله الصعبه والحزينه واذا بالنساء تجعل من العزاء مناسبه للتجمع والسهر وكانهم في مناسبه مفرحه كخطبه او زواج !! اتمنى من بعض النساء مراجعه انفسهم وتغيير هذه العاده السيئه والقيام بعزاء الواجب في اوقات مناسبه وعدم الضغط على اهل المتوفى بهذه الطريقه الخاطئه ,,,

[مختلف جداََ]

:omg: شهر !!!

[Qt.1]

:omg: شهر !!!

نعم حدثت قرابة الشهر !!

[طلعة الروح]

لاحول ولاقوة الا بالله
حتى هيبة الموت صرنا نفتقدها هالايام
الله يهدي خلقه لما يحب ويرضى

[بصمة قطرية]

صدقت والله أخوي بوعبدالله ..
جربت هالشي يوم توفت أمي الله يرحمها*..

كل شي يهون إلا سالفة السوالف والضحك ..
و اللي ما تحشم المكان اللي هي فيه لما تجي بكامل زينتها ..!!!
هاي اللي فعلاً يقهر ..


الله يرحمنا برحمته ..

[Qt.1]

صدقت والله أخوي بوعبدالله ..
جربت هالشي يوم توفت أمي الله يرحمها*..

كل شي يهون إلا سالفة السوالف والضحك ..
و اللي ما تحشم المكان اللي هي فيه لما تجي بكامل زينتها ..!!!
هاي اللي فعلاً يقهر ..


الله يرحمنا برحمته ..

بالضبط كل الي ذكرتيه صار العام يوم توفى ابوي الله يرحمه برحمته ,,,

[Qt.1]

لاحول ولاقوة الا بالله
حتى هيبة الموت صرنا نفتقدها هالايام
الله يهدي خلقه لما يحب ويرضى

للاسف فعلا فقدنا هيبة الموت , مره كنا رايحين المقبره ندفن زوج خالتي متوفي هالكلام من سنتين وشي تقريبا , انا من الضيقه ومن كثر عيوني ماتعورني من الدموع بس ماسك نفسي ماقدر اشوف قدامي و التفت حذاي الي يسولف والي يضحك وواحد يطلع تلفونه يتصل ويسولف ويطقطق فيه , معقوله هالناس هذي ماتملك اي احساس !! انت في مقبره ياخي استحضر عظمة القبر والحساب على الااقل تخيل نفسك يوم من الاايام وماهو ببعيد بتكون في هالحفره اسال نفسك هل انا مستعد ؟ الناس احساسها اصبح شبه معدوم .

[بنت مريخ]

شهر ��
يعزون و يطلعون
بعضهم يحطون مكياج باهت
يارب لاتبلينا

[وحيد-الشوق]

هي جات عالحريم حتى عزاء الرجال ماتفرق بينه وبين العرس ذبايح وشاي وقهوة والناس كاشخه وسوالف وكل واحد ماسك تلفونه ويدردش عالواتس اب وهذا غير المخاسير يذكروني بالمثل المصري موت وخراب ديار :)

[ضوى]

اكره سالفه العزا واللي يصير فيها ، اختي بوفاه زوجها الله يرحمه ، تحاتي الغدا والعشا للناس اقولها انتي خلج باللي انتي فيه بس صار عادة قبيحه والكل مشى عليها ، لو في سيدة شجاعه ووقت العزا بس قهوة وشاي ومافي اي نوع من التقديمات الاخرى كان الكل بيتبع هالامر بدايته صعبه لكن عقب بيصير الشي عادي وينقلب عادة بس لو عندنا الشجاعه

[aloosh]

عندنا 3 ايام في القبيله كلها بقطر وخارج قطر لم ارى في حياتي اكثر من 3 ايام فقط

[ضوى]

الرجال نعم ثلاث ايام

الحريم ولا ممكن

[بصمة قطرية]

اكره سالفه العزا واللي يصير فيها ، اختي بوفاه زوجها الله يرحمه ، تحاتي الغدا والعشا للناس اقولها انتي خلج باللي انتي فيه بس صار عادة قبيحه والكل مشى عليها ، لو في سيدة شجاعه ووقت العزا بس قهوة وشاي ومافي اي نوع من التقديمات الاخرى كان الكل بيتبع هالامر بدايته صعبه لكن عقب بيصير الشي عادي وينقلب عادة بس لو عندنا الشجاعه
اي والله ياليت ..
نترك هالعادات السيئة اللي ما لها لزمة ..
بعض الدول عندهم عيب غير الماي و الشاي و القهوة مافي ..

[R 7 A L]

مستغرب اخوي بوعبدالله من المده
اكثر الي اشوف واسمع زين اذا احد جا اليوم الثالث

[ابوالكلام]

انا كان مثل هذا الموضع شاغل بالي اود ان اطرحها في السابق مايدل بأننا نحن نمارس النفاق الجماعي الامور مجرد عادات مكتسبة لا اكثر ولا اقل ولانهتم لامر الاخرين اللهم بأننا قمنا بالواجب اي بممارسة النفاق الجماعي مع تبادل الضحكات واللعب بالاجهزة الجوالة. انا استغرب حقاً. شكراً

[ام امااني]

اكره سالفه العزا واللي يصير فيها ، اختي بوفاه زوجها الله يرحمه ، تحاتي الغدا والعشا للناس اقولها انتي خلج باللي انتي فيه بس صار عادة قبيحه والكل مشى عليها ، لو في سيدة شجاعه ووقت العزا بس قهوة وشاي ومافي اي نوع من التقديمات الاخرى كان الكل بيتبع هالامر بدايته صعبه لكن عقب بيصير الشي عادي وينقلب عادة بس لو عندنا الشجاعه

والله نفس الشيئ عندنا
لا وزادو دخلو الحلويات والتمر وحنا بالاساس اي شيئ حلو زمان كنا ما نقدمه بالعزى
بزمنا هذا حتى الموت فقد هيبته
وبالمقابل فيه عوايل محافظين على العوايد ومتمسكين بيها
ولا يوقدون النار ببيوتهم طول فترة العزاء والاهل والجيران هم اللي يطبخون لهم
وياريت هالعادة تعمم
حفاظا على مشاعر اهل الفقيد واحتراما لحالتهم ومصابهم

[BUHASSEN]

الله المستعان الصراحه صار العزا تكلفه عل اهل المتوفي والسبب هالعادات الي ما انزل الله بها من سلطان

الاصل يعزون في المقبره وانتهي الموضوع والله التكلفه للعزا 3 ايام تطلع مرات فوق ال 50 الف هاذي والله لو ينعمل فيها بير ولا مسجد لا استفاد الميت من هالوقف ما الله به عليم

الله يصلح الاحوال ياارب

[بانغ بانغ]

الله المستعان الصراحه صار العزا تكلفه عل اهل المتوفي والسبب هالعادات الي ما انزل الله بها من سلطان

الاصل يعزون في المقبره وانتهي الموضوع والله التكلفه للعزا 3 ايام تطلع مرات فوق ال 50 الف هاذي والله لو ينعمل فيها بير ولا مسجد لا استفاد الميت من هالوقف ما الله به عليم

الله يصلح الاحوال ياارب

صحيح خاصة في االكويت وهاي السنة اعتقد

[ya3coub]

عندنا و عندكم خير الرجال ايضا لا يقلون من هالناحية للأسف بس لمدة اسبوع مو شهر.

عزا يدي الله يرحمه كان فبيتنا و من 6 الصبح موجودين لين قريب الــ12 فالليل شخلو حق الحريم.



صج في ناس ما تستحي ولا تقدر

و في الي يجون يقرون قران و يحثون الناس على الدعاء و ترك السوالف الجانبية

بس مثل هالمناظر لأهل المتوفي مستفزة و هاي ليش نذكرها

[عثرة جواد]

انا اتكلم عن تجربتي

لين توفى ابوي الله يرحمة ويسكنه فسيح جناته

كان الاكل مرتب بطريقة راائعه كل يوم ع 2 مثال الغداء ع اخوي لكبير

العشاء ع النسايب هاي بنسبة للاكل .

اما الزيارات والعزاء الحمد لله كان مرتب جدا محاضرات من افضل الداعيات ف قطر

استمرت 6 شهور وماكان يقدم الا الشاى والقهوة ..

الغلط مش ف الناس الغلط ف اهل العزاء هم الي مفروض يرتبون عزاهم


وبل عكس الكل كان يشكر ويطلع ووهو مستانس وف توزيعات الاذكار والاسيدي الاسلامي

عساااك ع ااالقوة

[شبح الصمت]

عندنا و عندكم خير الرجال ايضا لا يقلون من هالناحية للأسف بس لمدة اسبوع مو شهر.

عزا يدي الله يرحمه كان فبيتنا و من 6 الصبح موجودين لين قريب الــ12 فالليل شخلو حق الحريم.



صج في ناس ما تستحي ولا تقدر

و في الي يجون يقرون قران و يحثون الناس على الدعاء و ترك السوالف الجانبية

بس مثل هالمناظر لأهل المتوفي مستفزة و هاي ليش نذكرها



اول شيء الله يرحم مواتاكم وموتى المسلمين ..

ثاني شيء اشلون ياخوي ما يستحون !!

هل اهم الي جوكم غصب وقالوا لكم فتحو ميالسكم شهر كامل ..

العزء معروف 3 ايام وينتهي ..

اما المبالغه فيه فهذا راجع لاهل المتوفي ..

الرياجيل 3 ايام
الحريم بحكم انهم حريم الي ما جات اول ثلاث ايام تجي بعدها ومب شرط اذبح لهم


قهووه وشاي ويذكرون الله ويترحمون على الميت
والله يجزاهم خير ويرحم والديهم

[غايه الطواش]

اي والله صار العزا لا له هيبه ولا للميت حرمه

[حمد 2002]

الله يحفظ النعمة ويحميها من الزوال

[شبح الصمت]

مع احترامي للكلمة الي بقولها

اوصخ نوعية الي يدخن داخل العزء ..

هذا وش وضعه او اش موضوعه مب عارفين صراحة

ما حشم حد ..

هذا ودك تصكه بدلة الرسلان في راسه

واتكلم يدخن داخل المجلس او في الخيمه داااخلها

[حمد 2002]

مع احترامي للكلمة الي بقولها

اوصخ نوعية الي يدخن داخل العزء ..

هذا وش وضعه او اش موضوعه مب عارفين صراحة

ما حشم حد ..

هذا ودك تصكه بدلة الرسلان في راسه

واتكلم يدخن داخل المجلس او في الخيمه داااخلها

والي ايدخن بالمقبره؟

[حمد 2002]

والي ايصور سناب شات بالمقبره ؟

[ya3coub]

اول شيء الله يرحم مواتاكم وموتى المسلمين ..

ثاني شيء اشلون ياخوي ما يستحون !!

هل اهم الي جوكم غصب وقالوا لكم فتحو ميالسكم شهر كامل ..

العزء معروف 3 ايام وينتهي ..

اما المبالغه فيه فهذا راجع لاهل المتوفي ..

الرياجيل 3 ايام
الحريم بحكم انهم حريم الي ما جات اول ثلاث ايام تجي بعدها ومب شرط اذبح لهم


قهووه وشاي ويذكرون الله ويترحمون على الميت
والله يجزاهم خير ويرحم والديهم

أخوي شبح الصمت اسمحلي على الكلمة اقصد فيها ليس من يحضر و يأتي العزاء بل من يأتي و يقعد بوسط المجلس

رجعت اقرى ردي و ما عرفت فئة "الي ما يستحون" او قليلي الآدب

و هم الي يجيك من الصبح و يبسط لين فالليل بلا اي فائدة لا يساعد ولا يوجب ولا اي شي فقط موجود كأنه بمجلس.
صاف سيارته عند الباب او مسكر و صاف غلط طول الوقت على البلاكبيري و الأيفون <<< قبل السناب و على ايام البلاك بيري
ضحك و مسجات و نكت بصوت مرتفع شوي و كل شوي يعزم المدخنين للتدخين بالحوش و احنا فبيتنا ولا شخص يدخن ولا حتى فالعيلة كاملة بين عمامي.

قد لا يكون قريب لك من العائلة او حتى المعارف انما جالس يشوف و يلتقي بمن لم يرهم منذ زمن سوائا من اصحاب قدامى او زملاء عمل و دراسة.

تحس انه متعذر من دوامه علشان العزى, و بنفس الوقت لا اهو الي حزين ولا اهو الي يواسي بس ضحك و شرب و اكل و تستنكر هالتصرفات لان فيها استفزاز و عدم اريحية لأهل المتوفي.

يشوف الشياب يجون ولا يتحرك انش من مكانه ودك تكلمه بس ابوك و عمامك يقولونلك تراه فبيتك و مهب عدلة يدك عمره ما سواها ولا من طبعه.


البيت يفتح من الصبح لين الليل لأن في ناس و خصوصا الشياب و الي كان يدي غالي عليهم جاين متعنين للدوحة على كم ساعه و بيمشون.
او الي يجيبه ولده و وراه دوام او الخ.

صحيح العزاء 3 ايام ولكن لما يجونك رابع و خامس و من الصبح يطقون الباب و بالأغلب من برع قطر الي توه واصلهم الخبر ما تقدر ترده بس في من يستغل هالشي علشان يسولف عن مغامراته و ذكرياته هاي الي انا ضده.


في عزا احد الشباب الي توهم متوفين الله يرحمهم بدون ذكر اي حادث ولا اي اسامي
خذيت الأهل ولا الوالدة مسكينه تنتفظ و اتقول في ناس ما تستحي المرة ولدها توفى بحادث سيارة ليلحين ما بدا حياته
و في بين الحريم يتكلمون عن فلانه تنفع حق ولدي !!
كل شي له وقت و مكان و ظروف ملائمة و ناس نراعي شعورهم و نجبر بخاطرهم

[شبح الصمت]

الله يرحم يدك ياخوي ويرحم موتى المسلمين

ويجمعك معاه في جناته الفردوس ..

انا داري بالكلام الي تقوله بس نفس وضع الشخص الي تكلمت عنه حالة استثنائيه
شخص يبي نفس ما قلت فاضي
واوقات يمكن الرجال يبين فالصورة انه موجود ولكن مب بهالطريقة ..

وفي ذمتك الحين في العزء كل العالم تسولف عن الموت اكثرنا نسولف عن الدنيا
وسالفه وراء سالفة وسالفه تجر سالفة

لو انه المكان كان فيه شيخ دين وبعد يحدث تحصل ناس مب عاجبهم الوضع ..
ويسولفون ..

تعال شوفهم يوم يدفنون الواحد كلن لاهي مع احد
وتحصل البعض يحضكون

انا في ناس اتصدد منهم وقت الدفان لاني عارفهم من النوع الي يحب يسولف

واموره طيبه عادي عنده ..

الواحد في هالوقت يتذكر نفسه وشنو الي سواه
صج نه بعد من نطلع من المقبرة نرجع لحياتنا الطبيعة الضحك وكل شيء

لكن ذهابنا للمقابر للتذكر بانه مردنا للقبور


وهنيئاً لمن ذكر الله فذكره
اللهم اغفر لنا وارحمنا فوق الارض وتحت الارض ويوم العرض

[شبح الصمت]

والي ايدخن بالمقبره؟


والي ايصور سناب شات بالمقبره ؟



موجودين ..

شوفوني انا فالمقبرة
وبعضهم للتذكير


لا تحاتي ان شفت في يوم واحد مصور مع ميت
استغفر الله العظيم

ناس مدري اشلفون تفكر

[عثرة جواد]

اذكر ف موت ابوي وحده سلمت وقعدت تكلمنا

عن وحده شارية فيلا ومسويتها من داخل شي خافي

كنت اطالعها مستغربة اي قلب عندها ..عقب قلت لها

حبيبتي الوالد توفى الله يرحمة عزيتي وماقصرتي

اذكري الله والا الله يحفظج اضحكت وتمت ساكتة

سبحان الله قبل الموت لة هيبة...

[حرف]

شدعوة شهر متأكدين انهم قطريين

[بصمة قطرية]

من فترة بسيطة ..
رحت أعزي ناس تخيلوا سولفوا عن شنو ..!!!
ثاني يوم العزا ..
وراهم عرس و كل وحدة تسأل الثانية حجزتي مكياج و شعر ..!!
والله العظيم أنصعقت ..
كنت أسمعهم و أنا مش مستوعبة اللي يقولونه
معقولة ..!!
الحين هاي اللي توفت الله يرحمها ما لها حشيمة و إحترام ..!!
ما لها تقدير ..!!
و قريبة وايد ..
شلون قلوبهم طاوعتهم يتكلمون عن هالشي
يعني عرس ووناسة
وين الحزن ..!!!
اوكي الحزن في القلب بس هاي ثاني يوم ..!!
ليش والله العظيم قلبي عورني ..

[بانغ بانغ]

اخبر عزا واحد حضرته استمر شهر ... كان عزا د. محمد قطبة الله يرحمه

من كل دول الخليج عزوا هله