ابي رايكم اشتري دودج رام ولا فورد اف 150 ؟

[مضارب دوسري]

السلام عليكم ورحمة الله وبركاته

بغيت اخذ رايكم
بما ان خبرتي فالسيارات مب ذاك الزود

انا مب مقتنع بسييرا او سلفرادو بسبب احسهم وعرين ما يصلحون لعائله
انا رايي حسب الشكل القديم مدري عن الجديد


ف ابي رايكم تنصحوني بدودج رام او فورد اف 150

اللي يهمني
الراحه في السواقه
الانسيابيه
وسهل تاخذ u turn عند الاشارات
والعزم


بانتظاركم
والله يجزاكم خير مقدما

[لطيف الروح]

الله يوفقك

نصيحه اتصل في شركة الفورد و اطلب منهم تجربة السيارة الي تبيها

جربها بالمطبات و عند اللفات و عزمها و بعدين قرر

[بوخميس]

السيارات جيدة لكن الوكيل بيطلع عينك أكثر من مجلس إدارة الإجارة :omen2:

السييرا يمكن الافضل حالياً في السوق، والموديلات الجداد احسن من قبل كفخامة وراحة.

بس بو محمد شتبي في بيك آب؟؟

[مضارب دوسري]

هلا بو خميس
عندي فورويل
بس
البيك اب فوايده كثيره
للسفر يعجبك
للرحلات يعجبك
على الشارع تحس انه الشارع مسجل باسمك
محد يلف عليك هههههه
راعي الرنج والمرسدس يضرب لك سلام وتحيه ويقولك تفضل طال عمرك
هههه

[مضارب دوسري]

لطيف الروح
وياك يالغالي

بس التجربه قبل الشراء ما تعطي انطباع واضح

يعني وقت التست تجرب سياره جديده شهرين الى 5 شهور بتحس باريحيه
العيوب تتضح بعد فتره

[busnaidah]

أخذ تاندرا وبتدعيلي. بس خذ ال أديشن 1794

[مضارب دوسري]

التندرا مشكلتها اذا لا سمح الله دعمه او شي قطع غيارها من دبي وهالشي مخليني اغض النظر عنها

تسلم اخوي

[الوسيط العقاري]

Gmc او تندرا

نصيحة أخو لاتاخذ لادوج ولا فورد

وموفق

[sos 12]

عندي دودج رام 2012 .. الحين ماشي حول 70 الف بدون مشاكل والحمدالله ... بالنسبه للشكل القديم ... المقارنه راح اتكون في صالح الدودج ... بس اذا راح اتقارن بالفورد الشكل الجديد فالمقارنه راح اتكون في صالح الفورد اف 150.
عموما الموترين فيهم ريافه احسن بواجد من الجمس والشفر ... لفه الدودج اصغر من لفه الفورد فرق بسيط لايذكر بس الاثنين لفتهم اصغر من الجمس والشفر ... من ناحيه القوه علي حسب الارقام الدودج 395 ... والفورد 360 حصان .. قوه المكينه في صالح الدودج ... من ناحيه الوكاله قاعدين يتحسنون في المعامله وماصادفت من الشركه ان ماعندهم قطع غيار ولا مش متوفره ... اذا مش متوفره في خلال يومين اتكون موجوده عن طريق وكيل الامارات ... باختصار اذا الشكل القديم من اقول خذ الدودج بو 8 سرعات ... او تاخذ الفورد الجديد اذا حبيت.

[بعيد النظر]

بومحمد .. يصبحك بالخيير ..


الله يسلمك انا من عشاق الجموس ..
وجربت 3 موديلات فيهم .. وكلهم غمارة .. بس يوم جفت الفورد الجديد ..
قلت بروح اجربه .. عجبني ! ويوم جربته ...............
جاتني الصدمة ههههههههههههه !


بعت الجمس عقب اسبوع وخذت لي رابتر .. غمارة وربع ..
والحمدلله مرتاح ومستانس واموري طيبة ..


والربع غيرو الجموس وخذو فوردات اف 150 ..
وما شاء الله مواتر مريحة وريفة وقوية .. وانصحك فيها !!


اما الدوج ما بعلق عليه لاني ما جربته ولا افكر اجربه ..



وموفق

[مضارب دوسري]

يصبحكم بالنور

الله يعطيكم العافيه ما قصرتوا

[مضارب دوسري]

عندي دودج رام 2012 .. الحين ماشي حول 70 الف بدون مشاكل والحمدالله ... بالنسبه للشكل القديم ... المقارنه راح اتكون في صالح الدودج ... بس اذا راح اتقارن بالفورد الشكل الجديد فالمقارنه راح اتكون في صالح الفورد اف 150.
عموما الموترين فيهم ريافه احسن بواجد من الجمس والشفر ... لفه الدودج اصغر من لفه الفورد فرق بسيط لايذكر بس الاثنين لفتهم اصغر من الجمس والشفر ... من ناحيه القوه علي حسب الارقام الدودج 395 ... والفورد 360 حصان .. قوه المكينه في صالح الدودج ... من ناحيه الوكاله قاعدين يتحسنون في المعامله وماصادفت من الشركه ان ماعندهم قطع غيار ولا مش متوفره ... اذا مش متوفره في خلال يومين اتكون موجوده عن طريق وكيل الامارات ... باختصار اذا الشكل القديم من اقول خذ الدودج بو 8 سرعات ... او تاخذ الفورد الجديد اذا حبيت.

وهل اسعار قطع الغيار فالدودج
غاليه او مناسبه اخوي

[الاسطوره]

بومحمد شرايك بالفورد رابتر ؟ جربتها ؟ انا اشوف انها احلاهم لو تحطها في بالك ترى مابتندم

والدوج رام يمدحونها ناس واجد والله

موفق ان شاءالله

[الســـهم]

مرحبا اخوي مضارب دوسري (بومحمد) ..

الفورد موتر ماعليه كلام خذها من مجرب , عيبه الوحيد وكالته او بالاصح (توافر قطع الغيار) , وان شاء الله ماتحتاجهم الا نادرا لان الموتر مايحتاج الا السيرفس العادي (فلتر، ايل، بلكات) , يعني على سبيل المثال انا احتجت كراجهم بعد سنتين ونص ولله الحمد , اعتقد خدمة الموبايل سيرفس تغنيك عن الكراج فالسيرفس العادي وعندهم مركز خدمة في محطة بترول لاندمارك ..

الموتر من ناحية السواقه والريافه والسعه والعزم (ماشاء الله عليه) , وازيد عليهم اقتصادية البترول (صرفيته ماشاء الله على الخط نفس الاربعه سلندر) ..

والقرار فالنهاية لك , واتمنى تاخذ برأي اللي جربوا اكثر من نوع من البياكم (جمس، دوج، تندرا) ..

[sos 12]

وهل اسعار قطع الغيار فالدودج
غاليه او مناسبه اخوي

انا اشوفها مناسبه جدا ... من سنتين عملوا خصم جامد علي قطع الغيار... الموتر ماشي 70 الف بدلت مره واحده السفايف الي قدام وسعرهم حول 320 ريال .. وطبعا الايل والفلتر حول 200 ريال ... هذا الي بدلته في الموتر في 3 سنين

[مضارب دوسري]

الله يعطيكم العافيه
ما قصرتوا

[ya3coub]

الشباب الي من ربعي جربوهم يمدحون الفورد بالدرجة الأولى و بعده علطول الــرام

و التندرا

و بالأخير السلفرادو و من ثم الجمس

للأسف عندنا ثقافه الجمس منتشرة نفس ثقافه الكروزر شيك بالمخبى و خراباته بسيطة و قطع الغيار متوفة و الخ....
انا مجربهم كلهم و اقولك الفورد و الرام متساوين و الأفظل من ناحية السعر و العزم و الاوبشن الي فيهم.

الشباب يمدحون الفورد الجديد وايد وايد بس ليلحين ما جربته بصراحة ولا اعرف احد جربه

[مضارب دوسري]

بيض الله وجهك اخوي يعقوب

[النهار]

توكل على الله خذ اف 150 من احسن المواتر الي مرو علي

[مضارب دوسري]

وقع الاختيار على الرام
اللون سلفر

والله يوفق ان شاء الله

عجبني فيه تقسيمة الصندوق

[بوفهد@]

سيارات ماعليها كلام بس المشكله الوكيل يكرهك بالسياره

[مضارب دوسري]

كلهم يا بوفهد نفس الشي

الشفر والجمس مجربهم من قبل اردى واردى

وشغل يدهم طاير بالعلالي

[مضارب دوسري]

الوكاله الوحيده اللي ف قطر
نقدر نقول انها افضل السيئين
هي bmw

[المبرمج صلاح]

فورد بلاتينيوم f150 شي خرافي
ركز من الدقيقة 7


https://www.youtube.com/watch?v=4TuKaVbUEcQ

[Mr-Khalifa]

حالياً ارشح الاف 150 الجديد

مواصفاته ممتازة وموتر عملي جداً

عندي رابتر و اف 150 غمارة .. من اروع البياكم اللي جربتها

والرام بعد موتر جبار بمكينته الهيمي ولكن انا اميل للفورد اكثر

[abu m7md]

اخوي انا ماقريت ردود الاعضاء لاني عجل
ولكن انصحك بموتر غير الفورد او الدوج رام
يا تندرا او جمس
لاتعور راسك

ولاتنسى تسوي عشى حق الموتر الجديد وتعزمني بروحي :)


تقبل مروري اخوك
ابومحمد