وش سالفة عمال وقود والطراره ...

[Nojoom]

السلام عليكم

صار لي اكثر من موقف مع عمال وقود وفي محطات مختلفه ..

وكلها تحت عنوان الطراره وعلى عجاله بذكر موقفين

الموقف الاول كنت رايح اغسل سيارتي ولما كنت احاسب العامل قبل الغسيل طبعا قالي "عيد مبارك شيخ " واحنا مو بوقت عيد ولا شي ،، يعني طراره سفهت له طبعا ولا عطيته

واليوم في محطة بترول الشحانية "سرده " شريت لي أغراض بقيمة 47 ريال وأعطيته خمسين ريال
وانا انتظر الا يقولي أوكيه شيخ ،،، قلت له نوو نت أوكيه ،، وخليته يرجع المبلغ ،

والكثير من الأصدقاء يذكرون لي موقف حتى وصلت لبعض الأحيان الى السرقه وتغافل الزبون


وين إدارة وقود من مثل هالعمال وليش ماتضع لهم قوانين صارت من بعد ماتحذرهم

الصراحه انا كنت اعتقد الفلبينين راقين ولكن ثبت لي العكس

او ان طبع بعض الزبائن خربهم

[بانغ بانغ]

يعطيك العافية اخوي

لو تعطيه كم ريال يمكن ايكون لك شفيع في يوم من الايام

ما يمنع مع ان اسلوبهم صراحة اتفق فيه معك ...

[qatara]

تفكيرهم عنا بالي يشوفونه من تصرفاتنا

ناس عندها فلوس ولا تعرف قيمتها تحذف يمين ويسار هههههه

شنطه بستين الف تبديل سيارات فسقه من غير ضروره وحاجه

ووووو ولو اعد الفلسفه الزايده فينا عجزت ما خلصت

وذولي جايين من بلدان يمكن حتا مايشوفون فيها السياره والفلوس

ياويلنا من الله الي حل غضبه وحرمنا هذه النعم

كلهم مستغلين الفرصه واللعب علينا قطري شيخ

عمال المحطات وغيرهم والحقيقه العيب منا

الصدقه شي تمنحه من نفسك وليس البخشيش

فالصدقه اغثت بها انسان وضل اجرها لك

والبخشيش خسرت مالك ووفوقها اثمه عليك

[بصمة قطرية]

ذكرتني بموقف صار لي من فترة شهر أو أقل ..
مب في وقود في سوق الذهب ..
نزلت محل على السريع ولدي ينتظرني في السيارة قريب
ما حصل موقف ..
أول ما طلعت إلا أشوف هندي يكلم ولدي ..
قلت له شالسالفة اش يبي يقول فر مخي يمه ..
كان يتكلم إنجليزي ..
قال لي أنا جاي قطر من فترة بسيطة و كنت أدور شغل
قلت له اوكي لقيت شغل ..!
و لا تبي تشتغل ..
قال حصلت شغل و بداوم بعد اسبوع
قلت له أوكي اش تبي الحين ..
قام يصيح و يقول ما عندي فلوس لإيجار الغرفة المشتركة
و ما عندي فلوس للأكل ..
عطته المقسوم عساه في ثواب موتانا و موتى المسلمين
ما شكرني قال لي أبي بعد زيادة ..
طبعاً الدموع اختفت في ثواني ..
أبي أكمل الأجار ..
استغربت منه قلت له ما عندي ..
قال قطرية أكيد عندج ..!!
نرفزني قلت به شرايك أعطيك الشنطة و تشوف ..
قلت لولدي ارفع الدريشة و حرك ..
الا يقول لولدي انت عطني ..
ولدي قال له أنا طالب ما اشتغل
اش فيك انت خلاص روح ..

قهرني بصراحة برده ..
يعني صرنا بنوك متحركة ..!!
ومرة لبنانية في صالون تبي تنصب علي بالسعر
قلت لها شوفي الأسعار أعرفها قبل لا أجيج
و لا تفتكرين كل قطرية بتقط فلوسها بدون لا تحاسب ..
قالت انتو عندكم فلوس قلت لها والله فلوسج اكثر ..

[نمر بن عدوان]

عط ياخوي اذا تقدر هذيلا مساكين عمال المحطات والحماليه وعمال النظافه ولك الاجر ان شالله الخمس والعشر ماتضرنا وتنفعهم .

[المحاميه]

استغفر الله العلي العظيم

[بوخالد911]

عن نفسي أرفض هالاسلوب
والله المستعان.

[مشاكل]

قال تعالى ( وأما السائل فلاتنهر )

وقال سبحانه وتعالى ( ولاتبطلوا صدقاتكم بالمن والاذى )

بعض الناس ممكن يدخل كوفي شوب ويشرب قهوة مع قطعة بسكوت وغرشة ماي ب 100 ريال ويستخسر 10 ريالات على هالفقير المسكين اللي راتبه مايتعدى الف ريال ويصرفها على نفسه وهله وطوايفه

اللي بيعطي اجره على الله واللي مايبي يعطي لايعطي وماله داعي يحرض الناس عليهم

[khalid525]

طالما الواحد يعطيهم برضاه ما اشوف فيها شي ، خصوصا في هالوظايف اللي الموظف او العامل ما يقدر يستغل الوظيفة لمصلحته الخاصة
عطها بنية الصدقة ولا تحرمون المساكين اللي يشتغلون في عز القيظ والبرد عشان كم ريال اخر الشهر

[qatara]

عطو أي شخص مش لانه ادى خدمه لا

الي بيعطي يعطي لوجه الله مش لانه ادى خدمه

[Al-Kuwari]

طالما الواحد يعطيهم برضاه ما اشوف فيها شي ، خصوصا في هالوظايف اللي الموظف او العامل ما يقدر يستغل الوظيفة لمصلحته الخاصة
عطها بنية الصدقة ولا تحرمون المساكين اللي يشتغلون في عز القيظ والبرد عشان كم ريال اخر الشهر
+1

........

[<اضرب واشرد>]

رد ع الموضوع كتب بالخطأ بموضوع ثاني


ريال ريالين ماراح تغير في ميزانيتنا
صحيح طريقة الطلب مستفزه
بس الحمد لله رب العالمين احنا ف خير ونعمه
واللي يبي يعطي او لا هذا امر شخصي
بس عن نفسي افضل اكثر اعطي المسلمين بصراحه والشياب
لان مادري هالمسيحي اعطيه اخرتها يجمعها حق سواد ويه فالويكند

[abu m7md]

لله الحمد انا دايما ازيد في الجرعه ريال او ريالين يا اعطي او اتركها اذا كانت خردة
ولكن مع النية بالاجر والثواب لموتنا وموتى المسلمين.
ولا تحقرن من المعروف شيئا
والواحد مايدري باي عمل يقبل .
بعض الطرارين ليس بعفيف متعفف
وبعضهم مايسحتي وجهه قوي
وبعضهم ياخذك بالشفقه والرحمه

اختلف الاسلوب ولكن لاتنسى تحويل الانفاق الى اجر وثواب لك ولغيرك .


أكثر من واحد يجني ينرفزني لكن اتبسم في ويهه ولا ارفع صوتي عليه
حتى اذكر مره واحد في مكه مسك ايدي وحاول انه يجبرني اني اسمع ظرفه وحالته
خليته لين ماخلص ودعيت له ومشيت .

في سورة الضحى يامرنا الله سبحانه وتعالى عدم النهر عليهم وبان نذكرهم بانعم الله .

اخوي نجوم تقبل مروري
اخوك
ابومحمد

[العفراء]

هو صح الاسلووب غلط بس من اكثر المساكين هالفئة من العمال رواتبهم عندنا ع ثمانميه و ما سووا هالحركات الا لانهم يعرفون طيبتكم

[راعي ال VXR]

ما ارده حتى لو عطاني نغزات صباح الخير او عيدكم مبارك واعطي بنية الصدقه وهي رد البلاء حتى لو بخمس ولا عشر
تذكروو كم في نعمه نحن الله يديم علينا وبعدين هم ما يقولون الا لأصحاب المواتر الفخمه معروفه اشكالهم ما يقولون اللي عندهم كرولا
وما يحتاج نشر موضوع في ذلك منعت نفسك من الخير وقاعد تحرض الاخرين بمنع الصدقات

قوله تعالى واما السائل فلا تنهر صدق الله العظيم

[حرف]

ما يحتاج تنزلون موضوع بهذا الخصوص
الي يبي يدفع بنيه الصدقه والاجر يدفع والي مايبي لايدفع بس يسكت

[abu m7md]

ما يحتاج تنزلون موضوع بهذا الخصوص
الي يبي يدفع بنيه الصدقه والاجر يدفع والي مايبي لايدفع بس يسكت

بالعكس اخوي حرف
انا استفدت من تصرفات بعض الاعضاء
وهم اكيد بيستفيدون ونصحح بعض

[Riku3]

ياخوي مساكين على الاقل تحصله يقولك السلام عليكم ويبتسم في وجهك ويهتم فيك يخلصك بسرعه وكانوا قبل يغسلون الجامه بس ما ادري ليش وقفوا .. احسن من جنسيات ثانية اسيوية اعوذ بالله حتى لو انت قلت السلام عليكم ما يرد السلام قاصد .. اما الفلبينيين في العادة حتى لو مسيحي تحصله متسامح ويرد السلام لك ومرات يبدء به .. وانا ملاحظ كل الي في محطات بترول وقود من اي جنسية كانوا تلاقيهم مبتسمين ..

اذا الحساب وصل 116 عطه 120 وتوكل ما بيضرك شي .. ولو ما تبي تعطيه لا تعطيه ما بيهاوشك ..

بس معاك حق لو لاحظت انه ما يبي يرد الباقي او يستهبل هنا خذ فلوسك وتوكل ... افضل حل ان تنتظر لين يطلع الباقي ويمد يده عقب انت لك القرار .

[راعي الكورفت]

انا اعطيهم دايما بخشيش من دون ما يطلبون مني.



يعني يصب الموتر ب85 واعطيه 100 واقوله اخذ الباقي لك.


ويرد علي جزاك الله خير



ومرات بعضهم مايعرفون عربي !! يقولي thank you






شكلي انا عودتهم على البخشيش :con2:

[أم محمد 90]

انا اعاني من نفس الوضع ولكن مش مع عمال وقود .

في شخص يبيع جريدة رياضيه ، او مجلة بالاحرى .
المهم يكسر خاطري يطق الدرايش محد يعطيه ويه ف اروح اشتري منه الا (ريالين) .
المهم كذا مره امر عند الدكان ويجيني واشتري المهم اخر الايام صرت امر ع الدكان شبه يوميا . ف صار يشوفني ويخلي الكل ويجيني . واحيانا ينشب بطريقة مستفزه يعني يطق الدريشه ااشر اني مابي ويتم عند السياره مايمشي.
ف مابي احرجه احسه مسكين ماعرف >.<

[بنت شرق]

عادي عطه في ثواب والديك ،يمكن اهو تعود الي يلبس ثوب يده كريمه

[qatara]

ما ارده حتى لو عطاني نغزات صباح الخير او عيدكم مبارك واعطي بنية الصدقه وهي رد البلاء حتى لو بخمس ولا عشر
تذكروو كم في نعمه نحن الله يديم علينا وبعدين هم ما يقولون الا لأصحاب المواتر الفخمه معروفه اشكالهم ما يقولون اللي عندهم كرولا
وما يحتاج نشر موضوع في ذلك منعت نفسك من الخير وقاعد تحرض الاخرين بمنع الصدقات

قوله تعالى واما السائل فلا تنهر صدق الله العظيم

بعضنا يعطي بنية الصدقه ياخوي بس هم ياخذونها بنية البخشيش وبعد ذالك لايخدم من بعدك الا بهذا البخشيش لا يعي انها صدقه

ولوجه الله يعي انها لانجازه العمل مع العلم انه عمله ياخذ عليه راتب ليش يا خذ البخشيش بتقولي انت على نياتك صحيح

لاكن هو بياخذها بفكره لن يودي عمله صحيح الا اذا خذ هذه الصدقه البخشيش ويعطل غيرك من بعدك

ان لم يجد وبكره بيجي غيره من العماله وبيعطلك او بيشتغل لك أي كلام وهذا المرض ليس بوقود

فقط فهو منتشر بكل مكان الصباغ السمكري المكانينكي لدرجه هو يقولك بوجه قوي

مفيش اكراميه ولا كاش مفيش بخشيش ولا اذا الشغل تمام في بخشيش بعدين

يعني ان قلت له لا حقك بتاخذه كامل بيسوي لك شغل سلطه وخاصه

البنغال وبعض العرب فالحرام شلون يدخل من باب مشي مشي

شوي وتلقنا كلنا نتعامل بالكراميه والبخشيش باسم الهديه

ولا ودي اذكرانا اساله كانه مسلم اعطيه

واقوله ذي صدقه مافي بخيشيش والله يشهد

اجبرني الموضوع ذكر هذا

و هذه هي الدائره والعيب منا

في لقطة فيديو واحد معطي هندوسي كتاب دعوه للاسلام

المهم الهندوسي جلس يشوف لكتاب ونسا

الهوز وزاد البترول وصب قليل منه برع السياره

شوي ونزله وهاوشه وحكه بالكلام الين كرره نفسه

لما مشا من عنده من القهر الهندوسي خذ الكتاب

وحذفه ليش ما تكون معاملتنا هي الصدقه ؟

[رجل الجزيرة]

طالما الواحد يعطيهم برضاه ما اشوف فيها شي ، خصوصا في هالوظايف اللي الموظف او العامل ما يقدر يستغل الوظيفة لمصلحته الخاصة
عطها بنية الصدقة ولا تحرمون المساكين اللي يشتغلون في عز القيظ والبرد عشان كم ريال اخر الشهر

كلامك صحيح بس يجي واحد ويسبتعط علي ويكون دفعة بلاء فهذا عندي مرفوض، فدفعة بلاء بنفس راضية فهذا هو الصحيح.

[kuwari]

الصدقات تدفع عن طريق الجمعيات الخيريه افضل واذا انك تبي تعطي عامل تاكد هو مسلم او كافر

[حبر وقرطاس]

انت انسان مقتدر ومايضرك لو خليته ياخذ ريالين والا ثلاثه احتسب الاجر.. الرسول عليه الصلاه والسلام قال اتقوا النار ولو بشق تمره

[fahed]

نعرف انه ( و أما السائل فلا تنهر ) و ما أعتقد انه فيه مواطن قطري ماله نصيب من الصدقة. لكن الاسلوب اللي قاعد يطرون فيه يعتبر استغفال للناس. أنا و كثير غيري ما عندنا مشكله لو تصدقنا بمبالغ كبيرة لكن انه أحد يستغفلني بريال فلا و ألف لا. لما اشتري كم شغله من الجمعيه ويجي الهندي يبي يوصلهم لي للسيارة فأنا ما أمنعه, مع انهم كيسين بس و ماني متعاجز انا أشيلهم, لكن أخليه يوصلهم و أعطيه المقسوم حفاظاً لماء وجهه. لكن اني احاسب و ما يردلي الباقي بحجة انه ريال أو ريالين يعتبر استغفال. والناس يختلفون وكل له وجهة نظر نحترمها....

[كاشف الغطاء]

نعرف انه ( و أما السائل فلا تنهر ) و ما أعتقد انه فيه مواطن قطري ماله نصيب من الصدقة. لكن الاسلوب اللي قاعد يطرون فيه يعتبر استغفال للناس. أنا و كثير غيري ما عندنا مشكله لو تصدقنا بمبالغ كبيرة لكن انه أحد يستغفلني بريال فلا و ألف لا. لما اشتري كم شغله من الجمعيه ويجي الهندي يبي يوصلهم لي للسيارة فأنا ما أمنعه, مع انهم كيسين بس و ماني متعاجز انا أشيلهم, لكن أخليه يوصلهم و أعطيه المقسوم حفاظاً لماء وجهه. لكن اني احاسب و ما يردلي الباقي بحجة انه ريال أو ريالين يعتبر استغفال. والناس يختلفون وكل له وجهة نظر نحترمها....

اتفق معاك وبعدين بيتحول البقشيش مع الوقت إلى رشوة ماراح يخدمك إلا إذا حصل منك مثل بعض الدول اللي استشرى فيها هذا المرض

[نمر بن عدوان]

هههههههههههه يعني مثلا ماراح يصب لي بترول الا ادفع له البخشيش قبل :rolleyes2:

[مختلفة عقليا]

السلام عليكم

انا اعطى من طيب خاطر ايه ., اتيي اتسوي حركات لا اسمحلي .,

اذا حاول السرقة او النصب ممكن تتصل في الكول سنتر وبتاخذ حقكك .,

بس لو الكل يسكت وراضي ., عادي عندهم بيصيرون جيه واكثر .,

ويسلموو

[Riku3]

انا اعاني من نفس الوضع ولكن مش مع عمال وقود .

في شخص يبيع جريدة رياضيه ، او مجلة بالاحرى .
المهم يكسر خاطري يطق الدرايش محد يعطيه ويه ف اروح اشتري منه الا (ريالين) .
المهم كذا مره امر عند الدكان ويجيني واشتري المهم اخر الايام صرت امر ع الدكان شبه يوميا . ف صار يشوفني ويخلي الكل ويجيني . واحيانا ينشب بطريقة مستفزه يعني يطق الدريشه ااشر اني مابي ويتم عند السياره مايمشي.
ف مابي احرجه احسه مسكين ماعرف >.<
صارلي من شهر كنت واقف على الاشارة ماسك الجوال الا يضرب على القزاز صرقعني .. الا يقولي الجو وايد حار ، باقي 10 جرايد بس ما تبي تشتريها كلها ؟؟

مسكت نفسي بصعوبه ما عصبت وقفلت الدريشه :weeping: .