شنو اهم من ولدج/ك؟ [الأرشيف] - منتديات شبكة الأسهم القطرية

مشاهدة النسخة كاملة : شنو اهم من ولدج/ك؟

غريب الدّار

01-12-2015, 08:56 AM

صبحكم الله بالخير

حد فيكم خطر على باله هالسؤال :
شنو اهم من ولدك او ولدج؟

واللي خطر في باله ، او اللي سأل نفسه هالسؤال الحين ياترى شنو جاوب؟

اكاد اجزم ان الكل تقريبا قال مافي شي اهم من ولدي

حلو

انا ليش بديت هالبداية ؟

أقول لكم ليش :)

والله استغرب لما اروح مجمع مثلا واشوف ام تمشي ووراها خدامة شايلة ولدها!!!
او ماسكة عيالها وراها !!!

التسوق صار اهم من الولد؟

(وطبعا مابي ادخل في سالفة ان الخدامة حرمة مثلج ومب معضلة علشان تقطين عليها شيل الولد طول الوقت) لان هذا مب موضوعي

لكن استغرب من الأمهات هاذول والله !!!!

واللي تسافر وتقط عيالها بيت أمها !!! الحين السفر صار اهم من عيالج؟
واللي تطلع تروح مطعم مثلا مع خواتها او صديقاتها او حتى ريلها وتخلي عيالها في البيت !! الحين الطلعة صارت اهم من العيال ؟

واللي تكون قاعدة تطالع التفزيون مثلا وأول ماتسمع الولد يصيح نادت الخدامة !!! ؟؟؟؟؟؟؟؟؟؟؟ التلفزيون صار اهم من ولدج ؟

والأدهى والأمر :
اللي اتداوم وتطلع وعيالها رقود!!! لانها قاطة كل شي على الخدامة !!

الحين الشغل صار اهم من عيالج؟؟ !!! مب قادرة تقعدين الصبح توقظين العيال وتشوفينهم وتجابلينهم قبل ماتروحين الدوام ؟

اللي تسوي أي فعل من الأفعال المذكورة أعلاه :
والله اني اشوف ان في أشياء وايد في حياتها اغلى من عيالها ، اغلى من ضناها !!!

وعلى الجانب الآخر :
انت ياللي امطيح في الميلس وماتفارقه
ماعندك وقت تودي ولدك العاب مثلا؟
ماعندك وقت اتوديه يشتري له شغلة ?
يمكن تقول لا خله يتعلم ويعتمد على نفسه
طيب يعتمد على نفسه من أي سن ؟ خمس سنين ؟
علمه انت خله يعتمد على نفسه
الدريول موجود وتدفع له راتب ماقلنا شي
بس ياخي الدريول خله للضرورة
مب شايل البيت وولدك عنك!!!!

ان كلموك في البيت وانت قاعد في ميلس او ماعندك شغل ضروري ياخي ارجع وقوم في بيتك
مافيها شي

هل عندك اغلى منهم؟ هل عندك اغلى من ولدك ؟

طبعا الكلام اللي ذكرته أعلاه كله فوق يمكن يكون مثالي في نظر البعض
وغير مطبق للأسف من اغلب الناس
لكني اعتقد ان هذا اللي لازم يصير

الأبناء والاسرة هم نواة المجتمع
وبناءهم هو بناء للمجتمع

اعتبروها ملاحظات :)
اعتبروها نصايح :nice:
اعتبروها أحلام :(

والله يصلح الحال

تحياتي للجميع

بانغ بانغ

01-12-2015, 09:29 AM

صادق والله

لا وازيدك اني شفت ناس ايخلون البيبيات او اعيالهم في السيارة في الشمس والحبيبة او الحبيب يتسوقون والصغار مع الخدامة وفاتحين الدرايش

موضوع حساس

بانغ بانغ

01-12-2015, 09:30 AM

واتوقع ان الفراغ الاجتماعي له دور كبير

سواء الدوام الطويل او الانشغال بالتكنولوجيا والبرامج الخاصة بالموبايلات ووووووو لهم دور كبير

مرتبش

01-12-2015, 09:35 AM

العملة النادرة

01-12-2015, 10:42 AM

qrt_trading

01-12-2015, 11:27 AM

مش معناة إني لما أطلع من البيت أروح أتسوق وأخلي عيالي في البيت إني اكرهم ومش معنى إني مخصصه يوم لنفسي مع زوجي نطلع نتغدى ولا نتعشى إني أكرهم ومش معنى إني أسافر وأهدهم في ديرتهم وسط أهلهم إني أكرهم ومش معنى إني أروح الشغل وأداوم إني أكرهم.

لما أطلع من البيت علشان أتشرى أغراض ترى أغلب الوقت تقريباً 95% طلعاتي لهم والأغراض إلي أجيبها لهم ولما أطلع أحاول بقدر الإمكان إني أرجع البيت 6 أو 6:30 بالكثير علشان أكون معاهم حزة العشى والرقاد وأنا ما أطلع إلا مغذيتهم ومدرستهم وقاعدة معاهم أشوي.

وبالنسبة للطلعة والغدا أو العشى برع البيت كلها يوم في الأسبوع هاليوم لي ولنفسي مالي حق يعني مش معناة إني جبت عيال إني أدفن نفسي بالحيا.

أما بالنسبة للسفر كاني إذا الله أراد بعد كم يوم راح أسافر مع زوجي وعيالي في بيتهم وخالتهم راح أتكون معاهم وتبات عندهم وعماتهم ما راح يقصرون، كل سفراتي معاهم وثلاث أرباع طلعاتي معاهم وبعد 9 سنين أخيراً راح أسافر وأتفسح مع زوجي بدون عيالنا هل هذا حرام ولا مالنا حق في هالشي كونا صرنا أمهات وبالنسبة للعيال في إجازتهم إذا الله أراد لهم سفره.

أما بالنسبة للشغل الحمد لله ما أعتقد في أم في الدنيا تطلع وتروح شغلها قبل ما تتأكد إن عيالها قاموا وافطروا ولبسوا وراحوا لمدارسهم هذي إذا مش هي إلي اتوصلهم لمدارسهم مثلي، أما بالنسبة للرضع الأم إللي تطلع وتخليهم رقود وما تقومهم أو تسجلهم في حضانة يمكن ما تقدر وحالتها المادية ما تسمح إنها اتسجلهم فيها أو إنها تتأخر عن دوامها ويخصمون من راتبها بس علشان تنطر الياهل يقوم من نومة وتأكله وتسبحه ، ياخوي غريب الدار هل إنت راح تعطيها راتبها كامل مكمل إذا قعدت وجابلت الياهل، ولا الدولة راح إتمشي لها راتب في حالة طلعت من الشغل إذا الوحدة ما وصلت للسن القانوني و كملت سنوات خدمتها مالها راتب يعني يرضيك تموت هي وعيالها من الجوع بس علشان تقعد معاهم.

إرحموا من في الأرض يرحمكم من في السماء، كل اشوي مطلعين لنا موضوع عن الأمهات والعيال وإنهم مقصرين في حق عيالهم والله حرام عليكم، صرنا ننقث من كثر ما نشوف هالمواضيع ترى إحنا بشر بعد مش ملايكة منزلين من السماء.

وأسفة على الإطالة بس من حرة قلبي والله.

abu m7md

01-12-2015, 11:45 AM

وجهة نظر واحده

نمر بن عدوان

01-12-2015, 12:01 PM

فعلا الاب والام في هالزمن غير عن ابهات وامهات لول الانانيه وحب الذات طغت حتى على عيالهم

بصمة قطرية

02-12-2015, 12:41 AM

لا يا غريب ..
بالغت وايد ..!!!
أنا مش موظفة و عيالي كبار أصغرهم عمره تسع سنين ..
الحمدلله قمت بواجباتي كأم من ناحية عيالي
و إذا في يوم طلعت معناته إني أم مقصرة ..!!
و إذا الخدامة طلعت معاي و مسكت البيبي يعني أنا مهملة ..!!
أسافر مرات من غير عيالي يكونون في بيت إختي و لا بيت أخوي
هل هذا يعني إهمال و عدم إهتمام و أنانية مني ..!!
أعترض مرة ثانية على اللي ذكرته يا غريب
ما أعتقد في أن قلبها قاسي على عيالها
إذا في فهم فئة قليلة جداً
ما نفدر نقول إن غالبية النساء جذي ..!!

نوفا91

02-12-2015, 01:07 AM

عيل باخذ بنتي الجامعه عشان ما أكون مقصره ، أعذرني يالدرهم :(

مختلفة عقليا

02-12-2015, 07:06 AM

السلام عليكم

مافيها شي دام الام موجوده او الجده فالخدامة بس للشيل والحط والخدمه .,

قدام اعيوني واشوف كل شي .,

شوف اخوي ., واقعيا احنا قساه اتجاه بعض التهم والانقادات .,

يعني الام يوم اتسوق لمن ياحظي !! لزوجها واعيالها ولنفسها عشان زوجها

مافي حل ثاني اتسويه ., اشلون اتسوق ومعاها ياهل ,. جرب روح السوق مع اعيال بتين والله

جرب اتسافر مع اعيالك خصوصا اطفال سنداااااره ., وحتي في النفس ., الام محتاجه اتسافر واتروح اتغيير جو مع حبيبها .,

ف احسن حل انها تاخذ العيال عند امها او ام ريلها مع الخدامه لان كبار العمر مو خدم هم بس مراقبين ومشكورين ما قصروا امسكوا العيال .,

اذا عندك حل اسدحه ., بس مو تنتقدهم وجنهم ارتكبوا جريمه بحق الابناء .,

ويسلموو

غريب الدّار

02-12-2015, 07:37 AM

صادق والله

لا وازيدك اني شفت ناس ايخلون البيبيات او اعيالهم في السيارة في الشمس والحبيبة او الحبيب يتسوقون والصغار مع الخدامة وفاتحين الدرايش

موضوع حساس
بل!!
هاذي اول مرة اسمع بها
وسواء اللي يسوي هالحركة اب او ام
الحركة اعتبرها جريمة

واتوقع ان الفراغ الاجتماعي له دور كبير

سواء الدوام الطويل او الانشغال بالتكنولوجيا والبرامج الخاصة بالموبايلات ووووووو لهم دور كبير
اللي انت تذكره اخوي بانغ هو الإهمال
وهو قريب جدا من الموضوع
مسالة الدوام الطويل احب اسال فيها :
من اهم الدوام الطويل ولا العيال ؟
المرأة أولى لها اتجابل بيتها او دوامها؟

وسؤالي مايعتبر تقرير
يظل تساؤل
تساؤل عادي وليس استنكاري

غريب الدّار

02-12-2015, 07:39 AM

عاد توني شايف فيديو لخدامة تعذب رضيع يمكن بو 3 شهور.. تضربه وترفعه وتحذفه ياخي شنو هذا.
المهم
المنظر محزن لما الاسرة وغالبا بدون رجل يتمشون في المول والطفل او الاطفال حاملينهم الخدم وراهم بملابس مزرية ..افكر واقول وين احنا عايشين في اي كوكب

والله يامرتبش توني من شوي شفته وماكملته
لاني قفّلت !!! مااحب اشوف هالمقاطع لانها تستفزني الى ابعد حد

والاهمال للأسف واضح بشكل كبير

وهاذي مسؤولية الأسرة

الخدامة لما تنكرف طول اليوم وعقب يقطون عليها الياهل ويروحون
وش تتوقعون ردة فعلها؟ بتحضنه وبتصيح عليه ؟

وحياك الله يامرتبش

غريب الدّار

02-12-2015, 07:46 AM

وايد بالغت يالشيخ
الحياه اسهل
يعني اذا مره في السنه بسافر وبخلي عيالي عند امي وين المشكله
اذا بطلع مره في الاسبوع مع زوجي وبخلي العيال في البيت مع الخدامه ما اشوف فيها شي
اذا ما بتحرك ولا بيي ولا بروح عشان العيال العيال ماراح يكبرون في شهر وشهرين لي عمرهم عشرين واحنا نلاحق وراهم وما نلحق ... مادري صعب حياتي اخليها بس عشان العيال انا بعد لي وجود وزوجي يبي اهتمام ولازم اشتغل ...
انا اشوف الخدامه والدريول عامل مساعد مهم في الحياه اضف لذلك المدرس الخصوصي في بعض الاحيان ...
وشكرا
يامرحبا اختي العملة النادرة

اول شي مسالة اني بالغت هاذي نظرتج وانا احترمها (يمكن انتي تكونين صح)

ثاني شي : شوفي اختي
اللي اشوفه ان العيال هم اهم شي في الوجود والله ( سواء بالنسبة للأم أو الأب)
يعني الأولوية دوم لهم
وانا متأكد اني لو سالتج : لو مافي اكل في البيت الا شوي وانتوا كلكم يواعة
بتاكلين من اول شي ؟ أتوقع بتقولين العيال
حتى لو انتي تجوعين بس اهم شي هم
هذا اللي قصدته بان لهم الأولوية في كل شي
طبعا عسى الله يرزقكم ويبارك لكم وماتجوعون في يوم

ثالث شي اختي :
شوفي أقول لج شغلة
بشكل عام : طول ماان الاسرة متابعة وشايفة العيال وشايفتهم وين وعارفة أوضاعهم ومتطمنة ان أوضاعهم في السليم
يمكن كلامج يكون صحيح بس مب كقاعدة عامة
فقط في حالة التأكد من حال العيال وانهم بخير
وبعدين اختي بعد اذنج لي تعليق على جملتج هاذي دام انج ذكرتيها :
( صعب حياتي اخليها بس عشان العيال )
طيب اتخلينها علشان من ؟
ماقلت ان الواحد او الوحدة يحبسون اعمارهمف ي البيت ويجابلون عيالهم 24 ساعة
بس القصد كان المتابعة الدائمة والمستمرة

بالنسبة لهالجملة :
انا اشوف الخدامه والدريول عامل مساعد مهم في الحياه اضف لذلك المدرس الخصوصي في بعض الاحيان

قد اتفق معاج فيها اختي لعوامل كثيرة

ويامرحبا بج الشيخة والله يخلي لج عيالج ويبلغج فيهم

بومتعب

02-12-2015, 07:49 AM

احييك على هذا الموضوع ..... للاخوات اللاتي تركن اطفالهن للخادمة .... وكرسوا اوقاتهم للعمل او غيره ......

اتمنى التأمل في صور هذه النائبة بالاتحاد الاوروبي والتي رفضت ان تترك ابنتها في حضانة اثناء انشغالها عنها بجلسات البرلمان واصرت على جلبها معها منذ بداية عمرها الى أن كبرت

http://i4.mirror.co.uk/incoming/article687388.ece/ALTERNATES/s1227b/Licia%20Ronzulli%20takes%20part%20with%20her%20bab y%20in%20a%20voting%20session%20at%20the%20Europea n%20Parliament%20in%20Strasbourg

http://i.dailymail.co.uk/i/pix/2012/02/16/article-0-11BFDA78000005DC-262_634x444.jpg

http://english.ahram.org.eg/Media/News/2012/11/21/2012-634891167946214018-621.jpg

http://i.dailymail.co.uk/i/pix/2012/10/23/article-2222100-15A3D807000005DC-149_634x920.jpg

http://i.dailymail.co.uk/i/pix/2013/11/20/article-2510440-1982A6DE00000578-346_634x423.jpg

غريب الدّار

02-12-2015, 07:55 AM

مش معناة إني لما أطلع من البيت أروح أتسوق وأخلي عيالي في البيت إني اكرهم ومش معنى إني مخصصه يوم لنفسي مع زوجي نطلع نتغدى ولا نتعشى إني أكرهم ومش معنى إني أسافر وأهدهم في ديرتهم وسط أهلهم إني أكرهم ومش معنى إني أروح الشغل وأداوم إني أكرهم.
اختي اعتقد انج حدتي عن الموضوع شوي واسمحي لي على هالكلمة
لاني ماذكرت الكراهية أصلا !!!

لما أطلع من البيت علشان أتشرى أغراض ترى أغلب الوقت تقريباً 95% طلعاتي لهم والأغراض إلي أجيبها لهم ولما أطلع أحاول بقدر الإمكان إني أرجع البيت 6 أو 6:30 بالكثير علشان أكون معاهم حزة العشى والرقاد وأنا ما أطلع إلا مغذيتهم ومدرستهم وقاعدة معاهم أشوي.
قواج الله اختي والله يعينج ويعين الجميع يارب

وبالنسبة للطلعة والغدا أو العشى برع البيت كلها يوم في الأسبوع هاليوم لي ولنفسي مالي حق يعني مش معناة إني جبت عيال إني أدفن نفسي بالحيا.
اختي محد قال ادفني نفسج
أتمنى ترجعين للموضوع وبتعرفين قصدي
ماقلت لاي شخص سواء ام او اب ادفن نفسك او الغي وجودك

أما بالنسبة للسفر كاني إذا الله أراد بعد كم يوم راح أسافر مع زوجي وعيالي في بيتهم وخالتهم راح أتكون معاهم وتبات عندهم وعماتهم ما راح يقصرون، كل سفراتي معاهم وثلاث أرباع طلعاتي معاهم وبعد 9 سنين أخيراً راح أسافر وأتفسح مع زوجي بدون عيالنا هل هذا حرام ولا مالنا حق في هالشي كونا صرنا أمهات وبالنسبة للعيال في إجازتهم إذا الله أراد لهم سفره.
الله يحفظج ويحفظهم اختي
اذا كان الشخص متأكد ومتطمن ان عياله أوضاعهم سليمة فالله الحافظ
وان كان لي تحفظ على مسالة السفر بدون الأولاد الصغار بدون ضرورة
يعني اقول لج إياها كاش اختي :
سفر للسياحة
الواحد ليش يقط عياله ويروح ؟ مايبون يستأنسون ؟
لو سفر للضرورة بنقول اوكي
لكن سياحة وواحد قاط عياله
انا اشوفها صعبة اختي وهاذي نظرتي
ويمكن أكون غلطان فيها او نظرتي قاصرة
يمكن
ويمكن انتي صح مليون في المية بعد

أما بالنسبة للشغل الحمد لله ما أعتقد في أم في الدنيا تطلع وتروح شغلها قبل ما تتأكد إن عيالها قاموا وافطروا ولبسوا وراحوا لمدارسهم هذي إذا مش هي إلي اتوصلهم لمدارسهم مثلي، أما بالنسبة للرضع الأم إللي تطلع وتخليهم رقود وما تقومهم أو تسجلهم في حضانة يمكن ما تقدر وحالتها المادية ما تسمح إنها اتسجلهم فيها أو إنها تتأخر عن دوامها ويخصمون من راتبها بس علشان تنطر الياهل يقوم من نومة وتأكله وتسبحه ، ياخوي غريب الدار هل إنت راح تعطيها راتبها كامل مكمل إذا قعدت وجابلت الياهل، ولا الدولة راح إتمشي لها راتب في حالة طلعت من الشغل إذا الوحدة ما وصلت للسن القانوني و كملت سنوات خدمتها مالها راتب يعني يرضيك تموت هي وعيالها من الجوع بس علشان تقعد معاهم.
لا مايرضيني طبعا (والموضوع أصلا مب اذا يرضيني او مايرضيني)
اختي شوفي
انتي قاعدة تردين بكلام ماله علاقة في الموضوع
تدرين ليش؟ لانج تذكرين حالات استثنائية!! انا حددت كلامي بشكل واضح
ارجعي له الله يرحم والديج

إرحموا من في الأرض يرحمكم من في السماء، كل اشوي مطلعين لنا موضوع عن الأمهات والعيال وإنهم مقصرين في حق عيالهم والله حرام عليكم، صرنا ننقث من كثر ما نشوف هالمواضيع ترى إحنا بشر بعد مش ملايكة منزلين من السماء.
اختي شوفي

وأسفة على الإطالة بس من حرة قلبي والله.

طبعا ردي فوق بالازرق

ولي تعليق على هالجزئية :
إرحموا من في الأرض يرحمكم من في السماء، كل اشوي مطلعين لنا موضوع عن الأمهات والعيال وإنهم مقصرين في حق عيالهم والله حرام عليكم، صرنا ننقث من كثر ما نشوف هالمواضيع ترى إحنا بشر بعد مش ملايكة منزلين من السماء.
اختي شوفي

وأسفة على الإطالة بس من حرة قلبي والله

اختي الموضوع (لو ركزتي فيه ) مب عن الامهات فقط
انا تكلمت عن الام والأب بعد
يعني الاسرة

انتي اللي ركزتي ع الام !!! مب انا
من قال ان كل الأمهات مقصرات اختي؟
انا تكلمت عن واقع
صعب انكاره
وماقصدت فيه اني احر حد او اقهر حد

لا والله

واقع نعيشه وحبيت اسلط الضوء عليه
اذا انتي (او غيرج) شايفة انج قايمة بدورج فالله يوفقج ويهنيج ويبارك لج في عيالج
وكل انسان ادرى بظروفه وبمصلحته وبمصلحة عياله

وبالنسبة انج طولتي فاخذي راحتج اختي بالعكس على العين والراس
بس الموضوع مب موجه ضد أي احد
الموضوع يتكلم عن الام والأب
مب شرط كل الأمهات نفس الشي
ومب شرط كل الآباء نفس الشي

ومب شرط كلامي يكون كله صح او بعضه صح !! يمكن كلامي كله غلط او بعضه غلط

وجل من لايسهو
لكني تكلمت مثل ماقلت لج عن واقع شفته وأتمنى انه يتصلح للأفضل

وعسى الله يشافي بنتج ويعافيها ويقر عينج بها وتشوفينها عروس باذن الله

والله يوفق الجميع

غريب الدّار

02-12-2015, 08:00 AM

فعلا الاب والام في هالزمن غير عن ابهات وامهات لول الانانيه وحب الذات طغت حتى على عيالهم

يامرحبا والله اخوي نمر
التقصير موجود

وفي ناس مقصرين وفي ناس غير مقصرين

ويامرحبا بك

غريب الدّار

02-12-2015, 08:07 AM

لا يا غريب ..
بالغت وايد ..!!!
احترم نظرتج اختي الكريمة بصمة قطرية

أنا مش موظفة و عيالي كبار أصغرهم عمره تسع سنين ..
الحمدلله قمت بواجباتي كأم من ناحية عيالي
عسى الله يبارك فيهم واحد واحد وتعرسينهم كلهم في يوم واحد :nice:
و إذا في يوم طلعت معناته إني أم مقصرة ..!!
انا ماقلت هالكلام !!! اذا طلعتي مقصرة؟؟ ماقلت ولا قصدت هالشي يابصمة

و إذا الخدامة طلعت معاي و مسكت البيبي يعني أنا مهملة ..!!
اهنيه لي وقفة بعد اذنج اختي بصمة ، والسؤال مب لج لان خصوصياتج محد يقدر يتدخل فيها ، لكن باسالج بشكل عام :
اذا في ام يعني ماشاء الله بصحتها
وتقدر تشيل ياهل
ليش اتقطه عالخدامة ؟ من اللي المفروض يشيله أصلا ؟ مب امه ؟ الخدامة ادري يندفع لها راتب وبتسوي اللي مايتسوا لانها محتاجة مسكينة
لكن الام ليش ماتشيل؟ هذا اللي مب قادر افهمه !!!
وأقول لج الحق اكثر من مرة اشوف حريم مايرضون الخدامة تشيل عيالهم وهم اللي يشيلون
كل واحد وكيفه طبعا
بس السؤال : ليش؟

أسافر مرات من غير عيالي يكونون في بيت إختي و لا بيت أخوي
هل هذا يعني إهمال و عدم إهتمام و أنانية مني ..!!
أعترض مرة ثانية على اللي ذكرته يا غريب
ما أعتقد في أن قلبها قاسي على عيالها
إذا في فهم فئة قليلة جداً
ما نفدر نقول إن غالبية النساء جذي ..!!
اعترضي على كيفج واعتراضج على عيني وراسي اختي بصمة
وردي وضحته لج بالازرق

واشكرج على مداخلتج الكريمة
ويامرحبا بج ولا تحرميني تواجدج

غريب الدّار

02-12-2015, 08:09 AM

عيل باخذ بنتي الجامعه عشان ما أكون مقصره ، أعذرني يالدرهم :(

لا يانوفا
ماقلت هالكلام
ماقلت اخذوا بناتكم للجامعة
:)

بتضطرين اتخلينها علشان شي مهم انتي متطمنة انها في يد امينة

تطلعين وانتي متاكدة انها كلت او شربت او لبست او نامت
هذا موضوع ثاني اختي

ماتكلمت عنه
هل انا قلت ان الام لازم اتودي عيالها الدوام مثلا؟ ارجعي لموضوعي ولا عليج امر وقولي لي وين قلت هالكلام ؟

ويامرحبا بج
والله يوفقج ونشوفج في قائمة العميد او لستة العميد (قائمة الشرف)

نوفا91

02-12-2015, 08:18 AM

لا يانوفا
ماقلت هالكلام
ماقلت اخذوا بناتكم للجامعة
:)

بتضطرين اتخلينها علشان شي مهم انتي متطمنة انها في يد امينة

تطلعين وانتي متاكدة انها كلت او شربت او لبست او نامت
هذا موضوع ثاني اختي

ماتكلمت عنه
هل انا قلت ان الام لازم اتودي عيالها الدوام مثلا؟ ارجعي لموضوعي ولا عليج امر وقولي لي وين قلت هالكلام ؟

ويامرحبا بج
والله يوفقج ونشوفج في قائمة العميد او لستة العميد (قائمة الشرف)

هلا غريب ، أدري أنك ماقلت بس بالغت بكلامك مثل ماقالوا الاخوات اذا بسافر مره مرتين فالسنه لازم أخذها !
وبكل طلعة مثل سينما وتزعج العالم !!
، طلعات اليهال معروفه مجمعات عشان الألعاب .

وخير ان شاء الله قائمة العميد :)

بنت مريخ

02-12-2015, 08:21 AM

دامني مطمنه عليه ومخليته في يد امينه
مب غلط اسافر اغير جو وانا طول السنه ماقصرت في شي
ولا طلعه مع صديقاتي في الشهرمره ماظنتي تاثر وانا ملبيه جميع احتياجاته
الخميس يقعد معاي في البيت لان العرب كلهم يطلعون واتم امي بروحها مع الخدامات تكسر خاطري
مرات اطرشه الالعاب مع الخدامه

الحياة الخالدة

02-12-2015, 08:25 AM

هلا فيك أخوي غريب الدار

العيال نعمة من الله .. ما يعرف قيمتها إلا المحروم منها
طبعاً أتفق معاك في أن الكثير من الأمهات و الآباء ( على حد سواء ) بدال ما يخلون العيال أولوية .. حركوهم للمركز الثاني أو الثالث في الاهتمام

نسوا أن الواحد فيهم بس يتزوج و يكون أسرة .. تصير وظيفته الأولى ( من وجهة نظري الشخصية ) و استثماره في الأبناء أولاً و أخيراً
لكن تتداخل أمور أخرى ..
عشان الأم و الأب يوفرون لأبناءهم الحياة الكريمة و الرفاهية يسعون جاهدين لإتقان عملهم أو حتى البحث عن مصادر أخرى للكسب
و في خضم هذا البحث ينسون الأولوية شيئاً فشيئاً .. و قد يتحول البحث عن أساسيات العيش و الحياة .. إلى البحث عن كماليات يمكن الاستغناء عنها
و قد يتعدى الأمر إلى تحول الاهتمام من الأبناء إلى الاهتمام بالنفس و الشخصية و الكيان و ما إلى ذلك

الحياة لم تعد بالسهولة التي كانت عليها .. لا بد من موازنة .. ولا بد من تضحية
و يحتاج الأمر إلى ضبط الميزان بحرفية و مهارة .. حتى لا تخسر الأم أو الأب أبناءهم من حيث لا يشعرون

qrt_trading

02-12-2015, 09:53 AM

أدري أخوي إني ركزت على موضوع واحد في موضوعك وهي الأم لأني أم وما أقدر أتكلم عن الأب لأنه له وجهة نظر غير عن وجهة نظري أكيد وأدري إني بالغت بكلمة كراهية بس يمكن لأني جمعت في راسي عدة مواضيع ثانية تكلمت عن الأم وإهمالها، بس إنت لاحظ شي في ردود الأعضاء هم بس ركزوا على المقطع الأول إللي ينتقد الأم وتصرفاتها وما جاو صوب المقطع الثاني إللي ينتقد الأب وتصرفاته، أما بالنسبة لنقطة السفر أنا مش معاك فيها يعني إنت فكر فيها الأم طول الوقت مع عيالها ولعيالها فلما تفكر تسافر مع زوجها مره وحدة بعد سنين امقضيتها مع عيالها فهذي حق لها لأنها تبي اتجدد نشاطها وترجع لهم وتخدمهم من عيونها الثنتين، وبالنسبة لي من تزوجت من غير ما نذكر سفرة شهر العسل سافرت مرة من 9 سنين لتايلند وبعد 9 سنين حنيت للسفر واشتقت إني أسافر مع زوجي بنفسنا بدون مسؤولية ولما الوحدة أتكون كملت أكثر من 12 سنة زواج ولله الحمد وما تكون سافرت إلا مرتين فهذي مش كثير ولا يعتبر إهمال صح ولا أنا غلطانه.