هل تؤيد تحويل فاتورتك إلى هلا ؟؟؟؟

[saeed2005]

تابعت موضوع الأخ شالح بن هدلان " أوريدوا ودفع الشهري" ورأيت حجم الشكوى من فواتير أريدووا ولست استثناءا في ذلك فالحال واحد وقد فكرت مرارا في التحول إلى هلا لكني متردد أخاف يجي اتصال مهم ولا ألقى أعبي رصيد فهل توافق أو تعارض الانتقال إلى هلا وإغلاق باب التشكي من فواتير أوريدووو إلى الأبد فحبذا لو تكتب رأيك دون تعليل فالعلل معروفة ويراد من الموضوع أن تطلع أوريدووو على حجم المعاناة وحالة الرفض لعل وعسى يغيروا سياساتهم أو يشكل انتقال العملاء إلى هلا عامل ضغط لتحسين خدماتهم .

[ضوى]

حولته فترة هلا ماعجبني الوضع خاصة انه فاتورتي ماتتعدى 350 ريال ودايما اقل من جذي بس في فترات معينه تزيد

[monatee]

لا طبعاً ، كلش الموضوع مب عملي اذا ابغي اتكلم حالاً ومالاقي رصيد

او وقت المكالمه اقعد احاتي اشكثر باقي ع الرصيد

هالنقطتين سبب ان تلفوني فاتوره ومستحيل استخدم هلا

[A-Alansari]

بالنسبه لي مابي هلا مرتاح مع الفاتورة

لكن الي عنده مشاكل وحاب يحول هلا بعد سهله

وموضوع الرصيد سهل

عندك برنامج اوريدو تفتحه وتدخل على حسابك وتعبي تلفونك رصيد على طول مايحتاج تتحرك من مكانك

بس بالنسبه لي ما أيد اني استخدم هلا ولا احب اني احاتي وقت المكالمات لايخلص الرصيد

[ممنوع اللمس]

جوالي كان فاتوره وكل مره ادفع مبلغ وقدره
حولته هلا
كل اسبوع اعبي 60 ريال وارسل رساله ب 60 ل 121
يتم اسبوع كامل مفتوح مكالمات غير محدوده

ابرك لي من الفاتوره اللي كل شهر مادري كم الف

[فريج النجادة]

انا ما ارتحت الا يوم حولت فاتورت الى هلا

[hamoor4ever]

حولته وارتحت وعندك خدمه تدفع 4 ريال شهريا وتصير لك العشر دقايق المحليه لاي تلفون بقطر تطلع بريال يعني لو عندك رصيد ريال تقدر تتكلم عشر دقايق بترتاح .. واشتر بطاقات الانترنت وبتقدر تتحكم بمكالماتك وترتاح بدون مشاكل الفواتير ..
يمكن غيري مرتاح مع خط الفاتورة بس بالنسبه لي الهلا احسن واظمن

[غير عنهم]

هلا افضل وامن تعرف لي لك ولي عليك

[sara jsm]

افضل شي كروت هلا .. عالاقل عارف فلوسك وين تروح ومتى تخلص ..
وحتى بالسفر تسجل في جواز سفر اوريدو وامورك تمام ..
:
وسالفه التعبئة عن نفسي اعبي عن طريق المصرف ..
ولكن عندي احتياط كرت بو100 في البوك .. سبحان الله كنت في مكان مافيه نت ..

[Dana’1]

أنا أؤمن وأؤيد أن كل واحد لازم يعرف سره وإلي يرحه ويناسبه مع اوريدو وبالتالي يضبط أموره معهم أنا ماتم شي ماسويته
والفواتير كانت مشعلله غير الخطأ بالنظام عبى قولتهم ويزيد لك من نفسه عقب يعتذرون اذا صدتهم طبعا وواجهتهم ! جربت وجربت لين أخيرا قدرت أتحكم بشكل كبيير فيها ومع إن استخدامي هو نفسه قبل إلا إن الفاتوره ما تتعدى250-350واحيان كلش كلش 500 وهي نادر*وغالبا اكون عارفه السبب
وإن شاءالله ما أواجه أي مشكله بالمستقبل

[المبرمج صلاح]

انا عن نفسي الافضل لي
الشهري باقة 250 مكالمات طول الشهر مجانا لاي رقم داخل الدوحة لات تشيل هم رصيد ولا يحزنون ومستحيل اريدو يلعبو معي في الفواتير لان اعرف كل تفاصيل نظمهم وباقتهم وطرق حسابهم للفواتير

تبقى المشكلة عند بعض الناس انهم ممكن يستخدمون خدمة مع الشهري هي اللي تسبب لهم كارثة بدون ما يدرون وهنا تبدأ الشكاوي
واشهرها استخدام الانترنت على الجوال

غالبا الباقة تعطيك واحد جيجا فقط استخدام البعض ممكن يخلصها في 10 ايام او اقل والبعض تكفيه لاخر الشهر اذا كان يعتمد على الواي فاي في بيته

فهنا من لدية القدرة على التحكم في هذه الخدمات ويفهم لها مثل النت وجواز اريدو فمرحبا بالشهري فهو الافضل له

اما من يعاني مع هذه المشكلة هناك الحل ان يشحن كارت نت ب 100 ريال كل شهر اول ما يخلص يشحنه مرة اخرى ويفضل يكون بدايته مع تاريخ الفاتورة

اما اللي يحس نفسه انه بيكلم قليل او ممكن غير قادر التحكم بهذه الصورة في الخدمات فهنا الحل الاخير والافضل له هو هلا

بالتوفيق للجميع ان شاء الله

[بوخالد911]

مع الفاتورة وبقووووة

[نايم سهران]

يا اخوان الي يتكلم ويقول مرات ابغي اتكلم ضروري وما راح القى رصيد ،، ترى الحين حتى عن طريق حسابك في البنك تدخل الحساب وتحول رصيد دايما احول حتى لو اخر الليل سهالات ، احسن من ناس احد يبوق فلوسنا ومش عارفين واذا سألتهم يقولون لك استخدام زائد ، زادت بطونكم من حطب جهنم

[بصمة قطرية]

من شهرين حولته هلا
والسبب فواتير كيوتل المشكوك في أمرها ..!!
ما أستخدم الجوال وايد
و النت في البيت عندي واير لس
لين طلع برودباند و مرتاحة على باقة الـ 100
فاتورتي شهرياً ما تتعدا 160 ريال ..
فجأة تجيني قاتورة 800 ريال
أطلب تفاصيل الفاتورة يقولون إستخدام نت
ما عطوني تفاصيل ..
إنقهرت لأني سنين نفس الإستخدام
دفعت الفاتورة و حولته هلا نفس اليوم ..
صحيح للحين مش حابة فكرة التعبئة
لأني متعودة على الفاتورة
بس أبرك من إني أدفع فاتورة ما اعرف تفاصيلها ..
أعبي كل شهر رصيد و إنترنت و مرتاحة الحمدلله ..

[Most Wanted]

عن نفسي مع الفاتوره وعمري ما فكرت أغير الى هلا.
استغرب من بعض الردود اللي يقول مب عارف ليش فاتورتي مرتفعة ومبالغ خياليه ولا هو بعارف وين المشكلة. اوريدو ما قصرت تقدر تعرف كل تفاصيل فاتورتك عن طريق التطبيق او عن طريق موقعهم وين الاستهلاك زايد او سبب زايدة الفاتوره.
صارت لي كم مره مبالغ محسوبة غلط في الفاتوره وبكل سهوله مجرد بعثت لهم إيميل والغوا المبالغ المحسوبة من غير حق والعملية ما تأخذ اكثر من يومين وكل شي متعدل.
اذكر مره صار خطأ عندهم في السيستم لما جئت ادفع اونلاين فواتيري انخصم من الفيزا وماجاني مسج على التلفون ان الفاتوره اندفعت مع ان وصلني مسج من البنك ان المبلغ انخصم من الفيزا بعثت لهم إيميل وفي خلال يومين انحلت المشكلة وتم تصفير الفاتوره.

[ابوعلي]

اوريدوا ومانعرف ماذا يريدون

فعلا فواتيرهم تقصب الواحد

بالرغم اني حولت للخدمة الجديدة للنخبة والي بس تجي 365 ريال

ولكن للاسف صارت الفاتورة تجي امثر ولما راجعت يقولون انت مشترك في خدمة الترفيه وبالرغم اني سألتهم قبل وقالوا عندك خدمة الترفيه وكنسلوها فمن رجعها !!!!

وانا ولا لي في هالسوالف وجوالي محد يمسكه غيري

وبانتظر فاتورة هالشهر واذا نفس المشكلة الظاهر اني باريح بالي وباحول هلا

[رآعي موآجيب]

كنت في يوم من الايام انتقد اللي عنده خط هلا ودايما اقولهم انتوا ما تنزعجون من التعبئه كل شوي !!
مع العلم اني اصلا كنت مفروم فواتير ومزعوج حدي لأني ادفع شهريا مالا يقل عن 1500 ريال ، وسنين وانا على هالحال الين شهر 7 سنة 2010

تفاجأت بفاتوره فيها 3000 وخرده ، رحت لهم اكثر من 4 مرات وماخليت شي ماقلته في الآخير قالوا هذا استخدامك واقبض الباب الشرقي

قلت على خشمي ،، واسدد الفاتوره واحول رقمي هلا واعبي الخط بـ 1000 ريال فقط ، التعبئه الثانيه كانت شهر 9 !! في شهر 9 عبيت بـ 500 ريال كنوع من انواع التدقيق فقط وتميت استخدم الرصيد لين الثلث الأول من شهر 10 !!
طيب وقسط العراوي اللي كنتوا تسحبونه من ظهري كل شهر من كان المستفيد منه !!؟؟

المهم اني من شهر 7 / 2010 الى الآن وانا خطي هلا مع العلم ان خطي كان فاتوره من سنة 1998
واقنعت كل اخواني واهلي وربعي بالتحويل لخط هلا ، الحين اعبي رصيد كل شهر بـ 500 بالإضافه الى 100 نت فيها 6 جيجا تكفيني شهر وانا مبسوط
واذا سافرت سفره خفيفه جواز اوريدو بـ 100 ريال يوفي بالغرض ، واذا السفره طويله آخذ خط من البلد اللي انا فيها مع نت وكان الله غفور رحيم

ملاحظه مهمه

عمركم شفتوا اي تاجر في الدنيا يموت ويستقتل علشان يبيع الناس بالأجل ( بالدين ) !!؟
كل تاجر وكل شركه في الدنيا تفضل التعامل بالكاش وبعضهم يرفض الدين رفض تام وغير مقبول النقاش فيه

إلا اوريدو العزيزه

اعلانات ضخمه في كل مكان وعروض قويه وحصريه وتسهيلات مميزه فقط في سبيل الترويج للخطوط الشهريه !!

طيب ليييييش !!!!؟
خط الهلا ادفع لهم كل مستحقاتهم قبل لا استخدم أي شيء من خدماتهم وهم يحفزون ويشجعون على الخدمات آجلة الدفع !!

سبحااان الله ,, كرم عندهم كرم

[زايدي]

نعم أؤيد استخدام "هلا" وبكل قوة

فالحق مع أوريدو ضايع وشروط عقدهم كلها ضد المستخدم

[للصبر اخر]

انا فاتورتي كانت توصل 600 وانا ما استخدم التلفوووون ابد بس انترنت
ماحولته هلا
بس قطعت الانترنت
صارت توصل الفاتوره 50 ريال
للعلم عندي اشتراك شهري للانترنت ب 100

[عثرة جواد]

انا حولتة من كثر ماعورو راسي كانت الفواتير تجيني كل أسبوعين


وكل الفواتير غير صحيحة ...مافي احلا من هلا والفاتورة فودا

[مرتبش]

كيف اوريدو تغلط في حساب الفواتير وماتغلط في حساب الهلا؟
ما يصير

عموما شخصيا ماعندي اي اشكالية في فواتير اوريدو ولا افكر بالتغيير.. اختيار الباقة المناسبة لاستخدامك ومعرفة احتياجاتك قبل الاختيار اهم شي.. الكثيرين مايدرون عن فواتيرهم ولا الخدمات المشتركين فيها ..يدفع الفاتورة لما ينقطع الخط وعقبها يتشكى

[ضوى]

كيف اوريدو تغلط في حساب الفواتير وماتغلط في حساب الهلا؟
ما يصير

عموما شخصيا ماعندي اي اشكالية في فواتير اوريدو ولا افكر بالتغيير.. اختيار الباقة المناسبة لاستخدامك ومعرفة احتياجاتك قبل الاختيار اهم شي.. الكثيرين مايدرون عن فواتيرهم ولا الخدمات المشتركين فيها ..يدفع الفاتورة لما ينقطع الخط وعقبها يتشكى

اتفق معاك اهم شي تعرف استخدامك

[بنت مريخ]

كان هلا حولته فاتوره
كل شهر800

[بوفاطمه]

أنصحك تاخذ لك فاتورة أحسن .
وفي نظام في الشهري تحط مبلغ اضافي خصم في المكالمات الدولية .
عندي شهري وما اتشكى منه،وعندي هلا حاطه في السيارة للضرورة.

[بوفاطمه]

انا واحد اتابع اول باول ،واذا حسيت في شي زيادة اكلمهم .
واخذ حقي بعد

[Charisma]

لا ، مرتاح مع الباقه الحاليه .

يبقى الموضوع في الأستخدام وخصوصا عند تفعيل التجوال والغاءه ، لان أغلب المبالغ المحتسبه تكون من التجوال ونسيان خيار "البيانات اثناء التجوال" مفعل .

[saeed2005]

نتيجة الاستطلاع عدد المشاركات تقريبا 24 عدد الذين يرون الفاتورة 12 وعدد الذين يرون هلا 11 وواحد اتخذ موقف وسط والخلاصة أن من رأى الفاتورة أوجب ضرورة التنبه لاستخدام خدمات أوريدوو وخاصة الإنترنت فهو القاصمة في كثير من الأحيان ومن رأى العودة إلى هلا رأى أنه أسلم للبال وللمال ولكن حتى هلا إن لم يكن هناك انتباه للاستخدام فسيقع المرء في ورطة سحب الرصيد والله المستعان

[Boost]

الحمدلله حولت هلا من سنين ومرتاح

لكن انسحب رقم مميز من ارقامي ولين الحين مطنشين يحسبوني بانسى وبياخذونه مثلا

[مرتبش]

للي يعانون من ازدياد تكلفة استخدام الجوال.
باقة 250 من الشهري تعطيك مكالمات ومسجات غير محدودة لجميع الارقام في قطر.. ارضي او فودافون او كيوتل
وفيها 1 غيغا للنت.

من يحتاج انترنت اكثر ممن يشترك في باقات الانترنت الجول بدءا من 60 لواحد غيغا و 200 ل15 غيغا و400 للغير محدود

بذلك اقصى فاتورة ممكن توصلك هي 650 وفيها كل شي غير محدود.

[A-Alansari]

للي يعانون من ازدياد تكلفة استخدام الجوال.
باقة 250 من الشهري تعطيك مكالمات ومسجات غير محدودة لجميع الارقام في قطر.. ارضي او فودافون او كيوتل
وفيها 1 غيغا للنت.

من يحتاج انترنت اكثر ممن يشترك في باقات الانترنت الجول بدءا من 60 لواحد غيغا و 200 ل15 غيغا و400 للغير محدود

بذلك اقصى فاتورة ممكن توصلك هي 650 وفيها كل شي غير محدود.

هالكلام الي قلته

لكن المشكله عند البعض مر بتجارب سئية ويمكن هو مب عارف طريقه الباقات وحط اكس على شي اسمه فاتورة

والبعض يسافر بدون مايسكر التجوال وتجيه فاتورة تقص الظهر

[عاشق العديد]

بالعكس اشجع وانا اول من قام بهالخطوه وارتحت وايد ..

الفاتوره قبل لما ادفعها شهريا احط معاها سيفتي 1000 ريال .. عشاان اتنجنب الانقطاع .. لكن بعد كان ينقطع ..
حولت هلا .. ومن بداية كل شهر احط 1000 رصيد .. وافتح خدمة هلا الاسبوعيه 40 ريال بحيث توفر لي 200 دقيقه مجانيه وانترنت بسيط ولما تخلص 200 الدقيقه يحسبون لك الدقيقه بنص فعندك الحسبه يمر شهر ونص واكثر ولحين عندي رصيد وما ينقطع ابدا الرصيد من تلفوني .. فبكذا انا مرتاح .. وبلا هم وفواتير وقطع ..

[اليحصبي]

بحكم اتصالاتي مب كثيره
ماخذ باقه الشهري سمارت مع العرض الي من فتره بـ 70 و لاني مرات اتصل دولي اضفت عليها 100 حق استخدام الدقايق لدولي او محلي ,, عندي 450 دقيقه اقدر اتصل فيهم دولي او محلي ونهاية الشهر 170 ريال

واستخدام الانترنت متوسط تصفح على وتساب مع بيانات 1gb مسوي في الجوال لمت يظهر تنبيه لو قربت حد معين

مشكلة نظام " هلا " فجأه تشوف الرصيد مخلص

[حرف]

سيم سيم

[عبدالرحمن1]

كل واحد على حسب أستخدامه بس الاكيد انك اذا غلطت
في الفاتوره بتاكلها مفلفله ولا هلا بيروح الرصيد كله وبتعرف
انك جايب العيد وبتلاحق نفسك

[محمد11]

على كثر مشاكل اوريدو تعبر افضل شركة ف الخليج بالنسبه لجودة الخدمات

[بصمة قطرية]

بالعكس اشجع وانا اول من قام بهالخطوه وارتحت وايد ..

الفاتوره قبل لما ادفعها شهريا احط معاها سيفتي 1000 ريال .. عشاان اتنجنب الانقطاع .. لكن بعد كان ينقطع ..
حولت هلا .. ومن بداية كل شهر احط 1000 رصيد .. وافتح خدمة هلا الاسبوعيه 40 ريال بحيث توفر لي 200 دقيقه مجانيه وانترنت بسيط ولما تخلص 200 الدقيقه يحسبون لك الدقيقه بنص فعندك الحسبه يمر شهر ونص واكثر ولحين عندي رصيد وما ينقطع ابدا الرصيد من تلفوني .. فبكذا انا مرتاح .. وبلا هم وفواتير وقطع ..

شلون افتح خدمة هلا اللي توفر لي دقائق محلية مجانية ..!!

[بوخالد911]

لدي باقة 100 الشهري
لي 450 دقيقة محلية
وبعد 1gb
ومرتاااااح
وبالبيت اشبك ع الواير لس:victory: