درايش الحمامات اعزكم الله

[البرونزي]

السلام عليكم ورحمة الله وبركاتة


ياجماعه حاليا انا في مرحلة خرائط البيت وفي بالي ماسوي درايش للحمامات اعزكم الله
اولا انظف عن الغبار وثانيا توفيرمن تكلفة الدرايش وثالثا التوزيع
في الحمام ماراح اواجه مشاكل واكتفي بتركيب الشفاط فقط ،،
وطبعا الدليل حمامات الفنادق مافيها درايش والامور تمااام

تعليقكم الكريم ورايكم في هالموضوع

تحياتي

[qatara]

مهمه للتهويه

الفنادق لان الغرفه بضهر الغرفه فما في مجال

[ضوى]

جربنا لما عدلنا الحمام ببيت ابوي الله يرحمه كنسلنا درايش الحمام ، هو شهر واحد ماتحملنا الخنقه اعوذ بالله كأنه قبر ومع الشفاط ، سوينا فتحه وركبنا دريشه حتى النفسيه تغيرت

[$الملياردير$]

هلا اخوي ربنا يوفقك ان شاء الله ... الجو عندنا رطب و حار راح تصير كتمة ... و التهوية و الشمس لهم دور إيجابي ...نصيحة أخويه مادامك في مرحلة التصميم لا تستعجل و راجع 100 مره و شاور الناس القريبين منك انك تغير تصميم ع ورق أرخص من انك تغيره ع الواقع ... وفيه نقطة ثانية كثير منا يقارن بيته او تصميمة بستايل الفنادق .. حياتنا العملية في بيوتنا غير و الفنادق غير الفندق في فريق صيانه جاهز لتلبية اي احتياج من صبغ لكهرباء الخ .... احنا الله وكيلك اذا احترق ليت نتظر الين يحترفون 5 وياه عشان نبدل او نجيب كهربائي .... في النهاية اخوي دائماً الضوء و الأشعة الطبيعية و دخولها للمكان له طابع إيجابي و نفسي اكثر من التهوية ... تخيل الكهرباء مقطوعه شلون بنشوف في الحمام .... او تخيل لوفي رسوم ع الكهرباء مستقبلا معناه راح تشغل اللمبات و المروحة طول .... انا اعرف ناس تكبر شباك حمام الماستر ... وانت تبي تلغيه كامل ... ربي يوفقك اول و اخير بس يا اخوي راجع الموضوع مره اخرى

[سعود.]

لازم درايش للتهوية والاضاءه الطبيعية .

او سوها صغيرة ???

[asulaiti]

الدرايش مهمة جداً .. والفنادق لهم وضع خاص بحكم التصميم .. أو علشان واجهات الفندق ... الخ

اذا على الغبار ركب درايش upvc فهي تعزل الغبار .. والله يوفقك ويسدد خطاك ..

[Qt.1]

تحمل تغلط هالغلطه الكبيره , الدرايش ضروريه جدا للتهويه , لو تحط 3 شفاطات ماتغنيك عن الدريشه ,,

[معماري7]

السلام عليكم اخوي
اتشرف بانها اول مشاركة لي .

حبيت اقول ان من الخطأ الكبير عدم وجود درايش في دورات المياه.
من الجيد ان تكون( صديق للبيئة ) حيث توفر التهوية والاضاءة الطبيعية لكل فراغات المنزل ( مو فقط دورات المياه).

وبالتوفيق ان شاء الله

[sweet qatar]

أنا وحدة أحب الإضاءة والتهوية الطبيعية وما استغني عنها

لكن قد شفت حمام وسط البيت بدون دريشة وماحسيت بفرق كبير

مريح و تهويته زينه

يمكن لأن بابه يسمح بالتهوية أو لأنه كبير نوعا ما

[بوخالد911]

لازم تركب الدرايش
الكل انصحك
والراي لك.

[وحش الصناعات]

الافضل انك تركب حتى لو صغار مثلا ستين في ستين، حتى المبلط والبايب فيتر وغيرهم يحتاجون يكون النور الطبيعي موجود لاتقان العمل ومب كل العمال بجيبون كشاف.. صارت معاي باحد الحمامات اعزكم الله كنت مركب شباك صغير والبلاط اللي ماخذه كان من الالوان الداكنه كنت اقول في نفسي ليتني كبرت الشباك شوي لاني حسيت بخنقه ومظلم المكان وايضا العمال كانوا يشتكون من قلة او عدم وجود النور وخاصه اذا اجاك الحمام في الدور الارضي.

[معماري قطري]

السلام عليكم اخوي
اتشرف بانها اول مشاركة لي .

حبيت اقول ان من الخطأ الكبير عدم وجود درايش في دورات المياه.
من الجيد ان تكون( صديق للبيئة ) حيث توفر التهوية والاضاءة الطبيعية لكل فراغات المنزل ( مو فقط دورات المياه).

وبالتوفيق ان شاء الله

وانا اتمنى إن يكون ردي أول رد عليك يا رفيق المهنة وحياك الله معانا

ما دام متوفرة المساحة عندنا لترتيب وضعية دورات المياه جهة الحائط الخارجي فلازم نستغل هذا الوضع جيداً بعمل نوافذ مناسبة .. انا أوقات احس إني ابالغ وقت التصميم في كبر مساحات النوافذ بس بعد السكن وانتهاء البناء أعرف إن كان بالإمكان التكبير شوي أكثر

عندي في بيتي حالياً ممر يفصل غرفة الملابس عن تكرمون الحمام وهذا عبارة عن تسريحة عاملها بالخشب بطول 3.4 متر وعرض متغير من متر ونص لحد مترين .. فيه نافذة كبيرة مقابلة باب غرفة الملابس اللي هي عبارة عن غرفة بتقاطيع خشبية وجزئياً خزائن بأبواب والباقي مساحات تخزين مفتوحة

النافذة هذي 1.6 متر عرضها وارتفاعها فوق الكاونتر الخشب .. أقل شوي من 90 سم ومركب عليها ستارة خشبية لسهولة الفتح يومياً .. وداخل الحمام نافذة مشابهة وبرف سيراميك كبير لأَن عمق الحايط عندي حول 45 سم ومعزول ومعزولة الأبيام والأرضيات الخرسانية .. هذي نتيجتها تبين هذي الأيام بحيث الأرضية تكون دافية للمشي حافي .. وحظي الدريشة مقابلة شرق والنور يدخل مع الفجر وحتى في الليل ليتات برج اسباير تنور المكان بدرجة تسمح للدخول والخروج بدون إنارة كهربية .. كنت ناوي احط ستارة خشبية لكن شفت المكان صاد ولا يطل مباشر على جار وسويت القزاز محبب

دوم نصيحتي للي يبنون حالياً بعمل أعلى الحائط بكامل العرض من الطوب الزجاجي بس يخلون مكان لتمديد الصرف والتغذية وهذا يعتبر حل وسط بين المنور السقفي والنافذة .. ويكون مفتوح دوم بدون ستاير وفي نفس الوقت الفقاعات اللي في الزجاج تنشر النور في أرجاء المكان

[معماري قطري]

أنا وحدة أحب الإضاءة والتهوية الطبيعية وما استغني عنها

لكن قد شفت حمام وسط البيت بدون دريشة وماحسيت بفرق كبير

مريح و تهويته زينه

يمكن لأن بابه يسمح بالتهوية أو لأنه كبير نوعا ما

تعتمد على التصميم وممكن التصميم يغطي عيوب عدم وجود الإضاءَة الطبيعية .. مثل دورات مياه الفنادق تكون صغيرة ومتناسبة الأبعاد والارتفاع وفيها فن في التوزيع والإنارة ومنها المباشرة القوية والمخفية وبكم لون أحياناً .. لكن العالم يدور حلول لهذي الأماكن وتم استخدام نوع من التيوبات العاكسة من الداخل تدخل النور الطبيعي لأي مكان نبغي داخل من خلال السقف المستعار

[معماري قطري]

الافضل انك تركب حتى لو صغار مثلا ستين في ستين، حتى المبلط والبايب فيتر وغيرهم يحتاجون يكون النور الطبيعي موجود لاتقان العمل ومب كل العمال بجيبون كشاف.. صارت معاي باحد الحمامات اعزكم الله كنت مركب شباك صغير والبلاط اللي ماخذه كان من الالوان الداكنه كنت اقول في نفسي ليتني كبرت الشباك شوي لاني حسيت بخنقه ومظلم المكان وايضا العمال كانوا يشتكون من قلة او عدم وجود النور وخاصه اذا اجاك الحمام في الدور الارضي.

أذكر بيت جدي قبل مبني كان بالطابوق والسقف دنجل وخوص وطين والدرايش خشب وحديد .. بنيان شوي محدث وانتقالي من الحصى والطين والجص لين الطابوق .. بس تكرم الحمام بعيد ومعزول بروحه وفيه فتحة في الحائط قرب السقف حول 80 سم في 30 ارتفاع وبدون دريشة للتهؤئة والإنارة .. ألحين وضعنا تغير للتهؤئة والتكييف الكهربي والإنارة الكهربية لكن للنور الطبيعي دوم نكهة خاصة

سكنت مرة شقة كانت حاصل تصميمها على جائزة أفضل تصميم في وقتها وفي فئتها .. وكان أحلى ما فيها دريشة الحمام بكامل واجهة الحائط قرب البانيو وداخلة شوي داخل ونور الشمس أول الصبح يدخل منها .. صج كان تصميم يستحق .. عاد كانت المنطقة باردة ولو طلعت الشمس شوي ندور دفاها .. وكان الحمام يشجع على السباحة كل صبح .. والله اتمنى ارجع لهذي الشقة مرة بس .. كل حائط درجة لون تختلف من البنفسجي والوردي والأحمر الفاتح

[وحيد-الشوق]

اجباري تركب مالك مفر حتى لو الحمام مكيف تخيل يسكر عليك باب الحمام على الاقل تقدر تطلع من الدريشة :)*

وممكن حد يساعدك بسكين او ساطور تكسر فيه الباب

[$الملياردير$]

اجباري تركب مالك مفر حتى لو الحمام مكيف تخيل يسكر عليك باب الحمام على الاقل تقدر تطلع من الدريشة :)*

وممكن حد يساعدك بسكين او ساطور تكسر فيه الباب
انا بصراحة رد وحيد الشوق اقنعني بقوه من الاخر :nice:

[البرونزي]

الله يجزاكم خير ياجماعة
وان شاء الله باخذ بنصيحتكم
تحياتي لكم