تركيب البورسلان زيرو جويت .. هل له أضرار؟

[عايش فرحان]

السلام عليكم و رحمة الله

حبيت استفسر عن تركيب البورسلان زيرو جوينت مثل الرخام ..
عندي كذا واحد من الجماعة مركبين بهالطريقة و الصراحة المنظر عجبني بعد التركيب و حاب أسوي مثلهم في بيتي ..
بس الاستاذ اللي يركب عندي حذرني و نصحني أني اخلي فراغات من 4 ال 5 مللي عشان التمدد
و يقوللي لو ركبت زيرو و بدون فراغات البورسلان راح يتمدد في الحر و ينقشع ..

بصراحة معارفي اللي ركبوا توهم بانيين و ما يمدي نتأكد هل كلام الاستاذ صحيح وإلا يبالغ و ما يبي يتعب عمره ..

حبذا لو حد عنده خبرة في هالموضوع يعطينا الرأي الصحيح..

وسلامتكم..

[Qt.1]

خذها من شخص ركب زيرو جوينت وتحسف , الزيرو جوينت صعب يضبط لان اغلى وافضل السيراميك بعد بيبقى بينهم فرق لو بسيط انا بيتي كله اسباني وماخذه غالي وبعد طل فيهم فرق كلش مايبين , فريح بالك وركب كروس بتلاحظ الشغل صار مرتب , وبالعكس هو اريح له يركب لك زيرو لان الشغل ايصير اقل , هذي تجربتي وننتظر باقي الشباب ,,

[معماري قطري]

إخوي عايش فرحان انت شفت بعينك وشفته أحلى .. وانا اختلف مع بو عبدالله في إن الزيرو جوينت سهل .. هو سهل لو أسست له صح ولو بتركبه على صبية مستوية والمونة اللي يركب يساويها بالمشط المربع والمونة خاصة وتحتاج قراوت سائل أو حتى بدون لكن احتياط للغسيل حتى الماي ما يتسرب تحتاج قراوت سائل يعبي الفراغات البسيطة جداً

بالنسبة للتمدد لو كان برا نعم لكن داخل البيت فواصل التمدد تكون الأطراف والمساحات بسيطة ما تحتاج لفواصل تمدد .. لو قاعة كبيرة بنقول اوكي لازم نسوي فواصل وبعد نقدر نركب زيرو جوينت .. فاصل التمدد شيء وفاصل التركيب شيء ثاني .. يبقى التركيب زيرو جوينت فيه فاصل بسيط جداً وانت لو عبيت الفاصل سواء كان زيرو جوينت أو 1 سم بالمونة خلاص منعت التمدد .. فاصل التمدد يتعبى بماستك مطاط قابل للانضغاط

بعدين أغلب البورسلان ألحين جاهز للزيرو جوينت الا بعض البورسلان الرديء وكذلك السيراميك

[شموخ دائم]

,

,


مرحبا


ركب زيرو اجمل بمليون مره
بس المهم تراعي

ان البورسلان يكون نوع ممتاز اوربي
والشخص الي يركب يكون ممتاز وشايف شغله

مافي تمدد داخل البيت درجه الحراره شبه ثابته

اذا النوع البورسلان صيني رخيص
بتواجهك كل بلاطه مقاساتها تختلف بكم ملي ويعمل مشكله

جيب لك شخص فاهم بيركب لك وبيطلع شغل مرتب

بورسلان نخب اول
+
وشخص فنان
=

النتيجه بتكون ( فنتاستك )

والعكس صحيح


ترى الفراغات بين البورسلان ما تصلح للمجالس والصالات
بيطلع المكان مثله ومثل المطبخ نفس الشي
:)

,

,

[معماري قطري]

هذي أهم جملة لفتت نظري والجمل الباقية ما شاء الله مهمة ونتيجة خبرة كبيرة

ترى الفراغات بين البورسلان ما تصلح للمجالس والصالات
بيطلع المكان مثله ومثل المطبخ نفس الشي

على الجهة الأُخرى هناك مونة خاصة لبين البلاط نقدر نترك فراغ حول 2 سم وتبين مثل الخطوط العريضة .. ميزتها قوية وثابتة ولا تتشقق أو تنفصل أو تنزال بسهولة وفيه منها مجال كبير من الألوان الجريئة ودرجات الألوان .. مثل ممكن نركب بورسلان أسود والمونة من درجات الأحمر بس بعد نحتاج بورسلان مقاسه ثابت حتى الخطوط تبين مستقيمة والمونة نفس السمك

[عايش فرحان]

اخوي العزيز بوعبدالله

استاذنا الكبير معماري قطري

فناننا الرايق شموخ دايم

بيض الله وجوهكم على النصايح و الردود الكريمة .. ماقصرتوا..

[(عبدالله)]

من تجربتي الشخصية

انا مركب بورسلان اسباني درجة أولى a1 زيرو جوينت في جميع صالات وغرف البيت

مقارنة بالرخام في فرق طبعاً ومهما كانت جودة البورسلان في فرق في الزيرو جوينت بينه وبين الرخام

البورسلان لازم في نسبة صغيرة جداً جداً جداً في حجم البلاطة سواءاً في الطول والعرض أو السمك بواقع جزء من الملليمتر... وهذا بيكون ظاهر للي يدقق .. لكن كمنظر عام يطلع جميل بشرط توفر المعلم والعمالة الماهرة والمونة المستخدمة

أنا اللي ساعدني إن العمالة اللي ركبوا عندي فلبينيين

أما بخصوص التمدد ... فماواجهت أي إشكالية بما أن البورسلان داخل البيت مب برع مع عوامل الجو المختلفة في الضيف والشتا

[معماري قطري]

ووجهك أبيض إن شاء الله إخوي عايش فرحان

حتى لو العمالة عندك خبرتهم بسيطة لو ركبوا على صبية مستوية تكون الأُمور سهلة

وتجربة الأخ عبدالله واضحة بعد وجزء من الملم شيء بسيط ما يتلاحظ

[عايش فرحان]

من تجربتي الشخصية

انا مركب بورسلان اسباني درجة أولى a1 زيرو جوينت في جميع صالات وغرف البيت

مقارنة بالرخام في فرق طبعاً ومهما كانت جودة البورسلان في فرق في الزيرو جوينت بينه وبين الرخام

البورسلان لازم في نسبة صغيرة جداً جداً جداً في حجم البلاطة سواءاً في الطول والعرض أو السمك بواقع جزء من الملليمتر... وهذا بيكون ظاهر للي يدقق .. لكن كمنظر عام يطلع جميل بشرط توفر المعلم والعمالة الماهرة والمونة المستخدمة

أنا اللي ساعدني إن العمالة اللي ركبوا عندي فلبينيين

أما بخصوص التمدد ... فماواجهت أي إشكالية بما أن البورسلان داخل البيت مب برع مع عوامل الجو المختلفة في الضيف والشتا

مشكور عالرد اخوي عبدالله .. والله يبارك لك في بيتك..