المساعد الشخصي الرقمي

مشاهدة النسخة كاملة : أخطاء الصبغ و تأثيرها المزعج


sweet qatar
04-01-2016, 01:20 PM
السلام عليكم ورحمة الله وبركاته


بعض التفاصيل تأثيرها كبير علي البيت ..تقلل من جمال و فخامة المكان


للأسف الأخطاء هذي شفتها في بيوت قطرية راقية


http://st.hzcdn.com/simgs/60d221a20357e700_8-9703/home-design.jpg

أول خطوة تسبق عملية الصبغ هي تغطية الحواف و سوكت الكهربا وبعضهم يشيله لضمان النظافة

وايد من الصباغين يستخدمون اللزقة العادية والمفروض يستخدمون لزقة خاصة



http://p-fst1.pixstatic.com/506a0ff474c5b64b1d000a8c._w.540_s.fit_.jpg

اختيار عدد الطبقات المناسبة ومعالجة الطوفة قبل الصبغ تأثر بشكل كبير علي جمال اللون حتي لو كان حيادي باهت

نظافة الشغل والخط الفاصل بين الألوان وايد مهمين خصوصاً إذا كانت عندك طوفة بلون مختلف أو مثل ما نسميها accent wall

وفي شي تعلمته .. ومثل ما يقولون محد يتعلم ببلاش


إذا قلت للعامل أو المقاول هذا الشكل مابيه وقال لك عقب ما يخلص ومع الفنشنج والبوليشنج بيصير مثل ما تبي

تأكد ان هذا أكبر مقلب بتاخذه في حياتك :)
معماري قطري
04-01-2016, 01:34 PM
انا يئست من الصبغ والصباغين خصوصاً العرب منهم .. باصبغ بيتي من الخارج بجوتاشيلد ولثاني مرة خلال سنة بسبب صبغه في غيابي بواسطة عامل مصري بالغش وبغالي

جوتاشيلد يجي منه نوعين الأكريلك والايبوكس ويتكون من 4 طبقات وحصلت باكستاني بيسويه ب 28 ريال ويوناني بيسويه ب 85 .. وكلهم شركات مب أفراد بس مرتاح للباكستاني لأن تعاملت معاه قبل ومن عيال فريجنا حتى الجواز يستاهله :) ووعدني بإزالة القديم بالرمل بالكامل .. للداخل أي مكان اسوي له تجديد الحل السهل هو ورق الجدران
sweet qatar
04-01-2016, 02:06 PM
والله يا أستاذي كلهم نفس الشي إذا وثقت فيهم

الحل توقف علي راسهم .. وما تقبل بأي نوع من التنازل

والله يوفقك مع الباكستاني مع ان فرق السعر كبير والشغل الجيد يكلف
معماري قطري
04-01-2016, 02:31 PM
باتفق معاه مرحلة مرحلة أفضل
khaldoon
04-01-2016, 02:40 PM
والله شي حلو انه في ناس تنتبه للتفاصيل الصغيره......فعلا انا ادقق في كل شي و بكل حيطه قبل اني استلم الدهان بشكل نهائي و ادفع للصباغ

في ناس بس تطلع بشكل عام و لا تفكر تنظر للتفاصيل و هذ المصيبه
sweet qatar
05-01-2016, 09:30 AM
باتفق معاه مرحلة مرحلة أفضل

موفق ان شالله
sweet qatar
05-01-2016, 09:37 AM
والله شي حلو انه في ناس تنتبه للتفاصيل الصغيره......فعلا انا ادقق في كل شي و بكل حيطه قبل اني استلم الدهان بشكل نهائي و ادفع للصباغ

في ناس بس تطلع بشكل عام و لا تفكر تنظر للتفاصيل و هذ المصيبه

التفاصيل هي الي تكون جمال المكان

للأسف سوء التتفيذ ما يبي له دقة ملاحظة

حتي لو العين غير مدربة لالتقاط مثل هالامور

المكان بشكل عام يبين cheap

في أخطاء كثيرة الناس تتغاضي عنها وهي دافعة فلوس يعني المفروض تستلم شغل نظيف احترافي

لازم نرفض الشغل الغلط ... مب نحاتي تكاليف تصليحه أو نخاف من التأخير

تخيل انك تسوي عشا البيت وتاخذ الناس في أرجاء المنزل والطوف تبين كنها مصبوغة من 10 سنين !!!
معماري قطري
05-01-2016, 02:44 PM
موفق ان شالله

الله يوفقج إختي

والله صج كلامج يعور القلب العمالة عندنا والشغل غش في غش

أذكر أول العام في فلوريدا وهم يموتون على الألوان الشمسية .. كنت ساكن في مجمع وطرأ عليهم يصبغونه والمجمع كبير ومتكون من عدة مباني وكانت ألوانه متعددة من الأخضر والأبيض والبيج والبرتقالي ومن 4 أدوار .. جابوا عربة خاصة بمنصة ترتفع فوق ويرشون ماي قبل والصبغ الموجود زين وانا توقعت يغسلونه بس لكن تفاجأت بالشغل بعدين وكل قطعة تقريباً بلون وشلون ما يلطخون الجدران والسيارات صافة وهذي العربة مادة منصتها فوق ويشتغلون بدون ما يخربون شيء

هذا المجمع اعتقد اليمين خلصوا صبغه واليسار للحين .. سيارة وحدة وثلاث أشخاص يشتغلون وخلصوه بسرعة وهدوء

http://i.imgur.com/5lELOHN.jpg

هنا قبل لينصبغ وشقتي اللي في الثالث في البلكونة كرسي وسيارتي الرصاصية تحت .. ذكريات

http://i.imgur.com/Sjtry0g.jpg

الشغلة ما كانت سهلة وفيها كورنيشات جي ار سي لازم تنصبغ بروحها والصبغ كان خاص وراقي

http://i.imgur.com/mW0aEfo.jpg

الشمس شوي مخربة التصوير وهنا تبين الحدود الفاصلة وكيف دقة صبغها

http://i.imgur.com/YZOFDC2.jpg
معماري قطري
05-01-2016, 02:46 PM
انا مصور الصباغ والعربة وبادور في الصور بعدين باحط باقي الصور .. والله ذكريات حنيت لذيك الأيام
المهندس عبدالعزيز
05-01-2016, 06:13 PM
هذي الدول اي شغلة محتاجه خبرة وشهادة وامتحانات من الحلاق والصباغ والميكانيكي والمقاول..فالجودة عندهم عالية جداً

على سبيل المثال لا الحصر في كندا

http://www.contractorcheck.ca/
معماري قطري
05-01-2016, 10:40 PM
وهذا الشيء إخوي عبدالعزيز أدعو إليه من زمان لازم لكل شغلة مهما كانت بسيطة ترخيص وتأهيل .. لازم المقاول يختار فنييه بعناية بالغة ويدربهم صح قبل ليشتغلون وما يشتغلون الا بشهادة تبين صلاحيتهم للشغل وحدود خبرتهم
معماري قطري
05-01-2016, 10:45 PM
هذي الدول اي شغلة محتاجه خبرة وشهادة وامتحانات من الحلاق والصباغ والميكانيكي والمقاول..فالجودة عندهم عالية جداً

على سبيل المثال لا الحصر في كندا

http://www.contractorcheck.ca/

هذي جهات تفحص قدرة المقاول وقوته البشرية والمهنية لأَداء المهام الهندسية .. بعدها تجي ضمانات المقاول واثباتاته وبعدها تجي العقود اللي لازم تكون موثقة فيكون ممكن حصر أعمال المقاول الحالية وتوقع قدرته على أداء العمل .. عندنا حتى تأهيل المقاولين ما يتم بطريقة صحيحة
النهار
05-01-2016, 11:31 PM
تقريبا من اكثر من 10 سنوات صديقي كان يدور له على صباغ شاطر
قلت خلنا نروح شارع مشيرب في وايد صباغين تحصلهم هناك
فعلا اول ماقلنا نبي صباغ الا التمواعلينا صباغين من جميع الجنسيات وفي واحد واقف شويه بعيد
صديقي تركهم كلهم وراح حق الي واقف شويه بعيد قال انت صباغ قال نعم صباغ 100%
انا ماقتعت فيه بسبب ان ملابسه مهب ملطخه بالصبغ ههههههههه
قمت دور على صباغ ثاني حصلت واحد تقول صابين جميع انواع الصبغ على ملابسه قلت حق صديقي هذا هو الصباغ الي تدور عليه
ضحك وقال لا انا ابي هالصباغ الي ثيابه نظيفه هبابه تحصل جم نقطة صبغ على ثايابه
سألته عن السبب قال اذا تدور لك على صباغ شوف ملابسه اذا حصلت عليها صبغ بكثره هذا عليمي يخرب لك الشغل وتعال رقع من وراءه
والله طلع كلامه صح فعلا كان شغله 100% مثل ماقال لنا
معماري قطري
06-01-2016, 08:27 AM
وليش نترك الأُمور للفراسة إخوي النهار .. اللي يبي يتوظف وهو قطري حتى لو كان كبير ويشتغل في جهة فرضاً خاصة يقولون له جيب شهاداتك كلها .. لازم ذيلا ينعمل لهم ترخيص وبدونه ما يشتغلون وكافة العمال مب بس الصباغين

ممكن ترخيصهم عن طريق مدارس فنية صغيرة مثل ما يرخصون السائقين وهذي المدارس فيها فصول للتدريب
sweet qatar
08-01-2016, 11:07 PM
الله يوفقج إختي

والله صج كلامج يعور القلب العمالة عندنا والشغل غش في غش

أذكر أول العام في فلوريدا وهم يموتون على الألوان الشمسية .. كنت ساكن في مجمع وطرأ عليهم يصبغونه والمجمع كبير ومتكون من عدة مباني وكانت ألوانه متعددة من الأخضر والأبيض والبيج والبرتقالي ومن 4 أدوار .. جابوا عربة خاصة بمنصة ترتفع فوق ويرشون ماي قبل والصبغ الموجود زين وانا توقعت يغسلونه بس لكن تفاجأت بالشغل بعدين وكل قطعة تقريباً بلون وشلون ما يلطخون الجدران والسيارات صافة وهذي العربة مادة منصتها فوق ويشتغلون بدون ما يخربون شيء

هذا المجمع اعتقد اليمين خلصوا صبغه واليسار للحين .. سيارة وحدة وثلاث أشخاص يشتغلون وخلصوه بسرعة وهدوء

http://i.imgur.com/5lELOHN.jpg

هنا قبل لينصبغ وشقتي اللي في الثالث في البلكونة كرسي وسيارتي الرصاصية تحت .. ذكريات

http://i.imgur.com/Sjtry0g.jpg

الشغلة ما كانت سهلة وفيها كورنيشات جي ار سي لازم تنصبغ بروحها والصبغ كان خاص وراقي

http://i.imgur.com/mW0aEfo.jpg

الشمس شوي مخربة التصوير وهنا تبين الحدود الفاصلة وكيف دقة صبغها

http://i.imgur.com/YZOFDC2.jpg


عجييييييييب

شلون اصبغوا بهالنظافة واللون قوي و واضح ؟!!!


في انتظار صور العربة والصباغ .. يمكن نشوف شي من ادواتهم ونعرف الطريقة


احنا اذا بيصبغون بيتنا من برا يعتفس عندنا الحوش كله :(
sweet qatar
08-01-2016, 11:12 PM
هذي الدول اي شغلة محتاجه خبرة وشهادة وامتحانات من الحلاق والصباغ والميكانيكي والمقاول..فالجودة عندهم عالية جداً

على سبيل المثال لا الحصر في كندا

http://www.contractorcheck.ca/


وهذا الشيء إخوي عبدالعزيز أدعو إليه من زمان لازم لكل شغلة مهما كانت بسيطة ترخيص وتأهيل .. لازم المقاول يختار فنييه بعناية بالغة ويدربهم صح قبل ليشتغلون وما يشتغلون الا بشهادة تبين صلاحيتهم للشغل وحدود خبرتهم


صح كل مهنة يبيلها شهادة*


لكن في هالامور الحرفية ما تكفي الشهادة

الصباغ المحترف ممكن يوفر من التكاليف عشان يزيد الربح
sweet qatar
08-01-2016, 11:19 PM
تقريبا من اكثر من 10 سنوات صديقي كان يدور له على صباغ شاطر
قلت خلنا نروح شارع مشيرب في وايد صباغين تحصلهم هناك
فعلا اول ماقلنا نبي صباغ الا التمواعلينا صباغين من جميع الجنسيات وفي واحد واقف شويه بعيد
صديقي تركهم كلهم وراح حق الي واقف شويه بعيد قال انت صباغ قال نعم صباغ 100%
انا ماقتعت فيه بسبب ان ملابسه مهب ملطخه بالصبغ ههههههههه
قمت دور على صباغ ثاني حصلت واحد تقول صابين جميع انواع الصبغ على ملابسه قلت حق صديقي هذا هو الصباغ الي تدور عليه
ضحك وقال لا انا ابي هالصباغ الي ثيابه نظيفه هبابه تحصل جم نقطة صبغ على ثايابه
سألته عن السبب قال اذا تدور لك على صباغ شوف ملابسه اذا حصلت عليها صبغ بكثره هذا عليمي يخرب لك الشغل وتعال رقع من وراءه
والله طلع كلامه صح فعلا كان شغله 100% مثل ماقال لنا


ههههههههههه

وهو صادق .. الصباغ الي ما يقدر يتحكم في كثافة اللون ويصبغ عمره بدل الطوفة ما بيغطي لك الطوفة عدل

و ممكن يكون دليل انه يغش في المواد الي يستخدمها او يستخدم مواد رخيصة
معماري قطري
09-01-2016, 08:38 AM
عجييييييييب

شلون اصبغوا بهالنظافة واللون قوي و واضح ؟!!!


في انتظار صور العربة والصباغ .. يمكن نشوف شي من ادواتهم ونعرف الطريقة


احنا اذا بيصبغون بيتنا من برا يعتفس عندنا الحوش كله :(

دورتها حول ساعة كاملة ولا حصلتها بس هي مثل الكرين اللي يركبون فيه عمال اثنين ويرفعهم بجهاز في يدهم ويحركهم في كل اتجاه
MAZEN37
10-01-2016, 03:45 PM
مشكلتي مع الصباغ والسبب
اني ما بغيه يفنيش الكوت الاخير الا عقب ما اخلص نهائي
وهو يبي يقلب الشغله ويخلص وياخذ فلوسه
وبعد خرب لي الدنيا
شفت بعيني صباغيين خالصين داخل الفيلا والبلاستر ما خلص بره
وشفت شبابيك المنيوم راكبين على الطابوق قبل البلاستر
الصبغ هو مرحله من مراحل البناء لكن شغل المشي حالك هو الدارج
للاسف
تجاوز
10-01-2016, 06:32 PM
موضوع مهم ...
Mubarak7
10-01-2016, 09:36 PM
كل عمل يحتاج اتقان وتفاني حتى الصبغ
sweet qatar
11-01-2016, 09:41 AM
دورتها حول ساعة كاملة ولا حصلتها بس هي مثل الكرين اللي يركبون فيه عمال اثنين ويرفعهم بجهاز في يدهم ويحركهم في كل اتجاه

تخيلت شكلها

شوف أخوي ماعندي إلا تفسير واحد

إن طبقة الصبغ السابقة تم تنفيذها باحترافية

فالطبقة الجديدة ما احتاجت لتحضير

و يكون الصبغ مزيج بين اللون والبرايمر

أما نظافة الحدود اكيد استخدموا لها فراشي صغيرة


مشكلتي مع الصباغ والسبب
اني ما بغيه يفنيش الكوت الاخير الا عقب ما اخلص نهائي
وهو يبي يقلب الشغله ويخلص وياخذ فلوسه
وبعد خرب لي الدنيا
شفت بعيني صباغيين خالصين داخل الفيلا والبلاستر ما خلص بره
وشفت شبابيك المنيوم راكبين على الطابوق قبل البلاستر
الصبغ هو مرحله من مراحل البناء لكن شغل المشي حالك هو الدارج
للاسف

مب من حقه يستعجل عشان يخلص ويروح

للأسف اخوي مازن احنا ما نتكلم

ندفع فلوس بسكات .. كنهم متفضلين علينا

المفروض يكون الشخص واضح من البداية وعنده تسلسل معين للشغل

ويرفض حركات البعض الي يوعدك ان الشغل بيمشي مثل ماتبي

بدون تحديد او اتفاق !!

الطريقة الأفضل ان الدفع يكون علي دفعتين .. عربون و بعد التنفيذ النهائي

و ممكن إذا البعض يخاف ان الزبون ما يعطيه فلوسه

يكون الاتفاق بتسليم الدفعة الأخيرة قبل المباشرة بالعمل النهائي


موضوع مهم ...

شكرآ

وأتمني الاستفادة للجميع



كل عمل يحتاج اتقان وتفاني حتى الصبغ

صدقت

الله يهدي الجميع لإتقان العمل والبعد عن الغش
معماري قطري
11-01-2016, 12:48 PM
لا إختي كانوا يستخدمون مكينة رش واحد يرش وواحد يمسك بورد ما ادري يثبته بلزقه وبعدين حاطين قناع للتنفس وشغلهم نظيف ومرتب .. الصبغ القبلي كان زين وهذا تجديد اعتقد من نوعية البولي ايرثين المضاد للرطوبة .. عاد هناك مطر وشمس والرطوبة دوم
معماري قطري
11-01-2016, 12:50 PM
والله نبي نعرف نوعيات الصبغ وطريقة الصبغ المثالية لأنها مهمة للكل
عقرب
11-01-2016, 01:58 PM
بما أن الموضوع عن الصبغ

عندنا مشكلة في طوفة البيت .. الصبغ مايتم كم شهر إلا ينتفخ و يتقشر

يمكن ملوحة يمكن شي ثاني الله أعلم .. للعلم الطوفة أنبنت يوم أن الأرض كانت مزرعة والظاهر الماي المستخدم من العين إلي في المزرعة مش متأكد

لحد يقول أهدم الطوفة ورد أبنيها أو ركب حجر لأن طول الطوفة 155 الواجهة و155 متر من الخلف والعمق 42 يعني التكلفة بتكون عالية

أبغي من الأخوان إلي عندهم خبرة يفيدونا بأي طريقة نعالج فيها المشكلة


والسموحة من راعي الموضوع :)
معماري قطري
11-01-2016, 02:23 PM
تحتاج إصلاح وصيانة متخصصة وصبغ جيد .. شوف أصباغ الرش تجي قوية ومنها الجوتاشيلد ومنها البوليارثين

هذا فلم للبوليرثين وميزته متماسك ويكون طبقة عازلة للرطوبة .. هنا له مثال يعملون منه فورم للجي آر سي أو الجبس


https://www.youtube.com/watch?v=hP759SLZM38
معماري قطري
11-01-2016, 02:29 PM
هو منه أنواع حتى لعزل الأسقف وأنواع غالية وأنواع سعرها معقول .. وأكيد تحتاج شركة تنصحك بطبقات الصبغ والأفضل لك كسعر وجودة وانا انصحك باللون الأبيض لأنه يقاوم أشعة الشمس ولا يتغير ويبهت


https://www.youtube.com/watch?v=GXZejm649V4
معماري قطري
11-01-2016, 02:33 PM
بعدين شوف لو الطوفة من فوق مب مسكرة والماي يدخل من فتحات الطابوق وقت المطر تكون مشكلة وينتفخ الصبغ بسبب الرطوبة .. لو تحب تعطيها شكل مجدد ركب فوق قرميد يصرف الماي ويعطيك شكل حلو بس خله مايل زيادة حتى يبين في الواجهة
sweet qatar
11-01-2016, 04:42 PM
لا إختي كانوا يستخدمون مكينة رش واحد يرش وواحد يمسك بورد ما ادري يثبته بلزقه وبعدين حاطين قناع للتنفس وشغلهم نظيف ومرتب .. الصبغ القبلي كان زين وهذا تجديد اعتقد من نوعية البولي ايرثين المضاد للرطوبة .. عاد هناك مطر وشمس والرطوبة دوم


اهاااا .. شكرا للتوضيح

طالما الصبغ الاول مافيه مشاكل الطبقة الجديدة بتكون بنفس المستوى .. الاساس هو الاهم



والله نبي نعرف نوعيات الصبغ وطريقة الصبغ المثالية لأنها مهمة للكل


ان شالله باقي الاعضاء يتفاعلون .. انا قررت اصبغ غرفتي بنفسي
والي بيفيدنا بمعلومة الله يجزاه خير
sweet qatar
11-01-2016, 05:02 PM
بما أن الموضوع عن الصبغ

عندنا مشكلة في طوفة البيت .. الصبغ مايتم كم شهر إلا ينتفخ و يتقشر

يمكن ملوحة يمكن شي ثاني الله أعلم .. للعلم الطوفة أنبنت يوم أن الأرض كانت مزرعة والظاهر الماي المستخدم من العين إلي في المزرعة مش متأكد

لحد يقول أهدم الطوفة ورد أبنيها أو ركب حجر لأن طول الطوفة 155 الواجهة و155 متر من الخلف والعمق 42 يعني التكلفة بتكون عالية

أبغي من الأخوان إلي عندهم خبرة يفيدونا بأي طريقة نعالج فيها المشكلة


والسموحة من راعي الموضوع :)


الموضوع موضوعك اخوي .. خذ راحتك



خذ لك فني عزل يعاين و اساله عن طريقة الفتحات بالدريل في الطوفة او التنشيف الحراري اذا بيحلون مشكلة الرطوبة

لا تصبغ مرة ثانية قبل لا تتاكد من العزل الجيد


وان شالله باقي الاعضاء يفيدونك
معماري قطري
11-01-2016, 11:34 PM
اهاااا .. شكرا للتوضيح

طالما الصبغ الاول مافيه مشاكل الطبقة الجديدة بتكون بنفس المستوى .. الاساس هو الاهم





ان شالله باقي الاعضاء يتفاعلون .. انا قررت اصبغ غرفتي بنفسي
والي بيفيدنا بمعلومة الله يجزاه خير

طلعتي خطيرة .. بتسوين مثل اللي في برامج دو ات يورسلف .. شوفي قبل اخذي العدة كاملة ومري على أصباغ جوتن ولا ناشيونال ولا رغدان واتوقع فيه نوعيات غير واسئليهم عن الطبقات والطريقة المثالية للصبغ ولا تنسينا بالصور قبل وبعد

بس تبين الصج صبغ غرفة مسكونة مزعج وورق الجدران حلو ويتركب في يوم .. كان صبغ مكتبي بيج وحطيت ورق فيه نقوش بيج خفيف وأخضر وطلع وايد حلو .. العيال اختاروا تشكيلة جلد بني وطلع بعد حلو
عقرب
12-01-2016, 09:17 AM
الله يجزاكم خير ويرحم والديكم
sweet qatar
12-01-2016, 11:04 AM
طلعتي خطيرة .. بتسوين مثل اللي في برامج دو ات يورسلف .. شوفي قبل اخذي العدة كاملة ومري على أصباغ جوتن ولا ناشيونال ولا رغدان واتوقع فيه نوعيات غير واسئليهم عن الطبقات والطريقة المثالية للصبغ ولا تنسينا بالصور قبل وبعد

بس تبين الصج صبغ غرفة مسكونة مزعج وورق الجدران حلو ويتركب في يوم .. كان صبغ مكتبي بيج وحطيت ورق فيه نقوش بيج خفيف وأخضر وطلع وايد حلو .. العيال اختاروا تشكيلة جلد بني وطلع بعد حلو

هههههههه

سلمك الله غرفتي انصبغت أكثر من مرة ونفس المشكلة .. تسريب في الطوفة و صبغ مقشر

هالمرة بسويها بنفسي .. مثل ما قلت نقلة الأغراض صعبة
و ماعندي وقت كللللش


الله ييسر


الله يجزاكم خير ويرحم والديكم

والدينا و والديك .. :o
Riku3
12-01-2016, 11:32 AM
انا من فترة صبغت والصباغ كان جيد بس المشكلة كانت في الاساس الي سواه لي مصري حسبي الله ونعم الوكيل فيه .. قبل لا يشتغل الصباغ قالي خلص الاضاءة عقب بشتغل ..

وصح كلامه عقب ما خلصت الليتات طلعت الفضايح والتموجات في المعجون وحسب كلام الصباغ حتى المعجون مغشوش ومخلوط بمواد ثانية مع ان فرق السعر 20 ريال للكيس بس .. وهالسرقات والغش منتشر عند هالنوع من الشغل ..

بعد ما حاول يعدل التموجات قالي بتصير عندنا مشكلة مع تماسك الصبغ بسبب الاساس الضعيف ..

اخترت اصباغ رغدان وحتى اني تعلمت من اليوتيوب شلون يسوونها وبدى الشغل ..

الشغل بشكل عام حلو بس حصلت مشاكل في الاماكن الي بغيت فيها خطوط فارقه بين الاصباغ والالوان .. هناك تعب الصباغ لان كل ما بغى يحط فوارق كانت تشيل الصبغ ! .

قبل كم شهر بنتي لزقت صورة على الجدار .. ومن شليتها قام الصبغ معاها >___< .. نفس ما قال الصباغ مشكلة الاساس مالها حل الا ان تشيله بالكامل وانا كنت مستعجل وما شليته قبل الشغل .
معماري قطري
12-01-2016, 01:56 PM
والله موضوع الإخت سويت قطر مهم وينورنا ويوضح للكل المشاكل .. بالنسبة لك إخوي ركوع ما ادري ريكو 3 المشكلة عندك من الصوبين البلاستر والأساس وبعض اللي يسوون أساس يخلطونه بالبودرة .. أرخص وتطلع خلطة زينة بس غش وتبين نتائجها بعدين

لصاحبة الموضوع لو فيه رطوبة في الحايط أول نشوف مصدر الرطوبة ونحاول نزيله .. ممكن تسريب بسيط من بايب تكييف فوق السطح ما سدوه عدل .. ممكن بايب ماي فيه بطوط صغيرة ويسرب .. شفت حالات يضربون البيب النحاس بمسمار يسوون فتحة قد راس الابرة وهذي تسرب بالتدريج .. عندي حالتين في بيتي بس في بيتي البايبات في الغلاف الخارجي للجدار وتبين من برا وتوني مصلح واحد بعد 11 سنة من سكنت .. الظاهر المقاول أو الفنيين أما حسد في نفوسهم ويسون هالحركة أو نذالة أو حتى يشتغلون مرة ثانية .. صلحته ب 1000 ريال والشغل كله كان من برا بس في الفترة الأخيرة زاد التسريب ووصل للداخل وخرب الصبغ شوي وهنا قلت لا بد من القضاء على السبب والحمد لله استبدلنا حول متر من البايب وفي ساعات بسيطة .. وبعدين نزيل الصبغ والتأسيس في هذي المنطقة ونسوي تأسيس ثاني لها بس أو للغرفة كلها لو كان تأسيسها تعيس .. والحل الثاني ننسى الصبغ ونحط ورق جدران
sweet qatar
13-01-2016, 08:41 AM
والله موضوع الإخت سويت قطر مهم وينورنا ويوضح للكل المشاكل ..


ماشالله عليكم استاذي انت وباقي الأعضاء .. اثريتوا الموضوع بتجاربكم
بدينا الموضوع بنظافة الشكل وصرنا نتكلم عن العزل




لصاحبة الموضوع لو فيه رطوبة في الحايط أول نشوف مصدر الرطوبة ونحاول نزيله .. ممكن تسريب بسيط من بايب تكييف فوق السطح ما سدوه عدل .. ممكن بايب ماي فيه بطوط صغيرة ويسرب .. شفت حالات يضربون البيب النحاس بمسمار يسوون فتحة قد راس الابرة وهذي تسرب بالتدريج .. عندي حالتين في بيتي بس في بيتي البايبات في الغلاف الخارجي للجدار وتبين من برا وتوني مصلح واحد بعد 11 سنة من سكنت .. الظاهر المقاول أو الفنيين أما حسد في نفوسهم ويسون هالحركة أو نذالة أو حتى يشتغلون مرة ثانية .. صلحته ب 1000 ريال والشغل كله كان من برا بس في الفترة الأخيرة زاد التسريب ووصل للداخل وخرب الصبغ شوي وهنا قلت لا بد من القضاء على السبب والحمد لله استبدلنا حول متر من البايب وفي ساعات بسيطة .. وبعدين نزيل الصبغ والتأسيس في هذي المنطقة ونسوي تأسيس ثاني لها بس أو للغرفة كلها لو كان تأسيسها تعيس .. والحل الثاني ننسى الصبغ ونحط ورق جدران

اي أكيد في تسريب لأن الطوفة وراها حمام تكرمون


بعد المحاولات من الوالد و كل شوي صبغ وصيانة والعمال أشكال وأنواع
قررت أحل الموضوع بنفسي

ماشالله انت قدرت تحل المشكلة بسهولة لأنك مسوي حساب الصيانة

انا اذا قررت انفذ بمشي علي خطوات المواقع الأجنبية

قبل فترة شفت علي اليوتيوب برنامج عربي لتصليح الصبغ

قالت فيه المره انها بتحط "البوند" كعازل وأمس في السناب واحد متخصص يقول "البوند" يعتبر لاصق قوي مش عازل

فإذا قررت اصبغ بنفسي أول شي بسويه اني أشوف لي عامل يصلح التسريب
و واحد ينشف الجدران

و واحد يغطي لي الطوفة بمادة عازلة

وانا يبقي علي الصبغ العادي :)
معماري قطري
13-01-2016, 12:31 PM
الله يهداج والماي وين يروح حتى لو كمية بسيطة .. يبين تأثيره بالتدريج ويزيد .. انا جبت جهاز صغير قيمته يمكن 100 ريال من ألمانيا وعلى بطارية يقيس نسبة الرطوبة .. يعني له مسمارين لو اشغله على اليد تطلع لي نسبة 10 - 15% وجيت عند طوفة بيتي اللي فيها التسريب حصلت نسبة 45 في المكان القريب وكل ما ابتعد تقل .. جربته في صلعة واحد عطاني حول 25 كان عرقان شوي .. ونفعني عرفت وين مكان التسريب وجبت العمال وكسروا وصلحوا

انتي الوضع عندج نفس الشيء بس قبل لا نكسر قولي لي وين ارتفاع الرطوبة .. لو في حدود 60 سم من الأرض معناها من بايبات التغذية ولو في منطقة وراها مغسلة ولين 90 سم مرتفع معناها من بايب المغسلة أو حتى الشاور .. والتكسير بيكون سهل جداً في الطابوق ويتعدل التسريب بلحام أو بوصلة بايب جديدة ونترك شوي نشوف لو التسريب يرجع .. لو فني شاطر يقدر يسوي كل شيء في ساعتين ويحط حتى بلاستر

الأهم حماية البيت والصبيات وآخر شيء يجي الصبغ أو ورق جدران أو أي تشطيب ثاني
sweet qatar
13-01-2016, 08:42 PM
الله يهداج والماي وين يروح حتى لو كمية بسيطة .. يبين تأثيره بالتدريج ويزيد .. انا جبت جهاز صغير قيمته يمكن 100 ريال من ألمانيا وعلى بطارية يقيس نسبة الرطوبة .. يعني له مسمارين لو اشغله على اليد تطلع لي نسبة 10 - 15% وجيت عند طوفة بيتي اللي فيها التسريب حصلت نسبة 45 في المكان القريب وكل ما ابتعد تقل .. جربته في صلعة واحد عطاني حول 25 كان عرقان شوي .. ونفعني عرفت وين مكان التسريب وجبت العمال وكسروا وصلحوا

انتي الوضع عندج نفس الشيء بس قبل لا نكسر قولي لي وين ارتفاع الرطوبة .. لو في حدود 60 سم من الأرض معناها من بايبات التغذية ولو في منطقة وراها مغسلة ولين 90 سم مرتفع معناها من بايب المغسلة أو حتى الشاور .. والتكسير بيكون سهل جداً في الطابوق ويتعدل التسريب بلحام أو بوصلة بايب جديدة ونترك شوي نشوف لو التسريب يرجع .. لو فني شاطر يقدر يسوي كل شيء في ساعتين ويحط حتى بلاستر

الأهم حماية البيت والصبيات وآخر شيء يجي الصبغ أو ورق جدران أو أي تشطيب ثاني

بالضبط هذا الي ناوية اسويه اصلح التسريب بالاول

اماكن التسريب واضحة .. في ظهر المغسلة

وان شالله بعالج المشكلة .. بس القى وقت :(

بالنسبة لجهاز قياس الرطوبة ممكن اسمه او ماركته .. شكله مفيد

اما صلعة رفيجك مالها حل هههههههههههه
معماري قطري
13-01-2016, 09:28 PM
يكشف الرطوبة اللي في راحة اليد .. إحتمال تحصلينة عند ناصر بن خالد فرع بوش .. هذا اسمه profi scale - Burg Wachter الجهاز ألماني وحتى الاسم .. خذت المآلتي دتكتور للحديد وللكهرباء وخذت جهاز الرطوبة .. بس شحادج لهم ما دام الرطوبة واضحة وتبين خليهم يكسرون من صوب الغرفة حتى ما يخترب البلاط

الإحتمال الضعيف إن وقت الوضوء عند المغسلة يتنطش الماء على الطوفة ويتخلل المونة بين البلاط ويوصل للجهة الثانية من الحائط وفي هالحالة ممكن تسوين مونة ثانية بس القديمة لازم تزال قبل ويركبون ثانية قوية ومتماسكة
Qt.1
15-01-2016, 01:22 PM
موضوعج جدا مهم انا من النوع الدقيق يعني محكر لهم صح , ماحب اشوف عيوب واخطاء حتى لو كانت صغيره , مع اني اشوف هالطبع احيانا يكون مهب زين لكن بما اني دافع مبلغ وقدره من حقي اشوف شغل عدل في بيتي انا مهب باني بيت تجاري وبأجره , هذا جزء عندي في البيت للصاله كل الي تشوفينه من اللوان للصبغ او للديكور كله من اختياري الشخصي وتم تنفيذه لي ,,

http://cdn.top4top.co/p_140wcm1.jpg (http://up.top4top.net/)
معماري قطري
15-01-2016, 03:50 PM
ما شاء الله .. الله يبارك لك في بيتك يا بو عبدالله

بس طلعت بخيل علينا صورة وحدة ما توضح لنا كل شيء نبي الحيثيات الصغيرة وصور أكثر
معماري قطري
15-01-2016, 03:53 PM
الله يعينك على التأَثيث وقت التأثيث مؤكد بعض الجماليات بتختفي وشيء مهم لازم الصبغ والتشطيب والكهرباء يتماشون مع التأَثيث من الأساس .. حتى يفترض من بدايات التصميم ندمج موضوع الفراغات مع التأَثيث ومع مجال الحركة ومع النور الطبيعي والصناعي
Qt.1
15-01-2016, 05:01 PM
ما شاء الله .. الله يبارك لك في بيتك يا بو عبدالله

بس طلعت بخيل علينا صورة وحدة ما توضح لنا كل شيء نبي الحيثيات الصغيرة وصور أكثر

الله يرحم لي والديك , ولو بصور بطول السالفه الصاله كبيره وفيها ديكورات وتشاكيل وايد بس حبيت اعطي اختنا فكره ان الشخص احسن يتابع كل صغيره وكبيره , وعن التاثيث الحمدالله تقريبا خلصت النص بفضل الله وباقي شي بسيط كم غرفه بس الي ماحتاجهم في الوقت الحالي اجلتهم لين عقب ,,,
معماري قطري
15-01-2016, 05:12 PM
الله يرحم لي والديك , ولو بصور بطول السالفه الصاله كبيره وفيها ديكورات وتشاكيل وايد بس حبيت اعطي اختنا فكره ان الشخص احسن يتابع كل صغيره وكبيره , وعن التاثيث الحمدالله تقريبا خلصت النص بفضل الله وباقي شي بسيط كم غرفه بس الي ماحتاجهم في الوقت الحالي اجلتهم لين عقب ,,,

ووالديك في الجنة إن شاء الله .. وانت كريم أكيد مع اخوانك شوي كلمة بخيل تعتبر استعارة وانا طماع لو تحط 10 صور ابي أكثر خصوصاً من هالصور الجميلة والواقعية واللي انعملت بمتابعة ذاتية

الله يوفقك والتأَثيث على مراحل شيء ضروري ويخلينا نختار المناسب خصوصاً بعد ما نسكن
sweet qatar
17-01-2016, 10:02 AM
انا من فترة صبغت والصباغ كان جيد بس المشكلة كانت في الاساس الي سواه لي مصري حسبي الله ونعم الوكيل فيه .. قبل لا يشتغل الصباغ قالي خلص الاضاءة عقب بشتغل ..

وصح كلامه عقب ما خلصت الليتات طلعت الفضايح والتموجات في المعجون وحسب كلام الصباغ حتى المعجون مغشوش ومخلوط بمواد ثانية مع ان فرق السعر 20 ريال للكيس بس .. وهالسرقات والغش منتشر عند هالنوع من الشغل ..

بعد ما حاول يعدل التموجات قالي بتصير عندنا مشكلة مع تماسك الصبغ بسبب الاساس الضعيف ..

اخترت اصباغ رغدان وحتى اني تعلمت من اليوتيوب شلون يسوونها وبدى الشغل ..

الشغل بشكل عام حلو بس حصلت مشاكل في الاماكن الي بغيت فيها خطوط فارقه بين الاصباغ والالوان .. هناك تعب الصباغ لان كل ما بغى يحط فوارق كانت تشيل الصبغ ! .

قبل كم شهر بنتي لزقت صورة على الجدار .. ومن شليتها قام الصبغ معاها >___< .. نفس ما قال الصباغ مشكلة الاساس مالها حل الا ان تشيله بالكامل وانا كنت مستعجل وما شليته قبل الشغل .


اشكرك على عرض التجربة وان شالله الكل يستفيد من الخطأ الي ارتكبته ..

الاستعجال ما يفيد وكل شي لازم تتاكد من جودته قبل لاتنتقل للخطوة الي بعدها
حتى بعض مراحل الصبغ لازم تاخذ وقت معين ممكن يصل ليومين .. لو تم تجاهل هالفترة بعد بتطلع لنا عيوب

وانت طرحت نقطة مهمة جدا جدا جدا


الاضاءة قبل الصبغ


مثل ما ذكرت اخوي ريكو اولا بتبين معاك عيوب الشغل قبل التغطية

ثانيا لون الصبغ يفرق مع الاضاءة

فاختيار اللون من باليت الالوان غير لما يصير على الطوفة .. ووقتها ممكن تغيير اللون بكل سهولة
sweet qatar
17-01-2016, 10:10 AM
موضوعج جدا مهم انا من النوع الدقيق يعني محكر لهم صح , ماحب اشوف عيوب واخطاء حتى لو كانت صغيره , مع اني اشوف هالطبع احيانا يكون مهب زين لكن بما اني دافع مبلغ وقدره من حقي اشوف شغل عدل في بيتي انا مهب باني بيت تجاري وبأجره , هذا جزء عندي في البيت للصاله كل الي تشوفينه من اللوان للصبغ او للديكور كله من اختياري الشخصي وتم تنفيذه لي ,,

http://cdn.top4top.co/p_140wcm1.jpg (http://up.top4top.net/)



ينصر دينك :app2:

هذا المطلوب اخوي بوعبدالله .. ان احنا نطلب الشغل على المستوى الي يرضينا

يحق لك تكون دقيق .. و قاعد لهم على الحبه في الاخير هذا بيتك يعبر عنك .. اي خطأ بسيط بتعديه الحين ممكن بعد اكتمال الديكورات يبين واضح

ماشالله الشغل وايد حلو .. الله يبارك لك فيه
Qt.1
17-01-2016, 09:15 PM
ينصر دينك :app2:

هذا المطلوب اخوي بوعبدالله .. ان احنا نطلب الشغل على المستوى الي يرضينا

يحق لك تكون دقيق .. و قاعد لهم على الحبه في الاخير هذا بيتك يعبر عنك .. اي خطأ بسيط بتعديه الحين ممكن بعد اكتمال الديكورات يبين واضح

ماشالله الشغل وايد حلو .. الله يبارك لك فيه

ويبارك فيج يارب ,,
معماري قطري
17-01-2016, 10:14 PM
إن شاء الله باقدم على صبغ بيتي مع بعض التغييرات وبنتناقش في هذي التغييرات

في البداية ناوي اركب درج حديد للعمال حتى يصبغون من فوق وصوب البنتهاوس وباركب حديد ساتر بين بيتي والجيران .. عندي الدرايش جاية فوق بعض وداخلة 5 سم يعني سطح واجهة الدرايش داخل 5 سم عن واجهة البيت .. وهذي ناوي اسويها بلون ثاني .. خاطري في البيج الخفيف أو بين الرملي والطيني والباقي أبيض .. بس باحط جي ار سي أبيض في مكان البيج وبتشكيلات فيها فتحات تبين الخلفية البيج وفي نفس الوقت تكون إنتقال سلس من الأبيض للبيج

شرايكم آغير الألوان مع إقتناعي بالأبيض للباقي + عندي قرميد أَصفر فاقع كتحديد وتظليل فوق الدرايش .. ولو خليت خط الدرايش أخضر فاتح بينفع بعد الأخضر مع الصفيري يتفاهمون شرايكم
Dana’1
18-01-2016, 01:41 AM
آه يا سويتي من جد موضوع عالوتر
ماشفت صباغ صاحي ومتخصص للحين إلي عنده يدلني*
لو تشوفين الصبغ عندي في بعض المناطق بدا يتقشر مع إنه مكلف
واعادة صبغه بعد مكلف لان بيصبغ المكان كامل!

ورق الجدران ممكن يكون حل احيان لكن بعد لازم يكون شغل نظيف أو بيدمر المكان أكثر



للأمانه أنا لما اقارن الشغل هنا بقطر مع الشغل بالسعوديه مثلا كثييير يفرق هناك ارتب وانظف بكثيير

مع إنها نفس الجنسيات!

شسالبب ياترى؟!!
Qt.1
18-01-2016, 11:56 AM
آه يا سويتي من جد موضوع عالوتر
ماشفت صباغ صاحي ومتخصص للحين إلي عنده يدلني*
لو تشوفين الصبغ عندي في بعض المناطق بدا يتقشر مع إنه مكلف
واعادة صبغه بعد مكلف لان بيصبغ المكان كامل!

ورق الجدران ممكن يكون حل احيان لكن بعد لازم يكون شغل نظيف أو بيدمر المكان أكثر



للأمانه أنا لما اقارن الشغل هنا بقطر مع الشغل بالسعوديه مثلا كثييير يفرق هناك ارتب وانظف بكثيير

مع إنها نفس الجنسيات!

شسالبب ياترى؟!!

الصباغ عندي ولتشيلين همه , وعندي بعد لج صبغ ممتاز وسعره جدا معقول وانا تقريبا بيتي من هالنوعيه وصدقيني كل ماتشوفين الطوفه بتدعين لي , اذا لج خاطر راسليني وبرتب لكم وياه ,
معماري قطري
18-01-2016, 03:55 PM
بو عبدالله إخوي أرسل لي الرقم ولا عليك أمر بس بشرط ما يكون عربي

صبغ بيتي الخارجي بيكون عن طريق مقاول وهو بيرتب كل شيء لأن فيه تركيب كورنيشات بسيطة وتغيير وفيه الحاجز المعدني فوق الجدار بطول 40 متر وارتفاع متغير من 1.5 متر إلى 4 متر مع تركيب إنارة مع درج حديد حلزوني للخدمات للسطح .. الدرج قال بيكلف 6000 والحاجز 9000 والصبغ بيكلف 30 ريال للمتر أول إزالة للموجود بالسفع بالرمل ولازم يركب حمايات للدرايش والأبواب حتى ما يخدشها الرمل .. وبعدين البرايمر الخاص من جوتن ومتناسب مع جوتاشيلد وبعدين التكسجر من جوتاشيلد بمكينة رش .. وبعدين قاطين صبغ من جوتاشيلد بعد وحسب مواصفاتهم
معماري قطري
18-01-2016, 03:58 PM
آه يا سويتي من جد موضوع عالوتر
ماشفت صباغ صاحي ومتخصص للحين إلي عنده يدلني*
لو تشوفين الصبغ عندي في بعض المناطق بدا يتقشر مع إنه مكلف
واعادة صبغه بعد مكلف لان بيصبغ المكان كامل!

ورق الجدران ممكن يكون حل احيان لكن بعد لازم يكون شغل نظيف أو بيدمر المكان أكثر



للأمانه أنا لما اقارن الشغل هنا بقطر مع الشغل بالسعوديه مثلا كثييير يفرق هناك ارتب وانظف بكثيير

مع إنها نفس الجنسيات!

شسالبب ياترى؟!!

السبب اتوقع القوانين الهندسية الواضحة واللي له حق واضح ياخذه بالقانون وبسرعة .. اللي عندنا عمالة فايضة ومهدودة في الشوارع ويسون كل شيء وبنشوف مع القانون الجديد شيصير
sweet qatar
19-01-2016, 12:05 AM
إن شاء الله باقدم على صبغ بيتي مع بعض التغييرات وبنتناقش في هذي التغييرات

في البداية ناوي اركب درج حديد للعمال حتى يصبغون من فوق وصوب البنتهاوس وباركب حديد ساتر بين بيتي والجيران .. عندي الدرايش جاية فوق بعض وداخلة 5 سم يعني سطح واجهة الدرايش داخل 5 سم عن واجهة البيت .. وهذي ناوي اسويها بلون ثاني .. خاطري في البيج الخفيف أو بين الرملي والطيني والباقي أبيض .. بس باحط جي ار سي أبيض في مكان البيج وبتشكيلات فيها فتحات تبين الخلفية البيج وفي نفس الوقت تكون إنتقال سلس من الأبيض للبيج

شرايكم آغير الألوان مع إقتناعي بالأبيض للباقي + عندي قرميد أَصفر فاقع كتحديد وتظليل فوق الدرايش .. ولو خليت خط الدرايش أخضر فاتح بينفع بعد الأخضر مع الصفيري يتفاهمون شرايكم

كنت احاول اتصور الوضع لين وصلت للاصفر !! ماقدرت اتخيله

ولاعليك امر زودنا بالصور عشان اعطيك رايي الفني :o


والله يوفقك
sweet qatar
19-01-2016, 12:22 AM
آه يا سويتي من جد موضوع عالوتر
ماشفت صباغ صاحي ومتخصص للحين إلي عنده يدلني*
لو تشوفين الصبغ عندي في بعض المناطق بدا يتقشر مع إنه مكلف
واعادة صبغه بعد مكلف لان بيصبغ المكان كامل!

ورق الجدران ممكن يكون حل احيان لكن بعد لازم يكون شغل نظيف أو بيدمر المكان أكثر



للأمانه أنا لما اقارن الشغل هنا بقطر مع الشغل بالسعوديه مثلا كثييير يفرق هناك ارتب وانظف بكثيير

مع إنها نفس الجنسيات!

شسالبب ياترى؟!!

:weeping:

سلامتج من الآه يالغاليه

الغش منتشر بشكل كبيرررر .. كنهم متفقين محد يشتغل عدل او يعلمون بعض غلط

وعندنا في قطر ثقافة "مش حالك" الناس ما لها بارض ولا نفس مع العمال

فللاسف الشغل عندنا مب على السعر ... خبرج الناس ماشالله دفيعه لكن العمال حتى العليمي شايف نفسه

انزين مافي مجال ترجعين للشركة الي نفذت لج الشغل تحل المشكلة ؟

وليش يصبغون الطوفة كلها .. اذا انتي معتمدة شكل التعتيق احس التعديل سهل
Dana’1
19-01-2016, 04:50 AM
:weeping:

سلامتج من الآه يالغاليه

الغش منتشر بشكل كبيرررر .. كنهم متفقين محد يشتغل عدل او يعلمون بعض غلط

وعندنا في قطر ثقافة "مش حالك" الناس ما لها بارض ولا نفس مع العمال

فللاسف الشغل عندنا مب على السعر ... خبرج الناس ماشالله دفيعه لكن العمال حتى العليمي شايف نفسه

انزين مافي مجال ترجعين للشركة الي نفذت لج الشغل تحل المشكلة ؟

وليش يصبغون الطوفة كلها .. اذا انتي معتمدة شكل التعتيق احس التعديل سهل


الله يسلمك غلاي
صادقه الغش منتشر تدرين كنت مشتطه على بعض الديكورات ويوم جيت اطبق بس وحده على سقف المجلس الرئسي إلا يقولي ماعندنا نفس القوالب المطلوبه بس اقدر اسوي قريب منها

يوم بدا شغل الا دمار شامل ماتدرين هو ورد هو حبال هو ثعابين شي غير الي انا طلبته شوي وابكي
قلت لا خلاص ما ابغى انسى الفكره خلها ساده حك الي سويته كله بلاها ديكور


وعقبها ما سويت اي ديكور بالبيت والسبب هالشي ما اعرف احد اثق بشغله وقتها
والحين عالراحه بدور وإن شاءالله خير


بالنسبه للصبغ
هم قالولنا عشان اللون يكون واحد لان يبغاله حك وكذا الا ما يأثر عالمنطقه الي حولها على الاقل لازم يصبغ جدار كامل!

نوع الصبغ كادورو

يعطيك العافيه عالتفاعل^_^
Dana’1
19-01-2016, 04:56 AM
الصباغ عندي ولتشيلين همه , وعندي بعد لج صبغ ممتاز وسعره جدا معقول وانا تقريبا بيتي من هالنوعيه وصدقيني كل ماتشوفين الطوفه بتدعين لي , اذا لج خاطر راسليني وبرتب لكم وياه ,



جزاك الله خير الصوره الي حطيتها رروعه ماشاءالله تهنيتو عساه منزل مبارك يارب
Dana’1
19-01-2016, 05:04 AM
السبب اتوقع القوانين الهندسية الواضحة واللي له حق واضح ياخذه بالقانون وبسرعة .. اللي عندنا عمالة فايضة ومهدودة في الشوارع ويسون كل شيء وبنشوف مع القانون الجديد شيصير

بصراحه كلامك صحيح*وإن شاءالله خير
sweet qatar
19-01-2016, 03:50 PM
الله يسلمك غلاي
صادقه الغش منتشر تدرين كنت مشتطه على بعض الديكورات ويوم جيت اطبق بس وحده على سقف المجلس الرئسي إلا يقولي ماعندنا نفس القوالب المطلوبه بس اقدر اسوي قريب منها

يوم بدا شغل الا دمار شامل ماتدرين هو ورد هو حبال هو ثعابين شي غير الي انا طلبته شوي وابكي
قلت لا خلاص ما ابغى انسى الفكره خلها ساده حك الي سويته كله بلاها ديكور


وعقبها ما سويت اي ديكور بالبيت والسبب هالشي ما اعرف احد اثق بشغله وقتها
والحين عالراحه بدور وإن شاءالله خير


بالنسبه للصبغ
هم قالولنا عشان اللون يكون واحد لان يبغاله حك وكذا الا ما يأثر عالمنطقه الي حولها على الاقل لازم يصبغ جدار كامل!

نوع الصبغ كادورو

يعطيك العافيه عالتفاعل^_^


هلا حبيبتي


ان شالله تلقين الي يسوي لج الي تبينه


الكادورو هو نفسه التعتيق "ان ما كنت غلطانه" يجي بعده اشكال حسب الادوات المستخدمة

المهم التعديل يبي له فن بس مش مستحيل ولا يحتاج صبغ جدار كامل !!!

كل السالفة انهم يحاولون يصلحون اماكن التشققات ويعيدون الصبغ عليها

ولان التعتيق للطوفه يتم باعتماد اكثر من shade للون ممكن تمويه اماكن التعديل بحيث تندمج مع الطبقه السابقه
وعشان نحصل نتيجة متناسقة نحط coat اخير عام لكل الطوفة

انتي تقدرين تقيمين المشكلة ديور اذا ممكن تنحل بسهوله او لا .. وماعليج منهم لو فاهمين صح ما طلعت من وراهم هالمشاكل
معماري قطري
19-01-2016, 04:06 PM
كنت احاول اتصور الوضع لين وصلت للاصفر !! ماقدرت اتخيله

ولاعليك امر زودنا بالصور عشان اعطيك رايي الفني :o


والله يوفقك

صورت بس الصور عندي تبين عدلة لين نزلتها تطلع مقلوبة عقدتني صراحة

المهم هذي الأُولى وكنت حاط القرميد بس علشان اوازن سقف القرميد اللي جاي على غرفة بارزة على مدخل البيت وتظلل تحتها استعملها مكتب لي وما ركبوه صح بعد .. في القوس اللي فوق النافذة ناوي اركب قطعة جي آر سي وسطية وتحت في خط النافذة ناوي اركب جي آر سي بنقوش معينة

http://i.imgur.com/K4SmBpG.jpg

الخلفية هذي اللي داخلة 5 سم محتار شاصبغها .. لو القطع اللي باركبها بلون حجري مثلاً بني فاتح أو بيج الخلفية آخليها بيضا مع البيت كله .. ولو القطع بيضا والبيت أبيض الخلفية هذي أخليها رملية أو بنية فاتحة أو خضرا فاتحة

وهذي الصورة الثانية تبين التحديد أكثر

http://i.imgur.com/egt9VW8.jpg
معماري قطري
19-01-2016, 04:13 PM
سامحوني ما قدرت اعدل الصورة أول مرة اواجه هالوضع

يبين الصبغ شلون متقشر وغش .. ألحين إن شاء الله صبغ جوتاشيلد بيكلفني أقل من هذا الصبغ الغش .. عن طريق شركة ثانية بيكلفني حول 100000 لكن عن طريق الباكستانيين بيكلف حول 30000 وباوافيكم بشغل الصبغ لين بدوا فيه إن شاء الله
sweet qatar
19-01-2016, 04:24 PM
الله يوفقك و يكتب لك النتيجة الي ترضيك

الصور يبيلي انزلها عندي عشان اشوفها عدل

شرايك نجرب الالوان في الفوتوشوب ؟
معماري قطري
19-01-2016, 04:31 PM
الله يوفقك و يكتب لك النتيجة الي ترضيك

الصور يبيلي انزلها عندي عشان اشوفها عدل

شرايك نجرب الالوان في الفوتوشوب ؟

تبين الصراحة ما اعرف لو تساعديني فيها تسوين خير .. ناوي اسوي التشكيلات رسم بس بعد بتواجهني مشكلة إن العرض عندي مختلف من دريشة لدريشة ولازم تكون التشكيلة مدروسة صح لتناسب كل الدرايش
معماري قطري
19-01-2016, 04:35 PM
شكلي وجدتها ( I Found It ) باخلي الكرنيش يكون عادي بتشكيلة عرضية وبيناسب كل الدرايش وبيكون بسيط بس نركز على الخلفية ولون الكورنيش
sweet qatar
19-01-2016, 05:09 PM
تبين الصراحة ما اعرف لو تساعديني فيها تسوين خير .. ناوي اسوي التشكيلات رسم بس بعد بتواجهني مشكلة إن العرض عندي مختلف من دريشة لدريشة ولازم تكون التشكيلة مدروسة صح لتناسب كل الدرايش

تحت امرك .. ارسمها على الاوتوكاد وانا بلونها في الفوتوشوب
معماري قطري
19-01-2016, 11:59 PM
تحت امرك .. ارسمها على الاوتوكاد وانا بلونها في الفوتوشوب

ما يامر عليج عدو .. إن شاء الله
معماري قطري
21-01-2016, 11:19 AM
تشاورت ووصلت لقرار بخصوص الصبغ .. يكون كله مصبوغ أبيض حتى الكسرات وقطع الجي آر سي البسيطة تكون بيج وباركب ليتات ال اي دي صغيرة في الحائط تزينية وباوافيكم بصور شغل الصبغ إن شاء الله

يركبون السقالات الحين من جهة ويشتغلون في ساتر الحديد من جهة ثانية .. والكاميرات مركبها وتمديداتها خارجية أقدر اسويها داخلية وهذي فرصتي البتان ما يقصرون

مسوي لستة واشتغل عليها شيء بشيء ومشكلتي كسول شوي في المشاوير .. آبي الليتات اللي تعطي خطوط على الطوفة .. 4 وبلون أزرق .. حد يعرف وين احصلها؟
sweet qatar
26-01-2016, 05:18 PM
للحين ما رسمت الدريشه على الاوتوكاد ؟


ماعرف وين ممكن تحصل هالليتات ان شالله الاعضاء يفيدونك
معماري قطري
27-01-2016, 12:21 AM
للحين ما رسمت الدريشه على الاوتوكاد ؟


ماعرف وين ممكن تحصل هالليتات ان شالله الاعضاء يفيدونك

حصلتها وشريتها بس بالنسبة للرسمة ذكرت لج فوق ما ابي اكلف عليج الرسم أكيد يكون غير والواقع غير .. خايف أغامر مع إني من محبين الألوان .. لو البيت كله أبيض بيطلع أحلى مع الإضاءَة التجميلية وقطع الجي آر سي بابرزها بلون قوي مثل القرميد .. تعبوني في إزالة الصبغ القديم لهم 8 أيام من صبح للمغرب شغل وأرضية البيت كلها صبغ وقربوا يخلصون الواجهة الثالثة .. باقي جهة شوي صعبة تحتاج تثبيت حديد في الحائط فوق السكايلايت اللي بين المطبخين .. ولو طاح شيء بيكسر البلاستيك المغطي للسقف .. ما ادري اخليها واخلي الجهة الخلفية بالكامل

بس صج المصري اللي صبغ قبل غشنا ولو كنت موجود ما خليته يصبغ .. حتى سقالات ما ركب ولا اشتغل صح وصبغ بصبغ رخيص مب المطلوب .. الباكستاني جيد ومهتم وإن شاء الله تطلع النتيجة مرضية .. طلبته يدخل وايرات الكاميرات في الحائط قال ما فيه مشكلة البلاستر 3 سم وبنسوي شق بالغريندر وبنحط بايب بلاستيك وبندخل الوايرات .. العازل للرؤية ركبنا له فريم حديد قوي وثبتناه بالبراغي وهذا باركب عليه بعد اضاءَة تجميلية وباركب كشاف ال اي دي ينور على وسط دوار على المدخل .. ألوان الإضاءَة بتكون بيضاء فضية وزرقا وحمراء .. هههههههه خايف حد يدخل يحسب صالون مغامرة والتراجع عنها سهل .. برا بتكون الإضاءَة بيضا متناسبة مع اضاءَة السور
معماري قطري
27-01-2016, 12:27 AM
المراحل بعد إزالة الصبغ بتجي صنفرة بالحجر لإزالة المتبقي وتعديل البلاستر ومعاها بيجي التجهيز للتمديدات للإنارة والكاميرات وبعدها البرايمر الخاص وبعدين طبقة التكسجر اللي بتكون تأسيس بمكينة رش تسد أي فجوات في البلاستر وتعطي تشكيل خاص وفوقها تجي طبقتين صبغ ورشة تلميع نهائي

أصعب مرحلة هذي والجاية أما الصبغ بيكون سريع إن شاء الله
sweet qatar
28-01-2016, 12:19 AM
حاولت ارسم الواجهة على الاوتوكاد بديت بالدرايش بس احس ما ضبطتها .. ان شالله بحاول فيها بعد عساها تضبط


فعلا هذي اهم مرحلة .. هالمرحلة مثل ما يسميها واحد من الي اتابعهم على سناب ( ماجد) الطرطشه

ويقول انه يحرص على العمال انهم يغطون الطوفه بالطرطشه لدرجة التغطيه الكامله بحيث لون الطابوق يختفي تماما
معماري قطري
28-01-2016, 12:50 AM
حاولت ارسم الواجهة على الاوتوكاد بديت بالدرايش بس احس ما ضبطتها .. ان شالله بحاول فيها بعد عساها تضبط


فعلا هذي اهم مرحلة .. هالمرحلة مثل ما يسميها واحد من الي اتابعهم على سناب ( ماجد) الطرطشه

ويقول انه يحرص على العمال انهم يغطون الطوفه بالطرطشه لدرجة التغطيه الكامله بحيث لون الطابوق يختفي تماما

هذي بالنسبة للبلاستر قبل عمل البلاستر .. الطرطشة عبارة عن عمل مسامير من الإسمنت الخالص أو الشبه خالص والمخلوط بماء قليل وتنرش ببروش أو بمكينة خاصة .. وتنرش بالماء لتتفاعل وتقوى وتيبس وبعدها ينعمل البلاستر بالضرب فوقها بالسكين وتسويته بالميزان الطويل وهناك طرق كثيرة لعمل البلاستر غير

عيل ما شاء الله دخلتي عصر الأُوتوكاد؟ هو برنامج ضخم وقوي وغالي وكل تحديث يتعقد أكثر .. انا بديته من اصدار 12 سنة 94 تقريباً وتعلمت من كتاب من 1200 صفحة اقرا واطبق .. حتى إني أجدت الثلاثي الأبعاد والإنارة الطبيعية للشمس وحسب موقع واتجاه المبنى في الكرة الأرضية والوقت والتاريخ لدراسة الظلال .. وطبقتها على مظلة مشاهدين وكانت ناجحة .. وكلمت استشاري يطبقها على مظلة أُخرى وكان ما يعرف شاتكلم عنه بس يقول ماشي يأفندم وبعد التنفيذ الا المظلة مرتفعة والشمس تصلخ اللي تحتها .. يمكن التظليل بس لآخر الصفوف

ألحين تطور البرنامج كثير واستوى يحتاج دراسة جديدة وبرمجة خصوصاً للألوان ولمكتبة المواد وما قدرت اتابع بكتاب مختص

الكتب للي حاب يتابع موجودة في www.4shared.com يسوي سيرش عن بي دي اف فايل حق الاوتوكاد وبيحصل كتب وايد .. وللبداية اللي عنده سؤال مستعد اجاوبه لكن من يدخل عميق يستعين بالغير

بالنسبة للدرايش عندي متغيرة بعضها عرضها 80 سم وبعضها 2.6 متر وأعتقد عندي حول 3 متر .. القوس ارتفاعه 30 سم من الأكتاف وارتفاع الكتف مترين .. والدريشة جاية في حائط 15 سم بين حائطين يمين ويسار 45 سم .. حول 15 سم داخل كتجويف للستارة و5 سم كتجويف خارجي يحدد مكان الدريشة

هذي الطريقة نفعتني في تقليل الصوت الخارجي وفي إغلاق الستائر بالكامل وفتحها بالكامل وهي داخل تجويف خاص بها .. وتاج الستارة يستوي بسيط ومتساوي مع الحايط من داخل

من زمان كل ما حبيت اوضح هذي النقطة بروحي احصل صعوبة في شرحها ولو بارسمها كثيرين ما بيفهمون الرسمة الا المختصين
sweet qatar
28-01-2016, 01:15 AM
وي يعني الطرطشة غير !!

انا ضعت بين المسميات .. لكن بصراحة استفدت وايد وااااايد من السناب خصوصا من السعوديين والكويتين .. اما اهل قطر ما يبون يفيدونا :)


اصبر علي شوي اتعلم على الاوتوكاد صح .. والسكيتش اب .. وان شالله كل شي بيتوضح بالصور
معماري قطري
28-01-2016, 09:49 AM
وي يعني الطرطشة غير !!

انا ضعت بين المسميات .. لكن بصراحة استفدت وايد وااااايد من السناب خصوصا من السعوديين والكويتين .. اما اهل قطر ما يبون يفيدونا :)


اصبر علي شوي اتعلم على الاوتوكاد صح .. والسكيتش اب .. وان شالله كل شي بيتوضح بالصور

طريقج طويل وممتع وسهل لو قريتي وطبقتي

في الأُردن خذت كورسات عدة بمجموع 11 مادة في مركز تدريب المهندسين .. الكورسات متنوعة ويعطونا إياها مهندسين كبار في السن وتعبر عن عصارة تجاربهم العملية مع شوية علم والأكثر عملي .. من ضمنها الاوتوكاد والعزل الحراري وغيرهم .. في الاوتوكاد المهندس يشرح طريقة مطولة شوي لشغلة وانا اطبق بطريقة مختصرة يمكن من 10 خطوات لخطوتين .. قلت له جرب بالطريقة الفلانية قال مبصرش ولو صار أبصر إيش يا زلمة بتكون علمتني إشي ما تعلمته من قبل .. انا استانست لأني كنت اطبق بسرعة والف وادور في الكمبيوتر وربعي عليمية يتابعون معاه .. يوم جرب الا يطالعني ويسئل شلون عرفت هذا الاختصار .. قلت من الكتب .. للأسف الكتب العربية معقدة وأفكارها محدودة وشرحها ممل لكن الأجنبية خصوصاً الانجليزي ومن دور نشر كبيرة فيها جذب أكثر للقاريء وأفكار أكثر
معماري قطري
30-01-2016, 01:50 AM
متابعة الصيانة وتقشير الصبغ القديم مع العمال وجع راس وتحتاج عمل لستة والتعديل عليها حسب المستجدات

بداية الشغل ما فيها شيء غريب .. من الأربعاء 20 - 1 لين بكرة بتكون مرت 10 أيام ودخلنا السبت

صورت شوي بعد الظهر بس ذبحني البرد والصور ما توضح كل شيء .. باقي من الساتر بين بيتي والبيوت الثلاثة الإيجار شوي بكرة بيخلصونه الحدادين والجزء الباقي فوق الملحق وهو الجزء البسيط واللي اكتمل يمر فوق طبيلة الكي سبان بطول حول 12 متر بجسر حديد بهذا الطول وبدون أعمدة تخرق الكي سبان وبدون إزالة الكي سبان مثل ما طلبوا من قبل

وهذي صورة لطرف الطبيلة المركبة على سور البيت وجزء معلق على حائط البيت

http://i.imgur.com/ZE1kwEI.jpg

وهذي الجهة الثانية وتبين غرفة السواق ويبين لنا الحديد تحت والصبغ المزال ملطخ الأرض .. باقي الصبغ اللي ماسك بيسون له حك ببروش حديد وقرطاس شامي قبل البرايمر

http://i.imgur.com/vuEQdEK.jpg

هنا يبين لنا الساتر وإن شاء الله شكله مقبول ويكون قوي وعملي .. بغيته ساتر أمني ما ينشقح بسهولة ويستر الملاحق الخلفية اللي مسوينها المؤجرين

http://i.imgur.com/4GkPKnN.jpg?1

العمدان الحديد تم تثبيتها من تحت ببراغي وفي الجدار ببراغي بدون حفر وبلحام جيد

http://i.imgur.com/4GkPKnN.jpg?1

بعد الإنتهاء بصور صور ليلية مع الإنارة إن شاء الله وباتابع بباقي الصور وقت آخر
معماري قطري
30-01-2016, 01:53 PM
باكمل اليوم مع بعض الصور وباركز على الشرح أكثر لأَن فيه توضيح لبعض المشاكل

مثلاً هذي صورة من المكتب جهة الدرايش اللي جاية في خط واحد وب 5 سم داخلة على داخل وفوقها تشكيلة القرميد .. هذي ما تركبت صح ولو باعدلها الحين بناخذ وقت أكثر ولا القطع موجودة وخصوصاً للزاوية كاملة .. اللي يلاحظ فوق مرقعين اتصالها مع السطح العمودي بالإسمنت بطريقة متموجة وهذي شفتها في بيوت كثيرة .. والصح نقطع القطع الأخيرة بزاوية الميلان بحيث تركب لاصقة في الحائط اللي وراها

http://i.imgur.com/L1qLUx4.jpg

نشوف كذلك يسار الصورة البيوت اللي في الجنب كيف مفتوحة ومنظرها داخل مزعج مع مشكلة اتصال الملحق عندهم مع ملحق بيتي وممكن يسبب خطورة وسهولة انتقال للأشخاص للسرقة أو للهروب

في الصيانة والإضافات لازم نحاول نصلح كل السلبيات .. عندي مثلاً كنت مركب كاميرات بوايرات خارجية وبيدخلونها في الطابوق والحين يقصون لها كذلك كلمت إخونا حسن الأحمد بخصوص تركيب بعض قطع الحجر كتحديد لأسفل النوافذ مع ما تسمى كي ستون وسط القوس .. مع إضافة بعض نقاط الإضاءَة التجميلية مكان الاكس في هذي الصورة

http://i.imgur.com/9DeCQOs.jpg

هذي بعض العدة قبل البدء في العمل ونشوف حديد قاعدة العمود بسمك 10ملم ويتركب ببراغي قوية تثبته في الطابوق أو الخرسانة بدون الحاجة للحفر

http://i.imgur.com/QntuIeU.jpg

http://i.imgur.com/eO8Bb4R.jpg

مع نهاية تركيب السقالات وقبل بداية تقشير الصبغ القديم .. بالنسبة لهذا الممر هو ارتداد البيت 3 متر مع الجار واستئذنته إني أركب درج حديد خلف البيت للخدمات ووافق .. قصينا في سور السقف ومع نهاية الصبغ بيتم تركيب الدرج ببراغي وبدون حفر

الأحواض الزراعية تحديدها بينصبغ باللون الطيني الداكن وكذلك أحواض خارج البيت .. الحائط أو السور الخارجي للبيت إن شاء الله بينصبغ بيج مع بعض التحديدات بالبني مع إنارة زينة ومع تحديد أحواض الزراعة بالبني الداكن

هذا دلوار سواق البيت المبروك يشرف على الأعمال ويعتبر مهندس موقع

http://i.imgur.com/ikSIDcQ.jpg?1

http://i.imgur.com/CVlZmZQ.jpg?1

هنا نلاحظ الصبغ شلون متقشر وهو طبقة رقيقة وصبغ جوتاشيلد عبارة عن حماية للطابوق الخارجي والبلاستر من التشققات ومن الحرارة وانا عندي الطابوق الخارجي طيني وعازل يغلف البيت بالكامل ( الفوم الأزرق ) والطابوق الداخلي العادي .. والحمد لله الخارجي اللي فيه شقوق بسيطة من رداءة الصبغ داخل من أحسن ما يكون بسبب الحماية والعزل والجوتاشيلد بيعزل الخارجي بطبقة قوية أيضاً شكل ما بنشوف مع تطور الشغل

http://i.imgur.com/2gSydor.jpg?1

ونتابع لاحقاً بإذن الله
Aozomblue
30-01-2016, 06:45 PM
ما شاء الله اخوي معماري تقرير اكثر من مفيد
جزاك الله خيراً
متابع معاك و لي مشاركة بسيطة ان شاء الله
معماري قطري
30-01-2016, 09:54 PM
ما شاء الله اخوي معماري تقرير اكثر من مفيد
جزاك الله خيراً
متابع معاك و لي مشاركة بسيطة ان شاء الله

الله يجزيك بما دعيت .. انا بروحي ضيف هنا ولا هذا موضوع الإخت سويت قطر وما فتحته الا للمشاركات أكيد

انا مستعد للنقد وودي أصور أكثر بس بعض الأماكن صعبة والبرد ذبحني .. والصبغ كان متقشر وازيل بسرعة بضغط الماي وألحين متابعين الإزالة اليدوية والتكسير لإخفاء الوايرات وإزالة شترات المراوح الخربانة وتركيب غيرها

فكرت اسوي نعلات لبلاط الحوش بس هذا الصبغ قوي وضد الرطوبة والنعلات تحتاج اختيار وشراء وقص ووزنية .. عندي حل إني بعدين اركب قطعة قرانيت أسود أو بلون آخر داكن وتكون بسمك واحد وتتركب كفاصل بين الأرضية والجدار وبتكون جمالية أكثر منها عملية .. يعني تكون شبه دائرية بقطر 5 سم ويمكن 4 سم
معماري قطري
30-01-2016, 10:00 PM
لازم اجدد الفواصل بازالة الماستك القديم وتركيب جديد بعد ما نشطف البلاط الخارجي لتجديد طبقته .. الشطف سهل بس يسونه غالي بعض المحلات المختصة والمكينة الخاصة غالية .. انا باخلي المقاول يشوف مكينة بالاجار ويسوي الشغلة للحوش قبل ولو شفت طلع زين باسوي لدرج الرخام داخل البيت .. البلاط الشعبي اللي بقطع رخام ينجلي والرخام والقرانيت كذلك البورسلان يمكن بعض الأنواع الضعيفة واللي بدون طبقة تزجيج فوق واللي تنخدش بسهولة لكن الأنواع الجيدة اللي ما تنخدش تنظيف وبس
eXpert*
31-01-2016, 08:23 AM
أنا مع فكرة أن يكون عندنا معهد تدريب / ترخيص مهني ،، لكن مع الأسف نسبة كبيرة من اللي راح يتم إجازتهم ناس من تحت الطربيزه !
معماري قطري
31-01-2016, 09:00 AM
أنا مع فكرة أن يكون عندنا معهد تدريب / ترخيص مهني ،، لكن مع الأسف نسبة كبيرة من اللي راح يتم إجازتهم ناس من تحت الطربيزه !

المفروض ضوابط وقوانين ومتابعة وعقاب .. نقدر نستغل المدارس بعد خروج الطلبة .. قليل منها أو نعمل فصول لعدد قليل في بيوت مؤجرة أو شقق في شوارع تجارية

المقاولين الجيدين هم اللي يدربون ويتعبون مع عمالهم .. أذكر فورمان يشتغل في مدماك باكستاني راتبه 20000 وكنت راتبي حول 11000 وانا مهندس وهو فورمان لكن فاهم شغله صح ويدخل مبالغ كبيرة للشركة .. وأي شركة ما فيها عمال جيدين وادارة متمكنة ما تمشي صح في السوق

الفساد سهلة محاربته لو كانت هناك نية صادقة وجهد صحيح وعقاب متناسب
sweet qatar
31-01-2016, 11:49 PM
متابعة الصيانة وتقشير الصبغ القديم مع العمال وجع راس وتحتاج عمل لستة والتعديل عليها حسب المستجدات

بداية الشغل ما فيها شيء غريب .. من الأربعاء 20 - 1 لين بكرة بتكون مرت 10 أيام ودخلنا السبت

صورت شوي بعد الظهر بس ذبحني البرد والصور ما توضح كل شيء .. باقي من الساتر بين بيتي والبيوت الثلاثة الإيجار شوي بكرة بيخلصونه الحدادين والجزء الباقي فوق الملحق وهو الجزء البسيط واللي اكتمل يمر فوق طبيلة الكي سبان بطول حول 12 متر بجسر حديد بهذا الطول وبدون أعمدة تخرق الكي سبان وبدون إزالة الكي سبان مثل ما طلبوا من قبل

وهذي صورة لطرف الطبيلة المركبة على سور البيت وجزء معلق على حائط البيت


وهذي الجهة الثانية وتبين غرفة السواق ويبين لنا الحديد تحت والصبغ المزال ملطخ الأرض .. باقي الصبغ اللي ماسك بيسون له حك ببروش حديد وقرطاس شامي قبل البرايمر

http://i.imgur.com/vuEQdEK.jpg

هنا يبين لنا الساتر وإن شاء الله شكله مقبول ويكون قوي وعملي .. بغيته ساتر أمني ما ينشقح بسهولة ويستر الملاحق الخلفية اللي مسوينها المؤجرين

http://i.imgur.com/4GkPKnN.jpg?1

العمدان الحديد تم تثبيتها من تحت ببراغي وفي الجدار ببراغي بدون حفر وبلحام جيد

بعد الإنتهاء بصور صور ليلية مع الإنارة إن شاء الله وباتابع بباقي الصور وقت آخر


ماشالله تبارك الله ... الشغل على قدم و ساق


اسمح لي بهالسؤال .. بالنسبه للساتر ما يطلع اصوات .. من الهوا او يصير كنه مكبر صوت ؟؟


انت حاطه بس جهة الملاحق صح .. ؟ الله يحفظكم من سالفة الملاحق المتلاصقة بس ذكرتني ببيوت اول :)
معماري قطري
01-02-2016, 01:10 AM
ماشالله تبارك الله ... الشغل على قدم و ساق


اسمح لي بهالسؤال .. بالنسبه للساتر ما يطلع اصوات .. من الهوا او يصير كنه مكبر صوت ؟؟


انت حاطه بس جهة الملاحق صح .. ؟ الله يحفظكم من سالفة الملاحق المتلاصقة بس ذكرتني ببيوت اول :)

مساكين الباكستانيين مجتهدين ومبالغين في البراغي والحديد والسمك مناسب .. كلف 9000 مع إني محصل شوي أرخص بس تأخر علي وعجبني شغل ذيلا متكفلين بكل شيء .. إيه جهة الملاحق وورانا الحديقة يجهزونها للتوسعة وحلو منظرها بيكون .. وإن شاء الله ما يطلع صوت ولو طلع بنركب براغي أكثر فيه أماكن لها .. وورا بعد بنركب درج حلزوني

الحديد باركب عليه ليتات زينة 4 زرق وواحد أحمر اللي يجون شكل إكس بس متخوف يطلعون مب زينين لأَن الحديد مب سيدة فيه مثل الفراغات .. جهة بيت اخوي هو مركب ساتر قماش

مفكر اسوي مجلس خارجي مرتفع والسيارات توقف تحته بس ما اتوقع بيعطوني موافقة
معماري قطري
02-02-2016, 01:40 AM
باتابع معاكم بالصور واتوقع الصورة تشرح نفسها وبنشوف شلون تقشر الصيغ وتجمع مع إنه ينشال أول بأول

http://i.imgur.com/F4WGgSO.jpg?1

بالنسبة للموضوع أخطاء الصبغ المفروض يتغير لغش الصبغ لأَن غالبية الصباغين غشاشين ولا حد يعاقبهم

http://i.imgur.com/RN0tZQg.jpg?1

هنا نلاحظ العمود بالقاعدة الحديد ومركب بالبراغي على الطابوق

http://i.imgur.com/tL0nXsu.jpg?1

http://i.imgur.com/YE5EVKz.jpg?1

أثناء تقشير الصبغ

http://i.imgur.com/Urxh9Wx.jpg?1

http://i.imgur.com/vkVXneC.jpg?1

النقش اللي فوق اسمنت صب مصبوغ وباصبغه كله أبيض حسب نصيحة إخونا حسن الأحمد صاحب شركة العالمية للحجر وتوافق رايه مع رأيي .. كنت بغيت قطع حجر بسيطة بس قال لي صعبة والحين الجي ار سي ما حصلت حد يسويه اللي عنده رقم حد يسوي ويركب جي ار سي يعطيني اياه مشكوراً

طبعاً الحسنة الوحيدة اللي سواها المصري تلبيس العمدان سيراميك مقطع قطع صغيرة شكله يبين نظيف وباخليه

http://i.imgur.com/oda5k8D.jpg

كانت نصيحة حسن إني ما اسوي شيء للدرايش وشكلي بالتزم بها وباصبغ بينهم بالطول بلون غير يمكن رملي أو بيج والباقي أبيض

http://i.imgur.com/XWW2dbK.jpg

http://i.imgur.com/N1ugKSf.jpg

من ضمن الشغل بيكون ترتيب حواف أحواض الزراعة وزيادة التربة للي خارج البيت

http://i.imgur.com/2pvA7hv.jpg

من داخل الطبيلة اللي مسوي واجهتها بتشكيلة اسمنتية وتبين شلون نازلة حتى وقت الدخول اخاف تحك في السيارة

http://i.imgur.com/HTQbRSt.jpg
Aozomblue
03-02-2016, 10:16 AM
اخوي معماري
لو سمحت ايش هاد القرطاس الشامي ؟
معماري قطري
03-02-2016, 10:34 AM
اخوي معماري
لو سمحت ايش هاد القرطاس الشامي ؟

هذا الخشن اللي يحكون به الحديد والخشب والصبغ
Aozomblue
03-02-2016, 07:52 PM
هذا الخشن اللي يحكون به الحديد والخشب والصبغ

تقصد ورق الصنفره ؟
معماري قطري
03-02-2016, 10:02 PM
تقصد ورق الصنفره ؟

إيوا بالضبط ويسمونه قرطاس شامي ما ادري ليش هالإسم
sweet qatar
08-02-2016, 11:35 AM
مساكين الباكستانيين مجتهدين ومبالغين في البراغي والحديد والسمك مناسب .. كلف 9000 مع إني محصل شوي أرخص بس تأخر علي وعجبني شغل ذيلا متكفلين بكل شيء .. إيه جهة الملاحق وورانا الحديقة يجهزونها للتوسعة وحلو منظرها بيكون .. وإن شاء الله ما يطلع صوت ولو طلع بنركب براغي أكثر فيه أماكن لها .. وورا بعد بنركب درج حلزوني

الحديد باركب عليه ليتات زينة 4 زرق وواحد أحمر اللي يجون شكل إكس بس متخوف يطلعون مب زينين لأَن الحديد مب سيدة فيه مثل الفراغات .. جهة بيت اخوي هو مركب ساتر قماش

مفكر اسوي مجلس خارجي مرتفع والسيارات توقف تحته بس ما اتوقع بيعطوني موافقة


قواك الله اخوي معماري على متابعة الموضوع وتدعيمه بالصور



ما اعتقد الليتات الملونة تنفع مع الحديد (الساتر) الي انت حاطه ولا الي لها x shape

الانسب من وجهة نظري تحط اللون الابيض او الاصفر المطفي الي يعطي اضاءة فوق و تحت بس و توزعهم على بعض الفراغات

بخصوص المجلس الخارجي .. انا بعد ماتوقع هههههههههه



بالنسبة لباقي الصور .. ليش للحين ما خلصوا تقشير الصبغ حسبتهم خلصوا قبل تركيب الساتر؟؟ و صدقت والله غش وتلاعب حسبي الله عليهم


والطبيله ليش جذي نازله ؟؟ ارفعها شوي
معماري قطري
08-02-2016, 02:21 PM
الغرض من الطبيلة تظلل السيارات وما بغيتها تبين من برا .. حتى اللي يدخل ما يحس بوجودها

الليتات خذتهم وفكرت في اللي تقصدينهم ومجال التغيير مفتوح .. وبعدين بيكونون فوق الملحق وغرفتي وغرفة ولدي تطل عليهم القصد يعطون شوية منظر

اللي بغيته من الجي آر سي ما حصل للحين وواحد عطانا سعر 14000 بدون عينات على كم قطعة وشكلي باحتد اهون والا اشوف بعدين على راحتي .. الفورمان مسكين تعب معاي بالنسبة للملاحظات والطلبات .. شوي بيدخلون على الشهر وشغلهم يومي حتى الجمعة أوقات يجون .. باروح اشوفهم وباصور بعد وبانزل الصور وقت ثاني
معماري قطري
08-02-2016, 02:23 PM
سالفة رفع الطبيلة ضحكتني تحسبينها سهلة .. هي حديد ملبس خرسانة مشكلة قعدوا يشتغلون فيها حول شهر ونص .. الحديد بروحه قبل وبعدين شغل التكسية
][ Q6r ][
09-02-2016, 03:26 AM
تقريبا اكثريتهم من الجنسيات العربيه فيهم النصب والغش في الصبغ جربت واحد مصري من شركة البتلي وغشني في نوع صبغ الخارجي اختاري هو جوتاشيلد وصبغ لي النوع العادي حسبي الله ونعم الوكيل
تنبيه من التعامل مع هذه الشركة
معماري قطري
09-02-2016, 12:16 PM
[ Q6r ][;10309578']تقريبا اكثريتهم من الجنسيات العربيه فيهم النصب والغش في الصبغ جربت واحد مصري من شركة البتلي وغشني في نوع صبغ الخارجي اختاري هو جوتاشيلد وصبغ لي النوع العادي حسبي الله ونعم الوكيل
تنبيه من التعامل مع هذه الشركة

انا حطيت إكس على الجنسية بالكامل مع إني احب المصريين لكن العمالة المصرية لالالالالالا مش ممكن صادتني عقدة منهم لدرجة لو يجيني شخص يقول جربني ببلاش باقول له شلي بوجع الراس .. إلا زراع صعيدي الله يذكره بالخير هذا ما شفت مثله وكل سنة يختارونه لكل ربيع زهرة
][ Q6r ][
15-02-2016, 04:55 PM
اخوي معماري قطري هذا الزراع من النوادر ....
والله معاناه وصادق والله ياذيك من الحن جاني واحد مصري قلت له عن الاسعار الصبغ الداخلي الكادورو
ومايبي يقولي السعر المتر اصر انه يسوي عينه عندي بالفيلا وقال ومب مختلفين
يوم عمل عينه ومب ذاك الزود واسعاره مرتفعه
مادري ليش اذا قلت لهم سعر المتر يقول اول شي اسوي عينه او اشوف الفيلا او او او
يعني كلها طوفه ويحسب المتر
بالتلفون قول المتر ولا تعطل العالم :)
MAZEN37
15-02-2016, 05:36 PM
اخ معماري ممكن صورة لفكرة التجويف حق الدرايش شلون
مافهمت كيف 15 سم حاولت افهم وادقق بالوصف لكن مخي علققق
معماري قطري
15-02-2016, 06:34 PM
مساء الخير ومباركين ارتفاعات البورصة

يمكن أحسن شيء سويته إني اتفقت في شغل الصبغ مع مقاول عنده كامل التخصصات .. والشركة اللي عطوني سعر صبغ للمتر بحدود 85 كان مبدئي ويوم قدر الشغل قال بيزيد وخوفني إنه يتفق بالباطن .. والحمد لله اللي هداني إني أفكر صح وشفت هذا المقاول المتكامل وناقشت معاه الشغل وقال كله بيسويه من ضمن ال 30 ريال لسعر المتر وعلى كلامه طلعت المساحة 900 متر غير شاملة للبنتهاوس والجهة الخلفية واحس إنه زادها شوي ولا ابي اشيك وراه لأَنه يستحق على التعب اللي تعبه

هذي الواجهة واتفقت على تركيب تاج جي ار سي عطيته تصميمه ولو ما سووه مثل ما ابي بالغيه .. الكورنيش كنت متمني احصل تصميم مناسب بس صعب يسوون دزاين جديد وباشوف بعدين لأَسفل الدرايش فقط

هنا نشوف مكان الليت تم عمل التمديد مخفي له وتم اخفاء بايب تمديدات الكاميرات

http://i.imgur.com/Y20UWnR.jpg

هذي الصورة تعتبر قديمة وتم صبغ هذي المنطقة بس باقي تركيب الليت وقطع الجي ار سي

وهذي صورة من نافذة دورة المياه جهة منزل الجار وهو مقسوم لثلاث ملازم .. طبعاً الارتدادات غير والمساحة صغيرة لكن سوبر قطري ما يقدرون عليه التخطيط .. وهذا البيت الأول بيت عمال عزوب .. إضطروني لعمل زراعة خارج البيت وأحواض مرتفعة دعموها كم مرة بسبب مرورهم بالباص جدام الباب بطريقة وقحة وخطرة

http://i.imgur.com/1HprWn4.jpg

غالبية اللي جبتهم يشتغلون قالوا بيشيلون الطبيلة وما رضيت وهؤلاء عملوا سقالة بتثبيت في الحائط مؤقت مثل ما هو واضح فوق الطبيلة

الحاجز الحديدي جهة الجار سيتم تركيب خيوط عليه لزراعة الياسمين المتسلقة مع تركيب إنارة تزيينية بلون أزرق على قواعد خشبية فوق الحديد وتم تركيب دعامات حديدية ملحومة لها

http://i.imgur.com/94AzAE1.jpg

هذا تصوير لفوق الملحق وستتم تغطيته بعد الانتهاء من الصبغ لأن الحديد مستخدم حالياً كسقالة فوق الطبيلة

البيت اليسار في الصورة هو الأوسط في الواقع .. وهو لعاملات صالون قريب وكانت تقام فيه حفلات صاخبة في رأس السنة وبلغت عنهم ومسكوهم .. بنيت جزء الحائط بيني وبينهم لكن ما يفي بالغرض الساتر أعلى وأفضل وملحقهم وملحق مدرسة الأجيال اللي جنبهم ملاصق لبيتي ويشكل خطر كبير خصوصاً إن ادارة المدرسة كريمة وتؤجر المدرسة ملجأ للعمال وخصوصاً الجنسية السورية في الليل .. هذا الجزء من الحاجز بتكون عليه إضاءَة تزيينية فقط.

http://i.imgur.com/OBcRWzR.jpg

هنا تم تثبيت الحديد في الحائط فقط حتى لا يخترب عازل السقف .. وسيكون هناك تثبيت مائل جانبي من الطرفين فقط

http://i.imgur.com/AwyqTE5.jpg

طبعاً تم صبغ هذه المنطقة لكن المنطقة التي فوق التغطية الخفيفة بين الملحق والبيت سيتم تثبيت الحديد كما شاهدنا فوق الطبيلة سابقاً حتى يتم صبغها جيداً وهي مقابلة لتانكي الماء هنا .. حيث أن السقف بلاستيك ضعيف ولا يتحمل الوقوف عليه

http://i.imgur.com/GUAGU1r.jpg

وإن شاء الله باكمل معاكم لاحقاً
معماري قطري
16-02-2016, 12:13 AM
هذا جزء الزراعة اللي بتطلع منه زراعة الياسمين وتتسلق لقريب آخر الجزء الحديدي .. هنا يبين لنا جزء الطابوق بعرض 40 سم مبعد الزراعة عن حايط السور وهذا معزول من الجهتين ومحفور له بعمق حول مترين .. وتم تركيب العمود عليه ببليت حديد 20 في 20 في سمك 1 سم وبراغي اللي تمسك في الخرسانة + بليتات مثبتة ببراغي في الطوفة وملحومة مع العمود

http://i.imgur.com/fyh5sOQ.jpg

نشوف باقي الحائط وأرضيات الدرج الحلزوني اللي بدو يركبونه في الخلف وبنوصل له

http://i.imgur.com/UlCssuR.jpg

انا احاول اوضح الصورة كاملة حتى لو حد بينفذ جزئية ينفذها صح .. وبيتي صار له على هذا الوضع 11 سنة وألحين مرحلة تجديد بسيط ولازم اعرض الصور قبل وبعد وللحين في مرحلة قبل وأثناء وإن شاء الله نوصل للنهاية

هنا هذا الخشب سويته قبل حتى تنبت عليه الزراعة اللي تطلع زهور ملونة ما اعرف شسمها .. وطلعت لفوق الطبيلة وتبين من الغرفة فوق

http://i.imgur.com/fsduAkA.jpg

سيارة ولدي خليفة واقفة تكسر الخاطر .. التواير كل شوي يقول لي يبه انتهت ابي غير .. والقير انكسر وركبت جديد .. هل هي بوادر تحفيص؟ مع إنه 15 ما يسوق والسواق يسوق به بس الله أعلم

هذي الأقواس المزروعة تحدد الدوار وتعطي جمال للبيت بمساحة حوشه الصغيرة

http://i.imgur.com/6mgYk1S.jpg

تم تسكير الفتحة اللي بين أعلى الجدار ومجرى مياه المطر وتم تعليق الحديد على عوارض حديدية حتى يسد جهة الجار فوق الطبيلة بدون ما نفتح في الطبيلة ونحط عمود

http://i.imgur.com/LXlCwJs.jpg

وهنا تكميلة الطبيلة وهي بطول يتعدى ال 12 متر وربط الحديد فوق بدون أعمدة كان وما زال يعتبر مغامرة بس إن شاء الله يثبت

http://i.imgur.com/CQ19aWX.jpg

هذا تقريب لطريقة تركيب العمود بدون حفر وتكسير وبالبراغي ( Don't Try This At Home ) انا اتقبل مسؤولية شيء انشائي اسويه في بيتي لكن للغير هم مسؤولين عن قراراتهم

http://i.imgur.com/aRejG6Q.jpg?1

توضيح للتثبيت في الحائط

http://i.imgur.com/ZCTxQPq.jpg?1

صورة من بلكونة مكتبي جهة برج اسباير

http://i.imgur.com/u2yt0hl.jpg

ويبين لنا كيف الساتر سد جهة الجار وفي الطرف بلكونة تطل على الحوش مباشرة

هذي الصورة قبل الصبغ بس سدوا مكان الحفر لتمديد الوايرات لليتات وحطوا اسمنت أبيض فوقه .. ونشوف الزراعة كيف صادة رؤية طرف الطبيلة وطالعة فوقها

http://i.imgur.com/LsIKqLH.jpg

الواشنتونيا زرعتهم صغار والحين وصلوا فوق البلكونة

http://i.imgur.com/PgxQEPb.jpg

http://i.imgur.com/goSxdrQ.jpg

هذا البروز خرساني فوقه قرميد وفكرت في صبغه لون غير هو مع كسرات في أعلى سور السقف .. فكرت في الأزرق بس جاب لي عينة ما عجبتني بنشوف صورتها بعدين .. شرايكم؟

وفي منتصف خرسانة السقف باحط كشاف ال اي دي ينور على تحت

http://i.imgur.com/DOavlEL.jpg

البلكونة يبي لها ترتيب أكثر وتور عن الطيور وأفكر في أرضية عشب صناعي .. المكتب هذا هو الجزء الوحيد البارز وبواجهات زجاجية وبدون عزل للجدران وأرضيته مكشوفة للهواء البارد .. يبرد كثير وفيه لازم اشغل الدفاية هذي الأيام .. الغريبة الحرارة تكون بسيطة والمكيف اقصر عليه .. مجابل شمال والهواء البارد يضربه أغلب الوقت

http://i.imgur.com/6f0TNXF.jpg

صورة الدوار من فوق .. مب بس أشغال يحبون الدوارات .. فكرت اسوي شلال ينزل وسطه من البلكونة وبيبين من برا بس ترددت وكان بيكلفني 6000 عن طريق الاندونيسيين والحين ما ادري وينهم .. سووا لي الطبيلة بتشوفون صورتها بعدين وكانت الخطة البس درابزين البلكونة تشكيلة حجر وينزل منها الشلال .. الحين ممكن اسوي جدول ماي تحت للطيور

اللي تشوفونه أبيض قشور صبغ المصري اللي غشنا

http://i.imgur.com/EQssXdC.jpg

http://i.imgur.com/EecWTjh.jpg

http://i.imgur.com/04OEY8u.jpg

وسامحوني باخلي شوي حق بكرة
معماري قطري
16-02-2016, 01:39 PM
بما أن الصبغ متصل باصلاح بعض الشلوخ خصوصاً الخارجية نتيجة تغير الحرارة بسرعة أو لسبب إنشائي أو بسبب الصبغ القديم اللي يسمونها الشلوخ الشعرية ( Hairy Cracks )

عندي الحمد لله داخلياً 0 وخارجياً قليل من الهيري كراكس .. بالنسبة للإنشائي تتسكر وتتمعجن وترجع مرة ثانية وهذي صعبة وحبيت اشرح للكل للاستفادة ومنها الشلوخ العرضية وهي خطيرة لو في الأبيام ( الجسور ) واحتمال تكون إنذار مبكر للانهيار لو توسعت شوي وحلها صعب ويتطلب تدعيم وهدم جزئي واصلاح جذري .. لها حلول ثانية كالتدعيم بحديد خاص من بليتات وبراغي خاصة

كانت عندي ملاحظة على كثير من مباني قطر اللي هي الجزء الواصل بين سور السطح والسطح الخرساني .. هنا يستوي شلخ عرضي بين أسفل الطابوق وخرسانة السقف .. وعملت لها حل بغمس قطع حديد في خرسانة السقف قبل لتجف وعمل صبية ثانية مدعمة بقطع الحديد وعمل الطابوق فوقها بشبك حديد في الجزء الفاصل مع تمديد الأعمدة حتى تمسك سور السقف ولا يحصل شلخ

المشكلة نسيت متابعة البنتهاوس واستوى الشلخ هناك وكذلك الملحق .. الملحق سوره طابوقة وحدة ويستوي فيها هذا الشلخ المزعج والحل نسوي حفر في بعض التجويفات بالدريل ونركب قطعة حديد ونملي بالخرسانة .. عندي تم التعديل بالاسمنت والصبغ ومتوقع يرجع الشلخ بعد كم دورة تغير حرارة .. البنتهاوس باسويه وقت ثاني خلاص قربنا النهاية ودوشة الشغل أزعجتنا
Aozomblue
16-02-2016, 02:06 PM
عساك على القوة اخوي معماري
ما شاء الله تقرير مفصل
Aozomblue
16-02-2016, 02:08 PM
فكرة الياسمين المتسلق على الحاجز الحديدي ...
ممتازة لتغطية الحاجز و بتعطيك منظر جمالي روعة ....
معماري قطري
16-02-2016, 03:17 PM
[ Q6r ][;10313107']اخوي معماري قطري هذا الزراع من النوادر ....
والله معاناه وصادق والله ياذيك من الحن جاني واحد مصري قلت له عن الاسعار الصبغ الداخلي الكادورو
ومايبي يقولي السعر المتر اصر انه يسوي عينه عندي بالفيلا وقال ومب مختلفين
يوم عمل عينه ومب ذاك الزود واسعاره مرتفعه
مادري ليش اذا قلت لهم سعر المتر يقول اول شي اسوي عينه او اشوف الفيلا او او او
يعني كلها طوفه ويحسب المتر
بالتلفون قول المتر ولا تعطل العالم :)

تبين عيارتهم بسرعة .. لازم الواحد يكون قوي معاهم ويحاول ما يتفق مع شخص .. الباكستانيين ذيلا كانوا يشتغلون في بناية لنا وعينوا مقاول مصري يصبغ جوتاشيلد وصراحة شفت شغله مسكت بس بإشراف منهم .. ما ادري ليش يستغلون القطري .. المهم تعلموا من المقاول طريقة الصبغ والطبقات شلون وطبقوا عندي وطلعوا أحسن لأَنهم يغطون جانب البناء وشغل الحديد والألمنيوم والخشب وشغل الصبغ وانا اشوفه بسعر معقول جداً
معماري قطري
16-02-2016, 03:24 PM
اخ معماري ممكن صورة لفكرة التجويف حق الدرايش شلون
مافهمت كيف 15 سم حاولت افهم وادقق بالوصف لكن مخي علققق

حي الله اخوي مازن

الله يسلمك التجويف تقدر تسويه بطبقة جبس فوق الحائط لو تحت .. انا عندي الحائط بروحه سمكه 45 سم ومكان الدرايش مسويه 15 سم ومعوض عن العزل الحراري بعزل البلاك أوت والستاير السميكة

يعني بدل الستاير ما تجي فوق الحائط جهة الغرفة استوت مغمورة داخل الحائط .. حتى تقدر لو عندك سرير تلصقه في الدريشة وتفتح الستارة من وراه .. وفي أماكن بتجي قطعة أثاث سكرت التجويف من تحت بطابوقة واستوت حاجز لقطع الأثاث والدريشة والستارة ورا .. وبنفس الوقت قدرت اسوي كسرة مكان الدرايش من الخارج بعمق 5 سم اللي تشوفها شلون مصبوغ مكانها بيج في الصور .. باصور إن شاء الله للدرايش من داخل
معماري قطري
16-02-2016, 04:02 PM
فكرة الياسمين المتسلق على الحاجز الحديدي ...
ممتازة لتغطية الحاجز و بتعطيك منظر جمالي روعة ....

الله يقويك ويحفظك إخوي اوزومبلو

ايحاءات الصور تخليك تركز في المحيط حولك وتسوي شيء مشابه وهذا المنتدى ما شاء الله فيه نقاش وأفكار كثيرة

ألحين طلعت فكرة ديكورية مهمة اللي هي مكان الدريشة والستارة .. انا بعض الستاير مركبها خشبية لسهولة الفتح يومياً وللغرف عملت الكسرة الداخلية مثل ما شرحت قبل ويمكن حد يسويها حتى بالجبس لو حايطه 20 سم أو بعمل بروز على الخارج .. ممكن كذلك يسوي البروز كبير شوي ويحط كرسي بسيط ثابت معمول ومنجد قرب الدريشة والستارة تسكر عليه .. الدريشة تكون تطل على 3 جهات وبروزها يكون حلو .. الحلول كثيرة وكثير منها ما يستعمل عندنا أو يستعمل خطأ بدون حساب كل شيء

هذي صور لإحدى النوافذ وكان ممكن اكبر البوردر العلوي شوي وانزل جزء من القماش على الجوانب حتى لو بشكل ولون غير حتى يعطي تشكيلة برواز وممكن بجبس كقوس وممكن بخشب منجد بقماش واسفنج .. وهذي اذكرها للمهتمين واللي بيطبقون الفكرة

ميزة الكسرات ذي لو انعملت من الطابوق وفوق من الخرسانة تكون قوية لتعليق الستائر وانصح أي حد بيسوي يضيف نقطة كهرباء لو حب يركب شتر خارجي أو يسوي الستارة تنفتح كهربائياً

http://i.imgur.com/wkEErZj.jpg

نلاحظ إن التجويف الداخلي متعدي حدود الدريشة حتى تغطيها الستارة عدل والتجويف الخارجي لا جاي مع الدريشة

http://i.imgur.com/Ia3hu5q.jpg?1

مع تركيب الدريشة متوسطة في الفتحة تستوي عندي كسرتين داخليتين وهذي تكسر الصوت الخارجي وتخليه أخف ما يمكن

http://i.imgur.com/qxugr8v.jpg

هذي الكسرة الثانية اللي بعمق 15 سم

http://i.imgur.com/9xJxM1g.jpg

هنا صورة لحديد الستارة مثبت على خرسانة أعلى فتحة الدريشة وأعلى التجويف

http://i.imgur.com/pYyKCdp.jpg?1

أَتمنى الصورة وضحت للجميع
معماري قطري
16-02-2016, 10:13 PM
هنا قرب باب يودي حق الملحق والمطبخ

http://i.imgur.com/ncroA7y.jpg?1

باقي يصبغون الحايط اللي فوق السقف البلاستك ولازم يثبتون الحديد في الحائط ويركبون سقالة حق يركبون يصبغون هذي المنطقة

http://i.imgur.com/Ty80zTZ.jpg?1

هنا تم عمل سلوب لتصريف الماي عن حافة الطابوق حتى ما ينقع ويتغلغل داخل ويخرب الحائط وحتى الرطوبة أوقات الصيف تنقع وتنزل من قزاز الدريشة البارد .. بعض الناس يركبون حجر أو معدن أو قرانيت أو يو بي في سي والاسمنت والصبغ العازل ينفع .. سويناها ورا البيت وحسيت بيتعبون وهم يسونها جدام وقلت بس بالصبغ نكمل الباقي

http://i.imgur.com/j3u5VWJ.jpg

الدرج في بدايته وتم تركيبه بالبراغي في صبية اسمنت خفيفة .. وهنا ورا البيت صبية الاسمنت كانت في حدود 5 سم بس الحمد لله ثبت زين بالبراغي

كلف 6000 ريال بإرتفاع 10 متر تقريباً .. وبيكون كمخرج طواريء ولخدمات الصيانة للسطح

http://i.imgur.com/ZCQf26l.jpg?1

http://i.imgur.com/FYPIiET.jpg?1

ناوي اسوي الكسرات اللي في أعلى السقف فوق كل دريشة باللون الأزرق السماوي مثل الصورة

http://i.imgur.com/jbNKLl2.jpg

http://i.imgur.com/8ERKDXI.jpg

اللون الأزرق اللي بيحدد حوض الزراعة برا وبعض الكسرات وبيحدد أعلى الدرايش .. أحواض الزراعة داخل اخترنا لها اللون البني الداكن ما تبين فيه آثار التواير لو احتكت به

http://i.imgur.com/DLgQn6Q.jpg

http://i.imgur.com/igq99Kd.jpg

http://i.imgur.com/YcRdusl.jpg

خلط الصبغ أو خلط القراوت لازم يتم بمقادير معروفة وبخفاق ميكانيكي وهنا البتان مخترعين خفاق دريليكي

http://i.imgur.com/IEQXx7o.jpg?1

http://i.imgur.com/RTyRt0a.jpg?1

هذي البلكونة اللي فوق المدخل واللي كنت ناوي انزل الشلال منها بس فكرت في الهواء بيدخل الماي صوب المدخل

http://i.imgur.com/JpPhkC6.jpg?1

بيتم صبغ النقوشات بأبيض وبتخف حدتها

وباحط زوايا جي ار سي من ابتكاري ولو قدر يسويها زين اللي يبي تفاصيلها ومقاساتها حلاله .. ولو ما قدر يسويها باكنسلها

http://i.imgur.com/5hXWP5j.jpg?1

السواق واخوه يكربون الواشنتونيا والدرج الخشب خلاص حده كنت افكر في المستقبل اجيب كرين بس السواق حل المشكلة وطلب المقاول يسوي درج حديد ينشال ويكون مرتفع يقدر يوصل أرفع فوق

http://i.imgur.com/YrVNJHd.jpg?1
معماري قطري
17-02-2016, 11:13 PM
اليوم بدأ الشغل قرب مدخل البيت مع بعض الزوايا الصعبة مثل فوق سقف الممر بين الملحق والبيت البلاستيكي بعد عمل دعامات وتثبيتها على الحائط فوقه والوضع حقيقيةً يخوف لو سقط أحد العاملين .. المتوقع هذا مقاول مسجل وعنده تأَمين والله يحفظهم صورت وبانزلها مع الدفعة الأخيرة مع انتهاء الشغل بإذن الله

كبداية جربنا كم طريقة للرش حسب الكتلوج واخترت هذي اللي بدون ضغط للحبيبات بالرولر للجهة الخلفية وبعدها غيرت رأيي للجهات الباقية لتكون بالرولر وضغط بسيط

http://i.imgur.com/oU7rlTe.jpg

هذي قبل أول طبقة صبغ اللي تكون أساس وبعدها يجي نوع فيه لمعة شوي يسمى جوتاسيلك وهو يعطيها نعومة ويخلي الرطوبة تنزل وما تلتصق وتخترق الصبغ وكذلك الغبار ينغسل بسهولة

http://i.imgur.com/7GvaWz6.jpg

وإن شاء الله تكون الدفعة الأخيرة جاهزة مع تخليص الشغل واتمنى نهاية الاسبوع الجاي
sweet qatar
20-02-2016, 07:00 PM
الله يجزيك خير استاذ معماري على الشرح الوافي

ماشالله تبارك الله .. الواجهة تتحول بالتدريج .. حلو استخدام اللون الازرق مع الشجر الي محوط البيت ماشالله


ما قدرت استوعب ارتفاع الطبيلة احسها وايد نازلة .. بس في حل انك تنزل ارضيه الطبيله هههههههه ما بنخلص !


بخصوص الشلال الي تبي تحطه من فوق .. ممكن يكون وراه زجاج .. بحيث يمنع الماي انه يدخل

http://1.bp.blogspot.com/_tLx2vFF9IR8/TGOUCXc6ZFI/AAAAAAAAAU8/sJv_z2hDGvc/s200/bw-indoor-waterfall-fountains.jpg


بس خساره لو حطيت الشلال ما بتستفيد من منظره من البلكونه
معماري قطري
20-02-2016, 09:43 PM
الله يجزيك خير استاذ معماري على الشرح الوافي

ماشالله تبارك الله .. الواجهة تتحول بالتدريج .. حلو استخدام اللون الازرق مع الشجر الي محوط البيت ماشالله


ما قدرت استوعب ارتفاع الطبيلة احسها وايد نازلة .. بس في حل انك تنزل ارضيه الطبيله هههههههه ما بنخلص !


بخصوص الشلال الي تبي تحطه من فوق .. ممكن يكون وراه زجاج .. بحيث يمنع الماي انه يدخل

http://1.bp.blogspot.com/_tLx2vFF9IR8/TGOUCXc6ZFI/AAAAAAAAAU8/sJv_z2hDGvc/s200/bw-indoor-waterfall-fountains.jpg


بس خساره لو حطيت الشلال ما بتستفيد من منظره من البلكونه

الله يسلمج اختي ويبارك فيج الموضوع موضوعج واحنا ضيوف وشكلي خربته شوي

هذا شلال خفيف وحلو في نفس الوقت اللي حطيتي صورته

بالنسبة للطبيلة ما تبين حتى لو حد يدخل الا يلتفت ويركز وأهم شيء تجي فوق الراس بشوي للي يمشي واللي بيدخل السيارة .. يعني قياس بالسنتيمتر يكفي السيارات العادية مثل الجيات وحتى السوبربان أو السآب يوربان مثل ما يسمونه في بلاده وما تحتاج لحلول نهائياً

عرض الصبغ مع التعديلات البسيطة والتغيير هو مهم لتوضيح مبدأ بسيط إن الواحد في الصبغ لازم يصين ويصلح ويعدل حسب احتياجه ويغير شوي للأفضل

اليوم من 8 الصبح ل 8 في الليل يشتغلون واعتقد خلصوا الدرج الحلزوني واشتغلوا على الواجهة اللي صوب الملحق واحتمال كملوا تركيب الحاجز .. وبكرة بيشتغلون برا بإذن الله وبيبدون يركبون الليتات وباقي صبغ الواجهات جهة سور السقف من فوق ومخلينه لبعد تركيب الدرج الحلزوني

بإذن الله ننتهي هذا الاسبوع ويسوون بولش بمكينة للبلاط ويجددون الماستك في فواصل التمدد
معماري قطري
20-02-2016, 09:45 PM
فكرة الزجاج بتكون حلوة بس حبيت الانفتاح على الدوار والزراعة باشوف نافورة جاهزة أو باسوي جدول ماي والسبب ابي العصافير يشربون وقت الحر .. بيتي ما شاء الله مستقطب عصافير وانواع طيور كثيرة بسبب الزراعة
sweet qatar
21-02-2016, 11:38 AM
فكرة الزجاج بتكون حلوة بس حبيت الانفتاح على الدوار والزراعة باشوف نافورة جاهزة أو باسوي جدول ماي والسبب ابي العصافير يشربون وقت الحر .. بيتي ما شاء الله مستقطب عصافير وانواع طيور كثيرة بسبب الزراعة

ماشالله تبارك الله .. صدقة جارية ان شالله

خذ راحتك أخوي في الموضوع بالعكس كل تفصيل تذكره أكيد بيفيد المتابعين والمحتاجين

من يومين تقول لي وحدة عن معرس تلته مع طوف الخله مغير ورق الجدران 6 مرات بسبب الرطوبة

حرام والله علي كثر المشاريع الي في البلد ماعندنا فنيين عدلين
معماري قطري
21-02-2016, 11:54 AM
ماشالله تبارك الله .. صدقة جارية ان شالله

خذ راحتك أخوي في الموضوع بالعكس كل تفصيل تذكره أكيد بيفيد المتابعين والمحتاجين

من يومين تقول لي وحدة عن معرس تلته مع طوف الخله مغير ورق الجدران 6 مرات بسبب الرطوبة

حرام والله علي كثر المشاريع الي في البلد ماعندنا فنيين عدلين

اف هالكثر .. هذا شكله من مصريين لمصريين مع الاعتذار للشرفاء منهم لكن عمالة البناء ما ينفعون نهائياً

انا يا اختي عندي ورق مركبه قبل لا اسكن البيت من 11 سنة وللحين موجود .. فيه كسرات عندي كثيرة وخصوصاً صوب الدرايش وأسطح افقية قرب الدرايش تتجمع عليها شوية رطوبة من التكييف .. قام شوي من هذي الأطراف واستوى عليه سواد من الرطوبة بس حله بسيط .. قطعة خشب تتثبت فوقه تثبته وتبعد عنه الرطوبة .. هذا مركبه من رافكو وكان غالي

ركبت عن طريق هندي من محل صغير وكان شغله بعد زين ورخيص تفكك شوي في الوصلات بعد سنتين وناديته وصلحه بسرعة ولا طلب فلوس عطته 100 ريال من طيب نفسي .. ركبنا في مكان مكيف وكان أصغر من اللي قبله وبقت قطعة فاضية وشاف شيء مقارب لها وركبه واستوت ما تبين .. الصبغ وورق الجدران والتكسية بالخشب أو الحجر أو الرخام أو البلاط ممكن تكون داخلية أو خارجية وممكن اصلاحها بسهولة .. أما تغيير و 6 مرات هذا تصرف شخصي من المالك اتوقع ذوقه رفيع للغاية وما يعجبه شيء
sweet qatar
21-02-2016, 01:26 PM
هههههههههه

لا هو مسكين ما كان يعالج الرطوبة الي في الطوفة

بس يغير ورق الجدران

الله يعين هل الدوحة علي الصيانة ابتلينا بجشع العمال
معماري قطري
21-02-2016, 02:54 PM
هههههههههه

لا هو مسكين ما كان يعالج الرطوبة الي في الطوفة

بس يغير ورق الجدران

الله يعين هل الدوحة علي الصيانة ابتلينا بجشع العمال

شفت مرة في برنامج عن البناء في دولة باردة ورطبة .. كانوا يحطون دفايات خاصة لإزالة الرطوبة قبل التشطيب النهائي

عندنا يحطون ثلج في الخرسانة للصب في الحرارة الزايدة بس المشكلة الثلج يتحول ماي ويضعف الخرسانة وكلها دقايق وترتفع الحرارة كثير .. في صب السدود والجسور الكبيرة حتى لو الحرارة الخارجية ثلج داخل كتلة الخرسانة توصل ل 300 درجة مئوية .. داخل غير وبرا باردة قرب الجو الخارجي يتسبب في شلوخ حرارية تتسع مع الوقت لذلك يمددون بايبات خاصة ويمر فيها سائل تثليج يبرد الخرسانة وبعدها يسدون هذي البايبات بملؤها بخرسانة شبه سائلة
معماري قطري
26-02-2016, 02:22 PM
آخر أخبار الصبغ والصيانة للحوش

ما خلصوا للحين بعكس التوقع .. والحمد لله الإختيار للألوان كان موفق وتم المزج بين الأبيض والبيج المصفر ( قريب من المحاحي نقدر نقول ) وكذلك الأزرق السماوي طبعاً الأبيض هو الطاغي وفيه أجزاء بسيطة بالبني والأحمر .. اللي بالأحمر درج الخدمات ورا وهذي صورة له قبل لينصبغ

http://i.imgur.com/162K1oR.jpg

وللأسف ما صورته بعد الصبغ

والبني بيكون لتحديدات أحواض الزراعة الداخلية وبيتناسب مع تشكيلة الخشب لطبيلة السيارات وبعض الدنجل في الحوش مع نيتي لعمل مظلة خفيفة من الدنجل والخشب حق سيارتين اضافيتين في الحوش .. والأهم إنه لون أرضي وما يتأثر باحتكاك تواير السيارة مثل الألوان الفاتحة

هنا نشوف تحديد الدرايش لحمامين وانتوا تكرمون فوق بعض .. وفوق كل دريشة مسوي كسرات على داخل مثل عتبات الدرج وهذي صبغناها زرقاء مثل مباني قطر القديمة وتختلط مع زرقة السماء

http://i.imgur.com/yl18WbE.jpg

تم أخذ الأزرق كذلك لبعض الكسرات في الحائط الخارجي ولتحديد البوابات وكذلك أحواض الزراعة الخارجية

هذي الدرايش الخلفية اللي عملنا لها سلوب للحافة لتصريف الرطوبة وللحين ما انصبغ السلوب وما عجبني تركت الأمامية بدون سلوب وبيتم استخدام السيليكون لسد أي تسريب مستقبلي .. والحمد لله على ضغط الماء القوي أثناء الغسيل لم يكن هناك أي تسريب سوى في طرف دريشة واحدة والسيليكون بيكون تحديد أحلى لإطار الدريشة وحماية اضافية

http://i.imgur.com/Dk8OCFn.jpg

تم كذلك تغيير بعض شترات التهؤئة

هنا نشوف مكان بايب الكاميرا اللي حولنا غالبية خطوطها اللي تبين داخل الطوفة وبيتم تركيبها قريباً لمراقبة جزء الدرج وغرفة مضخات حوض السباحة

http://i.imgur.com/lHTCFv0.jpg

طبعاً تشكيلة الرش في هذا الجزء غير وتم تعديلها للأجزاء المفتوحة على المدخل

هذه التشكيلة الأُخرى وهي مضغوطة برولر الصبغ الدائري

http://i.imgur.com/DzBeKRb.jpg

صورة لجزء الزراعة الخارجي قرب باب الحوش وباصور إن شاء الله صور أوضح لهذه المنطقة .. نلاحظ الصبغ على التربة اليابسة وبيتم ازالة جزء من التربة ونكش الباقي واضافة تربة زراعية جيدة .. مع وضع حماية لحائط البيت عبارة عن نايلون بكذا طبقة والدفان عليها حتى ما توصل الرطوبة للحائط وتخرب الصبغ وتخربه

هنا تم وضع طابوقة كانت جديدة لكن خلال فترة ما تتعدى الأربع سنوات بدت تتحلل بسبب الرطوبة والأملاح .. لذلك نفهم ونعرف أهمية حماية الطابوق ببلاستر جيد ويفترض مخلوط بكيماويات عازلة للرطوبة وقوية وثم طبقات الصبغ مع حماية الأساسات والجدران قرب الأرض بعوازل جيدة

الجزء الخارجي من الزراعة ونرى أسفل الحائط بعد عمل المعجون والبرايمر له وبعد تقشير الصبغ .. الآن انتهينا من الرش وباقي الصبغ والخطوط في البلاستر بتنصبغ بأزرق وفيه خط عريض فوق بيكون أزرق كذلك .. وبيتم تركيب اضاءَة تزيينية على شكل اكس بلون عادي بين الأبيض والذهبي

http://i.imgur.com/zFvk9z5.jpg

الأحواض الخارجية اضطريت لعملها بسبب وقوف بعض الهمجيين قرب الباب لأَخذ عيالهم من مدرسة بعيدة نوعاً ما ويمرون قرب باب البيت وتحصل عيونهم داخل البيت .. لدرجة واحد شاف سيكل نزل يركض وسرقه قطه في بدي السيارة والخدامة حاولت تسجل الرقم ما قدرت .. وهي كتزيين كذلك وصدت باص العزوب جيراننا عن المرور قرب باب البيت أيضاً .. درعم الهندي سواق الباص كم مرة في الطابوق ويستاهل
sweet qatar
28-02-2016, 10:20 AM
متابعة ومتشوقة للشكل النهائي

الله يتمم لك علي خير
معماري قطري
28-02-2016, 03:09 PM
متابعة ومتشوقة للشكل النهائي

الله يتمم لك علي خير

تسرني متابعتج وإن شاء الله طرحي فيه فائدة للجميع

فكرة الإنارة التزيينية طلعت حلوة حتى مع الحديد وبدوا يخلصون شوي شوي ويشيلون أغراضهم بيروحون بيت ولد عمي يبي يسوي ازالة للحجر ويسوي بلاستر وصبغ كويتي .. ما علمني شقصة هالصبغ وباشوف لو يعطيني صور .. يقول جاته عروض ب 70 ريال للمتر و ب 90 وهذا الباكستاني اتفق معاه على 55

بقت مشكلة تنظيف بلاط الأرضية الباكستانيين يفكرون يدوي وانا اتمنى مكينة اللي تزيل طبقة بسيطة مع حك القراوت وتبديله بآخر نوعية أفضل والظاهر هذي بعد تعتبر شغلة كبيرة .. باصبر شوي وباسويها ممكن بعدين وباركب نعلات رخام قرب حايط البيت بتطلع أحلى إن شاء الله
sweet qatar
28-02-2016, 03:53 PM
اكيد طرحك فيه افاده للجميع .. والله يجعله في ميزان حسناتك


اي والله نبي نعرف شنو الصبغ الكويتي ؟؟
معماري قطري
28-02-2016, 10:31 PM
شالفرق كلها مواد مصنعة وتنخلط وتتعبأ عندنا اللي يفرق بس طريقة الشغل ونظافته وأمانة اللي يشتغل والعدة للتنفيذ تكون مناسبة
معماري قطري
01-03-2016, 07:04 PM
الليلة باكمل ببعض الصور للإنارة الخارجية وبعضها مب واضحة

هذي المنطقة تطل على جانب كان قبيح قبل لا احط الحاجز الحديدي وألحين مع الإنارة والزراعة اللي تبين من فوق استوى وايد أحلى وأأمن

http://i.imgur.com/hbrnfyt.jpg

التصوير من دريشة الحمام الرئيسي ودريشة غرفة الملابس تطل على هذا الجانب ودريشة الغرفة كذلك ودريشتين في غرفة ثانية

http://i.imgur.com/3ZUkz4q.jpg

تم تركيب 5 ليتات الأوسط أحمر والجانبيين زرق

يمكن البعض يشوف ما لهم داعي لكن كهربتهم خفيفة جداً وتغيير

http://i.imgur.com/TTsefub.jpg

أول ليت طلع شبه مخفي ورا الشجر

http://i.imgur.com/kdZV3sE.jpg?1

جنب مدخل البيت حطيت اثنين حمر والكل قالوا يبون زرق ولا بيض

http://i.imgur.com/0EcvQw6.jpg?1

اللي فوق من داخل الطبيلة يبين

http://i.imgur.com/9hM16R7.jpg

http://i.imgur.com/KCUV6SK.jpg

من وراء الشجر وهنا إن شاء الله بيتم تركيب الهوكات وعليها حبال للياسمين يتسلق عليها

http://i.imgur.com/C6Jl36s.jpg

انا صورت قبل ليكتمل الشغل وباحط صور أوضح بعد اكتمال الشغل وللحايط من الخارج مع البوابات

فيه شوية نواقص ومساويء من ناحية الأرضية توصخت شوي بالصبغ بس إن شاء الله تلميعها بالمكينة يزيل الصبغ وجاء مندوب شركة شاف ورفع المقاسات وبيقول كم تكلف .. بقت أجزاء ما صبغناها مثل ورا البيت والبنتهاوس ولي نية اصبغها بعدين أو أثناء سفرنا بإذن الله لأن العملية مزعجة ومرهقة
sweet qatar
01-03-2016, 10:03 PM
لا تحمل تخليهم يسوون شي وانت مب على راسهم

شفت شكثر عدلت وراهم :)



معليه لما يترتب البيت على مزاجك بتنسى التعب كله

الله يقويك ويعينك
معماري قطري
01-03-2016, 11:14 PM
لا تحمل تخليهم يسوون شي وانت مب على راسهم

شفت شكثر عدلت وراهم :)



معليه لما يترتب البيت على مزاجك بتنسى التعب كله

الله يقويك ويعينك

لا الباقي بيكون محدد ومعروف وكله شغل فوق السطح من خارج البيت وورا البيت
معماري قطري
05-03-2016, 06:18 PM
السلام عليكم ورحمة الله وبركاته

بحمد الله تم انجاز كل الأعمال تقريباً عدا ترتيب تربة الزراعة واضافة تربة للخارج .. إخواني وأخواتي العين حق والكل لازم يذكر الله ويطلب التوفيق سواء لهذا العمل أو غيره من الأعمال اللي يحطها صاحبها لفائدة الجميع

باقي أيضاً تنظيف البلاط وصبغ بلكونة المكتب أتوقع بدوا فيه اليوم + هناك أعمال أُخرى لمرحلة ثانية وهي عمل طبيلة من الخشب وفوق حماية معدن وعليه سعف نخل لتغطيته والمقاول وعد بيجيب خشب قديم من البيوت المهدومة القديمة + كذلك فكرة عمل نافورة وسط الدوار استهوتني للطيور وكمنظر جمالي

لتنظيف البلاط فشلت المحاولات للإتفاق واحد طلب 14000 ويبي نص القيمة قبل وهو سوري وقلت له سوري .. قال بيجيب مكينة كحت الرخام بالألماس وبيطلع البلاط لامع ويضمنه لمدة 7 سنين وانا عارف من دوس التواير والغبار والرطوبة والأملاح حتى في الماي البلاط ما له حل والمطلوب تنظيف مؤقت لذلك ارتحت يوم أصر وراح غير مأسوف عليه

مصري مع عامل بنقالي قوالوا 7000 وبيسونه بالغرايندر مع وضع ورق خشن قليلاً .. والسائق صاد تكلفة الغرايندر والورق ما اتوقع يكلف كثير وممكن هو يسوي الشغلة وبيكون نقدر نسويها من وقت لوقت ولا ندفع مبلغ كبير وترجع المشكلة

وهذي عينة سووها عمال المقاول لبلاطة حك بقرطاس صنفرة مع محلول يخرب البلاط

آسف على المنظر البشع بس هذا آيل في كم مكان

http://i.imgur.com/Znd4dKS.jpg

صورة قبل ليكتمل الشغل ويتم صبغ حدود الزراعة .. صبغت برا بالأزرق السماوي وداخل بالبني المائل للأحمر

http://i.imgur.com/4qPbmXV.jpg

صورة من البلكونة ونشوف فيها شلون البلاط مبقع .. وهذا التبقيع يهون ولا الكسور والتحلل بسبب الماء والأملاح طيلة فترة 11 سنة لكن الحمد لله تحلل بسيط ومقبول وفي حالة تغييره بيتم تركيب الجديد بلزقة قوية على الموجود لأن التأسيس قوي وأنصح الكل بهذي الطريقة .. حطيت صورة الطابوقة اللي تحللت في الزراعة بسبب الماء والتربة والأملاح.

http://i.imgur.com/ylJmEur.jpg

http://i.imgur.com/xt05FHx.jpg

هنا لم يكتمل صبغ حدود الزراعة .. وسيتم فتح أعمدة نور الحوش وتنظيفها وصبغها وتركيبها مرة ثانية بواسطة المقاول

http://i.imgur.com/57WR3vz.jpg

جمهور البيت عندي زعلانين يقولون مكثر الألوان .. إرضاء الناس غاية لا تدرك .. السقف فوق المدخل كان الكورنيش فيه ملون وبارز وحبيت أخليه هادي صبغته نفس صبغة السقف الكبير بالبيج المصفر والداخلي الصغير اللي قرب باب المدخل بالأبيض وهنا ما يبين بوضوح اتوقع

http://i.imgur.com/XVBJipV.jpg

جزء بسيط من تمديدات الكيمرات اضطرينا نخليها مكشوفة بسبب عدم القدرة على الحفر لوجود خرسانة

http://i.imgur.com/mpFpFqb.jpg

الكاميرا تم تركيب بوكس معدن معزول وقبل مركب لي الفني بلاستيك رخيص

http://i.imgur.com/bBL7jDE.jpg

الليتات يبينون يحتاجون فك وتنظيف وصبغ .. ولازم أي شخص يسوي صيانة يكون مفتح ويسجل ملاحظات أول بأول ويرتب لها مع المقاول .. وانا أكرر المقاول هذا مبروك والفورمان طالب هندسة وما شاء الله عليه يتعلم عملي ويتعلم نظري ومهذب لأبعد الحدود وهو اللي نبهني لها

http://i.imgur.com/gyRHGcB.jpg

شجرة الوشنتونيا اللي على اليسار هي أقصر وحدة .. ونشوف الكاميرا على البوابة موجههة للداخل صوب غرفة السايق والملحق وفيه وحدة خارجية تصور الشارع والباب من برا وتمديداتها خارجية بسبب الخرسانة ونصيحة لأي حد يخطط يبني يسوي التمديدات قبل خصوصاً للحوش الكاميرات مهمة

http://i.imgur.com/qw7md8m.jpg

كشاف الال اي دي 800 وات شريته ب 800 ريال من الترا لايت ونوره طلع حلو على الدوار ونشوف كذلك ليتات الزينة وهنا ركبت بلون أحمر لكن إستوى إحتجاج وقصف من جهات مختلفة واضطريت اغير للون مائل للأصفر .. هذي الليتات ب 250 من الترا لايت كذلك

http://i.imgur.com/8gXr5U7.jpg

http://i.imgur.com/7UEUuyG.jpg

أُم العيال تقول لي فاتح محل ورد ولا كافي

http://i.imgur.com/TNncJv9.jpg

الباب هذا للمدخل يو بي في سي يعزل الصوت والغبار والحرارة ووراه باب ثاني خشب بقزاز ملون ما يبين وراه .. خليت القدامي بدون تظليل حتى يبين المدخل منور وفيه على الجنب أبواب خشب بعد لمجلسين مجلس صغير ومجلس شوي أكبر .. مساحة المدخل حول 4 متر في 2.8 والبعض يبالغون في هذي المساحة على حساب المساحات الأهم

http://i.imgur.com/VK1I3s6.jpg

http://i.imgur.com/9nRK4DF.jpg

هذي البوابة أيام التصميم كنت مقتنع إنها تكون بسيطة وبدون مظلة .. وكان التصميم المعماري كله بواسطتي في سنة 2003 تقريباً أو قبل خلص ويعتبر أول تصميم بيت لي .. كنت شغلي أكثر شيء مركز على المشاريع في مرحلة التصميم وعلى تصميمات بسيطة وغالبيتها مكاتب إدارية وتعليمية ومنشآءات رياضية وغيرها بس كنت مقيد وشغلي تحت مسؤولين وهنا لا المجال مفتوح لي

داخل يبين الليت بعد ما غيرناه وانا للحين اشوف الأحمري أحسني

http://i.imgur.com/YXSiz1r.jpg

الليتات الخارجية أرخص ب 150 الواحد واشوفها أحلى وأقوى

باواصل إن شاء الله بعدين
sweet qatar
05-03-2016, 10:03 PM
أُم العيال تقول لي فاتح محل ورد ولا كافي



هههههههههههههههههههه

الله يسعدك ويسعدها ضحكتني من قلب



ما شالله ولا قوة الا بالله .. الله يبارك لك في البيت

الشغل جمييييييل و نظيف .. الطوف فرقت وايد عن قبل


بالنسبه لليتات .. حلوه الاضاءة داخل البيت مناسبة لاضاءة البوابة و اريح للعين
معماري قطري
05-03-2016, 10:39 PM
هههههههههههههههههههه

الله يسعدك ويسعدها ضحكتني من قلب



ما شالله ولا قوة الا بالله .. الله يبارك لك في البيت

الشغل جمييييييل و نظيف .. الطوف فرقت وايد عن قبل


بالنسبه لليتات .. حلوه الاضاءة داخل البيت مناسبة لاضاءة البوابة و اريح للعين

ويسعدج ربي إختي ويديم ضحكتج

وابي رايج في مراجعة تصميم واحد في موضوع مراجعة التصاميم

الحمد لله طلعت النتيجة إيجابية وزين اللي قريتي كامل القصة

بالنسبة للأزرق اللي فوق سور السقف وفي خارج البيت هو حلو يكون عالي متصل مع السماء وهو لون تراثي يستخدمونه قبل لصبغ خشب مرازيم المطر وكذلك خشب أو جص سور السقف .. انا سويت حتى أحواض الزراعة منه

عن سالفة محل الكافي يمكن بعضهم يسونها بقصد ضحكة ولا ما يدرون وزين غيرت اللون .. أما اللي على عازل الرؤية خليته أحمر
sweet qatar
05-03-2016, 11:09 PM
ويسعدج ربي إختي ويديم ضحكتج

وابي رايج في مراجعة تصميم واحد في موضوع مراجعة التصاميم

الحمد لله طلعت النتيجة إيجابية وزين اللي قريتي كامل القصة

بالنسبة للأزرق اللي فوق سور السقف وفي خارج البيت هو حلو يكون عالي متصل مع السماء وهو لون تراثي يستخدمونه قبل لصبغ خشب مرازيم المطر وكذلك خشب أو جص سور السقف .. انا سويت حتى أحواض الزراعة منه

عن سالفة محل الكافي يمكن بعضهم يسونها بقصد ضحكة ولا ما يدرون وزين غيرت اللون .. أما اللي على عازل الرؤية خليته أحمر

حلو فهمك للون و توظيفك له*

ان شالله بشوف موضوع مراجعة التصميم في اقرب وقت .. الله يعطيك العافيه وينفع بعلمك
معماري قطري
06-03-2016, 02:42 PM
حلو فهمك للون و توظيفك له*

ان شالله بشوف موضوع مراجعة التصميم في اقرب وقت .. الله يعطيك العافيه وينفع بعلمك

الله يعافيج إختي سويت .. المهم اللون الطاغي هو الأبيض وهو قوي ما يتغير وعاكس للحرارة ومقاوم لأشعة فوق البنفسجية اللي تغير اللون
بوخالد911
06-03-2016, 10:46 PM
ومنكم نستفيد.
معماري قطري
07-03-2016, 12:36 AM
ومنكم نستفيد.

الفائدة الأهم للصبغ خصوصاً الخارجي هي تجديد حماية الطابوق خصوصاً من الرطوبة وكذلك حماية الخرسانات وإعطاء نسبة عزل حراري أفضل والفائدة المباشرة المنظر العمراني الجميل
Aozomblue
10-03-2016, 10:11 AM
ما شاءالله تبارك الله
الله يبارك لك في علمك و رزقك اخوي معماري
نتيجة مرضية بعد التعب ... تستاهل كل خير و الله يبارك لك في بيتك
معماري قطري
10-03-2016, 04:23 PM
ما شاءالله تبارك الله
الله يبارك لك في علمك و رزقك اخوي معماري
نتيجة مرضية بعد التعب ... تستاهل كل خير و الله يبارك لك في بيتك

مشكور إخوي اوزومبلو .. الحمد لله مرتاح للنتيجة وباقي صبغ البلكونة وتركيب الحبال للزراعة المتسلقة ودفان أحواض الزراعة الخارجية بترتبة زراعة

للدفان الخارجي قرب سور البيت نبهت الفورمان يركب نايلون سميك بعدة طبقات مب تركيب بمسامير بس يحطه ملاصق للحايط ويدفن عليه حتى الرطوبة ما تضر الحائط وهذا أسهل شيء لحماية الحائط من الرطوبة وانصح الكل بعمله .. تكلفة رول النايلون الكبير والسميك حول 30 - 50 ريال لكن تكلفة التصليح وتشوه الحائط وتكسر الطابوق توصل للآلاف
معماري قطري
10-03-2016, 04:33 PM
تعبت شوي من المتابعة وازعاج الشغل وباقي صبغ الواجهة الخلفية وهناك حوض السباحة ويحتاج صيانة أكثر خصوصاً لحديد السقف صدأ بعضه شوي وناوي البسه ألمنيوم + أحتاج لتركيب مزيلات الرطوبة والجهاز الواحد يكلف 25000 والحمد لله مجهز للكهرباء .. صبغ الحوائط بيستلزم تفريغ الماء من الحوض وشغل يحتاج متابعة دائمة .. كذلك صبغ خلف البيت يستلزم إزالة عريش خشب واعادة تركيبه والمقاول يقول لا تهتم باسويه وانا لازم اتابع وخليت الجزء هذا كله لوقت لاحق مع البنتهاوس والسقف كامل

أهم شيء قبل لنصبغ ونشطب نشوف شالتغيير اللي ممكن نسويه والتجديد على الحالي .. وبنخسر كثير لو نسوي كل شيء نفس قبل .. أقل تغيير حتى في الإضاءَة والإضافات البسيطة كنافورة أو اصيص زراعة أو عمل تظليل أو فتحة جدارية يكون مؤثر وكبير في نفوسنا وفي الصورة النهائية
معماري قطري
23-05-2016, 07:29 PM
كمتابعة لهذا الموضوع الشيق وبعد عرض خطوات صبغ البيت عندي والحين حول 3 شهور من خلصت والحمد لله انصح اللي يبني بتطبيق هذا النوع من الصبغ

لاحظت برودة البيت طول أوقات اليوم .. مع إني اطلع درجة الحرارة توصل 40 لكن حرارة ثرموستات التكييف عندي في المكتب بين 24 و 27 أحياناً والصالة فيها مكيفين و4 مكيفات تحت صدقوني فوق أوقات نبند المكيفات من البرد لفترة طويلة وتبرد الصالة من التكييف تحت ومن بعض الغرف المفتوحة وبرودة مريحة

ما ادري ممكن للحين الجو ما صخن وايد بس هذي ملاحظة قوية وبديت اقتنع بها لأن يقولون هذا الصبغ عازل للحرارة والظاهر كلامهم حقيقي
Azizuk
24-05-2016, 11:28 AM
نبارك لخونا معماري قطري على الانتهاء من اعمال صبغ المنزل

الله يبارك لك وعقبال بناء الفيلا الجديدة ان شاالله

بخصوص البيت بارد اللي اعرفه ان عندك الفيلا حالياً الحائط فيها عريض ويعتبر حائط البيت طابوقتين عازل ممتاز

انا غلط أني ماسويت البيت عندي حوائط البيت عبارة عن طابوقتين حتى يغنيك عن عزل البيت بالحجر او بالفوم او اي ماده اخرى

عني افضل الصبغ للبيت اشوفه احلا على الأقل بين فترة وفترة تقدر تغير صبغ وتجديد الصبغ للبيت

والله يبارك للجميع
معماري قطري
24-05-2016, 12:21 PM
الله يبارك فيك اخوي عبدالعزيز صار لي فترة مخلص من شهر 2 اعتقد

بس حبيت اذكر ميزة العزل وشيء لاحظته الحين أكثر عن قبل بسبب الصبغ .. الأصباغ هذي تناسب حتى للحجر وميزة الصبغ لو متأسس صح تقدر تبدل اللون وتغير فيه كل 10 سنوات مع إن اللون الأبيض هو الأثبت والأقوى واللي يعكس الحرارة
sweet qatar
25-05-2016, 11:33 AM
ماشالله الله يبارك لك اخوي معماري .. اخبار طيبة و فرق كبير


السموحة بس اذا ممكن تذكرنا بالنوع الي استخدمته*

وهل العزل محصور في ماركة او مادة معينة ؟
معماري قطري
25-05-2016, 11:44 AM
ماشالله الله يبارك لك اخوي معماري .. اخبار طيبة و فرق كبير


السموحة بس اذا ممكن تذكرنا بالنوع الي استخدمته*

وهل العزل محصور في ماركة او مادة معينة ؟

هذا اختي جوتاشيلد .. شيلد تعني الدرع وهم يدعون إنه مقاوم لتغير اللون وللرطوبة ويعزل الحرارة .. قلت يبالغون بس الواقع أثبت لي إنه فوق الممتاز

البرايمر كان من نوعية خاصة ومن عندهم وطبقة الرش تجي بتشكيلة وهذي اللي تعطي حماية حول 5 ملم غطاء للبلاستر والبرايمر .. وطبقة الصبغ وطبقة الصبغ اللامع + استخدامي للون الأبيض عكس الحرارة بفعالية .. وهذا وانا مركب عازل في الحوائط والسقف من الأساس
معماري قطري
25-05-2016, 11:45 AM
الله يبارك فيج والحمد لله النتيجة كانت مرضية لأعلى المقاييس
معماري قطري
25-05-2016, 11:46 AM
نبغي بعد نتابع أي عملية صبغ داخلي أو خارجي حتى نستفيد ويستفيد الجميع
sweet qatar
05-06-2016, 10:20 AM
الله يعطيك العافية استاذي على الرد الوافي والمتابعة


في نقطة اثارها اليوم المهندس المحيميد في سنابه

عن الطوف الملاصقة للحدايق والزرع

يقول عشان نتجنب تقشر الصبغ يتم عمل النعلات بحجم 50 سم

و يراعى تكون المادة لا تمتص الماء

مثلا حجر التربنتينو يمنع الماي بعكس الحجر السعودي او الأردني
معماري قطري
05-06-2016, 01:39 PM
الله يعطيك العافية استاذي على الرد الوافي والمتابعة


في نقطة اثارها اليوم المهندس المحيميد في سنابه

عن الطوف الملاصقة للحدايق والزرع

يقول عشان نتجنب تقشر الصبغ يتم عمل النعلات بحجم 50 سم

و يراعى تكون المادة لا تمتص الماء

مثلا حجر التربنتينو يمنع الماي بعكس الحجر السعودي او الأردني

ما فيه أحسن من السيراميك والبورسلان للعزل عن الماء ودرجة امتصاص المادتين هي الأقل أما الرخام والحجر والغرانيت كله يمتص بدرجات أكبر

بعدين ضروري نبعد الزراعة شوي عن الحوائط ونسوي حوض خاص لها ونعزله ببلاستيك فلا تتسرب منه الرطوبة ولا توصل الجذور للأساسات .. ونملأ الحوض تربة هشة زراعية بعمق مناسب .. والنعلات تعطي منظر جمالي بس 50 سم شكلها بيكون قبيح الا تنعمل سميكة وبفرزات .. وشيء مهم ما ننساه اللي هو ميلان أرضية الحوش بيبين واضح مع النعلة الكبيرة .. لكن نعلة خطية بسيطة 5 سم أو 7 وتكون جاية مايلة مع ميلان الأرضية تكون سهل تركيبها وقصها وبتبين فاصل حلو
معماري قطري
05-06-2016, 01:41 PM
الحل الثاني الصبغ نفسه نسوي العشرة أو 20 سم السفلية من الصبغ الايبوكسي أو البولي ايرثين .. حتى جوتاشيلد مثل ما يدعون وانا توني تجربتي معاه حديثة يقاوم الرطوبة