هل يلجأ إليكم أبناؤكم/بناتكــــم

[الحياة الخالدة]

السلام عليكم و رحمة الله

صبحكم / مساكم الله بالخير

http://1.bp.blogspot.com/-iPxNTN1Fxik/VTyNNParQwI/AAAAAAAAWYg/QC1SXNwUnGg/s1600/%D9%84%D8%A7%2B%D8%AC%D8%AF%D9%88%D9%89%2B%D9%85%D 9%86%2B%D8%A7%D9%84%D8%AA%D8%B1%D8%A8%D9%8A%D8%A9% 2B%D8%A8%D8%AF%D9%88%D9%86%2B%D8%AD%D8%A8.jpg

سواء عند الوقوع في مشكلة .. أو للحديث في أمور خاصة .. أو للبحث عن إجابات لتساؤلات تخطر ببالهم ( في أمور مختلفة )
أو لمجرد الفضفضة ( كما يقولون ) و تبادل أحداث اليوم و المواقف التي مرت بهم .. أو أو أو

هل الأبواب بينكم مفتوحة و الحواجز معدومة لدرجة أن الابن أو البنت ما يترددون في الكلام معاكم في أي وقت يحتاجون فيه للحديث ؟؟
و متى يكون وقت هاذي القعدات .. هل لها وقت محدد ؟؟ و الا أي وقت ممكن يجونكم يسولفون معاكم ؟؟
من الأقرب للأبناء .. هل هو الأب أم الأم ؟؟ .. أم هم أناس آخرون .. خارج حدود المنزل ( سواءً مكانياً أو تكنولوجياً ) ؟؟


تحياتي للجميع .. و تمنياتي لكم بقضاء عطلة أسبوع سعيدة

[بانغ بانغ]

انا عن نفسي احاول اكسر الفجوات الاجتماعية بحيث اخلي اعيالي مع انهم صغار ان يفاتحوني باي شي ايصادفهم

البعض ايفاتح والبعض يستحي

اتوقع مهم ان يلعب الاب ...دور الصديق لهم في هذه المرحلة

[جبر ال جبر]

انا عن نفسي احاول اكسر الفجوات الاجتماعية بحيث اخلي اعيالي مع انهم صغار ان يفاتحوني باي شي ايصادفهم

البعض ايفاتح والبعض يستحي

اتوقع مهم ان يلعب الاب ...دور الصديق لهم في هذه المرحلة

مهم جدا تقعد معاهم وتخصص وقت لهم المال والبنون زينه الحياه الدنيا وماتكون قاسي عليهم وتكون لين وتسكر الفجوات هذا اهم شي
بعضهم مايدري عن عياله مخلي هالمهمه ع الخدامه والدريول بعض الشباب الله يهداهم يقول ماقعد مع ولدي الا في الاسبوع مره يوم الجمعه !!! شهالحياه

[ضوى]

موضوع طيب من اخت طيبة

باقولج تجربتي اختي العزيزة

عندي ماشاء الله اربعه من العيال الله يحفظهم ويبارك لي فيهم ويبلغني فيهم كل خير يارب

درجة قربهم مني متفاوتة فيه اللي وايد قريب وفي اللي نص ونص ، بس نتفق انهم وايد يفضفضون لي سواء القريب او النص ونص ، تلقينهم اي شي يصادفهم يسعدهم والا يزعلهم يقولون لي ، في المدرسة في البيت والشارع وبالذات عبدالرحمن والعليا اصغير اثنين لو اعطيهم المجال وافتحه عالبحري مابنخلص بس مجابلتهم واسمع تفاصيلهم الدقيقة جدا ، العليا من تدش البيت الله يحفظها كل شي صار بيومها تقوله من تبتدي تبدل لين نقيل ، واخوها مثلها ويتهاوشون منهو يتكلم قبل الثاني ، المهم الولد يقولي تفاصيل المدرسة وشصار وشخذوا ويراويني وش كتب وش قاله الاستاذ .. الخ وانسب الاوقات طبعا مع الغدا والعشا وبين المغرب والعشا هاي قعدتنا الاساسية وبالليل مع البنات بس بحكم انه الشباب غرفهم فوق فما اشوفهم الا خلال الفترات اللي ذكرتها ماعدا هذا يمسون علي ويروحون ينامون ،
البنت الكبيرة تتكلم وتسولف وتفضفض بس بدرجة اقل واكيد لها ربع وصديقات اقرب لها مني وفي اشياء اكيد تقولها لهم انا ماعرفها وانا جدا احترم خصوصيتها واخليها براحتها بس هاي مايمنع اني اتابعها واشوفها اذا تغير شي بجدول حياتها
الولد الكبير كلامنا محدود بسبب الجامعه وربعه والميلس وخلافه بس نتواصل وايد عالواتس اب واذا في شي يقعد معاي ويفضفض معاي او مع ابوه وعالاغلب ابوه اكثر مني واكيد كل واحد منهم عنده صديق والا رفيج والا قريب يقوله الاشياء اللي مايقولها لي

نصيحة اخيرة قربوا من عيالكم وايد اسمعوهم لا تتمللون منهم خاصة الصغار من مرحلة الروضة وطالع احلى سنين العمر اللي يكتسبون فيها عادات وصفات واخلاقيات كثيرة بحكم احتكاكهم بالغير بكم ابتعادهم فترة معينة عن الام والاب تكون في جعبتهم الكثير من القصص والحكايا ، انتهوا للتفاصيل الدقيقة في اللي يقولونه وعلى فكرة ترا فرحتهم لا تقدر يثمن بقعدتهم معاكم ، اجمعوهم عالغدا والعشا وان حصل الفطور بتشوفون اشكثر هم مستمتعين بوجودكم بحياتهم

اسفة اني طولت بس الاسترسال مطلوب

[بانغ بانغ]

مهم جدا تقعد معاهم وتخصص وقت لهم المال والبنون زينه الحياه الدنيا وماتكون قاسي عليهم وتكون لين وتسكر الفجوات هذا اهم شي
بعضهم مايدري عن عياله مخلي هالمهمه ع الخدامه والدريول بعض الشباب الله يهداهم يقول ماقعد مع ولدي الا في الاسبوع مره يوم الجمعه !!! شهالحياه

صادق طال عمرك خاصة في ظل هالمعمعة التكنولوجية

[بعيد النظر]

للحين عيالي صغاار .. والله يبلغني فيهم ويحفظهم

بتكلم عن نفسي كنت قريب للوالدة عسى الله يمدها بالصحة والعافية ..
اكثر من ابوي الله يحفظه بحكم سفراته الكثيرة ..

وكانت دوم حولنا تقعدني من النوم وتريق معاي .. واروح المدرسة ..
و ع الغدى موجودة وتغديني .. وكانت دوم تسالني شسويت اليوم ..
وتسولف معاي كانت اقرب لي من اي شي ثاني ..

ومن ذاك الوقت وانا اقولها اللي عندي وتنصحني ..
وحزات كنت اسمع من هني واطلع من هناك .. وسبحان الله كلام امي هو اللي يصير !
لين الله رزقني بخوة ربع والنعم .. صرت 50% 50% .. السوالف هني وهناك ..

وما انكر دور الوالد في تواجده .. له الفضل بعد الله في شخصيتي اللي انا عليها ..
ينصح ويوجه نعم الاب والقايد .. قاعدته الاولى الصلاة في جماعة وخذ اللي تبيه ..
كنت اذا ابغي شي اصلي الفير واقعد معاه لي الشروق .. واحنا طالعين يقولي آمر شـ بغيت ..
اقوله اجر العمرة .. يقول هذي عند ربك .. شـ بغيت مني استحي منه واسكت هههههههه

والحمدلله كبرنا وفرقنا الصح من الغلط .. وان شاء الله اني بقتدي فيهم ..
بكون حولهم اذا الله راد وبنشدهم عن علومهم كلل يوووم .. مثل ابوي وامي عسى الله يحفظهم

[رجل تعليم]

للأسف أختي حياة ما خليت شيء ما سويته لأجلهم...لكن والدتهم تسرق مني الأضواء ويحبونها أكثر مما يحبونني ههه
يرتاحون للحديث إليها ربما بسبب شخصيتي الصارمة جدا والتي ورثتها عن مهنتي كمدرس
هذا هو الحال ...قلما يطلبون مني شيئا بشكل مباشر ، ولكن الصغيرة فيهم بعمر ست سنوات هي الوحيدة التي تكسر الحدود بسهولة معي وهي الناطقة الرسمية باسم أخيها وأختها الكبيرة
أعلم أيضا أنها عندما ستكبر قليلا سوف تتوجه لوالدتها أكثر وستنسى عنها هذا المعلم الصارم والجاف أحيانا ههه والذي لا يتردد في الصراخ في وجه أبنائه عندما تدعو أصغر ضرورة لذلك

أعتقد أن والدتهم تقوم بدورها وأنا أيضا ...الأدوار موزعة بشكل عادل بيننا كوالدين ... أحيانا يستحب ألا أعرف بعض التفاصيل الخاصة بصغاري بشكل مباشر ...هذه مسؤولية الأم بحكم استعدادها الطبيعي للإطلاع على بعض تفاصيل الأبناء ... إذا كان بمقدور الأم أن تتصرف لوحدها وتعالج الأمر فهذا هو الأفضل ، وعندما تعجز عن تدبير بعض الملفات طبعا يتم التعاون لمعالجة الأمر
بعضنا يكمل الآخر وهذا هو حال أغلب الأسر في اعتقادي

أعتقد أنهم عندما سيكبرون أكثر إن شاء الله ستتبدد الحواجز بيننا أكثر وسنصبح أقرب إلى بعضنا ... حاليا لا أستطيع تقديم إجابات عملية بحكم صغر سن أبنائي ... يبقى أن أسأل الله تعالى أن يحفظ لكم أبناءكم ويهديهم ويصلح شأنهم ويحميهم ويحفظهم من كل سوء .
لكن غالبا ما تصورت أن الأم ستظل دائما أقرب إلى هموم أبنائها ومشاكلهم ..هي التي تكون دائما وبشكل طبيعي مؤهلة بحكم الأمومة لأن تتولى مهمة الإستماع للأبناء ... ربما عامل الحياء والخجل يمنعهم من التوجه لصدر الأب ...الأب بدوره يتحاشى الوصول لأخبار أبنائه عندما يكبرون خصوصا ما تعلق بمسألة تقرير المصير وما إلى ذلك ... نجده يتدخل فيما تعلق بعمل الأبناء ودراستهم ومشاريعهم المستقبلية ... أما ما تعلق بأمورهم الشخصية جدا فيستحسن ترك الدور للأم ...هذا هو الواقع
صباحك سعيد

[راعي الكورفت]

اريد ان اعلق بالموضوع لكني لااعرف الاجابه!

لانني مازلت اعزبا ولم ارزق بالاطفال بعد.


انشاءالله لي عوده بعدما يرزقني الله بالزوجه الصالحه والبنين.



تقبلوا تحياتي :)

[بشائر]

للحين عيالي صغاار .. والله يبلغني فيهم ويحفظهم

بتكلم عن نفسي كنت قريب للوالدة عسى الله يمدها بالصحة والعافية ..
اكثر من ابوي الله يحفظه بحكم سفراته الكثيرة ..

وكانت دوم حولنا تقعدني من النوم وتريق معاي .. واروح المدرسة ..
و ع الغدى موجودة وتغديني .. وكانت دوم تسالني شسويت اليوم ..
وتسولف معاي كانت اقرب لي من اي شي ثاني ..

ومن ذاك الوقت وانا اقولها اللي عندي وتنصحني ..
وحزات كنت اسمع من هني واطلع من هناك .. وسبحان الله كلام امي هو اللي يصير !
لين الله رزقني بخوة ربع والنعم .. صرت 50% 50% .. السوالف هني وهناك ..

وما انكر دور الوالد في تواجده .. له الفضل بعد الله في شخصيتي اللي انا عليها ..
ينصح ويوجه نعم الاب والقايد .. قاعدته الاولى الصلاة في جماعة وخذ اللي تبيه ..
كنت اذا ابغي شي اصلي الفير واقعد معاه لي الشروق .. واحنا طالعين يقولي آمر شـ بغيت ..
اقوله اجر العمرة .. يقول هذي عند ربك .. شـ بغيت مني استحي منه واسكت هههههههه

والحمدلله كبرنا وفرقنا الصح من الغلط .. وان شاء الله اني بقتدي فيهم ..
بكون حولهم اذا الله راد وبنشدهم عن علومهم كلل يوووم .. مثل ابوي وامي عسى الله يحفظهم

عجيييب هالرد ماشاء الله !
رحم الله والديك وحفظهم لك وعيالك ويبلغك فيهم .. ونعم التربية .
وهذا المفروض إنه يصير .. الدور من البداية يقوم على الوالدين ..
الأم أو الأب لازم واحد منهم (على الأقل) يقرب منه عياله ويتودد لهم ويسمع طلباتهم ولا يستهين بها
ويكسب ثقتهم .. بعض الوالدين ثرثارين يقولون مواقف مضحكة أو عادية قدام الناس وهي مب عادية عند الطفل تضايقه
تحرجه وتكون السبب في بعده عن الفضفضة والمصارحة لهم ..
احترام مشاعر الطفل أمر ضروري وهي أول خطوات الثقة ..

[العقل المدمر]

انا بتكلم عن مراهقتي وطفولتي :tease:
كنت الطفلة الصامتة :( ابوي عمره ماسولف معاي
اما امي من كثر ما كانت عصبية صارت بيننا حواجز كبيرة
كنت احس اني في كل شي بكون غلطانة وان قلت كلمة بنضرب
طبعا وصلت عالمراهقة محد فيهم قريب ككلام بس احب ابوي اكثر
اما القراب اللي كنت اسولف لهم وافضفض لهم اكيد ربعي
والحين تجاوزت كل الناس وماحب افضفض الا حق نفسي :(

[بصمة قطرية]

الحمدلله عيالي أصدقائي ..
عطيتهم الثقة و كسبتهم الحمدلله ..
أعمارهم مختلفة أكبرهم 19 سنه و أصغرهم 9 سنين ..
يسولفون لي عن ربعهم و المواقف اللي تصير لهم
و لربعم و ياخذون رايي في أشياء كثيرة ..
عودتهم أسألهم دوم اش سويتوا وين رحتوا إش صار معاكم
و عودتهم اني أسمعهم هالشي خلاهم الأقرب لي
و صرنا أصدقاء ..
الثلاث الكبار بالذات علاقتي معاهم صديقتهم و امهم ..
كثر ما يسولفون لي عن السيارات صرت أعرف كل شي
على قولة أخوي ( واحد من الشباب ) طبعاً كلهم شباب الله يحفظهم و يبلغني فيهم
و يطرح فيهم البركة ..
العيال من نعطيهم الثقة و الأمان راح نكسبهم أصدقاء ..

[مختلفة عقليا]

السلام عليكم

لحين ما طلع ولدي للحياة ., ولكن اعتقد ع العلم والتجربة والخبرات اللي عندي ولدي او بنتي هم اصدقائي .,

بس من تجربتي مع امي .,

اااه فديت امي ., امي صديقتي كل شي ابي اخذ فيه استشاره ., حتي لو انا متاكده انها ماتعرف الحل اقول لها ., الفضفضه معاها شي ثاني

الله يرزقها الفردوس الاعلي .,

ويسلموو

[limited]

انا بتكلم عن مراهقتي وطفولتي :tease:
كنت الطفلة الصامتة :( ابوي عمره ماسولف معاي
اما امي من كثر ما كانت عصبية صارت بيننا حواجز كبيرة
كنت احس اني في كل شي بكون غلطانة وان قلت كلمة بنضرب
طبعا وصلت عالمراهقة محد فيهم قريب ككلام بس احب ابوي اكثر
اما القراب اللي كنت اسولف لهم وافضفض لهم اكيد ربعي
والحين تجاوزت كل الناس وماحب افضفض الا حق نفسي :(

وللحين عايشه ؟؟؟؟

[العقل المدمر]

وللحين عايشه ؟؟؟؟

كلنا عايشين وعلاقاتنا تحسنت بشكل كبير الحمد لله

[غريب الدّار]

والله يالحياة بما ان الشئ بالشئ يُذكر :

اذكر اني قريت مرة نسيت في أي موقع بالضبط ولا أي كتاب ، كان في بنت تقول انها مستعدة تقول اسرارها للعالم كله وماتقول حق أمها

وكان في طبيب نفسي علّق على كلامها وقال : ان هذا اكبر خلل في التربية ، لان الام والأب يُفترض انهم يكونون اقرب الناس لعيالهم

طبعا المفروض شي والواقع شي ثاني

وكل مجتمع تحكمه قناعات وأمور متوارثة


والله يوفق الجميع