استفسار : حضور مباريات الدوري الاسباني ( الكلاسيكو )

[البرونزي]

السلام عليكم ورحمة الله وبركاتة

بغيت استفسر للي عنده خبره منكم او يقدر يفيدني
بأذن الله ناوي احضر مباراة في الدوري الاسباني
وبغيت تذاكر لكن للاسف مالقيت حد عندنا وكلهم من
دول الخليج والاسعار تختلف بفرق كبير بين كل بائع وبائع
مثلا احصل ناس في الكويت تبيع التذكره مع الفندق 4 ليالي بسعر
تقريبا من 5000 الى 6000 ريال ,, وناس ثانيه احصل عندها
التذكره بس لحضور المباراة بسعر 5000 ريال الى 7000 ريال
طبعا من غير السكن والسعر يختلف على حسب المكان في الملعب .
طبعا ودي اشتري من الدوحه على الاقل اضمن ان التذكره غير مزوره وهاذي ممكن تصير
الي يقدر يفيدني ياليت يفيدني او يرسل لي اي معلومات عنده ...

تحياتي للجميع مقدمأ

[مختلف جداََ]

ياخوي
ليش بالش عمرك

اشتر التذكرة أونلاين و اطبعها و خذها معاك
و السلام ختام

[حفيد الأنصار]

برايئ تظبط أمورك بنفسك وترتاح

[][ الوحيد ][]

حضرت الكلاسيكو السنه اللي راحت .. والتذاكر و السكن رتبهم لي واحد كويتي ماقصر بما انهم هم الخبره في هالسوالف ..
و مكاني كان جدا ممتاز في وسط السنتياقوو و بيني و بين الملعب يمكن 7 كراسي !.. والتذاكر اللي عنده موسميه ,,
يعني يعطيك بطاقه نفس بطاقه البنك .. و بين الشوطين يجيك واحد من المسؤولين اللي يشتغلون معاه .. وياخذ التذكره من عندك ..


هاي رقم الرجال بعد اذن الاداره .. easy ticket

0096555151540

[مهندس اسهم]

مرحبا اخوي

الشيخ انا العام حضرت المباراة في برشلونه وكانت الاجواء جدا حلوة ورائعه .. اللي اعرفه انه اسيا للسفريات اللي في المعمورة ولهم فرع في العزيزيه و دحيل يبيعون تذاكر المباريات وذي اسهل طريقه

الطريقه الثانية اللي انا سويتها ... في موقع متخصص في بيع تذاكر المباريات واللي شريتها من عندهم.

الرابط اللي تحت فيه تذاكر مباراة برشلونه وريال مدريد الجايه في برشلونه 3 ابريل 2016 وتقدر تشوف بعد مباريات في دوري الابطال او الدوري الانجليزي او اي دوري كبيراو احداث كبيره
http://www.viagogo.com/Sports-Tickets/International-Soccer/FC-Barcelona-vs-Real-Madrid-Tickets/E-1073691

وفيه طريقتين اما تشتري ال E- ticket او فيه خيار pick up on event day وهذا اللي صار معاي بعد ما تشتري بطاقة المباراة بيطرشونلك ايميل تاكيد ويوم المباراة بيطرشونلك ايميل يقولونلك فيه من وين تاخذ بطاقة المباراة ويكون فندق قريب من الملعب بس لازم ترجع البطاقة بعد المباراة مباشرة او يسحبون منك 200 يورو اذا ما رجعتلهم البطاقة. انا صراحة قبل المباراة كنت خايف لكن الحمدلله طلع كل شي تمام وحتى واحد من الربع راح مباراة ارسنال ومانشستر يونايتد عن طريقهم وبنفس الاجراءات. الموقع راح يوفرلك بعد خيار المنطقة اللي تبي تقعد فيها.
بالنسبة للفندق اللي سكنته كان بينه وبين الملعب خمس دقايق مشي وهو 4 نجوم واسمه Catalonia Rigoletto نظيف وزين والنت سريع بس عيبه الوحيد مافي شطاف وينفع ليوم المباراة.
واذا فيه اي استفسار الشيخ انا حاضر.

[بونووف]

اغلب تذاكر المباريات وخصوصا للكلاسيكو قبل المباراه بفتره تبتدي تنفتح الكراسي للبيع من المواقع .. وفي بعضهم عندهم كراسي باسمهم اتوقع هاي الي يقصده الوحيد تلاقيه يبيع الكرسي كل مباراه

عندي رقم مغربي اتعامل معاه متعامل معاه اكثر من 5 مرات وغير الشباب متعاملين معاه

ممكن تجرب القطريه انا خذت من عندهم اولت العام كانوا يبيعون .. والعام خذت من عندهم لكن عن طريق واحد شغال فالقطريه

تقدر تكلم الفندق الي بتسكن فيه ممكن يدبر لك تذاكر

وقبل المباراه بيوم بتلاقي كشك في الرامبلا يبيع تذاكر رسميه وحتى يوم المباراه

فالاخير ياخوي اذا صكت مالقيت عند حد خذ لك فرتين عند الملعب قبل المباراه بتلاقي نااس بالهبل يتمشون ويبيعون تذاكر


واذا انك مدريدي شوفها فالدوحه ماله داعي تتعنى :tease:

[رُفق المجنّا]

ما اعرف ليه الاصرار ع المكاتب ؟!

الموقع مفتوح وتختار المكان اللي تبيه , انا شريتهم بـ 80 يورو وأشوف حبة الخال اللي في وجيه اللاعبين

وبالعكس حلاتها في نص الجمهور عشان تحس بالاجواء

[البرونزي]

السلام عليكم ورحمة الله وبركاته
انصح الجميع بعدم التعامل مع سفريات اسيا
سافرت اسبانيا ولاحصلت التذاكر للاسف وكل
التكاليف الي دفعتها للسفر راحت على الفاضي
وحاليا رفعت دعوه عليهم في المحكمه لتعويضي كل تكاليف السفره

[بوخالد911]

السلام عليكم ورحمة الله وبركاته
انصح الجميع بعدم التعامل مع سفريات اسيا
سافرت اسبانيا ولاحصلت التذاكر للاسف وكل
التكاليف الي دفعتها للسفر راحت على الفاضي
وحاليا رفعت دعوه عليهم في المحكمه لتعويضي كل تكاليف السفره

عاد حطنا بالصورة ع ايش انتهى موضوعك.
لا هنت.

[البرونزي]

عاد حطنا بالصورة ع ايش انتهى موضوعك.
لا هنت.

على خير يابوخالد حاولنا نتوصل للتسويه لكن
الاخوان في السفريات عندهم قناعه انهم مب غلطانين وهذا بعد المماطله والوعود الكاذبه
والتعويض لتذكرة المباراه بس وباقي المصاريف غير مسؤولين عنها
واحنا لولا والمباراه ووعدهم بتوفير التذكره ماسافرنا ولا تكلفنا واختارو طريق القضاء وان شاء الله ينصفنا ،،