لو قال لج بوديج .. بتروحين معاه ؟؟ [الأرشيف] - منتديات شبكة الأسهم القطرية

الحياة الخالدة

07-02-2016, 09:53 AM

السلام عليكم و رحمة الله

صبحكم / مساكم الله بالخير
عزيزتي الزوجة : لو قال لج زوجج أنا خذلت لج موعد مع الدكتور في عيادة جراحة التجميل

مثلاً :
خشمج عوي .. أبيه يعدله
شفايفج صغيرة .. أبي يكبرها
ويهج فاش .. أبي ينفخه و يطلع لج خدود و غمازات
زنودج متينة .. أبي يشفطها و يشدها
ابتسامتج مب عاجبته .. و يبي ابتسامة هوليوود

و غيره و غيره .. من اللي طول الوقت يعلق عليه و يقول لج يحتاج تعديل

هل بتوافقين تروحين معاه ؟؟
بيكون هالشي برضاج والا بتتروحين و انتي مغصوبة .. و بتحسين ان لو ما سويتي هالشي بيزعل عليج و أكيد بتزوغ عينه على غيرج ؟؟

والا انتي أصلاً اللي تبين تسوين هالشي من نفسج و بتقعدين تحنين عليه ليل و نهار عشان يوديج .. أو يخليج تروحين بروحج ؟؟

و تحياتي للجميع

R 7 A L

07-02-2016, 10:06 AM

موضوعج صعب

بانغ بانغ

07-02-2016, 10:09 AM

متفرج من بعيد

مختلف جداََ

07-02-2016, 10:17 AM

بجاوب بالنيابة عن مدامتنا
بتقول لي

إذا انت مصر على رايك ،

طلقني

المــزن*

07-02-2016, 10:19 AM

الحياة الخالدة

07-02-2016, 10:19 AM

رحال .. بانغ بانغ
الموضوع بالدرجة الأولى موجه للحريم .. لكن مشاركة الرجال فيه أيضاً مهمة جداً
هو يتكلم من واقع نعيشه لا يمكننا إنكاره .. و يتناول مفاهيم و زوايا مختلفة .. في نظري تستحق النقاش

يمكن تحبون تشاركون فيما بعد .. حياكم الله مشاركين أو متابعين

الحياة الخالدة

07-02-2016, 10:34 AM

بجاوب بالنيابة عن مدامتنا
بتقول لي
إذا انت مصر على رايك ،
طلقني

هلا فيك أخوي مختلف
هل هاذي فرضية منك .. والا انت جربت ؟؟
و هل طرت على بالك مثلاً هالفكرة يوم من الأيام ؟؟
لك حرية الإجابة من عدمها

ضوى

07-02-2016, 10:35 AM

ان طلب مني هالشي باوافق

لكن اول شي باقوله يصبغ شعره اسود وينحت خصره ويشيل كرشته وسوي ليزر حق ويهه ويصغر شوي خشمه ويجمل اشوي بأذانيه لانه مب شي شكلهم اذا رضى بهاي كله باسوي اللي يبيه

الحياة الخالدة

07-02-2016, 10:37 AM

وعليكم السلام والرحمه

ماراح اسوي هالشي اذا مب مقتنعه فيه حتى لو زعل علي
الراي الاول والاخير يرجع لي لان هالشي يخصني انا مب هو ..
واذا كنت فعلا احتاج تجميل مب مشكله بسوي بس مب لازم اروح وياه :(

يعطيج العافيه حبيبتي
هلا هلا بالمزن .. الله يرزقنا المطر ههههههههه
ليش ما توافقين .. طبعاً على فرض إن مافيه شبهة تحريم
طالما هالشي بيسعده و يرضيه
و ليش ما تبين تروحين معاه ؟؟

الله يعافيج يالمزن

مختلف جداََ

07-02-2016, 10:38 AM

هلا فيك أخوي مختلف
هل هاذي فرضية منك .. والا انت جربت ؟؟
و هل طرت على بالك مثلاً هالفكرة يوم من الأيام ؟؟
لك حرية الإجابة من عدمها

ما جربت

وليست فرضية ،
لأنه بتقول هذا من تغيير خلق الله

هلا فيج

مختلف جداََ

07-02-2016, 10:39 AM

ان طلب مني هالشي باوافق

لكن اول شي باقوله يصبغ شعره اسود وينحت خصره ويشيل كرشته وسوي ليزر حق ويهه ويصغر شوي خشمه ويجمل اشوي بأذانيه لانه مب شي شكلهم اذا رضى بهاي كله باسوي اللي يبيه

و إذا هو أساسا جميل !!!

طيب
و إذا رضى ؟؟؟

نيساني

07-02-2016, 10:39 AM

اممم مراقب حتى اشعارٍ آخر

ضوى

07-02-2016, 10:39 AM

و إذا هو أساسا جميل !!!

طيب
و إذا رضى ؟؟؟

اذا هو جميل فاكيد باكون أجمل منه

واذا رضى بارضى

الحياة الخالدة

07-02-2016, 10:40 AM

ان طلب مني هالشي باوافق

لكن اول شي باقوله يصبغ شعره اسود وينحت خصره ويشيل كرشته وسوي ليزر حق ويهه ويصغر شوي خشمه ويجمل اشوي بأذانيه لانه مب شي شكلهم اذا رضى بهاي كله باسوي اللي يبيه

هلا فيج ضوى
ليش ماخذه السالفة بندية .. أقصد وحدة بوحدة ؟؟
الجمال مطلوب في المرأة أكثر من الرجل ..
و اذا هو ياج وقال لج بكل حب و حنان : أبيج تسوين هالشي عشاني .. طالما مافيه حرمة .. ولا يضرج بشي
شاللي يمنع إنج توافقين ؟؟

بعيد النظر

07-02-2016, 10:40 AM

من طبيعة المراة المناحس ..

لو تبي تروح بتروح بنفسها ..
اما اني افاجئها بشي مثل ذي !

اتوقع اني جنييت على نفسي

JN000N

07-02-2016, 10:42 AM

يمكن اي يمكن لا
اذا واثقه من نفسي ومابي ومالي خاطر بسحب عليه
واذا ودي من الله اصلا ياشر لي
يمكن انا افاجئه واقوله حددت الموعد خلاص ههههاي

الحياة الخالدة

07-02-2016, 10:42 AM

ما جربت

وليست فرضية ،
لأنه بتقول هذا من تغيير خلق الله

هلا فيج

تمام تمام .. دام انتو الاثنين مقتنعين .. محد له عندكم شي
الله يسعدكم و يتممها عليكم

الحياة الخالدة

07-02-2016, 10:43 AM

اممم مراقب حتى اشعارٍ آخر

ههههههه خلاص ننتظر الإشعار الآخر
مع رحال و بانغ بانغ
حياك الله أخوي

المــزن*

07-02-2016, 10:44 AM

هلا هلا بالمزن .. الله يرزقنا المطر ههههههههه
ليش ما توافقين .. طبعاً على فرض إن مافيه شبهة تحريم
طالما هالشي بيسعده و يرضيه
و ليش ما تبين تروحين معاه ؟؟

الله يعافيج يالمزن

اهلين حبيبتي... امين يارب

ماحب حد يفرض رايه علي اذا انا مب مقتنعه واذا ملزم اني اسوي هالشي غصبن عني ،، الله وياه ويسهل دربه
مابي اروح وياه لاني ماحب الريال الي يتدخل ف سوالف الحريم

ضوى

07-02-2016, 10:44 AM

هلا فيج ضوى
ليش ماخذه السالفة بندية .. أقصد وحدة بوحدة ؟؟
الجمال مطلوب في المرأة أكثر من الرجل ..
و اذا هو ياج وقال لج بكل حب و حنان : أبيج تسوين هالشي عشاني .. طالما مافيه حرمة .. ولا يضرج بشي
شاللي يمنع إنج توافقين ؟؟

خلينا واقعين عزيزتي الحياة ، يعني هو ماجاني ويبيني اسوي اللي يبيه الا وهو شايف وزايغة عينه وهالمفروض مايجوز خله يتزوج واحدة شكلها مثل مايبي ويسرحنا بالمعروف

الحياة الخالدة

07-02-2016, 10:46 AM

من طبيعة المراة المناحس ..
لو تبي تروح بتروح بنفسها ..
اما اني افاجئها بشي مثل ذي !
اتوقع اني جنييت على نفسي

ههههههههه المناحس اممممم أتفق معاك موجود عند الأغلبية
بس عموماً الإنسان ما يحب يكون الشي مفروض عليه
مب لازم تفاجئها يعني .. ممكن تمهد حق الموضوع و تكلمها بكل هدوء
عاد كل واحد يعرف مفتاح زوجته .. و شلون يوصل لها الرسالة اللي يبيها

حياك الله أخوي

الحياة الخالدة

07-02-2016, 10:50 AM

يمكن اي يمكن لا
اذا واثقه من نفسي ومابي ومالي خاطر بسحب عليه
واذا ودي من الله اصلا ياشر لي
يمكن انا افاجئه واقوله حددت الموعد خلاص ههههاي

ههههههههههه يعني حسب المزاج و الحالة النفسية
بس عجبتني سالفة إني حددت الموعد خلاص
يعني انتي مقررة و خالصة .. و حديتيه إنه يطلب منج هالشي
يعني بالعربي : أجبرتيه بالطريقة الذكية إن القرار يجي منه ( نفس موضوع أختنا ضوى )

كيد النساء ماله حل

بعيد النظر

07-02-2016, 10:51 AM

ههههههههه المناحس اممممم أتفق معاك موجود عند الأغلبية
بس عموماً الإنسان ما يحب يكون الشي مفروض عليه
مب لازم تفاجئها يعني .. ممكن تمهد حق الموضوع و تكلمها بكل هدوء
عاد كل واحد يعرف مفتاح زوجته .. و شلون يوصل لها الرسالة اللي يبيها

حياك الله أخوي

صعبة جدا امهد .. المراة كل يوم بمزاج ..
واذا عرفتلها باسلوب معين .. باجر مزاجها غير و تبي اسلوب غيره ! ههههههههههههههه

يعني الموضوع مللللللللللللغي !
حتى لو هي ميتة وتبي تسويه .. بس يجي من الزوج ؟!

عيل شلا خذتني وخشمي عوي ..

احس اني ممكن اكتب 1000 سيناريو هههههههههههه

القبطان سلفر

07-02-2016, 10:53 AM

ان طلب مني هالشي باوافق

لكن اول شي باقوله يصبغ شعره اسود وينحت خصره ويشيل كرشته وسوي ليزر حق ويهه ويصغر شوي خشمه ويجمل اشوي بأذانيه لانه مب شي شكلهم اذا رضى بهاي كله باسوي اللي يبيه

هو الحلقه الاقوى

يعني هو اللي يملي شروطه لانه صاحب الترخيص بالتعدد :)

على العموم هي قضية شائكه فمن المفترض كلا الطرفين يتجمل للاخر ويستشف ما يعجب الشريك ويفعله سواء من المظهر الخارجي لبس وما الى ذلك . ولكن من الافضل عدم التصريح لاي طرف للاخر بأن هناك عيب خلقي فيه مثل الخشم او اي عضو اخر على اعتبار انه نوع من التجريح والنقد السلبي مما قد يفرض قطيعه عاطفيه بينهم .

واذا قال الرجل لزوجته تعالي بوديج تسوين عمليه تجميل يعني بلغ السيل الزبى واصبح الحال لا يطاق لديه وعليها ان تذهب معه حتى لا يذهب عنها .

R 7 A L

07-02-2016, 10:53 AM

احس صعبة فيه ريال يطلب من زوجته هالطلب كاش مباشر

بعيد النظر

07-02-2016, 10:55 AM

مشاكل

07-02-2016, 10:57 AM

اتوقع انه حرام والله اعلم الا اذا كان في تشوهات خلقية

بانغ بانغ

07-02-2016, 10:57 AM

احس صعبة فيه ريال يطلب من زوجته هالطلب كاش مباشر

لا والله مثل ما قال القبطان ايسمكرها عند فني محترم احسن من ما ياخذ عليها...

الحياة الخالدة

07-02-2016, 11:02 AM

صعبة جدا امهد .. المراة كل يوم بمزاج ..
واذا عرفتلها باسلوب معين .. باجر مزاجها غير و تبي اسلوب غيره ! ههههههههههههههه

يعني الموضوع مللللللللللللغي !
حتى لو هي ميتة وتبي تسويه .. بس يجي من الزوج ؟!

عيل شلا خذتني وخشمي عوي ..

احس اني ممكن اكتب 1000 سيناريو هههههههههههه

وانا عشان جذي قلت لك : الرجال يعرف مفتاح زوجته
يعرف متى يكلمها .. و متى يسكت و ما يتكلم لا في تجميل ولا في غيره
بالضبط نفس ماهي المفروض تسوي .. و ما تطلب اللي تبيه إلا في الوقت المناسب و الظروف المناسبة

و بخصوص الجملة الأخيرة : ليش خذتني و خشمي عوي
أتفق معك تماماً و ابصم لك بالعشرة ههههههههههههه

الحياة الخالدة

07-02-2016, 11:07 AM

هو الحلقه الاقوى

يعني هو اللي يملي شروطه لانه صاحب الترخيص بالتعدد :)

على العموم هي قضية شائكه فمن المفترض كلا الطرفين يتجمل للاخر ويستشف ما يعجب الشريك ويفعله سواء من المظهر الخارجي لبس وما الى ذلك . ولكن من الافضل عدم التصريح لاي طرف للاخر بأن هناك عيب خلقي فيه مثل الخشم او اي عضو اخر على اعتبار انه نوع من التجريح والنقد السلبي مما قد يفرض قطيعه عاطفيه بينهم .

واذا قال الرجل لزوجته تعالي بوديج تسوين عمليه تجميل يعني بلغ السيل الزبى واصبح الحال لا يطاق لديه وعليها ان تذهب معه حتى لا يذهب عنها .

و هذا أخونا الحكيم القبطان سلفر عطاج اياها كاش أختي ضوى
لازم تترسين عينه .. عشان ما يطالع غيرج

هذا المبدأ الدارج الحين .. ارضي الزوج و سوي كل اللي يبيه .. عشان ما يتزوج عليج

رأيي الشخصي : ترضينه بما يرضي الله و من غير ضرر و خطر عليج
لكن الكثيرات يسعين لإرضاء الزوج بأي طريقة ( حتى لو فيها معصية ) .. و في خضم كل هذا ينسين أنفسهن

و شاللي يضمن بعد كل التعب و العمليات اللي ممكن تمر بها الزوجة .. أنه ما يتزوج عليها
مافي ضمان طبعاً .. و يبقى الزواج عليها من حقه : سواء سوت التجميل أو ما سوت
القصد أن سالفة سوي التجميل لا يروح يتزوج عليج .. ما تمشي

الحياة الخالدة

07-02-2016, 11:09 AM

اتوقع انه حرام والله اعلم الا اذا كان في تشوهات خلقية

والله ياخوي مشاكل : أتفق معاك
قبل لا تقدم المرأة أو الرجل طبعاً على أي عملية تجميل .. لازم تستفتي فيها من ناحية الحرمة أو الكراهة أو الجواز

تحياتي لك

المخفي

07-02-2016, 11:10 AM

لا طاعة لمخلوق في معصية الخالق

الحياة الخالدة

07-02-2016, 11:10 AM

احس صعبة فيه ريال يطلب من زوجته هالطلب كاش مباشر

فيه يا رحال .. بس انت ما تدري عنهم
و في اللي يودي زوجته عند الجراح بنفسه .. و يقول له شنو يسوي لها

مختلف جداََ

07-02-2016, 11:11 AM

خلينا واقعين عزيزتي الحياة ، يعني هو ماجاني ويبيني اسوي اللي يبيه الا وهو شايف وزايغة عينه وهالمفروض مايجوز خله يتزوج واحدة شكلها مثل مايبي ويسرحنا بالمعروف

يعني إذا تزوج لازم يسرح

مافي حل وسط !!!

الحياة الخالدة

07-02-2016, 11:12 AM

لا والله مثل ما قال القبطان ايسمكرها عند فني محترم احسن من ما ياخذ عليها...

طبعاً لما تكون الزوجة بالنسبة للرجل مثل أي سيارة أو بضاعة يشتريها
أكيد بيروح يسمكرها
لكن على العموم السمكرة ما تقتصر على النساء

تحياتي لك

الحياة الخالدة

07-02-2016, 11:13 AM

لا طاعة لمخلوق في معصية الخالق

صحيح كلامك أخوي المخفي
لكن بعض الأمور اختلف علماء الدين في حرمتها
ولا أفتي في ذلك

بانغ بانغ

07-02-2016, 11:15 AM

طبعاً لما تكون الزوجة بالنسبة للرجل مثل أي سيارة أو بضاعة يشتريها
أكيد بيروح يسمكرها
لكن على العموم السمكرة ما تقتصر على النساء

تحياتي لك

لحد يزعل انتي قلتيها ان بعض الرجال ايودون حريمهم بنفسهم للدكتور ... يعني ايعامليها كسلعة او جارية

طبعا ما انسب المبدأ لك

الحياة الخالدة

07-02-2016, 11:17 AM

لحد يزعل انتي قلتيها ان بعض الرجال ايودون حريمهم بنفسهم للدكتور ... يعني ايعامليها كسلعة او جارية

طبعا ما انسب المبدأ لك

لا أخوي ما أزعل .. لأن هالنظرة موجودة عند البعض
ما أقصدك طبعاً

مختلف جداََ

07-02-2016, 11:17 AM

الله يعينا على هالزمن
الوحده ما تبي تتعدل
و ان طالع غيرها حرام
و ان تزوج عليها
قالت له ودني بيت أبوي

طيب و بعدين!!!!!

بانغ بانغ

07-02-2016, 11:20 AM

لا أخوي ما أزعل .. لأن هالنظرة موجودة عند البعض
ما أقصدك طبعاً

كان زين حطيتي جزء من سوال الموضوع بشكل عكسي

هل فعلا بيرضى الرجل ان يعدل من شكله ... اذا مرته قالت له âک*

اشك في ذلك

مشاكل

07-02-2016, 11:20 AM

والله لو كل رجل غض بصرة عن ماحرم الله لأصبحت زوجته في نظره حورية من حور الجنة

لبيبة

07-02-2016, 11:21 AM

وعليكم السلام ورحمة الله وبركاته،

الموضوع من الناحية الشرعية حرام إن كان فيه تغيير للخلقة، وإن كان لتعديل عيب خلقي هناك فتاوى،

اما اذا بنتكلم عن العمليات التجميلية بشكل مطلق،

ينصحون أطباء التجميل ان الوحدة اذا بتسوي عملية يسألونها هل انتي بتسوينها إرضاء لشخص ما في حياتج؟ والا بتسوينها لنفسج؟

واذا جاوبت انها تبي تسويها إرضاء لزوجها مثلا، يرفض الطبيب يسوي العملية، لأن الطبيب يعرف انها بتندم بعدين لأنها ما سوتها لنفسها،

وسوتها إرضاء لشخص في حياتها وما راح يدوم هالشخص لها،

في حين جسمها ووجهها بيكونون شيء دائم لها طول حياتها، شلون تغير شيء دائم علشان شخص مؤقت.

بالتالي يرفضون أطباء التجميل الشاطرين ان يسون اي عملية إذا كانت الوحدة تبيها إرضاء لزوج أو غيره،

بالتالي، اذا بنطبقه على الموضوع، لا تسوي العملية إرضاء لزوجها، و رفقا بزوجاتكم لا تحملونهم ما لا يطيقون.

الحياة الخالدة

07-02-2016, 11:23 AM

الله يعينا على هالزمن
الوحده ما تبي تتعدل
و ان طالع غيرها حرام
و ان تزوج عليها
قالت له ودني بيت أبوي

طيب و بعدين!!!!!

الله يعين
بس شلون تتعدل .. إذا السالفة فيها خلاف هل هي حلال والا حرام ؟؟
و هل هي لما تسوي العمليات اللي يطلبها خلاص ما راح يطالع غيرها ؟؟
و تقعد طول عمرها بس كلما اشتهى شكل معين خذاها للجراح يصلح فيها ؟؟

و في النهاية نفس ما قلت حق القبطان : هو متزوج عليها متزوج .. ليش التعب و الشقى

الحياة الخالدة

07-02-2016, 11:26 AM

كان زين حطيتي جزء من سوال الموضوع بشكل عكسي

هل فعلا بيرضى الرجل ان يعدل من شكله ... اذا مرته قالت له âک*

اشك في ذلك

والله ياخوي ما حبيت الموضوع يكون موجه ضد الرجل
فخليته عام من الطرفين
لأن في حريم بعد يسعون لهذه العملية و الهدف الأساسي : إرضاء الزوج .. عشان ما يطالع وحدة ثانية

ضوى

07-02-2016, 11:27 AM

والله لو كل رجل غض بصرة عن ماحرم الله لأصبحت زوجته في نظره حورية من حور الجنة

بس هذي الزبدة بالنسبة لي

الحياة الخالدة

07-02-2016, 11:28 AM

والله لو كل رجل غض بصرة عن ماحرم الله لأصبحت زوجته في نظره حورية من حور الجنة

صدقت أخي الكريم .. و هاذي هي الحكمة الإلهية من غض البصر .. و الأمر للطرفين
لكن من يلتزم في هذا الزمن .. أو من يستطيع ؟؟!!

مختلف جداََ

07-02-2016, 11:29 AM

الله يعين
بس شلون تتعدل .. إذا السالفة فيها خلاف هل هي حلال والا حرام ؟؟
و هل هي لما تسوي العمليات اللي يطلبها خلاص ما راح يطالع غيرها ؟؟
و تقعد طول عمرها بس كلما اشتهى شكل معين خذاها للجراح يصلح فيها ؟؟

و في النهاية نفس ما قلت حق القبطان : هو متزوج عليها متزوج .. ليش التعب و الشقى

تقولين عمليات التجميل فيها خلاف هاه
طيب
خذي عندج

اعرف واحد جاني فاصل ( رفيج دنيا ).
و قال لي مب حالة ترى

قلت له خير شعندك

قال لي تخيل اقول لمرتي قصي شعرج لأنه طويل وايد و خاطري تغيرين فيه
قالت له : أنا أطول شعري لأني سمعت إنه المره اللي شعرها طويل يسترها يوم القيامة .

ما بغى يكسر خاطرها

راح قال لها انزين صبغيه أشقر ، قالت له أنا صبغت مره وحده واخترب شعري.

الرجال هني جاب العيد

بالله هذي ما ياخذ عليها 4 في نفس اليوم :anger1:

الحياة الخالدة

07-02-2016, 11:33 AM

بانغ بانغ

07-02-2016, 11:36 AM

تقولين عمليات التجميل فيها خلاف هاه
طيب
خذي عندج

اعرف واحد جاني فاصل ( رفيج دنيا ).
و قال لي مب حالة ترى

قلت له خير شعندك

قال لي تخيل اقول لمرتي قصي شعرج لأنه طويل وايد و خاطري تغيرين فيه
قالت له : أنا أطول شعري لأني سمعت إنه المره اللي شعرها طويل يسترها يوم القيامة .

ما بغى يكسر خاطرها

راح قال لها انزين صبغيه أشقر ، قالت له أنا صبغت مره وحده واخترب شعري.

الرجال هني جاب العيد

بالله هذي ما ياخذ عليها 4 في نفس اليوم :anger1:

ههههههههههههههههههههههههههه في منتصف الصالون

سووووووووري الحياة ما قدرت استوعب مختلف

بس مختلف ما يصير ياخذ عليها اربعة .. حدة ثلاثة لانه متزوج

JN000N

07-02-2016, 11:37 AM

ههههههههههه يعني حسب المزاج و الحالة النفسية
بس عجبتني سالفة إني حددت الموعد خلاص
يعني انتي مقررة و خالصة .. و حديتيه إنه يطلب منج هالشي
يعني بالعربي : أجبرتيه بالطريقة الذكية إن القرار يجي منه ( نفس موضوع أختنا ضوى )

كيد النساء ماله حل

ههههههههههه
مافي حد مايحب يتجمل ويتعدل ويدور الحلا والجمال والعدال
بالعكس هالشي مطلب للكل تقريبا
ماقول سوو عمليات تجميل
الله سبحانه خلقنا في احسن صوره
وماقدر حتى اقول عن شي ف خلق الله عيب خلقي
احس الكلمه مب حلوه
في امور وحوادث تخرب عالشخص وافتو العلماء عادي تعديلها
كم واحد ووحده انكسرو خشومهم مثلا
في نفس الوقت ماننكر ان تغيير خلق الله حرام
واللي بيطلبه مني لو تغيير في الشكل ويقول صيري مثل فلانه وعلانه هني من حقي الرفض
لكن لو قالي عن اشيا بسيطه او شد ف الجسم او تصغير هتلشي عادي مايضر

أم محمد 90

07-02-2016, 11:38 AM

تحياتي لكل امرأة تجمل نفسها لنفسها فقط

مو للغير...

JN000N

07-02-2016, 11:39 AM

تقولين عمليات التجميل فيها خلاف هاه
طيب
خذي عندج

اعرف واحد جاني فاصل ( رفيج دنيا ).
و قال لي مب حالة ترى

قلت له خير شعندك

قال لي تخيل اقول لمرتي قصي شعرج لأنه طويل وايد و خاطري تغيرين فيه
قالت له : أنا أطول شعري لأني سمعت إنه المره اللي شعرها طويل يسترها يوم القيامة .

ما بغى يكسر خاطرها

راح قال لها انزين صبغيه أشقر ، قالت له أنا صبغت مره وحده واخترب شعري.

الرجال هني جاب العيد

بالله هذي ما ياخذ عليها 4 في نفس اليوم :anger1:

لا والله
حبكت تصبغ شعرها اشقر عشان حضرته يتونس وهي شعرها يقلب يعد ويطيح ويخترب
بعدين شحلاته الشعر الطويل الناس يدورونه دواره يركبون وصلات عشان يطولون شعرهم وهو يقولها قصيه
ليش بالساهل هو طول
خل يعدل ف عمره زين عشانها عشان هي تتشجع تعدل عشانه
تعالي يالمره صيري مجله متجدده للزوج عشان حضرته ما يمل ويعرس عليج

بعيد النظر

07-02-2016, 11:44 AM

ضوى

07-02-2016, 11:44 AM

جنون صفي يمي يمه

قبطان سلفر ، بيده التعدد صح لكن مب لانه مب عاجبته لو مب عاجبته كان ماوافق عليها من البداية عاد وماشاء الله كلا ينقي زوجته نقوة

مختلف جداََ

07-02-2016, 11:49 AM

لا والله
حبكت تصبغ شعرها اشقر عشان حضرته يتونس وهي شعرها يقلب يعد ويطيح ويخترب
بعدين شحلاته الشعر الطويل الناس يدورونه دواره يركبون وصلات عشان يطولون شعرهم وهو يقولها قصيه
ليش بالساهل هو طول
خل يعدل ف عمره زين عشانها عشان هي تتشجع تعدل عشانه
تعالي يالمره صيري مجله متجدده للزوج عشان حضرته ما يمل ويعرس عليج

الرجال حر
يبيها مجله على قولتج
كييييييييفه

واجب عليها تصبغ اذا قال لها

واذا على موضوع خراب الشعر
تروح صالون محترم و يكون شغله صح

خل شعرها الطويل ينفعها لما توصلها دعوة عرس ريلها

دام يبيها تتعدل و تصبغ و تلون لازم تسمع كلامه و تملى عينه

كلامكم هذا فيه مكابر( لازم أقتنع أول شي).

عجبي!!!

الحياة الخالدة

07-02-2016, 11:50 AM

الجمال و البحث عن الجمال يتجلى في هذا الموضوع بقوة

http://www.qatarshares.com/vb/showthread.php?616423-%E1%E6-%CA%DE%CF%E3%CA-%E1%CE%D8%C8%CA%DF-%DD%CA%C7%C9%A1-%DD%E3%C7-%E5%ED-%D1%CF%C9-%DD%DA%E1%DF%BF

مختلف جداََ

07-02-2016, 11:50 AM

بااااااااااااااااااااااااااااااااااااااااااااااااا اااااااااال شدعوة !

شفت شلون عاد !!!

الحياة الخالدة

07-02-2016, 11:52 AM

سأعود لبقية الردود بإذن الله

جبر ال جبر

07-02-2016, 12:00 PM

تقولين عمليات التجميل فيها خلاف هاه
طيب
خذي عندج

اعرف واحد جاني فاصل ( رفيج دنيا ).
و قال لي مب حالة ترى

قلت له خير شعندك

قال لي تخيل اقول لمرتي قصي شعرج لأنه طويل وايد و خاطري تغيرين فيه
قالت له : أنا أطول شعري لأني سمعت إنه المره اللي شعرها طويل يسترها يوم القيامة .

ما بغى يكسر خاطرها

راح قال لها انزين صبغيه أشقر ، قالت له أنا صبغت مره وحده واخترب شعري.

الرجال هني جاب العيد

بالله هذي ما ياخذ عليها 4 في نفس اليوم :anger1:

مع احترامي العميق لرفيجك الي قالك اياه غلط كبير جدا مايصير يوصف لك شعر زوجته ولا لون شعرها ولا غيرها من امور شطاري عليه قوله جيبها خلني اشوفها واحكم لك شلي يوارج وياها واذا قالك بل شدعوه قوله مادري عنك تقولي اشياء خاصه عن اهلك!!
حتى لو كان رفيج دنيا ع قولتك او فاصل ماله حق يتكلم بهالطريقه انصحه بطريقه مهذبه ليجيب العيد

JN000N

07-02-2016, 12:02 PM

الرجال حر
يبيها مجله على قولتج
كييييييييفه

واجب عليها تصبغ اذا قال لها

واذا على موضوع خراب الشعر
تروح صالون محترم و يكون شغله صح

خل شعرها الطويل ينفعها لما توصلها دعوة عرس ريلها

دام يبيها تتعدل و تصبغ و تلون لازم تسمع كلامه و تملى عينه

كلامكم هذا فيه مكابر( لازم أقتنع أول شي).

عجبي!!!

والله عاد الريال اللي بيفكر جذي هذا تافه وتفكيره سطحي
تعالي غيري شعرج والا باعرس عليج
علك تاخذ اربع علي اخذ ورقتي واعيش معززه مكرمه ف بيت هلي وانت دور من وحده لين وحده عساك تاخذ ام شعر بنفسجي بعد هههههاي اي والله بيعرس عشان شعرها
مادري وين بيوصلون الرياييل

JN000N

07-02-2016, 12:03 PM

جنون صفي يمي يمه

قبطان سلفر ، بيده التعدد صح لكن مب لانه مب عاجبته لو مب عاجبته كان ماوافق عليها من البداية عاد وماشاء الله كلا ينقي زوجته نقوة

ان شاء الله :shy:

ضوى

07-02-2016, 12:04 PM

ميمّ

07-02-2016, 12:07 PM

بعض الردود تحرم من كيفها !
في اشياء مب حرام ومب تأليف روحو شوفو الفتاوي وبتعرفون شنهي الفتاوي ,
ترو الفتاوي مب "حلال وحرام" وانتهينا ؟!
في يجوز وفي منكر وفي مكروه وفي وفي وفي ... انتو على طول حرام !!
الحرام قطعا هو التغيير بخلق الله ( بمعنى شي دائم ) وحتى هذا يبيله فتوى اذا عيب خلقي !
فـ أتمنى لحد يفتي من راسه = )

JN000N

07-02-2016, 12:07 PM

ويقولون المراة ناقصة عقل عيل هالريال وش يطلع ؟؟

شدعوه ينعد من الرياييل
هذي على شعر بيتزوج
تكفين بتأمن على عيشتها وياه؟
زين لو قدر الله وصادها حرق ف مكان ف جسمها والتجميل ما نفعها
على طول بينقز يعرس
لكن هو لو ينشل منقلب بحادث هي تصبر عليه وتتكفل بخدمته وغسيله واكله وشربه
يارج الله يابنت حواء

بصمة قطرية

07-02-2016, 12:50 PM

هو يطلب مني لا طبعاً ..
بقول له إستريح الشيخ ..
إذا كنت محتاجة شي أدل العيادات
و بسويه بنفسي
ما بنتظره يطلب مني ..
هو إش عرفه في هالسوالف
لا و ياخذ لي موعد ..!!! :rolleyes2:

مختلف جداََ

07-02-2016, 12:58 PM

مع احترامي العميق لرفيجك الي قالك اياه غلط كبير جدا مايصير يوصف لك شعر زوجته ولا لون شعرها ولا غيرها من امور شطاري عليه قوله جيبها خلني اشوفها واحكم لك شلي يوارج وياها واذا قالك بل شدعوه قوله مادري عنك تقولي اشياء خاصه عن اهلك!!
حتى لو كان رفيج دنيا ع قولتك او فاصل ماله حق يتكلم بهالطريقه انصحه بطريقه مهذبه ليجيب العيد

الله يهديك يا خوي جبر

الرجال قال ابيها تقص شعرها
أبيها تصبغ شعرها

الكلام عام
لا قال طولها و عرضها و لون شعرها أصلاً جي
و هي مربعه و لا مدوره

هدي و أنا أخوك

مختلف جداََ

07-02-2016, 01:01 PM

والله عاد الريال اللي بيفكر جذي هذا تافه وتفكيره سطحي
تعالي غيري شعرج والا باعرس عليج
علك تاخذ اربع علي اخذ ورقتي واعيش معززه مكرمه ف بيت هلي وانت دور من وحده لين وحده عساك تاخذ ام شعر بنفسجي بعد هههههاي اي والله بيعرس عشان شعرها
مادري وين بيوصلون الرياييل

مب سالفة أصبغي و لا بعرس عليج

السالفه إنه في أبسط الأمور الحلال ما عندها استعداد تغير في نفسها على شانه

وش تخسر هي إذا سمعت الكلام

و الله إنه بيحبها بزيادة

لكن بعض الحريم عندها يا أقتنع يا يروح يطق راسه بالطوفه

مختلف جداََ

07-02-2016, 01:04 PM

ويقولون المراة ناقصة عقل عيل هالريال وش يطلع ؟؟

هالريال يطلع واحد مرته ما احترمت رغبته في أبسط الأمور( تسره إذا نظر ).
ولا بينت له إنها متمسكه فيه بتنفيذ طلبه ( البسيط).

و على فكره مب شرط يطلقها .
يخليها و ياخذ عليها و هي تعيش معاه في بيتها معرزة مكرمة ( محتفظة بقناعاتها ) و قناعات ( صديقاتها ).

مختلف جداََ

07-02-2016, 01:06 PM

هو يطلب مني لا طبعاً ..
بقول له إستريح الشيخ ..
إذا كنت محتاجة شي أدل العيادات
و بسويه بنفسي
ما بنتظره يطلب مني ..
هو إش عرفه في هالسوالف
لا و ياخذ لي موعد ..!!! :rolleyes2:

على أساس هو بقرة و ماله راي و لا نظره

ياخذ موعد بنفسه ( طبعا ضد).

مختلف جداََ

07-02-2016, 01:09 PM

شدعوه ينعد من الرياييل
هذي على شعر بيتزوج
تكفين بتأمن على عيشتها وياه؟
زين لو قدر الله وصادها حرق ف مكان ف جسمها والتجميل ما نفعها
على طول بينقز يعرس
لكن هو لو ينشل منقلب بحادث هي تصبر عليه وتتكفل بخدمته وغسيله واكله وشربه
يارج الله يابنت حواء

هي انحرقت
من المروءة إنه ما يسرحها و يصبر عليها . و إن حب يتزوج عليها و يخليها بعد حقه.

إذا هو انشل تصبر عليه ( و لها الأجر ) إن أرادت .
أو تطلب الطلاق وهو حقها .

طبعا المجتمع ما يرحم المرأة و أول من بياكلون وجها ( الحريم ).

ضوى

07-02-2016, 01:12 PM

هالريال يطلع واحد مرته ما احترمت رغبته في أبسط الأمور( تسره إذا نظر ).
ولا بينت له إنها متمسكه فيه بتنفيذ طلبه ( البسيط).

و على فكره مب شرط يطلقها .
يخليها و ياخذ عليها و هي تعيش معاه في بيتها معرزة مكرمة ( محتفظة بقناعاتها ) و قناعات ( صديقاتها ).

ليش هو يوم شافها في النظرة الشرعية ماسرته يوم نظر اليها ؟

بريق الحق

07-02-2016, 01:16 PM

استغربت من الكثير من الردود اشياء غريبه قامت تطلع الحين
الله يرحم الحال الصراحه
اليوم الريال يطلب من مرته بكره زوجته بتحجز له موعد حق هالخرابيط الله لا يبلنا

qatarman8008

07-02-2016, 01:20 PM

..
الموضوع صعب..
والخيارات صعبة..
ولازم يكون في محامي..
لكن هناك سؤال يبطح نفسه على الطاولة..
اذا واقفت تسوي هال عمليات.. هل فعلا بتكون مرضية لزوجها..؟؟

مختلف جداََ

07-02-2016, 01:22 PM

ليش هو يوم شافها في النظرة الشرعية ماسرته يوم نظر اليها ؟

أكيد شافها
بس بعد 15 سنه
الرجال حاب يشوفها بنيو لوك

فيها شي ؟؟؟

بصمة قطرية

07-02-2016, 01:23 PM

على أساس هو بقرة و ماله راي و لا نظره

ياخذ موعد بنفسه ( طبعا ضد).

شنو يعني بقرة ..!!
أها قصدك ثور ..

في أمور بسيطة مثل قصة صبغة
لكن شي تجميلي
لا و ألف لا
يوم خذها كان حول و لا عور ..!!!
و لا عيونه مبحلقه و يبي مرته تسوي
مثل فلانة و علانة ..!!!!

لا حول و لا قوة إلا بالله ..
لو ما كان في هالأمور
و ما تقدر تنفخ و لا تسوي عملية تجميل
ايش راح يقول لها ..!!!!

بصمة قطرية

07-02-2016, 01:24 PM

..
الموضوع صعب..
والخيارات صعبة..
ولازم يكون في محامي..
لكن هناك سؤال يبطح نفسه على الطاولة..
اذا واقفت تسوي هال عمليات.. هل فعلا بتكون مرضية لزوجها..؟؟

عمليات ..!!!
صعب ترضيه تدري ليش ..!!
من تدخل مجال العمليات ما راح تطلع منه ..
يعني اليوم شي بسيط بكرة أكبر
واللي بعده سوي جذي ..

مختلف جداََ

07-02-2016, 01:25 PM

استغربت من الكثير من الردود اشياء غريبه قامت تطلع الحين
الله يرحم الحال الصراحه
اليوم الريال يطلب من مرته بكره زوجته بتحجز ل
ه موعد حق هالخرابيط الله لا يبلنا

بريق

موضوع نفخ براطم ، شفط خدود ( طبعا ضد)

بس في ما أحل الله

شالمانع الوحده تنفذ رغبة زوجها

مختلف جداََ

07-02-2016, 01:27 PM

شنو يعني بقرة ..!!
أها قصدك ثور ..

في أمور بسيطة مثل قصة صبغة
لكن شي تجميلي
لا و ألف لا
يوم خذها كان حول و لا عور ..!!!
و لا عيونه مبحلقه و يبي مرته تسوي
مثل فلانة و علانة ..!!!!

لا حول و لا قوة إلا بالله ..
لو ما كان في هالأمور
و ما تقدر تنفخ و لا تسوي عملية تجميل
ايش راح يقول لها ..!!!!

لا

قصدي بقرة

واذا اقتنع انه رايه مب مهم ( يصير ثور).

أنا المثال اللي حطيته واضح
قص+ صبغ

لحد يقولني كلام ما قلته

أما موضوع نفخ براطم
و الذي منه فأعتقد انه حرام شرعاً إلا بضوابط

بصمة قطرية

07-02-2016, 01:31 PM

لا

قصدي بقرة

واذا اقتنع انه رايه مب مهم ( يصير ثور).

أنا المثال اللي حطيته واضح
قص+ صبغ

لحد يقولني كلام ما قلته

أما موضوع نفخ براطم
و الذي منه فأعتقد انه حرام شرعاً إلا بضوابط
من قولك شي ما قلته ..!!!!

انزين قول لي
اذا رفضت تغير من شكلها بناء على طلب زوجها
و قالت مثلاً ما أحب الصبغات
و ما أبي أقص شعري
بيطلقها ..!!!

مختلف جداََ

07-02-2016, 01:33 PM

من قولك شي ما قلته ..!!!!

انزين قول لي
اذا رفضت تغير من شكلها بناء على طلب زوجها
و قالت مثلاً ما أحب الصبغات
و ما أبي أقص شعري
بيطلقها ..!!!

لا طبعاً

بس الخيارات لو حب موجودة

بصمة قطرية

07-02-2016, 01:35 PM

لا طبعاً

بس الخيارات لو حب موجودة

شنو الخيارات ..!!
نورنا بما إنك رجل
عشان لو انحطينا في هالموقف
نعرف شنو الخيارات ..

مختلف جداََ

07-02-2016, 01:37 PM

شنو الخيارات ..!!
نورنا بما إنك رجل
عشان لو انحطينا في هالموقف
نعرف شنو الخيارات ..

قبل لا أقول الخيارات

فهميني بما إنك أنثى

هل يحق للمره ما تتجمل لزوجها بالشكل اللي يرضيه هو و بما لا يخالف الشرع ؟

ضوى

07-02-2016, 01:38 PM

بعد 15 سنة يبي يغير لوكها وصار مايعجبه ؟؟

عموما انتهى حواري معاك اخوي مختلف

مختلف جداََ

07-02-2016, 01:41 PM

بعد 15 سنة يبي يغير لوكها وصار مايعجبه ؟؟

عموما انتهى حواري معاك اخوي مختلف

براحتج اختي ضوى

بانغ بانغ

07-02-2016, 01:43 PM

يا جماعة خفوا الريس اشوي

البنت من حقها تطلب من زوجها يتعدل والعكس صحيح بس في مظري مب شرط عمليات

ياخي ماتحبو باعض

يعني اما اتصير نيكول كيدمان والا باتزوج عليها

وهو اما ليوناردو دي كابريو والا بتشوف غيره

مختلف جداََ

07-02-2016, 01:46 PM

qatarman8008

07-02-2016, 01:46 PM

عمليات ..!!!
صعب ترضيه تدري ليش ..!!
من تدخل مجال العمليات ما راح تطلع منه ..
يعني اليوم شي بسيط بكرة أكبر
واللي بعده سوي جذي ..

انا وجهه نظري ان الرجل يحب مرته لمكانتها عنده.. مب لجمالها او لاي شيئ ظاهري..
عاشت معاه كم سنة بالحلوة والمرة وصارت نصفه الثاني وصارت ام عياله..
اعتقد لو بيغير بيكون تغيير في الجوهر مثل اكمال الدراسة الجامعية او تعلم مهارات مثل االطبخ او التعامل مع الابناء اذا كبروا..
او اذا كان شي له علاقة بالمظهر بيكون صبغة شعر او تخفيف الوزن مثلا..
ما توصل لمرحلة العمليات..

مختلف جداََ

07-02-2016, 01:51 PM

انا وجهه نظري ان الرجل يحب مرته لمكانتها عنده.. مب لجمالها او لاي شيئ ظاهري..
عاشت معاه كم سنة بالحلوة والمرة وصارت نصفه الثاني وصارت ام عياله..
اعتقد لو بيغير بيكون تغيير في الجوهر مثل اكمال الدراسة الجامعية او تعلم مهارات مثل االطبخ او التعامل مع الابناء اذا كبروا..
او اذا كان شي له علاقة بالمظهر بيكون صبغة شعر او تخفيف الوزن مثلا..
ما توصل لمرحلة العمليات..

اتفق معاك

قلنا تغير من اللوك شوي

ما عجبهم

كأني كفرت

غريب والله

qatarman8008

07-02-2016, 01:59 PM

اتفق معاك

قلنا تغير من اللوك شوي

ما عجبهم

كأني كفرت

غريب والله

التغيير بحد ذاته مافي اعتراض عليه.. التغيير والتجديد مطلوبين..
لكن سبب مطالبة الزوج لزوجته بالتغيير هنيه يخلي الزوجة تفكر وتضرب اخماس في اسداس..
ليش واش معنى وكيف واش قصده يعني... ههههههههه

النهار

07-02-2016, 02:01 PM

ليش من الاول مأختيار النموذج والاستايل الجديد الي طرآ عليه بعد الزواج

مختلف جداََ

07-02-2016, 02:01 PM

التغيير بحد ذاته مافي اعتراض عليه.. التغيير والتجديد مطلوبين..
لكن سبب مطالبة الزوج لزوجته بالتغيير هنيه يخلي الزوجة تفكر وتضرب اخماس في اسداس..
ليش واش معنى وكيف واش قصده يعني... ههههههههه

عجيب والله

عذر أقبح من ذنب ( هذا إذا هي فكرت بهالطريقة فاسمح لي هذي عندها قصور في وزن الأمور)

مختلف جداََ

07-02-2016, 02:02 PM

ليش من الاول مأختيار النموذج والاستايل الجديد الي طرآ عليه بعد الزواج

خلني ساكت

JN000N

07-02-2016, 02:18 PM

معليش ترى المره بعد مب صورة ولعبه عنده يقعد يغير ويشكل فيها على راحته
اذا هي استحبت تغير عشانه من باب هو ف خاطره كيفها
واذا ماتبي ومرتاحه على شكلها وماتحب تهلق ف عمرها وتصبغ اشقر واحمر وازرق بعد من حقها ومب من حقه يجبرها
بعدين لا يقعد الريال يعصلق الامور على اشيا تافهه تعالي غيري شعرج تعالي قصيه
نسى عيشته وعشرته معاها وكل شي حلو وفجاه صارت مب حلوه لانها ماقصت شعرها ولاصبغته وصار عذره ان يتزوج عشان الثانيه تستوي له ارقوز وتتنقز له كل مره بلون يديد
الحين عذره هو اقبح من ذنبه

امـ حمد

07-02-2016, 02:46 PM

ماراح اسوي هالشي ،ولا أسمع كلامه،لأن هذه الأمور حرام قد شهدت الأحاديث بلعن فاعلها وأنها من الكبائر ،ومن باب تغيير خلق الله تعالى،
وبين من الأمور المباحة كالكحل والحناء ،والتزين،
الله يعطيج العافيه حبيبتي الغاليه الحياة الخالده

الحياة الخالدة

07-02-2016, 03:07 PM

يعطيكم العافية جميعاً

بس حبيت اوضح عشان ما يُساء فهم الموضوع
واللي يحب يرجع يقراه مرة ثانية للتأكد

انا تكلمت عن اللي يبي زوجته تسوي عملية تجميلية أو على الأكثر حقن البوتكس و ما شابه
ما تكلمت عن تغيير اللوك البسيط اللي ما يحتاج طبيب

و بعدين حتى القص و الصبغ و العناية بالشعر من كثر تكرار الصبغ
كل هالامور تحتاج صالونات مب أي صالونات
و تكلف الشي الكثير ( يبيلها ميزانية محترمة من بيدفعها ؟؟ )
إضافة إلى أن ضرر الصبغ يتعدى دمار الشعر إلى كونه يمتص من خلال البشرة و يؤثر على أعضاء أخرى

بس عموماً الموضوع يتناول موضوع التدخل الجراحي

و شكراً للجميع

العقل المدمر

07-02-2016, 05:34 PM

مستحيل اشق والا اطق ابر عشان خاطره
اصلا وقتها مادري شقد بتقزز منه وبحسه واحد خز الحريم لين شبع
عموما اظن اني بطنشه وخل يشبع حرام والا يتزوج بالطقاق وهو اللي بيتحسف وانا بفتك منه اسود الويه :tease:

Dana’1

07-02-2016, 07:04 PM

ماراح يطلب إن شاءالله^_^

أظن
الزوج شايف وخابر ومبسوط على زوجته يومه تقدم لها ،،، شالي جد عليه يطلب هالاشياء ؟!
عالعموم
إذا بسوي شي بيكون من خاطري أنا والأهم موافق للشرع ولا يضر الصحه

والزوج إذا بيتشرط أشياء من هالنوع تغيير جذري للشكل ويتحجج عشان يلتفت لغير زوجته
هذا حتى لو إنها طاعته وصارت أجمل وحده بالعالم بيهملها بعد فتره
هالنوع يمل ويحب التجديد ماشي يرضيه إلا التراب يكز بوجهه

فالجواب
لااااا

بانغ بانغ

07-02-2016, 09:44 PM

العقل المدمر

07-02-2016, 11:06 PM

هههههههههههههههههههههههههههههههههههه

اتخرعين

يا رب ريلي اللي بيتوهق فيني يخاف مثلك :(

بصمة قطرية

07-02-2016, 11:32 PM

قبل لا أقول الخيارات

فهميني بما إنك أنثى

هل يحق للمره ما تتجمل لزوجها بالشكل اللي يرضيه هو و بما لا يخالف الشرع ؟

نادر ما تحصل إمرأة ما تتجمل لزوجها
و في حريم يسوون المستحيل عشان يرضون سي السيد ..
تتجمل لزوجها في حدود العقل
يعني أشياء بسيطة ..
لكن عمليات اللي يتكلم عنها الموضوع
لا و ألف لا ..
اللي بيطلب من زوجته تسوي عمليات
مب صاحي بصراحة ..
خذتها و هاي شكلها
و إذا العذر على قولتك بعد 15 سنه مثلاً
طبيعي بتكبر و بتتغير
يعني هو اللي تم شاب و حافظ على شكله
إلا أغلبهم مكرشين و ماشاءالله مدربحين
هل من حقها تطلب منه يتغير و يغير شكله عشانها ..!!
عقب هالسنين و كانوا سابقاً رياضيين ..!!

المحاميه

08-02-2016, 11:02 AM

لا

اشحادني

مب مجبوره اتحمل آلام انا ف غنى عنها
وثاني شي اللي يلعب ف خلقة ربه شنو مصيره؟

الهديل

08-02-2016, 07:46 PM

يعني اذا الموضه الان الخشم الأوربي تعمل عمليه تعديل الأنف
بكرة اذا تغيرت الموضه وصار الخشم الأفريقي هو الموضه بعد تغير
و صارت الحياه قَص و لصق
أتوقع ان الزوج شاف الزوجة قبل الزواج او أهله شافوها و وصفوها عنده و هو وافق عليها
خلاص انتهى الموضوع مش ضروري وجهة المراه يواكب الموضه
و في الاول و الأخير ( لقد خلقنا الانسان في احسن تقويم )
خلق الله افضل خلق

عابر سبيل

10-02-2016, 08:10 AM

وعليكم السلام اخت/الحياة الخالدة
و التحية موصولة للجميع..

لا ادري(من كثرة الردود ما شاء الله) ان كان احد سبقني
بما ساكتب..

لكن..مع ان الموضوع "افتراضي"
فهنالك حادثة حقيقية حدثت وهي مطابقة تماما
لمحور الموضوع..

فقد قرأت في احد الكتب من عدة سنوات..
عن حادثة حدثت في امريكا..

حيث ان (الخطيب) الذي هو بالاساس
جراح متخصص
في الجراحة التجميلية..

طلب من مخطوبته التي كانت هي ايضا ممرضة في ذات
عيادة (التجميل) التي يمتلكها الطبيب..

ان تقوم بجراحة تجميلية لجزء ما في ":secret:" جسدها..
ليكون الشكل "بيرفكت"!!

فما كان من تلك المخطوبة الا ان
تركت له العيادة باكملها
و رحلت من حياة ذلك الزوج المستقبلي
الطبيب الجراح مالك العيادة "الشهيرة"!!

*
*
،،
سلام

حليتان*

11-02-2016, 07:00 AM

اتوقع المره بتوافق هم بدون شي طوابير فالعيادات الداخليه والخارجيه بعد حد يشجعها ويدفع لها بوووووو طياره طياره

انا ما اعرف شلون الواحد الله معطيه الصحه والعافيه ويروح يغامر ويتبنج عشان شي مش مهم ويسوي جراحه ويلعب فنفسه بس عشان شكل !!!

دمي قطري

11-02-2016, 09:27 AM

اي بروح معاه واللي يناسبني بسويه .. وباخذ مافي خاطرة وبكون أرضيت نفسي وارضيته

عثرة جواد

11-02-2016, 09:46 AM

السلام عليكم

هههههه عجبني الوصف

شوفي مشرفتنا احنا معشر النساء ننقسم قسمين

ف منا الي ماتحب تغير شي ف شكلها بس تهتم وتترتب

وف منا الي تحب او تبالغ ف الزينة وتصبح شبة مهرج

ونفس الشي عند الريايل ف الي يحب ان زوجتة تكون ع الطبيعة حتى مكياج ماتحط

وف الي يحبها سندريلا يعني كل شي فيها تركيب ...

عاد هي وشطارتها ف التقبل الموضوع .....((ان كيدهن عظيم )):victory:

عسااك ع االقوة

عثرة جواد

11-02-2016, 09:48 AM

اي بروح معاه واللي يناسبني بسويه .. وباخذ مافي خاطرة وبكون أرضيت نفسي وارضيته

اسموحة ع الاقتباس لاكن ف شي اهم من رضاة هو رضى رب العالمين

مرتبش

11-02-2016, 11:47 AM

ما اعتقد الرجل الطبيعي يطلب من زوجته هكذا طلبات

مختلفة عقليا

11-02-2016, 12:22 PM

السلام عليكم

اذا كان حلال ., بمشي معاااااااااااااااااااااااااااااااااه للاخر .,

لو يقول السما خضراء اقول خضراء ولا يهمك .,

بس لو حرام لا

ويسلموو

العقل المدمر

11-02-2016, 01:39 PM

السلام عليكم

اذا كان حلال ., بمشي معاااااااااااااااااااااااااااااااااه للاخر .,

لو يقول السما خضراء اقول خضراء ولا يهمك .,

بس لو حرام لا

ويسلموو

بس هاي جذب والجذب حرام :(

مختلفة عقليا

11-02-2016, 02:11 PM

بس هاي جذب والجذب حرام :(

هلا

لا هاي طاعه عمياء مني :shy:

ويسلموو

ameeer3

11-02-2016, 03:05 PM

اتوقع انه الي طلعوا فلوسهم من الاسهم ، راح يفتحون عيادات تجميل وترقيع،
لان الدووس كثر على ها العيادات ،،
escapeescapeescapeescapeescape

العقل المدمر

11-02-2016, 04:02 PM

هلا

لا هاي طاعه عمياء مني :shy:

ويسلموو

لا طاعة لمخلوق في معصية الخالق :anger1:
الا لو قصدج عمى الوان :shy:

<اضرب واشرد>

11-02-2016, 06:18 PM

لاتنخدعوا بما ترونه في الشاشات

هيفاء وهبي قبل عمليات التجميل:
أنف، حواجب، سيليكون للبراطم، سيليكون للخدود والوجه، ويمكن أشياء ثانية..

https://pbs.twimg.com/media/CS_4mIbW4AAzQ8d.png

حمد 2002

12-02-2016, 08:12 AM

انا من رأيي انها لاتسمع كلام زوجها بل تسمع كلام ربها. .

لأنه العمليات حرام ..

لأنها تغير لخلقه الله تعالى ..

مختلفة عقليا

14-02-2016, 08:41 AM

لا طاعة لمخلوق في معصية الخالق :anger1:
الا لو قصدج عمى الوان :shy:

هلا

اقراء اول رد لي .,

ويسلموو

بانغ بانغ

14-02-2016, 10:14 AM

يعني لو قالها خل نحتفل بالفالانتاين ... بتقول لا ؟

مع انه احتفالية تعبر عن حب !!!! او بترفض لسبب ديني او ثقافي !

للاكشن

مختلف جداََ

14-02-2016, 10:21 AM

يعني لو قالها خل نحتفل بالفالانتاين ... بتقول لا ؟

مع انه احتفالية تعبر عن حب !!!! او بترفض لسبب ديني او ثقافي !

للاكشن

ههههههههههههههههه

ضوى

14-02-2016, 10:43 AM

يعني لو قالها خل نحتفل بالفالانتاين ... بتقول لا ؟

مع انه احتفالية تعبر عن حب !!!! او بترفض لسبب ديني او ثقافي !

للاكشن

اذا قالها نحتفل بسئ الذكر هذا فاقل شي تقوله اتق الله انت عارف منهو هالخسيس اللي تبي تحتفل فيه ؟ هالخسيس غرر بحريم متزوجات لانه كان يعشق النساء وعندهم الراهب مايتزوج بس يلعب حلال وماعندهم طلاق لذلك قتلوه يعله في جهنم وبئس المصير وبس بهالرد تسد نفسه ولا عاد يكرر هالموضوع معاها مرة ثانية

مهرة

14-02-2016, 10:55 AM

..

والله يالحياة الموضوع وردووده عبارة عن تسالي أحلا عالم يونس ويضحك يعطيج العافية وقواج الله على حسن إدارته, وقلت بذكركم بشخصية (ذباح) الخاطب والموديل جيسيكا سمبسون.!!

الحياة الخالدة

15-02-2016, 07:11 AM

أشكركم جميعاً على ردودكم و مشاركاتكم الجميلة

أختي مهرة : أهم شي انتو مستانسين
من هذيلا ذباح و جيسيكا ؟؟

مهرة

15-02-2016, 05:12 PM

^^

هلا بالحياة ،، ذباح الفارس المغوار الي خطب وبعد الملكة قال للعروس تسوي اشوية تعديلات عشان تصير طبق الأصل مثل جيسيكا وكل شي على حسابه من غير المهر ومصاريف العرس!!

الحياة الخالدة

16-02-2016, 07:43 AM

^^

هلا بالحياة ،، ذباح الفارس المغوار الي خطب وبعد الملكة قال للعروس تسوي اشوية تعديلات عشان تصير طبق الأصل مثل جيسيكا وكل شي على حسابه من غير المهر ومصاريف العرس!!

هلا هلا فيج
هههههههههه انزين و العروس وافقت ؟؟
و تم العرس على خير و الا تكنسل ؟؟
و استمر على خير وعاشوا في سعادة و هناء .. والا ما زال يطلب المزيد من التعديلات ؟؟

مهرة

16-02-2016, 02:41 PM

^^

سلمج الله الصبغة مقدور عليها بس قلب المزاح جد ومعزم ذباح ع التعديلات وحتى هي ماتعرف منهي ذي جيسكا ,, وللأسف خسرت (ام الزين) ذباح وما تم الزواج.!

الله يعوضهم خير.,

الحياة الخالدة

16-02-2016, 02:45 PM

^^

سلمج الله الصبغة مقدور عليها بس قلب المزاح جد ومعزم ذباح ع التعديلات وحتى هي ماتعرف منهي ذي جيسكا ,, وللأسف خسرت (ام الزين) ذباح وما تم الزواج.!

الله يعوضهم خير.,

من قال انها خسرت ذباح ؟؟
اللي مثله ماعليه حسوفة .. والا كانت كملت حياتها من عيادة لمستشفى و يا قلبي لا تحزن
الله يعوضها خير
و يرزق ذباح شبيهة جيسيكا :secret: