طرح مسكوكات من فئة 10 ، 5 ، 1 درهم للتدول ..................

[بومتعب]

اعلن مصرف قطر المركزي عن اصدار مسكوكات معدنية جديدة للتداول اعتبارا من 2016/2/15 من فئة
10 درهم
5 درهم
1 درهم

[بانغ بانغ]

نبي فئة بو 1000 ريال و 200 ريال عشان اللي بوكه " متروس فلوس " يقدر ايشل معاه خريدة

[بن غيث]

اذا في شخص يقدر يفيدنا ..
ما فائدة هذه الفئات !!!! خاصة فئة 10 '5 '1 درهم

[غريب الدّار]

انا بصراحة مادري اذا فكرتي عن الموضوع صحيحة ولا لا :
لكن هل هناك نية او توجه لرفع قيمة الريال القطري ؟


سؤال للمختصين ومن يملك إجابة

[المزن الرياني]

خطوه متأخره جداً جداً

[غريب الدّار]

خطوه متأخره جداً جداً

شلون يعني اخوي؟


اللي فهمته من سؤالك ان هالخطوة كان يجب اتخاذها من زمان

بس ليش ؟ شفايدتها ؟ وليش تعتقد انها جات متاخرة ؟

[مساهم عادي]

الحين الدكاكين والجمعيات اذا لك باقي من فئات نص او ربع ريال مايردها لك بحجة انها مب متوفرة عنده او بالاصح يبي يلهفها ... فما بالكم بهالفئات الأصغر

[غريب الدّار]

الحين الدكاكين والجمعيات اذا لك باقي من فئات نص او ربع ريال مايردها لك بحجة انها مب متوفرة عنده او بالاصح يبي يلهفها ... فما بالكم بهالفئات الأصغر

والله اللي انا اشوفه العكس يامساهم
ذاك اول لما ماكانوا يردون

الحين بعض المرات يعطيك الباقي بدون مايخصم أجزاء الدراهم هاذي




اللي اعرفه ان جاتهم تعليمات من زمان ان محد يأخذ شي من العميل

[شيخ الديرة]

الحين الدكاكين والجمعيات اذا لك باقي من فئات نص او ربع ريال مايردها لك بحجة انها مب متوفرة عنده او بالاصح يبي يلهفها ... فما بالكم بهالفئات الأصغر
لأن النص ريال ماراح يجيب شي لما اشتري مرة ثانية

استغرب من هذا الأصدار الجديد بهذه الفئات, في عصر الدفع الألكتروني في كل مكان

[ميمّ]

الحين فئة 50 درهم ماتلقى شي تشتريه !
حطو 10 , 5 , ودرهم؟
شنسوي فيهم -_- !!

[دايموند]

مو من صجهم !!!!!!!!

انزين مافي صور للعملات الجديده؟

[.قطر.]

اتخيل ادفع بالعملات المعدنيه مب شي
اصلا يقرقشون ف البوك انا اذا رحت دبي وعطوني الباقي عملات معدنيه اشيلهم من البوك :omen2:

[Riku3]

كم بتكلفهم هالعملة لاصدارها !! .. بتصير مثل البيني الامريكي لو تقطه في الشارع محد يلقطه ويكلف صنعه اكثر من قيمته الاصلية !! .

يكفي النص ريال الي يطيح في جبدنا ومحد مستفيد منه الا العيال ياخذونه حق الحصاله :tease: .

بتكون حجه لرفع الاسعار بنظري .. يدرون محد يشيل النص ريال معاه فما بالك بهالدراهم .. ومثلا بيصير سعر سلعه ريال و 61 درهم .. يلا عاد تعال ادفع .. بتعطيه ريالين وبتحرك .

[لـبـيـه]

اذا في شخص يقدر يفيدنا ..
ما فائدة هذه الفئات !!!! خاصة فئة 10 '5 '1 درهم

نفس السؤال جا في بالي ايش فايدتهم

طيب هل في شي في قطر كلها ب 1 درهم او 5 درهم او 10 درهم

والله مستغرب ؟

[شيخ الديرة]

مو من صجهم !!!!!!!!

انزين مافي صور للعملات الجديده؟

الأعلان بالراية صفحة 3 (http://raya.com/file/get/aca7f199-a7bf-421f-9408-4602efd4c4ad.pdf#pagemode=thumbs)

[مختلف جداََ]

يعني يصير أعطي المخبز 200 درهم في كيس
عشان آخذ ريالين خبز
هههههههههههههه

[عثرة جواد]

متابعة بصمت

[MAZEN37]

ببساطه كل كاونترات الجمعيات والهايبرماركات بتوفر هالعمله المعدنيه في حال دفت كاش

[البرونزي]

بعض التجاري مثلا يحط لمت للربح للبضاعه قبل العرض
فتطلع البضاعه مفرقه بعد العرض بسعر ربحي مثلا 10 ريال و 13 درهم
فالتجار يكون مجبور يحط 25 درهم بدال ال 13 درهم لان هالفئه غير موجوده
طبعا انا اتكلم عن بعض التجار الي يكون مجبور يحط عالفئه لكن بعض التجار
لقاها فرصه لرفع السعر بحجة ان هالفئه من العملات غير موجوده
وطبعا 15 درهم مني و 10 درهم منكم وهلم جرا وعليكم الحسبه

[شيخ الديرة]

بعض التجاري مثلا يحط لمت للربح للبضاعه قبل العرض
فتطلع البضاعه مفرقه بعد العرض بسعر ربحي مثلا 10 ريال و 13 درهم
فالتجار يكون مجبور يحط 25 درهم بدال ال 13 درهم لان هالفئه غير موجوده
طبعا انا اتكلم عن بعض التجار الي يكون مجبور يحط عالفئه لكن بعض التجار
لقاها فرصه لرفع السعر بحجة ان هالفئه من العملات غير موجوده
وطبعا 15 درهم مني و 10 درهم منكم وهلم جرا وعليكم الحسبه

تسجيل أعجاب بهذا التعليل. يعني ماراح نستخدمها ولكن ترفع العذر القانوني في بعض الحسابات التسعيرية

[Boost]

يمكن بنفك الإرتباط بالدولار وتصير نفس حركة الكويت وسلة العملات؟ :nice: يصير الريال يسوى

[مخطط قطري]

لو المركزي حط لنا فئة 20 و200 و1000 بيكون وايد ابرك الوضع الاقتصادي للبلد تغير 720 درجه خصوصا 14 سنه الاخيره ابرك لهم من هالدراهم الي محد يستخدمها ومكلفه اكثر من الورقيه

[ya3coub]

و مع هالفئات نتمنى اصدار المزيد من الـــ25 درهم خصوصا و الــ50 درهم

اهو شي طيب بس الله يعينا عالحسبة بهالطريقه

بس طيبه لأ، المحلات يحطون مثلا شي سعره عشرة ريالات و 78 درهم من وين اجيبها .!!!!

بالبطاقه تنسحب صحيحة بس بالفلوس اما يعطونكم زود او ياخذون منكون زود لأقرب ريال

[سعود.]

اذا في شخص يقدر يفيدنا ..
ما فائدة هذه الفئات !!!! خاصة فئة 10 '5 '1 درهم

رتويت !! نفس السوأل ؟؟

[غريب الدّار]

يمكن بنفك الإرتباط بالدولار وتصير نفس حركة الكويت وسلة العملات؟ :nice: يصير الريال يسوى

شعلاقة فك الارتباط بالدولار؟
شلون ربطت بينهم اخوي ؟

[أبو راكان]

هذي مب اول مرة يسك فيها مصرف قطر المركزي هذي الفئات
ودائماً مع كل سك للفئات المعدنية يتم اصدار كافة الفئات ابتداء من واحد درهم الى خمسين درهم
لكن اللي يطرح للتداول فقط فئة 25 و 50

[غريب الدّار]

هذي مب اول مرة يسك فيها مصرف قطر المركزي هذي الفئات
ودائماً مع كل سك للفئات المعدنية يتم اصدار كافة الفئات ابتداء من واحد درهم الى خمسين درهم
لكن اللي يطرح للتداول فقط فئة 25 و 50

؟؟ !!!


افا
هههههههههههههههههه

يعني كل النقاش فوق والمداخلات ماكان لها أساس؟

لاتقول ياريال
:)

[رجل الجزيرة]

وأنا أحسب إن العملة تغيرت من ريال إلى درهم.

[السكين]

أنا من كم شهر وأنا اشوف عملة خمس دراهم اللي لونها نحاسي ..وتحديداً من الميرة وأكثر من مكان ..حتى لو زاد لك ربع ريال عطوك خمس عملات معدنية ملصقين مع بعض لونها نحاسي .. هل استجد شي يعني ؟؟

أتووقع تنفع لللي يشترون بالوزن والجرامات ..يعني واحد حط حبتين تفاح يطلع الحساب مبلغ وفكة دراهم ..

كنت أتمنى عملة الألف وعملة المائتين تكون هي اللي عليها الدور.

[الحياة الخالدة]

ناقصين قرقشة في أبواكنا و مخابينا

أنا في البداية عبالي عملات معدنية ريال و خمس ريالات و عشر ريالات
آخرتها أصغر من النص و الاربع آنات

[محمد2]

اذا في شخص يقدر يفيدنا ..
ما فائدة هذه الفئات !!!! خاصة فئة 10 '5 '1 درهم


هذا دليل ان بداية التقشف وشد الحزام ، ومعناة يالقطريين بسكم زبو وتفوشر حتى ال 50 و 25 درهم نعمة الله

[محمد2]

الحين الدكاكين والجمعيات اذا لك باقي من فئات نص او ربع ريال مايردها لك بحجة انها مب متوفرة عنده او بالاصح يبي يلهفها ... فما بالكم بهالفئات الأصغر


الا يردها وغصباً على خشمة بس حنا القطريين فينا تفوشر وزبو اللي ما نعطي اي قيمة للمسكوكات المعدنية بحجة انها لاقيمة لها لدينا بالاضافة الى انها ثقيلة عندما تحملها معكً

[<اضرب واشرد>]

1 درهم ؟
شيء طيب عشان ترجع للريال هيبته ونحس بقيمته

[airbus]

اعتقد السبب الرئيسي الدولة سوف تضيف ضريبة مشتريات لان ادا تبي تشرب قهوة بتدفع معها كسور

[عيسى111]

أتوقع بتكون عليها صور معالم للدولة كل وحدة غير الثانية والله أعلم

[شموخ دائم]

,

,


مرحبا

زين حق التنزيلات يحطون سعر
ريال و99 درهم

تعطيه 2 ريال يرجع لك ( درهم احمر )

:)

تصيرون نفس لندن

وتحطون الدراهم على الطاوله او في ( قرشه )

,


,

[بوخالد911]

ينفع لما تشتري خضرة
تلاقي مثلا حبتين خس بسعر 4.12 درهم
وقس ع ذلك

[زقرتي ومزاجي]

ودنا نعرف معلومات اكثر عن السبب

[نفسي عزيزه]

ودنا نشوف فئة 1000 ريال و200 ريال

[السيف5]

ودنا توضيح من الجهة المختصة ليش ؟

[<اضرب واشرد>]

ودنا نعرف

ودنا نشوف

ودنا توضيح


"ودّي ولكن كيف تحقيق ودّي .. عيّا زماني لايجيني على الكيف
فصّلت لي من العنا ثوب قدّي .. وسكنت بيتٍ من هموم وتحاسيف"

[حليتان*]

يا جماعة الخير ترا موجودين من زماااااان هالفئات بس مش متداولين بكثره

[R 7 A L]

اكيد فيه شي جاي على الطريق
اعتقد بتكون المواقف في الشوارع بتكون بدراهم
او قواري المطار والمستشفيات

[حليتان*]

اكيد فيه شي جاي على الطريق
اعتقد بتكون المواقف في الشوارع بتكون بدراهم
او قواري المطار والمستشفيات

اتمنى لكن مبالغ رمزيه وفرض غرامات على من يستغل موقف لفتره طويله

[@north_star@]

كل هالفئات موجودة من زمان بس حاليا في إصدار جديد مع بعض التعديلات

http://www.majaless.com/up/get-2-2016-36r9ttmh.png (http://www.majaless.com/up)

[معماري قطري]

اذا في شخص يقدر يفيدنا ..
ما فائدة هذه الفئات !!!! خاصة فئة 10 '5 '1 درهم

خسارة على خزينة الدولة ما ادري شفيهم مضيعين .. الا لو بتكون بس للاقتناء واصدار محدود للي يحبون الكشخة بأي شيء

[shadad]

لأن النص ريال ماراح يجيب شي لما اشتري مرة ثانية

استغرب من هذا الأصدار الجديد بهذه الفئات, في عصر الدفع الألكتروني في كل مكان


حطه جنبك بالتكايه . بعد فترة صدقني بتجمع خرده ( صرة دراهم ) تشتري لك شي محترم. هو صج الازعاج اللي بيطلع لك وهم يصكون بعض هههه بس ما تدري بتحتاجهم عقب.

خل راعي الدكان يسامحك بالنص لو ما يشتري شي :). نفس الشي بالمقابل.

[الأغر]

بالفعل هي موجودة ولا يتم تداولها الا ما نذر إجمالا عن نفسي ادفع ببطاقة atm وأريح نفسي من الأنات والدراهم وأتمنى بالفعل فك الارتباط بالدولار حتى يتنفس الريال وياخذ حقه اقتصاد ولله الحمد قوي والصرف ضعيف

[تاجر كشخة]

يا جماعة الخير ترا موجودين من زماااااان هالفئات بس مش متداولين بكثره

موجودة ؟؟؟؟؟؟؟؟؟ صدمتني وكاني مب عايش في قطر اذا عندكم صور طرشوا ودي اصدق :eek5:

[معماري قطري]

ودنا توضيح من الجهة المختصة ليش ؟

يحبون الخساير ولا شفايدتها .. انا واحد اكره العملة المعدنية وريحتها في كل الدول وخرخشتها في المخبى .. ومجال التلوث فيها كبير

[شيخ الديرة]

موجودة ؟؟؟؟؟؟؟؟؟ صدمتني وكاني مب عايش في قطر اذا عندكم صور طرشوا ودي اصدق :eek5:

http://rter.info/image.php?iso=QAR&name=1-f4a585173a1ef74290c09b1116af291a

الصورة تكفي ولا تريدها باليد ؟؟ تاجر وكشخة ينخاف منك :secret:

[بانغ بانغ]

ها شباب بشروا كيف التداول بهالفئات الحلوة

وحد جرب ؟

[غريب الدّار]

ها شباب بشروا كيف التداول بهالفئات الحلوة

وحد جرب ؟
هلا بانغ

مااعتقد حد جرب او بيجرب للسبب هذا طال عمرك :

هذي مب اول مرة يسك فيها مصرف قطر المركزي هذي الفئات
ودائماً مع كل سك للفئات المعدنية يتم اصدار كافة الفئات ابتداء من واحد درهم الى خمسين درهم
لكن اللي يطرح للتداول فقط فئة 25 و 50


؟؟ !!!


افا
هههههههههههههههههه

يعني كل النقاش فوق والمداخلات ماكان لها أساس؟

لاتقول ياريال
:)

:)

الأخ بو راكان جزاه الله خير وضح السالفة
واستمر النقاش بعدها :)

واحتمال يستمر بعد كم صفحة زيادة

[بانغ بانغ]

هلا بانغ

مااعتقد حد جرب او بيجرب للسبب هذا طال عمرك :



:)

الأخ بو راكان جزاه الله خير وضح السالفة
واستمر النقاش بعدها :)

واحتمال يستمر بعد كم صفحة زيادة

هههه الله يجزيك خير امبين