سباقات السياكل.. و الزحمة في قطر

[عايش فرحان]

اكتب الان من موتري .. لان المرور واقف صار له حول 20 دقيقة صوب البريد و دوريات الشرطة سادة الشوارع و هليكوبتر يحوم فوقنا .. كل هذا لان اتحاد السياكل مسوي سباق ..
حرام عليكم يالمسئولين .. البنية التحتية ما تستحمل الانفجار السكاني اللي عندنا .. و الناس صارت تخاف تطلع من بيوتها بسبب الزحمة .. و ما شاءالله اتحاد السياكل كل يومين مصكر شوارع قطر من الخور لين مسعيد !!
ناقصين احنا؟!
و بعدين إِيش هالرياضة المؤذية اللي تتصكر اغلب شوارع قطر علشانها؟
كم واحد يمارس هالرياضه في قطر؟
كل هالأكشن والأذية عشان جم اجنبي ينزلون من الطيارة و يسوقون في شوارعنا و يردون طيارتهم و مع السلامة ..
أطالب المسئولين في اتحاد السياكل اذا كانوا مصرين على هالرياضه انهم يخلون سابقاتهم في البر و الطرق الخارجية و مايزاحموننا في مراكز المدن و الكورنيش ..
ترا رياضتكم محد درا عنها و ما ورآها الا المخاسير واذية خلق الله.

[بانغ بانغ]

مرة ثانية ؟ الجمعة اللي طافت كان في سباق بعد !!!!!!

[سليمان احمد]

(( الرياضه وما ادراك ما الرياضه استنزفت ميزانيات اهدرت ملايين سببت زحمه اباحت امور محضوره الغت قوانين

جعلتنا نتزلف رضا الفيفا والدول من اجل كاس العالم وووووو وسياتي وقت نندم على اموال اهدرت على امور

كان بالامكان ان تكون في امور اهم ))

[ضوى]

مب جذي الواحدمنثبرفي بيته ابرك له لا يضايق احد ولا احد يضايقه ، نروح مشوار مايبي له الا عشر دقايق ويخلص وناخذ ساعه بالطريج لذلك خذناها من قصيرها مجابلين بيتنا ابرك لنا والله المستعان وقادرانه يجعل لنا مخرجا

[monatee]

يصير حادث بسيط ،، تصير زحمة مب طبيعيه

بعد مسكرين شوارع ؟؟!!!

[Rashid554]

انا من وجهة نظري الشخصيه اشوف ان موضوع النقد تافه ولايسوى النقاش عليه مع احترامي للي كاتبه لان اتحاد الدراجات مايسكر بعض الشوارع الحيويه الا بالسنه حسنه وانا الصراحه اشوف ان هالمواضيع هي الي مسويه زحمه بالقسم بدون اي فايده
وشكرا

[السيف5]

الصراحة مصخت مع الرياضة

حتى شوارعنا ضايقونا فيها

ياأخي روحوا البر او الشوارع الخارجية على اليمين

لازم الشوارع الحيوية

ترى والله مللونا برياضتهم

[دايموند]

الاسبوع الي طاف صكروا علينا الطريج في شارع الخور للذخيره مرتين والله العظيم حسبت الوقت مايقارب 45 دقيقه واكثر بس علشان هالسياكل..انزين يالشرطي وقفنا قبل لا يوصولن ب10 دقايق مب قبلها بساعه اشدعوه !!!!
اعتقد كان يوم الاحد ويوم الاربعاء

[معماري قطري]

الوالد كبير في السن ويمشي بصعوبة من أيام يتذكر سيكل بو ثلاث تواير كان عند ولدي ( النوع اللي وراه سلة ) قال لي يبي مثله الظاهر تأثر باللي يشوفه .. شرايكم آخذ له خصوصاً عنده القلب وجايته جلطة من فترة

[عايش فرحان]

انا من وجهة نظري الشخصيه اشوف ان موضوع النقد تافه ولايسوى النقاش عليه مع احترامي للي كاتبه لان اتحاد الدراجات مايسكر بعض الشوارع الحيويه الا بالسنه حسنه وانا الصراحه اشوف ان هالمواضيع هي الي مسويه زحمه بالقسم بدون اي فايده
وشكرا

ليش شوارع حيوية؟ الكورنيش هو منفذ سكان منطقة الأبراج و الدفنة و اللؤلؤة و الوسيل الى جنوب قطر و مطار حمد و سكان هالمناطق بمئات الألوف !
عندهم شارع الاحتفالات ( الرفاع ) .. يسوون فعالياتهم فيه ..
كم عدد منتسبي اتحاد السياكل؟ 15 نَفَر؟ 16 نَفَر ؟ إِيش انجازاتهم ؟
من حق هواة السياكل ممارسة هوايتهم و لكن عليهم ايضا ان يراعوا مصالح باقي أهل قطر.

[نمر بن عدوان]

مثل هالرياضه المفروض تكون الجمعه او السبت والصبح اما وقت الذروه والناس يبون يطلعون في الاجازه بصراحه حرام

[السفير العربي]

اليوم كانت الفوضى المرورية بسبب أغلاق الكورنيش أمر لا يُطاق ، وكان التذمر بادياً على أوجه السائقين لدرجة أن أحدهم خرج من طوره وأسمعته يسب وينهر ..
أختيار الكورنيش لأي مناسبة في ظل ظروف الأزدحام المروري قرار غبي لا يصدر إلا من عقل خاوي لايتخيل حجم المعاناة التي ستواجه مرتادي الطريق .. فهل أصبحت المناسبات الرياضة أهم من معاناة البشر ولا المجتمع ماله قيمة ؟

[حليتان*]

الوالد كبير في السن ويمشي بصعوبة من أيام يتذكر سيكل بو ثلاث تواير كان عند ولدي ( النوع اللي وراه سلة ) قال لي يبي مثله الظاهر تأثر باللي يشوفه .. شرايكم آخذ له خصوصاً عنده القلب وجايته جلطة من فترة

اخذ له بالعكس الرياضه زينه حق مرضى القلب واتمنع الجلطات باذن الله

[<اضرب واشرد>]

الوالد كبير في السن ويمشي بصعوبة من أيام يتذكر سيكل بو ثلاث تواير كان عند ولدي ( النوع اللي وراه سلة ) قال لي يبي مثله الظاهر تأثر باللي يشوفه .. شرايكم آخذ له خصوصاً عنده القلب وجايته جلطة من فترة

الله يطول بعمره
شوف له سيكل خاص لكبار السن إذا موجود بقطر ولا برع ((رابط الفيديو)):

"رصد لنا عبدالعزيز الحماد هذا المشهد الذي يجيب على كثير من الأسئلة والاستغراب والدهشة التي تراود متابعينا، ومنها: هل تصلح الدراجة لكبار السن، أم أنها حكرا على المحترفين وأصحاب الأجسام القوية؟ وكنا نجيب بجمل قد لا تقنع الكثير فكنا نقول: ينصح الأطباء كبار السن على ركوب الدراجات أكثر من نصحهم على المشي لصحتهم وذلك لأن التدرج على دراجة أخف على أعضاء الجسم ومنها الركبة من رياضة المشي. الدراجة من الرياضات الخفيفة ويستطيعها الجميع، بل هي رياضة لا يصاب فيها المزاول بشد العضل بسبب ليونتها وعدم قسوتها على العضلات. وهي رياضة تزيد من قوة تحملك وصبرك ولياقتك.

ربما تخاف من السقوط وليس عندك قدرة على التوازن، الجارية قد تكون المدخل لكل طاعن في السن، فهي دراجة بكرسي مريح وغالبا تأتي بثلاث عجلات. المشهد التالي سيعجبكم كما وعدنا عبدالعزيز الحماد."

https://www.youtube.com/watch?v=6eh_TD5nBOY

كرسي مريح، وبطيء عشان لاينقلب عليهم

[رجل الجزيرة]

طيب عندهم طريق 22 فبراير، حارة وحده تكفيهم.

[<اضرب واشرد>]

"المانيا افتتحت أول طريق سريع مخصص للدراجات فقط وستُوسَّع الفكرة ليمر الطريق بـ 10 مدن و4 جامعات بطول 100 كيلومتر"

"ألمانيا تفتتح أول 5 أميال من 100 ميل لخط سريع للدراجات، سيربط 10 مدن، ويخفض من قيادة 50 ألف سيارة يوميا"

https://pbs.twimg.com/media/CXvWc2qWEAQhvAB.jpg

https://pbs.twimg.com/media/CXvWdq2WwAEV6Ju.jpg

https://pbs.twimg.com/media/CXvWdxaWcAAR-Pr.jpg

[وحش قطر]

انا من وجهة نظري الشخصيه اشوف ان موضوع النقد تافه ولايسوى النقاش عليه مع احترامي للي كاتبه لان اتحاد الدراجات مايسكر بعض الشوارع الحيويه الا بالسنه حسنه وانا الصراحه اشوف ان هالمواضيع هي الي مسويه زحمه بالقسم بدون اي فايده
وشكرا



شكلك شاري سيكل جديد عشان تدافع عنهم

المهم شنو المردود من البطوله
ولا شنو الانجاز اللي تسجل باسم قطر بعد تنظيم اكثر من 7 سنوات

اتمنى منك الاجابه

[بعيد النظر]

الاسبوع الي طاف صكروا علينا الطريج في شارع الخور للذخيره مرتين والله العظيم حسبت الوقت مايقارب 45 دقيقه واكثر بس علشان هالسياكل..انزين يالشرطي وقفنا قبل لا يوصولن ب10 دقايق مب قبلها بساعه اشدعوه !!!!
اعتقد كان يوم الاحد ويوم الاربعاء

وانا ظاهر من لفان .. وقفت 25 دقيقة !
اتوقع لو الله استجاب دعائي كان كل المتسابقين ماتو !!!


لاني تنرفزت !! الحين الواحد طالع من دوامه !
ناقص هبل وتسكير شوارع يالله يالله عيوني مبطلة ابي اعود البيت واغط شوي قبل الاذان !

يجون ذول ظرب في هالبيدر واحنا اللي ننطر !