تقسيم البيوت :هل هو ممنوع أم مسموح وهل القانون مطبق على الكل

[الكاسر99]

السلام عليكم ورحمة الله وبركاته

تقسيم البيوت لتأجيره على أكثر من عائلة مسموح أم مخالف لقانون الدولة ....؟


في منطقة عين خالد القديمة ( منطقة عوايل )

بيوت مؤجرة على عزاب وعمال شركات ووجودهم بكثره في المنطقة وهم في تزايد مستمر مع عدم وجود مفتشي من البلدية

تحصل بيت شعبي من دور واحد مقسم ومأجر لعدد من العوايل

هل هذا مسموح به أم ممنوع .......؟؟؟

القانون يقول لك (( ممنوع التقسيم ويتم إعاده البيت كما كان ويخالف المالك ))


أكثر الكباين موجوده في الشارع وخارج حدود الأرض وتشوية للمنظر العام

هل هذا مسموح به أم ممنوع


بيت شعبي عمره فوق ال 15 سنه يعطى رخصه بناء دور أول ومن ثم بتم تقسيمه لأربع عوايل من قبل المالك

ويظهر كتاب من البلدية للشخص المخالف بإزالة التقسيمات ويرفض ويخالف وفي نفس الوقت يعطى من قسم أخر من البلدية رخصة إتمام بناء للدور الاول

وعند المراجعه يقولون لك هذا قسم وهذا قسم أخر ( قسم يخالف لأن المالك مخالف للقانون - وقسم أخر يمشي أمور المالك لتكملة البيت ) شي غريب :rolleyes2:

وإلى الأن المخالف مستمر في صيانة البيت لتأجيره

وعنده قضية في المحكمه

السؤال : وين مفتشي بلدية الريان بالتحديد عن منطقة عين خالد ......؟؟؟

تقسيمات + فتح ابواب على الشارع بطرق عشوائية وتسكين عمال عزاب بها + وضع كباين خارج البيوت بطرق عشوائية

وين دور مفتشي البلدية من هاذي المنطقة بالذات

منطقة قديمة صار لها أكثر من 20 سنة لو تدخلها تحس أنك مب عايش في قطر

الحين أبي أعرف تقسيم البيوت ( لتسكين العوايل ) ممنوع على الكل أم مسموح لناس معينين

[غريب الدّار]

على حسب علمي ممنوع اخوي
ونزل اعلان من البلدية على مااذكر بهالخصوص في الجرايد اكثر من مرة

او تحذير


باحاول اشوفه لك

والتحذير مااستثنى احد ابد

وبالنسبة لدور مفتش البلدية اخوي :
تقدر انت ترفع شكوى وهم يشوفون السالفة
وهم مب مقصرين

[عثرة جواد]

تعال الشمال وشوف البلدية ف سبات عميق


والله الفلا فيها فوق 10 او 20 وبين بيوت عوايل


وهم اكبر سبب ف غلاء الاجارات

[غريب الدّار]

للاستفادة تقدر تدخل على هالرابط اخوي :
http://www.al-sharq.com/news/details/241008#.Vs6-9XlMuM8

[عثرة جواد]

اخوي غريب اتعرف الصورة ع شنو تدل ف علم النفس

[ضوى]

معاك حق

مسيمير وعين خالد والدوحة الحديثة فيها فلل مقسمة بشكل عشوائي وبطريقة مقززة والعزاب منتشرين بكثرة ولا حسيب ولا رقيب

[سليمان احمد]

اي مشكله يكون خلفها خساره للتجار لايمكن بأي شكل من الاشكال يكون لها ردع يمنعها

وهي ثلاث مشاكل رئسيه متكرره لها سنوات وهناك قانون يمنعها ومع ذلك موجوده وبشكل متزايد

ولو كان القانون يمنعها فعلا ماتفاقمت في ظل وجود قانون وهي ثلاث مصايب والمواطنين يعانون منها

وهي (( مشكله سكن العزاب )) و (( مشكله الشاحنات ووقوفها في الاحياء السكنيه )) و (( ومشكله تقسيم البيوت ))

ولو تمعن الواحد ان الحلول موجوده وامكانية حلها متوفره ويوجد قانون على مستوى قانون اميري يمنع سكن

العزاب وقانون للبلديه يمنع وقوف الشاحنات وقانون للبلديه يمنع تقسيم البيوت ومع ذلك مستمرين الشركات والتجار

اصحاب البيوت في تقسيمها ومستمرين الشاحنات توقف في المناطق السكنيه ومستمرين التجار في ايجار البيوت

على العزاب ضاربين بعرض الحايط القرارات والقوانين تبغى قوانين صوريه والا لو كان هناك تطبيق فعلي للقانون
،
وغرامات والله العظيم ماتشوف احد يخالف القانون ولأن القانون يمس التجار لذلك سلم لي على القانون

وسلامتكم

[الدوحه1]

هالصوره منقوله من "تويتر"!!
اشرايكم؟؟

http://www7.0zz0.com/2016/02/25/12/447120131.jpg (https://www.0zz0.com)

[ضوى]

ماطلعت الصورة

[بصمة قطرية]

إدخل موقع مزاد قطر و شوف البيوت المعروضة للإيجار
وايد منها تقسيم لأكثر من عائلة ..
و بعد في باقي المواقع نفس الشي ..
إذا التقسيم ممنوع شلون يحطون إعلانات جذي
في مواقع ..!!!

[وحيد-الشوق]

شيء يفشل وظاهرة سيئة بيوت مقسمه على عوايل وين قاعدين ياجماعه !!!

ادري البعض محتاج سكن وهو مستفيد أيضاً من فكرة تقسيم المنازل لكن سؤال يحيرني شلون يرضى القطري يسلم البيت لجنسية عربية هدفها تقسيم البيت لهذي الدرجة وصل فينا الجشع وحب المال ورجاء لاتقولون القطري مايعرف :)

[الكاسر99]

وين دور مفتشي البلدية وبالذات بلدية الريان عن منطقة عين خالد

ليش محد يمر ويشوف المخالفات والشاحنات والعزاب والكباين على طول الطريق

وين الحملات التفتيشية اللي يكتبون عنها في الجرايد

ماشفت شي

أنا الحين بكمل سنتين في المنطقة لا شفت مفتشين ولا شفت أحد تخالف

الناس تفتح أكثر من باب على الشارع وكل باب في غرف للعزاب تقول (( محاكر حمام ))

وشوف في كل غرفه كم عامل ساكن والأمور عادية

القانون يقول ( ( تقسيم العقارات السكنية .. مخالفة قانونية )) ليش ما يطبقونها على الكل


الحين تحصل واحد عنده بيت قديم يقسمه حق أربع عوايل

وين كلام البلدية أن هذا زياده على الصرف الصحي وعلى استهلاك الكهرباء والماء

ولا بس كلام بدون تنفيذ القانون

نبي أحد يرد علينا

هل التقسيم ممنوع أو مسموح سواء تسكين عوايل أو عزاب

ولا ممكن يمشونه لو قسم بيته وعقب يعطونه رخصة ...........؟؟؟؟

[Rider]

المالك همه الفلوس حتى لو على حساب الاخرين

[مرتبش]

يعرف ويبي هالشي ..ويرفض يسكن قطري في بيته يقول مايدفع الاجار

[ضوى]

صح وايد يرفضون التأجير لقطري ، ياترى شنهو السبب ؟ وهل هذا قانوني ؟ ويمكن محاسبة المؤجر ؟

[الكاسر99]

المالك همه الفلوس

وبلدية الريان وين دور مفتشينهم ..........؟؟؟

يقولون حملات تفتيشية لضبط المخالفين

وعقب يقولون لك قدم شكوى

يعني شخص واحد في المنطقة يشتكي على كل المخالفين في المنطقة

عجل شنو دور المفتشين ..........؟؟؟

لو كان فعلا في تطبيق للقانون صح والضرب بيد من حديد لكل مخالف

بتحصل البيوت نظيفة وكل جار يحترم جاره

[بانغ بانغ]

مسكين ظلمتوه .... باني عالشارع بس

اعرف بيت في معيذر امقسم حق 35 شخص تقريبا 12 عايلة

اعرف مصري وهله ساكنين وتوه طالع

[عضو دائم]

مع الأسف القرارت التي تخرج علينا قرارات عشوائية لاتخدم الناس ،، البيوت المقسمة سببها كثرت الطلب على السكن .. الحل في يد الحكومة اذا ارادت الحل بسيط وهو فتح الشوارع الى شقق ومحلات وتنتهي ازمة السكن والمحلات وتكون على مستوى مناطق الدولة بعيداً عن الواسطات والمحسوبية وابرتفاعات لاتقل عن 3 ادوار ..

[qatari 111]

المالك همه الفلوس

وبلدية الريان وين دور مفتشينهم ..........؟؟؟

يقولون حملات تفتيشية لضبط المخالفين

وعقب يقولون لك قدم شكوى

يعني شخص واحد في المنطقة يشتكي على كل المخالفين في المنطقة

عجل شنو دور المفتشين ..........؟؟؟

لو كان فعلا في تطبيق للقانون صح والضرب بيد من حديد لكل مخالف

بتحصل البيوت نظيفة وكل جار يحترم جاره

اخوي موضوع البيوت المقسمه صعب عالمفتش انه يحدد هل البيت مقسم او لا الا اذا دخل وشاف وهذا ممنوع عالمفتش دخول البيت اين كان سكن عزاب او عوايل الا بامر من النيابه العامه او بموافقة المالك بخط كتابي موقع من قبله بالموافقه غير هالشي مايقدر يسوي شي .
الشي الثاني اللي اعرفه مب كل العزاب ممنوعين من السكن بين العوايل الا فئة العماله الكوليه والصباغين والبنايين اما مهندسين موظفين شركه مسموح لهم شرط محددين عددهم اعتقد مايزيد عن 10 اشخاص .
والشي الثالث ليش اتعب روحك وتجيب لنفسك عوار الراس اذا في سكن حول بيتكم عزاب قدم شكوى ويش عليك من اللي بعيد عنك دام اللي قريبين منهم راضيين .
الشي الرابع ويش اللي يضرك بالتقسيم وسكن اكثر من عايله ؟
والشي الخامس الكهربه والماي عليهم يدفعون فواتيرها وين الاسراف والتبذير وهدر المياه والكهربه ؟ دامهم يدفعون حلال عليهم مب بلاش .

[مرتبش]

في شارع عندنا تحول الى مايشبه المواقف..السيارات تقف عمودية لكثرتها ..تسبب خطورة للمشاة وتضيق الشارع وتغلق مداخل البيوت .

[ابوعلي]

في شارع عندنا تحول الى مايشبه المواقف..السيارات تقف عمودية لكثرتها ..تسبب خطورة للمشاة وتضيق الشارع وتغلق مداخل البيوت .

نفس المعاناة اخوي اربع فلل جدام بيتي وتقول معرض سيارات ولما اشتكينا قالوا عوايل :(

[MAZEN37]

مافي بديل
معاشاتهم بسيطه وما يقدر ياخذ فيلا بروحه
الحل
الحل يفتحون المناطق عماير بشرط توفر باركنج
والعمال المفروض يسمحون لهم بكل مكان بشرط يكون كومباوند مجمع على اربع شوارع

[معماري قطري]

هالصوره منقوله من "تويتر"!!
اشرايكم؟؟

http://www7.0zz0.com/2016/02/25/12/447120131.jpg (https://www.0zz0.com)

عجيب صاحب البيت ذيه

بس ما دام انه حلف انا مصدقه ومبينه البيوت قبله على سيد نفس البيت .. ممكن غيروا المخطط وسوه لشارع واحد

[بوخميس]

تقسيم البيوت طلع مصطلح جديد في سوق العقار عند السوريين والمصريين (مستثمر) يعني واحد يستأجر بيت من (قطري طبعاً) بمثلاً (15) ألف ريـال، ويقوم (المستثمر) مع (كومار مال الجبسن بورد) بتقسيم البيت إلى (8) شقق (وهي عبارة عن محاكر 3 في 3) ويأجر كل واحد على (3000) ريـال، ويطلع ربحه (9000) ريـال.

اعرف سوريين وبنغالية وهنود مستأجرين أكثر من (3-4) بيوت ومقسمينها. ويدخلون (20-25) ألف شهرياً من فرق الايجار الاصلي والباطن.

[الخيالة]

انا للحين ادور علي بيت و كل ما احصل بيت في مزاد قطر و اتصل يرد علي مصري و يقول عن بيوت التقسيم او يقول فوق ماخذين تحت أجار يوم اروح اشوف ألقي اللي تحت بعد مقسم و الحوش مشترك وااايد فلل و بيوت شفت مقسم و عادي عندهم و محد يدري عنهم هندي مأجر فيلا مقسمه علي 4عوائل كل قسم ماجرته فوق ست الاف

[الخيالة]

و حصلنا فيلا في الوكير فلل جديده يوم رحنا طلع فلل اللي حوالينه كله ماجرين للشركات هنود و الصينيين

[جوال 11]

قانون المنع موجود على الرف نتمنى تفعيله تمر على فلة عندها اكثر من ثلاثين سيارة ايش يعني هذا المنظر غير تقسيم الفلل تفعيل دور المفتشين على كل مخالفة يعطى نسبة من المبلغ والشباب بيشتغلون لكن هنالك يمكن تعليمات بعدم تطبيق القانون

[fzaa_qatar]

انا والله مستغرب دام فيه قانون ليش البلديه تكتفي بس بمخالفه اللي اجر من المالك .. انا واحد ساكن بعيد عن الدوحه وهلي فمعيذر اجرت قسم في فله غرفه وصاله وملحقاتها .. طبعا تميت اكثر من سنه لحد ما لقيت واحد ياجر ل قطري .. تم توقيع العقد وبديت افرش الملحق اللي اهو جزء من دور ارضي بيني وبين جاري حاجز بس وشفت واحد يلصق اوراق مخالفه لاربع فلل جديده منهم فلتي كلمت اللي ماجر منه قالي ما عليك منهم بس ندفع مخالفه وتنتهي المشكله وفعلا صار لي سنه ولا صار اي شي .. تعال شوف المشاكل والضغط ع الكهربه والماي وحتى الشوارع بو سيدين صارت سيد واحد من كثر السيارات .. فلتي انا وخمسه غيري حتى السطح حطوه شينكو وسكنوا العوايل ..... والله والله اتمنى فعلا يجي يوم يطبقون القانون صح لانه فعلا الوضع صار مئساوي ومنظر الفرجان كانك فالصناعيه والمقيمين منهم من صار هامور تاجير من الباطن ومسيطرين ع مناطق بكبرها ليش يسمحون لهم ياجرون اكثر من فله تحت الاسم الواحد

[Riku3]

والشي الخامس الكهربه والماي عليهم يدفعون فواتيرها وين الاسراف والتبذير وهدر المياه والكهربه ؟ دامهم يدفعون حلال عليهم مب بلاش.
سلامتك اكثرها شامل الكهرباء بقيمة ثابتة على الايجار لان المؤجر الرسمي شخص واحد وفي العادة مصري او سوري او هندي .. وهو بدوره يأجرها على غيره ويدفع الكهرباء بنفسه كل شهر ..

هالتصرفات تمر بتهاون من البلدية .. والمخالفين يعلنون في الجرايد الرسمية بشكل علني وانا شخصياً كلمت ناس ورحتلهم وشفت شلون ساكنين في ملاحق مافيها اقل متطلبات السلامة !! .. حتى الحوش قالبينه شقتين الى 4 شقق !! .. هذا غير البيت نفسه الي تلاقيه 5-8 شقق اقل شي .. كل هذا وهو مأجر البيت بـ 15 الف وياخذ من وراه 30-35 الف في الشهر !! ..

رحت قبل سنتين ابي موافقة لبناء البنتهاوس ولعوزني بسبب النسبة لين رضو .... واخرتها واحد من الجيران اشوفه باني الدور الثالث كامل شينكو ومكيفات ويندو !! .. ضحكت عليه قلت بيتخالف وبتجيه الازالة .. كاهو من سنتين اموره طيبه وماشيه ولو نحسبها هو مسوي شقتين في الطابق الثالث وكل وحده اجار 4000 يعني طلع قريب 200 الف في هالسنتين ولين يطلع حكم محكمة بيشيله مب مشكلة وبعده باسبوع يرجع يبنيه مره ثانيه :eek5: .

[حليتان*]

ضد التقسيم العشوائي امنيا


مع العلم ان التقسيم يخدم فئه من المجتمع

[معماري قطري]

نفس المعاناة اخوي اربع فلل جدام بيتي وتقول معرض سيارات ولما اشتكينا قالوا عوايل :(

حتى العوايل يفترض ما تسد الطريق والسيارة اللي موقفة غلط تنسحب .. لو سيارة قطري تشيطروا عليها

[معماري قطري]

ضد التقسيم العشوائي امنيا


مع العلم ان التقسيم يخدم فئه من المجتمع

ممكن يكون تقسيم مدروس ومناسب .. حتى المواقف ممكن ترتيبها صح لكن عندنا تخطيط كله متفاجيء بالأعداد المهولة

البنيان العمودي والشقق والمواقف تحت الأرض حل مناسب أو المواقف في الدور الأرضي والسكن فوق بدون قيود 60% من الأرض وارتدادات تاكل الأرض كاملة .. دكتور ما ادري شسمه توه متجنس قطري شرى بيت على شارع الوعب وهدمه وبنى مكانه تقريباً بدون ارتداد وسوى بنت هاوس يبين من الشارع يعني ترس السقف بنيان .. بنيانه زين والله يوفقه بس ليش هو غير وغيره من القطريين يطبقون عليهم قوانين تعسفية

[جبر ال جبر]

معماري قطري هذا عنده واسطه ومعروف وقوانين البلديه من استوت ماتطبق الا على الضعيف اما القوى والقوى الله محد يقرب صوبه والواجب ع البلديه تطبيق النظام على الجميع مب ناس وناس

[لطيف الروح]

لا تعليق

[bohilal191]

ماظن هالصورة في قطر

[mersal]

على حسب علمي ممنوع اخوي
ونزل اعلان من البلدية على مااذكر بهالخصوص في الجرايد اكثر من مرة

او تحذير


باحاول اشوفه لك

والتحذير مااستثنى احد ابد

وبالنسبة لدور مفتش البلدية اخوي :
تقدر انت ترفع شكوى وهم يشوفون السالفة
وهم مب مقصرين

صح هم مش مقصرين لكن المشكله عندهم انه المستاجر والمالك يقولوا لهم المأجرين عندنا البقال والخياط الي صوبنا او الدوبي مش عمال شركات والفئه الي ذكرتهم لهم الحق يسكنوا مع العوايل وهذا حاصل معي شخصي عمارتنا فيها شقتين ماجرهم الخياط لعماله وما قادر اعمل معهم شي

[معماري قطري]

معماري قطري هذا عنده واسطه ومعروف وقوانين البلديه من استوت ماتطبق الا على الضعيف اما القوى والقوى الله محد يقرب صوبه والواجب ع البلديه تطبيق النظام على الجميع مب ناس وناس

صدقت والله جاري باع أرضه على وزير سابق والأرض صغيرة غصب سوى فيها 3 بيوت وانا مبتلش بهالثلاث بيوت .. بيت مدرسة وبيت عزوب وبيت فلبينيات يسوون حفلات ويشتغلون في صالون نسائي قريب .. إشتكيت ولا سووا شيء

[حليتان*]

ممكن يكون تقسيم مدروس ومناسب .. حتى المواقف ممكن ترتيبها صح لكن عندنا تخطيط كله متفاجيء بالأعداد المهولة

البنيان العمودي والشقق والمواقف تحت الأرض حل مناسب أو المواقف في الدور الأرضي والسكن فوق بدون قيود 60% من الأرض وارتدادات تاكل الأرض كاملة .. دكتور ما ادري شسمه توه متجنس قطري شرى بيت على شارع الوعب وهدمه وبنى مكانه تقريباً بدون ارتداد وسوى بنت هاوس يبين من الشارع يعني ترس السقف بنيان .. بنيانه زين والله يوفقه بس ليش هو غير وغيره من القطريين يطبقون عليهم قوانين تعسفية

بالضبط لازم دراسه ونظام لان هذول بشر
يارجل قامو ياجرون السراير تخيل غرفة فيها 8 سراير والسرير ب 800 ريال هذي طلع من غرفة وحده فبيت 6400 ريال غير المجلس والصاله والغرف الثانيه !! تخيل 8 اشخاص فغرفه وحده!! واحيانا اكثر كل ما تكبر الغرفه كل ما زاد العدد شلون يتنفسون وين الخصوصيه لو احترف البيت شلون بيطلعون غير انه هالبيوت فيها الكثير من العماله الهاربه والغير نظاميه ومجمع امراض الله المستعان كم جريمة قتل كم مشاجره وضرب بسواطير وسججاين كم حالة اغتصاب




ووعلى فكره من اسباب ارتفاع سعر العقار تقسيم البيوت

[بشائر]

حسب علمي ممنوع تقسيم البيوت هذا غير إنهم عزابية بلغ البلدية بيتلونهم بإذن الله.

[R 7 A L]

المشكلة عندنا ( قوانين ) غير مطبقه
بس حبر على ورق

[Riku3]

صدقت والله جاري باع أرضه على وزير سابق والأرض صغيرة غصب سوى فيها 3 بيوت وانا مبتلش بهالثلاث بيوت .. بيت مدرسة وبيت عزوب وبيت فلبينيات يسوون حفلات ويشتغلون في صالون نسائي قريب .. إشتكيت ولا سووا شيء
في ارض صوبنا في المخطط حجمها 1700 متر .. من كم سنه انباعت والي شراها قاعد يبني الحين 5 فلل فيها !! .. للحين في الاساسات وماخذه كل الارض .. انا للحين مب مستوعب شلون بيحط هالخمس فلل في الارض هذي .

[النهار]

في ارض صوبنا في المخطط حجمها 1700 متر .. من كم سنه انباعت والي شراها قاعد يبني الحين 5 فلل فيها !! .. للحين في الاساسات وماخذه كل الارض .. انا للحين مب مستوعب شلون بيحط هالخمس فلل في الارض هذي .

عادي ياخوي في فلل مسحتها 250 او 280 وهاي تطلع 338 تقريبا

[معماري قطري]

في ارض صوبنا في المخطط حجمها 1700 متر .. من كم سنه انباعت والي شراها قاعد يبني الحين 5 فلل فيها !! .. للحين في الاساسات وماخذه كل الارض .. انا للحين مب مستوعب شلون بيحط هالخمس فلل في الارض هذي .

هذي اللي جنبي 1380 على ما اذكر .. وباعها بحول 350 سنة 2005 - 2006 وبعدها أقلعت الأسعار

وصحيح 1700 لو أي شخص يطلب ترخيصها وتقسيمها بيتعب حق 3 وهذا مسوي 5 .. آتمنى يكون قانون ويمشي للكل لأن الحاجة للأراضي ولزيادة الارتفاع كبيرة لكن ناس وناس هنا المشكلة.

[.. الكاش ..]

الكل يريح نفسه التقسيم على عوايل مسموح انا رايح البلديه بنفسي اذا مخطط البيت مصرح ومافي مخالفات مسموح تحط كم عايله

[MAZEN37]

الكل يريح نفسه التقسيم على عوايل مسموح انا رايح البلديه بنفسي اذا مخطط البيت مصرح ومافي مخالفات مسموح تحط كم عايله

صحيح عايشين مع بعض المهم كل عايله عندها غرفه لها باب
تخيل الوضع صراحه الله يعينهم
ايش الوصلهم لهدرجه
هو غلاء الايجار فيتعاونوا على البيت
المشكله واضحه
توفير شقق صغيرة لذوي الدخل المحدود
الموضوع يطول الكلام فيه

[الكاسر99]

الكل يريح نفسه التقسيم على عوايل مسموح انا رايح البلديه بنفسي اذا مخطط البيت مصرح ومافي مخالفات مسموح تحط كم عايله

أخوي من قال لك التقسيم مسموح

أنا مشتكي على جاري والمساح من البلدية جاء البيت وصور المخالفات والتقسيمات وقال لي أن البيت كله مخالف

وكلمت المدير قلت له والحين وش بيصير قال لازم يزيل كل التقسيمات ويرجع البيت نفس ما كان والحين الرجال عنده محكمه اخر شهر 3
وفي نفس الوقت ونفس البيت هو باني دور أول وبعد من ناحية المخططات اللي ماخذها من البلدية بعد مخالف في الدور الأول أيضاً

الغريب في كل هذا أنه في نفس البلدية ..........؟؟؟؟

عطوره رخصة إتمام بناء وهو مخالف أشلون ما أدري

يعني المالك نفسه عليه قضية على نفس البيت وواصله المحكمه والمالك مب متجاوب لا مع البلدية ولا مع النيابة وتم أرسل كتاب له من المحكمه ولا أستلم الكتاب

والحين قاعد يكمل صيانة البيت

ولين سألت اللي في البلدية أشلون يحصل رخصة إتمام بناء وهو عليه قضيه

يعني كأن البلدية يناقضون أنفسهم قسم يرفع عليه قضية

وقسم أخر يمشي له أموره عشان يخلص البيت

للحين والله مب مستوعب أشلون نفس الجهه وحده مب واصله لحل مع المالك ورافعين عليه قضيه وقسم ثاني يمشي له أموره

أبي أحد يرد علي هل هذا عادي في البلدية كل قسم يشتغل بروحه ولا كلهم تابعين لبعض

[سليمان احمد]

اغلب قرارات المنع واللي تمس التاجر اعتقد انها فقط لذر الرماد في العيون

[qatari911]

أخوي من قال لك التقسيم مسموح

أنا مشتكي على جاري والمساح من البلدية جاء البيت وصور المخالفات والتقسيمات وقال لي أن البيت كله مخالف

وكلمت المدير قلت له والحين وش بيصير قال لازم يزيل كل التقسيمات ويرجع البيت نفس ما كان والحين الرجال عنده محكمه اخر شهر 3
وفي نفس الوقت ونفس البيت هو باني دور أول وبعد من ناحية المخططات اللي ماخذها من البلدية بعد مخالف في الدور الأول أيضاً

الغريب في كل هذا أنه في نفس البلدية ..........؟؟؟؟

عطوره رخصة إتمام بناء وهو مخالف أشلون ما أدري

يعني المالك نفسه عليه قضية على نفس البيت وواصله المحكمه والمالك مب متجاوب لا مع البلدية ولا مع النيابة وتم أرسل كتاب له من المحكمه ولا أستلم الكتاب

والحين قاعد يكمل صيانة البيت

ولين سألت اللي في البلدية أشلون يحصل رخصة إتمام بناء وهو عليه قضيه

يعني كأن البلدية يناقضون أنفسهم قسم يرفع عليه قضية

وقسم أخر يمشي له أموره عشان يخلص البيت

للحين والله مب مستوعب أشلون نفس الجهه وحده مب واصله لحل مع المالك ورافعين عليه قضيه وقسم ثاني يمشي له أموره

أبي أحد يرد علي هل هذا عادي في البلدية كل قسم يشتغل بروحه ولا كلهم تابعين لبعض

انا اقولك شلون
الواسطه وخواتها

[نمر بن عدوان]

الزبده:

التأجير لاكثر من عايله ممنوع هالشي مافيه كلام لكن لما احد يأجر بيته لاكثر من عايله ومحد يشتكي عليه شي طبيعي بتمشي الامور عادي .انا جاري مأجر بيته لاكثر من عايله لكن ماشتكيت عليه لان هالشي مب مظايقيني فليش اقطع رزقه وبعدين هذيه مواطن خله يستفيد هو على الله وعلى هالبيت ويمكن يكون البيت لايتام او ارامل لذلك نلاقي القانون مش مطبق لان محد يشتكي ولا اذا فيه شكوى على طول يتم اعطاء انذار اخلاء ويتغرم راعي البيت المخالف

[نمر بن عدوان]

هالصوره منقوله من "تويتر"!!
اشرايكم؟؟

http://www7.0zz0.com/2016/02/25/12/447120131.jpg (https://www.0zz0.com)

هالصوره في اي بلاد ؟

[venum]

محد ضيعنا و لعب في سوق العقارات و اسعار الايجارات الا هالنصابين اللي اذا دخلو في سوق خربوه والحلف عندهم ببلاش

بيوت ماتسوى ايجارها 15 و طالع بهذلونا حسبي الله عليهم واذا جا قطري يستأجر قالو لا , صاحب البيت مايبي قطري وهو يخسي بس يبي يقسم البيت ويدري القطري مايرضى يسكن اهله و شوفاته مع غرب

و نقطة ثانيه

يا حكومتنا الموقرة و كهرماء و البلدية و اي شخص مسؤؤل

شلون وسيط ياجر لاجانب و يكتب في الاعلان وعيني عينك وقدامكم الايجار شامل كهرماء؟؟ اخبر الكهربا و الماء مجانا للقطريين !!! و ليش ساكتين على هالتلاعب ولا فتامين واو عادي !!

[وحيد-الشوق]

محد ضيعنا و لعب في سوق العقارات و اسعار الايجارات الا هالنصابين اللي اذا دخلو في سوق خربوه والحلف عندهم ببلاش

بيوت ماتسوى ايجارها 15 و طالع بهذلونا حسبي الله عليهم واذا جا قطري يستأجر قالو لا , صاحب البيت مايبي قطري وهو يخسي بس يبي يقسم البيت ويدري القطري مايرضى يسكن اهله و شوفاته مع غرب

و نقطة ثانيه

يا حكومتنا الموقرة و كهرماء و البلدية و اي شخص مسؤؤل

شلون وسيط ياجر لاجانب و يكتب في الاعلان وعيني عينك وقدامكم الايجار شامل كهرماء؟؟ اخبر الكهربا و الماء مجانا للقطريين !!! و ليش ساكتين على هالتلاعب ولا فتامين واو عادي !!

والله لاعبين لعبتهم ياخوي نصب غش وتلاعب وحلف بالله كأنه امر عادي اتمنى نقضي على ظاهرة تقسيم البيوت وللعلم ترى بعضهم كلامهم صحيح يجيك قطري مايبي يأجر على قطري بحجه انه مايدفع الايجار او يتأخر حتى اذكر احد الاخوان في المنتدى قالها بعظمة لسانه :)

[بوحارب]

البلاد في ازمه

إجارات غالية
السكان مليونين ونص
بعض راعيين البيوت عليهم التزامات بنكية قام وقسم البيت
رواتب الأجانب قليلة



لازم تحصلون تقسيم وخربطة ومخالفة للقوانين


اعرف واحد قطري مقسم فلته على 4 عوايل
وهو ساكن معاهم
عليه ديون في البنك ومظطر

الله يعين الجميع

ملاحظة؛ انا ضد التقسيم العشوائي

الله يعين الجميع

[الكاسر99]

الزبده:

التأجير لاكثر من عايله ممنوع هالشي مافيه كلام لكن لما احد يأجر بيته لاكثر من عايله ومحد يشتكي عليه شي طبيعي بتمشي الامور عادي .انا جاري مأجر بيته لاكثر من عايله لكن ماشتكيت عليه لان هالشي مب مظايقيني فليش اقطع رزقه وبعدين هذيه مواطن خله يستفيد هو على الله وعلى هالبيت ويمكن يكون البيت لايتام او ارامل لذلك نلاقي القانون مش مطبق لان محد يشتكي ولا اذا فيه شكوى على طول يتم اعطاء انذار اخلاء ويتغرم راعي البيت المخالف

هلا أخوي هذا أنا مشتكي للحين البلدية ماسوو له شي

الدور الأول مخالف هو فيه ومعطينة رخصة إتمام بناء

والدور الأول بعد مخالف وعنده قضية وصلت للمحكمه

والله للحين مستغرب نفس البيت ونفس المالك

عنده قضية في المحكمه ونفس الوقت معطينة رخصة إتمام بناء

ولين سألت قالوا : هذا قسم الرخص وهذا قسم الشؤون الفنية

المشكلة هم تابعين لنفس البلدية

ليكون في البلدية كل قسم يشتغل ويصدر قرارات لحالة

[qatarman8008]

التقسيم ممنوع بالقانون..
لكن تعال الحين وطبق القانون..
انا جمب بيتي 3 فلل مقسمين وماجرين..
قدام كل فلة تلاقي 6 سيارات صغيرة..
الشارع ضيق اصلا.. وصارت نص سياراتهم صافة بالشارع..
صار الشارع مسار واحد.. وصرنا ما نعرف نسوق سياراتنا حتى..