استفسار

[Stars]

يالربع حد تعامل مع هالمكتب اسمه مناقصات
يطرحون مشروعك من التصميم الى إصدار رخصة البناء
الى التنفيذ عند الشركات المتعاقدة معهم ويقدمون لك الأسعار
ما ادري حد تعامل معهم ياريت يفيدنا


وهذا إعلانهم في موقعهم وعلى تويتر 👇🏼


‏من تصميم البيت إلى تسليم المفتاح
‏جميع خدماتنا مجانية
‏إحنا #بنكفيك،،
‏سجل كعميل لدى monaqasat.net وإطرح مناقصتك.
‏
‏#مناقصات_نت
‏#قطر
وإيضاً هذا الإعلان 👇🏽

‏الآن،،،تصميم مخططات منزلك حتى إستخراج رخص البناءأصبحت خدمة مجانية لدى #مناقصات_نت للمواطنين القطرين.
‏سجل الآن
‏للإستفسار : 44444108
‏#بنكفيك

[معماري قطري]

اتوقع فكرته حلوة ووصلني اعلانهم بس يفترض يحطون تفاصيل

مثلاً انا احتاج تفصيل للاستشاريين المتعاملين في التصميم مثل .. إسم الاستشاري وخبراته وعدد وتخصصات مهندسينه وخبرتهم - موقع المكتب أو الفروع والمكاتب - عدد المشاريع أو نسبة الإنشغال ( فهناك مكاتب مشغولة فوق طاقتها ومكاتب تقدر تاخذ 20 مشروع زيادة )

الموقع هذا هل هو هندسي متكامل يدقق الوثائق ويطرحها مناقصة على مكاتب استشارات ومقاولات متقاربة أو بس كل القضية تسعير والسلام؟ أوعملية تسويقية انا اسوي لكم دعاية يالمكاتب ويالمقاولين وتحطون لي مبلغ معين لو رست المناقصة عليكم

انا كفرد عندي علاقات ومصادر لعمل هذا كله وفوقه التدقيق والتعديل والمقترحات المحسنة على التصميم بس دوم للمالك رأيه وهو يسوي شيء مغاير للواقع ويعتمد على كلام المجالس ويدور الرخيص بغض النظر عن جزئية الجودة

المكاتب كلها كذلك بعد ما يتوفق الواحد في اختيار واحد منهم ويخلص التصميم تسوي مناقصة البناء وتعد الوثائق وتبيعها للمقاولين بمقابل بسيط يغطي قيمة الطباعة .. وهذا يشمل شركات من طرفهم ومن طرف المالك وممكن للمالك ياخذ الوثائق ويدعي شركات من اختياره .. والشركات اللي سمعتها جيدة ومناسبة لعمل ما معدودة في السوق والسيء مثلها كثير وما تسمى شركات

تقسيم المناقصة لعدة أعمال يحتاج حساب كميات وعقد دقيق يفصل حدود شغل كل مقاول وهذا مهم للي يحب يشطب بنفسه .. وهذا ما اعتقد موقع شبكي بسيط فيه ممكن سماسرة وناس غير مختصين يقدر يسويه

كنت اتمنى الحكومة تسوي مثل هذي الخدمة وبتوثيق للعقود ومتابعة عامة .. اللي هي متابعة الشكاوي وسير العمليات الرئيسية والاستلام أقلها ومن ضمنها التحكم في الجودة كعمل وكمواد وكتطبيق للمواصفات .. وحتى لو برسوم بس يكون لها حق الضبط القانوني ومحاسبة الاستشاري المشرف لو قصر أو المقاول .. ومنها نشر أفضل المقاولين بمصداقية وحرفية وكذلك الاستشاريين فيكون تطوير حقيقي لمهنة البناء والاشراف والاستدامة والمباني الخضراء وكل اللي يتكلمون عنه ولا نشوف منه شيء

[sweet qatar]

خدمتهم روعه

ومجانية هم ياخذون العمولة من الشركة الي بتختارها

توكل علي الله و تواصل معاهم و تقدر تشوف المشاريع الي شاركوا فيها لأنهم يحطون لوحة خاصة فيهم علي البيت


هم يطرحون المناقصة و تجيك عروض .. تختار عدد معين منها و تقابلهم عقب تختار الي يناسبك

يعني الاختيار يكون عليك

موفق ان شالله

[Stars]

اخوي المعماري تنصح بالتعامل معهم ؟

[Stars]

جزاكم الله خير جميعاً

[معماري قطري]

اخوي المعماري تنصح بالتعامل معهم ؟

والله يا اخوي لو عندهم مهندسين يدققون الرسومات وينصحون بالأفضل أكيد .. لكن موقع مثل مواقع كثيرة ياخذ عمولات من المكاتب والشركات ويسوي لهم إعلان واحنا ما نعرف خلفيات هذي الشركات أكيد مجال الإختيار الخطأ موجود

الشركات الجيدة تروح لها وتقابل مديرها أو مدير مشاريعها واحتمال يقبل واحتمال يعتذر بكثرة الشغل عنده

وهذي الخدمة كل استشاري يسويها والاستشاري من واقع تجربته ينصحك بالأفضل واللي فاهم وبيسوي شغلك صح

يعني لنفترض انا قلت ابي تدعون شركة 1 و 2 و 5 و9 وحطوا شركات من عندكم ويدخلون شركات ضعيفة ويسعرون رخيص أو يخطئون في التسعير بعدين يلاحظ إنه أخطأ ويتهرب ويحاول يسوي شغل يمشي حاله بس

دوم في المناقصات حاول تاخذ شركات ظروفهم تتشابه ومناسبين للشغل اللي تبيه

[sweet qatar]

والله يا اخوي لو عندهم مهندسين يدققون الرسومات وينصحون بالأفضل أكيد .. لكن موقع مثل مواقع كثيرة ياخذ عمولات من المكاتب والشركات ويسوي لهم إعلان واحنا ما نعرف خلفيات هذي الشركات أكيد مجال الإختيار الخطأ موجود

الشركات الجيدة تروح لها وتقابل مديرها أو مدير مشاريعها واحتمال يقبل واحتمال يعتذر بكثرة الشغل عنده

وهذي الخدمة كل استشاري يسويها والاستشاري من واقع تجربته ينصحك بالأفضل واللي فاهم وبيسوي شغلك صح

يعني لنفترض انا قلت ابي تدعون شركة 1 و 2 و 5 و9 وحطوا شركات من عندكم ويدخلون شركات ضعيفة ويسعرون رخيص أو يخطئون في التسعير بعدين يلاحظ إنه أخطأ ويتهرب ويحاول يسوي شغل يمشي حاله بس

دوم في المناقصات حاول تاخذ شركات ظروفهم تتشابه ومناسبين للشغل اللي تبيه


كل شركة تتقدم للمناقصة تعطيك بروفايلها


و العرض يوصلك بالتسعير وتفاصيل التسعير



فانت تقيم الشركة و تشوف اذا كان التسعير على اسس صحيحة او مبالغين
و تعرف مستوى الشركة من صيغة العقد


اذكر اني راجعت بروفايل شركة و استبعدتها على طول لان السعر الي تدخل فيه للعقد وراه عقود اضافيه
في كل المشاريع الي نفذتها !!!

[معماري قطري]

كل شركة تتقدم للمناقصة تعطيك بروفايلها


و العرض يوصلك بالتسعير وتفاصيل التسعير



فانت تقيم الشركة و تشوف اذا كان التسعير على اسس صحيحة او مبالغين
و تعرف مستوى الشركة من صيغة العقد


اذكر اني راجعت بروفايل شركة و استبعدتها على طول لان السعر الي تدخل فيه للعقد وراه عقود اضافيه
في كل المشاريع الي نفذتها !!!

زين سؤال هل كل البروفايلات حقيقية وصحيحة 100%؟

إحنا اضطرينا لتكوين لجنة من عدة أشخاص والذهاب لمكاتب استشارية بروفايلها زاخر بالمهندسين .. بس من خلال زيارات ميدانية وجدنا بعض المكاتب خالية الا من مسؤول يمشي الأُمور والباقي مختومة جوازاتهم وعندهم اقامة لكن خارج الدولة حتى يوفرون على المكتب

كثير التلاعب موجود وشركات تدعي شيء ما عندها .. خذي مثال صار معاي .. سويت تصميم لبيت وحطيت صورة التصميم وادور في قوقل حصلت تصميمي هو هو في إعلان لمكتب سعودي .. اللي شاف الاعلان وشاف التصميم بيقول انا اللي سارقه وانا متأكد وواثق من نفسي إني مسويه من الصفر والله يعلم ويشهد على ما اقول

العمل الهندسي فن مرهق ومتعب وصعب الواحد ينجز كثير فيه الا بالمثابرة والتعود وكثير يقتبسون وكذلك عمل المقاولات .. هذا شغل تفكير وورق ورسم وذاك شغل حقيقي وراه مجهود واشراف ومالك منتبه ومهتم

إنتي يمكن تحللين المناقصة وتتعبين .. لكن غيرج لا يقتنع بالأرخص ولا حتى يروح الشركة ويشوفها يجيه المندوب لعنده ولا يقرا البروفايل ولا يسئل وبعضهم صحيح منتبه لكل شيء ويسئل وحتى يتأكد من عدد مشاريع الشركة الحالي وعدد عمالها ونوعياتهم ومقدرتهم على تنفيذ الشغل

بعض الشركات مالك وفورمن ويلقط عمال أما يوميين أو اعارة من مكان لمكان وهذا شغل مغامرة ومتعب .. وفي ظل القوانين الحالية من تحويلات رواتب ورقابتها عن طريق وزارة العمل والبنوك حتى المالك اللي يؤسس الشركة صح يعيش صح في ظل الغلا والناس اللي تشتغل من تحت الطاولة .. بيسعر تسعير بفايدة تغطي تكاليفه بيكون غالي واللي يلف ويدور بيسعر تسعير رخيص وبياخذ المشروع ولا بمسويه زين وبيدور ثغرات بيخليها حق وقت الشغل بيطلع كل شوي مبلغ ما اتفق عليه ومضاعف

دوم نصيحتي المناقصة تكون حول 10 شركات الى 15 متقاربين في القوة ومب غلط نطالع شركات أعلى مستوى لكن الأدنى نبتعد عنهم .. يعني شركات مناسبة ومناسبة جداً لو حصلنا المناسب جداً حول ال 10% زايد نفاوضه ونحاول ننزله شوي وناخذه .. ودوم نبتعد عن الأقل والأعلى سعراً .. لكن لو الأقل شركة قوية وبيننا وبينها علاقة طيبة وسعروا برخيص كرغبة في الشغل وارضاء لهذي العلاقة ناخذهم أكيد

وبالنسبة للسعر المفصل كل التفصيل بنود عريضة .. شغل أساسات - خرسانات - طابوق وبلاستر - تمديدات - تشطيبات - خشب - أعمال ألمنيوم - أعمال خارجية .. وكل بند عريض وراه تفاصيل وبنود أصغر كثيرة ما يحددها وتكون مبهمة .. بحاول انزل حساب الكميات واشرحه مرة ثانية لتوضيح هذي النقطة

لو حساب كميات دقيق ومسعر مع رسومات وتفاصيل ومع مواصفات واضحة في هالحالة باقول كلامج صحيح نقدر نشوف التفصيل ونقرر

[Stars]

يعطيك العافية اخوي معماري وسويت قطر ما قصرتم

[معماري قطري]

الله يعافيك ويوفقك ويمكن لو تجربهم تستفيد أقل شيء تعرف السوق .. بس خل فترة قبل التوقيع للتفاوض ولا توقع مع الأقل الا يكون مقاول جيد وشايف شغله وعقدك معاه شامل والا شوف حد من الوسط وحاول فيه لازم بينزل سعره .. بعدين عندك بعض الالغاءات والتغييرات لبعض الأشياء المكلفة بتوفر عليك كثير

كمثال لو الدرج مفتوح وجاي لاف ممكن تاخذ درابزين بسيط بأعمدة مستقيمة وبعيد عن الزخرفة الزايدة ويطلع لك بنص سعر الثاني وجماله غير ممل وتنفيذه مضمون وسهل .. وبدل ما تركب رخام أو غرانيت تركب بورسلان حتى بثلث السعر وميزته ما يتشمخ ولا تضره مواد التنظيف

بدال الحجر تسوي صبغ ب 10% من تكلفة الحجر وصبغ راقي وقوي وتجديده سهل بعد 10 سنين

الجبس تسويه عن طريق محل صغير بيكون أرخص بس تاخذ شخص مجرب وفنان

النجارة والأبواب .. غالبية مناجرنا تتأخر كثير تأخير يوصل لسنة وفوق وسعرها غالي ولو تشوف من اللي يجيبون جاهز ويركبون أفضل لك بكثير .. مثل نابينا والمتحدة واعتقد حسين فكري عنده

سيستم المياه لو تتفق مع مقاول يورد ويركب ونظام جيد وبايبات زينة أفضل لك .. مثل عندك حسين فكري عنده النظام السحاب والقابل للفتح أي وقت وعنده نوعية بايبات بي بي ار ألمانية مضمونة 50 سنة وهو المفروض يضمن التركيب بعد .. والطيب اتوقع عنده ومع عمالة فوق الجيدة وصيانة .. تدمر سئلتهم عن التركيب قالوا بس فوق السطح

[Stars]

تسلم اخوي المعماري الله يكتب أجرك لارشادك اخوانك

أفكر بالنسبة للبايبات أخليه برع طوفة الحمام مهب داخلها
وبغطيهم بقطعة رخام لأن العادة اذا داخل الطوفة حتى لو شغل السباك
ممتاز يخرب الصبغ من الرطوبة

إِيش رأيك في الفكرة
يعني على طول امتداد البايب يتغطى من فوقه وعلى الجنب
بقطع رخام وفوق الرخام ممكن نحط بعض الاكسسوارات

[Stars]

صراحة نحتاج لحل لموضوع بايبات الحمامات الله يعزكم
اغلب البيوت فيها ذي المشكلة

[معماري قطري]

اليوم بالصدفة أتكلم مع واحد مجدد الحمامات كلها من بايبات وبلاط وأطقم

يقول ركب البي بي ار الألماني والفني جاب كل القطع مع وصلاتها وبعدين بدأ يركب وكلها مخفية

بالنسبة لك اخوي ستار الخارجية بتبين قطعة الرخام شاذة وأشوف حتى لو مكشوف عادي وينصبغ مع البيت .. داخل تحت البلاط .. أو لو تبي سو لهم فتحة مغطاة بالطابوق والسيراميك جهة داخل الحمام