أفضل مكتب لـ عمل خرائط بيت

[بن مفتاح]

الله يمسيكم ويصبحكم بالخير

ما عليكم امر ايش أفضل مكتب لعمل خرائط لبيت العمر .. مريت مكتب من المكاتب وقال لي بيعمل خريطة مُعتمدة على خريطة موجودة .. يعني تُجرى لها تعديلات على حسب احتياجاتي للوصول الى الموجود في تخيلي .. وقال لي تكلفة الخرائط 25000 .. المكتب سمعته طيبة وفيه جميع التخصصات المطلوبة لعمل الخرائط من الألف الى الياء ..

يا ليت تفيدوني عن متوسط سعر الخرائط وأفضل مكتب متعاون ومحترف لعمل الخرائط ويكون سعره غير مبالغ فيه .

وجزاكم الله عني كل خير

[السمسمه]

السلام عليكم ورحمة الله وبركاته
بخصوص الخرايط غاااالي شوي الحين انا عامل عند مكتب خرايط 12500ريال كل شي عليه الا الاشراف عقد ثاني غير المبلغ ،،وفي مكتب عطاني 20,000ظهرت من عنده مع انه شغله ممتاز بس مايستغلني في مكاتب سألت عنها والحين معاهم مسوي فلتين عندهم،،،

[معماري قطري]

بن مفتاح إخوي أرسل لي اسم المكتب خاص وباعطيك رايي فيه لو اعرفه

وشوف موضوع التصاميم المعمارية .. أكثر مكاتب قطر يستعملون تصاميم معينة ويعدلون عليها واللي يجدد نادر جداً .. يمكن تحصل شيء مناسب في الموضوع لأرضك ونعدل عليه مثل ما تحب قبل لا تبدأ

25000 مبلغ معقول لتعديل بس يعتمد على المكتب بعضهم ما يشبعون يسوون بهالمبلغ وبعدين يطلبون زيادة وبعضهم ضامنين حقهم مضاعف من الاشراف والتعامل مع المقاول نص لك ونص لنا

[الزجاجي]

شخصيا انا مع العلي للاستشارات الهندسيه واشوفه زين
الاسعار تتفاوت على حسب الخدمات المعروضه .. اكثر من 15 الف اشوفه كثير لمخطط

[معماري قطري]

شخصيا انا مع العلي للاستشارات الهندسيه واشوفه زين
الاسعار تتفاوت على حسب الخدمات المعروضه .. اكثر من 15 الف اشوفه كثير لمخطط

كثير ناس مدحوا العلي للاستشارات والسد وانا جربت بعد مكتب جماعة العمارة العربية وهو قديم والمؤسس له فوق 30 سنة في قطر وألحين ولده يشتغل معاه ودوم يشتغلون للأوقاف

المكاتب كثيرة بس الاختيار يعتمد على أُمور كثيرة أهمها استعداد المكتب في الوقت المعين .. أوقات المكتب يكون مضغوط وياخذ الشغل بغالي ويحوله لمهندسين بالباطن بس المكتب يختم وياخذ عمولة

أهم نقطة ما يلتفت لها الكثيرون اللي هي توقيع عقد شامل مع المكتب .. عقد تصميم يتكون من مراحل هي الاسكتش أو الرسم المبدئي وينتهي بالموافقة المبدئية للتخطيط DC 1 وبعده يكون التغيير والإضافات في أبسط الحدود ولشيء ضروري مثل الخدمات - مرحلة Preliminary Design وهذي يدخل فيها الخدمات والانشائي ثم تأتي مرحلة التصميم المفصل واعداد الوثائق .. شرح المراحل الثلاث مهم ولا يسويه الا مكتب قوي ومختص حتى يضمن حق العميل وحق المكتب .. يعني المرحلة الأخيرة يفترض العميل بس ينتظر اجراءات تخليص الرخصة النهائية ولا يعدل شيء ولو عدل تعديل قوي يكون كإعادة تصميم لأَن الموافقات تعاد والمفروض الأتعاب تحدد مرة ثانية وبشروط واضحة في جزئيات العقد

كذلك الخدمات يحددها المكتب بوضوح وفي حال توزيع الأثاث المبدئي يذكر وتصميم الفراغات الداخلية تصميم متكامل يذكر كذلك بوضوح ولأي الحدود

مرحلة مهمة اللي هي مرحلة إدارة المناقصة .. وكلمة مناقصة تستخدم للكل حتى الشخص العادي وهذي تعتبر أهم مرحلة يعرف فيها العميل تكلفة مبناه وشلون بيكون كشكل وكتشطيبات وجودة ويعرف شاللي عليه واللي على المقاول ويعرف المقاول الرئيسي والمقاولين المختصين والثانويين أما يعينهم الرئيسي أو هو يسعى في العقود المنفصلة ويحدد دور المقاول الرئيسي والثانوي

على سبيل المثال المالك حاب يتعاون مع منجرة معروفة ويبغي يدير العملية كعقد بنفسه والتنفيذ أثناء أو بعد الصبغ .. وعلى فرض بعد البرايمر وقبل الصبغ والصبغ عقده بيكون مع المقاول الرئيسي .. يتم في هذي المرحلة تحديد حماية الأعمال الخشبية من قبل المقاول الرئيسي والتعاون مع المقاول الثانوي ( النجار ) ونفس الشيء بالنسبة للألمنيوم أو الحديد أو توريد المواد وتركيبها على المقاول وذكر طريقة التركيب وتفاصيل التركيب بوضوح

بعد توضيح العقد شامل الرسومات والمواصفات وأي تعديلات وتركيز على المواصفات العامة للبناء توضح بصيغة هندسية واضحة وبلغة الهندسة الانجليزية مع ترجمة مساوية بالعربي ولو اختلف على الترجمة يرجع للأصل .. وممكن نضمن العقد حساب كميات مفصل يكون متماشي مع الرسومات والمواصفات وموضح دور المقاول بالكامل والدفعات تكون على أساسه أفضل بكثير من الطرق العادية

الإشراف ركن مهم جداً ومهم المكتب اللي صمم هو يشرف لأَن خلال الإشراف يتم تدارك أي قصور في التصميم وتكون مسؤولية المكتب أكبر ولازم يلتزم بالمشروع بالكامل ومكسبه من البداية في العقد بشكل كامل أفضل من عمل اتفاق ثانوي مع مكتب ثاني

نقطة مهمة في عقد التصميم - المناقصة - الاشراف اللي هي يحق للمالك الانسحاب من أي مرحلة قبل بدئها والمكتب ياخذ دفعاته حسب انتهاء كل مرحلة ( يفترض ) لكن غالبية المكاتب تاخذ حقها أول بأول وواجب جهاتنا الرقابية والتشريعية في هذي العملية شبه مفقود .. بما معناه انا ابغي اشوف تصميم مبدئي جداً يناسب الموقع والمساحة عندي وطلباتي كذلك .. هذا يفترض جهد أولي من المكتب ويتم الاتفاق على الأتعاب بعده .. لكن عندنا استوت المكاتب ادفع قبل لنرسم أي خط

العملية تحتاج لتنظيم أكثر واتمنى المعلومات هذي توصل وزير البلدية .. المشكلة الموجودين في تقنين هذي العملية مهندسين غالبيتهم عندهم مكاتب وكثير يديرونها بالباطن ويدورون حقهم وبس حق المواطن ما يهمهم ونظافة الشغل الهندسي ما يلتزمون بها .. الالتزام يعني جهد أكبر وعدد موظفين مناسب وخسارة وقت كبير .. هم يبون يخلصون بسرعة وأي كلام لذلك يوصلون معلومات بسيطة لكبار المسؤولين ولا يشتغلون الا لصالح مكاتبهم

[بن مفتاح]

الله يجزيكم خير .. ما قصرتوا .. لا خلا ولا عدم ..

السموحة في تأخري بالرد .. كنت في زيارة خاصة بالشغل وما انتهيت منها الا الخميس .. وان شاء استفيد من شوركم ومن ردودكم .. وما خاب من استشار .. وباذن الله ارسل اسم المكتب لأخوي معماري قطر .. والله يجزيكم عني كل خير .. والشكر موصول لمن راسلني على الخاص ..

[معماري قطري]

مثل ما شرحت فوق اخوي بن مفتاح ولو إنه شرح طويل بس المكتب المتمكن يشرح لك الخطوات والعقد حتى تكون متطمن وعارف شيصير

البند المالي يجيك مقسم على فترة العقد كاملة جزء مقدم قبل كل مرحلة

زرت مكاتب ما تحصل موقف لسيارتك ولو دخلت وانت جاي بموعد تحصل اللي يسمونه مهندس قاعد في بارتشن ضيق ومفتوح من فوق وصوته عالي مع عميل غيرك .. تنتظر فترة يخلص العميل الثاني وتدخل انت وتحصل اللي يسمونه مهندز مشغول مع تلفونات وشغلات مكتبية يراكض وراها ويخليك ولا يركز معاك ولا تتذكر شكنت تبي ويمكن من عشر نقاط تصيد ثنتين .. كراسيهم مكسرة من سوق الحراج وحتى اللي هناك وايد أحسن .. واللي يسمونه مهندز كل شوي ويقول لك حنعدل لك وقت التنفيذ

هذا اللي فوق موقف صار لي مع مكتب درجة اولى معينه اخوي وكنت اروح اراجع معاه ولشغلاته وترجيته يخليهم قال لا وفي النهاية دفعوه فوق المليون ريال على شغلات غير مغطاة في الرسم والعقد وتغييرات هم أقنعوه بها وقت البنيان

مكتب ثاني لا غير المواقف متوفرة والإدارة متطورة .. تحصل إسمك عند السكرتاريا وينادون اللي لك موعد معاه .. ياخذك لقاعة اجتماعات هادية بأثاث جيد ومريح ويكون مجهز وثائق العمل وتخلص معاه بسهولة وأي تعديلات يناقشها معاك ويضمنها وينفذ كل شيء بحرفية ما يوافقك وبس وبعدين يقول لك ما انته أولت لي .. يقول لك شمساؤي إختيارك ويترك لك القرار ويعطيك البدائل الأفضل ويوثق كل شيء في ملف المشروع .. يرتب لك التفاوض مع المقاولين ويساعدك في إختيار الأفضل وفي النهاية تكون عارف شاللي لك واللي عليك وتستلم بنيانك مثل ما هو مخطط له .. أما اللي قبل يكون الفرق بالزيادة حول 25% غير عن الزيادة اللي إنت دافعها في خرسانات فوق الحاجة وتصميم تعيس

[بو راشد 1]

بو مفتاح،

ترى معماري قطري رفيجي من ايام الثانوية.

بو عبدالله،

كل يوم الثلاثاء بعد صلاة العشاء، نجتمع انا و بو مفتاح و بعض الشباب في المجلس، ايش رايك تمر علينا و تتواجهه مع بو مفتاح وتشرح له مباشرة.

[معماري قطري]

بو مفتاح،

ترى معماري قطري رفيجي من ايام الثانوية.

بو عبدالله،

كل يوم الثلاثاء بعد صلاة العشاء، نجتمع انا و بو مفتاح و بعض الشباب في المجلس، ايش رايك تمر علينا و تتواجهه مع بو مفتاح وتشرح له مباشرة.

والله يا اخوي بإذن الله بيننا اتصال وهذي الساعة المباركة نتعرف عليك مرة ثانية وعلى الربع اللي معاك بكرة إن شاء الله .. وباسجل ملاحظة عندي وانت ذكرني بعد

[معماري قطري]

بو راشد شكلي نسيت شكلك من الفترة الطويلة اللي ما شفتك فيها .. 23 سنة مب شوي .. فضحنا نفسنا الكل بيقول شياب

[بن مفتاح]

نتشرف بشوفتك اخوي بو عبدالله عند اخونا بو علي .. وهذي الساعة المباركة نكسب اخو جديد .. والله يجزي كل من شاركنا الرأي والمشورة .. ولا خلا ولا عدم من الجميع ..



والشيب غزانا وغزاكم .. ويقولون الشيب ما هو عيب ..
والحمد لله على نعمة الصحة والعافية والأمن والدين .. والله يحفظ قطر وكل دول الاسلام والمسلمين
وجزاكم الله عني كل خير ..

[معماري قطري]

نتشرف بشوفتك اخوي بو عبدالله عند اخونا بو علي .. وهذي الساعة المباركة نكسب اخو جديد .. والله يجزي كل من شاركنا الرأي والمشورة .. ولا خلا ولا عدم من الجميع ..



والشيب غزانا وغزاكم .. ويقولون الشيب ما هو عيب ..
والحمد لله على نعمة الصحة والعافية والأمن والدين .. والله يحفظ قطر وكل دول الاسلام والمسلمين
وجزاكم الله عني كل خير ..

لي الشرف يا اخوي ودوم إن شاء الله أهل قطر مجتمعين على خير