معقولة ؟؟ !!! لين الحين ؟ طيب وبعدين ؟

[غريب الدّار]

حذرت دراسة أجرتها جامعة دولة قطر من ارتفاع الديون الشخصية للمواطنين القطريين، حيث زادت أعداد الأشخاص المقترضين لمبالغ كبيرة من البنوك المحلية، وتعثر البعض عن سداد أقساطها.
وقال لوران لامبرت، من معهد البحوث الاقتصادية والاجتماعية بجامعة قطر، إن "فكرة أن القطريين هم قلة صغيرة محظوظة وسعيدة أصبحت مجرد أسطورة".
وظهرت في قطر مؤخرا مشكلة تزايد الديون، التي يسحبها المواطنون من البنوك المحلية في شكل بطاقات ائتمان، وعجز البعض عن سداد أقساطها.

ونوقشت المشكلة في برامج حوارية إذاعية، وعلق عليها كتاب صحفيون وخطباء المساجد.
وأضاف لامبارت: "الكثيرون لا يملكون الدخل الكافي لتلبية متطلبات نمط الحياة التي يعيشونها، ونسبة صغيرة تعتبر فقيرة للغاية وفقا للمعايير المحلية، وتعاني من أجل تغطية نفقات المعيشة".
ويبلغ عدد المقيمين في قطر نحو2.4 مليون شخص، معظمهم من العمال الأجانب، بينما يبلغ عدد المواطنين نحو 300 ألف شخص فقط، وهؤلاء هم الذين يسمح لهم بالحصول على قروض بنكية ميسرة.
ولم تنعكس الرواتب الحكومية الهائلة، ووجود نظام مجاني للتأمين الصحي، بشكل إيجابي على أرصدة المواطنين لدى البنوك، وذلك بسبب حياة البذخ التي يعيشونها.
ويرى بعض القطريين أن من أسباب المشكلة الازدهار الاقتصادي للبلد، خلال فترة ارتفاع أسعار الطاقة التي استمرت حتى منتصف عام 2014، ما أدى لارتفاع مستويات المعيشة ومضاعفة تطلعات المواطنين.
ويعد الإنفاق على اقتناء أحدث إصدارات الهواتف الذكية، وأحدث الأزياء لحفلات الزفاف، والسفر لقضاء العطلات، من أهم مظاهر البذخ لدى المواطنين القطريين.
وتتعمق المشكلة مع انخفاض أسعار الطاقة عالميا، الأمر الذي يعني أن الدولة في قطر ستصبح أقل سخاء.
ورغم ذلك، فإن المشكلة لا تبدو حتى الآن كتهديد على النظام المالي للدولة عموما.
ويبلغ عدد الأسر القطرية المستدينة من البنوك نحو 75 في المئة من إجمالي الأسر، وأغلبهم مدين بأكثر من 250 ألف ريال قطري، أو ما يوازي 68.7 ألف دولار، وفقا لتقرير حكومي لعام 2014.
ولم يعجز سوى عدد قليل من هذه الأسر عن سداد مديونياتهم، وهي جريمة يعاقب عليها بالسجن.
لكن تسريح بعض الموظفين الحكوميين وانخفاض أسعار الطاقة لفت الأنظار إلى مشكلة المديونية، وما قد يصحبها من تهديد للتماسك الاجتماعي، إذا ما ضغط هؤلاء المدينون على أقاربهم أو على الحكومة لطلب المساعدة.
وتوسعت البنوك في سياسات الإقراض، مدفوعة بفورة الأصول المالية، التي نتجت عن النمو الاقتصادي المتسارع، ومددت فرص الإقراض للأسر الراغبة في قضاء عطلة أو شراء سيارة جديدة.
وحصلت تلك الأسر على قروض بأضعاف راتبها، دون ضمانات حقيقية.



المصدر :
http://www.bbc.com/arabic/business/2016/03/160303_qatar_loans_business?ocid=socialflow_twitte r



تعليق غريب الدّار :
ماأنكر اني استغربت والله اول ماقريت الخبر !!
لأني اعتقدت ان الكل (او مجموعة كبيرة ) وعت الدرس والكل خفف من موضوع السلفيات !


ماراح ادخل في تفاصيل اكثر الحين
مع انها كثيرة


وبعد اذنكم راح اكتب كم محور ، أتمنى النقاش يظل حولهم ، واللي يبي يتكلم عن أي نقطة خارج هالمحاور بس لها علاقة مباشرة بالموضوع يامرحبا به :

1- سبب الديون والسفلفيات هاذي من وجهة نظركم ؟ البطرة الزايدة ؟ قلة التدبير ؟

2- هل تشوفون ان الأوضاع الحالية هي احسن أوضاع اقتصادية ممكن تمر على البلاد وممكن الشخص يوفر فيها ؟

3- هل تشوفون ان الغلاء يستنزف الدخل بشكل قوي مما يضطر الفرد الى السلف؟ (هاذي انا غير مقتنع فيها اطلاقا لكن طرحتها لانها تشكل نقطة قد يتساءل او يطرحها البعض)؟

4- هل تشوفون ان معظم الأساسيات متوفرة ولله الحمد وان صرفنا الأكثر على الكماليات ؟

5- بالنسبة للرواتب : من يشوفها قوية ومن يشوفها العكس ؟

6- هل تعتقدون ان الظروف الاقتصادية والرخاء الاقتصادي يمكن يكون دافع ورا استهتار البعض وعدم اكتراثه في الصرف؟

7- ندري ان في أمور قد نتفق على انها مبالغ فيها (مثال : المقاولين وأسعار البناء ، السيارات او بعض السيارات ) لكن هل تعتقدون ان الصرف الزايد عليهم له مايبرره؟ مثال : شخص اسرته مكونة من اربع اشخاص ، يبني بيت حق عشر اشخاص وعقب يقول البنيان غالي ) طبعا هذا مجرد مثال المقصودفيه : هل فعلا احنا بحاجة لكل مانشتريه ؟ واضرب لكم مثال ثاني : احنا ندري ان صعب الواحد يصرف اموره في قطر بدون سيارة ، متفقين على هالشي ، طيب هل السيارة هاذي شرط تكون رنج روفر ولا بي ام مثلا؟ اعتقد المثال واضح

(محاور عامة واللي عنده إضافة اشكره عليها مقدما )


والله يكتب اللي فيه الخير

[Riku3]

ما قصر اخونا "لوران لامبرت" من جامعة "قطر" حط يده على الجرح . :rolleyes2:


1- سبب الديون والسفلفيات هاذي من وجهة نظركم ؟ البطرة الزايدة ؟ قلة التدبير ؟
اكثر اسبابها بنظري هو محاولة الفقير او ميسور الحال مجاراة الاغنياء .


2- هل تشوفون ان الأوضاع الحالية هي احسن أوضاع اقتصادية ممكن تمر على البلاد وممكن الشخص يوفر فيها ؟
ما باقي الا تيسير الحصول على اراضي للشباب ... وكل واحد يمد ريوله على حق اللحافه وبيعيش كريم واموره طيبه .


3- هل تشوفون ان الغلاء يستنزف الدخل بشكل قوي مما يضطر الفرد الى السلف؟ (هاذي انا غير مقتنع فيها اطلاقا لكن طرحتها لانها تشكل نقطة قد يتساءل او يطرحها البعض)؟
مب شرط الغلاء كثر ماهو تصرفات الافراد .. ماعندك فلوس مب شرط تسافر كل اجازة :] .


4- هل تشوفون ان معظم الأساسيات متوفرة ولله الحمد وان صرفنا الأكثر على الكماليات ؟
الحمد لله .


5- بالنسبة للرواتب : من يشوفها قوية ومن يشوفها العكس ؟
قوية بس انعكست على الكل سلباً بسبب ارتفاع الاسعار .. بس الحمد لله الامور طيبه .


6- هل تعتقدون ان الظروف الاقتصادية والرخاء الاقتصادي يمكن يكون دافع ورا استهتار البعض وعدم اكتراثه في الصرف؟
جداً .. اعرف "يهال" من اول راتب خذو موتر بمبلغ وقدره .. وتلاقيه نفسه بيبيعه بخساره وبياخذ موتر جديد بعده بسنتين بالكثير وهو ما دفع ربع المديونيه .. ما يفكر بتراكم الفوايد عليه ويحسب الموضوع لعب .

[عـ العبيدلي]

كلامه 100% ,,

من وجهة نظري ,,

اول شي الاستهانة بالديون الربوية ..

ثاني شي حياة البذخ الي مالها داعي ,, شي تعدا المنطق ووصل للجنون من وجهة نظري ,,

ثالث شي .. الحصول على الفلوس بدون مشقه ( يعني ) وايد ( مب الكل ) يحصلون المبالغ بدون ما ينكرف على ويهه يعني
ياخذ أكثر من ما يعطي

رابع شي الغلاء قاعد يزيد ليش !؟ لانه التجار يشوفون انه الشعب ماعنده مشكلة بيدفع ولو شفت محل مثلا رفع الأسعار ومحد شرا منه
غصب بينزل سعره .. مثلا سعر اللكزس وصل قريب 450 و قاعد يزيد انتشاره
وقيس على باقي الأشياء حتى الدياي مايونيز كان بريالين صار ب 4 فبعض المعاصر والناس للحين تشتري :)

[الدكتور عزوز]

1- سبب الديون والسفلفيات هاذي من وجهة نظركم ؟ البطرة الزايدة ؟ قلة التدبير ؟



فيه حالات معينة سببها البطرة الزايدة ، لكن اخي الكريم خلنا نكون واقعيين شوي ، شوارع الدوحة تعبانة اذا عندك سيارة صالون راحت فيها (وانا اتكلم عن تجربة شخصية) تحتاج سيارات دفع رباعي عشان تسوقها بدون ما تسبب اضرار لهيكل السيارة ، وافضل السيارات من ناحية خدمات ما بعد البيع هي الكروزر لآن السيرفس الخاص بها ممكن عمله في اي مكان وسعره الافضل بحسب تجربتي

لكن لما تجي تشتري كروزر السعر يبدأ من 200 ألف وطالع ، طبعا لما يجيك شخص توه متوظف أكيد بياخذها بالاقساط

لما يجيك شخص متزوج وتم تخصيص الارض له ، لكن البناء تأخر لأن ترخيص البناء ما طلع وبناء عليه ما عطوه قرض البناء إلى الآن وصارله 3 سنوات او اكثر (اتكلم عن اكثر من صديق لي يواجهون نفس المشكلة) ، وصعبة يسكن في بيت اهله لأن بيت اهله صغير وفعلا يحتاج يستأجر ، وأقل سعر للإيجار فوق 15 ألف وهو راتبه كله على بعضه ما يوصل 20 ألف ايش يقدر يسوي غير انه يلجأ للدين؟




2- هل تشوفون ان الأوضاع الحالية هي احسن أوضاع اقتصادية ممكن تمر على البلاد وممكن الشخص يوفر فيها ؟



الاوضاع الحالية من وجهة نظري ليست جيدة على الاطلاق ، ولازم الشخص قد ما يقدر يحاول يوفر لو على الاقل 1000 او 2000 ريال ، مع انه الافضل ان كل شخص يحط 25% من رابته شهريا في حساب توفير وما يمسكه الا للضرورة القصوى.




3- هل تشوفون ان الغلاء يستنزف الدخل بشكل قوي مما يضطر الفرد الى السلف؟ (هاذي انا غير مقتنع فيها اطلاقا لكن طرحتها لانها تشكل نقطة قد يتساءل او يطرحها البعض)؟



اي نعم من وجهة نظري الغلاء يستنزف دخل الفرد ، والدليل رحلات العوايل للاحساء والدمام لشراء مستلزماتهم بحكم ان السعر ارخص هناك ، سبب ارتفاع السلع الاستهلاكية وسلع تجارة التجزئة بشكل عام هو ارتفاع اسعار الايجارات بشكل مبالغ فيه ، والتاجر يحتاج أنه يحافظ على هامش ربح معين فيضطر يرفع اسعاره كل ما زاد صاحب العقار الايجار عليه ، لأن في الاخير اصحاب العقارات فيهم جشع غير طبيعي ، ويرفع الايجارات بشكل دوري عشان يستثمر في عقارات ثانية ويرفع السعر فيها ويستثمر في عقارات ثالثة ،،،، وانت ماشي




4- هل تشوفون ان معظم الأساسيات متوفرة ولله الحمد وان صرفنا الأكثر على الكماليات ؟



الاساسيات نعم متوفرة ، الدولة ولله الحمد وفرت المواد التموينية ووفرت المساكن للمواطنين ووفرت اشياء كثيرة ، المشكلة تأخر انتهاء الموافقات والمعاملات الحكومية تزيد الأعباء على المواطن لفترات تصل لسنوات




5- بالنسبة للرواتب : من يشوفها قوية ومن يشوفها العكس ؟



الرواتب قوية لما تسمعها كرقم ، تعال ترجمها في ارض الواقع وشوف التكاليف المرتفعة عندنا بتحس أن الرواتب في قطر متوسطة




6- هل تعتقدون ان الظروف الاقتصادية والرخاء الاقتصادي يمكن يكون دافع ورا استهتار البعض وعدم اكتراثه في الصرف؟



ما فيه رخاء اقتصادي في الوقت الحالي ، فيه البعض من اصحاب الدخل المتوسط يحاولون يجارون أصحاب الدخل المرتفع جدا ً ويسببون على نفسهم مصاريف مالها أول من آخر ومن ثم ديون متراكمة

وبعدين يقولون اهل قطر يمشون ورى الزبو ، انا ما شفت بحياتي الا اعداد محدودة من هذا النوع ولكن للأسف الجميع اصبح يعمم أن اهل قطر يتدينون عشان الكشخة ، وانا اشوف ان نسبة بسيطة فقط من ها النوع لكن الاغلب لا




7- ندري ان في أمور قد نتفق على انها مبالغ فيها (مثال : المقاولين وأسعار البناء ، السيارات او بعض السيارات ) لكن هل تعتقدون ان الصرف الزايد عليهم له مايبرره؟ مثال : شخص اسرته مكونة من اربع اشخاص ، يبني بيت حق عشر اشخاص وعقب يقول البنيان غالي ) طبعا هذا مجرد مثال المقصودفيه : هل فعلا احنا بحاجة لكل مانشتريه ؟ واضرب لكم مثال ثاني : احنا ندري ان صعب الواحد يصرف اموره في قطر بدون سيارة ، متفقين على هالشي ، طيب هل السيارة هاذي شرط تكون رنج روفر ولا بي ام مثلا؟ اعتقد المثال واضح



أخي الكريم لا أعتقد ان الصرف الزايد في المجالات اللي ذكرتها في محله واعتقد صعبة نعمم على الجميع

والدليل أن اكثر البيوت في قطر بيوت عادية ومسوينها بحسب شروط الاسكان الحكومي
والبيوت اسعار البنيان غالة جدا ً يعني بالضبط قبل 11 سنة كانت تكاليف بناء البيت الشعبي بين 300 إلى 400 ألف ، الحين لو بتحسب تكاليف بناء نفس البيت بنفس المواصفات مب اقل من مليون وهذي زيادة قدرها 130% . احنا نتكلم عن عقد واحد من الزمن ما نتكلم عن عقود أو قرون ، أعتقد ان الامكانيات موجودة لدراسة اسباب ارتفاع الاسعار خلال 10 سنوات ومن ثم وضع خطة عمل لتحديد الطرق البديلة لخفض التكاليف.


وايضا اكثر السيارات انتشارا في قطر هي الكروزرات ، وهذا يعني ان اغلب الشعب يبي يستعمل الشي المعقول ، اما اصحاب الرنجات وغيرها من السيارات الفارهة الله يزيد نعمتهم اذا كانوا ماخذينها وهم قد التكاليف ، واذا كانوا ماخذينها وهم ما يقدرون عليها بعد الله يعينهم على تكاليف خدمات ما بعد البيع

[بوخميس]

زادت الرواتب ولله الحمد

الدولة وضعت نظام ما يسمح بالاقتراض من أكثر من بنك (مركز قطر للمعلومات الائتمانية)

حطت سقف للديون ما تتجاوز 6 سنوات وما تتعدى 75% من الراتب الاساسي والعلاوة الاجتماعية.

لكن في المقابل، الناس قبل كانت تروح الحسا ودبي، الحين تروح زيلامسي وفيينا وبرشلونة

النعم زوالة

[غريب الدّار]

الأخ الكريم ريكو 3 :

ما قصر اخونا "لوران لامبرت" من جامعة "قطر" حط يده على الجرح .
من ذيه ؟


اكثر اسبابها بنظري هو محاولة الفقير او ميسور الحال مجاراة الاغنياء .

هاذي مصيبة حقيقية والله ياخوي ريكو
مع العلم اني اشوف حتى ميسورين الحال يقدرون يعيشون احلى عيشة بس بعقل
مب شرط كل الناس يصيرون نفس المستوى(ولا راح يصير هالشي لان الله خلقنا درجات) ولازم يكون في تفاوت
عاد من يسمع


ما باقي الا تيسير الحصول على اراضي للشباب ... وكل واحد يمد ريوله على حق اللحافه وبيعيش كريم واموره طيبه .

والله ياريكو حتى الأراضي الحمدلله ميسرة (قصدي من الدولة ) طبعا بدون الدخول في تفاصيل مستحق وغير مستحق
قد تكون هاذي احدى المشاكل
بس بصراحة : هل تعتقد ان كل اللي يتسلفون علشان أراضي ضابطين امورهم الثانية من ناحية الصرف؟
خصوصا ان الدراسة تقول ان الصرف على الكماليات هو المشكلة
وليس الأساسيات


مب شرط الغلاء كثر ماهو تصرفات الافراد .. ماعندك فلوس مب شرط تسافر كل اجازة :] .

هذا كلام العقل
اشكرك


قوية بس انعكست على الكل سلباً بسبب ارتفاع الاسعار .. بس الحمد لله الامور طيبه .


يعني قصدك الأمور ماتستحق الاقتراض المبالغ فيه ؟


جداً .. اعرف "يهال" من اول راتب خذو موتر بمبلغ وقدره .. وتلاقيه نفسه بيبيعه بخساره وبياخذ موتر جديد بعده بسنتين بالكثير وهو ما دفع ربع المديونيه .. ما يفكر بتراكم الفوايد عليه ويحسب الموضوع لعب .
اعتقد اخوي ريكو ان سبب ذلك هو انعدام الثقافة الاستهلاكية
في ناس تفكر ان : دام راتبي قوي
واقدر اتسلف
اذن : اصرف مافي الجيب ياتيك مافي الغيب

ويظل طول عمره مديون


في النهاية اشكرك جزيل الشكر على مشاركتك الكريمة اخوي

[غريب الدّار]

مرحبا العبيدلي

كلامه 100% ,,

من وجهة نظري ,,

اول شي الاستهانة بالديون الربوية ..

وجهة نظرك على العين والراس ياولد العبيدلي

لكن يعني لو كانت قروض إسلامية عادي الواحد يستهين فيها ؟
كلها قروض يابن الحلال وكلها على الظهر :)



ثاني شي حياة البذخ الي مالها داعي ,, شي تعدا المنطق ووصل للجنون من وجهة نظري ,,

قد يختلف البعض مع هالنقطة اخوي العبيدلي
لكن اعتقد ان الكثيرين يوافقون عليها او الأكثرية (اعتقد والله اعلم)


ثالث شي .. الحصول على الفلوس بدون مشقه ( يعني ) وايد ( مب الكل ) يحصلون المبالغ بدون ما ينكرف على ويهه يعني
ياخذ أكثر من ما يعطي

هاذي نقطة في غاية الحساسية يالعبيدلي
وبصراحة قد تشخص الموضوع بكل دقة
بس اعتقد لو تعمقنا فيها لازم نفتح موضوع ثاني
واشكرك على ابداءها


رابع شي الغلاء قاعد يزيد ليش !؟ لانه التجار يشوفون انه الشعب ماعنده مشكلة بيدفع ولو شفت محل مثلا رفع الأسعار ومحد شرا منه
غصب بينزل سعره
كلامك صحيح
وهاذي الثقافة الاستهلاكية اللي يجب ان يتم ضبطها بالوعي


مثلا سعر اللكزس وصل قريب 450 و قاعد يزيد انتشاره
وقيس على باقي الأشياء حتى الدياي مايونيز كان بريالين صار ب 4 فبعض المعاصر والناس للحين تشتري
صحيح 100% ، وعلى فكرة في سلع اعتقد كل مايزيدون سعرها بتجذب ناس اكثر واكثر :rolleyes2:

بس ياخي اشتر لك لحم مايونيز وخل الدياي:nice:


ويامرحبا بك الشيخ

[BUHASSEN]

والله ياخوي الدين هم ومشكله من المشاكل الي تواجه الغالبيه خل نقول اسبابها كثيره ومن وجهة نظري في ثلاث اشياء:

بناء منزل او ارض ..
شراء سياره..
سفر...

هالامور الي ذكرتها تحتاج دايما سيوله الراتب مايقدر يوفرها يعني الراتب مثلا 30000 المصاريف الشهريه تقريبا مابين 15 ال 20 الف علي حسب الاسره وافرادها

بغيت اشتري سياره متوسط السيارات من 150 وطالع الجأ للسلفيه ... وقس علي ذلك.


توفر السيوله له دور كبير في زياده الديون والامور التراكميه واحد اشتغل توه ويبغي سياره خذ سلفه 200 الف نفرض مع الارباح وكذا وصلت 240 الف بعد سنتين او 3 يبي يتزوج خذ علي العنده او سو اعاده جدوله عشان العرس

وجدد قرض جديد ومده جديده وقس علي ذلك.

طبعا هاي من الاسباب مب كلها الزبو والي ياخذ فوق الحاجه هاي بعد له دور.


سياسة التوفير من البدايه خاصه الواحد اذا توه توظف تساعدك كثير في باقي حياتك في البدايه ماعندك التزامات كبيره كلها مصاريف فالتوفير يكون سهل وتكون بديت صح.

والله يفرجها علي جميع المسلمين من الديون

[القلب المؤمن]

شكرا على موضوعك المهم
من وجهة نظري فعلا المواطن القطري مظلوم وغير سعيد، ببساطه لان الدولة غنية وعدد مواطنيها ظ£ظ*ظ* الف نسمة !!
رواتب قوية لاقيمة لها بجانب ارتفاع الاسعار الجنوني واستنزاف المواطن ماليا ..
عدم قدرة المواطن الحصول على ابسط حقوقه من مسكن مستقل حيث ان العقارات اسعارها جنونية احتكار التجار في كل النواحي واسعار السلع في الدولة والقلة في تنوع المعروض !!
القروض التي ياخذها المواطن ليست جميعها بغرض المفاخرة وانما لاحتياجات قد تكون منطقية جدا مقارنة بالدول الاخرى..
للاسف يا سادة نحن نعيش تخبط وعشوائية في تنظيم حياة المواطن الذي سلبت حقوقه في امور كثيره ولايزال ينتظر الفرج من رب العالمين..
وااتمنى كل من يرد عالموضوع ويعلق ان يتذكر عدد المواطنين (ظ£ظ*ظ*) الف في دولة تعتبر من اغنى دول العالم..انتهى

[الماريّة]

1- سبب الديون والسفلفيات هاذي من وجهة نظركم ؟ البطرة الزايدة ؟ قلة التدبير ؟
كثره السلفيات وقله التدبيير



2- هل تشوفون ان الأوضاع الحالية هي احسن أوضاع اقتصادية ممكن تمر على البلاد وممكن الشخص يوفر فيها ؟

نعم يجب على كل شخص التوفير وخصوصا في هالاوضاع


3- هل تشوفون ان الغلاء يستنزف الدخل بشكل قوي مما يضطر الفرد الى السلف؟ (هاذي انا غير مقتنع فيها اطلاقا لكن طرحتها لانها تشكل نقطة قد يتساءل او يطرحها البعض)؟

مش ضرروي الغلاء يكون سبب للسلف
ياخذ الشخص حاجته قد راتبه


4- هل تشوفون ان معظم الأساسيات متوفرة ولله الحمد وان صرفنا الأكثر على الكماليات ؟
نعم ولله الحمد في الاغلب الاسياسيات متوفره واغلب الصرف على الكماليات والبذخ الزايد


5- بالنسبة للرواتب : من يشوفها قوية ومن يشوفها العكس ؟

وبفضل الله الرواتب عاليه وافضل من الدول الاخر


6- هل تعتقدون ان الظروف الاقتصادية والرخاء الاقتصادي يمكن يكون دافع ورا استهتار البعض وعدم اكتراثه في الصرف؟
قله المسؤوليه وتوفير كل المتطلبات من الصغر هي جعلت الاغلبيه مستهتر


7- ندري ان في أمور قد نتفق على انها مبالغ فيها (مثال : المقاولين وأسعار البناء ، السيارات او بعض السيارات ) لكن هل تعتقدون ان الصرف الزايد عليهم له مايبرره؟ مثال : شخص اسرته مكونة من اربع اشخاص ، يبني بيت حق عشر اشخاص وعقب يقول البنيان غالي ) طبعا هذا مجرد مثال المقصودفيه : هل فعلا احنا بحاجة لكل مانشتريه ؟ واضرب لكم مثال ثاني : احنا ندري ان صعب الواحد يصرف اموره في قطر بدون سيارة ، متفقين على هالشي ، طيب هل السيارة هاذي شرط تكون رنج روفر ولا بي ام مثلا؟ اعتقد المثال واضح

لايوجد مبرر للصرف الزايد مع قله الراتب
مد رجولك على قد لحافك



(محاور عامة واللي عنده إضافة اشكره عليها مقدما )


والله يكتب اللي فيه الخير

اللهم امين ويرزقنا الصبر في عدم الصرف الزايد
وشكرا لك اخوي غريب الدار

[Boost]

أتذكر يومني صغير كان ابوي الله يحفظه ويعطيه الصحة والعافية وطول العمر يحاتي مصروفي للمدرسة كل يوم بيومه وكان يروح يتسلف علشان ودام البيت ومستلزمات بسيطة
وعلشان يغطي التزاماته الخارجيه ومايكون حد له منه عليه يروح وياخذ سلفه من البنك

الله يرحم أيام الدكان الإيراني والبيع سلف

وطبعا من تاخذ سلفه بتحصل صاحبك ولا ولد عمك أو الشخص اللي تعرفه معرفة شخصيه وهو موظف البنك المحترم يحاول يقنعك تاخذ غيرها وجدوله وأهم شي عمولته اللي ربك بيحاسبه عليها يوم القيامه

لكن أقول لكل شباب البنوك :) خلها تنفعك قدام رب العالمين هالنسبه اللي خذتها على سلفية المسكين والترقيه اللي خذتها على ظهور هالمساكين

لا وطالعين لي موضه هالأيام

بنك إسلامي !
سلفتي حلال سلفتك حرام

والبنك الفلاني خل ننقل كلنا عليه فلان بيضبطنا وبننقل سلفياتنا تصير كلها حلال

أقول أركد أنت وياه ماوراها خير لا سلفيات إسلامية ولا ربوية

هذا رأيي وليس بفتوى !

[غريب الدّار]

يامرحبا والله اخوي دكتور عزوز


فيه حالات معينة سببها البطرة الزايدة ، لكن اخي الكريم خلنا نكون واقعيين شوي ، شوارع الدوحة تعبانة اذا عندك سيارة صالون راحت فيها (وانا اتكلم عن تجربة شخصية) تحتاج سيارات دفع رباعي عشان تسوقها بدون ما تسبب اضرار لهيكل السيارة ، وافضل السيارات من ناحية خدمات ما بعد البيع هي الكروزر لآن السيرفس الخاص بها ممكن عمله في اي مكان وسعره الافضل بحسب تجربتي
احترم وجهة نظرك اخوي
بس يعني كل اللي عندهم صوالين متبهدلين مثلا؟ صوالين وايد نشوف في الدوحة
وانا معاك فعلا ان المواتر الكبيرة مثل الكروزر افضل ويعمّر
بس السؤال : اللي ماعنده ، ليش يبهدل عمره ؟ وبعدين افرض انه لازم يأخذ له كروزر
هل لازم في اكس آر ملا؟ ولا جي اكس ار يكفي؟ ولا جي اكس؟
هالامور الدقيقة هي اللي تفرق اخوي دكتور عزوز
لان الكل يقول نفس الكلام : يقول لك شوارع الدوحة مايمشي فيها الصالون
هالكلام ان سلمنا به (مع ان في مواتر وايد صالون تمشي وعادي) انزين شالله حادك تأخذ لك في اكس آر مثلا؟
هذا هو السؤال اللي يجب ان يطرح
هذا طبعا مثل ماقلت لك اخوي دكتور عزوز لو سلمنا بوجهة النظر القائلة ان الصالون مايمشي في الدوحة


لكن لما تجي تشتري كروزر السعر يبدأ من 200 ألف وطالع ، طبعا لما يجيك شخص توه متوظف أكيد بياخذها بالاقساط
هالنقطة مرتبطة بالنقطة الأولى تقريبا
وبشكل عام : المفروض كل واحد يكون عارف امكانياته ويتصرف على أساسها


لما يجيك شخص متزوج وتم تخصيص الارض له ، لكن البناء تأخر لأن ترخيص البناء ما طلع وبناء عليه ما عطوه قرض البناء إلى الآن وصارله 3 سنوات او اكثر (اتكلم عن اكثر من صديق لي يواجهون نفس المشكلة) ، وصعبة يسكن في بيت اهله لأن بيت اهله صغير وفعلا يحتاج يستأجر ، وأقل سعر للإيجار فوق 15 ألف وهو راتبه كله على بعضه ما يوصل 20 ألف ايش يقدر يسوي غير انه يلجأ للدين؟

أولا : لاحظ ان الدراسة أصلا تكلمت عن أمور ثانية وهي الصرف على الكماليات :)

ثانيا : الظروف اخوي محد يقدر يتحكم فيها آمنا بالله
لكن هل كل الناس جذيه ؟
وبعدين كم عدد القطريين المتزوجين اللي رواتبهم 20 ؟ :) ادري موجودين
ب كم نسبتهم مقارنة باللي رواتبهم اعلى واعلى

وموضوع الدراسة كانت عن اللي يصرف رابته على الكماليات سواء عشرين الف او عشرين مليون
ومع هذا يادكتور عزوز احترم وجهة نظرك واثني عليها لان فعلا الظروف محد يقدر يتحكم فيها
والكلام دائما يكون له طابع عام


الاوضاع الحالية من وجهة نظري ليست جيدة على الاطلاق ، ولازم الشخص قد ما يقدر يحاول يوفر لو على الاقل 1000 او 2000 ريال ، مع انه الافضل ان كل شخص يحط 25% من رابته شهريا في حساب توفير وما يمسكه الا للضرورة القصوى
وجهة نظرك اخوي على عيني وراسي ويجب ان يتم احترامها
بس ممكن تبين ليش يادكتورنا العزيز ؟ ليش ليست جيدة على الاطلاق؟


اي نعم من وجهة نظري الغلاء يستنزف دخل الفرد ، والدليل رحلات العوايل للاحساء والدمام لشراء مستلزماتهم بحكم ان السعر ارخص هناك ، سبب ارتفاع السلع الاستهلاكية وسلع تجارة التجزئة بشكل عام هو ارتفاع اسعار الايجارات بشكل مبالغ فيه ، والتاجر يحتاج أنه يحافظ على هامش ربح معين فيضطر يرفع اسعاره كل ما زاد صاحب العقار الايجار عليه ، لأن في الاخير اصحاب العقارات فيهم جشع غير طبيعي ، ويرفع الايجارات بشكل دوري عشان يستثمر في عقارات ثانية ويرفع السعر فيها ويستثمر في عقارات ثالثة ،،،، وانت ماشي

انا معاك ان الحسا ارخص
بس على فكرة اخوي ماعادت نفس ذاك الرخص اللي انت خابر
حتى السلع الاستهلاكية صارت أسعارها ترتفع وتقارب الدوحةفي بعض الشغلات

لكن بشكل عام ارخص انا معاك
وكون الناس يروحون الحسا يادكتور عزوز مايعني ابدا (من وجهة نظري ) ان الوضع غير جيد حتى وان كان هناك غلاء في قطر

تدري ليش؟
يمكن هالناس اللي يروحون الحسا يحبون يوفرون (وهذا من حقهم) في بعض الشغلات :)
يقول لك ليش اشتري الشغلة هنيه بألف ريا مثلا وهناك اقدر اخذها باربعمية مثلا ؟
يمكن هاذول يحبون يمدون ريولهم على قد لحافهم
او مايحبون الصرف الوايد
او مايبون يصرفن على أشياء يشوفن انهم يقدرون ياخذونها بأسعار ارخص


الاساسيات نعم متوفرة ، الدولة ولله الحمد وفرت المواد التموينية ووفرت المساكن للمواطنين ووفرت اشياء كثيرة ، المشكلة تأخر انتهاء الموافقات والمعاملات الحكومية تزيد الأعباء على المواطن لفترات تصل لسنوات

تأخر انتهاء الموافقات ؟ اخوي انت تكلمت عن نقطة وحدة اللي هي السكن (وهاذي على فكرة مب دايما تصير وانت عارف )
شنهي الموافقت لثانية اللي تتكلم عنها؟


الرواتب قوية لما تسمعها كرقم ، تعال ترجمها في ارض الواقع وشوف التكاليف المرتفعة عندنا بتحس أن الرواتب في قطر متوسطة
والله اخوي اسمح لي اختلف معاك
الرواتب قوية كرقم وكقوة شرائية
احنا اللي احلامنا تخطت واقع رواتبنا
انا لازلت اشوف ان الواحد في قطر ممكن يعيش احسن عيشة ويوفر بعد بس بعقل
هاذي وجهة نظر
وعلى فكرة أتكلم عن المواطن العادي في الظروف العادية

وقد أكون مخطئ


ما فيه رخاء اقتصادي في الوقت الحالي ، فيه البعض من اصحاب الدخل المتوسط يحاولون يجارون أصحاب الدخل المرتفع جدا ً ويسببون على نفسهم مصاريف مالها أول من آخر ومن ثم ديون متراكمة
مافي ؟

وبعدين اخوي هذا اللي احنا نقوله وقالته الدراسة :

فيه البعض من اصحاب الدخل المتوسط يحاولون يجارون أصحاب الدخل المرتفع جدا ً ويسببون على نفسهم مصاريف مالها أول من آخر ومن ثم ديون متراكمة
يعني السبب في اللي يتبطر زيادة مب السبب في الرواتب او الغلاء :)


وبعدين يقولون اهل قطر يمشون ورى الزبو ، انا ما شفت بحياتي الا اعداد محدودة من هذا النوع ولكن للأسف الجميع اصبح يعمم أن اهل قطر يتدينون عشان الكشخة ، وانا اشوف ان نسبة بسيطة فقط من ها النوع لكن الاغلب لا

والله اخوي في وفي


أخي الكريم لا أعتقد ان الصرف الزايد في المجالات اللي ذكرتها في محله واعتقد صعبة نعمم على الجميع

والدليل أن اكثر البيوت في قطر بيوت عادية ومسوينها بحسب شروط الاسكان الحكومي
والبيوت اسعار البنيان غالة جدا ً يعني بالضبط قبل 11 سنة كانت تكاليف بناء البيت الشعبي بين 300 إلى 400 ألف ، الحين لو بتحسب تكاليف بناء نفس البيت بنفس المواصفات مب اقل من مليون وهذي زيادة قدرها 130% . احنا نتكلم عن عقد واحد من الزمن ما نتكلم عن عقود أو قرون ، أعتقد ان الامكانيات موجودة لدراسة اسباب ارتفاع الاسعار خلال 10 سنوات ومن ثم وضع خطة عمل لتحديد الطرق البديلة لخفض التكاليف.

اخوي لما قلت الصرف الزايد وضحت قصدي : يعني مافي داعي تبني لك قصر وانت مواطن عادي اذا ماتقدر
مافي داعي تبيني بيت خمسين غرفة وانت اسرتك صغيرة ، ادري في ناس يقولون حق المستقبل ، بس أي مستقبل؟ عشرين سنة قدام ؟ خل بيتك دايما قابل لزيادة البناء عليهوفي المستقبل تقدر تتوسع في حالة الحاجة

ابي اشتري سيارة : مافي داعي اشتري لي لكزس وأقول والله مااقدر أعيش في الدوحة بدون سيارة !! هاذي وقتها تكون كلمة حق يراد بها باطل

ووجهة نظري تقبل الخطأ قبل الصواب



في النهاية :
اشكرك من كل قلبي اخوي الدكتور عزوز ، اثريت الموضوع (ولا قصور بالباقين )
وشرفت

[غريب الدّار]

زادت الرواتب ولله الحمد

الدولة وضعت نظام ما يسمح بالاقتراض من أكثر من بنك (مركز قطر للمعلومات الائتمانية)

حطت سقف للديون ما تتجاوز 6 سنوات وما تتعدى 75% من الراتب الاساسي والعلاوة الاجتماعية.

لكن في المقابل، الناس قبل كانت تروح الحسا ودبي، الحين تروح زيلامسي وفيينا وبرشلونة

النعم زوالة
فكرتك مترابطة يابو خميس بشكل منطقي وواضح

أشكرك
وأثنّي على كلامك

واعتقد احدى الاخوات الكريمات طالبت في موضوع آخر (اذا ماخاب ظني) بوجود قوانين تضبط مسالة القروض

والقوانين (او القرارات) موجودة واعتقد ان المصرف المركزي أصدرها

[بانغ بانغ]

المشكلة الاساسية في مجتمعنا واللي ايعاني منها فئة كبيرة ... من الناس هو التقليد الاعمى

مصاحبة الاثرياء وحب الظهور او البروز الاجتماعي لهم دور كبير في اثبات شخصية الفرد المسكين امامهم

ايضا وحسب اللي اعرفه ان بعض البنوك اتقدم تسهيلات للعملاء وعقب يتدبسون مساكين فيها

اتوقع ان ثقافة الادخار والتوفير معدومة

لازم كورسات اقتصاد وان الكماليات السرابية ليست الا سجن اجتماعي مؤلم

السموحة ما قريت كل الردود فلربما حد تطرق لنفس الكلام قبلي

[بصمة قطرية]

صحيح الرواتب عالية بس في المقابل المعيشة غالية ..
للي دوم يكررون الرواتب مرتفعه ..!!
السلفيات والقروض للأسف بهدلت العالم
في ناس على كل شي سلفية ..
و ناس أكثر من نص الراتب يروح على سلفيات
و قروض ..
المقروض الواحد يحكم عقله شوي
و ما يوهق عمره وايد في السلفيات ..
المشكلة البنوك الربوية تسهل هالأمور
المهم هم مستفيدين ..

[غريب الدّار]

هلا اخوي بو حسن


والله ياخوي الدين هم ومشكله من المشاكل الي تواجه الغالبيه خل نقول اسبابها كثيره ومن وجهة نظري في ثلاث اشياء:

بناء منزل او ارض ..
شراء سياره..
سفر...

مرحبا اخوي

وجهة نظرك على العين والراس
وهالكلام ممكن يكون صحيح
بس اعتقد تنقصه الدقة من وجهة نظري اخوي
يعني :
بناء منزل او ارض او شراء سيارة (باخلي السفر على صوب الحين وبارجع له باذن الله)

بناء منزل :
باختصار اخوي بو حسن انا اعتقد ان في ناس وايد بنوا اكثر من طاقتهم بكثير
اعتقد هالشي
اللي يبني بالمعقول اعتقد ماراح يواجه مشاكل كثيرة
حتى لو تسلف بيتسلف مبلغ قليل يقدر يسدده ويقدر عليه

هذا اعتقاد فقط
وينطبق على السيارة وتم شرح ذلك في مداخلة سابقة اخوي بو حسن

اما بالنسبة للسفر :
اخوي ماوضحت : أي سفر تقصد؟
اذا سفر للسياحة : فبصراحة انا ضد اللي يسافر سياحة بالسلف !!
اما اذا موضوع عاجل ومايتحمل تأخير (كعلاج مثلا ) او أي حالة طارئة أخرى فممكن نقول اوكي


توفر السيوله له دور كبير في زياده الديون والامور التراكميه واحد اشتغل توه ويبغي سياره خذ سلفه 200 الف نفرض مع الارباح وكذا وصلت 240 الف بعد سنتين او 3 يبي يتزوج خذ علي العنده او سو اعاده جدوله عشان العرس
انا والله يابو حسن مادري هل انت تذكر النقطة هاذي كتبرير ؟ او كسرد واقع ؟

وفي جميع الأحوال يثور التساؤل :
واحد توه اشتغل
وماعنده
ليش يشتري له سيارة ب 200 وتوصل مع الفايدة 240 ؟


سياسة التوفير من البدايه خاصه الواحد اذا توه توظف تساعدك كثير في باقي حياتك في البدايه ماعندك التزامات كبيره كلها مصاريف فالتوفير يكون سهل وتكون بديت صح.

اها
الحين فهمت النقطة السابقة يابو علي
وانا معاك قلبا وقالبا في اللي ذكرته
كلامك صحيح


والله يفرجها علي جميع المسلمين من الديون
اللهم آمين
اللهم آمين
اللهم آمين

يالله يارب اشوف كل مديون قطري مليونير وبدون ديون
وغير المديون اشوفه ملياردير :)

[غريب الدّار]

القلب المؤمن

شكرا على موضوعك المهم
والشكر موصول لك للمداخلة الكريمة

من وجهة نظري فعلا المواطن القطري مظلوم وغير سعيد، ببساطه لان الدولة غنية وعدد مواطنيها ظ£ظ*ظ* الف نسمة !!
رواتب قوية لاقيمة لها بجانب ارتفاع الاسعار الجنوني واستنزاف المواطن ماليا ..

وجهة نظرك على راسي اخوي
مع ان الرقم اللي ذكرته مب مبين عندي
لكن هل تعتقد اخوي ان الغلاء يشكل عائق امام الرواتب لمجابهته؟
هل تعتقد ان اللي يصرف بشكل طبيعي ماراح يقدر يواجه غلاء الأسعار في قطر؟
انا بصراحة اخوي اعتقد العكس
ان حتى مع الغلاء اللي صاير الرواتب ممكن تغطيه وزيادة
بس بالمعقول طبعا
خصوصا في ظل دعم الدولة للسلع الأساسية
ومجانية الصحة والتعليم
ومثل ماقلت لك اخوي هاذي وجهة نظري وتحتمل الخطأ بنسبة 99%



عدم قدرة المواطن الحصول على ابسط حقوقه من مسكن مستقل حيث ان العقارات اسعارها جنونية احتكار التجار في كل النواحي واسعار السلع في الدولة والقلة في تنوع المعروض !!

اخوي موضوع السكن هذا تمت مناقشته في موضوع آخر وبصراحة ماببي ادخل في تفاصيله بعد اذنك اخوي واسمح لي
وعلى فكرة اخوي : مسالة السكن هاذي مالها علاقة في نظري في قلة المعروض ، اعتقد له علاقة باحتكار -------------------> وهاذي نقطة خارج الموضوع
بس اخوي السكن هذا شي واحد :
شنهي الأمور الثانية اللي تشوف ان المواطن محروم منها وتأثر على معيشته بشكل اساسي؟


القروض التي ياخذها المواطن ليست جميعها بغرض المفاخرة وانما لاحتياجات قد تكون منطقية جدا مقارنة بالدول الاخرى..
شلون يعني منطقية جدا مقارنة بالدول الأخرى اخوي ؟

ممكن توضيح ولا عليك امر علشان ماابي ارد وانا مب متاكد من نقطتك اخوي واعذرني


للاسف يا سادة نحن نعيش تخبط وعشوائية في تنظيم حياة المواطن الذي سلبت حقوقه في امور كثيره ولايزال ينتظر الفرج من رب العالمين..

طيب اخوي وش هي الحقوق اللي سلبت منه على قولتك ؟ انت ذكرت مسالة السكن
وعلى فكرة مسالة السكن ترى غير المستحق للأرض حسب القانون له قرض
ادري ان القرض يمكن مايسوي وايد ، بس له شي !! ودامك تكلمت عن المقارنة بدول ثانية اخوي فأحب أقول لك لو نقارن بنعرف يعني شنو الظلم
دول كثيرة عربية وغير عربية المواطن مطحون فيها (دامك تكلمت عن مقارنة اخوي)


وااتمنى كل من يرد عالموضوع ويعلق ان يتذكر عدد المواطنين (ظ£ظ*ظ*) الف في دولة تعتبر من اغنى دول العالم..انتهى
على عيني وراسي اخوي
بس لو سمحت اذكر الرقم بالحروف لانه مب مبين عندي
وفي جميع الأحوال :
اعتقد اخوي ان الوضع بشكل عام اوكي
واادري ان في أخطاء تحدث
بس هذا مايقلل من الوضع بشكله العام ولله الحمد


اشكرك على ابداء وجهة نظرك ولا زال للحديث بقية اخوي وارحب لك في أي وقت
واحب اذكر مرة ثانية ان كل اللي انا ذكرته فوق هو وجهة نظري الشخصية وهي تقبل الخطأ بنسبة 99% قبل الصواب

والله من وراء القصد

[غريب الدّار]

كثره السلفيات وقله التدبيير



نعم يجب على كل شخص التوفير وخصوصا في هالاوضاع



مش ضرروي الغلاء يكون سبب للسلف
ياخذ الشخص حاجته قد راتبه


نعم ولله الحمد في الاغلب الاسياسيات متوفره واغلب الصرف على الكماليات والبذخ الزايد



وبفضل الله الرواتب عاليه وافضل من الدول الاخر


قله المسؤوليه وتوفير كل المتطلبات من الصغر هي جعلت الاغلبيه مستهتر



لايوجد مبرر للصرف الزايد مع قله الراتب
مد رجولك على قد لحافك




اللهم امين ويرزقنا الصبر في عدم الصرف الزايد
وشكرا لك اخوي غريب الدار

الشكر موصول لج اختي المارية على المشاركة الكريمة
واثنّي على كلامج


ويامرحبا بج

[غريب الدّار]

أتذكر يومني صغير كان ابوي الله يحفظه ويعطيه الصحة والعافية وطول العمر يحاتي مصروفي للمدرسة كل يوم بيومه وكان يروح يتسلف علشان ودام البيت ومستلزمات بسيطة
وعلشان يغطي التزاماته الخارجيه ومايكون حد له منه عليه يروح وياخذ سلفه من البنك

الله يرحم أيام الدكان الإيراني والبيع سلف


وطبعا من تاخذ سلفه بتحصل صاحبك ولا ولد عمك أو الشخص اللي تعرفه معرفة شخصيه وهو موظف البنك المحترم يحاول يقنعك تاخذ غيرها وجدوله وأهم شي عمولته اللي ربك بيحاسبه عليها يوم القيامه

لكن أقول لكل شباب البنوك :) خلها تنفعك قدام رب العالمين هالنسبه اللي خذتها على سلفية المسكين والترقيه اللي خذتها على ظهور هالمساكين

لا وطالعين لي موضه هالأيام

بنك إسلامي !
سلفتي حلال سلفتك حرام

والبنك الفلاني خل ننقل كلنا عليه فلان بيضبطنا وبننقل سلفياتنا تصير كلها حلال

أقول أركد أنت وياه ماوراها خير لا سلفيات إسلامية ولا ربوية

هذا رأيي وليس بفتوى !


أتذكر يومني صغير كان ابوي الله يحفظه ويعطيه الصحة والعافية وطول العمر يحاتي مصروفي للمدرسة كل يوم بيومه وكان يروح يتسلف علشان ودام البيت ومستلزمات بسيطة
وعلشان يغطي التزاماته الخارجيه ومايكون حد له منه عليه يروح وياخذ سلفه من البنك
عسى الله يطول لكم في عمره اخوي
بس شاللي تبي تقوله بالضبط اخوي ؟


وطبعا من تاخذ سلفه بتحصل صاحبك ولا ولد عمك أو الشخص اللي تعرفه معرفة شخصيه وهو موظف البنك المحترم يحاول يقنعك تاخذ غيرها وجدوله وأهم شي عمولته اللي ربك بيحاسبه عليها يوم القيامه

لكن أقول لكل شباب البنوك :) خلها تنفعك قدام رب العالمين هالنسبه اللي خذتها على سلفية المسكين والترقيه اللي خذتها على ظهور هالمساكين
معاك اخوي
بس ترى موظف البنك هذا شغله
والبنك فيه مساهمين ينطرون الأرباح
موظف البنك مضطر يسوي جذيه لانه شغله (بغض النظر يأخذ عمولة ولا ماياخذ)
طول ماانه مسوي شغله ويوضح للعميل كل شي انتهت مسؤوليته
هذا رايي اخوي
الا اذا خدع العميل هذا شي ثاني


بالضبط اخوي
كلامك صحيح
كلها ديون وعلى الظهر
سواء دين ربوي ولا دين إسلامي
كله على ظهرك وراح تسدده

طبعا كلنا ندري ان الإسلامي هو الحلال
بس انا أتكلم من ناحية ديون : كلها ديون


اشكرك على المشاركة اخوي الكريم وياهلا بك

[غريب الدّار]

المشكلة الاساسية في مجتمعنا واللي ايعاني منها فئة كبيرة ... من الناس هو التقليد الاعمى

مصاحبة الاثرياء وحب الظهور او البروز الاجتماعي لهم دور كبير في اثبات شخصية الفرد المسكين امامهم

ايضا وحسب اللي اعرفه ان بعض البنوك اتقدم تسهيلات للعملاء وعقب يتدبسون مساكين فيها

اتوقع ان ثقافة الادخار والتوفير معدومة

لازم كورسات اقتصاد وان الكماليات السرابية ليست الا سجن اجتماعي مؤلم

السموحة ما قريت كل الردود فلربما حد تطرق لنفس الكلام قبلي

مرحبا اخوي الغالي بانغ

مسموح افا عليك والموضوع موضوعك

والف شكر على المشاركة

[غريب الدّار]

اهلا اهلا
بالاخت الكريمة بصمة قطرية :)


صحيح الرواتب عالية بس في المقابل المعيشة غالية ..
للي دوم يكررون الرواتب مرتفعه ..!!
لازم نكرر يابصمة لان هذا الواقع
المعيشة غالية في كل مكان تقريبا لان الغلاء طال العالم كله
لكن اعتقد ان الرواتب لو يتم صرفها في محلها وبدون تبذير ممكن تجابه غلاء الأسعار بشكل فعّال
ورايج على راسي


السلفيات والقروض للأسف بهدلت العالم
في ناس على كل شي سلفية ..
و ناس أكثر من نص الراتب يروح على سلفيات
و قروض ..
المقروض الواحد يحكم عقله شوي
و ما يوهق عمره وايد في السلفيات ..
المشكلة البنوك الربوية تسهل هالأمور
المهم هم مستفيدين
وهذا اللي نقوله طال عمرج

يعني تشوفين ان الناس هم اللي وهقوا أعمارهم مب السبب الرواتب :)
مع انج في البداية قلتي الرواتب مب عالية مقارنة بالغلاء :) بعدين قلتي ان الناس هم الللي اموهقين أعمارهم بالسلفيات



رحم الله والديج يابصمة على تشريفج موضوع اخوج
وياهلا بج

[بصمة قطرية]

اهلا اهلا
بالاخت الكريمة بصمة قطرية :)


لازم نكرر يابصمة لان هذا الواقع
المعيشة غالية في كل مكان تقريبا لان الغلاء طال العالم كله
لكن اعتقد ان الرواتب لو يتم صرفها في محلها وبدون تبذير ممكن تجابه غلاء الأسعار بشكل فعّال
ورايج على راسي


يسلم راسك ..
صحيح المعيشة غاليه في كل مكان
بس لو قارنت هالشي في دول الخليج
قطر الأغلى ..
سافرنا دول الخليج و قارننا المطاعم المجمعات
و قطر الأغلى ..
حتى الإيجارات عندنا أغلى ..
وهالشي ما يختلف عليه إثنين ..




وهذا اللي نقوله طال عمرج

يعني تشوفين ان الناس هم اللي وهقوا أعمارهم مب السبب الرواتب :)
مع انج في البداية قلتي الرواتب مب عالية مقارنة بالغلاء :) بعدين قلتي ان الناس هم الللي اموهقين أعمارهم بالسلفيات



رحم الله والديج يابصمة على تشريفج موضوع اخوج
وياهلا بج

إي الناس اللي وهقوا اعمارهم ..
يعني إذا انا موظفة وراتبي عالي أروح أوهق
عمري بسلفيات ..!!!!
ليش ..!!
أعيش على راتبي واصرفه بعقل ..!!!

عندي وحدة الله يهديها أكبر مثال على هالشي
سنير وراتبها حلو
في المقابل مبلغ مش بسيط ينخصم من راتبها
كل شهر على السلفيات ..!!
ليش اش سبب هالسلفيات ..!!
كلها اسباب ما تستاهل والله
مرات أقول لها قلبج ما يعورج لما تشتغلين
و تتعبين و في الأخير نص راتبج يروح على سلفيات
ياليتها مهمة و ضرورية و كانت لشي يستاهل ..!!!
الواحد لازم يسوي موازنة بين راتبه وصرفيته
ما يحاول يعيش أعلى من مستواه ..

[غريب الدّار]

إي الناس اللي وهقوا اعمارهم ..
يعني إذا انا موظفة وراتبي عالي أروح أوهق
عمري بسلفيات ..!!!!
ليش ..!!
أعيش على راتبي واصرفه بعقل ..!!!

عندي وحدة الله يهديها أكبر مثال على هالشي
سنير وراتبها حلو
في المقابل مبلغ مش بسيط ينخصم من راتبها
كل شهر على السلفيات ..!!
ليش اش سبب هالسلفيات ..!!
كلها اسباب ما تستاهل والله
مرات أقول لها قلبج ما يعورج لما تشتغلين
و تتعبين و في الأخير نص راتبج يروح على سلفيات
ياليتها مهمة و ضرورية و كانت لشي يستاهل ..!!!
الواحد لازم يسوي موازنة بين راتبه وصرفيته
ما يحاول يعيش أعلى من مستواه ..
بيض الله ويهج يابصمة وهذا اللي انا أقوله

معاج 100%

اعتقد ان معظم السلفيات اللي على ظهور أصحابها هم وهقوا انفسهم بها

وعلى فكرة يابصمة : شفتي المثال اللي ضربتيه عن صديقتج؟ هذا مثال متكرر بشكل كبير جدا

[غريب الدّار]

لحول
والله توني الاحظ انج رادة داخل الاقتباس بعد
عليج حركات يابصمة :) زين ردي بلون ثاني ع الأقل انتبه

اخذي ردي ياختي الكريمة الكبيرة بصمة :


يسلم راسك ..
صحيح المعيشة غاليه في كل مكان
بس لو قارنت هالشي في دول الخليج
قطر الأغلى ..
سافرنا دول الخليج و قارننا المطاعم المجمعات
و قطر الأغلى ..
حتى الإيجارات عندنا أغلى ..
وهالشي ما يختلف عليه إثنين ..
الإيجارات في دبي يمكن اغلى يابصمة وانتي عارفة
لكن ماراح اضربها كمثال الحين

وباقول لك صح كلامج الإيجارات عندنا غالية
بس يابصمة نكون منصفين شوي :
المطاعم مب دايما اغلى ترى

وحتى السلع الاستهلاكية اللي العالم يروحون يجيبونها من الحسا أسعارها شوي ارتفعت بل صارت مقاربة او بعض المرات تطوف أسعار لدوحة (في بعض الشغلات طبعا مب كل شي )

بس بالنسبة للمجمعات يابصمة : تقصدين شنو بالضبط؟ شلون المجمعات اغلى؟ اجار المحلات في المجمعات ولا قصدج السلع داخل المجمعات ؟

لان في اغلى وفي ارخص
واعترف (وهذا شي لايمكن انكاره مثل ماتفضلتي) ان الأسعار في قطر بالنسبة لامور كثيرة غالية

لكن لازلت اشوف ان الرواتب ممكن تجابه هالاسعار
لكن وين اللي يصرف بعقل ؟



وياهلا بج