احتاج عمال يدفنون الحوش

[V.I.P_QATAR]

صباح الخير اخواني
وصلت مرحلة تبليط الحوش احتاج ارقام ناس غير العرب لاني تعبت معهم وخصوصا في البيت
ابي ادفن البيت بس شنو احسن نوع دفان
وبعدها ابي العمال يصبون لي خرسانه على المممرات قبل تركيب البلاط
هل هذا صحيح ارجو افادتي الله يجزاكم خير

[معماري قطري]

الصحيح تسوي دفان مدكوك بدون استخدام البودرة وبسلوب في حدود 1% ولو الحوش كبير تقدر تكتفي بسلوب 0.75% وهو كل متر تنزل 7 ملم وحتى 6 و 5 معقولة وكافية لتصريف الماي جهة باب الحوش .. بعدها تحط صبية خرسانة 10 سم وكل 7 متر تسوي فاصل تمدد .. تقدر لل 10 سم سمك تسوي كل 10 متر فاصل تمدد لكن ال 7 متر احتياط مضمون أكثر .. ولو بتسوي الخرسانة مخلوطة بالفايبر وبدون حديد بتكون أقوى وما تتشلخ بسهولة وتقدر تسوي فواصل تمدد أقل .. مادة الفايبر اسمها Grace Cemfiber F12 وحتى تجيك أرخص من الحديد وأقوى وتقدر تركبها لكل الأرضيات ولا تحتاج رش بالماء عقب ولو بتركب سجاد سوها بدون بلاط وتجيك الخرسانة ناعمة بعد جفافها .. لازم الفورمان والعمال يعرفون مقاديرها شكثر ويصبونها في الردي مكس قبل ليصبونه ويخلونه يلف بها كم لفة يخلطها .. ألحين فيه نوعيات كثيرة وحتى الردي مكس يجيبونها مخلوطة جاهزة وتعتبر اضافات للخرسانة

لازم تحت الخرسانة قبل الصب بلاستيك سميك حتى ما تحتك بالتربة والأملاح اللي فيها وبعدها تسوي التشطيب اللي تبي من نوعيات البلاط أو حتى كسر رخام وانصحك تستعمل مونة زينة لبين البلاط .. أحسن شيء الايبوكسي وبتكون غالية وصعب يشتغلونها العمال ولازم حسب التعليمات وغيرها روبات كثيرة أما تخليهم على كيفهم بيصبون لك اسمنت أبيض

عن العمال اعرف باكستاني ومعاه شلة آسيويين وكلهم خبرة في كل أنواع البنيان لو ما اتفقت علمني بارسل لك رقمه .. الفورمان يدرس هندسة في سنة ثانية وما شاء الله عليه فاهم وخلوق

[Stars]

يعطيك العافية اخوي معماري على المعلومات القيمة
وبغيت رقم الباكستاني يكفي تزكيتك له

[معماري قطري]

يعطيك العافية اخوي معماري على المعلومات القيمة
وبغيت رقم الباكستاني يكفي تزكيتك له

حاضر يا اخوي بيوصلك إن شاء الله خاص والله يعافيك

بس انتبه كلهم عيايرة وبيقولون ما يعرفون المادة ويمكن صادقين .. هذا ابوه كان فورمان عند حمد بن خالد بن حمد واشتغل في بيتي بنفس الطريقة ويمكن هو ما يعرفها .. إبوه ألحين شيبه وما يشتغل مثل قبل ومشكلته عربي ما يعرف مثل ولده