من انترلاكن الى زيرمات

[برشلوني قطر]

السلام عليكم

الله يرضى عليكم الي يقدر يفيدني اكون شاكر له

اذا حبيت اروح من انترلاكن الى زيرمات في اي منطقة يكون القطار

الي ينقل السياره ؟ ياليت بالاحداثيات

واذا وصل القطار وين اوقف السياره في زيرمات ؟ ياليت بالاحداثيات

انا بحثت فالنت افتر مخي. واحد حاط احداثيات تاش وواحد حاط كندرستنج

ماعرفت وين الصحيح. اذا ممكن حد مجرب وراح يفيدنا

وجزاكم الله خير

[ضوى]

احداثيات تاش هي الصح

بس والله ماتسوى العنوه ولا فيها زود رحتها وتحسفت الا كانك تبي الثلج بعد على هواك
احنا طلعنا من انترلاكن لين تاش تقريبا مع اصلاحات الطرق ذاك الوقت خذتا ست ساعات بس يوم ردينا خذنا نص ساعه لاتسالني اشلون مرينا من طريق دفعنا فيه 25 فرنك بذاك الوقت ,تقريبا كان بسنه 2008 , وعقب الدفع دخلنا سكه حديد لقطار مفتوح الجوانب ماتنزل من السيارة اصلا مافي مكان ودخلنا نفق مظلم جدا وعقب نص ساعه طلعنا على انترلاكن وكانت بطريقنا البحيرة الزقاء وبس هذا اللي صار معانا

ماستانست بزيرمات وايد كانت حر بشهر 8 والشمس ساطعه ، بس كانك معزم فيه مطعم ايطالي فوق تله مرتفعه شوي تطل على الجدول المطين مالهم اكله خياااال صج اكل ايطالي اصلي

[برشلوني قطر]

يعني اروح كندرستنج واركب القطار بالسياره وبعدها يوقف القطار وانزل بالسياره واروح لتاش
اوقف السياره واركب قطار ثاني يروح لزيرمات صح ؟؟
اما سالفة ست ساعات مب رايح لها. الي عرفته ساعتين وقلت تجربه بس واذا عندج اسم المطعم فيديني

واي اضافات عندكم اماكن تستاهل حولها نتقبلها بصدر رحب

[غير البشر]

مرحبا اخوي برشلوني

ماقصرت ضوى جزاها الله خير

بالنسبه لقريه كندرستنج وهالقطار لحمل السيارات ينفع للي يبغي يروح اماكن بعيده وجذي
يعني ماتفرق معاك وايد نقلها بالقطار

نفس ماقالت لك ضوى تروح تاش وتوقف سيارتك هناك

بس انت راح تكون جاي من اي مدينه
ليش ماتروح بالقطار من المدينه الى انت فيها الى زيرمات دايركت !!

انا اشوف افضل والسياره تكون بالفندق

[برشلوني قطر]

هلا اخوي غير البشر. بكون ان شاء الله ف انترلاكن. بس قريت ان فالسياره طريق جبلي وسيد واحد واوقات يكون ثلوج ومطر هذا الي خلاني اترددبس قصدك اروح تاش ومن اهناك اركب قطار لزرمات صح ؟ الظاهر اخوي ماعنده سالفه يقول حلوه

[غير البشر]

هلا اخوي غير البشر. بكون ان شاء الله ف انترلاكن. بس قريت ان فالسياره طريق جبلي وسيد واحد واوقات يكون ثلوج ومطر هذا الي خلاني اترددبس قصدك اروح تاش ومن اهناك اركب قطار لزرمات صح ؟ الظاهر اخوي ماعنده سالفه يقول حلوه


هلا فيك يا الغالي
هي يعني مب حلوه وايد يعني كتغيير فقط
وموضوع نقل السياره بالقطار هي بس لتقريب المسافه لان بدل ماتلف من ورى الجبل

في قطار يروح زيرمات من انترلاكن
تقريبا ياخذ ساعتين وربع
وتبديل قطار في محطتين

اذا تبغي قريتين جنب انتر لاكن ومايدخلونهم السيارات
عندك قريه مورين وقريه وينجن
كل قريه على جبل ومتقابلتين وبينهم وادي
وهالوادي تحت قريه لوبتزيرن
وهالوادي بعد ينزل منه شلالات تروميل باخ
عندك اماكن كثيره قريبه من انتر لاكن لاتتعنى

عندك مونترو حلوه و ولوزيرن وقريه بيرنز على بحيره انترلاكن
وقريه سبيز على بحيره ثون جنب انتر لاكن
غير الاماكن السياحه في انتر لاكن

[برشلوني قطر]

اشكرك اخوي غير البشر وبيض الله ويهك

الظاهر بغض النظر عن زيرمات. وبخصوص قرية مورين ووينجن هل عندك احداثيات لهم ؟
واشلون نظامها اذا حبيت اروح لها فالسياره ؟

[ضوى]

برشلوني نصيحه اخت لك في الله انترلاكن اذا رحتها في وايد اماكن تطلع منها وناسه وترفيه ومناظر طبيعيه اما زيرمات ترى صج مافيها شي الا قمه مدري شسمها اللي عالكافي هوبرون مدري وشو ميزتها مافي سيارات مع انه شفنا سيارات صج مب وايد بس في ،
تبي اطلع على لوقانو وعلى ميلان وعلى لوزيرون وبعد كم منطقه ماتذكر الاسماء عدل ، غير هذا انترلاكن فيعا فعاليات تجنن تخليك ماتطلع منها اولها القفز بالبراشوت هاي بروحه تحفه ومتعه ، وفي مناطق تبعد ساعه لين ساعتين ، روح البحيرة الزرقاء وفي نفس اليوم روح الاوشن سي تجنن وفيها الزحليقه الصيفيه مدري عاد مفتوحه هالايام والا لا بس وايد استمتعنا فيها اكثر من البحيرة الزرقاء بمراحل
قمه جونغفرو بتروحها وبتتحسف كلها هنود وشعب شرق اسيا الريحه لاتطاق فعلا لاتطاق ماعجبتني كلش

[برشلوني قطر]

ماقصرتي ضوى. خلاص شلتها من الحسبه.

بخصوص المناطق الي ذكرتيها معظمها من ضمن المخطط. وميلان كنت ناوي وكنسلت لاني
برجع من فرانكفورت وماعندي وقت اطول.

مشكورين وماقصرتو