إنطباعاتكم عن عصائر الخضروات [ جزر - شمندر - .... الخ ] !!؟

[أبو عبدالعزيز]

السلام عليكم..
جربت أنا عصير الجزر وأعجبني كثيرا ولا زلت أفضله على كثير من عصائر الفواكه خصوصا كون عصيره بلا إضافات مطلقا ولا حتى ماء.
جربت كذلك عصير الشمندر (البنجر) وأعجبني مضافا للجزر، وشربته لوحده لكن مرات كان مقبولا، ومرات أخرى كانت فيه حموضة أو حرقة.
.
هل توجد خضروات أخرى مقبولة كـ عصائر سواء من حيث استساغة طعمها أو من حيث فوائدها؟؟ وما طريقة تحضيرها؟؟
تقديري لكم

[JN000N]

يقولون الطماط عاد انا ماجربته
والزنجبيل مع اي نوع ثاني
ومادري شنو بعد

[.قطر.]

الافكادو ينفع
والطماط بعد :secret::rolleyes2:

[بريق الحق]

عصير الخيار والخس ممتاز
انا اشوف الشي عادي لانه حاسية الذرق ماقامت تهمني اذا تبي الصج

[naklan]

أنا عصيري المفضل الجزر
والرمان

[Red rose]

شمندر مع تفاح وليمون وجزر

مفيد للي عندهم نقص في نسبه الحديد

وطعمه كأنه عصير رمان عجيب :)

[بصمة قطرية]

وعليكم السلام ..

بصراحة ما أستسيغ طعم الخضار كعصاير
مع أني من عشاق الحضروات ..
عمري ما فكرت أجرب
يمدحون عصير الجزر ..

عصيري المفضل الرمان ..

[ضوى]

ليش عصاير ؟

جرب تاكل الخضار بصورتها الطبيعيه الذ واحلى

[الحياة الخالدة]

و عليكم السلام و رحمة الله
أنا جربت عصير الفراولة مع الخيار
طلع عجيب

[qatarman8008]

مع الاكل.. جزر وبرتقال ..
افضل من الليمون بنعناع..
لانه مايسبب حارق..
بدون الاكل افوكادو مع جوز هند..
عجيب..
اخر مرة رحت مطعم سلاط بار عطوني عصير جرجير..
عجيييييييييب..

[Dana’1]

الجزر والبرتقال لذيذ

التفاح الأخضر مع الكرفس وشوية خيار وشوية ليمون أنا أحب الأخضر
عجيب ^_^

[أبو عبدالعزيز]

عصير الخيار والخس ممتاز
انا اشوف الشي عادي لانه حاسية الذرق ماقامت تهمني اذا تبي الصج

عن جد طعمه مناسب وإلا لا؟
وإيش طريقته؟

[أبو عبدالعزيز]

و عليكم السلام و رحمة الله
أنا جربت عصير الفراولة مع الخيار
طلع عجيب

المقادير لو سمحتي

[أبو عبدالعزيز]

مع الاكل.. جزر وبرتقال ..
افضل من الليمون بنعناع..
لانه مايسبب حارق..
بدون الاكل افوكادو مع جوز هند..
عجيب..
اخر مرة رحت مطعم سلاط بار عطوني عصير جرجير..
عجيييييييييب..

الأفكادو مع جوز الهند كيف طريقته؟
.
هل تقصد (سلاط بوتيك) اللي في اسباير؟
وإلا وينه (سلاط بار)؟؟

[qatarman8008]

اخذه من مندرين..
افوكادو بحليب ومعاه نكهه جوز هند..
وتقدر تحط معاه مكسرات وعسل لوتحب..
السلاط بار حضرتك موجود في اسباير..
مطعم رائع جدا الصراحة..
مشكلته انه بالحجز..
يعني حضرتك ما ينفع تدرعم منيه والباب..

[qatarman8008]

الأفكادو مع جوز الهند كيف طريقته؟
.
هل تقصد (سلاط بوتيك) اللي في اسباير؟
وإلا وينه (سلاط بار)؟؟

انت صادق اخوي اسمه سلاط بوتيك..
انا ما ادري من وين جبت اسم سلاط بار..

[الحياة الخالدة]

المقادير لو سمحتي

والله ياخوي أنا ذقته في هالمطعم في أمريكا
مادري إذا نفس العصير موجود في المطعم في قطر
بس ما جربت أسويه في البيت

http://qfup.com/up/picc/IMG_1691.jpg

[العقل المدمر]

اولا لازم نعرف الفرق بين الخضروات والفواكهة
الفواكهة عبارة عن الثمار اللي تنتج من الازهار
والخضروات هي الاشياء الثانية مثل الساق والجذور والاوراق
وبجذي نعرف ان الطماط والخيار والباميا والباذنجان عبارة عن فواكهة

ثاني شي بمفهومنا احنا حق الخضروات والفواكهة
ماجربت غير الجزر بس وااايد احبه
مع اني ماعندي مانع اجرب اي عصير غيره

[Saoud_]

خضار وفواكه مكس بيطلع احلى
ومع زيت زيتون يقولك عشان الدهون الصحيه

[للصبر اخر]

انا عن نفسي احب عصير الجزر


والطمااط بعد

[كويتي مميز]

الجزر بالبرتقال كويس

[معماري قطري]

الكرفس عجيب مع البقدونس

وأي عصير ينضاف له شوية زنجبيل وتكون كل المكونات طازجة يكون جيد .. المحفوظ نسبة السكريات تكون أكبر ويكون فيه مواد حافظة ومبالغ في سعره عندنا وايد .. في أواخر العشرينات لعلبة عادية يقولون قاري عليه مشعوذ من مشعوذينهم

برا كنت آخذهم بحدود 5 ريالات وهنا نفس النوع ب 28 وحولها

[نفسي عزيزه]

يعطيكم العافيه موضوع مفيد للغايه

[مهرة]

..

الشمندر كثير مهم وينفع تخلطه او تعصره مع كثيير فواكة مثل,,

http://store2.up-00.com/2016-03/145931959387891.jpg (http://www.up-00.com/)

هذا عبارة عن شمندر حبة وحدة متوسطة الحجم+تفاحة حمرا+5حبات فراولة+برتقالة وحده ونضيف سكر قليل السعرات او تحلية بالكمية المناسبة

دائما خبراء التغذية ينصحون بدمج الشمندر مع الفواكة الحمرا لإحتوائها على مضادات الأكسدة والأحماض الأمينية ومادة الكولاجين الي تفيد البشرة ومرونة الجلد وبعد للي يعانون من الأنيميا.,

وهذا بنلقاهم أكثر في التوت الفراولة الكرز الجح العنب الأحمر التفاح الأحمر وأكيد حبيب الشعب الرمان,, حاول في كل مرة تخلط نوع بالفواكة مع الشمندر.

ونصيحة للبنات واسألوا فيها بعد الشمندر مع الفراولة والتفاح مفيد جداً للبشرة يخليها موردة وصافية :nice: وشوكرن