معقوله هذه الشوارع موجوده عندنا ! ! !

[أبو سعود]

كل ما أتوجه للشوارع الداخليه بالمنطقه الصناعيه


أشعر أن شوارع الدول ( الناميه و الفقيره )


أفضل حالآ من الشوارع الداخليه للمنطقه

الصناعيه عندنا


كل ما أتوجه للشوارع الداخليه بالمنطقه الصناعيه


أشعر بفقدان البصمات الأيجابيه للمسؤولين من

هذه الشوارع الحيويه بهذه المنطقه


كل ما أتوجه للشوارع الداخليه بالمنطقه الصناعيه


أشعر بأن ولا مسؤول أطلع على الطبيعه للأحوال

( السيئه ) لهذه الشوارع بالمنطقه الصناعيه


الشوارع السيئه لهذه المنطقه لم تكن من

شهور و سنوات بسيطه


بل أنها تعاني من ( الأهمال و الأهمال )

ومن سنوات عديده


ولو كانت شوارع المنطقه الصناعيه مثل شوارع

مناطق ( اللؤلؤة و كتاره ) لكانت هي :

( الأفضل و الأجمل و الأحلى )


لكن للأسف الشوارع الداخليه للمنطقه الصناعيه

لم تلقى أي أهتمام واضح عليها



ولو كانت هذه الشوارع في الدول المتقدمه

كان سمعنا بمحاسبه ( المسؤولين المقصريين )

عن عدم التطوير لهذه الشوارع الحيويه

[حليتان*]

من اهم اسباب تلف الشوارع فالصناعيه هو الحمل الزائد عليها من عبور السيارات الثقيله

طبعا حاليا بدت الاعمال في ترتيب الشوارع والتوسعه فالمنطقه الصناعيه

[رجل الجزيرة]

لو يبعدون الصناعية إلى غرب جنوب قطر يكون أفضل علشان الزحف العمراني.

[BoFahed]

اخوي التنفيذ والانجاز عندنا سلحفائي ولا اصلا شغالين فيها تعديل ومجاري وتكسير من 5 سنوات بس الشق اكبر من الرقعه


ان شالله الصناعيه الجديده بالصليل وبركة العوامر تخلص بسرعه علشان يكون البديل ويخف الزحمه ويشتغلون في القديمه

[Abu Muhsen]

اخي الكريم لو تشوف الشوارع الداخلية في فريج بن محمود راح تستغرب اكثر ... بعض الشوارع فيها هبوط خطير جدا .. وحفر تسبب اضرار للسياراة ...اما بالنسبة للمنطقة الصناعية فيها شوارع بكروزرات يالله تقدر تدخلها ..

[SouthK]

الدولة ما تقدر تخلي كل الشوارع نفس كتارا لكن على الاقل تقدر تسوي خلطة قار تستحمل الوزن و اكبر مثال شارع جبل علي في دبي اللي كأنه جديد توه مخلص ولا كأن الشاحنات عليه يوميا!

[naklan]

ردد ياليل ما طولك طلع الوزير الإماراتي السابق
مانع العتيبة من قطر وصار وزير وبعد 30 سنه رجع
للدوحة ومر عند عمارة كليوبترا لقى بيب الماي الي يليك
على حالة وتم يضحك يابوي هذا سيفوه وهذي
خلاقينة هههههههههههههههه

[naklan]

شوارع قطر ماتيي نصف مساحة شوارع دبي
ودبي بلد غير نفطي بس شوف الناس الحية شلون
حتى لو تروح مكان مقطوع تحصل جسر وتحصل
جسر مشاة بلا ناس يعني للمستقبل النية
عندنا مَش نية بناء وتنظيف للبلد
واحنا الخسرانيين

[معماري قطري]

من اهم اسباب تلف الشوارع فالصناعيه هو الحمل الزائد عليها من عبور السيارات الثقيله

طبعا حاليا بدت الاعمال في ترتيب الشوارع والتوسعه فالمنطقه الصناعيه

هذا يا اخوي عذر ما له أساس وتحمل يمشونه عليك أشغال .. حق كل حمل تصميم معين مناسب له .. شوارع أمريكا تقريباً كلها تمشي عليها شاحنات ثقيلة .. وبعضها معدات صناعية ثقيلة تمر آخر الليل وتكون شحنة سوبر ثقيلة ولا استوى لها شيء

شارع الوعب منعوا مرور الشاحنات عليه لكن فيه هبوطات بسيطة وبتزيد مع الوقت

وأمس شفت شارع الخور من طريق الشمال للخور يبنونه بطريقة تضحك .. هندسياً غلط .. جايبين دفان وحاطينه بين خرسانات حماية الطريق وهي صج ثقيلة لكن مع دك الدفان تتحرك شوي ويضعف الدفان .. حاطينها من الجوانب وقايلين لها اثبتي لا تتحركين .. زين بعد الدفان بيخلونها أو بيشيلونها وإن شالوها شبيحطون مكانها

الشارع يشتغلون فيه فوق السنة ويمر في صبخة ومسوين الدفان مرتفع حول 60 - 70 سم وهو شيء زين وصح بس طريقة الدك والشغل غلط .. المفروض يركبون سواتر جانبية ثابتة .. أما ألواح حديد مضروبة في الأرض أو خرسانات بقواعد .. retaining walls .. وبعدين بيطلع واحد بيقول الأرض ضعيفة أو فيها كائنات غريبة تاكل الدفان

[معماري قطري]

ردد ياليل ما طولك طلع الوزير الإماراتي السابق
مانع العتيبة من قطر وصار وزير وبعد 30 سنه رجع
للدوحة ومر عند عمارة كليوبترا لقى بيب الماي الي يليك
على حالة وتم يضحك يابوي هذا سيفوه وهذي
خلاقينة هههههههههههههههه

الشغل النظيف يبي له ناس نظاف

مريت مرة في شارع يشتغلون فيه ويسوون شبكة ري وشفت المحابس اللي المفروض تكون من نوعية ما تتغير وخاصة وقوية جداً .. شارينها من شارع مشيرب صينية غش انا ما اركبها عندي في حوش البيت .. خلصوا شغلهم وزرعوا وبعدها بحدود الشهر رجعوا يحفرون .. الشغل الرخيص يبين واضح مب شرط للمختصين حتى للناس العاديين وهذا أثناء مرور سريع ونظرة بطرف العين

شوارعنا للأسف هي الأغلى والأقل جودة

[بو راشد 1]

اخوي التنفيذ والانجاز عندنا سلحفائي ولا اصلا شغالين فيها تعديل ومجاري وتكسير من 5 سنوات بس الشق اكبر من الرقعه


ان شالله الصناعيه الجديده بالصليل وبركة العوامر تخلص بسرعه علشان يكون البديل ويخف الزحمه ويشتغلون في القديمه

ابشرك، صناعية ابا صليل من الحين المجاري طافحه!

[معماري قطري]

الدولة ما تقدر تخلي كل الشوارع نفس كتارا لكن على الاقل تقدر تسوي خلطة قار تستحمل الوزن و اكبر مثال شارع جبل علي في دبي اللي كأنه جديد توه مخلص ولا كأن الشاحنات عليه يوميا!

استخدموا القابرو ونفس الشيء شغلهم غش .. في الأخير طلع دكتور مهندس قال شوارع قطر فيها كائنات غريبة تاكل الأسفلت وبتقرير منشور في الجريدة

[معماري قطري]

اخوي التنفيذ والانجاز عندنا سلحفائي ولا اصلا شغالين فيها تعديل ومجاري وتكسير من 5 سنوات بس الشق اكبر من الرقعه


ان شالله الصناعيه الجديده بالصليل وبركة العوامر تخلص بسرعه علشان يكون البديل ويخف الزحمه ويشتغلون في القديمه

في عالم البناء إن بغيت تنجز مشروع تعين له مقاول مناسب وتحط شروط واضحة ورسومات دقيقة والشغلة اللي بتاخذ 12 شهر بعدد 100 عامل ومعداتهم المهترئة بتاخذ 6 شهور بنفس العدد بس على شفتين وبمعدات أحسن .. وممكن 4 شهور لو سوينا 3 شفتات كل شفت 8 ساعات وعدد العمال لكل شفت 50 عامل

مشكلتنا أكثر في الإدارة والا المهندسين والمكاتب الهندسية اتوقع يعرفون الحلول

[معماري قطري]

كم واحد منا يمر على شغل الترقيع لتقاطعات الشمال ويشوف الحاصل .. بالأيام محد يشتغل

من رأيي يجيبون مطوع يقرأ على الطريق ممكن يستوي بنفسه

[معماري قطري]

اليوم أطالع رصيف في شارع جديد في العزيزية .. وفيه منهولات والرصيف خافق على شكل خط واضح من سوء الدفان والدك .. حد بيمر يفتش ويشيك على هذي الأشغال ويطلب المقاول بو كزمة حتى يجي يعدل ويدفعه غرامة تشويه للمدينة وشغل تعبان؟ ما فيه للأسف

[أبو سعود]

اليوم أطالع رصيف في شارع جديد في العزيزية .. وفيه منهولات والرصيف خافق على شكل خط واضح من سوء الدفان والدك .. حد بيمر يفتش ويشيك على هذي الأشغال ويطلب المقاول بو كزمة حتى يجي يعدل ويدفعه غرامة تشويه للمدينة وشغل تعبان؟ ما فيه للأسف

للأسف يا أخوي

أحنا ما نشوف المسؤولين الأ عند حفل

أفتتاح الشوارع الجديده

وكل واحد منهم يريد أن يبرز نفسه بالصوره


لكن :

عند طرح مواضيع عن سلبيات الشوارع

نجدهم يتهربون ونادر ما نرى منهم

من يتحمل المسؤوليه

[naklan]

الشغل النظيف يبي له ناس نظاف

مريت مرة في شارع يشتغلون فيه ويسوون شبكة ري وشفت المحابس اللي المفروض تكون من نوعية ما تتغير وخاصة وقوية جداً .. شارينها من شارع مشيرب صينية غش انا ما اركبها عندي في حوش البيت .. خلصوا شغلهم وزرعوا وبعدها بحدود الشهر رجعوا يحفرون .. الشغل الرخيص يبين واضح مب شرط للمختصين حتى للناس العاديين وهذا أثناء مرور سريع ونظرة بطرف العين

شوارعنا للأسف هي الأغلى والأقل جودة


هلا والله بالغالي معماري قطري
ياخوك ما جات على محابس الزراعة الان خط رئيسي
وياخذو منه محابس خارجية وتوصيلات يعني شارع كامل
ممكن يديره شخص احنا متكلم في الشوارع الضيقة ونتكلم عن عدم الاهتمام بالصيانة
معقولة شوارع المنطقة الصاعية بهذا السوء ووقت المطر تصبح عبارة عن بحيرات طبيعية
معقولة دبي وصلت يمكن الى 20 الف جسر واحنا هالكم جسر اخوي ربعنا يحفرون
ويدفنون والنَّاس تشتغل على بلدانهم معقولة احنى الأغنى ماليا ولاسواء
تنفيذيا هذي هي التساؤلات الي عندي تحياتي يالغالي

[naklan]

وجهة نظر شخصية
بعض شوارع الصناعية لو يعدلونة مليون مرة
ما يستوي المكان عبارة عن برك تجمع للأمطار لذالك اولا عمل تصريف
للامطار قبل تجديدها حتى لا ترجع لماساتها السابقة فايً
تجديد بلا تصريف لمسألة الأمطار هو هدر للمال
بلا جدوا وسيعود الشارع لنفس المشكلة

[معماري قطري]

وجهة نظر شخصية
بعض شوارع الصناعية لو يعدلونة مليون مرة
ما يستوي المكان عبارة عن برك تجمع للأمطار لذالك اولا عمل تصريف
للامطار قبل تجديدها حتى لا ترجع لماساتها السابقة فايً
تجديد بلا تصريف لمسألة الأمطار هو هدر للمال
بلا جدوا وسيعود الشارع لنفس المشكلة

الوضع صعب لأَن المنطقة الصناعية ما خططت من الأساس بالتصريف .. تصريف سطحي يحتاج مناطق لتجميع المياه وتكون منخفضة كمستنقعات طبيعية وهذي تحتاج أراضي فاضية .. بايبات تحت الأرض بعد بيعتمدون على الجاذبية والشغلة بتكون حفر عميق وشغل جديد مزعج ومكلف للغاية

مستغرب ليش ما بدوا خط صرف المياه الجوفية ومياه الأمطار لعين خالد من المنطقة الصناعية .. كانوا بيحلون مشاكل كل المناطق من عين خالد لجنوب مطار حمد الدولي .. هذا الخط قطره ستة متر وكان يفترض مخلص سنة 2011 ولا سمعنا عنه شيء للحين

النظرة قاصرة وبتبقى قاصرة في كل مشاريع البنية التحتية .. خاطري اشوف مشروع تنفذ صح وخدم صح مثل ما هو مخطط له وبدون إعادة توسعة وتغييرات وأشياء منسية اكتشفوها بعد افتتاحه

يسون جسر ونفق ويكبرون الدوار يسونه مضمار سباق مثل دوار الصناعية ودوار الشحانية مسوينه مثله ودوار محطة بترول الجيدة قبل ( ما ادري شسموه ألحين )

أي مشروع طرق المفروض يتم تنفيذه بسرعة وفعالية وسعر معقول ويخدم عمر يفترض ما يقل عن 30 سنة لدولة متطورة بسرعة مثل قطر ول 100 سنة في دولة قد يتناقص عدد سكانها أو يزيد بوتيرة بسيطة جداً

كنت استغرب ليش جسور أمريكا حواجزهم الجانبية خرسانة وغير مصبوغة .. وعرفت إنها حتى تكون بدون صيانة لفترات طويلة .. ألحين يتم تغليفها بطبقة بلاستيك كحماية وتعطيها لون أبيض ناصع يعكس النور في الليل ويبين بوضوح طول الوقت

الطرق تتطور تطور رهيب وكذلك تكنولوجيا الطرق وبناؤها .. حتى الأنظمة الأمنية وأنظمة القيادة بدون سواق وباقي أنظمة الأمان تدخل في الطريق وعندنا للحين نشيل دوار ونستحدث دوار آخر .. نسوي نفق وجسر ونخلي الدوار شعار وبعدين نجي نحفره ونركب عليه كاميرات .. هندستنا ومشاريعنا شكلها كلها تعتمد نظرية Trial And Error التجربة والخطأ ويتعلمون من أخطاؤهم ولا حتى يتعلمون

[الحياة الخالدة]

السلام عليكم
من كلامك أخوي معماري قطري .. حسيت بعض اللي يشتغلون في أشغال و يخططون للطرق و هندستها مب مهندسين .. ولا عندهم شهادات
الحين الخلل من وين بالضبط : من الإدارة ؟؟ والا من المهندسين ؟؟
والا من عوامل و كائنات فضائية دخيلة ؟؟!!

[MAZEN37]

حتى بتطوير الشوارع تحس في غباء
والسموحه على الكلمه
مثال بسيط الحين يوم تيجي من اشارات المناصير متجه للصناعيه تعدي الجسر الدوار الي فوق واذا حبيت تدخل الصناعيه يمين من شارع 10 ما تقدر لانهم قافلين الخدمات
يعني لازم تطلع وتركب الدوار فوق وانت جاي يعني تكدس سيارات فوق يعني زحمه يعني غباء بدووون حدود

[عايش فرحان]

الحل في رداءة الشوارع .. بسيط ..
محاسبة المقاولين و فرض الغرامات و رفع القضايا عليهم من قبل الحكومة الى ان يعرفوا ان الله حق ..
و لكن هذا الامر لا يحصل لان الحكومة تشجع المقاولين المحليين (المساكين) و ما ترضى لهم الخسارة ..

[معماري قطري]

هلا والله بالغالي معماري قطري
ياخوك ما جات على محابس الزراعة الان خط رئيسي
وياخذو منه محابس خارجية وتوصيلات يعني شارع كامل
ممكن يديره شخص احنا متكلم في الشوارع الضيقة ونتكلم عن عدم الاهتمام بالصيانة
معقولة شوارع المنطقة الصاعية بهذا السوء ووقت المطر تصبح عبارة عن بحيرات طبيعية
معقولة دبي وصلت يمكن الى 20 الف جسر واحنا هالكم جسر اخوي ربعنا يحفرون
ويدفنون والنَّاس تشتغل على بلدانهم معقولة احنى الأغنى ماليا ولاسواء
تنفيذيا هذي هي التساؤلات الي عندي تحياتي يالغالي

هلا فيك اخوي نقلان

صحيح كلامك بس لو استخدمنا شيء رخيص في شغل كبير وعلى مستوى هذا قمة الغش وبيكلف تعديله غالي وتشويه وشغل يخرب اللي صار قبله

مثال آخر كثير من الكهرباء الأرضية تشوط وقت المطر بسبب تسرب المياه لها وعدم عزلها صح وتمديدها في بايبات خاصة

[بوخالد911]

مو بس بالصناعية
حتى أغلب الشوارع الداخلية بالفرجان
تعباااانة من قلب
وشغل ترقع وبس

[معماري قطري]

السلام عليكم
من كلامك أخوي معماري قطري .. حسيت بعض اللي يشتغلون في أشغال و يخططون للطرق و هندستها مب مهندسين .. ولا عندهم شهادات
الحين الخلل من وين بالضبط : من الإدارة ؟؟ والا من المهندسين ؟؟
والا من عوامل و كائنات فضائية دخيلة ؟؟!!

مهندسين يا طويلة العمر بس يدورون الرخيص ويدفعون غالي

لكل عمل هناك عدة خيارات وطرق ولكل طريقة مساويء ومميزات .. عندنا الصرف الصحي مأساة وواقع محد ينكره وكذلك تصريف مياه الأمطار القليلة .. أما يسوون نظام صرف صحي شبكة كبيرة تغطي جزء كبير وبطريقة قديمة جداً اللي هي تعتمد على الجاذبية وكل ما ابتعدنا زاد العمق لين نوصل لأعماق سحيقة وطريقة الحفر ببوكلينات عادية .. وبدون آلات حفر ضخمة وقوية الا في الفترة الأخيرة ( الظاهر صراخنا جاب نتيجة ) وبدون تفجير لإختصار مدة الحفر .. وليش الحفر الغزير من الأساس في ظل تواجد المضخات؟ وليش ما تكون هذي التمديدات عن طريق أنفاق خدمات غير مدفونة وقابلة للصيانة والفحص واضافة أي تمديد جديد .. وبنفس الوقت تكون كفائتها كبيرة وكافية للصرف الصحي + تصريف الأمطار القليلة سنوياً

هذا حل أفضل للنظام البيئي ولو المعالجة صارت للمياه مجمعة ( صرف صحي + صرف مطر ومياه جوفية ضحلة ) وصرف المنشآءات الصناعية والملوثات الخطرة يكون غير ومستقل بالكامل .. لو صار هذا التخطيط بطريقة مقسمة ومحلية لكل قطاع ومنطقة كبرى بيكون أسهل وعملي أكثر ومشاكله أقل

نرجع حق دبي مرة ثانية .. صرفهم الصحي يعاد استخدام 90% منه للزراعة وللبحيرات حول طرق دبي .. حتى الأشجار وقت الغبار ترش بالماء ليلاً لتطلع نضرة صباحاً .. صرفنا الصحي ما يلحقون على معالجته ويتم صب الصرف الملوث 100% وبدون معالجة بواسطة التناكر في مستنقع بو نخله وغيره من المستنقعات

البحيرات استوت تعطي مظهر جمالي للطرق واستوت منخفضات يتجه لها المطر القوي ولا يغرق الشارع

عندنا لا مصرين على الحفر للشوارع وحتى الطرق الخارجية حتى لين نزل المطر تتحول قطاعات كبيرة من هذي الشوارع لمستنقعات طبيعية تخوض فيها السيارات

صدقيني امسك صبعي ليتهور ويوديني في مشاكل انا في غنى عنها .. حتى الانترلوك الجديد ( الغرانيت ) على طريق سلوى تعرج واستوت انخفاضات كثيرة فيه وشكله باهت بسبب الغبار والتلوث بالديزل وآيل السيارات .. ويفترض تنظيفه من وقت لوقت وبمياه معالجة وترجع في نظام الصرف للمعالجة مرة ثانية

أقول الملاحظات الواضحة وشوي اطلع بعض المعلومات اللي توصلني وأكيد الخافي الله أعلم به .. في النهاية كله شغل مؤقت وبتستمر عجلة البناء في الدوران الى أن يشاء العزيز القدير

[شيخ الديرة]

عدة عوامل, كتبتها ومسحتها :omg:

[معماري قطري]

عدة عوامل, كتبتها ومسحتها :omg:

أحسن لك انا ناوي انتقل لمرحلة فكرية جديدة برؤية كل شيء جميل وصح ومرتب ولن أكتب في هذه المواضيع مرة أُخرى

[بانغ بانغ]

كان زين مهندسينا ومسئولي اشغال والبلدية ياخذون دورة فنية في بناء الطرق والبنية التحتية في جمهورية كوريا الشمالية لمدة شهر

[رجل الجزيرة]

مهندسين يا طويلة العمر بس يدورون الرخيص ويدفعون غالي

لكل عمل هناك عدة خيارات وطرق ولكل طريقة مساويء ومميزات .. عندنا الصرف الصحي مأساة وواقع محد ينكره وكذلك تصريف مياه الأمطار القليلة .. أما يسوون نظام صرف صحي شبكة كبيرة تغطي جزء كبير وبطريقة قديمة جداً اللي هي تعتمد على الجاذبية وكل ما ابتعدنا زاد العمق لين نوصل لأعماق سحيقة وطريقة الحفر ببوكلينات عادية .. وبدون آلات حفر ضخمة وقوية الا في الفترة الأخيرة ( الظاهر صراخنا جاب نتيجة ) وبدون تفجير لإختصار مدة الحفر .. وليش الحفر الغزير من الأساس في ظل تواجد المضخات؟ وليش ما تكون هذي التمديدات عن طريق أنفاق خدمات غير مدفونة وقابلة للصيانة والفحص واضافة أي تمديد جديد .. وبنفس الوقت تكون كفائتها كبيرة وكافية للصرف الصحي + تصريف الأمطار القليلة سنوياً

هذا حل أفضل للنظام البيئي ولو المعالجة صارت للمياه مجمعة ( صرف صحي + صرف مطر ومياه جوفية ضحلة ) وصرف المنشآءات الصناعية والملوثات الخطرة يكون غير ومستقل بالكامل .. لو صار هذا التخطيط بطريقة مقسمة ومحلية لكل قطاع ومنطقة كبرى بيكون أسهل وعملي أكثر ومشاكله أقل

نرجع حق دبي مرة ثانية .. صرفهم الصحي يعاد استخدام 90% منه للزراعة وللبحيرات حول طرق دبي .. حتى الأشجار وقت الغبار ترش بالماء ليلاً لتطلع نضرة صباحاً .. صرفنا الصحي ما يلحقون على معالجته ويتم صب الصرف الملوث 100% وبدون معالجة بواسطة التناكر في مستنقع بو نخله وغيره من المستنقعات

البحيرات استوت تعطي مظهر جمالي للطرق واستوت منخفضات يتجه لها المطر القوي ولا يغرق الشارع

عندنا لا مصرين على الحفر للشوارع وحتى الطرق الخارجية حتى لين نزل المطر تتحول قطاعات كبيرة من هذي الشوارع لمستنقعات طبيعية تخوض فيها السيارات

صدقيني امسك صبعي ليتهور ويوديني في مشاكل انا في غنى عنها .. حتى الانترلوك الجديد ( الغرانيت ) على طريق سلوى تعرج واستوت انخفاضات كثيرة فيه وشكله باهت بسبب الغبار والتلوث بالديزل وآيل السيارات .. ويفترض تنظيفه من وقت لوقت وبمياه معالجة وترجع في نظام الصرف للمعالجة مرة ثانية

أقول الملاحظات الواضحة وشوي اطلع بعض المعلومات اللي توصلني وأكيد الخافي الله أعلم به .. في النهاية كله شغل مؤقت وبتستمر عجلة البناء في الدوران الى أن يشاء العزيز القدير

أخوي سؤال لو سمحت:

ليه ما تكون مستشار (بس إستشارة) في أشغال على الأقل يأخذون رأيك يا أخي حرام كل هذه المعلومات القيمة تروح هباء منثورا أو إنك توثق خبراتك في كتاب قيم وتقدمه لوزارة الإعلام لتوثيقها.

[معماري قطري]

أخوي سؤال لو سمحت:

ليه ما تكون مستشار (بس إستشارة) في أشغال على الأقل يأخذون رأيك يا أخي حرام كل هذه المعلومات القيمة تروح هباء منثورا أو إنك توثق خبراتك في كتاب قيم وتقدمه لوزارة الإعلام لتوثيقها.

توني معلن اعتزالي للكتابة في مواضيع الطرق .. وهالمعلومات يعرفونها جميع الخبراء الموجودين .. انا خلاص على وشك التقاعد وحتى لو تقاعدت ورحت عندهم بيحطوني عامل أرشيف ولا مشرف موقع .. يا ويلي الله لا يغير علي خلني على وضعي أحسن بوايد

[رآعي موآجيب]

حتى بتطوير الشوارع تحس في غباء
والسموحه على الكلمه
مثال بسيط الحين يوم تيجي من اشارات المناصير متجه للصناعيه تعدي الجسر الدوار الي فوق واذا حبيت تدخل الصناعيه يمين من شارع 10 ما تقدر لانهم قافلين الخدمات
يعني لازم تطلع وتركب الدوار فوق وانت جاي يعني تكدس سيارات فوق يعني زحمه يعني غباء بدووون حدود

وليش تقول السموحه !!

هذا الصحيح وانا اخوك ، وأخذ باقي اللسته اللي طرت علي الحين

1- من نفس الطريق اللي اشرت له ، اشارات المناصير بإتجاه الصناعيه ، لو حبيت تروح يمين قبل النفق للدوار اللي فوق النفق وتحت الجسر ، لازم السواق يكون مدرب على الدرفت بطريقه احترافيه ! الدخله منيب قادر اوصفها اصلا , يبغيلها تصوير فيديو ، والمصيبه الشارع ضيق جدا وفيه حوالي 6 مداخل ومخارج على يمينك !! ، طيب ليش المخاطره والضيق والله موسع عليكم بحوالي 150 متر بالعرض كلها فضاء ؟؟

2- الطرق الجانبيه اللي تكون قبل الجسور مثل جسر الصناعيه ( دوار المياه سابقاً ) وكل الجسور ، الطريق يكفي لسياره ونص , طيب لسياره فهمناها ، نص الطريق الثاني اعتبره بخشيش من المقاول مثلا !! وإلا رداة تخطيط من أشغال :thumbdown::thumbdown: ،، تلاقي السياره اللي بتتجاوز السياره الاخرى وخصوصا البطيئه جدا مثل الشاحنات ، نص تواير السياره على الشارع والنص الثاني على الحصى !! ليش طيب ؟ انتسلف شوي قار وجبرو من البحرين ونحل المشكله يا اشغال ؟
اللي يقهر ويغث ويرفع الضغط ان المساحات الفاضيه ضخمه على اليمين وعلى اليسار ، غبينه الصراحه

3- الدوارات اللي تحت الجسور ، سويتوا جسور وخلصت بعد ما هرمنا ( منيب قايل شكرا ) ليش تقللون المسارات في الدوارات !؟ وإلا مبسوط على الجسر وتعتقد انك انقذتنا من الزحمه وتكرمت علينا بشبه دوار يعتبر بالنسبه لك ( أكسترا ) وفعليا ماله داعي !؟

4- تقاطعات شارع سلوى من دوار الصناعيه إلى جسر مدماك ، ليش قبل الاشارات 4 مسارات وعند الاشاره مسارين !! ، طيب المسارين الآخرين وشو وضعهم ؟ لازم تكدس السيارات على بعض ؟

5- توسعة الشارع اللي قبل اشارات رمادا من الصوبين شي جيد ، لكن لازالت الزحمه توصل للجسرين يا اشغال ، سيارات واقفه على جسر الجيده وسيارات واقفه على جسر مدماك ، يعني مافيه حد فيكم فكر بجسر ضخم في المنتصف يوزع هالتكدس الدائم بشكل منظم !؟ وإلا لأن الشارع حيوي وبتكون عليه استفسارات دائمه من جهات كثيره فمخوفكم وترقعونه وهو على حاله !!

وغيرها وغيرها ,, وشو اللي بذكره وإلا وشو اللي بخليه !