رمضان وبذخ أهل الخليج ..!!

[الزاجل]

هلا يا جماعة الخير ..

http://talal2010.jeeran.com/صورمتحركة/رمضان-كريم.gif

مع قرب قدوم شهر الخير والبركات
يكثر التفكير في كيفية استقبال هذا الشهر الفضيل ..
http://198.65.147.194/Arabic/news/2001-11/19/images/pic11.jpg

في دولنا الخليجية تتسابق النساء في هذا الشهر الفضيل على ملئ البيت
بالانواع والاصناف المتعددة من المواد الدهنية والسكرية والقمحية
السائلة والصلبة والمتجمدة و الباردة والدافئة او الخاثرة حتى .. والى اقتناء
المشروبات الملونة من تنك وفيمتو

http://www.durham21.co.uk/images/2002-2003/michaelmas/996/wh_halward%20episode%201_image%201.jpg
( احلى شي في رمضان )
بالااضافة الى العصائر والاجبان والمعجنات و.....و ................. و...........

http://static.flickr.com/31/57011779_02a23a1f0c_m.jpg

ليس المهم عند المرأة الاقتصاد في الصرف ولكن
المهم عندها انها تستولي على قدر اكبر من البضائع التموينية من المجمعات
والجمعيات والدكاكين او من عند الخباز اذا لزم الأمر ..

والأمر لا يكون مقتصرا على ميرة البيت .. بل يتعدى الى اقتناء الأواني
الجديدة لكي تحل ضيفة ليوم او نص يوم في بيوت المعارف والجيران والأهل ..
ما اتشوفون عسكر كل شهر شعبان حاط اعلان بمناسبة شهر رمضان اسعار مخفضة .. يستغل رغبة الحريم في تجديد الاواني وتغيرها بمناسبة الشهر الكريم ..

ولن يطول اسبوع بالكثير حتى نشاهد المرأة الخليجية وقد عاودت شراء
ما ينقصها من تلك المجمعات .. ولكن اين تذهب كل هذه المواد التموينية ؟

لو دخلنا مطبخ احدى هؤلاء النساء
لشاهدنا المبالغة المفرطة في اعداد اصناف او كميات الطعام
فمنزل به 10 اشخاص يتم اعداد الطعام ل20 شخص لماذا ؟

http://7awa.roro44.com/catimg/4.gif http://7awa.roro44.com/catimg/3.gif

http://7awa.roro44.com/catimg/9.gif http://7awa.roro44.com/catimg/14.gif http://7awa.roro44.com/catimg/27.gif

http://7awa.roro44.com/catimg/15.gif http://7awa.roro44.com/catimg/10.gif http://7awa.roro44.com/catimg/23.gif

http://7awa.roro44.com/catimg/24.gif http://7awa.roro44.com/catimg/17.gif

عند السؤال ترد عليك راعية المطبخ او من ينوب عنها ..
بيت بو فلان جارنا ياب لنا امس ملة ثريد وملتهم عندنا
لازم انردها وفيها شي .. وبيت بو علان ما طرشنا لهم شي لازم انطرش لهم ..
طيب يا مرة الثريد اللي طرشوه بيت بو فلان اشسويتي فيه ؟
قطيته برع محد ياكل ثريد من العيال الا من شغل بيتنا ..

اها واشطرشتي حق بيت بو علان ؟
طرشت لهم ساقوا مع طبق كريم كراميل وعصيدة ..
بس يا مرة بيت بو فلان رعيان سكر وضغط اشلون اتطرشين لهم
اطباق امحلية ؟
اشعلي منهم المهم اني اطرش لهم شي..
اشبلاك انت تبي الناس يقولون عنا بخالا وما انوزع شي
هذا الشهر الكريم واحنا لازم نكون كرمة..

وهذا هو حال البيوت القطرية والخليجية توزع الاطباق وتطير من هنا
وهناك وتحدث زحمة في الشوارع والطرقات بسبب توصيل هذه الاطباق
والمحصلة ان الخير موجود في كل البيوت ولا بيت محتاج لصحن البيت
الثاني .. حتى الاطباق الموجودة في البيت تكون زايدة عن حاجة البيت ..

عندنا في البيت الطبق الوحيد اللي يخلص عن بكرة ابيه هو الهريس
http://www.hawacook.com/modules/Recipes/photos/433cef9992028.jpg

اما باقي الاطباق يتم توزيعها اول بأول على بيوت العزوب المحتاجين
يعني بيتنا او بيت الوالد الله يعطيه الصحة والعافية ما نستفيد من الاطباق التي
تدخل بيوتنا الا ناااااااااااادرا ..

من اهنيه لابد ان نبدأ بتثقيف راعية المطبخ الخليجي بالقول
ان الشهر الكريم شهر الخير والعطاء للمحتاجين والمتعففين
واصحاب الفقر والمساكين ..

اما الصرف والبذخ في اعداد الوجبات والاطباق المتعددة والمختلفة
لتوزيعها على بيوت انعم الله عليها بالخير والبركة لمجرد انها عادة رمضانية
في حين هناك من المسلمين في اراضي الله الواسعة لا يستطيعون الحصول
على نقطة ماء تروي رمقهم ونحن نسرف ونبذر في شهر الخير والكرم ..
فهذه الأمور ليست من صفات المسلم ..

لن اقول لا تتبادلوا الصحون ولكن اقول
الاعتدال في التبادل والبحث عن الذين يستحقون مثل هذه الصحون
فتسد جوعهم بدل ان ترمي في القمامة لعدم حاجة اهل البيت لها ..

http://www.bintnet.com/cards/images/occasion/ramadan/ramadan_fanos1.jpg

[khaldoon]

جزاك الله خير الجزاء على هذه النصائح الرائعه..فعلا كلامك صحيح اخوي الزاجل الكل يوزع من باب المجامله سواء بالخليج او غير الخليج وبتكلف ومن غير داعي وقليل اللي يفكر بالتوزيع على الفقراء والمحتاجين...صحيح انك تكلمت عن ربة الاسره انها تصرف ..بس ليش الرجل ما يحاول هو اللي يضبط شوي الموضوع

ان شاء الله راح اكتب موضوع لاحقا عن ما تطرقت اليه في موضوعك

[الزاجل]

وجزاك الله خير الجزاء يا خلدون

ماهي المسؤولية مشتركة ما بين الرجل والمرأة في الصرف
ولكن المرأة بحكم سيطرتها الكاملة على مجريات اللعب في المطبخ
وبحكم تحكمها بالأمور المنزلية وميزانية التموين
فهي رأس الحية اللي يبي لها قطع عند الاسراف ..

فهنا لا اخلي مسؤولية الرجل في الاسراف ولكن احمل
المرأة الجزء الأكبر منها ..

بانتظار موضوعك

تحية لك

[khaldoon]

علشان اخوي الغالي الزاجل ما اكون بس من النوع اللي يقول جزاك الله كل خير ويعطيك الف عافيه لانك من الاعضاء اللي ما شاء الله عليهم ببدوا اراءهم ويستحقوا معاملتهم بالمثل وبدن قول يعطيك العافيه لهم

احب ان اقول هنا ان كلمة اقتصاد بالانجليزيه مشتقه من كلمتي ايكوس نوموس اليونانيتين...ومعناهما قواعد ادارة البيت .....يعني ان الاقتصاد يبدأ من عند ربة البيت ...
هل تصدق ذلك؟؟؟...لو كملت ما اريد قوله راح اخرج عن الموضوع
اكتفي بهذا القدر

[OTOsan]

يعطيك الف عافيه اخوي الزاجل على موضوعك الرائع ،،
مشكلتنا ان كل شي ناخذه بالعكس .. مدري هي صارت عندنا طبيعه ولا وراثه ولا حداثه ..
يعني رمضان شهر صيام .... اشلون الكل يصير كل همه يتفنن في الاطباق والاكلات !!!

شي غريب الصراحه ..

تقبل مني كل الشكر ،،

[M O 7 A M M E D]

تسلم على الموضوع المهم اخوي الزاجل..

وفعلا في رمضان تزيد نسبة الاسراف من ناحية الاكل واعداد الوجبات والتسابق بين النساء في اعداد افضل واشهى المأكولات للبيت ولخارج البيت ..

فتجب على المرأة الاعتدال وعدم المبالغة في تحصير الاكل والولائم ..

وهنا يأتي دور الرجل لكي يقف بالمرصاد في وجه المرأة وتقدم لها النصيحة للتقليل في الاسراف ..

[الزاجل]

هلا بخلدون للمرة الثانية ..
يعني فكرنا طلع يوناني :dance

عندنا في الخليج قواعد ادارة البيت تتحملها المرأة
ولكن في دول الشام ومصر غالبا ما اتشوف ان تقاسم المسؤولية
يكون ما بين الرجل والمرأة ..

فميزانية البيت تنحط بعد دراسة جميع المتطلبات في الحياة
مب عندنا انخصص جزء كبير من الميزانية للزط والأكل ..:D

تحية لك

.................................................. .............................

[Mr.Lonely]

الله يعافيك يا اخوي
صدقت باللي قلته .. اعتقد وما اجزم طبعا
ان للتلفزيون دور كبير في ترسيخ هالنظرة للشهر الفضيل ..

ايام قبل على زمان الأوليين
الواحد لما كان يطبخ طباخ يومه كان على قده
ومع هذا كان يحاول انه يشارك جيرانه باللي عنده
فكانت الصحون لما تتبادل تتبادل عن كرم وسد حاجة بنفس الوقت ..

لكن لما بدت ثقافة طبق اليوم تنتشر في التلفزيونات
وبدأ معاها تغيير النمط المالي في المعيشة
صاروا الناس يظنون ان من باب الكرم في هذا الشهر البذخ والاسراف
لحاجة ومن غير حاجة ..

واتسعت دائرة التأثير بحيث ان الجيل الحالي
ما يعرف عن شهر رمضان غير عطش النهار والجلوس
امام المسلسلات والفوازير وبرامج المسابقات الرمضانية..

فشهر رمضان الكريم شهر تزيد فيه الحسنات لكرمه
فالحاصل ان الناس يلتفتون بشكل كبييير لظواهر الأمور
ويتركون بواطنها ظنا منهم انهم يتعاملون مع هالشهر بالشكل الصحيح ..

شاكر لك مشاركتك اخوي الكريم وتحية لك
.................................................. ..............................................

M O 7 A M M E D

الله يسلمك يا محمد
وشاكر لك تعقيبك ..

اتفق معاك ان لابد ان تكون هناك كلمة للرجل
ولكن عن اي رجل نتكلم ؟

رجل يدفع ولا يعرف كيف تشترى الحاجيات ؟
ام رجل يخاف ان تغضب منه زوجته ؟
او رجل يقترض حتى لا يكون اقل من غيره ؟

فلنبدأ بأنفسنا من هنا من المنتدى
كل شخص مؤيد فكرة الموضوع يبدأ بنصيحة المقربين له
و عقب ما يقتنعون ينصحون غيرهم ..

[خاربه خاربه]

يعطيك العافيه ومافي امل حد يغير شي من اللي كان يصير

واللي بيصير برمضان تقدر تقول ان يصير تغير بس للصرف الزايد:eek2:

مستحيل يقل omen

يمكن السنه الناس بيوزعون الاكل بصحون من الفضه

نفس ماسوت ام فلان :deal:

مافي امل تغير شي :shy:

[الزاجل]

يعطيك العافيه ومافي امل حد يغير شي من اللي كان يصير

واللي بيصير برمضان تقدر تقول ان يصير تغير بس للصرف الزايد:eek2:

مستحيل يقل omen

يمكن السنه الناس بيوزعون الاكل بصحون من الفضه

نفس ماسوت ام فلان :deal:

مافي امل تغير شي :shy:

الله يعافيك يا خاربة خاربة

ممكن كلامك يكون صحيح لو تمينا منتظرين غيرنا يتغير لو ما حاولنا
انغير من نفسنا ومن البيت اللي عايشين فيه ..

اما ام فلان هذي اضرب كل القيم في عرض الحائط
بعد صحون من فضة العام عيل هالسنة بتوزع
بصحون مطلية بذهب والسنة اللي عقبها ان شاءالله
بصحون من ذهب ..

اخخخخ لو ام فلان جارتنا كنت كل يوك باطرش لها طبق في صحون قصدير
وانطر صحونها المها وابيعها في السوق:app:

[ROSE]

اول شي اشكرك اخوي الزاجل على طرح هذا الموضوع المهم وجاء في وقته

ومعاك ان الاسرة الخليجية اسرة تسرف كثيرا في رمضان في تنوع اصناف

المأكولات وتنوع الاطباق وهذا يعتبر خطأ من وجهة نظري

فانا ممن يحبون دخول المطبخ في رمضان ولكن

لاعداد الطبق الرئيسي وطبق السلطة والحساء وصنف واحد من الحلويات

نعم قد اكون مقتتره في نظر البعض ولكنني ولاكمل كلامي

اعد هذه الاطباق بكمية تزيد عن حاجة البيت واهله


للتوزيع فشهر رمضان يستحب فيه التوزيع على الجار

ولكنني من النوع الذي يوزع في اطباق من الالمنيوم حتى لا استرجع الطبق او

لا الزم الجار باعادة الطبق الى

وبالعادة اشتري حاجتي اليوميه او الاسبوعيه فقط وبعدها وعندما تنفذ اتسوق مرة اخرى

وهكذا الى ان ينتهي الشهر الفضيل

التوزيع في هذا الشهر ليس للبذخ او للاسراف وانما كما ذكرت فهو شهر العطاء

والتواصل ويستحب فيه ان يطعم الجار جاره ، ربما لا استطيع التعبير بما فيه الكفاية

ولكنني اتمنى ان تكون الفكرة قد وصلت :con2:

[خاربه خاربه]

الله يعافيك يا خاربة خاربة

ممكن كلامك يكون صحيح لو تمينا منتظرين غيرنا يتغير لو ما حاولنا
انغير من نفسنا ومن البيت اللي عايشين فيه ..

اما ام فلان هذي اضرب كل القيم في عرض الحائط
بعد صحون من فضة العام عيل هالسنة بتوزع
بصحون مطلية بذهب والسنة اللي عقبها ان شاءالله
بصحون من ذهب ..

اخخخخ لو ام فلان جارتنا كنت كل يوك باطرش لها طبق في صحون قصدير
وانطر صحونها المها وابيعها في السوق:app:




ام فلان ماتخلي اي صحن عندها فلبينيه والفلبينيه عندها جلب

يدور صحن صحن :D لين راح مني ولا مني :nice:

[المخلب]

حي الله الزاجل ..

اتحفتنا بموضوع مهم للغايه وهو فطور رمضان << :)

اخوي اولا مانقول الا كل عام وانت بخير .. والله يعوده علينا وعليك بالعافيه والخير والصحه والسلامه

زين ..

نجي لموضوعك

والله العاده في اهل قطر الكرم بين الحبايب ..

يعني مايصير انا اتفطر وجاري جالس بدون فطور ..

صحيح المبالغه بالشئ مو زينه ..

لكن انك تبادل الفطور من بيت لبيت ! شئ جدا محبب ..

وهذا يقرب بين الجيران وبين اهل الفريج الواحد ..

بس صيحيح مثل ماتفضلت .. الكلافه .. والتحميل النفس طاقه اكبر من مستواها ..

مش مطلوبه ..

اذا ماتقدر تودي فطور مثل ماجابولك ..

اعتذر بشكل محترم .. وصدقني بيقدرون موقفك ..

تحياتي لك .. وللجيمع ..

والسموحه اخوكم المخلب ..

[relaax]

جزاك الله خير

صحيح الصرف في رمضان يزيد... مع تزايد تنوع اصناف الاكل ...

و راح اتكلم من منطلق شخصي .... عائله كبيره ... وكذا بيت من اخوان واهل .. جيران .. فقراء ... مساجد ... غبقات يجتمع فيها الغريب قبل القريب ... كلها تعتمد على زيادة التموين ... في تصرفات تكون في هذا الشهر واضحه وناس كثيره ينتظرونها وتعتبر موسم ... وهي في فرصه للتواصل .. ومع هذا ما يكون عندنا تنوع مبالغ فيه فالاطباق و الكميات .. بعتدال ... نفطر ويفطر غيرنا و الحمدلله ...

وبالنسبه .. احنا تموينا شهري و اسبوعي .. في جميع الاشهر ...

[غزلان]

موضوع مهم جدا

السرف حتى باقي الأشهر في العزايم وحفلات الزواج..ان شاء الله يقدرون النعمه ويحافظون عليها

[وطن]

موضوعك حلو اخوي

انا معاك في تبذير زايد عن اللزوم في رمضان

بس الظاهر الواحد مع الصيام والجوع يشتهي كل انواع الأكل وتبتدي ربة البيت تطبخ حق كل فرد في العايله النوع اللي يبيه .. ويتراكم الاكل ويزيد
خصوصا ان الواحد يكون صايم وما يقدر ياكل وايد في أول وجبة "المعدة تنصرع من الخرعه هاهاهاهاها" ..
المعدة ما تتحمل كميات كبيرة من الأكل والنتيجة التخمة والتكاسل عن التراويح في المسجد للأسف !!!!


وسالفة كب الأكل في الزبالة الصراحة حرام

سواء في رمضان أو غيره

في رمضان اذا جاكم أكل ما تاكلونه او طابخين اكل زايد عن حاجتكم انقلوه لصحن "بلاستيك أو المنيوم من النوع اللي ينرمي بعد الاستخدام" وارسلوه لأقرب خيمة افطار صائم جنبكم
ع الاقل تاخذون اجر افطار صائم
ولا انكم تكبون في الزبالة

في ناس غيرنا ماعندهم لقمه ياكلونها :(

[الزاجل]

مراحب بالجميع .. وشكرا جزيلا على المشاركة

روز يعطيك العافية على دخولك المطبخ :nice:
وبما انك واحدة من المعنيات فأنت تقرين بأنك تطبخين زيادة عن حاجة البيت
لتوزيعها على الجيران في هذا الشهر الفضيل ..
قد يخرج من بيتك طبق او طبقين يوميا .. ولكن هناك من يخصص
لكل جران من 2 الى 3 اطباق .. او انه لابد ان يرسل يوميا او ما بين كل يوم
ويوم طبق لكل جار .. او نرا دخول 4 او 5 اطباق دفعة واحدة من منزل واحد
مرة في الشهر ..
لا مانع من تخصيص جار على طول الشهر لأرسال طبق له
تمشيا مع العادة الكريمة في هذا الشهر الكريم ..
ولكن فلنعم ان هناك اسر في قطر لا تجد ما يسد جوعها
وان طبق واحد يتقاسمه افراد العائلة الكاملة ..

فالموضوع لا يتطرق للأواني على قدر ما يتطرق ما تحتويه هذه
الأواني سواء كانت من قصدير او من حديد ..

تحية لك ..

.................................................. .........................................

خاربة خاربة
خليه هالكلاب ايينا باحط له قطعة لحم فيه سم
وما باشوفه مرة ثانية :looking:

.................................................. ...........................................

المخلب
اهلين وسهلا بكم
وكل عام وانت بخير وسهالة وربنا يعوده عليك هالشهر
وانت وكل حبابيك بخير وعافية ..

يا المخلب اذا جارنا ما عنده ما يتفطر عليه
هذا الزام علينا انقصر على نفوسنا وانطرش له ..
الموضوع ان ولله الحمد ان غالبية اهل قطر وجيراننا
ناس ربنا منعم عليهم ومع هذا نحرص ان تدخل صحونا
واطباقنا بيوتهم .. بينما هناك من المقيمين في قطر
بالكاد يجدون اللي يسد رمقهم وجوعهم ..

عندك منقطة بو هامور .. عندك فريق غانم القديم
عندك فريق الخليفات القديم .. عندك الاسر اللي كانت في صوب السيلية
وغيرهم وغيرهم كثار مب املحقين الأجار ورسوم الكهربة والماي
ورسوم المدارس والكتب والمواصلات والعلاج ..

من اهنيه لو فكرنا فيهم راح انشوف انهم اولى بالاطباق هذه
من اسر ربنا انعم عليهم بالخير .
ما فيها شي لو اكرمنا جارنا بطبق كل اسبوعين او في الشهر مرة
لكن اولئك محتاجين فسد حاجتهم يعد واجب ديني وليس كرما ..

تحية لك ..
.................................................. .........................................

relaax

الله يديم عليكم الجمعة والتقارب ..
ما اختلف معاك في اللي قلته بالعكس ما فيها شي لو مصاريفنا زادت
اذا كان الهدف منها سد حاجة الآخرين .. او الاجتماع ..

فمثلا مثل ما قلت الجمعة راح تزيد المصاريف
ولكن من غير المعقول كل المجتمعين يطبخون اكثر من حاجتهم ..

مثلا احنا نجتمع بيت الوالد والوالدة ربنا يعطيها الصحة والعافية
تطبخ قدر كبير للكل بيحث تخصص لكل فرد حاجته ..
فاحنا ما انروح ومعانا طباخنا غير اطباق الحلو بس ..
ومع هذا انشوف زيادة في الخير ..
اتفق معاك ان لابد ان نفطر ويفطر غيرنا من الفطور الزين ..

تحية لك ..
.................................................. .......................................

غزلان
الاسراف في كل الشهور .. ولكن شهر رمضان هو سهر الخير والاكرام
نكرم جارنا ونبحث عن الخير في البحث عن المحتاجين ..
في شهر رمضان تزيد الصدقات والحسنات .. في شهر رمضان الاجر بأجرين
فلذلك لابد ان تكون اعمالنا الهدف منها الحصول على مرضاة الله ..
فالاسراف مفروض سواء في رمضان وغير رمضان
ولكن هناك امور لا تعد من الاسراف كأطعام المحتاجين والتصدق عليهم
ففي هذا الشهر قد نصرف اكثر من الشهور الأخرى وكلها مرضاة لله ..

تحية لك ..
.................................................. .............................................

وطن
مداخلتك مع مداخلات الأخوان
هي التي جملت الموضوع .

بخصوص الواحد صايم ويشتهي كل شي اتفق معاك
الواحد خاطره في عناقيد النجوم في السما.. فيتخيل كل شي
واي ريحة او اي أكلة تخترق خشمه وعقله:D

ولكن ما اتشوفين ان الأكل الزايد عقب الفطور ما منه فايدة
في موائد الافطار الجماعية ؟
قد كلوا وراحوا يصلون ..

لذلك المفروض الاقتاد يكون قبل الفطور والواحد يتعلم من الدروس
ان مب كل شي نشتهيه واحنا صيام لازم يتواجد على السفرة
ممكن جدا اوزع انواع الاطباق على طول الشهر ..

فياوطن النفس على ما تعلمينها ..
فلابد من ترويضها على القناعة بأن املعدة لن تتحمل الا ما يمكنها حمله
اما باقي الطعام راح يكون مصيره البقاء من دون أكل .. لان وجبة السحور
راح تكون مختلفة عن وجبة الفطور ..

تحية لك ..

[حتشبسوت]

أخوي الزاجل موضوع غاية بالأهمية والروعة
فعلا الأسراف برمضان مبالغ فيه جدا جدا وياليت السالفة على الصحون الصغيرة اللي تنرسل من بيت لبيت
لالالالالا السالفة تعدت وصارت مبالغ فيها جداجداجدا والله من قبل سنتين كنت معزومة على الفطور عند قرايبي وكانوا ساكنين في منطقة معروفة بناسها الراهيين ولما قرب أذان المغرب شفت شئ غريب صحن ذبيحة أشكبره وأجدور يمكن 3 واحد فيه هريس والثاني ثريد والثالث والله نسيت أيش فيه غير صحون الحلويات أشكال وألوان تقول بوفيه كامل أنا تخرعت
أوكيه في ناس مثلي ومثلك ومثل باقي أهل قطر يرسلون صحن يكفي أربع أشخاص من باب المجاملة والكرم لكن كل جدر يكفي أسرة مكونة من 15 شخص غير صحن الذباح والله من أستغرابي ما فطرت إلا شي بسيط والله حرام كل هالأسراف وياليت الناس تتعظ وتقول أن النعمة زوالة لكن ما فيه فايدة
وأخرتها من كم يوم بالميرة وحدة تحاسب قدامي 5 عربات:eek2: مليانه وحسابها طلع 2990 ريال ليه عاد كل هذا الميرة بتطير
بالنسبة لي الوضع ما يتغير الغدا بغير رمضان هو الفطور برمضان حتى الكراميل والحلويات ما أسويها وجيراني ما أعرف أي أحد منهم للأسف صار لي 5 سنوات ساكنه والله أسم جارتي ما عرفته إلا بالصدفة من سنتين يعني اللي مخليني مختلفة عن أهل قطر لأني بيتوتيه:D جداجداجدا ويمكن لو أعرف الجيران بأصير مثل باقي أهل قطر وبأرسل أكل بالهبل:p
بالنهاية موضوعك رائع جدا والحل بيد الرجال حددوا الميزانية وما عليكم من دلع النسوان وإذا أطبخت المرة أكثر من اللازم قعدوها وقلولها أكلي كل اللي طبختيه:funny: :funny: ككخخخخ يا ويلي من الحريم:p

[بنت الحرمي]

يعطيك العافية اخوي

بدل مايصير شهر رمضان عبادة وصوم ..

للأسف عند البعض صار بذخ واسراف في الاكل..

اتمنى ان هالظاهره تزول وتختفي في القريب العاجل ..


تسلم اخوي على هذا الطرح المتميز

[الزاجل]

هلا حبشموس ..

ما شاءالله عليهم راهي وربنا منعم عليهم
زين تضامنتي مع الناس اليواعى وما كلتي الا اشوي ..

ويعطيج العوافي على المشاركة
.................................................. .....................................

بنت الحرمي
ياهلا ومسهلا والله يعافيج

اضم صوتي لوصتج بأنني اتمنى زوال مثل هذه الظواهر ..
تحية لج

[وطن]

الزاجل انا ما اطبخ :)

ولا اكل وايد على الفطور عشان اقدر اروح المسجد واصلي وانا مرتاحة

الحمدلله :)

[الزاجل]

الزاجل انا ما اطبخ :)

ولا اكل وايد على الفطور عشان اقدر اروح المسجد واصلي وانا مرتاحة

الحمدلله :)
الحمدلله
وربنا يتقبل منك :nice:

[وطن]

منا ومنكم صالح الاعمال اخوي

[مهاوي]

مبروك عليكم هالشهر الفضيل

والله انا بقولكم الصدق والي يصير في بيتنا وبكل امانه
الوالده الله يسلمها تبالغ تبالغ تبالغ صح
يعني بالشهر هذا ممكن عشرين ولاخمس وعشرين ذبيجه
وعلى السفره لازم الهريس ملتين كبار والثريد والرز وكل شي بق سايز
والمصيبه محد ياكل لا بمجلس الرياجيل ولا مجلس الحريم
والسواقين المساكين وشو يدور راسهم من التوزيع وربي يكسرون الخاطر
بصراحه البيت رافض هالمبالغه الي تصير وهالتوزيع الي كل يوووم تقول سنه مؤكده
يعني بكل صدق تبذير واذا كلمنا الوالده حرام يايمه الي يصير قالت الحرام تمنعوني من الصدقه
وش يقنع هالعجوز انه الي تسويه مهب صدقه الا تبذير وتبذير مدري:con2:

الله يسلمها بس ويخليها لنا بركة البيت