أين الأحترام لزملائهم

[أبو سعود]

يا كثر ما نشوف الأولاد يتشاجرون مع زملائهم

على طول وكثير ما تكون أسباب تافهه ومن

دون التفاهم بينهم سواء في المدارس و الفريج


وقد تحدث أصابات بينهم


على سبيل المثال :


يأتي أبني الصغير من المدرسه ويشتكي أحيانآ

بأن بعض الأولاد يتصرفون كالمجانين :


- يضايقونه ويضايقون الأولاد الآخرين


- يضربونه ويضربون الأولاد الأخرين


- يسحبون شنطته وشنط الأولاد الآخرين


- يصرخون في وجه وفي وجه الأولاد الآخرين


- أحيانآ يمسكون حنجرته


كله هذا من دون سبب ومن دون أن

يتحرش بهم سواء في المدرسه أو في الباص


ويقول أحيانآ أدافع عن نفسي وأحيانآ

أشتكي عند المدرسات


بعضهم يحصلون على العقاب وبعضهم

لا يقولون لهم شي


وعندما تشتكي عليهم بالمدرسه أحيانآ

يقولون هؤلاء أطفال



ولكن أن حدث شي لا قدر الله من يتحمل المسؤوليه



ومن كثر ما شفنا كثره الأحتكاكات والشتم بين

الأولاد وعلى أمور تافهه أحيانآ من قبل


تشعر بأن هـؤلاء الأولاد لم يزرع فيهم بصمه

قيمه الأحترام والتفاهم مع زملائهم


الأولاد يحتاجون إلى تقديم النصح والتوجيه والأرشاد

لتساعدهم على ضروره أحترام زملائهم

وذلك حتى لا يتعرضوا لأي أذى أو عقاب

[qrt_trading]

شوف أخوي هالنوعيه من الأولاد يبيلهم فصل يمكن يمكن يستعدلون أشوي، وهالمدرسة يبيلة أتروح بنفسك لهم وتلعن بو خامسهم بعدين راح يهتمون بولدك إذا تركت الأم تتصرف بنفسها لا راح تأخذ حق ولا باطل دام الطيب ما نفع معاهم اللعانة هي دواهم.

[حمد بن سعد]

وزارة التربيه والتعليم

وزارة التعليم والتعليم العالي

[العقل المدمر]

المشكلة بعض الامهات لو قالوا لها عيالها مسوين شي
تنقلب وحش وتدافع عن عيالها كنهم ملايكة ما يغلطون
ولا تصدق اي كلمة مب عدلة تنقال عنهم ويمكن تصدق وتكابر
اتذكر وحدة ولدها مسوي عمره ملاك جدامها
وكل شوي يجيها ويتبلى على حد من الصبيان انه ضاربه
وتروح تزفهم ومرات تضربهم وهو يطالع ويتبسم
وتقول ولدي مستحيييييل يجذب :waiting:

[راعي ال VXR]

لاحول ولا قوة الا بالله اللهم احفظ ابنائنا من كل سوء

[eXpert*]

يا ريت من أولياء البعض قبل لا يسمح لأبناءه بالخروج للشارع يعلمهم شوية أخلاق وأدب بس شوية ..

مع الأسف في السابق كان التنافس على تربية الأبناء على الإحترام والأدب وحسن الخلق .. هاليومين صار التنافس على التربية بأدنى مستويات الوقاحة وعدم الإحترام ..

[عثرة جواد]

بنتي تقول يمة ف بنية كل ماتشوفني تقول الله ياخذج مع انها ماتعرفها ومب وياها ف الصف


اتقول بنتي سالتها ليش ماتحبيني قال بس جي اكرهج .....وحتى لو لقتها برع المدرسة


سالت بني ليش تعتقدين تكرهج قالت اتغار مني لانها دبة ومب حلوة ههههههههههه


قلت لها قولي لها الله يسامحج وروحي عنها بس لو حاولت تسوي لج شي اشتكي عليها وكلميني


حنى الطفولة اختفت

[مهرة]

يا ريت من أولياء البعض قبل لا يسمح لأبناءه بالخروج للشارع يعلمهم شوية أخلاق وأدب بس شوية ..

مع الأسف في السابق كان التنافس على تربية الأبناء على الإحترام والأدب وحسن الخلق .. هاليومين صار التنافس على التربية بأدنى مستويات الوقاحة وعدم الإحترام ..


للأسف اخوي هذي مش (اشوية) تربية هذي همجية خلف وقط وخلي الشارع يربيهم .!

هالنوعية من الناس الغير مسؤولة الي عندهم الخلفة والتربية تحصيل حاصل شي وصار مايقدرون يردونه او يتقبلونه او يلتزمون فيه لاء من جا حيالله ومن راح الله وياه التربية والأخلاق عندهم انه ماكلين وشاربين ومستانسين واهم شي محد يضحك عليك ولا يعلم عليك خلك رجال وخذ حقك بيدك ولا يهمك كبير ولا ترحم صغير,, ولا يهمهم مستوى دراستهم 7 سنين حذفه في المدرسة وهم بيربونه وبس والشهادة ثانوية والشغل مضمون وتزوج وخلف وكغثاء السيل وبس والله.!

[BoTamem]

الله المستعان قبل كم يوم ولد عمره 10 سنوات متحرش بزوجة مدير المدرسه وصارت سالفه عليها وجت ام الولد تترجى لانهم بمدرسه اجنبيه

[BoFahed]

الله المستعان

فعلا فيه ابناء تربية خدم ولا يعرفون الاخلاق لانه اصلا والدينهم مب متربين اصلا ودايما عيالهم ينفصلون ويدافعون عنهم بدل ما يربونهم ويعاقبونهم .

انا دايما اعلم ولدي على احترام ربعه مهما كانت جنسياتهم والمعلمين خط احمر واكد عليه اذا ضربت حد وانت متبلي عليه بجي الطش فيك قدام ربعك

واعلمه اذا حد غلط عليك ولا تمد ايدك روح واشتك عليه بس اذا حد مد يده عليك لازم ترد عليه وتكسره لها وتوقفه عند حده .

[بعيد النظر]

موجودة هالسوالف من زمااااااااااان ..
لي وصل باص ولدك اركب الباص وخذ رقم ابوه منه واتصله قدامه ..



وقوله ترا ولدي متاذي من ولدك .. يا تسنعه ولا اسنعه لك

[بشائر]

الله يعينك ويعين ولدك على هالنوعية من العيال قلة أدب ومايفيد فيهم الفصل أو التوبيخ وتلقى البيت دامر من أساسه !
روح للإدارة واشتكي على اللي يضربون ولدك واطلب مقابلة أولياء أمورهم يمكن ينتبهون لهم
وممكن بعد تنادي العيال وتقعد معاهم وتفهم منهم ليش يسوون كذا؟!
وعلم ولدك كيف يدافع عن نفسه.. كثروا قليلين الأدب واللي فيهم أمراض نفسية هالأيام ..

[تاجر كشخة]

صحيح كلامك اذكر لما كنت في المدرسة الصف السادس هجموا علي 4 اشخاص مثل المجانين من صف غير وما حسيت نفسي الا انا منسدح وضرب فيني ولا اعرفهم ولا هم يعرفوني واول سنه لي في المدرسة لكن واحد كان في صفنا متين فزع لي وكلم المدير عاد المدير ما قصر
لشطهم في الطابور لين بكوا وانا لين الحين مب فاهم ليش صار كذا .

[qatara]

كل هذه السلبيات نتجت


اولا عن الغاء التربيه


وثانيا نساء يدرسن اولا د

وثالثا عدم تدريس التربيه الدينه من التاسيس العيب (الغير جائز ) والحرام