مهندس استشاري للاشراف على تشطيب فلتين

[بدوور]

محتاجين مهندس استشارى يتولى تشطيب فلتين عظم سوف يتم الانتهاء منها وتسليمها خلال هذا الشهر( ياريت اقتراح اسماء ثقة في الاهتمام والاخلاص)
ولقلة الخبرة ارجو الافادة حول مسؤليات الاستشارى خلال فترة التشطيب الى التسليم مفتاح
وما هي الاواق المطلوبة من المقاول الاساسي عند استلام الفلتين عظم
اشكركم على وساعة صدرركم على الاسئلة

[معماري قطري]

الإستشاريين أغلبهم يتملصون من مسؤولياتهم وخصوصاً التشطيب يحتاج أول شيء مواصفات دقيقة ويحتاج تجهيز عقود واجتماعات .. ورسومات تفصيلية وعينات

طبعاً المقاول الرئيسي عليه يسوي رسومات للعمل المنفذ تسمى As Built Drawings وهذي يؤكدها الإستشاري عند الإستلام ويجهزها للمقاول أو المقاولين اللي بيستلمون التشطيب .. ومستحيل مقاول يقدر يسوي كل شغل التشطيب .. عندنا الأعمال الخشبية في الغالب يعطي منجرة ويدور منجرة رخيصة حتى يستفيد .. الإستشاري الشاطر ينسق مع مناجر ويعرض تصاميم وأسعار واتفاقيات جيدة للمالك .. كذلك شغل الألمنيوم أو اليو بي في سي .. كذلك الدرابزين والرخام يعطيه ناس مختصين .. أما أعمال البلاط والصبغ وسوكتات الكهرباء والديبيات ممكن الغالبية يسونها

أغلب الاستشاريين يشردون من هذي الشغلة أو يسعرون غالي لو انطلب منهم التنسيق وبعضهم يستغلون جهل المالك وما يسوون كل شيء يشرفون على الأُمور المهمة ويخلون الاتفاق كله يسويه المالك حتى ما يبتون في العقد

التكييف موضوعه مهم خصوصاً لو بيكون مركزي أو دكت سبلت والإتفاق على المصعد كذلك ومتابعة تركيبه وبعض الأثاث الثابت مثل الكبتات وتجهيز غرف الملابس

انا دوم انصح بكسب الاستشاري الجيد ليغطي كل المراحل من تصميم مبدئي لتصميم تفصيلي للعقد الأساسي وللعقود بالباطن ومتابعة كل هذي العملية والاشراف المتواصل لين الاستلام .. حتى لو نبي انترير دزاين ننسق مع مصمم الانترير والاستشاري

المشكلة اللي دوم انصح بهم غاليين لكن اتوقع اللي بيتفاوض وبيدور بيحصل استشاري جيد بسعر معقول وكله يعتمد عندهم على حمل العمل وبعضهم يعتذرون وبعضهم يعطون سعر خيالي حتى الواحد يبعد عنهم .. إم زد مثلاً شغالين في توسعة فيلاجيو ألحين ومديرهم كان زميل عمل وكنت متدرب عنده في بداية حياتي العملية وهو من أفضل المهندسين أقدر اقول الانشائيين في العالم .. ومكتب ابراهيم الجيدة اعتقد العربي للشؤون الهندسية مكتب قوي وادارته قوية بعد .. مكتب اتحاد قطر للتخطيط منظم وقوي .. المانع للاستشارات وعندهم عدة شركات بعد .. الاستشاريون العرب محرم باخوم قالوا لي بالحرف الواحد مشاريع صغيرة وخاصة ما نبي بس بعد هذا من فترة وممكن ألحين عندهم شغل قليل .. مكتب مصري وسط لي معرفه مع مديره وهو قديم في قطر ويشتغل حق الأوقاف بس كبر الحين وولده مستلم ادارة المكتب والمكتب اسمه جماعة العمارة العربية صوب السينمات

ولازم زيارة هذي المكاتب وملاحظة استعدادهم لترتيب الاجتماعات ومناقشة الشغل صح وفي مكان هاديء

بعد نقطة مهمة آحب انبه لها الجميع واللي هي تصنيف المكاتب درجة اولى وثانية .. المهم المكتب فيه مهندسين اشراف انشائيين وكهربائيين وميكانيكيين وللتشطيب المعماري بعد مهم

لي صديق مهندس هندي قديم في قطر وفي السعودية قبل واشتغل آخر شيء 7 سنين في المكتب الخاص وألحين فاتح شركة ويسوي ادارة مشاريع وله علاقات مع الشركات اللي تنفذ ومع الاستشاريين وهذا شغله خاص ومكتبه في المنتزه .. يعني هو مقاول لكن يسوي ادارة مشاريع واجتماعات وترتيب بس الاشراف يكون عن طريق مكتب والتشطيب ممكن هو يسويه عن طريق شركته أو يتابع شركة ثانية تنفذه ورقمه موجود عندي للي يبيه

[بدوور]

مشكور معماري قطر كفيت ووفيت وياريت تطرش المهندس الهندى وجعلة في ميزان حسناتك

[معماري قطري]

تم ارسال الرقم وإن شاء الله يكون موجود وفاضي حق هذي الشغلة

البديل أي مكتب ممكن يتابع التنفيذ بس أفضل يكون مكتب فيه مهندسين مختصين كهرباء وميكانيك وانشائي