صب ارضيه الحوش

[M.Alkhater]

السلام عليكم

محتاج شركة لصب ارضيه الحوش قبل تركيب لارضيات ..

من يخبر لي شخص تعامل معاه .. وكم،سعر المتر ..

وشكرا

[معماري قطري]

عليكم السلام ورحمة الله وبركاته

لصب الأرضية لازم تحدد مواصفات معينة حتى ينبني على أساسها السعر

العملية بسيطة جداً .. أهم شيء محدد التمديدات ومسوي مخطط دخول السيارات وموزع مباني الحوش صح ومناطق الزراعة .. حماية المنهولات والأساسات شيء ضروري حتى بايب الصرف الصحي لو تمر فوقه سيارة لازم تنصب حوله خرسانة كحماية وتقوية ولو نازل تحت زين نحميه بطابوق من الجانبين ونصب شوية خرسانة فوقه حتى يقاوي وزن السيارة فوق

أحد الإخوان حط صور للحماية وكان مسوي حماية صح أعتقد عزيز يو كي .. وللزراعة تحتاج تكون مسوي حفر غزيرة بعمق لا يقل عن متر ونص ولو وصلت مترين أفضل وتحمي حوض الزراعة بالطابوق من الجنب وبين الطابوق وحدود الحفرة تعزل بنايلون سميك وتكون ممدد للماء مع حماية التمديدات أو تخليها ظاهرة فوق حافة الطابوق لسهولة الصيانة

بعدين مهم تعمل وزنية لميلان الحوش جهة الصرف .. الغالبية للأراضي العادية السلوب جهة الباب لكن للأراضي الكبيرة ممكن نسوي عدة اتجاهات لتجميع المياه وأفضلها جهة الزراعة .. الوزنية يسويها المقاول بحديد ويعلم عليه حدود الدفان المدكوك والحديد يكون مغروس وثابت في الأرض .. والميلان الزايد يكون مزعج والبسيط يجي أحلى بس شوي مغامرة ممكن تصريف الماي ما يكون سريع وفعال وتحصل نقعة بسيطة .. عندك من نص سم لين 1 سم لكل متر نسبة معقولة يعني بين 0.5% و 1% سلوب .. وهذي تترجمها على أرض الواقع بحيث تقيس أبعد طول عندك لجهة التصريف ولنفترض وصلت 20 متر جهة الباب تنزل بين 20 سم و 10 سم .. العشرين أسهل وأوضح وبعض الشركات يستعملون جهاز الليزر وهو سهل جداً في ضبط السلوب وبعضهم بالخيط ويدوي وبعضهم مثل العرب ( هوي هوي وبالنظر )

لازم تدفن ويمكن تحفر شوي حتى تضمن السلوب المناسب مع دك الأرضية .. الدفان أما ناتج الحفر وبدون حجارة كبيرة أو من برا بشرط ما يكون بودرة وبعد ما يوصلون للعلامات اللي على الحديد يكون عندك الحوش جاهز لعملية الصب والتحضير لها بفرش نايلون سميك .. والبعض يحطون شبك حديد وبسكوتات تحته لكن انا افضل تطلب خرسانة مخلوطة بفايبر بقوة 15 - 20 نيوتن أو تشتري الخلطة ويخلطها العامل مع الردي مكس وتفتك من الحديد والفايبر ميزته ما يسوي عندك كراك اسمه ومواصفته الهندسية ( crack controlling additive .. Grace Cemfiber F12) وغريس الإسم التجاري وغيره وايد وايد في السوق عند تدمر والدرويش واتوقع عند غالبية شركات الردي مكس .. هذا حتى ما تحتاج الخرسانة رش بالماي وتقوى بعد 3 أيام والسمك عندك من 10 سم ل 15 .. سو 12 كفاية ولازم تسوي فواصل تمدد ببورد هش خاص بالتمدد وتتسكر من فوق بماستك أو بحبل الماستك تحت وفوق بماستك لو سمك الخرسانة 15 سم تسوي الفواصل لكل 15 متر في كل اتجاه .. 12 سم لكل 12 متر فاصل

يمكن التفاصيل صعبة عليك ولازم يشوفها استشاري فاهم حتى يطبقها وممكن لو حصلت مقاول مع فورمان جيد يكون فاهم ويطبقها بسهولة

هذي الطريقة سويتها لبيتي للحوش وللداخل وبدون حديد للطابق الأرضي .. وصراحة ما تحتاج لتبليط لو بتحط سجاد تجيك الارضية قوية وناعمة ومستوية ولو بابني أي مشروع جديد افضل هذي المواصفة وللحين 11 سنة حتى عمدان المواقف في الحوش ركبتها ببراغي وبدون أساسات لأَن أَساس الأرضية قوي

لو تبي تخطيط المنطقة واقتراحات ثانية طرش لي المخططات للحوش بصيغة اوتوكاد وباسوي لك مقترح بس السلوبات تنظبط في الموقع وممكن تضيف درجة للمدخل أو تقلل درجة هذا شيء وارد بس تحمل من الرامب للحوش المرتفع بطريقة قوية هذا يكون مزعج