عمليه الليزك تصحيح نظر (ضعف النظر) في الدوحه؟!!

[دايموند]

السلام عليكم

ياليت تنصحوني نظري ضعيف ولاعت جبدي من العدسات والنظاره

الي عنده خبره او الي يعرف وين تنصحوني عند اي دكتور او عياده اسوي عمليه الليزك وفي تقنيه اكثر تطورا بعد بس نسيت اسمها..

وكم تكلف العمليه؟


بانتظار مشاركاتكم ..شكرا

[سعود.]

روح الريفي في ( البحرين ) أفضل مكان في الخليج .

[دايموند]

صعبه حاليا اسافر...علشان جذي ابي في الدوحه

ياليت حد يفيدنا وين في قطر وبكم؟


شكرا لم

[لبيبة]

وعليكم السلام ورحمة الله وبركاته،

من متابعتي سابقًا في المنتدى عرفت إن د. خالد الشريف كثير يمدحونه، ويسوي العملية ب 9000 ريال، وهو طبيب زائر في مركز العيون التخصصي.

وبحثت لج عن موضوع فيه آراء الناس فيه، هذا الرابط (http://d.pr/uQTG)

والله يكتب لج الشفاء العاجل بإذنه تعالى.

[بعيد النظر]

انا سويتها ف مركز العيون التخصصي عند احمد بدوي ..
من تقريبا 5 سنوات !


الاهل .. سووها في مغربي ..
من سنة ونص تقريبا" ..


والحمدلله الامور طيبة

[A-Alansari]

في عمليه جديدة الحين مادري شسمها بس ماتحتاج جراحه او اي شي

ومن تخلصين العملية تطلعين وتشوفين عادي ومايحتاج تريحين عقبها

اتوقع يسونها في المستشفى الاسباني او شي جي اسم المستشفى ماعرفه بالضبط

[دايموند]

انا قالوا لي عن انتراليزك..قالوا لي في المغربي..مادري اشرايكم فيها؟

[ya3coub]

^^^^^^^ بالظبط

انا سويت انترا ليزك اتش دي Intra Lasic HD

عند دكتور احمد محمد المعتصم سويتها فدبي العيادة البريطانية لجراحة العيون
وقتها كان حسب السيفي من الأوائل و احسن الناس المتمكنين و الي يحدث شهاداته بأخر ما توصلت له الجراحات البصرية و الأجهزة, مصري الجنسية محترم جدا و يجي بزيارات دائمة للدوحة فالمركز الأسباني للعيون لما عرف اني قطري قالي ليش جاي لين اهني انا دايما اجيكم فالمركز الأسباني.

كلفتني وقتها من 3 سنين تقريبا و شوي ما يعادل 16-17 ألف ريال قطري و اختي عندها انحراف حاد كانت بــ12 الف.

"انا كنت ما اشوف بدون نظارة" <<<< و لله الحمد الأمور ممتازة و طيبة من ذاك الوقت


http://www.britishlasikdubai.com/ar/our_team.php?sub_id=7&ct_id=8

الدكتور محترم جدا جدا جدا و يمكن من 3 سنين إلى الآن في اجهزة جديدة و هاي اهم شي انه كم طبقه راح يشيل من العين و كل ما تطورت الأجهزة صارت كفائتها احسن و العين ما تتضرر.

الدكتور بدون اجهزة متطورة ما يقدر يسوي شي, لما سوالي العملية راواني الأجهزة و متى شروهم و السيرفس مالهم. عنده اسلوب يطمن المريض و لما خلص اول عين انا ما كنت متوقع علبالي تجهيز لين ما قالي مبروك خلصنا 50% من العملية باقي العين الثانية و خلاص.

الفحص عندهم وقتها كان ببلاش و الإستشارة ببلاش و بعدها موعد و من ثم الدفع للعملية فقط شامل الأدوية و كلشي و الأسعار تعتمد على مدى الضرر الي فالعين و قوة عدم الرؤية

[دايموند]

توني اتصلت ع عياده رويال ميديكال..وقالوا لي عندهم كل انواع الليزر بس قالي لازم اول شي الفحص وعقب يحددون لي شنهي انسب تقنيه لعيوني..
وقيمه الفخص 1200 ريال...


مادري اتوكل وروح لهم؟
قالوا لي عندهم زائر دكتور بحريني

[دايموند]

يعقوب كم كلفتك؟

[ya3coub]

ما اتذكر بس بالكثر 16 ألف هالكلام سنة 2012 شهر 11 و عيني نفس ما ذكرت كنت ما اشوف جدامي بدون نظارة اذا اقعد من النوم لازم بيدي اتحسس السرير لأن اذا النظارة قدامي ما اشوفها و لله الحمد اهو الوحيد الي وافق قبله 3 دكاترة قالولي ما يصير لأن عدد طبقات عيني قليل و العملية فيها نسبة خطر كبية.


اهو رحتله قالي نفس الكلام و قالي مافي شي مستحيل خلني اجرب على بيضة "عندهم طرق" و اذا نجحت بيتواصلون معاك علشان تجي تكمل اذا حاب. و فعلا خلال اسبوع واحد اتصلو فيني بأن الدكتور يقدر يسوي العملية و متطمن.

و لأنه نظري كان ناقص جدا قالي خلال 6 اشهر إلى سنة ممكن اسويلك تصحيح هنا "جميرا دبي" او فالدوحة ببلاش. و لله الحمد ما احتجت اي شي اللهم الدوى قطور اسبوعين و بس.


جربي أختي اتصلي بالمركز الأسباني و كلميهم اذا الفحص بفلوس او ببلاش, مو خسرانة شي بدال ما 1200 فحص.
الي سمعته انه الأسعار الحين صارت ارخص والله العالم بصراحة

[دايموند]

شكرا يعقوب...

[بوراشد82]

دكتور خالد الشريف ممتاااااااااااااااااااااااز ،، روحله وانت مغمض،، كل جماعتي مسويين عنده والنتيجة ماشاء الله ،،

[دايموند]

شكلي بروح لخالد الشريف...


سويت الفحوصات عند دكتور البحريني حسن العريض..وامس قعدت اناقش الفحوصات مع د سوري في عياده رويال ميديكال..
وقالي صعبه اسوي عمليه ليزك وانترا ليزك حاليا لان عيني ما بتتحملهم و فيها تعرجات وطبقه القرنيه ضعيفه وان قرنبتي فيها من القرنيه المخروطيه في في بداياتها قالي تسمى القرنيه البدائيه..!!وقالي لازم اول شي اسوي عمليه تصليب وتثبيت القرنيه وبالانجليزي اسمهالـ (Cross-Linking) وعقب 6 شهور اراجعهم واسوي الليزك..

مع ان الدكتور حسن العريض قالي بيسوي لي العمليه الاسبوع الجاي!!والسوري قالي لا تسوينها لانها مجازفه ولازم اول شي تقويه القرنيه ..

بصراحه خفت...


شكلي بشوف د خالد الشريف شنو بيقول

[دايموند]

حد جرب الـ (Cross-Linking)؟!

[دايموند]

اتصلت توني ع مركز العيون التخصصي وطلبت اخذ موعد مع د خالد الشريف قالوا لي مايدرون متى بيجي وبيتصلون لي عقب بيخبروني.. وخذيت موعد عندهم عند دكتور اسامه للاستشاره وعمل الفحوصات..

[S.T.Y.L.E]

انا رحت المركز الاسباني اسوي فحص
عندهم فحص الترا ليزك مجاني
ولاتنسى ان الالترا ليزك ادق حسب الدراسات يعني والعمليه اسرع

وولامانه الدكتور كان صريح معاي ومب مادي ابداً وهالشي وايد زين ، قالي فالوقت الحالي ما انصحك وانتظر فتره بعد

مكانهم صوب محطه الوعب

[أم عزوزي]

ماعليك شر ان شاء الله

بخصوص الي يقول روح للريفي ترى سكرو عيادته لان ولده كان يسوي العمليات من دون رخص ولا شهادات

والريفي مو كل من نجحت عمليته وياه ...

على كل ..

عن تجربه عندك د. اشرف شكري في المغربي للعيون هني بقطر

ماشاء الله انسان محترم وشاطر وفاهم ويده خفيفه ويسوي ديسكاونت واذا عندك تامين بعد خير وبركه

وبالتوفيق للجميع ان شاء الله

[بانغ بانغ]

والله انا ودي بعد اسويها

احس الزوووم اخترب

[الحياة الخالدة]

http://www.qatarshares.com/vb/showthread.php?618722-%CA%CD%D0%ED%D1-%D4%CF%E5-%C7%E1%E1%E5%CC%E5-%E3%E4-%CA%DA%C7%E3%E1-%E3%DA-%E5%C7%E1%CF%DF%CA%E6%D1-%D3%E3%ED%D1-%C7%E1%DE%E6%D3%E3%ED&p=10362588#post10362588

الله يشفي الجميع و يحفظكم
فكروا جيداً و شاوروا واستخيروا قبل ما تتعاملون مع أي طبيب

[دايموند]

مابي اغامر..تعبت نفسيا ..قلت بعيد الفحص عند دكتور. خالد الشريف وبشوف شنو يقول المشكله ليحين مو محدد موعد متى بيكون في قطر..

[ابوعلي]

الحمدلله سويت الليزك عند الريفي من 2002

والحين صرت احس في ضعف بسيط ولكن الامور ماشية عندي

وننتظر النوع الجديد وبنتوكل على الله

[دايموند]

ابو علي .. روح افحص مره ثانيه وتأكد من سبب ضعف النظر مره ثانيه...



توني طالعه من مركز العيون التخصصي..سويت فحوصات عندهم ب 950 ريال

وقابلت د اسامه اردني وشرح لي بالتفصيل كل شي وفعلا قالي قرنيتي ضعيفه وما تتحمل انترا ليزك والتراليزك وغيره..
ماينفع معاي الا اليزك..وقالي اني فعلا محتاجه الى تثبيت القرنيه لان في احتماليه تصير قرنيه مخروطيه..

حسبي الله ونعم الوكيل دكتور حسن العريض لما فحصت عنده قالي راح نسوي لج العمليه الليزك يوم الثلاثاء الي هو المفروض امس ولا قالي ان قرنيتي ضعيفه ولا قالي اسوي تثبيت قرنيه


وانا لحتى الان قابلت دكتورين بعده والاثنين قالوا لي اني ماقدر اسوي عمليه تصحيح االنظر قبل لا اسوي تثبيت القرنيه..

دكتور خالد الشريف صار له شهرين ماشرف العياده ومب عارفين متى بيجي قطر
ارتحت للدكتور اسامه
وحددت موعد الاحد الجاي راح اسوي تثبيت القرنيه وعقبها تصحيح النظر باليزك..

[ya3coub]

ما عليج شر اختي دايموند

جربي الأسباني الي قلت لج عنده و حسب علمي فحصهم ببلاش

انا ما اعرف شنو القرنية و الباقي بس حاسبي عندنا العضو ولد العرب مسكين بكرة عملية زوجته و عينها متضررة بسبب احد العمليات بالأردن.


شوفي كم دكتور مشكلة الليز او الليزك العادي بأنه يستهلك عدد طبقات اكثر من العين بالحرق يعني كل درجة ممكن تاخذ عشرين طبقه من عينج و صحيح يعتمد على اشياء كثيرة.

نصيحه لا تستعجلين و اخذي راحتج العين من اهم الحواس الي يعتمد عليها الإنسان