كيف اقدر اقلل نسبة الحديد في الجسم!؟

[بوحارب]

السلام عليكم


كيف اقدر اقلل نسبة الحديد في الجسم!؟

للعلم صارلي فتره أشيك ودائماً يكون الحديد زايد عندي

للعلم زياده الحديد له بعض الاثار السلبيه

فاللي يعرف كيف الطريقة لتقليل الحديد يا ريت يخبرني

ابي شي غير الدوا للعلم استعمل دوا حاليا بس ابغي شي ثاني

حتى لو كان مضر بالصحة عادي قولوا مثل البيبسي او اي شي

وشكرااااا

[ضوى]

الشاي الاحمر مع الوجبات يمتص الحديد

[حمد 2002]

ياأطفال يا حلوين اشربوا الحليب... للصحة ...و القوة ...اسألوا الطبيب

ابتعد عن شرب الحليب والكرك ..

[بوحارب]

الشاي الاحمر مع الوجبات يمتص الحديد
اشكرج



ياأطفال يا حلوين اشربوا الحليب... للصحة ...و القوة ...اسألوا الطبيب

ابتعد عن شرب الحليب والكرك ..
الحليب ممكن
بس الكرك وش دخله في زيادة الحديد !؟

[حمد 2002]

لانه جاي الكرك من مكوناته الحليب يالذكي .. :secret:

[direction]

السلام عليكم ... يمكن التبرع بالدم ينفع فهالحالة ..

[Charisma]

هههههههه "حتى لو كان مضر عادي قولوا " ، الله يسعدك ياشيخ هههههههه والكاتب الصحفي يقولك ابتعد عن شرب الحليب ، انا خبري ان الكالسيوم يؤثر على امتصاص الحديد . :telephone:


عليك برد الأخت ضوى والأخ دايركشن ، وماتشوف شر .

[بوحارب]

لانه جاي الكرك من مكوناته الحليب يالذكي .. :secret:
حليب الكرك مضر من الأصل ما يعطيك اي شي

ويكون مضر اذا كثرت منه بس

اما قلاص صلاصين في اليوم امورك طيبة



السلام عليكم ... يمكن التبرع بالدم ينفع فهالحالة ..

عدل كلامك بس بالطريقة هذي يبيلي سنه قدام اتبرع بالدم شهريا

وبالتالي راح يأثر على عمل النخاع الشوكي

وللعلم انا خلاص ما عاد استطيع التبرع لأني خذيت كيماوي قبل

وبالتالي الدم المسحوب يتم التخلص منه بأي طريقة اخرى

اشكرك ع الرد

[بوحارب]

هههههههه "حتى لو كان مضر عادي قولوا " ، الله يسعدك ياشيخ هههههههه والكاتب الصحفي يقولك ابتعد عن شرب الحليب ، انا خبري ان الكالسيوم يؤثر على امتصاص الحديد . :telephone:


عليك برد الأخت ضوى والأخ دايركشن ، وماتشوف شر .
ياخي نبي انزل الحديد بأي طريقة هههههههههههه

شكلي بتعامل مع مصانع الحديد :(

منور يا كابتن

[Charisma]

ياخي نبي انزل الحديد بأي طريقة هههههههههههه

شكلي بتعامل مع مصانع الحديد :(

منور يا كابتن

بوجودك يالفخم ،


شوف نظامك الغذائي ، اللحوم والكبدة والعدس والكورن فلكس وصفار البيض والسبانخ فيهم نسب عاليه من الحديد ، يعني باختصار :

وضعية القص وقت العزايم .
اكس على البلبل وابو المشاتين.
وقت الصباح كرك بدون كورن فلكس .
سوالف جم وضرب بيض مانصحك.
في حال انسجنت ، ارفع طلب بتغيير مينيو العدس .
لاتصدق باباي .



:telephone:

[بوحارب]

ههههههههههههههه ياخي لاتجيب طاري السجن مب وقته الحين

والله اللحم ما اكله الا مره مرتين في الأسبوع
والبيض ماعرفه يمكن مره في الاسبوع

ياخي اشرايك في المخدرات تنصحني فيها ؟
يمكن تنزل الحديد بسرعة !

[بصمة قطرية]

الشاي الاحمر مع الوجبات يمتص الحديد

أسرع حارق للحديد الشاي الأحمر
ممكن بعد الأكل مباشرة ..

[بصمة قطرية]

و نفس الوقت إبتعد عن الأشياء اللي فيها
نسبة عالية من الحديد مثل ما قال لك بايلوت
خصوصاً الكبدة و السبانخ و الملوخية ..

[بوحارب]

يسلموا دكتورة بصمه

ومعاك واحد شاي سكر وسط للأسطه بوحارب وصلحووووووو

[سالم الزهران]

اذا انت تستخدم ادوية فيجب عليك ان تحرص ؟ و الكلام اللي نقوله ماهو نصايح طبية بس من اللي نسمعه ؟ انت عندك نقرس يا بو حارب ؟

[دايموند]

شنهي اضرار زياده الحديد؟

[بـن عدوان]

يقولك التيزاب زين

[توشيبا]

السلام عليكم

اذا تستخدم ادويه اسال الدكتور عنها يمكن اهي تسبب بعدم امتصاص الحديد من الجسم

وانصحك في اليانسون او النعناع

اذكر دكتور قال لي ادفن رجولك في تربه بحر

بكره بتصلك ان شاء الله وبساله

[فرفوش]

اخوي تبرع وإذا ماتقدر احتجم

[المحاميه]

اللي اعرفه التبرع بالدم
وماتشوف شر

[بوحارب]

اذا انت تستخدم ادوية فيجب عليك ان تحرص ؟ و الكلام اللي نقوله ماهو نصايح طبية بس من اللي نسمعه ؟ انت عندك نقرس يا بو حارب ؟
مرحبا سالم

تسلم ع الرد
وأبشرك ماعندي لا النقرس ولا النورس الله لايبلانا ;)


شنهي اضرار زياده الحديد؟
له أضرار كثيره وتختلف على حسب العمر

منها تليف الكبد والسرطان لكبار السن فوق الستين سنه

ممكن تسألين الدكتور قوقل هو أخبر مني ؛(


يقولك التيزاب زين
تبي توديني في داهية انت ههههههه


السلام عليكم

اذا تستخدم ادويه اسال الدكتور عنها يمكن اهي تسبب بعدم امتصاص الحديد من الجسم

وانصحك في اليانسون او النعناع

اذكر دكتور قال لي ادفن رجولك في تربه بحر

بكره بتصلك ان شاء الله وبساله
وعليكم السلام

شوف التختور وش يقولك وخبرني يالدكتور


اخوي تبرع وإذا ماتقدر احتجم
اشكرك


اللي اعرفه التبرع بالدم
وماتشوف شر
ممنوع اتبرع بالدم

اشكرج والشر ماييج ;)

[حمد 2002]

حط إعلان للبيع حديد ..

ولا اقولك صدر حديد لخارج الدولة هه هه هه


أمزح معاك حبيبي لاتزعل ..


وماتجوف شر .

[بوحارب]

هههههههههههههههههههه

الشر ما يجيك ؛)

[Al Basha]

أخوي هل تقصد بالحديد اللي هو صبغة الدم الهيموجلوبين ؟
أنا لأن نفس الشي الدكتور قالي الصبغة عندك مرتفعة نوعاً ما ولكن بشكل مطمئن ..
كيف تهوية المكان اللي تقعد فيه ؟ هل فيه روائح ؟ أصباغ وغيرة ؟
تدخن أخوي ؟ كيف حمض الدم معاك (الأملاح يسمونها أو اليورك أسيد) ..

[A-Alansari]

شوف الموضوع في الرابط ممكن يفيدك

http://www.altibbi.com/مقالات-طبية/امراض-الدم/ارتفاع-مستوى-الحديد-في-الجسم-هل-هو-ضار-560

[بوحارب]

أخوي هل تقصد بالحديد اللي هو صبغة الدم الهيموجلوبين ؟
أنا لأن نفس الشي الدكتور قالي الصبغة عندك مرتفعة نوعاً ما ولكن بشكل مطمئن ..
كيف تهوية المكان اللي تقعد فيه ؟ هل فيه روائح ؟ أصباغ وغيرة ؟
تدخن أخوي ؟ كيف حمض الدم معاك (الأملاح يسمونها أو اليورك أسيد) ..
هلا اخوي

كل اللي ذكرته ماله خص في الموضوع

وانا اقصد حديد الجسم ولا ادخن وبيئة الشغل سليمة

[بوحارب]

شوف الموضوع في الرابط ممكن يفيدك

http://www.altibbi.com/مقالات-طبية/امراض-الدم/ارتفاع-مستوى-الحديد-في-الجسم-هل-هو-ضار-560

اشكرك عزوز :)

[سالم الزهران]

نسأل الله لك الشفاء والعافية ، و اذكرك ان لا تاخذ كلامي على انه طبي بس حنا هنا مثل الدلالين ، لازم نفتي لكن ان شاء الله في السليم . حسب كلام احد الاصدقاء طلعت نسبة الحديد عنده و يقول كان السبب حبوب فيتامين اظنه قال بي سكس و هو مكمل يصرف مع علاجات كثيره و يزيد نسبة امتصاص الحديد . فأستشر طبيبك و خله يبحث لك الموضوع ! الشيء الثاني نفس الزميل يقول انه وصفوا له الملفوف و يقول استفاد منه و عليك تجرب و فالك الصحة والعافية و لا تنسى ان طبيبك أخبر .

[توشيبا]

كنت بتصله اليوم بس انتظر الوقت المناسب

لي انه من يسمع صوتي بيقول صيد لي ضبان

[بوراشد82]

اقطع الاكلات اللي فيه حديد عالاقل ثلاث شهور،، مثل اللحوم والكبده والبيض والجرجير وبذور القرع، العدس، السبانخ، الزبيب الاسود ، الملوخيه ،، الكاكاو المر ،، الفاصوليا البيضاء،، هذا كلام اخصائيه التغذيه ريم العنزي،، وماتشوف شر اخوي

[بوحارب]

سالم مشكور على الرد يالغالي وماقصرت ")

توشيبا جيب واحد ضب مع رز بخاري :)

بوراشد لاهنت فديت خشمك :)

[سالم الزهران]

حياك الله يبو حارب ، الحين اللي يفيد معك ان شاء الله انك تنشره بالمنتدى لان مشكلة زيادة الحديد منتشرة ، قدامك العافية

[بريق الحق]

بوحارب انت تتمرن ؟
تاخذ ادويه تاخذ شي

تواصل مع الشيخ عقل واسئله

[بوحارب]

حياك الله يبو حارب ، الحين اللي يفيد معك ان شاء الله انك تنشره بالمنتدى لان مشكلة زيادة الحديد منتشرة ، قدامك العافية
هلا سالم

حاليا استعمل هالدوا

أحدث دواء مستخدم في هذا المجال هو Deferasirox واسمه التجاري EXJADE.



بوحارب انت تتمرن ؟
تاخذ ادويه تاخذ شي

تواصل مع الشيخ عقل واسئله

تمرين خفيف وماخذ اي دوا الا نوع واحد ذكرته فوق

اتوقع ما يحتاج اسأل الشيخ عقل لاني متابع مع دكتور مختص
بس قلت بنشدكم هنا اشوف يمكن حد مرت عليه نفس المشكلة

لاهنت يا بريق الحق

[ملاك]

الشاي الاحمر مع الوجبات يمتص الحديد

اتفق بشده مع هالحل
اي وجبه فيها حديد اشرب بعدها على طول شاي احمر عشان يعيق امتصاص الحديد

[بوحارب]

اتفق بشده مع هالحل
اي وجبه فيها حديد اشرب بعدها على طول شاي احمر عشان يعيق امتصاص الحديد

هالفتره مستمر على الشاي الأحمر مع الوجبات وبدون وجبات لعى وعسا يجيب نتيجة

اشكرك ملاك

[A-Alansari]

ماتشوف شر، وغير اسمك خله بوحديد الحين:nice:

[توشيبا]

طلع دكتور خربوطي بس زين ماطلب ضبان