اللبخة ( الصبخة ) .. للصداع والفتق والتنسيم الفري والجلطات

[بصمة قطرية]

بسم الله الرحمن الرحيم
السلام عليكم ورحمة الله و بركاته

مساكم الله بالخير ..

كنت أشوف الأنستقرام ..
و بالصدفة شفت إعلان من الكويت لجلسات مساج*علاجية
من ضمنها مكتوب شي أول مرة أقراه ..!!
عمل اللبخة ( الصبخة )
لعلاج الصداع والفتق في الرأس و التنسيم ( الفري ) الصداع النصفي ..
العلاج بالمساج الطبيعي بواسطة الصبخة ..

ما عرفت شنو الصبخة ..!!
فتحت يوتيوب و كتبت الصبخه و شفت فيديوهات كثيرة
وهالفيديو من ضمنها ..

من ضمن الأمور اللي ذكرها المعالج إنها تعالجه الجلطات ..
طبعاً الصبخة من الطب الشعبي ..

نزلت الموضوع عشان أستفسر عن هالشي لأني أول مرة أسمع عنه ..

في حد جرب هالعلاج واستفاد منه ..؟
في قطر في حد يسوي هالشي ..؟
يعني لو بغيت أسويه لحصل معالجة شعبية تسويه ..!!؟

أتمنى من الإدارة تخلي الموضوع في الحوار العام فترة
عقب ينقلونه الإستفسارات ..

https://m.youtube.com/watch?v=v4StQu2haEc

[سالم الزهران]

اول مرة اسمع فيها مع العلم اني قد استخدمت السدر على الراس و الحقيقة ان بعض الطب الشعبي عجيبه فوايده


جزاك الله خير

[naklan]

اول مرة اسمع فيها مع العلم اني قد استخدمت السدر على الراس و الحقيقة ان بعض الطب الشعبي عجيبه فوايده


جزاك الله خير

تحمل تحط السدر بيستوي في
رأسك كنار

[سالم الزهران]

تحمل تحط السدر بيستوي في
رأسك كنار
عرف الكنار يا اخ العرب ؟ اني ابيت اللعن لا احفل به خلا ان يكون كانوناً او ما شابه :)

[Dana’1]

حبيبتي اللبخه معروفه وتفيد بإذن الله حسب ماعرفت من أهلنا الاول
خصوصا اذا المعالج ممتاز
هنا اظن تسويها أم حمد بسوق واقف
للأمانه ماقد رحت لها بس يمدحونها والله أعلم

موفقه

[سعود.]

ام حمد ( سوق واقف ) الله يمسيها بالخير

نعم عندها علاج الفري . لرجل تحط صبخة وللحريم ربط الرأس .

جيتها قبل 6 شهور تقريبآ بعد جميع المحاولات لعلاج ولدي الصغير من الربو ( البلغم ) كان عمر ولدي 4 شهور مافية

مكان مارحت له في الدوحة ورحت بعد الرياض مرتين .*

الله ثم علاج ( ام حمد ) بعدها راح البلغم منه نهائيآ . واستغربت ان عندها مرضى من دول الخليج يجونها خصيصآ

[F.A1]

اي معروفه اللبخه ((الصبخه)) ومجربينها عيال عمي وناس من جماعتنا والحمدلله تشافو بعد الله سبحانه
واتوقع ام حمد معروفه بالشي هذا وفيه وحده ثانيه ناسي اسمها بس اتوقع انها في السيلية ساكنه
يمدحوووونها وولد عمي مسوي عندها اللبخه والحمدلله تشافى بعد الله سبحانه وتعالى
ومعروفه اللي في السيلية بالنسبه للنساء لانها تعالج النساء اللي يتأخرون في الحمل بعلاجات نسائيه
وبعد الله سبحانه يحملون مرت اخوي متعالجه عندها والحمدلله رزقها الله بولد بعد الله سبحانه وتعالى ثم هي

اسئلي عنها واكيد بتحصلينها انصحج فيها بصراحه

وعفانا الله وشفانا واياكم
والبسنا والبسكم ثوب العافيه يارب يامشافي يامعافي .

[الماريّة]

اخوي سالم الزهران بعد اذن اخوي نكلان

الكنار هو ثمر شجره السدر وله اسم ثاني النبق

والكنار كلمه قطريه

وبخصوص موضوع اللبخه مدري الصبخه سمعت عنها بس ماقد جربتها

ليش ماتجربين الحنا وايد ززززين لالام الراس يشفط الالم شفاط

والهوا من الراس

[PathFinder]

ارجو من الجميع الحذر من الوقوع في فخ العلاج الشعبي لبعض المعالجين الجهلة، ويدعون ان الرأس مفتوح بعدد الأصابع وبه هواء وأنه سيؤدي به الى الجنون وضمور الدماغ. و يصبح المريض رهنا لهم وينفذ ما يطلبوه بحجة انه اذا توقفت عن العلاج بيصير فيك كذا وكذا والحذر من المواد غير المعروفة التي توضع على الرأس باسم الصبخة. ويبيعونها بأسعار خيالية ويأخذ العلاج عدة أشهر. وأنا استغرب كيف يتم منحهم تراخيص ونحن في عام 2016 دون دليل علمي على نجاح علاجهم. وليس لديهم حتى شهادة الصف الأول.

[سالم الزهران]

اخوي سالم الزهران بعد اذن اخوي نكلان

الكنار هو ثمر شجره السدر وله اسم ثاني النبق

والكنار كلمه قطريه

وبخصوص موضوع اللبخه مدري الصبخه سمعت عنها بس ماقد جربتها

ليش ماتجربين الحنا وايد ززززين لالام الراس يشفط الالم شفاط

والهوا من الراس
اها ، صار النبق هو الكنار ؟ الله يجازيك يا نكلان دايم طلعاته غير . اما بالنسبة للحنا فالحمد لله ما هناك شكوى مستمرة لكن نحتاج تجربة

الطبيب الشعبي اللي يعرف وش يسوي اعتبره بكفاءة الاستشاري ؟ لا احد يستغرب ، لكن العمده على المعرفة لان النصابين كثيرين و يعلنون عن انفسهم .

[ريم الشمال]

كلمة اللبخة معروفة هي اشياء يتم عجنها ثم توضع مكان العوق ( الألم )
الصبخة وش دخلها ؟
الصبخة أرض مالحة غير مثمرة إي لا ينبت فيها نبات بسبب الملوحة .