هبوط أرضيات الملحق بسبب المياه الجوفية،رايكم في آلية الصيانة

[(عبدالله)]

السلام عليكم ورحمة الله
شوركم يا شباب وخاصة أخوي معماري قطر

بيتي الجديد في لعبيب (شمال دحيل) سكنت ولله الحمد من رمضان اللي فات. أول ما حفرنا في البيت عشان أساسات البيسمنت واجهنا المياه الجوفية و الحمدلله حلينا المشكلة بتصريف الماي حتى إتمام عزل طابق بيسمنت كامل بحيث والحمدلله لين اليوم ما واجهت مشكل تذكر.

المشكلة عندي الآن في ارضيات الملاحق.ولأن مافيها عزل من تحت مثل الفيلا جاها هبوط قريب ال10 سم على مدى 3 أشهر السابقة وغالباً بسبب ارتفاع ونزول منسوب المياه الجوفية، فالاجراء اللي سويته طلب شركة المطابخ بيجوني اليوم يفككون المطبخ الخارجي.

لما كلمت الاستشاري قال لي ماله داعي تحط عوازل بيتومين!!

وأشار علي بآلية العمل Scope of Work التالية:

1- حفر غرف الملاحق بعمق أرضي 100 سم من مستوى بلاط الأرضيات.
2- تسوية الأرض المحفورة على مستوى واحد.
3- رش ماء في غرف الملاحق حتى استقرار ووقوف مستوى الماء.
4- انتظار يومين او ثلاث حتى يجف الماء على الجزء الظاهر من الأرض.
5- دك الأرض ليس بالرولر ولكن بالدكاكة.
6- إعادة الدفان حتى 80 سم + دك + واير ميش 1000JJ
7- صب خرسانة 10 سم.
8- إعادة مد بيبات الماء والصرف والكهرباء.
9- رمل واسمنت وتركيب البلاط.

لاحظو قال ماله طداعي نحط عازل، شرايكم ؟

[معماري قطري]

لو بتسوي الشغل هذا كله من رأيي سو عازل لو مب موجود ولو موجود ووضعه زين خلاص

بس ليش إحتياط ما يسوي لك منهول خارجي بين الملحق والبيت ويصرف المياه الجوفية عليه ومنه على الصرف الصحي ( وهو ممنوع بس شتسوي ) الحكومة تقول غرقوا بيوتكم ولا تصرفون على صرفنا البدائي .. شوف يوتيوبيات البناء عارض كيف عمل النظام يسمى فرنش درينج أو دآكت ولو تقدر سوه حول البيت كله حتى يخلي المساحات حول الجدران جافة دوم

الحل معقول بس اطلب الدفان بدون بودرة وحط نايلون قبل الحديد ولو والحديد يكون مرتفع شوي واعتقد قطره 1 سم اللي موصفه لك و 8 ملم كفاية وحتى 6 لكن لو تزيد سمك الخرسانة ل 12 سم أفضل + لا تنسى مقاومة الأرضة في التربة أثناء الدفان .. وجود الحديد قريب من الوسط بيضمن لك تغطية من تحت بخرسانة كفاية وخذ حديد مغلف .. يعني لو عندك سمك 120 ملم للخرسانة خل التغطية للحديد من تحت 40 ملم أو 50 .. هذا بيخلي الحديد يشتغل في الاتجاهين .. يقاوم الانتفاخ ويقاوم الهبوط أكثر لأنه قريب من تحت

لا تنسى الأطراف تنحط فيها بوردات خشب حتى تستوعب ضغط الخرسانة وبعد ما تجف الخرسانة تكشط الطبقة العليا من البورد ونحط نقط من دواء الأرضة حتى بعد ما تطلع في الخشب هذا وتخرب الصبغ والبلاستر وأي خشب وفوق حط ماستك قوي يكون مرن ويستوعب أي تمدد ويغطي عن الأرضة ويحافظ على الدواء داخل

الاستشاري يفترض يكتب كل هذي الملاحظات مع توصيف أدق لكل المواد

الله يوفقك ويعينك شيء محزن والله واحنا قريبين على دخول رمضان .. لو انا مسؤول في الدولة كان حطيت هالتوصيفات هذي ضرورية لكل من يبني خصوصا للبيسمنت والتصريف ضروري لأن الماء مشكلة ويتغير حسب الوقت .. ممكن نحفر والأرض ناشفة لكن ما نضمن بعد أيام شيصير

[معماري قطري]

نسيت ارد السلام وعليكم السلام ورحمة الله وبركاته وسامحوني مندفع

[معماري قطري]

للمطبخ مهم عمل الخرسانة وعمل بلاستر فوقها بعد التمديدات بسلوب بسيط نحو الصرف للغسيل وتقدر تسوي تحت أماكن الكبتات ارتفاع بسيط خرسانة وتلبسها سيراميك حتى وقت الغسيل ما يدخل الماء تحت .. عندك من 5 - 7 سم بس تراعي الارتفاع النهائي للكاونتر ما يكون فوق 92 - 95 حسب راحة المستخدمين

[معماري قطري]

تبغي تخفف على نفسك ممكن حتى ما تحفر لهذا العمق بس بيكون الوضع شوي خطر ومغامرة .. ممكن 50 سم ورش ماء ودفان بدفان غالبيته رمل ولا فيه حجارة حتى تسد الفجوات ويندك عدل وتكمل باقي الخطوات وهذا بيكون أسرع

أعتقد تم عزل الأساسات قبل بالبتومين لذلك الاستشاري يقول ما فيه داعي .. ولو سويت الخرسانة زين بتكون هي الحامل الرئيسي حتى لو تستوي فجوات تحتها ما تهبط بس الحفر ل 100 سم ويفترض أكثر قرب الجدران حتى نمدد بايبات التصريف أفضل

[بوخالد911]

الله يسهلها عليك.

[معماري قطري]

بصفة عامة مشاكل البناء الإنشائية تنحل من التخطيط ومن الأساس .. الحل بعدين صعب ومكلف

مريت مجلس صار له مبني قريب ال 60 سنة وبنيانه الأساسي جيد وتم تجديده كم مرة بس البنيان الزين يدوم .. لا فيه هبوطات ولا فيه شلوخ في الحائط بسبب قلة المونة وضعف الطابوق

لو نتكلم عن بناء مستدام المفروض الجهات المختصة في الحكومة بتلفون بس تجي وتحدد الواقعة ويتم التحقيق بسرعة وتكليف المقاول بالتصليح والا دفع غرامة مضاعفة 10 مرات عن قيمة التصليح .. لو سووا هالشيء الكل بيلتزم خوف من العقاب .. بس بعد لهذا لازم تحديد قوانين لتفاصيل الدفان وطبقاته والصبية فوق وتكون ملزمة ما يركبون الناس بلاط على بودرة تنتفخ وتفش ويسوقون لها عمال ومهندسين ما يدرون شمساوئها

[معماري قطري]

بشر شصار معاك موضوعك مفيد وكنت اتمنى تحط صور للبقية يستفيدون .. انا متخيل الوضع

[(عبدالله)]

السلام عليكم ورحمة الله

وصبحكم الله بالخير جميع

الحمدلله بديت بتنفيذ الصيانة من قبل رمضان ب 10 ايام وانتهيت تقريباً مع نهاية اول أسبوع رمضان

تمت تنفيذ آلية العمل اللي ذكرتها فوق وماحطيت عازل

المفاجأة، لما تم الحفر وإزالة الدفان ووصلنا إلى قطعة البلاستيك اللي كانت تحت الصبية القديمة، استنتجنا إن سبب الهبوط مش من المياه الجوفية
للأسباب التالية:
(1) الأرض كانت جافة وما كان في أي أثر لرطوبة الأرض من قبل.
(2) لما دسنا بالرجل وضربنا بطابوقة نزلت الأرضية يمكن 5-10 سم زيادة.
(3) قواعد الملحق مافيها أي مشكلة والهبوط بس في الأرضيات.

وتيقنا إن السبب الرئيسي للهبوط هو رداءة الدك أثناء بناء الملحق!!

والاستشاري لما رجعت له مازال مصر إن السبب هو المياه الجوفية!!!!!! ويقول وقت البناء المقاول دك جدام عينه 3 مرات!!

المهم، صار اللي صار وقدر الله وما شاء فعل والله يعوض

أثناء الصيانة وبعد ما خليت العمال يدكون (جبت دكاك كبير اللي يقفز Jumping Compactor) وجبت شركة التيسير

وخذوا قراءات ل7 مواقع متفرقة مع عينة من التربة ووقفنا الشغل لين النتيجة بعد 3 أيام مع نتيجة قوة دك بنسب 95 إلى 104%

بعدها استأنفنا الشغل حسب الآلية وانتهينا ولله الحمد

[معماري قطري]

عليكم السلام ورحمة الله وبركاته وصبحك الله بالخير اخوي عبدالله

مشكلة استشاريينا تفتح عيونهم وتحط فيها رمل وتقول هذا رمل يقولون لك لأ دأ يا فندم دهب

بس شوف شغلة بسيطة تسبب وجع راس كبير وكان المفروض المتابعة صح من قبل الاستشاري وكل مرحلة يجي وراها فحص واستلام .. يمكن وجود فجوات بسبب حجارة كبيرة كان السبب لأن حتى لو دك تندك الطبقة العلوية وتبقى السفلية فيها فجوات وتهبط بعد فترة

[الرايــق]

وعليكم السلام ورحمة الله وبركاته

اوكي هو دك الارضية
لكن هل دكها واخذ قراءاتها؟
وهل رش ماء كافي عند الدك،، وما كان زيادة ومتجمع بالتربة من داخل؟
وهل لو اخذ القراءات اخذها صح؟ ( لان كل تربة لازم تروح المختبر ويحللها ويطلع شي يسمونه omc و mmd وعلي اساس هالقيم يدخلها الفني فالجهاز وعليه يسوي الاختبار وكذا يطلع معانا الارقام صحيحة 95-100 والا لو ما ودا العينه المختر بتكون القراءات ما لها دخل بالواقع )

الله يعوض عليك ويوفقك

[الرايــق]

اخوي عندي مقاول اكتشفت سبب الهبوط اللي حصل انه حاط حصا تحت وفوقه رمل ..طبعا الرمل يتغلغل في فراغات الحصي مع الوقت ويحصل الهبوط.. الفكرة ان اسباب كثيرة ممكن تودي للهبوط اللي صار معاك

[معماري قطري]

اخوي عندي مقاول اكتشفت سبب الهبوط اللي حصل انه حاط حصا تحت وفوقه رمل ..طبعا الرمل يتغلغل في فراغات الحصي مع الوقت ويحصل الهبوط.. الفكرة ان اسباب كثيرة ممكن تودي للهبوط اللي صار معاك

أكيد هذا الحاصل ولازم الكل ينتبه لإزالة الحجارة اللي أكبر من 5 سم بشبك الحديد الكبير .. وهذا بعض المقاولين كلش ما تشوفه موجود عندهم

هذي الحجارة الكبيرة يودونها الكسارات ويفرمونها يسونها بودرة طبعاً مع شوية خشب وكشرة وما يسوون لها غسيل لأنها ناعمة جداً .. يبيعونها للي مكذبين عليهم بأنها دفان زين بغالي واللي يدفن بها يحس انها صبية بعد رشها بالماء لكن بعدين من أقل رطوبة تنتفخ وتكسر أقوى خرسانة .. والمشكلة الثانية تطلع فيها الأرضة وتاكل خشب وبلاستر وخرسانات البيت بالتدريج

الحجارة الكبيرة ناتج الحفر لو نقدر نحافظ عليها ونستعملها لديكور الحديقة أو لأماكن ما تمر عليها سيارات وندفن حولها بعناية ممكن

[معماري قطري]

مجلس واحد من الشباب جديد ما صار له 10 سنين لكن الأرضة كلت الخشب واستوت حشرات كبيرة تطير وتزعج الناس